Na Thei Lo Asile Miih Thu Cawng HLah

Na Thei Lo Asile Miih Thu Cawng HLah

Hlan deuh ah khan reverends, pastors le rawngbawltu lawng kaitheihnak training a um. Cui seminar ah mi tamzet Pathian hnaṭuantu an kai. Thusimthiam zet zirhtu pakhat cun thuzirhnak le thusimnak a nei ringring. Nikhat cu seminar cemnak lam a si thlang ruangah a thusim ngaitu an tam zet. Mipi in a thusimmi mitṭhep lo ih an zoh lai ah hitin a sim, “Ka leitlun nun ih nuam ka ti bikmi pakhat cu kan Nu silo nunau pakhat thawi kan um tlang lai caan kha a si” a ti.

Mipipawl an mang a bang tuk!

Cule hitin a thusim cu a peh, “Cui nunau cu ka duhdawtmi ka nu a si!”

Mipipawl cu an hnih a suak tukih an hni rero, thusimthiam an ti tukih nuam an ti zet.

Zarh hnihkhat a rei hnuah cui seminar rak kai vetu rawngbawltu pakhat cun cui a hnihsuak saimi cu a sermon ih hman ve tengteng a duh. Nikhat cu a kawhhran ih zarhpi sun thusimnakah cui hnihsuak sai ve dingin a thinlungah a um. Malte cu a thiam aw lo deuh.

Mic. cu a hi naih ih ring zetin hitin a sim, “ka nunakih nuam ka ti bikmi pakhat cu ka nu silo nunau pakhat thawi kan um tlanglai can kha a si” ti’n a sim ve.

Mipi cu an lau phah nawnih an phun murmo.

Seconds 10 hrawng a din hnuah cui hnihsuak peh kha a thei nawn lo, a hngilh. Cui pastor cun rel ding a thei nawn lo ih a netnakah “…cu nu cu zo a si ti ka mang ciah nawn lo” a ti.

Thuanthu Ihsin Zirmi: Miih umdan, tidan kha kan tuah theilomi asilole kan ti theilomi a si ahcun cawn lo a ṭha bik.

Source: Knowledge Publisher