Zisui Suahkehnak ih Nunau Pali

Zisui Suahkehnak ih Nunau Pali

(Matthai 1:1-25), Thufim 31

Sermon by: 

Flora Biak Za Mawi

Matthai bung 1 pumpi kan siar asile Zisui suahkehnak thu cithlahawkdan a si. Abraham ih san ihsin a fapa Isak, Isak ih fapa Jakob tin Zisu a rung thlen tiang ngan a si. Hi cihthlahawknak thu ah mipa hmin lawnglawng a lang rero nan danglam zetin nunau pali a sim cihmi kan hmu thei. Cupawl cu Tamar, Bathsheba, Rahap, le Ruth pawl an si. Rahap le Ruth hi Gentile miphun an siih Tamar le Bathsheba hi Judah miphun an si. Curuangah Zisu cu Judah le Gentile miphun a si tinak tluk a si. Rahap hi hlawhhlang a si tin (Joshua 2:25) ah in sim. Tamar le Bathsheba khal an ui-re ti cu Semtirnak 38, le 2 Sam. 11:1 ah kan hmu thei. Ruth lawngte hi nunau fel a si. Hi nunau pali hi Ruth siarlo cu hlawhhlang le ui-re an si ko nan a thupi zetmi Zisui suahkehnak ah ziangah an lang ve si pei. An nun ihsin zir dingmi tete run rel ka duh.

Rahap

Rahap ih thu hi Joshua 2-6 ah kan hmu thei. Israel pawl kum 40 sung sal an tannak ihsin Kanan ram thleng dingih an feh laiah Jericho khawpi neh ta tengteng a ṭul. Khai Israel pawlih nehnak ah a thupibik cu Rahap a si. Zo hmanih an duhlomi le an hnonmi hlawhhlang Rahap nun ihsin zir ding kan nei.

a.     Mibum cu sual a si ringring ko. Mi tampi cun Rahap ih mibumnak ruangah Israel pawl nehnak an hmuh ruangah mibun hi a ṭhatnak lai a um, asilole thuphan var per cu a poi lo tin an sim. Asinan mibum pohpoh cu sual a si ringring ko. Rahap kha mi a bumnak ruangah a luat a si lo ih a zumnak ruangah a si tin Hebru 11  ah kan hmu. Pathian hmaiah mibum cu cohlan theihlomi thil a si ticu Thufim 12:22, 6:17 ah kan hmu thei.

b.     Pathian in ngaithiam thei lo a nei lo. Kan sualnak, kan harsatnak le mangbangnak hnakin Pathian duhdawtnak hi a tum sawn ringring. Rahap hi a hlanah ziangvekin rak nung hman sehla Israel pawl runsuahnak le an nehnak hrangih mi thupibik ah Pathian in a hmang thotho. Hebru bung 11 sungah tla cun nunau lakah Rahap le Sarah ih hming lawng a lang.

Siar bet

Thlarau ih hruaimipawl cu daan ih ukmi an si nawn lo (Gal. 5:18).

By: Rev. Amos Thang

“Daan cu thlarau lamih thil a si ti kan thei. Asinan kei cu tisami ka siih sualnak sal si dingah zuarmi ka si” (Rom 7:14).  Hi Bible cang kalh aw zikzik a bang nan daan ih kaihruainak hnuai ih kan um lai ah thihnak leiba nei kan si a lang ter (Rom 3:20). Galati cakuat rengreng hin a tumtah bikmi cu minung daan thlunnak ruangih thiam kan co thei lo zia a simih Pathian zangfahnak lawngin thiamcotermi kan si ti a sim. Daan hi thianghlim hman sehla tisami kan siih sual salih zuarmi kan si ruangah kan mizia thawn a kalh aw a si. Sihmansehla Pathian zangfahnak ruangah daan loin Pathian felnak kan co. Cathianghlim in “Zumnak ruangih Pathian thiamcotermi lawng an nung ding” (Gal. 3:11) a ti ruangah daan thlunakin zohmanin thiamcoter an si lo ding ti a fiang.

Daan hi thlarau lam thil rak si hmansehla tisami, sualpu taksa, sualsalih zuarmi kan hrangah cun, Pathian mizia a simi daan thianghlim cu kan nun thawn a kalh aw lellel. Cuti asinan Pathian in Khrih thihnak hmangin kan sual in ngaithiam ih cui tlunah a mai mizia kan neihsal theinak dingah a thlarau in run pe. Cui thlarau Thianghlim le kan thlarau a peh awk tikah, a mah ih nun thar kan nei. Khrih ih nun Thlarau Thianghlim hmangih kan co hnuah nun pahnih kan nei. Kan pianpi sualpu taksa Pathian in Kross ah in khenbeh sak zo ih, asinan kan mai nun ahcun a Thlarau Thianghlim hmangih nitin kan nunih sual um, do neh ih nun vivo hi Pathian ih tumtahmi a si.

Kan thulu ah Thlarau ih hruaimipawl cu daan ih ukmi an sin nawn lo ti a si. Asile zumtu ka si hnuah daan hi a sual maw si? Sual lo ve. Milai zo vek khal sungnung thlarau nei lo ih minung hlun thaw lawngih daan thluntum tupawl cu, an mahte ramri an ṭhenih minung mithmai ih a ṭhami tiang lawng an tuah. Cupawl nun in Pathian a ti lungawi dah lo. Thlarau ih uk mi pawl cun minung mit hmuh lawngah si lo in an mah ih um Pathian Thlarau duh zawng in an nung sawn. Thlarau ih hruaimi pawl cu Ezk 36:27 ih a sim vekin “nan sungah ka thlarau ka khum dingih ka daan nan thlun thei ding” a ti. Cui Thlarau ih ukmipawl hrangah daan hi, an sunglam nun an mizia diktak ih Pathian pekmi ti a si an thei. A daan in ukloin Thlarau sawnin a uk ih cutin thil pakhat khat an tuah tikah Pathian mithmai zoh in Pathian duhzawngih nun theinak an nei.

Daan ih ukmipawl cu daan hnuaiah tlansuahnak an hawl ih, cuhleiah daan ih umlomi, Bible cangan ih a cekci ih nganlomi cu pawi lo ah an ruat. Ṭimnakah (Kuak fawp hlah, kuva ei hlah, na pumna damnak zu malte in aw) tivek hi sualtuah ngamnak ah an hmang. Thlarau ih ukmipawl cun Pathian fate ih tuah dingih mawi le mawilo tisa daan le Thlarau daan thleidan thiamnak a pekih, cutin Pathian duh zawngin an nung sawn a si. Cumi um zia cu an nun uktu dingah an sung nung Pathian pekmi thlarau duhdan an thlun sawn.

Siar bet

Tisa duhnak le Thlarau duhnak an ral aw (Gal. 5:17)

By: Rev. Amos Thang

Leitlun mifimpawl le ralthiam pawlin do harsa bikih an theihmi cu sunglam ral a si. Ralkap burpi lakah mi lamṭang an rak um pang khi ral sunnak thlentertu a si. Cuvekin zumtu nunah Pathian duhzawngih kan nun theilonak bik cu kan sungih minung hlun (Old nature), tisa duhnak, suahkeh sualih kan neihmi hi a si.

Hi suahkeh sual minung hlun hi zumtu kan si ni in hlo mai sehla a duh um zet nan, cucu hlo ter mai loin a do nehnak dingah a thlarau in pe sawnih, cutin nehman laksawng in pe ding a si. Amai zangfahnak ruangah kan sungah thlarau a nun terih cumi hmangin sual doral nehtheitu ah in tuah. “Desiring God” timi ca sungah “hi nun pahnih do aw hi a harzetmi tuah in fialmi siloin, kan mai duhdan ih fehloin, thlarau sawnah nungin Pathian duhdanih kekar dingin, in duh sawn ruangah a si” a ti. Kan taksa sungih daan danglam um, minung hlun sualnak daan hi kan taksa sualnak daan hnuaiih in hruailuttu a si ti theihfiang a poimawh tuk (Rom 7:23). Himi theifiang tu cun lenglam mi hmuhnak lawng buaipi nawn loin an mai sungih sual donak cang an thiam.

David Schnarch cun “zokhal, an mah le mah kilkhawi aw (control) aw thei lo cu kiangkap mipi khal an kilkhawi (control) thei lo” a ti (Ref: psychologytoday.com). Kan Bible cun kum 2000 liam zo ah minung hi amah le mah donehnak dingah bawmtu Thlarau Thianghlim a ṭul thu a ngan zo ih, zumtu zaten cui thlarau hmangin kan nunih sual um do neh in, nu le pai nunsim theih lo le cozah hmanin thawnginn sung a khumih do neh theilomi, do neh theinak in pekmi co ngahtupawl cu, mangbangza in Pathian hmanrua ah an taksa a hung cang sawn.

Setan hnen ihsin kan ngahmi nun hi, Pathian in a Thlarau Thianghlim hmangin nitin ti mualpho ih neh vivo a duh ruangah, hi minung hlun tisa daan le thlarau daan, a kawpin in nuntlangternak a si. Himi pahnih hi duhdan bangawlo kalh aw rori an siih Watchman Nee cun “rawl pek puar sawn mimi in an neh” a ti. Tisa rawl cu leitlun caknak le Pathian duhlo zawng hiarhalnak hmuahhmuah hi a si. Thlarau rawl cu Pathian Bible Ca Thianghlim a siih nitin khuimi sawnin kan nunnak a luah tam deuh ti mahten kan ṭhencat aw ding.

Hi tisa duhnak le thlarau dokalh aw kan sungih ummi hin buainak le phurrit in thlen ṭheu hmansehla, Rebekka  ih pum sungih miphun phun hnih um a U sawnin a nau ih rawng a bawl ding ti thupawl Pathian hnen ihsin a don veten, pumsung ih nau sual aw bang lo hman hai sehla, a buainak a reh vekin, Pathian in nitin nehtu si ter in duh ti theifiangtu cun Pathian hnenih lungawi thusim theinak a suak sal sawn a si. Kan nunih sual um in do neh sakih a sunlawinak in hmuh tertu Pathian thangṭhat in um seh.

Siar bet

Thlarau ih ukmi in tisa duhnak a di an riamter lo (Gal. 5:16)

By: Rev. Amos Thang

A hmaisa in tisa duhnak diriam ter lonak dingah, tisa cu ziang a si ti theih a ṭul. Mirangin flesh cu tit (ruh tello) khi a sim duhmi asinan Protestant pawlih reldan ahcun Bible ih tisa (flesh) a timi cu suahkeh sual (sin nature) a si (Ref: http://blog.adw.org 2011-2013) tin kan hmu thei.

Paul in tisa duhnak  lole hiarnak diriam terlo a ti tikah, nitin ih kan nun ih ummi tisa daan sual a sim duh. Kiangkap rualpi sualnak ih in hnaihnok ruangih sual siloin, kan suahkeh ih kan neihmi sual hi a sim duhmi a si. Reform pa a si vemi Scotland ih John Knox khalin “suahkeh sual hi Adam ihsin ro kan comi sual a si” a ti. Ziangtlukin bulpak sungih tisa le thlarau doawknak hi a har ticu zumtu cun kan thei cio ding. Kross thihnak lawngin neh theih a si. Minung hin a mai pianpi ṭhatnak a neihmi hman hi ramri nei, tlintawk nei a si. A tlin lo cinah cui tisa rah cu a puakin a puak kuai sawn ṭheu. Curuangah kan ṭhatnak lengih Khrih ih nun Thlarau Thianghlim hmangin, kan sungih a nun hnu lawngah tisa duhnak pohpoh a di riamter loin kan um thei.

Tisa duhnak a diriam tertupawlih nunah lungawinak kan hmu dah lo. David in Uriah nupi a hahionak, a mitcaknak a ti pitlin ruangah a nunah buainak tumpi a thlen, a khua a har, a fatepawl ruangah thlaphannak le ṭahnak a tong, a cituhrahsengmi tampi hi veikhat tisaduhnak diriamter ruangih thilthleng an si. A rapthlak zia kan nunih zir dingah Bawipa in in hmuhsakmi a si.

Zirhnak 1 nak ih kan tarlang zo vekin thlarau ih ukmi cun an taksa in sualnak an tuah lo ih, an sungih tisa duhnak ummi kha Kross ih thah zomi a si ti thei in an thih san sawn. Lei dam sungah tisa duhnak diriamtertu zohman, mi nunhlim le thawveng zetih thlawsuah dawng an um dah lo. Cuhnakin an nun a tawi, an sualnakin an mah ah phuhrunawknak a pekih, mithmai le thinlung damlo zetin damsung nun an hmang ṭheu. Thlarau ih ukmi cu duhdawtnak, thlarau ihsin a suakmi lungawinakin an khat. Hi thuthup theingahtu pawlin Khrih in sualsal ihsin in luatternak cu, lungawi zetin an nunpi. Tisa duhnak diriam ternak hi sunglam ral ṭihnungbik a si ti an theih ruangah tisa duhnak di an riam ter nawn lo.

Siar bet

Thlaraumi sitheinak dingah ziang tuah a ṭul?

By: Rev. Amos Thang

Hi thu theihṭul zet hi Crusade le Camping tuahnak hmun le Khristian nun zirnak I piangah ka sut ṭheu. Hrekkhatin, thla kan cam a ṭul, ṭonghriatlo kan ngah a ṭul, a hrekin sual kan do neh a ṭul, daan kan thlun a ṭul tivekin an sang ṭheu.

Hi Galati cakuat hi a sannak ṭhabik a si ti theih a si. Ziangahtile Judah biaknak daan kengkawhtupawl Khristian lakah ra lutin Pathian mi, thlaraumi nan si theinak dingah vunzim nan tan a ṭulih, ei thianglo le serh le sang nan hman a ṭul ve tipawl an ra zirh ruangah, Paulin cupawl cu: hi Galati bu ahhin simfiangnak a nei. Kan ramih thlaraumi kan timi bangawlo celcel lakah, thil dang tanin serh le sang hmangin thlaraumi a si theih lo th le daanthlunnakin, thlaraumi in si ter thei lo zia kan zoh ta hnik pei.

“Hi thil hi I simfiang hnikuh: Pathian thlarau nan co hi, daan ih a lo fialmi nan tuah ruangah maw? asilole thuthangṭha nan theihnak le nan riannak ruangin so nan ngah? A hramthok ah thlarauin nan thokih a netnakah nan mai cahnakin nan cemter ding maw si? (Gal. 3:2-3). Hi thu kan zoh tikah daan thlun ruangih thlaraumi silam siloin Pathian thuthangṭha ngainakin a si ti a fiang. A thoknak ih thlarau ih thawk cia a si ruangah, cui thlarau cu kan nun netnak tiang khal thlarauin in kaihruai in, in uk ding a si. Kan mai thilti thei ruangah siloin thlarau ih kaihhruai uknak ruangin thlaraumi kan si thei. Thlaraumi kan timi cu thlarau ih ukmi tinak a si (Control by the holy spirit).

Serhtannak le serh le sang dang kan phut awkmi khal hi Khrih hnen ihsin in pialtertu, Khrih duhdawt zangfahnak lenglam in thlentertu sawn a si. Cumi cun salah in hruai lut sal ti thu Galati 5:1-4 ah fiangten in sim.  Asile tulai kan ramih thlaraumi tiaw pawlin cu tiih nan um le nan thi ding ti maw, ran thisen nan hlan a ṭul ti maw, nan inn na thenhlim a ṭul tipawl, thlarau lamah buainak thlentheitu, tampi Bible ih umlo an rel ṭheumi hin, na lung a lo hnok ter ve maw? Hibangpawl hi Paul sanlai ihsin Galati pawl serh le sang ih runluhpitu, salih hruai lut saltu vek an si kan ti lo thei lo.

Thlaraumi si ding cun Pathian in kan sungah a thlarau a khumih, kan nun si dingah Amai thlarau le kan thlarau a run peh zawm (Rom 8:15-16). Cui hnuah a thu hi kan thu, a dan hi kan dan si ve in, a duh zawng ih nun hi, nuam kan ti bikmi ah a rung cang. Cui hnu cun Bible hi kan  thlarau rawl a si ih, Pathian thu in kan nitin nunhlun sual in khen behsak hnuah lam zin dik in khihhmuh ih, a mai tleunak sungah in hruai. A thu hmang in, thlarau thianghlim in kan sunglamin in uk (control) ih cutin thlarau mi ah kan cang.

Siar bet

Nun Lungawinak

Thupi: Nun Lungawinak

Filipi 4:4

Leitlun minung zate in leitlun kan dam sungah nun pakhat te lawng kan nei. Kan nun sungih kan can theimi zuknung ngai umsun khal tui kan nun lawng hi a si fawn. Cumi ah a thupi bik cu nun lungawinak na nei maw? Zumtu ni tin kan nun ah nun lungawi kan si theinak dingah hi ca hin a lo bawm ding ti ruahsannak ka nei. Nitin kan nunih lungawinak a um theinak dingah:

Midang Thawn Tahṭhim aw hlah!

Zozo khal nanmah ih ziaza cio parah thuṭen aw ding nan si.

A ṭha asile midang ih nundan thawn

tahṭhimawk ṭul rero loin

nanmah ten nan lung a hmui ding (Galati 6:4)

Nang cu zothaw hman tahṭhim theih lo dingin danglam le hleice zetin Pathian ih lo sersiammi na si. Leitlun minung million 6 lenglo lakah zohman thawi bangaw lo dingin danglam le hleice zetin Pathian ih lo sersiammi na si. Na kiangkap na innhnen an hlawhtlinnak menin na nun lo ti buai hlah seh. Na innhnen, na rualpi le na kiangkappawlih hlawhtlin dan vek ciah ih hlawhtling dingin Pathian in a lo sersiam lo. Nang cu hleice le danglam zetih sersiammi na si bangin hlawhtlinnak danglamzet Pathian in lo pek a duh a si. Midang an hlawhtlin ruangah na nun buai hlah seh, Pathian ih mi hleice na si kha mang ringring aw. Midang an hlawhtlin ruangah vanse cuangih ruatawk ding a si lo ih midang an tlaksiat ruangah vanṭha cuang ih ruat awk ding khal a si lo. Nang cu nang na siih Pathian ih minung, Pathian kilvennak hnuaiih um na si. Miih umdan poh ih um ding le miih thucawngih um ding menih sersiammi khal na si lo.

Siar bet

Tlansanmi Na Si Lo, Umpimi Na Si!

“Zianghman ṭih hlah, na hnenah ka um a si.

Keimah cu na Pathian ka si, zianghmanin lo phang ter hlah seh.

Ka lo bawm dingih ka lo cakter ding;

Ka lo hum dingih ka lo run ding”

(Isaiah 41:10)

Minung kan nunah ‘keimah lawng ka si’ asilole ‘umpitu ka nei lo’ tiih ruahawknak hin kan thla in phang ter, kan thin in nau terih kan bei inti dawng ringring. Na rualpi lakah nangmah lawng cathiam lo ih na ruahawk a sile na beidawng a luar dingih na inhnen lakah nangmah lawng farah le hlawhtling lo ih na theihawk a si ahcun na tha a nau sinsin ding. Leitlunah mahlawng si cu bei a dawng duh zet, ning khal ṭih duh zetih thla khal a phang awl zet. Asinan zumtupawl kan van a ṭhat hleicenak cu umpi ringringtu Pathian kan neih hi a si. Ziangtlukin leitlun ah farah rethei le harsa in um khal sehla umpitu kan neih sungah cun kan bei a dawng dah lo.

Na rualpi lakah mawṭaw mankhung zet to theilotu le farah deuh an um hnuaihni ve tikah na hna a vun ngam deuh a si lo sawm? Na rualpi za lakah Degree sangpipi ngahlo an rak um ve tikah na ning a zak nawn lemlo a si lo sawm? Tlasam le hlawhsam thei ve zetzet na kiangkapih an um cun thinhar le thin bang khal a vun dem deuh a si lo sawm? Catloih Pathian ih umpimi ho khaw na si. Ṭih hlah, phang hlah. Lei le van tuahtu in sun le zan itthat loin na hnenah a lo umpi ringring. Na feh tikah na dung, na hmai, na sirih lo umpitu na nei hokhaw. Anih cun na tluk caan le a lo tho dingih zin na hloh caan ah Arsi bangin hmai a lo hruai ding.

Na ṭah ruangah Pathian in a lo umpi lo a si lo ih na tlaksiat ruangah Pathian in a lo tlansan dah fawn lo. Harsat na tuar ruangah Pathian in a lo dungtun dah lo ih na mitthli a tlak laiah a lo feh san dah fawn lo. Zan khua a thim sinsin tikah Arsi le Thlaipi ih tleunak a fiang sinsin a si lo sawm? Na nun a thim ih a pit sinsin a si ahcun Pathian ih duhdawt zangfahnak le sunlawihnak na nunah a lang fiang sinsin ding tinak a si cu. Ziangahtile nang cu tlansanmi na silo ih umpi mi na si.

Pathian hin mithli tlaknak umlonak zinin a lo fehpi thei tuk nan na mithli tla hnul kherkher a duh, a lo umpi zia na theihfiang sinsin nak dingah. Zuun ngai lungleng ih na um canah a thuthawi hnangamnak na neih a duh.

Pathian hin a lo umpi men asilo ih lo bawm le lo cah ter sin a duh. Na hlawhtlin le ṭhanlen thei nak dingah na hmaiih a retmi harsatnak kha na ṭih ding a lo siang lo ih na thlanphan khal a lo siang lo. A tlunih kan tarmi Bible cangah Pathian in ziang a lo ti, “zianghman ṭih hlah, na hnenah ka um a si. Keimah cu na Pathian ka si, zianghmanin lo phang ter hlah seh. Ka lo bawm dingih ka lo cakter ding; Ka lo hum dingih ka lo run ding” a lo ti a si kha! Ziangtluk hnangam um saw a si.

Leitlun na khualtlawnnak ramah caan tampi na harsat caan a um dingih Pathian ih umpinak na hngilh a si ahcun na bei a dawng lawkmai ding. Cui harsatnak sungih a lo umpi zia na theih ding kha a duhmi sawn a si. Harsatnak na tawn lo cun Pathian ih lo umpinak ziangtin saw na hmuhfiang sinsin thei ding. Harsatnak kan tawnmi hi Pathian ih in umpinak langtertu pakhat a si. Cui harsatnak ihsin lo cahter sin a duh, khai harsatnak kha na ṭih ding a duh lo. Curuangah si ka lo bawm dingih ka lo cak ter ding a  ti.

Siar bet

Thawhsalnak Nun Tak Neitu Na Si

“Zisu in a hnenah, Kei cu thawhsalnak le nunnak ka si.

Zokhal keimah I zumtu cu thi hmansehla an nung ding.

Zokhal keimah sungah a nungmi le

I zumtu cu an thin awn lo ding” (John 11:25-26)

Thih ṭihnakin na nun a lo luah khat pang maw? Asilole ka thih hnuah ziangtin ka um ding? Thawhsalnak tivek hi teh a um ngaingai pei maw ti ruahnakin siseh, Hellram, Vanram, le Pathian tivek hi rak um lo pang sehla teh tivek ruatin siseh, Bible le thawhsalnak thu ah hnangam loih na um caan a um pang ṭheu maw? Minung kan si sungah cuvek cu um theitukmi thil a si. Cuvek na ruah pang le na thin a bang pang ṭheu ruangah na piangthar lo tinak a si hrimhrim lo.

Ka lo sim duh, Setan in Bible, Pathian thu ah rinhlehnak le thlaphannak nei dingin lo thlem le lo neh a tum ringring ti hi a si. "Rukru cu ru ding, that ding le siatsuah ding lawnglawngah a ra. Kei cu nunnak an ngah ih tlamtling zetih an neihnak dingah ka ra a si" (John 10:10).  Leitlun minungpawl cu thi dingin leitlun ah kan rung nung nan kan nih zumtupawl cu nung dingin kan thi leh ding. Zumtui’ hrangah taksa thih hi nunnak a si.  Pathian mihman ropi DL Moody cu a tar tuk thlangih ka thi zik cuahco thlang ti a theih awk tikah mipipawl hnenah, “A rei hlanah thuthang le cahnah parah DL Moody a thi timi cangan nan hmu ding, asinan rak zum hlah uh, cui caan ahcun kei cu nun hram ka rak thawk rero zo ding” a ti. Setan ih hrawkhrawlnak le thlemnak men ruangih thlaphang le thinhar ih na um cun na sung tuk. A nih cu Kalvary tlangih a lu rialbek zomi a si kha. Cuvek na umpang caanah thawhsalnak nun tak neitu na sizia le a tak a sizia hmufiang sintu na si nak dingah Pathian hnenah thla cam aw.

Setan in, Pathian teh hi a um ngaingai kei maw? Hell ram le Vanram tivek teh hi a um ngaingai kei maw? Ka thih hnu ah teh Pathian hnenah ka feh taktak pei maw tin Pathian, Bible le thawhsalnak ih rinhlehnak nei dingin a lo thlem ringring. Cui caanah Sam 14 “Mi aa cun a thinlungin Pathian a um lo a ti” timi kha vun siar sal awla, thawhsalnak rinhlehnak na neih ṭheumi cu Setan ih bumtumnak a si ti na fiang ding. Kan ruahnak peng ding le lak hloh sak ding hi Setan ih a zuam bikmi pakhat a si. Kan ruahnak a lak thei cun kan taksa cu a ta a si cia ti a fiang tuk ve fawn.

Nang cu Pathian fa na siih na lei nunnak a cem vetei Pathian hnen feh ding, nun hram thawk ding na si. Hi thawhsalnak um hlah sehla Pathian kan zum man a ṭha hnem lo ding. Biaknak dangah thawhsalnak a um lo ih kan nih cu Zisui’ thawhsalnak hi kan ruahsannak a si. Buddhist biaknak rak thawktu ‘Gautama’ cu a thi ih a thosal nawn lo. Islam biaknak dintu ‘Muhammed’ khal a thi ih a tho sal nawn lo. Confucianism biaknak rak thawktu ‘King Fu TSu (Confucius)’ khal a thi ih a tho sal nawn lo. Hinduism biaknak rak thawktu ‘Ancient Sages’ khal a thi ih a tho sal nawn lo. Sikhism biaknak rak thawktu ‘Guru Nanak’ khal a thi ih a tho sal nawn lo. Taoism biaknak rak thawktu ‘Lao-tse’ khal a thi ih a tho sal nawn lo. Zoroastrianism rak dintu ‘Zoroaster’ khal a thi ih a tho sal nawn lo. Judaism (Hebres pawl biaknak) thawktu ‘Moses’ khal a thi ih a tho sal nawn lo. Kan biak Pathian cungnungbik fapa Zisu Khrih cu a mai sim cia bangin a thi ih ni thum hnu ah a tho sal (Matthai 28).

Zisui’ thawhsalnak cun Pathian hmaiah thiamcoter na si zia a lang ter (Rom 4:25) ih thih hnu hrang khal thlaphan ding na neih lo zia a lang ter. Zisui’ thawhsalnak cun thihnak a neh zia a lang ter (Rom 6:9) ih na thih veten na tho sal dingih Pathian hnen na feh ding ti khal a lang ter. Zisui’ thihnak le thawhsalnak hin zumtupawl khal a mah vekin ka thi dingih kan tho sal thluh ding ti a lang ter (1 Korin 15:20-22)

Curuangah nang cu kumkhua in vanram nuamih um ding na siih na hrangah nun khal a hlawk ih thih khal a hlawk sinsin. Setan ih thlemnak menin na lung rethei hlah seh! Setan ih bum tumnak menin thawhsalnak thu le na thih hnuih umdan dingah na nun buai hlah seh. Nang na nun cu lakhloh theih lo dingin Pathian in Khrih sungah a thuh a si (Kolosa 3:3). Cui nun thawn nun hram thawk ding na si. Setan ih bumthlemnak menin na lung rethei pang hlah seh! Pathian thutak le Bible hmangin Setan kan do neh vivo ding. Amen!

Siar bet

Pathian Hrangah Na Tling

“Cahnak I Petu Khrih Sungin ziangkim ka ti thei” (Filipi 4:13)

Fimthiamnak na neih lo ruangah si maw, sumpai tampi na neih lo ruangah si maw, upa tuk zo ih na theihawk ruangah maw, fel lo tukih na theihawk ruangah asilole sual tukih na ruahawk ruangah si maw Pathian hrangah ka tling lo tuk na ti caan a tam ko ding.

Taktak ahcun fimthiamnak le sumpai hi Pathian ih tahfung si sehla Zisui’  tirhthlh hleihnihpawl tla zohman an tling lo ding, awhak Moses khal a tling lo ding. Upat le nauhak tla hi Pathian ih tahfung si sehla Abraham khal a tar tuk zo, Jeremiah le a nauhak tuk. Fel le ṭhat, sinak hi rawngbawlnak hrang Pathian ih tahfung sisehla Uire David, mibum hmang Jacob, zuri Noah, tualthat Paul le Moses, thinlung thleng dualdo Elizah, Pathian hnen ihsin tlan Jonah, mi thintawi Peter, hlawhhlang Rahap, Zakiah le a niam tuk betah hlepru, Lazarus le mithi zo. Zohman Pathian hmaiah an tling lo. Asinan Pathian cun hman theih lo a nei ve lo thung. Pathian cun mifim mifel, le mitlingpawl a ko lo ih a kawhmipawl kha a fimter, a fel terih a tling ter sawn a si.

Khah! Tuah a tlunih tarlangmipawl hnakin na sual cuang maw, na ṭha lo cuang maw? A tlunih tarlangmipawl hnak cun na zia tuk sawn ding. Pathian ih a lo hman theilonak ding san a um lo ih na tlinlonak ding san khal a um lo. Biakin feh na ngam lo nak ding san khal a um lo. Setan cun na sualnak a lo hmuh dingih misual nu, misual pa a lo ti ringring ding, hmanseh Pathian cun ka fa a lo ti ringring ding. Nang cu Pathian ih kawhmi, hrilmi, a fa na siih a thiltitheinak lo pekmi khal na si. Na thil ti theinak hi nangmah ah siloin Pathian ah a um ti kha hngilh hlah! Na cahnak, na hlawhtlinnak le na tlinnak hi Pathian na sungih a um ruangah a si.

Mina pakhat damnak ngah dingih thlacam sak ding khalah na tling tawk tuk. Nangmai thlacam ruangah za ah za a dam thei lo ti na thei vekin Pathian in kei mai thlacamnak thanwgin za ah za a dam ter thei ti kai hnget aw. Khawsia le ramhuai dawi suak ding khalin nangmah thotho hi na tling. Thiltheinak keimah ah a um lo ti na theiawk rualin ka sungum Pathian hi Khawsia le ramhuai pawlih ṭihmi a si ti khal thei aw. Nangmah ah cahnak a um, na sungih um Pathian thawn ziangkim na ti thei. Na sungih um Zisu kha leitlun rak nehtu a si kha! Zisu in ka lo umpi ding inti mi hi in umpi satliah men a siloih cahnak huham, hlawhtlinnak le thiltitheinak ka lo pe dingih nan harsat canah ka lo bawm ding a tinak a si. Zianghman ṭihhlah! Hlawhtlinnak le thiltitheinak nangmah ah a um. Ni le thla dinter theitu Pathian kha na sungah a um.

Hi leitlun harsat beidawnnak ramah hnangam tei’ kan um theinak cu Thlarau Thianghlim kan parih a um ruangah a siih thil kan titheinak, kan dam kan cahnak le kan hlawhtlinnak hi Pathian kan sungih a um ruangah a si. Amen!

Siar bet

Midang Thawn Tahṭhim Aw Hlah.

Zozo khal nanmah ih ziaza cio parah 

thuṭen aw ding nan si.

A ṭha asile midang ih nundan thawn 

tahṭhimawk ṭul rero loin

nanmah ten nan lung a hmui ding (Galati 6:4)

Nang cu zothaw hman tahṭhim theih lo dingin danglam le hleice zetin Pathian ih lo sersiammi na si. Mipa ci, million 20 lenglo lakah minung ih hungcang thei umsun na siih leitlun billion 6 lenglo lak khalah zohman thawi bangaw lo dingin danglam le hleice zetin Pathian ih lo sersiammi na si. Na kiangkap na innhnen an hlawhtlinnak menin na nun lo ti buai hlah seh. Na innhnen, na rualpi le na kiangkappawlih hlawhtlin dan vek ciah ih hlawhtling dingin Pathian in a lo sersiam lo. Nang cu hleice le danglam zetih sersiammi na si bangin hlawhtlinnak danglamzet Pathian in lo pek a duh a si. Midang an hlawhtlin ruangah na nun buai hlah seh, Pathian ih mi hleice na si kha mang ringring aw. Midang an hlawhtlin ruangah vanse cuangih ruatawk ding a si lo ih midang an tlaksiat ruangah vanṭha cuang ih ruat awk ding khal a si lo. Nang cu nang na siih Pathian ih minung, Pathian kilvennak hnuaiih um na si.

Na nupi/pasal, na unau, na nulepa le na fale khal midang thawn tahṭhim aw hlah la nangmah khal zothaw hman tahṭhim aw hlah. Nang cu Pathian in danglam zetih a lo sersiam bangin nulepa, unau, nupi/pasal, fanau khal danglam zet a lo pe a si kha. Khuitawk hmanah tui na nulepa, na nupi/pasal le na unau vek kha zo hmanin an nei lo. Nang cu tui na nulepa, na unau le na nupi/pasal neitu na si kha na van a ṭha tuk. Leitlun ah khavek ciah nulepa, unau, nupi/pasal le sungkhat nei zohman an um lo. Bill Gate in ‘midang thawn na tahṭimawk a si ahcun nangmah le nangmah na hmuhsuam aw a si” a ti.

Tui na nunah hlawhtling hrih lo vekih na theihawk hmanah Pathian in na hrangih tumtahnak ṭha a neihmi a dang lam dah lo. Hlawhtlinnak timi cu sumpai tampi neih le len a si lo zia khal theihfiang tum sinsin aw. Siangpahrang Solomon khal milian le mifim maktara a siih lei nawmnak lamah nupi 700 le nusun 300 a nei (1 Siang. 11:3) nan hlawhtlinnak le nawmnak a si lo zia, nun hman a paih nawn lo le a huat thu, Thusimtu 2:17 ah a tarlang. Culai ah fimthiamnak, mawinak le lennak neilo putar Simeon cun naute Rundamtu Zisu a hmuh tikah leitlun ih nunman nei bik le hlawhtling bik a si zia theifiang in Pathian a thangṭhat (luke 2:28-29) kha hngilh hlah!

Hlawhtlinnak taktak ngahtu na si nak dingah nangmah le nangmah kha zothawn hman tahṭhim aw hlah la miih nundan khal va cawn tum hlah. Pathian in leitlun minung billion 6 lenglo lakah nang cu zo thaw hman bangaw lo, hleice le sunglawi zetih a lo sersiammi na si kha hngilh dah hlah. Pathian in na hrangih tumtah ṭha a neihmi le na fehnak ding lamzin kha thei fiang dingin Pathian sut awla Pathian ih a lo kawhnak hmunah feh aw. Cule leitlun ih nunman neibik, lungawi bik le hlawhtlingbik na si ding.

Siar bet

Theihthiam A Har Ṭheumi A Remruah

“Ziangtinkim ahhin Pathian cun Amah a duhdawttu le

Amah ih tumtahmi vekih a kawhmi hrangah cun

an ṭhatnak ah hna a ṭuan a si” (Rom 8:28).

Nunnak thaw a neimi minung hmuahhmuah in damcah le hlawhtlin duh lo zo hman kan um lo. Vawi tampi cu hlawhtling dingin kan zuam ih Pathian hnenah kan dil ve.

Damcahnak khal kan duh ih Pathian kan dil, na dil ve ṭheu ko ding. Asinan caan tampi cu Pathian hnenih dil a ṭha lo a si pei maw ti ding khawpin hlawhtlinnak ka dil le tlaksiat a luar ṭheu. Damnak kan dil caan khalah besia in ka neihsun sumpai khal a cem thluh caan a tam. Ziangmi si Pathian in ka hrangah ṭha a tiih ka hrangih a remruah cu! Theihthiam cu a har ngai ko. Hmanseh fiang zetih kan hmuhmi cu…

In umpi lonak ding hmunah Pathian in in ret dah lo. Pathian in a falepawl a umpi lo nak dingah ziang tik hmanah a um terin a ret dah lo. Umpitu nei lo, bawmtu nei lo vekih kan theihawk caan cu zumnakih puitling dingah kan nun a remmi a rak si sawn. "Bawipa cun harnak le le tuarnak sungah a lo thlenter hai ding, asinan nan tuarnak hmunah cun a um ve dingih a lo zirhtu a si ding" (Isaiah 30:20). Pathian ih in umpinak hnuai ahcun farah cing khalin kan lian, naa cing khalin kan dam, bang le cau zet cing khalin kan cak ih, ṭap cing khalin kan lung a awi. Cucu Pathian umpinak hnuaiih a rahsuah a si. Hi leitlun ah Pathian ih umpinak timi cu ninghan le ṭahnak umlo tinak a silo ih ṭap cing khalih lungawi theinak nun sawn a si. Pathin in a lo umpi lonak ding hmunah a lo ret dah lo vekin ziangvek na tawn caan khalah a lo umpi. Na kawh tikah a lo sang dingih na hrangih tumtah ṭha a neihmi khal a lo sim ding.

Kan tuar theilomi harsatnak in tuar ter lo. Pathian cun harsatnak tawng lo dingin a lo hruai lo dingih harsatnak a um caanah na kut a lo kai dingih a lo pahsuak pi sawn ding. Harsatnak leiram ih a umtu minung zaten harsatnak tuar lo kan um lo, kan tuar dan lawngte cu a bangaw cio lo. Cumi lakah kan nih zumtu cu kan tuar theilo dingmi harsatnak Pathian in in pe lo. Tui na tawnmi harsatnak kha har tuk le tuar theih lo ah na ruat tla a si men thei. Taktak ahcun Pathian in a tuar thei ding tiih a lo rinsan ruangah tui’ na tuarmi harsatnak kha na hmai ah a retmi a si sawn. A man khung zetmi sui khal a nasa zetmi meisa thawi hniksak kel a si. Midang ih hlawhtlinnak thawi bangawlomi, a danglam zetmi hlawhtlinnak Pathian in a lo pek duh ruangah a dang lam zetmi, mi zaran ih tuarlomi harsatnak a lo tuar ter. Cucu na tuar thei ding tiih a ruah, a lo rinsan ruangih na hmaiih a retmi khal a si fawn. Pathian ih a lo rinsan vekin nang khal tuar suak ṭenṭo zuam aw. Na hmaiah Pathian in hlawhtlinnak a lo ret sak.

Kan mah hmangih a ṭuansuah lo dingmi ṭuanvo in pe lo. Pathian in leitlun ah a ram karhzai dingah zumtu pakhat cio ih kan nun a hmang. Cumi ah zumtu pakhat cio ṭuanvo in pe ih ṭuanvo kan nei. Kan ṭuan theidan lawngte cu a bangaw lo ding. Curuangah Pathian in nangmah ihsin hna sunglawi ṭuansuah a duh ruangah tui na dinhmun na hnaṭuan a lo pe a si bik. Pulpit parih thusim le vahsuah kherkher hi Pathian ih in pekmi ṭuanvo a si thluh lo. Ṭuanvo a lo pekmi cu a tum zet a har zet tla a si men ding nan a lo rinsan ruangah a lo pekmi a siih cui’ na ṭuanvo hlensuah dingah tlaksiatnak, damlonak, harsatnak phunkim na tawn caan a um ko ding, hmanseh Pathian in nangmah rori hmangih ṭuansuah a duhmi a si. Nangmah hmangih ṭuansuah a duhlomi ṭuanvo cu Pathian in a lo pe dah lo. Paul cu thuthangṭha sim hi Pathian ih a pekmi a ṭuanvo a si (Rom 1) ih a har khalah a nawm khalah ṭuansuah ka tum, tlanzuamnak ah ka tlan rero a ti bangin hlawhtling zetin a ṭuanvo cu a ṭuansuak. Tui na ṭuanmi na hnaṭuan hmangin Pathian hmel a lang ding cu Pathian ih a lo pekmi ṭuanvo a si.

Na ṭhat ruangah siloin Pathian a ṭhat tuk ruangah Pathian in thlawsuah lo pe sinsin hram seh!

Siar bet

Man Pekih Leimi Na Si!

Man pekih leimi nan si. Curuangah nan taksa cu

Pathian sunlawinak ah

hmanguh.

(1 Korin 6:20)

A hmaisa ah kan ṭawngah LEI timi cu san tampi a neih ruangah simfiangnak malte ka nei ta ding. Ṭhimnakah: “Ka LEI na hrang sii LEI dingih ka feh laih LEI nal lakah ka bah ih a LEI zetmi thingkhawn ka pah”. Hinah LEI timi in san dangdang ciar an nei. Asinan hitawkih ka sim duhmi “LE̕I”cu thil-lei, man pe ih lei timi a si. Khatlam zawngih kan sim cun LEI timi cu neitu thlengawknak tikhal a si thotho. Cumi lakah kan simduh bikmi cu nangkhal leimi, man pekih leimi na si ti hi a si.

‘Lei’ timi ih umzia cu ziangkimah ‘leimi’ cu ‘leitui’ thuthu ih um a si. Thil na lei tikah na leimi cu na ta a siih na thuthu in na duhduh in na tuah thei. Leimi na si ahcun a lo leitu ih ta na siih a thuthu ih um a si. Cucu ‘Lei’ timi ih umzia cu a si. Nangkhal tluksiatnak ruangah Setan ta na rak siih kumkhaw meilipi (Hell) tla ding na rak. Cumi ihsin vanram nuamih um thei dingin Pathian in Zisui’ thisen thawn a lo lei. Cucu leimi na sinak tak cu a si. Pathian cun kumkhua Hell tla dingmi na thlarau lawng a lo lei a siloih na taksa rori khal kha a lo lei cih (1 Korin 6:20). Pathian ih a loleimi na nun taktak cu Khrih ah thuh in a um (Kolosa 3:3) ih phan ding zianghman a um nawn lo. Amah lawngte nitin sual lakih tlanglengmi na taksa cu Pathian sunlawihnak ih hman ringring a ṭul ve thung.

Nang cu a sunglawi bikmi Zisui’ thisen thawi leizomi (mi piangthar zo) na si ruangah na taksa cu Pathian ih duhzawngih a um hrimhrim a ṭul. Na duh zawng rori ih na taksa na hman ahcun na duh lo zawngin na taksa neitu (a lo leitu) in a tuah thei. Curuangah piansualnak/tlaksiatnakin ka hrangah tlai ni a nei ve lo.

Leitlun mi cun an mawinak cu ler-nak le nawmnak ah hmangin, an lennak cu taksa diriam ternak le sualnak ah hmang hman sehla nang cu cuvekih um thei na si ve nawn lo. Nang cu leimi na si zo ih Pathian ta na si zo. Na mawinak khal kha Pathian in a hrangih hmang dingah Zisui’ thisen thawn a lo lei zo. Na fimthiamnak khal kha mi donak le mi hmuhsuamnak menih hmang nawn lo ding le Amai hrangih hmang dingah Pathian in thisen thawn a lo lei. Na lennak khal kha leitlum nawmcennak menih hmang lo ding le Amai rawngbawlnakih hmang sawn dingah Zisui’ thisen pe in a lo lei. Leimi na si, nangmai ta na si nawn lo ih Pathian ta na si zo. “Man pekih leimi nan si. Curuangah nan taksa cu Pathian sunlawihnak ah hmang uh” (1 Korin 6:20).

“Curuangah nan ei ah siseh, nan in ah siseh ziangthil nan tuahmi kpah Pathian sunlawihnak ah tuah uh” (1 Korin 10:31)

Kan kutih tuahmi sualpawl ngaidam a si theinak dingah a kut an khenih kan ke ih a thlunmi sualnakpawl ngaidam a si theinak dingah a ke cu thir in an khen. Kan thinlung ṭha lo le bumhmang ngaidam theinak dingah a hnakah fei in an sun ih sual lawnglawng a ruat ringring tu kan ruahnakpawl ngaidamnak dingah a lu ah hling lukhum a khum. Nun nuam ih kan um thei nak dingah harsat manbang vuak le velh, cilphui tiang a tuarih nun kan neih theinak dingah Anih cu kan hrangah a thi.

“Khrih in Amah ih taksa rori in kan sualnak cu thinglamtah ah a thlenpi zo ruangah kannih cu sualnak ahcun mi thi kan siih dingnak sungah a nung dingmi kan si.  Amah ih hmaa ruangah damnak nan ngah zo. Zin a hlomi tuu bangtukin nan rak hlota; sikhalsehla a tu ahcun nan thlarau Khaltu le Kilkhawitu thlun dingah nan zin hlohnak ihsin kirter salmi nan si zo” (1 Piter 2:24-25

Curuangah Zisu in a lo sut…

Na hrangah ka thi, ka hrangah na nung ve maw?

Siar bet

Mi Sunglawi le Mi Hleice Na Si!

Mi Sunglawi le Mi Hleice Na Si!

Leitlun mi hmuahhmuah sungin Amah ih minung,

a minung sunglawi si dingah a lo hril zo a si,

(Danpeksalnak 7:6)

Leitlun minungpawl cu kan kiangkap zoh in, midang tlukin ka fimthiam lo, midang tlukin paisa ka nei lo ih thil khal ka ti thei lo tin siseh, midang tlukin ka mawi lo ih san khal ka tlai lo timi ruahnakpawlin vawi tampi kan thinlung in ti har. Asinan leitlun mi lakih mi hleice, mi cuanghmuar le misunglawi na si zia Bible hmangih lo sim ka duh. Pathian hrangah, minung hrangah na hleice-in na sunglawi ce!

Sibawipawl simdanvek asile ‘minung pakhat hung cangsuak dingah mipa cii, million 20 lenglo lakah pakhat te lawngin minung cantheinak a nei’ ti a si. Hi million 20 lenglo minung cang dingih zuamawknakah Pathian in nangmah kher a lo hrilih nehnak a lo pek hnuah minung ah na hung cang. Mipa cii million 20 lenglo lakah Pathian ih mitheih hleice le mi sunglawi hleice na rak si zo. Kan nui’ pum sungih kan sem hlan rori ihsin Pathian ih theihmi le hrilmi kan rak si zo (Jeremiah 1:4, Semt. 25:22-23; Thuṭ. 13:2-7; Isa. 49:1, 5; Gal. 1:15)

Minungih na hung can hnuah, leitlunah minung billion 6 leng lo lakah zothaw hmanih bangaw loin danglamzet le hleice zetin a lo ser. A mak zetmi pakhat cu leitlun minung billion 7 zikte lakah nangmah vekciah pakhat hman an um lo hi a si. Cucu na thupitnak, na hleicetnak le na sunlawi hleice nak a si fawn. Midang bang lo ih na theihawknak tak kha miih an lo banglonak tak a si. Kan hleicetnak le sunlawinak sawn hi theithiam lo in thinnaunak ah kan rak hmang linglet sawn. Curuangah Pathian hrangih na thupit zia ka lo sim duhnak a si fawn. Pathian ih duhlomi pakhat cu a mai sersiam danah lungkim lo ih miih umdan le sidan kan va dawt ciamco le cawn tum ciamcomi hi a si.

Pathian in danglam zet le mak zetih a lo sersiamdan, na sidan vekciah khan um aw. Midang umdaan le tlandaan  na cawn ciamco asile Pathian ih a lo sersiam daan na ngainep ih Amah ziangih siar lo na si tinak a si. Mi hleice le mi cuanghmuar pakhatin miih umdaan a cawng dah lo. Nang cu Pathian ih hril hleicemi, theih hleicemi le mi sunglawi na si ruangah nangmah in miih zohṭhimtlak umdaan le tlandaan mawi pakhat sersuak tum sawn aw. Cucu Pathian in hleice le sunglawi zetih a lo sersiamnak san a si. Pathian in tumtah neilo in a lo sersiam lo. Tumtahnak le ruahsannak tampi thawn mi hleice le sunglawng ah a lo sersiam.

Siar bet

Zisu A Ṭap

Zisu A Ṭap

John 11:35

Thuhmaihruai

Kan Bible sungah John 11:35 hi Bible cang tawi bik lam cu a si ve. Hmanseh hi cang tawite sung ihsin zir ding le ruah ding tampi kan nei. Ziangahtile leitlun Rundamtu Zisu A Ṭap tlat mai. Mi tampi in John 11:35 hi Bible cang tawi bik ti’n ruah a si. Asinan cucu a lettui thuthu le Bible version thu men a rak si. Ziangahtile NIV, TEV le NLT pawl ahcun Job 3:2, “He said” timi hi a tawi bik. NKJV, ESV, RSV le KJV pawl ahcun tui kan Bible cang John 11:35, “Jesus wept” timi hi a tawi bik. Falam Baibal Thianghlim Hlun ahcun Matthai 5:2, “thu a zirh” timi hi a tawi bik lala. Rel duh cu Bible cang tawi lam siloin tawi zet hman sehla zir ding tampi kan nei ti lam a si sawn. Bible ih in sim duhmi le zirh duhmi tete kan zoh khawm pei.

Zisu leitlun a len lai thu kan zoh asile Amah hi a Leitaksa zawng khalin mi-law, hnaṭuan paih, midang zawnruat thei, miding, pacangtha, ṭahneilo le mi tuarfai a si. A lei taksa a ti a hal ih A Pa Pathian in a tlansan lai hmanah Zisu a ṭap ti kan hmu lo. Asinan hitawkah ziangah Pathian Fapa Zisu rori a ṭap thei si pei?

Mi tampi in hitawk zawnih Zisui ṭahnak san hi (1) Judah/mipi pawlih an zum thei lo ruangah (2) Mari a zangfah tuk ruangah (3) Lazarus a duhdawt tuk ruangah a si ding ti’n zumdan phunphun a um. Asinan cupawl cu ‘ding asilole zumnak’ men lawng a si ruangah kan rel tam lo ding. A tawi zawngin kan zoh ding.

Siar bet

Abigail Nun Thawn Thazang Laknak

Abigail Nun Thawn Thazang Laknak

(1 Sansiarnak 25:1-43)

A hmaisa ah an sung thu le a thuanthu tawi kan zoh duak ding.

Abigail hi Siangpahrang David ih pa Jesse ih fanu pahnih lakih pakhat a si. Khatlam zawngih kan sim asile David ih nau a si (1 San. 2:9-17). A nu cu Nahash a si. Abigail ih nu Nahash hin Abigail le Zeruiah a neih hnu a pasal ih thihsan hnuah David ih pa Jesse in nupi ah a rak neihmi a si. David in nupi ih a neih hlanah Ishmael ih tefa Jether a pasal ih fapa pakhat Amasa an rak nei (2 San. 2:17). David thawi an neihawk hnuah Hebron khua ah fapa a hrin sak, a hmin cu “Chileab (Khileb)” a si. (2 San. 3:3). Daniel ti khalin an ko (1 San. 3:1;1;2:16, 2 Sam. 17:25).

A hmin sullam cu “nawnnak Pa” tilam a khih hmuh. Amah hi mi mawizet le theihnak lamih mi tawkzet timi nu a si ih tu thawngthum, kel(me) thawngkhat nei ih a rannung pawl Carmel tlangih khaltu Nabal timi ih Nupi a si. A pasal Nabal hi mai zawn lawng ruattu, thilṭhalo tuah ṭheutu a si. A hmin sullam khal “mi-aa” tinak a si. Hipa hi ram neitu a siih, ram ṭhazet hmunih Maon khua mi a si.

Siar bet

Pathian Thutak Hi Cu Aw!

Pathian Thutak Hi Cu Aw!

Pastor Enoch Laineipui

Thu hmaihruai

Kan Pathian thutak hi cu aw! timi Pathian thu Article ngan thei dingih ka nun zalam in hruaitu par ah ka lung a awi zet. Kan ram ah Pathian thu kan thei sang em em ih, a sunglawi zia leh a thawtnak tak tak theitu lawngte hi cu kan mal lai tiah ka ruat. Pathian thu hi kawlhra vek in ka tehkhin theu, thuk pi pi, tawng sang leh thuk khun kho ih simfiang tum hi nun thanlennak ah sawr ding a mal zet tiah ka ruat. Puan te te ah hin ei tlak in tlak leh nun in lakluh ding thuthup a rak um sawn a si.

Leilung tlun kan damsungah hin a tul leh pawimawh bik cu Pathian thu a si. Malsawm kan dawn theinak ding thuthup khal hi Pathian thu ah a phum aw theh. Kan taksa sual lak ih a himnak ding khal hi Pathian thu ah a um ih, kan mawinak, leh cawisan ih kan umnak kan mizia a pum puluk ih a thlengawk theinak thuthup khal hi Pathian thu lawng ah a thum aw a si. Kan Pathian thu tak hi cu aw! Bible sirhsan: Hebru 4: 12, Sam 113: 7; I Cor. 10: 13; I Cor. 13: 5, Gen. 39: 9; Daniel 1: 8; Tirhthlah 6: 15; I Peter 3: 3-4; Phi. 4: 11; Luke 21: 33; Siang. 3: 12-13; II Siangpahrang 20: 6.

Siar bet