Bulpak sumtuahnak (own business), tuah caak
zet nan ziangtin ka tuah thok ding ti
Sumtuahnak kan thok
ding tikah sumtuahnak hrang khawruah (Idea) tha timi cu a thupi hmaisa ah a
cang ringring. Sumtuah hlawhtling dingin Idea ṭha timi cu a thupibik lakih
pakhat a si ve. Facebook le Amazon pawl khi an sumtuahnak Idea a that tuk
ruangih hlawhtling tiih sim theihmipawl cu an si. An nih vekih leitlun huap ih hlawhtlin
ding cu ret hrih sehla, kan umnak khua le ramah bulpak sumdawnnak kan tuah
asile ziangtivekin sumtuahnak hrang Idea tha kan nei thei ding timi cu kan zoh
tlang pei uh.
Pakhatnak,
na kiangkappawl ih harsatnak kha cinfel sak aw. Tufang ih sumdawng asilole
sumtuah hlawhtlingpawl khi zoh awla an kiangkap pawl ih harsatnak cinfel sak
thei hnatuan a si thluh ding. Tahthimnak kan sim asile, a hlanah mi tampi in
video/zetka thatha zoh dingin DVD an lei, asilole khui sannak dawrah an va
sang. Cumicu tikcu a heu hleiah paisa a cem duh zet. Video zohpaih zettu pawlin
cuvek harsatnak an tong. Cuvek harsatnak tongpawl hrangah NETFLIX cun Online
ihsin ziangkim an tawlrel sakih cumi cun ,video zohpaihtu mipipawl a remcan ter
hleiah tikcu le paisa cem a mal ter. Cumicun Netflix ih hnatuan cu a tumin a
cak ter sinsin fawn. Cuvekin thotho in kan umnakah Mawtaw le Mawtaw cycle
kholhnak a um lo ruangah, kan kholh duh asile inn ihsn nahzi pakhat lai feh le rei a tul ṭheu.
Curuangah kan umnak ih tleirawl pa te cun sumhram malte thawn Mawtaw le mawtaw
cycle kholhnak tuah a thokih a kiangkappawl harsazetih nahzi pakhat lai feh tul
nawnlo dingin an harsatnak a cinfel sak. Midang hrang a that vekin a hnatuan
khal a tum in a karh sinsin.
Sumtuah kan thok ding
tikah kan kiangkappawl in ziangvek harsatnak an nei timi theih hmaisat a tul.
Cuhnuah ziangti zawngin ka cinfel sak thei ding timi ruah a tul. An harsatnak
na cinfel sak tam poh asile na hnatuan sumtuahnak cu na hlawhtling sinsin dingih
paisa hlawk le miat na ngah sinsin ding tinak a si.
Pahnihnak,
mihlawhtlingpawl kha cawng aw. Siangpahrang Solomon in Thusimtu 1:9 ah leitlun
ah zianghman thil thar a um lo a ti. Cuvekin sumtuahnak khalah midang ta an
cawng aw thluh ve ko. A mawi zawngin kan sim asile inspiration an la tinak
male. Kan nih vek cu simlo, leitlun huap company hminthangpawl hman an cawng aw
rero ko. Fiang deuh ih kan sim asile Apple company va cawngtu cu Xiomi company
an si. Asinan Appl in Xiomi cu taza a cuaimaw ti sehla a cuai hrih lo,
ziangahtile midang ta cawng dingin timtuahnak nasa zet le ralring zetih an tuahmi
a si ruangah a si. Kan nih khal mi hlawhtlingcia pawlih thiltidan kan cawn
asile hlawhtlin theinak lamzin a tam. Asinan daan in ziangcin a huap tivek daan
le duun thu, felfai zetih theih le zingzawi ta cu a tul ve.
Pathumnak,
khual tlawng aw. Himi cu pahnihnak thawn a bang aw deuh ko. Khual tlawngaw timi
cu nuamtawlin ei phah, it phah, facebook thamphah men ding tinak a si lo. Na
tlawnnak hmundang ram dangah ziangvek sumtuahnak in an hlawhtling ih ziangvekin
sum an tuah timi zingzawi phah dingah a si sawn. Hmun dangih a hlawhtling zetmi
sumtuahnak kha na umnak ah na tuah ve asile hlawhtlin theinak lamzin a um tam.
Kawlram ih sumtuahnak hlawhtling, mi tamsawn khal khi ramdang ta an cawncopmi, kawlram
ih an tuah sawngmi lawnglawng an si ko. Asinan hmundang ramdang ih a
hlawhtlingmi kha kan umnak khua le ramah a hlawhtling tengteng ding tinak cu a
si thluh cuang lo. Asinan a tikcu remcang le mipi man tikcu ih kan luh fuh
thiam a si ahcun hlawhtlin thei nak lamzin cu a tam ko.
Palinak,
Tufang sumtuah mihlawhtlingpawl ih tlaksamnak te hmu thei dingin zuam aw.
Ziangvek sumtuahnak hlawhtling khal tlaksamnak neilo an si lo. Ṭhimnakah, kan
innkiang ah fang dawr pakhat a um, an fang tla a tha ih a man thawn tla a kaih
aw zet, thil leitu mipi tla an ngah zet. Asinan cumi kiangah dawr thar pakhat a
ra um betih dawr thar te cun dawr umcia tei tuahlomi fang leitu tei inn tinah inn
tiang an kuat, an phurh sak. Cuveten dawr neta cu mipi leitu an tam sinsin ih a
rei hlanah dawr hmaisa te hnakin an tam. Cumicu ziangah ti asile dawr neta te
cun hmaisa tei dawrih tlaksamnak te an hmuh ngah ruangah a si. Mi hnakin sum
tuahnak ah na tlai, a umciapawl ih tlaksamnak le na thei cuanglo ih an mah vek
thotho in na tuah asile ziangtik hmanah midang na tluk thei lo ding. Thil leitu
na neih hmanah na thilri an duh ruangah siloin an lo hmaisawng ruangah a si
sawn ding.
Panganak,
Theihthiam thar tampin hawl aw. Your network is your net worth. Na
pehtlaihmipawl cu na neihnunnak an si. Sumtuahnak khawruah (Idea) tha na neihmi
na hmansuah ding tikah theihthiam thar tampi na tul. Mi pakhat in a umnak
kiangkap ah theihnak tete a nei ih ziangvek tuah sehla a tha, a thalo thei timi
khawruah an nei ve thluh. Cumipawl hnen ihsin tampi ruahnak tha le sumtuahnak
ih hlawhtlinnak hrang khawruah (idea) tha tampi an lo pe thei ding. Cumiruangah
rualpi le theihthiam thar tampi na tulnak cu a si.
Ok, himi Video hi a
tawinak in kan sim asile bulpak sumtuah kan thok tikah sumtuahnak hrangih khawruah
(Idea) thar ngah thei ding cun…
Pakhatnak… kiangkappawl
ih harsatnak cinfel sak thei dingin zuam aw.
Pahnihnak … Mi
hlawhtlingpawl cawng aw
Pathumnak … Caan ṭha
hmu thei dingin khual tlawng aw…
Palinak … Sumtuah
dangpawlih tlaksamnak te hmu thiam aw
Panganak. ..Rualpi
theihthiam thar tampi nei aw…
Na hrangah Ṭhathnemnak
malte tal a um thei ka beisei, ka lungawi.
0 comments:
Post a Comment