Kei Cal le Lal Ruang

Kei Cal le Lal Ruang

  

Nikhat cu tivapi pakhatah sur vorhin pacang pahnih an tong aw. Ti taw lam i sin Lal Ruang in a hun vorh so i, ti lu lam i sin KeiCal in a run vorh suk. KeiCal i nga awh mi hmuahhmuahin an lu a bul thluh. KeiCal cu mikei a si i Lal Ruang cu milai a si. An tonawk cun, “Kan rual aw ding” an tii i rualah an kai aw ta. Cutin sur vorh an baan hnu-ah rawl an ei ta i tlun an tum.

Lamziinah cun an rualvah cun an thiamnak hmuhawk an tum i, “Saam kan cai pei” an tii. Lal Ruang cun, “Ka rual KeiCal, nang hmasa aw” a ti. KeiCal cun saam a hun cai i thingte note le hrampi pawl cu a dunghnu cun an sawn duahdo i a keu tan phah vivo. Tawkfangin Lal Ruang in, “Ka rual, tawk hrih seh law” a ti i KeiCal cu a bang. Lal Ruang cun a hun thawh vee i a namsau in a hun vai i thing le hrampi cu an tlu zutzo vee. A tlu hmasasa in an ro thluh. KeiCal cun ka rual tawk hrih seh law a tii i Lal Ruang cu a cawl.

Cutin an tlung so vivo i Lal Ruang cun, “Ka rual KeiCal, nang feh hmasa aw” a ti. KeiCal cu hmai-ah a rak feh i lungpi pheenin a rak bawh. Lal Ruang a hung so i, “Khi lungpi khi a laifangin phel koin hun kap ning law” a tii. Cutikah KeiCal cun, “Na Rual Kei Cal ka um” a tii I a kap suak lo. Cui siin hmaiah a rak feh laalaa i dihaai phangkhat pheen te-ah a rak relh laalaa. Asinan Lal Ruang in a thei thotho i, “ Khi diphang te khi a laifangin hun kap tan ning law” a tii. Cutikah KeiCal cun, “Kap aw hlah, na rual ka um” a ti laalaa. KeiCal cun deh tumin a bawh ṭheu nan Lal Ruang in a thei i a deh thei lo.

A zaan cu Lal Ruang i innah an tlung. Lal Ruang cun a rualpa cu ṭhazetin a zoh i a mikhual. KeiCal cun Lal Ruang in ṭhate le duhdaw te`n a zoh ruangah ka rual, kan khua-ah rung tlawng aw la, ka ṭhi rah tla ka lo lawh ding. Na rung tlawn a sii le kan khawlu tlang na thlenin, “Maw Kei Cal na rual Lal Ruang ka rung tlawng e, ti`n rung au aw la,”  tin a cah ta. Cu ti`n lungawite`n KeiCal cu a tlung.

Nikhat cu Lal Ruang cu a rualpaa i hneenah a tlawng vee. KeiCal i thucah kha a tii i an khawlu tlang a thlenin ku ta loin a vung bih thup hai. KeiCal i khawpii pawl cu inn an rak sak i an mei sau ngiaungiau in diphun paarah an kaai i di an cih zok rero kha a vung hmu. Cui sin an hmuh loin a kir saal i hnar khaanin, “Maw Kei Cal, na rual Lal Ruang ka rung tlawng e” a tiih a vung au. Kei Cal cun an khawpi pawl cu, “Ka rual Lal Ruang a rung tlawng a si, nan mei thup cio u law” a tii i an zaate`n an mei cu an thup i milai ah an cang thluh.

Lal Ruang cu KeiCal i inn a thlen cun, “Ka Rual, na nu le na pa i hmuh aw” a tii. Kei Cal cun, “Kei i nu le pa hmuh tlak le zoh tlak an si lo. An se tuk lawmmam” a tii i a eel. Asinan Lal Ruang in, ”Nu le pa hmuh tlak lo tii a um lo, i hmuh aw” a ti thotho. Cutikah KeiCal cun, “Ka nu daarkhuang khuh, ka pa maaihuum khuh khi vung ong aw” a tii. Lal Ruang cun vung zoh na khaw KeiCal nu le pa cu an ha ther fiamfi te`n hmelse ngaingai in a hmu. Asinan Lal Ruang cun, ka rual cu hitluk nu le pa ṭha nei i zoh tlak lo na ti men hai, a tii i an hather tla cu faite`n a vung coih sak thluh. An nuupaa cun a vung lawm zok rero. KeiCal nu le pa cu an lungawi tuk i, “KeiCal, na rual pa na ṭhih ter a sii le nangmahin na tuar ding. Ṭhate`n kil aw” an tii. Ziangah tii le an khaw pawlin lamziinah an deh pang ding tii an phang.

Cuihnu-ah KeiCal cun Lal Ruang cu, “Ka rual, na ṭhi rah cu zaanlamah lo ta aw la, zinglam cu zingpitah ka tlun a ṭul ding” a tii i zaanlamah a lawh ter. Lal Ruang kahl cun phurhnak bawm tumpi khal a keng cuang lo. Ka kuakbawm khat lawngin ka lo men ding a ti. KeiCal khal cun ṭhi phur dingih rung pok i kuakbawm lawn run keng cu bawmpi run ken i tampi i phurh na duh lo maw? a tii. Lal Ruang khal cun, “Ka kuakbawm khat ka phurh cun a tawk mai ding” a tii san. Ṭhi rah cu Lal Ruang cun amahte`n a vung lo i a situng i a ṭhaṭha le a pawrpar a khiak i a lo zok rero.

KeiCal cun pamhmai a ti nasa. Asinan mai rual i thil lawh mi cu a sawm mi le a si fawn. A dawn ngam lo.  A kuakbawm khal le a khat lok thei fawn lo. An ṭhi rah cu a cem zik cuahco a bang. A situng ṭhaṭha a khiah zawngah KeiCal cun a ho a hun suah i, “Hngir” a hun ti ṭheu. Asinan a nu le a pain, “KeiCal um men aw” an tii i an rak dawn ṭheu. Cuti`n  Lal Ruang cun a kuakbawm khat a lawh cun a situng ṭha deuh le hahiozaa deuh pawl cu a cem deuh thaw thlang.

A thaizing cu vang-aar a khuanin, “Ka rual, tho thlang aw la, zingpit te`n na rak feh a ṭul ding. Cu le lamziinah na ek na rak thawh a sii le thilnu hi phulh vivo ta aw” a tii i rawl a khawh in zingpit teah an tlun ter. Khua a vaan ngah cun KeiCal i khawpi pawl cun Lal Ruang deh tumin an ra suak. “KeiCal, na rual ra suak she” ti`n an kotkheenin an rung au. KeiCal cun, “Rawl a ei lai” a tii san. Tawkfangah cun na rual ra suak she an ti laalaa. KeiCal cun, “A tiim a tuah lai” a ti san. Khua a tlai vivo. Tawkfangah cun, “KeiCal na rual ra suak she” an run ti thotho. Kei Cal khal cun a bum hai i; “Khah law, ka rual a ra suak e” a tii i an cuam sia hi sep suak na khaw an rak zon i an rak bawhṭhet thluh. Khua a tlai cuahco thlang i, “Na rual ra suak seh” an ti thotho. “A lupawng a pawng lai” a ti thotho. Netabik ah cun KeiCal khal cu a man vee thlang i, “Ka rual a ra suak e” a tii i amahin hmai a hruai i Lal Ruang cu an hei dawi ciamco. A ek an hi hmu i a rak thing thluh zo, a mawr thluh thlang a bang. KeiCal cun tlunpi a tum hai nan a khawpi pawl an lung a kim thei lo i an hi dawi thotho. Tawkfang an dawi hnu-ah cun an hi man zik thlang. Curuangah Lal Ruang cu saphu khua-ah a rak lut. Asinan a ke zimte kha a lang. Kei Cal cun ka rualpi pawlin an hmu pang ding tii a phaan ruangah thinghnah sawl a lak i a nen hnu-ah a toh nen. Cui hmunah cun an cawl.

KeiCal cun a ek le a thing thluh zo. Kan man nawn lo ding a ti hai. Asinan an tlun hlaanah thu pakhat a polh i, ”Tufangah hin ziang ha nan ṭihbik ding?” ti`n a sut. An ṭih ding thil cu a phunphun an rel i  Kei Cal cun, Kei cu tufangah hin khua rung ri durdo sehla, ṭek tla rung tla cupcoin rialruah bawkbawn tiatia in rung sur ciamco sehla, lei hnuai lamin phitte hung awn ngongo sehla ka ṭih bikk ding” a tii. A rualpi pawl kha cun kan ṭih vee ding an tii. Cuveete`n an tii vek cun khua a rii, niimthla a kau i rialruah thawn a sur ciammam i leihnuai lam cun phitte a hung awn cuahco ngaingai kha an thei. Cu cun an ṭih tuk i an khawziin zawhin an zuang tlung thluh. Asinan patarpa te pakhat cun, “A ek ka pal ngah i a hlum thurtho, Lal Ruang i sa ka ei loah cun ka tlung lo ding” a tii a tlung duh lo. Midang an tlun thluh cun Lal Ruang cu a hung suak i mikei patar pa cu a kianghrolin a thawi ciammam i a ha hmuah a beuh thluh. Cu`n mangbang vaansang in a tlung kir sal men. Khua a vung thlen cun a rualpi pawl hneenah cun, ”Nannih hmuah nan tlung thluh mai i kei hmauh nan tlun hnu ah Lal Ruang i sa ka run ei ciammam” a va tii san. Asinan an khawpii pawl cun an hnih a suak i, ”Nangmah sawn lehlam na ha beuh thluh koin a lo tuah a si lo maw” an rak tii san men.

Lal Ruang cu inn a va thleng. A ṭhi rah phurh mi cu kho-hraw pi-ah a hun sung i a khat thluh. An sungte pawl le innhneen rualpi tla an ko khawm i ṭhi cu suunvu in an thul zok rero. Hman cawk lo le orh cawk lo tiangin ṭhi an nei ta. Lal Ruang in ṭhi tampi a phur tii an theih tikah a naupa khal, “Kei khal ka rual i hneenah ṭhi rah ka phur ve ding,” a tii i a pok. Lal Ruang cun na thi ding. Feh aw hlah ti`n a dawn rero nan a duh lo i a pok thotho.

An khawlu tlang a vung tlenin, “Ku kha, Kei Cal nan rual ka rung tlawng e” ti`n a vung ku. Asinan KeiCal cun, ”Cu mi cu kei i  rualpa i aw a si lo. Curuangah nan mei thup duh hlah uh” a tii i an umkelin an um men. Lal Ruang i naupa cu a vung thleng i an inn saknak a vung thlen cun an mei sau ngiahngiah i an thlai aw kha a vung hmu i, “An mei sau ngialngial in” a tii i a vawk sak i a sep aw rero.

A zaan cu KeiCal nu le pa kha hmuh a duh vee i, “Ka rual, KeiCal, na nu le na pa i hmuh aw” a ti vee. KeiCal khal cun, “Kei i nu le pa hmuh tlak le zoh tlak an si lo” a tii. Asinan “Nu le Pa hmuh tlak lo le zoh tlak lo tii a um lo, i hmuh aw” a ti thotho. KeiCal khal cun, “Ka nu darkhuang khuh, ka pa maaihuum khuh” a tii. Vung ongin zoh na khaw an hmai baal thawn, an hmelsia thawn, an hather pi thaw cun a vung hmu. Curuangah Lal Ruang i naupaa cu, “Cu lawmmam i nu le pai` siat cu ee, an hmai baal le an hmelsiat pi thawn. An hather fepfep pi thawn, ningzakzaa an si hi” a tii i an siatnak cu a nautat zok rero hai. KeiCal nu le pa cun, “KeiCal, na rual na luat ter ah cun nang mahin na tuar ding” an tii.

Cuti`n ṭhi-rah cu i lo ter aw ti`n a diil hai. KeiCal cun a bawm khatpi`n a kaangsia le a caksia pawl a lawh sak. A thaizing cu vang ar a khuanin, “Ka rual tho awla tlung tlang aw, Lamziinah na ek na rak thawh a sii le thilnu hi phulh phah vivo aw la” a tii i khua a vaan veete`n an tlun ter. Khua a hung vaan cun Kei Cal i khawpi pawl cu an ra suak i, “Kei Cal na rual ra suak she” an ti laalaa. KeiCal cun, “Thaithawh a ei lai” a rak tii. Tawkfangah, “Na rual ra suak she”  an ti thotho. “A tiim a tuah lai” a tii san. Tawkfang a rei in, “KeiCal, na rual ra suak she” an run ti laalaa. “A lupawng a pawng lai” a ti fawn. Netabikah cun amah a suak i Lal Ruang i naupa cu an hi dawi ciamco.

Lal Ruang i naupa cun zingpit khua a vaan deuh hlaanah an tlun ter ruangah an khawsuah hnar lungdawl a thlenin, “Hitluk zaanlai i mi tlung ter hai” a tii i khua a vaan ngahih feh tumin a rak cawl. Kei Cal le a rualpi pawl an va thlenin, “Khuilam i uico rual ha an si” a tii i a kianghrolin a rak thawi ciammam i zohmanin an zon in an keu ngam loklo, Kei Cal in a zon i a zaksenin a piat i a thi. An zaaten a sa cu an ei i an tlun san  kir.

Lal Ruang cu a naupa tlun tii a neih nawn lo ruangah an thah a si tii kha a zum i hawl dingin a pok. KeiCal tei khua cu a va thleng sal. Lal Ruang cun, “Ka rual, ka nau teh?” ti`n a va sut. KeiCal in, “A hung tlun zo si, ka thei lo” a rak tii. Asinan phehawk a ṭha lo. Ka nau umnak i sim aw a ti thotho. KeiCal cun a sim ngam lo. A rual a thin a heng thlang ti a theih ruangah phehawk ṭha nawn loin a sim. Lal Ruang cun, “Na khawpi pawl ko khawm aw la anmah an ei mi cio luak sal hai she. A ruang ka din sal ding” a tii i an khawsenin an suak khawm. An ei mi cio cu an luak ter. Lal Ruang cun a hun zoh i a zak vun a kim lo. An hawl rero nan an ngah thei lo. KeiCal i rak ei mi a si. A rual hmaiah le a luak ngam nawn lo. Lal Ruang cun, Ka rual, luak mai aw” a ti rero nan a luak duh cuang lo. Lal Ruang khal cun a mangbangin a um sun a taksa dang kha a cam a cam i minungah a can ter sal i a zakkua a kim lo nakah siinthir phaw a ben sak. A naupa cu a nung sal.

Lal Ruang cun a naupa cu kan tlung thlang ding ti`n a sawm. A naupa cun, “Mahta mi khualtlawng men ziangah ha i rung hawl?” a rak tii. Lal Ruang cun, “Na ning hman zak loin na zakkua kha vun zoh hnik” a tii i vun zoh na khaw siinthir phaw ben mi cu a hmu i, “Hi lamlam i siinthir phaw na ben cu” a tii i a hlon. A siinthir phaw a lak vete`n a thi sal. A taksa a kim lo ruangah a nungsuak thei nawn lo i Lal Ruang cu a mangbangin a naupa i hngawngin a tan i a phur. A rual KeiCal i hneenah, “Ka rual, ka naupa na thah ruangah tu cun a that aw theithei kan that aw thlang ding. Kan ruak hnahah Hrang Sai pa`I Secang tilphir kan ruakhnah aw ding” a tii.

Lal Ruang cu ninghang lungsia in a tlung. Khua a thlenin a naupa cu a phum. A thlân-ka ah seentlung meipa minung bangin a tuah i a cam. Minung bangin puanlu a khuh i a ṭah ter zok rero. A kiangin Lal Ruang cun a bawh thup. KeiCal khal a rualpa kha deh dingin a ra hawl thlang. Thlaanka-ah miṭap rero kha a theih tikah ka rual kha si hmang pei e a tii i a pel, a pel i a zon ciamco. Cutiih a zon zawngah Lal Ruang cun a rak kah i a rual KeiCal cu cui hmunah a thi ta.

KeiCal i ruakhnah dingah an thukam cia bangin Hrang Sai pai’ Secang lei dingin a pok. Hrang Sai pai` inn a vung thlen cun a tapsakah a vung to. Hrang Sai pa cu dawithiam rak si vee khaw, “Thu hmekhmo tlang na hun hrawng, na hun hrawng i ka tapsakah na nung thu hmekhmo maw?” a rak tii. Lal Ruang khal cu dawithiam a si vee i, “Fim riangmang tlang ka hun hrawng, ka hun hrawng i na tapsakah ka hung fim riangmang maw” ti`n a let sal vee.

A zaan cu zaanriah an ei i Hrang Sai pa cun buhhlang pakhat kha a cam a cam hnuah Lal Ruang i hmaiah cun a thupten a seh. Asinan Lal Ruang in a thei i a ei duh lo. A rap tlunah thiahlei pahnih pherh ro mi kha a cam a cam i a nun ter hnuah a lehawk ter i a dawi awk ter zok rero. Hrang Sai pai fa le pawl cu thiahlei nuupaa te kha an zoh i an rawl ei hman an hngilh thlang. An hni an khek. An lungawi tukah an au rero i, “Ka pa, zoh hnik aw law” an ti rero kha a pa khal cun cu lawmmam ziangvek thil saw nan lungawi cu ti`n hun zoh duak na khaw a her sungah Lal Ruang cun a buhhlang kha Hrang Sai pai` hmaiah cun a hi she kir sal. Hrang Sai pa`n a thei lo i a ei ngah sual.

A thaizing khua a vaanin Hrang Sai pai` Secang cu Lal Ruang cun a khit i a fehpi. An hnar khaan tiang a hi thlah. Lal Ruang tlang a liam zawngah Hrang Sai pa cun, “Na kut le Sehri kha erh aw ta seh law”  a hi tii. Lal Ruang i kut le Sehri cu a erh aw ta. Lal Ruang cun, “Nang khal e na tonak lung le na taw erh aw ta seh law” a tii ta. Hrang Sai pa cu a tonak lungah a taw a bet i a ding thei nawn lo. Cuti`n a caarcirih ta  dah. Hrang Sai pa hnakin a thiam deuh ruangah  Lal Ruang cu a luat ta. A Secang caih mi cu a that i a rual KeiCal cu ruak a hnah.

Nikhat cu Suzangkak nui` hneenah Lal Ruang a leng. A zaan cu an it i Suzangkak nu i fanu hneenah Lal Ruang khal cun a naihniam thlang. A falanu cu “Ka nu aw, Lal Ruang in ka pawhte i tham, i tham” a tii. Asinan a nu-in, “Tham lo e, a kutin thlungte a tum,” a tii san. Tawkfangin, “Ka nu aw, Lal Ruang in ka su i tham, i tham” a ti sal laalaa. Asinan a nu cun, “Tham le e, a kutin thlungte a tum, a tum” a ti sal laalaa. Cuti`n Lal Ruang cun falanu cu a pom i nau a pai.

Nau a paai ruangah veikhat cu Lal Ruang kha hung tlawng dingin an cah. Lal Ruang khal cu lungawi zetin a hung tlawng. Asinan Suzangkak nu kha pom a tum sal laalaa. A fanu nau a pai ter i tluunah amah tiang pom a tum ruangah Suzangkak nu cu a thin a heng. An innleengah a tlan suak i, “Innpi lungpi kharkhep cang” a tii i a cam. Lal Ruang khal cun, “Cuvek nunau cu e” a tii i lunghlumin a deen. A lung tlemin a pop suak i innpi cu kharkhepah a cang i minung i on le bauh theih nawn loin lungpi ah a cang. Lal Ruang cu innpi sungah cun an khum ta.

Lal Ruang cu innpi sungah cun rilrawng cuahco-in a um ko. Asinan an raltluunah thiahlei pherh car mi kha a cam I a nun ter hnuah lungto-in a deen popnak ongin thiahlei cu a thlah i rawl a lak ter. Niti`n in cutin thiahlei in rawl a saan ṭheu. Nikhat cu thiahlei kha a innih vung dingin a thlah. “Kan innah vung aw la ka dawium te kha vung la aw. Na fehnakah thinglang hrimhrim zawh aw hlah” ti`n a tiam i a feh ter. Thiahlei khal cu a theitawkin a vung tlan i Lal Ruang  i dawium te cu vung la dingin a feh. A feh lamah cun thinglang a zawh ngam lo nan hung tlun soh lamah a rei tuk thlang i thlen zamrang kha a duh ruangah a nai deuh ding ti`n thinglang cu a hi zawh. Cutiih a thinglang zawh nakah cehfek thangin a rak awh. Cutiih thang i a awh cun dawium thiar mi kha a kaa ihsin a tla i tivapi in a fen. A dawium fenmi kha survorh pawlin an rak sar i an vuak kek. A ti ih a peh mi hmauhhmuahin dawi an thiam thluh. Cuti`n tutiang dawithiamnak khal a rung um vivo a si an tii.

Lal Ruang cu a dawium le a hneen a thleng thei nawn lo. A thiahlei rawl saantu ṭheu le a thih zo ruangah Suzangkak nui` inn kharkhep lungpi sungah cun suak thei nawn loin a thi dah ta.

 ************************************