Nu cu Vancungmi

Nu Cu Vancungmi

Hi thuanthu hi ka nauhakte lai ihsin a rak thawkmi a si. Kei cu leitlun ih ramharsa le rethei zet an timi ih um ka si bangin a farah zetmi insang ih ṭhanglian ka si. Ni khat ei ding, ni khat hawl dinhmun kan si tikah ei ding umlocan tla a um zuakzo ṭheu. Rawl ei can a kim tinten ka Nu in ka pakan ah a ei ding buh cu i rak pe ringring. Cule “Ka fa, hihi ei aw. Kei ka ril a rawng lo”, i rak ti ṭheu. Himi hi ka Nu ih hmaisabik i bumnak a si.

Malte ka hung upa deuh tikah ka Nu cu kan inn thawn a naihnak tiva ah feh in nga a hawl. A ngah sun nga tetepawl cu ka taksa a puitlin theinak dingah hanghnah hangrah thawn thawn zetin in suan sak. Rawl ei can a kim tikah thawn zetin ka Nui suanmi nga cu ka ei. Ka Nu cu ka kiang te ah a to ve ringringih nga-ruh a siatnak lawnglawng a ei ka hmuh tikah ka thinlung a nuam lo zet. Cuveten a dang nga, a thaw bik ding ka timi cu ka Nu ka pe cih, asinan i el cih ve, cule “Ka fa hihi ei aw, kei nga cu ka duh tuk lemlo”. Hihi ka Nu ih a vawi 2 in bumnak a si.

Phunhra tlawng ka kai tikah ka Nu cu kan ṭulsammi zia deuh dingin umhmun hnaṭuan thiamtah ih paisa ngah dan tete a hawl ih zan tlaipipi tiang a hnaṭuan thiam cu a tah ṭheu. Thla-tang khawzik caanah zankhat cu ka ṭhanghawi. Ka hmuh dah kello kan inn sungih meisa tleu cu ka mang a si pei maw tin mangbang zetin ka mit ka nuai. Ka zoh tikah ka Nu cu mei-in vangin thiam a rak tah rero lai. Cutikah ka Nu “It thlang aw, a tlai thlang, thaisun tla na hnaṭuan hrang zing na thawh a ṭul ding” ka ti. Ka Nu cu a hni ih hitin i let “Ka fa it aw, ka bang lo pi”. Hihi ka Nu in a vawi 3 in bumnak a si. 

Phunhra camibuai kan tuah tikah ka Nu cu a hnaṭuan hmuahhmuah tan in ka hrangah a caan zaten a pe. Sun nisa khengling lakah ka Nu cu ti ṭenṭi ten nahzi ziangmawzat sung cu a lengin in rak hngak. Tlawng dar khal a rung awn cuarco thlangih tlawngta zaten kan suak phungpho. Ka Nu cu a leng ihsin in rak hngakih kan tawnawk veten in pawmih ka hrangih i rak tuahsakmi tidai-thlum zetmi i rak pe. Cui tidai thlum thaw zetmi cun ka Nui duhdawtnak cu a tluk hrimhrim lo. Ka Nu cu a thlanpawl a luang ka hmuh tikah tidai in sal ve dingin ka pe ve sal. Ka Nu in, “ Ka fa, in aw. Kei ka ti a hal lo pi”. Hikhal ka nu ih a vawi 4 in bumnak thotho a si.

Vansiatnak ah ka pa in damlonak ruangih in tansan tikah mi harsa ka Nu cu insang pa dinhmun a kaih a ṭul thlang. A hnaṭuan le thiamtah cu theitawkin a zuam. Kan ṭulsammi tete le a tam si, ka pa le a um nawn lo tikah kan nun cu a hlan hnakin a harsa vivo. Culai ah kan inkiang ih tlangval-upa tuakzet pakhat in kan dinhmun a hmuh tikah in zangfah zetih kan tawnmi ziangkim a tum a te, a har a awl in in ra bawm.

A harsa zetmi le vansia, nuhmei insang te a hmu ringringtu kan innhnen tlangval-upa pa cun ka Nu cu nei dingin a ra bia (in zangfah zet ruangah). Asinan milungruh ka Nu cun an thurawnpawl cu a rak hnawl ṭheh. Hitin a rak let, “ Kei Duhdawtnak timi ka ṭul lo”. Hihi ka Nu ih a vawi 5 in bumnak a si.

Tlawngkai tla ka ṭheh ve thlangih hnaṭuan tla ka hawl rero thlang. Hican ahcun ka nu cu a tar deuh thlang tikah hna tla a ṭuan thei tuk nawn lo. Asinan cawlh-ummen cu a duh cuanglo ih innkiang ih a ciinmi hanghnah hangrah tete tla zuarin theitawk a ṭulmi tete hrang a zuam. Khawpi dangih um kei in ka Nu cu a ṭulmi hrangah tin paisa ka kuat ringring nan mi lungruh ka Nu cun a duh cuang lo, i kuat kir sal ṭheu. “Keimah ten paisa ka nei ko, kuat ka ṭul lo” i ti ringring. Hihi ka Nu ih a vawi 6 in bumnak a si thlang.

Yangon ih Bachelor Degree ka ṭheh hnuah Philippines ah Master Degree kai dingin ka feh. Pathian zarah ziangkim hi a rak remcang thluh ih Master tla ka ṭheh suak. Neta ahcun hnaṭuan tla ka hawlih company ah hnaṭuan ka nei. Lakkha tla awmang tawkte ka ngah. Ka Nu tla, hi ramih a um le nuam a ti tuk ve ding ti ruahsannak tampi ka nei. Asinan ka duhdawtzetmi ka Nu cun a fapa hnai-hnawk ding cu a siang hrimhrim lo, hitin i sim, “ ka Fa, hitawkih um hi nuam ka ti”. Hihi ka Nu in a vawi 7 in bumnak a si.

Ka Nu cu a tar vivo tikah vansiat ah cancer a nei ih sizung ah fehpi a si. Hmunhla ih a ummi kei in cui thu ka theih veten a rang thei bikin ka Nui umnak pan in ka tlung. Thazang a nei nawnlo ti theihtheih fahranin a rak itmi ka Nu cu sizung ihkhun parte ah ka va hmu. Nu-tar hmel a pu tuk zomi ka Nu cun a thuk zetmi duhdawtnak mit thawn i hun zoh tum. A natnak ruangah a cau zet cingtein a mithmai pante cu suah tumin ka lam a ra her. Natnak in ka Nui taksa le thinlung cu a rak siatsuah tukzo a si ti cu a thazang a neih lo dan le a ṭawl danin ka thei cih. Ka biangin mitthli cu a rung luang ih…ka Nu….aw…ka Nu…(ka aw khal a suak thei lo). Hi dinhmun ih a ummi ka Nu ka hmuh tikah ka thinlung cu a kekkuai thluh zik, a alh in a puakkuai thluh zikin ka thei. Asinan ka Nu cun a thazang neih hmuahhmuah suah in, “Ka fa, ṭap hlah, ka duhdawtbikmi ka fa, ṭap hlah aw! Ka na lo pi.” Himi hi ka Nu in a vawi 8 in bumnak a si.

 

A vawi (8) in bumnak a rel ṭheh veten, ka duhdawtbikmi ka Nu cu a mit a sing, kumkhuain.

Kan lakih a ummi Vangcungmi cu Nu hi a si.

Curuangah mirangpawlin hitin an sim.

·        “M” is for the million things she gave me

·        “O” means only that she’s growing old

·        “T” is for the tears she shed to save me

·        “H” is for her heart of purest gold

·        “E” is for her eyes, with love-light shining

·        “R” means right, and right she’ll always be

Kan zaten Nu timi cafang hi kan sunlawih pei uh, hihi leitlun ih in umtertu le kan thazang a si. Tufangah Nu ti ding neilaipawl ziangtluk mi vanṭha so kan si!

Source: Knowledge Publisher