Lunglutza Bochuk Aung San Ih Duhdawtnak Lamtluan

Nikhat cu Kawlram zalennak pa tiih theihlarmi Bochuk Aung San ih thuhlapawl ka siar, ka zoh phah rero ih lunglutza a lungduh thawi an thuanthupawl tla ka siar ngah. Aung San ih thu hi mi tampi cun kan thei thluhnan hi a duhdawtnak lamtluan thuhla te cu a thei kan mal men ding. Ṭin Maung ih rak nganmi thuanthu tawi, Mr. Suzuki in Japan ṭongih a nganmi duhdawtnak thu, le a nupi Khin Kyi (Suh Kyi nu) thawi an thuhlapawl tla an siih lunglut za ngaingai a si.

Cung-Ma-Nge Khua ih Mah Yin Aye

Aung San a nunlamtluan ih a hmuhton hmaisabikmi lengdawh cu Cung-Ma-Nge timi khuaih leiram neitu milian pai fanu Mah Yin Aye timi nu a si. Culai ah Aung San cu mizaran te a rak si. Cunu thawi an thuhla rak thok saktu, an tirhfung cu Khin Maung Tin a si. Yin Aye ih zukpawl cu Aung San a hmuh hleiah an inn tiang a hruai thlengtu a si. Culaiah Rampi zalennak hrang ziangtin kan sual ding tiih buai rerotu Aung San cun ‘aw’ khal ti lo ‘ai’ khal ti cuanglo in a rak um. Lehhnu deuh Aung San in zalennak ngah ding a zuam rero laiah paisa zathum tla a rak hlu dah. Paisa a rak hlu dah ruangah maw cu thei hlah, Aung San Japan ihsin a ra tlun sal ahcun Ṭin Maung ih rak thawhsakmi thuanthu te cu khatin a cemral ta.

Japan Lengdawh Ayeih-Kawsan

Japan ramih ralthiamnak zirih an um laiah Aung San ih thinlung, ling bangih rak hnintertu lengdawh nonal Ayeih-Kawsan timi fala nute a rak um. Ralthiamnak zirpawl tuamhlawmtu dingih retmi fala pahnih lakah Ayeih-Kawsan cu Aung San thawn an nel aw zetih tlangval pakhat a si vemi Aung San ih thinlungah duhdawtnak in hmun a khuar ṭan ve. Ralthiamnak a zirpi rualpipawl, Japan sayapawl khalin an capoh ṭheu. Aung San in cui Japan lengdawh te cu a duhdawt zia sim a tum ṭheu nan a thinlung a neh salih a sim lo. Lehhnu ahcun a saya khal si thotho, a rualpi khal si thotho Minami tiih kawhmi Mr Suzuki  cu Japan ṭongin fala cakuat ngan a rak fial. Cakuat pek rori a tum nan thinlung ih duhnak hnakin khua le ram hrang sawn ruattu le thupittu Aung San cun ca khal pe hlah, sim khal sim hlah, a ṭhulh sal. Thuanthu vek asile Japan Lengdawh Ayeih-Kawsan cu Aung San ih Sentecai a si kan ti thei ko, a lung rak turtertu le luahkhattu lengdawh hmaisabik a si.

Nurse sayamah Khin-Kyi

Aung San sizung a kai. Culai ah Khin-Kyi (Suhkyi nu) cu cui sizungih Nurse sayamah a rak si. Aung San in ziangtik lai ciah ah a rak duh ticu fiangfel ih theih a si lo. Asinan Aung San ih fala ngiardan tivek cu a mak thei zet. Sii ei a ṭul tikah Khin-Kyi siarlo zovek hmanin sii an tul thei lo, Khin-Kyi ih a pek lawngah sii a ei duh. A fala len dan tla cu hnihsuak a um zet. Violin tum thiam Dr. Myint Shwe cu Khin-Kyi tei inn len a sawm. Khin-Kyi tei inn cu an va leng ngaingai, rei hman an ṭong man hlanah Khin-Kyi cu hlasah a fial. Khin Kyi cu umngaihnak a thei nawn lo, ningzak cingten hla cu a sak hnelhno. Cui caanah Aung San cu kum 27 a siih Khin Kyi cu 31 a si. Duhnak thu a simdan le neihawk ding a sawmdan tla cu a mak ngaingai. Danglam deuh le dangdai deuh ih tuahmi khal zianghman um hlah. A hmaisabik ah rawl ei a sawm, a tlun lamah neihawk a sawm cih. Bochuk Aung San vek mi tlaitluang le mi zaidam, mi fimthiam le mi ṭha, rampi hruaitu pakhat ih dilnak cu Khin-Kyi khalin el nak ding thazang a nei lo a si bik. Pathian ih samhrihsihmi kan ti pei cu, Aung San khal tuanten nupi a nei.

Hminsin: Minung hminpawl khi theih-awlnak dingah tin Lai in ka ngan.

Source: www.akhyar.com