Hello nan dam cio maw? Tuitum cu Bulpak sumtuahnak
(Own business) tuahpawl hrangih theih tengteng tulmi thu hlawmawknak kan nei
ding.
Bulpak sumtuah mihlawhtling, milianpawl minung zakhat
kha bulpak sumtuahnak hlawhtling dingah a thupi bik ziang a si tin va sut awla
sanlehnak bangawlo zakhat lai na thei ding. A hrek cun khawruah (Idea) tha a
thupi bik tin siseh,, a hrek cun suangtuahnak tha (Plan) a thupibik, a hrek cun
hlawhtling ding cun burkhawm hnatuan thiamnak (Team) a tul tin an lo sang
celcel ding. A taktak khalah hipawl hi a ṭul zetmi cu an si thluh ko.
Asinan
bulpak sumtuahnak (own business) kan thok ngaingai tikah mi tampi ih kan
theihhngilh ṭheumi pakhat a um. Cumi
thei ngahtu cu midang an hlawhsam zet laiah khalah hlawhtling in paisa tampi an
rak ngah ṭheu. A theilotu cun tlaksiatlam an pan theu.
Hi video sung ahcun bulpak sumtuahpawl ih theih
hngilh theumi, suahtuahnak ih thlawhtling dingih a thupibik lakih pakhat,
“Bulpak Sumtuahpawlih Theihtulmi” timi
run sim ka duh.
#2015 ih tuahmi talk pakhat ah Bill Gross in a
hmuhsuahmi rak simmi a nei. Ziangah bulpak sumtuah tampi cu hnaṭuannak hrang
khawruah (idea) thatha nei thluh cingin hrekkhat cu an hlawhtling ih hrekkhat
cu an hlawhsam timi zingzawinak a tuahmi sungah, a hmuhsuahmi cu sumtuahnak ih
hlawhtling dingah:
Sumtuahnak hrang tikcu dik timi cu zatek 42%
Burkhawm hnatuanthiamnak cu zatek 32%
Khawruah thiamnak (Idea) tha cu zatek 28%
Hnatuan kan dindan (Business Model) cu zatek 24%
Sumhramphun thiamnak cu zatek 14% an si tin a sim.
Sumtuahnak hnaṭuan kan thok tikah kan thilri ra
leitu, ra hmangtu, le ra eituding, cutomers-pawl man hlan le an tlin hlan ih
kan tuah asile kan hnaṭuan cu a hnget thei dah lo ding. Asinan a tlai tuk lala
asile sumtuahnak ah zuamawknak a natsat tuk ruangah duvekin a hlawk, a miat
ngah a har lala. Curuangah a tikcu kaih ciah ih hnaṭuan thok thiamnak hi a
thupit tuk hleiah sumtuahnak hnatuan hlawhtlinnak hrangih bawmtutha a si
ringring.
#Ṭhimnakah VINE app cu 2012 ah Social Media sungah a
rung lut. A thok ahcun hmangtu mipi an tam zet lawk nan leitlun huap mipi ih
hman ding ahcun mi tamsawn in an tlin hrih lo, an tiarcia lo ih a rei hlanah a
hlo sal.
Himi hi VINE ih tlaksiatnak tampi lakih a thupimi pakhat a si ve. VINE
thawi bangawmi TIKTOK cu a hmangtu leitlun mipi ih man tikcu, tlink tikcu, an
tiar-awk caan kan ti man pei, 2016 ah Social media ah a rung lutih tuinitiang a
hlawhtling. Cuvek thotho in Z.com timi entertainment website pakhat cu 1999 ah
an rak thok zo nan cui sanah Internet line a cak lo tuk ruangah a rak
hlawhtling thei lo. Amah thawi bangaw ciah Youtube cu mipipawl ih man le tlin
tikcu, 2005 ah a runglut ve ih nasa tukin a hlawhtling. Kawlram khalah IFLIX cu
2017 ah a rung lut ve nan zuamtu dang tam thawn, mi pakhat ih sumlut thawn
Online ihsin data leinak a khun tuk ruangah a hlawhtlin ding zat a hlawhtling
thei lo.
Himi video in a sim duhmi tak cu bulpak sumtuahnak
kan thok ding tikah na zuar dingmi, na tuah dingmi hmang dingin mipi lamin an
tlin maw asilole a miat umlo ding khawpin midang, zuamtu dangin hmun an rak la
thuk tuk zo maw? Na thilri hi mipi theihter dingah a tikcu ciah a si maw, tikcu
dik a si maw timi cu ruah tengteng tulmi le thupibik lakih pakhat a si.
Ziangahtile sumtuahnak hnatuan pakhat hlawhtling dingah a tikcu te ih
luhthiamnak, (Timing) timi ih thupitzia cu zatek 42 rori a si ruangah a si.
0 comments:
Post a Comment