Tlansanmi Na Si Lo, Umpimi Na Si!

“Zianghman ṭih hlah, na hnenah ka um a si.

Keimah cu na Pathian ka si, zianghmanin lo phang ter hlah seh.

Ka lo bawm dingih ka lo cakter ding;

Ka lo hum dingih ka lo run ding”

(Isaiah 41:10)

Minung kan nunah ‘keimah lawng ka si’ asilole ‘umpitu ka nei lo’ tiih ruahawknak hin kan thla in phang ter, kan thin in nau terih kan bei inti dawng ringring. Na rualpi lakah nangmah lawng cathiam lo ih na ruahawk a sile na beidawng a luar dingih na inhnen lakah nangmah lawng farah le hlawhtling lo ih na theihawk a si ahcun na tha a nau sinsin ding. Leitlunah mahlawng si cu bei a dawng duh zet, ning khal ṭih duh zetih thla khal a phang awl zet. Asinan zumtupawl kan van a ṭhat hleicenak cu umpi ringringtu Pathian kan neih hi a si. Ziangtlukin leitlun ah farah rethei le harsa in um khal sehla umpitu kan neih sungah cun kan bei a dawng dah lo.

Na rualpi lakah mawṭaw mankhung zet to theilotu le farah deuh an um hnuaihni ve tikah na hna a vun ngam deuh a si lo sawm? Na rualpi za lakah Degree sangpipi ngahlo an rak um ve tikah na ning a zak nawn lemlo a si lo sawm? Tlasam le hlawhsam thei ve zetzet na kiangkapih an um cun thinhar le thin bang khal a vun dem deuh a si lo sawm? Catloih Pathian ih umpimi ho khaw na si. Ṭih hlah, phang hlah. Lei le van tuahtu in sun le zan itthat loin na hnenah a lo umpi ringring. Na feh tikah na dung, na hmai, na sirih lo umpitu na nei hokhaw. Anih cun na tluk caan le a lo tho dingih zin na hloh caan ah Arsi bangin hmai a lo hruai ding.

Na ṭah ruangah Pathian in a lo umpi lo a si lo ih na tlaksiat ruangah Pathian in a lo tlansan dah fawn lo. Harsat na tuar ruangah Pathian in a lo dungtun dah lo ih na mitthli a tlak laiah a lo feh san dah fawn lo. Zan khua a thim sinsin tikah Arsi le Thlaipi ih tleunak a fiang sinsin a si lo sawm? Na nun a thim ih a pit sinsin a si ahcun Pathian ih duhdawt zangfahnak le sunlawihnak na nunah a lang fiang sinsin ding tinak a si cu. Ziangahtile nang cu tlansanmi na silo ih umpi mi na si.

Pathian hin mithli tlaknak umlonak zinin a lo fehpi thei tuk nan na mithli tla hnul kherkher a duh, a lo umpi zia na theihfiang sinsin nak dingah. Zuun ngai lungleng ih na um canah a thuthawi hnangamnak na neih a duh.

Pathian hin a lo umpi men asilo ih lo bawm le lo cah ter sin a duh. Na hlawhtlin le ṭhanlen thei nak dingah na hmaiih a retmi harsatnak kha na ṭih ding a lo siang lo ih na thlanphan khal a lo siang lo. A tlunih kan tarmi Bible cangah Pathian in ziang a lo ti, “zianghman ṭih hlah, na hnenah ka um a si. Keimah cu na Pathian ka si, zianghmanin lo phang ter hlah seh. Ka lo bawm dingih ka lo cakter ding; Ka lo hum dingih ka lo run ding” a lo ti a si kha! Ziangtluk hnangam um saw a si.

Leitlun na khualtlawnnak ramah caan tampi na harsat caan a um dingih Pathian ih umpinak na hngilh a si ahcun na bei a dawng lawkmai ding. Cui harsatnak sungih a lo umpi zia na theih ding kha a duhmi sawn a si. Harsatnak na tawn lo cun Pathian ih lo umpinak ziangtin saw na hmuhfiang sinsin thei ding. Harsatnak kan tawnmi hi Pathian ih in umpinak langtertu pakhat a si. Cui harsatnak ihsin lo cahter sin a duh, khai harsatnak kha na ṭih ding a duh lo. Curuangah si ka lo bawm dingih ka lo cak ter ding a  ti.