Chin-ram Misssionaries le Zumtu Hmaisa

Chin-ram Misssionaries le Zumtu Hmaisa
Ting Hlei Thang

A Sungthu

-          Chin State ih American Baptist Missionaries Ṭuantupawl le An Thu

-          Saklam (Northern) Chin State ih Karen Zirhtu A Ra Thlengmipawl

-          Hakha Peng le Zumtu Hmaisa

1.      Shia Khaw ih Thu

-          Tedim Peng le Zumtu Hmaisa

1.      Pau Suan ih Thu

2.      Thuam Hang ih Thu

-          Tonzang Peng le Zumtu Hmaisa

-          Falam Peng le Zumtu Hmaisa

1.      Thang Tsin ih Thu

2.      Cong Kham ih Thu

3.      Saya Ṭial Hmung (Shwe Hlaing) ih Thu

-          Chinmi Lak Ihsin Ahmaisabik Zumtu Mi Piangtharpawl

Thuhmaihruai

Chin ramih American Baptist mission pawl an ra thlen hlan ahcun Chin mipawl cu thingbul lungbul, rirai biak tilo cu biakmi dang kan rak nei lo. Kan Chinmi lakah Saya Ṭial Hmung (Falam) le Nuam Dim (Tedim) le an hopawl lawng hi Missionaries thlen hlanih Khristian rak si zo ih zum an si. Asinan an nih hman cu a cang thei tiih zumhmang men a si. Felfai ih ngan khummi a um lo.

Chin State ih American Baptist missionaries-pawl:
Rev. A. E. Carson le a nupi (15 March, 1899)
 Rev. Dr. E. H. East le a nupi (21 March, 1902)
Rev. Dr. J. H. Cope le a nupi (21 December, 1908)
Dr. H. H. Tilbe le a nupi ( 1902)
Dr. J. G. Woodin le a nupi (3 November, 1910)
Rev. C.U Strait le a nupi (17 October, 1925)
Rev. F. C. Nelson le a nupi (3 December, 1939)
Rev. R. G. Johnson le a nupi (7 February 1947)

Rev. A. E. Carson le A Nupi (Laura)

Carson cu 6^th August, 1860 ah Columbus U.S.A ah a suak.  Missionary hna ṭuan dingin 13^th December, 1886 ah Rangoon a ra thleng. Laura L. Hardin cu 28^th September 1858 ah U.S.A ah a suak ih 28^th November 1883 ah missionary hna ṭuan dingin Rangoon a ra thleng.

1883 ah Women’s American Baptist Foreign Mission Society of the West in Laura Hardin cu kawlramih Missionary dingah an thlah. Cutin Bassein ih [Karen] Mission School ah zirhtu a ṭuan phah. Kum thum a rei hnuah American Baptist Missionary Union in kawlramih a hmaisabik missionary an thlahmi Rev. Arthur E. Carson thawn Bassein ah an nei aw. Cuihnuah Carson le a nupi cun a hmaisabik Chin Mission cu Thayetmyo ah an rak tuah.

1896 ah British colonial thuneihnakin Chin Hills Regulations a suah ih British colonial officer Captain Dury in Carson cu Laimi hnen ih mission hna, ṭuan dingin a sawm. Cucu Carsons le American Baptist Missionaries Union (ABMU) cun Chin miphunpawl hnenih thuthangṭha simtheinak canṭhabik tin an rak ruatih 2 February, 1899 ah Carson cun Thayetmyo/ thlanglam laitlang a suahsan ih Rev. Arthur E. Carson, Mrs. Laura Carson (Carson ih nupi), Karen ih a mah bawmtu Thra San Win, India rawlsuangpa le an nu (kawlmi), Thayetmyo ihsin Chin Khristians pahnih cu March 15, 1899 ah Hakha khua an ra thleng. Carson Chin ram a thlen thu cu hmakhatte ah a thang cih vekin Chin pawlin vunrang minung an hmuh hmaisabiknak khal a si. Mrs. Carson in a thlennak minungpawl hnenah ka-ang dingin a dil hmaisabikih an ha an ṭhuah maw ṭhuah lo ti a zoh hmaisabik.

Cutin theitawkin ṭawng an zir, mission umnak an tuah, inn an sak, tlawng le kawhhranpawl an din, ca tla an let ih evangelism campaign tla an tuah ih Chin pawlthawi a remcangbikih um theinak ding hrangah a phunphun an tuah.

A hmaisabik Chin Hills Baptist Association tla March 25, 1907 ah a rak thawk pi. Chin ramih Pathian hna, kum-nga an ṭuan hnu lawngah a rah an hmu (mipakhat a piang thar). Tuahcun Chin-ram ih Chinmi 90 % hnakih tam cu Khristian ah kan rung cang ve thung. Arthur Carson cu April 1, 1908 ah a nunnak a liam. Laura cu a palsalin a thihsan hnuah 1924 tiang a mission hnaṭuan a run peh. A hardamnak a bese tuk ve thlang ruangah United States ah a kir.

Rev. Dr. E. H. East le A Nupi (Emily East)

Rev. Dr. East le a nupi Emily East cu Chin mipawl hnenih si-bawi (medical) missionaries an si. 1902 ah damlonak ruangah U.S ah an kir sal. 1903 ah Hakha sizung ih ihkhun 20 tal tuahsak thei dingin sumpai thawn Hakha ah a ra kir sal. Dr. East hi Chinmi lakih mipiangtharpawl Baptistma pe hmaisabiktu missionary khal a si.

Rev. Dr. J. H. Cope le A Nupi (Elizabeth Cope)

Rev. Dr. Joseph Herbert Cope le a nupi (Elizabeth Cope) cu Rev. A. E. Carson ih hnaṭuan bawm ding le hlawhtling ter sin dingah 1908 ah Chin-ram an ra thleng. 19^th April, 1910 ah a umnak (headquarter) Hakha ihsin Teddim ah a ṭhawn. Dr. J. H. Cope hi kum 30 sung missionary lawng siloin British cozah tuahmi Chin-ram pumpi ih Honorary Inspector of School ṭuanvo khal a kai phah. A nih cu Falam le Tedim ṭawng tuahsaktu tiih theihmi khal a siih ṭawng tuahsak lamih hna a ṭuan rero laiah Lushai (tu ih Mizoram, India) mi, Mr. Hau Dala in a rak bawm. Dr. J. H. Cope cu 11^th June 1938 ah Hakha ah a thi ih cutawkah phum a si.

Dr. H. H. Tilbe le A Nupi (Clara)

1902 ah Dr. Henry H. Tilbe le a nupi Clara cu Rev. East bawm dingah Chin-ram ah an ra. Asinan kum hnih hnuah U.S ah an kir sal.

Dr. J. G Wodin

Dr. J. G Wodin cu Chin-ram ih a pahnihnak sii lamih rami missionary a siih, 6^th January, 1915 ah a kir sal.

Rev. Chester Ulyses Strait le Mrs. Florence Strait

1925 ah, Rev. C U Strait le Florence cu an ra thleng. Thuthlung Thar kha Hakha ṭawngin a let ih 1932 ah a ṭheh. Chin mi hrangih a hmaisabik Bible tlawng hrang ṭuanvo a lak tikcu hi 1928-1932 hrawng a si ding tin an sim. Chin-ram ih kum 15 lenglo hna a ṭuan hnuah, 3^rd January 1942 ah America ah a kir sal.

Rev. Franklin O. Nelson le A Nupi Mrs. Phileda Nelson

3^rd December, 1939 ah, Rev. Franklin tei nupa cu Teddim ah an ra thleng. Leitlun ralpi vawi hnihnak ruangah India ah an tlan. Ral a cem hnu ah an ra kir salih Tiddim ah Bible tlawng an dinih cumi cu 1947-1950 hrawng  a si ding tin an sim.

Rev. Dr. Robert G. Johnson

Rev. Dr. Robert G. Johnson hi Chin ram hrangih a ne tabik American Baptist Missionary a siih a nupi cu Elizabeth E. Johnson a si. 1948-1950 ah Hakha ah Bible tlawng a din. Solfa notation thawi tuahmi Chin Hymn Book tla a tuah ih 1970 ah an nam. 1965 ah Kawl cozah in missionaries hmuahhmuah kawlram suahsan dingih thu an rak suah ruangah,  28^th May, 1966 ah United States of America ah a kir sal.  

A tlungih tarlangmi American Baptist Missionaries-pawl ruangah le an pumpekawknak hmangin Pathian thutak kan rak thei.

Saklam (Northern) Chin State ih Karen zirhtu a ra thlengmipawl tla a hnuaiah malte kan tarlang pei:

Hmin                                     Kum                                                   Hmun

1.      Thra San Win                                      1899                                                    Hakha

2.      Thra Po Ko                                          1900                                     Hakha, Tedim, Tonzang

3.      Thra Shwe Zan                                    1904                                       Khawsak, Tedim Area

4.      Maung Gone                                       1906 c.                                        Laizo Falam,  Area

5.      Thra Po Aye                                        1906 c.                                   Lumbang, Falam Area

6.      Maung Lwin                                       1907 c.                                      Zokhua, Hakha Area

7.      Maung Kwine                                     1907 c.                                                Falam

8.      Maung Kya                                         1907 c.                                                Thantlang

9.      Thra Kyi Ghine                                   1908 c.                                                Hakha

10.  Thra Phe Gyi                                       1910 c.                                                Hakha

11.  Thra Benny                                         1910 c.                                                Hakha

12.  Thra Aung Dwe                                  1910 c.                                      Hakha, Falam, Tedim

13.  Thra Sein Po                                        1910 c.                                                Tedim

14.  Thra Maung Maung                            1910 c.                                                 Tedim

15.  Kyaw Khin                                         1910 c.                                                 Tedim

16.  Mahn San Tun                                     1920                                                Zathlir, Falam

Hminsin:

1.      Reverend Sang Fen in a cabute sungah Thra Maung Lun a thlen hlanah Saya Maung Kya le Sya Kyi Kaing (Asho Chin) cu Zokhua an thleng zo tin a ngan.

2.      Khuasak ih Thra Shwe Zan a thlen hlanah Tiddim ih Superintendant Assistant in Saya Tun aung an thlah, asinan a nih cu zu a ri ringring ih a umnak ah an kuat. (Captain Kham Cin Khai ih note).

A tlunih tarlangmi Missionaries pawl ruangah Chin ramah Thuthangṭha a karh vivo kan ti thei. A tlangpithu in kan zoh sal ding.

Hakha Peng Zumtu Hmaisa

Rev. Arthur Carson le a nupi cu March 15, 1899 ah Hakha an thleng. An thlen pekah mikhual an si bangin an tharhlam tukih cukhatu tla an nei lo. Asinan Saya San Win in thusimnak a nei ih Shia Khaw cu a piangthar. Rev. Carson in January 1, 1906 ah baptisma a pe.  Himi mipakhat a pianthar hnu in thluntu malte an nei. Cutin zumtu bur fatete cu an kawmkhawmaw ih Hakha Baptist Church timi an din suak. Cumi ih sungtel pahra pawl tla cu: Shia Khaw (Hakha baptisma co hmaisabiktu), La Khu (Hakha nunau baptisma co hmaisabiktu), Ngaih Ling, Tial Pam, Tum Tlik, Phir Thang, Chan Duai, Huat Ling, Tum Kir le Chia Khawm tla an si. Cui Kawhhran tharih Pastor cu Saya San Win a si. Mrs. Cope ih simdan vek asile Saya Kyi Ghine cu a hmaisabik pastor asi, ziangahtile San Win cu a hardamnak ih a tlin nawn lo ruangah a ṭuan thei lo.

1.      Saya Shia Khaw

Saya Shia Khaw ih pai hmin cu Za Mual a siih a nui hmin cu Khitang a si. Vungtu (Ngalang) aniam Zophei ih rami an siih 1892 ah a suak.

March 15, 1899 ih Carson le a nupi Laura Hardin Hakha an thlen laiah Shia Khaw cu kum sarih mi tee lawng a rak si lai. Cu lai ahcun British uknak hnuaiih um a siih British in salpawl cu a pu/pi hne ihsin tlansuah an rak siang. Curuangah Shia Khaw tei’ sung khal Sui Ling an suahsan tuih Dawrhlun timi ah an um. Dawrhlun cu Chinese kutzungthiam le sumdawngpawl umnak a rak si. Curuangah Chinsese quarters (Taluk Sang) Za Mual, tin an rak ko ṭheu. Lehhnu ah Shia Khaw ih pa cu rinlopin a rung thi.

Rev. Carson in hmunram, 30 acres kau cu Lian Mo, Sangte Lal hnen ihsin Rupee 35 in a rak lei. Carson cun Dawrhlun ih um hmuahhmuah cu mission compound ih um a rak sian ruangah cutin Shia Khaw khal mission compound ah a rak ṭhawn ve.  Salpawl an rak ṭhawnnak hmun cu “salbuk” tin an rak ko. Cumi salbuk cu tu ih State Middle School Pyidawta khi a si. Dr. Newland khal Salbuk ah a rak um dah. Carson cu mi farah harsapawl cu a zoh, a cawm ih an hrangah tlawng a phuan. Carsons in Shia Khaw cu 1902 ah tlawng a kai ter. Carson Chin hills ih a rat lai ah Karen mino Saya San Win cu thusimtu le zirhtu dingah a rak hruai. Shia Khaw cu Saya San Win ih thusimnakin a piang thar. Rev. Carson in Shia Khaw cu January 1, 1906, Siangpa tili ah baptisma a rak pe. Curuangah Shia Khaw cu Hakha pengih a hmaisabik piangthar le baptisma cotu a si. Baptisma a lak lai ah kum 14 lawng a si lai. 1906 ah phun li camibuai a awng. March 1907 ah Saya San Win ih zirhnak hnuai in Kawl-ca phun nga a awng. Phun nga a ṭheh ah thla khat Rs. 35 ngah dingin ṭawng leh hnaṭuan an pe. Asinan a rak el.

1907 ah Dr. East in Shia Khaw cu Yangon ih Bible tlawng (tu ih M.I.C.T) kai dingin a rak hruai. A kum hnih nakah a nau Sai Khuai a thi. A nau a thih hnu in a sungkua cawm dingah Hakha ah a kir sal.

Saya Shia Khaw cu 1914 ihsin 1919 lakah Sakta ih American Baptist Mission Primary School ih sayakyi a ṭuanih Ngun Hngel timi fala thawn an nei aw. A nupi cu Daw La Khu, Haka pengih baptisma la hmaisabik (October 1, 1906) ih fa nu a si. Shia Khaw le Ngun Hngel, Sang Ling le Sai pen tepawl cu nikhat ah an nei aw ih Rev. Dr. Joseph Herbert Cope in kut a sih.

Shia Khaw cu 1919 ihsin 1920, 1920 ihsin 1923 cu Zokhua ih American Baptist Missionary School ah hotu (sayakyi) a ṭuan. A.B.M tlawng cu 1924 ah an phih ruangah 1925 ihsin 1951 tiang cu Hakha ih Primary School ah tlawng sayakyi a ṭuan.

A Missionary Hnaṭuandan

Saya Shia Khaw cu Sakta khua, A.B.M tlawng ah 1814 ihsin 1918 tiang zirhtu a ṭuan. Tlawng zihrtu lawng siloin Pathian thu khal a sim. A tlawngtapawl cu Khristian si ter a duh, ziangahtile Shia Khaw a thlen hlanah Sakta khua ah zohman Khristian an rak um hrih lo. A thlen hnu ih Khristian cangmipawl tla cu, Za Ling, Thang Tu, Ral Mang, Mang Sum, Thawng Luai, Ṭial Hmung le Chia Bil. An pariat in 1919 ah baptisma pek an si.

Saya Shia Khaw cu Sakta ih a um laiah inn khat hnu inn khat feh in Pathian thu a sim. Pathian a lo sersiamtu a siih Amah nan zum lo asile hell ah a lo thla ding tin a rak sim. Zirnak a thawh zik tinten thlacamnak a nei ta ringring. Thla a cam thluh in hymns (Khristian hlabu) a sakih cu hnuah Bible a siar. Cu hnu lawngah zirhnak a thawk.

Saya Shia Khaw cu a lenglam thu lawng siloin harhdamnak, duhdawtnak, rualpitawknak, le pawlkawm thupawl tla a sim. Cuhnu ah thlacamnak ih thil ti thei zia, ziangkim Pathian ih ta a si ziapawl tla a zirh. Ruk ru lo dingin a simih, “minung hmuh lo ih a thuptei thil nan ruk khalle Pathian in a lo hmu thotho” tin a sim. Congthia khua ih Van Nawl in, “Pathian in innsung le a thimnak tivek a hmu thei sawm” tin a sut. Saya Shia Khaw in, “Pathian cu a mit kau pi a siih innsung le a thimnak khal a hmu thluh thei” tin a rak let. Amai zirhnak ruangah cumi laiah rukru le fifir tla an um lo.

A sim ringringmi cu Khristian nun cu hnuaidawrnak a si tihi a si. Cucu Pathian ih a duh tukmi a si, curuangah dangdawr ten um uhla hngal hlah uh.

A ni netabik

Saya Shia Khaw cu 26^th May, 1952 ah, Hakha ah a thi.

Tedim Peng (Sihzang)

Saya Shwe Zan cu Hakha ihsin Khuasak ah March 31, 1904 ah a feh. A hnaṭuan cu a hlawhtling zetih Pau Suan le a nupi Kham Ciang, Thuam Hang le a nupi Dim Khaw Cing, mi pali cu zumtu ah an cangih Rev. East in May 11, 1905 ah baptisma a pe. An mah pali hi Chinmi lakih piangthar hmaisabik cu an si. February thla 1906 ah mi pasarih cu Dr. East in baptisma a pe sal. Cutin a hmaisabik Baptist Church cu February 17, 1906 (inrin zing) ah Tedim peng Sihzang valley ih Khuasak khua ah an din. Sungtelpawl tla cu: Pau Suan le a nupi Kham Ciang, Thuam Hang le a nupi Dim Khaw Cing, Lam Shwin le a nupi, Tum Lian le a nupi, Sou Tun, Toum Ting, le Tua Neh pawltla an si. Saya Shwe Zan cu pastor ah hril a si ih Pau Suan le Thuam Hang cu deacons ah hril an si. Cubetah February 18, 1906 (cawlhni) ah Dr. East in Bawipa Zanriah zemnak a nei. Cutin Saklam Chin State ih a hmaisabik Kawhhran cu Khawsak khua ah sungtel 11 le Karen pastor thawn din a si.

1.      Saya Pau Suan ih Thu

A hmaisabik Chin-mi lakih Zisu Khrih cu ka Lal le i Rundamtu a si tiih rak cohlang hmaisabik cu Pau Suan a si. Pau Suan cu 1878, Khuasak ah a suak. Pau Suan cu Thuam Tak hrin, Kun Tong cithlah a siih Do Thang ih fapa upabik a si.

Pau Suan cu Thra Shwe Zan ih thusimnak ihsin 1904 ah a piang thar. A tlunih tarlang zo bangin Dr. E. H in 1^st February, 1906 ah Thuam Hang le a nupi le midang pasarih thawn baptisma a rak pe. 1910 ah Theizang Baptist Church le Thangnuai Baptist Church cu Khuasak Baptist Church ihsin an ṭhawn ruangah Saya Pau Suan cu Thangnuai Baptist Church ih pastor hmaisabik a si.

Saya Pau Suan cu a hnaṭuan a sunzawm lo ruangah ordained ta lo in a um, cutin 1951 ah a thi. A nupi hmaisa Kham Ciang cu a thih hlan ih a thih ruangah Son Kho Dim (Kham Ciang ih tu) cu nupi ah a run nei. A nupi hmaisa thawn fapa pahnih a nei ih Saya Lian Zam (a hmaisabik Tiddim Baptist Church, Pastor), le a nauta deuh cu Vai Ko Thang (Adventist Development and Relief Agency ih Rev. Kenneth Suan Za Nang ih pa) a si. A nupi neta thawn fapa pakhat an nei ih Vum Za Lian a si.

2.      Thuam Hang

Thuam Hang cu 1870 ah, Khuasak khua ah a suak. Thuantak hnam Tongseal cithlah a siih a pa cu Hang Suang a si. A pa cu pre-British san laiah sinak sang le lar zet a rak si. A nu cu Pi Hau Cing a siih a hmin thang zetmi Buanman Lal, Pu Thuam Hau ih fanu a si.

Khuasak ih Thra Shwe Zan evangelist le zirhtu a ṭuan laiah Thuam Hang ih fapa Suang Kho Kam cu nasa zetin a na. An mah rirai biakdan ah an neihmi thil hmuahhmuah cu thlarausia (khawsia) hnenah an pe thluh nan a dam thei cuang lo. Asinan Thra Shwe Zan in: “Thin phang aw hlah, ka biakmi Pathian na biak ahcun thlarau ṭhalopawlin na fapa cu zianghman an ti thei nawn lo ding, an mah ṭih khal a ṭul nawn lo ding. Pathian hnenih thla ka cam asile na fapa ih natnak hi a hlo ding” a ti. Thuam Hang cu a lung a awi tukih 25^th, July 1904 ah Thra Shwe Zan cu an inn leng dingin a sim. “Cumi a taktak asi veten Pathian kan zum ding”.

Hi thil a can ihsin thawk, Thuam Hang cu Thra Shwe Zan hnenah casiar le cangan a zir ih Pathian thu khal a zir ringring. A hmaisabik Khristian ih cang a si bangin Chin-mi lakih thusim hmaisabik khal a si. Hi caanah zumlotu, ririai bia mi tamsawn ih duhdan vekin Khristian cu an umnak Khuasak ih um an siang nawn lo. Curuangah Thuam Hang le a sungkuapawl cu “Khuakhuan” timi hmunah an um, tui ni tiangah hitawkih umtu an um lai.

Thuam Hang cu Khristian hlabu (humnals) le Bible leh hna a thawk ih cutin 1925 ah Hakha an an ordained. Tiddim le Sukte kiangkap ih Khristian-pawl khal a run zohkhen. Saya Thuam Hang le Saya Pau Suan cu Chin-ramih zumtu hmaisa bik an si bangin harsatnak phun zakip an tawng, an innpawl an ur sak, an lo rampawl an siatsak tivekin harsatnak phun zakip an tuar.

Rev. Thuam Hang cu Khuasak Baptist Church ah a kum sawmriat tiang pastor a ṭuan ih cuntin Khrih sal ṭha, riantuṭha rinum zetin 1951 ah leitlun a suahsan. A fapa umpabik Saya Suang Kho Kam cu a pai thih hlan kum tam nawnah a thi. A fapa lai, Kham Za Cin cu a tleirawl laiah a thi. A fapa nautabik Mang Khaw Pau (a pahnihnak ZBC G.S) a si. Fanu pahnih a neiih Mang Za Cing le Khan Huai an si.

Tonzang Peng (Kamhaus)

1905 ah Saya Po Ko cu Kamhau hnampawl hnenih thusim dingih fial a si bangin August 1905 ah khawbawi Hau Cin Khup ih lungkimnak thawn tlawng an din. Po Ko cun tlawngta mipa pahnih, Son Vung (kum 17), Tuitom khua ih rami, a pianthar dan thu September 1905 ah a phuang, le Hen Za Kam (kum 16), ni malte rei hnuih piangtharmi cu Dr. East in February 27, 1906 ah Hau Cin Khup le a khawpipawl hmaiah baptisma a pe. Dr. East cun khawbawipa cu baptisma pek lai ih theihpitu lawng siloin Khristian sinak khalah phur zet ding le Pathian biak duhnak nei dingin ruahsannak a rak nei. Asinan 1910 ih Dr. Cope Tedim ih a ra thlen tikcu ahcun khawbawi cun Khristian cu a duh nawn lo. Cutin 1913 ah Saya Po Ko cu Tonzang ihsin a dawisuak. Luan Za Cing ih simdanvek asile Hau Cin Khup in Tonzang ihsin Saya Po Ko a dawinak san cu “zumtu tharpawlin cui khua ih khawsia/khuavang an biaknak biakṭheng an siatsuah ruangah a si” tin a sim. (By Saya Stephen Vum Cung Nung’s Thesis, page 69, Personal interview with Nu Luan Za Cing on May 17, 2006 in Yangon).

Falam Peng

Falam peng ih thuthangṭha kan theihnak cu Karen pawl hnenin a si. Falammi sungin piangthar hmaisabik cu Thang Tsin (Lumbang khua) a si. A mah cu Saya Po Aye ih thusimnak ihsin piangtharmi a siih Rev. Carson in September 5, 1906 ah baptisma a rak pek. A pahnihnak cu Tsong Kham (bualkhua) a siih Rev. Carson in 1907 ah Hakha ah baptisma a rak pek. An pahnih hi zumnakih pacangṭha an siih evangelists vekin an minungpawl hnenah theitawkin thuthangṭha an sim. A pathumnak cu Saya Ṭial Hmung (Lungpi) a siih a nih cu Chin-mi lakih casiar le cangan rak thiam hmai sabik khal a si. Chin-mi lakih zumtu hmaisabik ding ih zum-um zet asinan a thuhla hi felfai ih nnganmi a um lo ruangah a si. An pathum (Thang Tsin, Tsong Kham le Ṭial Hmung) tepawlih thuanthu kan zoh hnik ding.

1.      Thang Tsin

A Suahth

Thang Tsin cu Falam peng, Lumbang khua ihsin peng hnih hrawng a hlatnak Khawlei khua ih Pu Con Khup le Pi Nei Tlang tei’ fapa upabik a si. A suah kum hi theihfel a si lo ih 1881 si thei ding bikih zum a si. Nau pahnih a nei ih…Pa Cin Lian (Rev. Za Duh ih pa) le Pa Za Lian (Captain Pawlu) ih pa tla an si.

A Hmin

Thang Tsin a suah hlan, a nui pumsungih a um lai ah a pa in mang a nei ih a mangah, vun-rang (mirang) mi pathum an ra ih an neih dingmi an fate cu Thang Tsin tiih hmisak dingin an ra sim.

Ziangtin Lumbang A Thleng

Pa Thang Tsin kum 6 a si ah a pa Pu Con Khup cun a thih san. Cuihnuah Lumbang khawmi Pu Hun Hlum in Nei Tlang (Thang Tsin nu) cu nupi ah a run nei. Cutin an sungin a pa-ei ih umnak lumbang ah an ṭhawn.

A Fimthiamzirnak

Lumbang khawuk (Chief of Lumbang) Nei Vum (miuk Hlur Hmung ih pa) in Thang Tsin cu Falam ah ah tlawngkai dingin a kuat. Cutawkah Sailo tiih kawhmi thawn thukam elawknak an neih ruangah tlawng ihsin an rak dawi. Laizo mi palik zunghnaṭuan Tha Hnok timi in a inn ah a rak hruai ih casiar le cangan a rak zirh. Cule rangrawl (pony fodder) hrang hrampi lak ding hna a ṭuan ter phah.

Cui caan laiah Far-thling lak hi a rak lar zetih Chief Nei Vum in Thang Tsin cu a tlawngkainak a hlensuah theinak dingah cumitla a rak ṭuan ter phah.

A Piantharnak

Karen zirhtu evangelist Saya Po Aye cu 1906 ah Lumbang a thleng. Chief Nei Vum cun Thang Tsin cu cui Missionary ṭawng lehsak ding le a ṭulmi tete tuah sak dingin a hnenah a um ter. Cutin Saya Po Aye thawn an um tlang vivo ih a nelam ahcun Khristian ah a cang. Thang Tsin cu Rev. E. Carson in 5^th September 1096 ah Lumbang, Singsih kiangih amai rak laihmi tili te ah Baptisma a pe.

Himi thu ah Laura Carson in a mai nganmi cabu “Piooneer Trials, Trials and Triumph” timi Cabu sungah, “Thang Tsin ih Baptisma a lak ni kha cu ka hngilh thei dah lo, ‘mang ṭha’ ti dingin kan hnenah a ra ih ‘ka minung, ka khawpipawl hnenah Zisu Khrih thu ka va sim dingih ziangtluk mi lungawi so ka si ding, kei cu ka zum, ka khawpi zaten an piangthar thluh ko ding’ tiih phur zet le mithmai pante ih in ra sim lai tla kha ka hngilh thei dah lo” tin Laura Carson cun a cabu sungah ah a ngan.

A Pianthar Ruangah Khua in Dawi

Carson Laura cun “cutin phur zet le ruahsannak thawi a va tlun laiah cui Khristian asinak thuthang cun Thang Tsin cu khaw-lal hnenah a hruailut” a ti. Khaw-lal cun, “Ramdang Pathian na bia tin ka thei, thil cang thei a si lo, ramdang Pathian na biak asile hi khua ah na um thei lo” a rak ti. Asinan Thang Tsin cun, “Aw, asinan cui mangbangza Pathian, in duhdawttu le kan sualnak ihsin in rundamtu ih thuhla cu in simter hramaw” tin a dil. Asinan khaw-lal cun “Ziang thu hman in sim hlah! Kan khua ah um cingin khai Pathian cu na be thei hrimhrim lo. Na thil tuahmi hi kan pathian in a theih le a thin a heng tuk ding hokhaw, kan ci tuhmi an keuh thei lo ding, kan rannungpawl an pung thei lo ding, kan nauhakpawl an thi dingih harsatnak le riahsiatnakpawl kan parah a thleng ding. Ramdang Pathian hi be lo in na um sawn ding maw khua ihsin na suak sawn ding” tin a ti.

Ruahsannak umlo asi ticu Thang Tsin in a hmuh tikah British bawi-upa hnenah a feh ih mi pakhat Pathian a biak ruangah khua ihsin dawi a theih timi British daan ah a um maw tin a sut. A nih in a mah lawng cu sehla a pawi lemlo, asinan nufa nei a si tikah a nufa zoh a ṭul ding, Khristian le an si hrih fawn lo, tlansan thei a si hrih lo a ti. Malte an biakawk hnuah cui bawiupa (Superintendent) cun, “A ṭha, Tang Tsin, nan khua ah va tlung sal awla nan khua ih na um sung, missionaries hna na ṭuannakah zohman thinheng dingin va tuah hlah aw, British cozah in na kiangin kan lo dinpi ding. Khaw-lal khalin Khristian pawlih Pathian na biak ruangah khua ihsin lo dawisuah theinak a nei lo,” tin a sim. Cui thupek khal cu khaw-lal hnenah kuat cih a si.

Cutin lungawi le aipuang ten khua ah a tlungih mina umnak, mithi umnak le harsa umnak tinkim ah feh in thil ṭha tuahnak thawi a minungpawl Pathian lamih hruailuh ding ṭuanvo a pe aw. Lo thlawh tikcu a rung thlen tikah khaw-lalin Thang Tsin cu a ko ih ramdang Pathian na biak lai thotho asile thlawh dingmi loram (an pupa san ihsin an ram) cu lawnsak a si ding thu cu a sim. Tang Tsin cun midang hnenih thil ṭha tuah lawng si ka tum, loram cu kan sung hrangah in laksak hram hlah uh tin a dil. Netabikah khaw-lal hmuhsuamnak thawn hni phahin, “thlawh ding loram cu na duh ngaingai asile zohmanih thlawh dah lonak ram (sacred field) na thlawh a ṭul ding” tin a sim. Cui hmun/loram cu khawse umnak tiih an ruahmi asi ruangah zohmanih an thlawh dah lo nak a si. Cun cui loram thlotu/tuahtu cu an thi ding tin an rak ruat fawn.

Tang Tsin cun phur zetin “Cui hmun cu ka thlo thei taktak ding ti aw” tin a sut. Khaw-lal cun, “ Aw, thleo thei e” tin a sim. Zing khat cu Tang Tsin in cui hmunram a thlawh rero lai an hmuh tikah an mang a bang tuk. An ka ang ciocio in an zoh ih ziangtikah Tang Tsin a thi ding timi hngakin an um. Asinan thih ti a nei lo ih a kiang nai ih rapawl hnenah Pathian thu a sim sawn.

“Cutikah Tang Tsin in, “Ziangruah ah ka vainim cu nan vainim hnakin a let deuhthaw in a tam, ka hlamhmai the ziangah a tum sawn, ka lo thilpawl an lo thil hnakin a lehhnih deuh thaw ih a tam/tum ruangah mi hrekkhat cun a thupten na Pathian cu kan pathian hnakin thil a ti thei sawn si tin in ra sim, cutin mi tampi cun Pathian an run zum phah,” a ti.

Laura Carson cun, “kum cem lamah kan hnen (mission) ah a ra ih himi thu pawl in ra sim tin” a cabu “Pioneer, Trials and Triumphs” ah a ngan.

A Rawngbawlnak

Cutin Thang Tsin cu Saya Po Aye hnen ihsin Khristian thuhla a zir, a zingzawi vivo ih rawngbawlnak lamah kekar a thawk ve. A kum 25 ahcun thusimtu pakhat a si zo. Ahlecei in Falam peng Zahau, Sim, Zanniat, Ngawn le Khualsim rampawlah khaw khat hnu khaw khat feh in thuthangṭha a sim.

Saya Thang Tsin cu 25^th March 1929, Hakha, Chin Baptist Association meeting ah ordained pek a si.

Hlan Chin Khristian hnaṭuantupawl sanlai ahcun nang khuitawk hmun, khuitawk peng, cutawk hmunah na ṭuan ding tivek a rak um lo. Asancu hnaṭuantu Pastors an mal zetih hnaṭuan ding le a tam zet ruangah a si. Thang Tsin ih hnaṭuan thupi bik pakhat cu Evangelist asilole khualtlawnnak ah Rev. J. H Cope le Saya Maung Gone bawm hi a si. Hualngo ramih Darkhai khua le Kalay-valley ih Angteng khua pawl hi a dunglam le hmailam ram ih an fehnak hmun an si. Cuihnuah Nahnuai (tuih Chang U kiang) le a caan ahcun Lusei hills ih Aijal tla an thleng ṭheu.

A Harsatnak

Rawl A Ei Thei Zet

Saya Thang Tsin hi thuthangṭha simih khual a tlawn tikah zo hmanin umnak ṭhiṭha an rak pe lo. Mihrek cun umnak le riahnak tivek an rak pe ṭheu nan a man cu hmuhsuamnak le camsiatnakpawl a si ṭheu. Vawikhat cu a khualtlawnnak ah mipakhat in nutar umnakah thlen inn a rak awn, asinan inteknu in a kawk ciamco: “na fehnak tinkimah arsa, arti le sa thawthaw tivek lawng ei na duh, hivek na duh ruangah thuthangṭha na sim awter! Ningzah neilo, rawlpham, Thang Tsin” tin a rak kawk.

Rev. Cope Thawn

Vawi khat cu Thang Tsin le Rev. Cope cu khual an tlawngih tiva an thlengih tiva tan a ṭul tikah Rev. Cope cu a buut hlih a tumih Thang Tsin cun: “Na buut hlit aw hlah, kan thilri ka phurh ṭheh hnuah ka ra lo paw ding.” Cope cun “Thang Tsin, na ti thei ngaingai ding maw si? A ti. Cule Thang Tsin cu Rev. Cope cu paw phah in tiva cu an hi tan, vansiatah tiva lai hrawng an thlenah lungnal a pal ngahih an pahnih in ti-lak-ah an bah ciamco ih an ciar thluh.

Awm-ang-tawk an feh bet hnuah Rev. Cope cu a ke khatlamin lungnal a pal sual ih a bah lala. A bah nasa deuh a si hmang, Saya Thang Tsin cu a um thei lo ih nasaten a hni ciamco ih a biangah a mitthlipawl hman a luang thei rori. Rev. Cope cun thinheng mithmai thawn Thang Tsin a zoh hnuah Thang Tsin, hitluk ka bah na hmu cingin na hni thei rero lai ti, na aa thlang maw si? Thang Tsin cun “tuihlanah vun-rang (mirang) bah ka rak hmuh dah lo ihsi” tin a simih a hni sinsin. Rev. Cope khal cu Thang Tsin a hnih tuk ve ruangah a um thei nawn lo ih an pahnih in nasaten an hni ta ciamco.

Sumpai Lamih A Harsatnak

Saya Thang Tsin cu thlatin missionaries bawmnak Rs. 15 tilo cu sumlut a nei lo. Cumi a ngah sunmite thawn a rawngbawlnak a feh ṭheu. Cubetah a khualtlawnnak ih mi harsa farah retheipawl tla cui a neihsunte sung ihsin a pe ṭheu. Cumi thotho in a nufa a cawm phah tikah Rev. Cope hnenah kum khat sungih a ngah dingmi thlahlawh suah dingin a dil. Cumi paisa a cem tikah Rev. Cope cu paisa cawih dingin a va dilih Rev. Cope khalin Rs. 240 a rak cawih. Himi paisa a hmang salih ka rul sal thei nawn lo ding ti a theihawk tikah Rev. Cope a sim salih a leiba cu kuan nawn lo dingin a rel sal.

Pathian Hnaṭuannakih A Nun

Lumbang khawukte le tlangsuakpawlin Thang Tsin ih thusim cu an zum thei lo. Curuangah khaw hruaitu upapawlin Thang Tsin cu ram siatnakhmun khawsepawl umnak cu lo ih tuah dingah an sim, cutawk hmun, khawsepawl umnakih lo a tuah le a thih an zum. Asinan zianghman a cang lo tikah a thusim cu an zum thlangih zumtu ah an cang. Cui an pekmi hmun cu “Singsih le Zaiti” an si. Thang Tsin cun ka Pathian cu ziangkim tlunah nehtu a si, cumi ruangah khawsiapawl umnak hmunṭhalo ka thlawh ngamnak le ka tuah ngamnak khal Pathian hrangah le a Mai ruangah a si tin a sim.

Rev. Carson in Thang Tsin cu a lo thar tuahnak hrangah American vainim ci, India vainim a rak pe. Vainim laak a cut tikah Thang Tsin cu a paṭha tuk, vainim ṭha zetzet a lo ihsin tawrleseng a suak ciamco.

Ahlawhtlin Ruangih Harnak

Cui laiah khawsungmi in lo thar an neih ding tikah cui an loram thar thlawh dingah khawsia an ti lungaiw ta ṭheu. Cumi hrangah 8 annas rate (pia kan timai pei) an rak pe ṭheu. Asinan Christian mimalte cun an rak pe duh lo. Pathian ih falete kan nih hrangah khawsia biaknak hrang paisa pe ding kan silo an rak ti. Khaw-lal le tlangsuak upa pawlin “Nan Pathian cu ko uhla Hakha, Tedim asilole Kalaymyo lamah va tlanhlo uh” tin thinheng zetin an sim.

Saya Thang Tsin cu Falam ah a feh ih thuneitu ṭuanvoneitu (superintendent of sub-division) hnenah mi pakhat a hlawhtlin le Pathian a biak, khawsia a biak lo ruangah khua ihsin dawisuah theinak daan (law) a um maw timi a sut. Cuihnuah cuvek ruangah zianghman khua ihsin dawiawk theinak daan a um lo thu a thei ih cui zung ihsin hlawhtlin ruangih kaihmi luarter dingin thupek a si.

Mi Buancak Thang Tsin

Nikhat cu Laizo khua ah thuthangṭha sim dingin Thang Tsin cu a feh ih cui khua ih khawlal le upapawlin Thang Tsin cu an va tawng. Anlakih mi pakhat mikhimi deuh (scoundrel) in “ Lumbangih nan miuk Hlur Hmung cu zianghman a si lo, a phunpipawl hrang khalah ziang ṭhatnak hman a tuah lo” tvk in a va ti. Cumi cu Thang Tsin hrang ahcun ngaithiam har zet a si ruangah “ a ṭhat le ṭhat lo cu nang thawn ziang sai” tin Thang Tsin cun thinheng nawnin a let ve sal. Cutikah cupa cun a va pawmih a va buan cih. Amah cu culai Laizo khua ih mi buan cak bik a siih zo hmanin a hlanah hivekin an rak neh dah lo. Thang Tsin cu thlacam phah au phah in “Ka biakmi ka Pathian, in bawm hram aw, nehtu cu nangmah na si” cutin Thang Tsin cun a rak buan ve ih vawi thum rori lei ah a hlawn. Saya Thang Tsin cu Pathian ih siahhlawh taktak a si. A nehnak ruangah uang-aw le puarthau loin a zanlam ah buan a nehmipa cu a va lengih Rs. 2 a va pe. Cui hnuah midang hmuahhmuah hnakin cupa thawn hmaisabik rualpi ṭha ah an cang ta.

A Lamzin ah Pawpi Thang

Vawikhat cu Tlorzan khua ah thuthangṭha sim dingin a feh ih cui khawpawl cun theihtheih lo dingin a lamzin ah ‘Pawipi’ thang an rak kam. Vanṭhatnak ah rang a rak hruai ih cui rang ih ke hmailam pahnih in cui thang cu a pal ngah. Cutin cui’ thang ihsin a luat.

Khua ah Lut Siang Lo

Vawi khat lala cu thuthangṭha ruangah Khualsim tlangtluan lam a feh ih Hmungsum khua a thleng. Cutawkah khawsung ih luh an sian lo ruangah vainim-kan bar khat hrawng le hnakphek bawl (chilly chutney) cu zanriah ah ringin khawleng ah a riak.

Cawl-lo ih Pathian Thu Sim/Rel Paih A Si

Ni khat cu Khupleng ihsin Vanniam lamah a pawkih zanlam hrawngih thleng dingin a um. Lamzin a feh lai ah Tashon (tlaisun) khaw tlawng ding Tlortang khua ih Kang Bil thawn an tawng aw. An tawnawknak cu Phau tiva ah a siih Tlortlang a nai sawn. Thang Tsin cun Pathian thu rundamnak tvk a sim ciamco. Cutiih Pathian thu an ruahawk sungah tikcu tampi a rak liam ih nitlak a rak cu zik thlang ruangah an pahnih in Tlortang ah an kir ih Vanniam ih riak ding cu a Pathian thu sim/relnak ah Tlortang ah an riak.

A Hlawhtlinnak

Thang Tsin ih Zumnak

Saya Thang Tsin cu zukhmawm, le wine le beer in tivek duhlo zettu le zumnak hnget zetmi a si. Culaiah “Pau Cin Hau biaknak” timi a rak umih annih cun zu-in le khawse biak tivekpawl tla pawi an rak ti lo. Cuvek thotho Phun Suak biaknak timi a rak um thotho ih an nih khalin zu-in tla an rak siang thotho ve. Culaiah Baptists pawl cu Thang Tsin ih lam an siih a dangpawl tla cu Pau Cin Hau ih group asilole Phun Suak ih lam an si tin theih a si. Phun Suak amah khal cu Lumbang mi a si ve.

Thingfacin Theihternak

1923-24 ah Chin Christian Association meeting cu Lumbang ah an tuah. Cutawkah American Baptist Mission Field ih Secretary Dr. Wiaff khal a kai ve. A sermon nakah Dr. Wiaff cun mipi hnenah 2 anna (pia 2 kan ti mai pei) a piah ih hitin a sim, “Zisu Khrih ih rundamnak cu himi pia 2 vek hi a si. Zokhalin nan ra la thei ih nan nei thei. Zo si ra la ding?” Cuveten Thang Tsin cu a tonak ihsin a dingih a va lak. Lehhnu ah cui paisa cun hai-rah a lei ih a ci a cing. Saya Thang Tsin cu thusim lawng siloin cicin daan tla a zirh phah.

Bible ka duh, meithal ka duh lo

The Deputy Commissioner Lt. Col. Burne cu Northern Chin hills ih British Civil administrator ih duhzetmi tin theih a si ih a zung cu Falam ah a siiih cutawkah cumi hna ṭuan reibik khal a si. A nih cu Saya Thang Tsin thawn nelawzet le rualpi ṭha an si ruangah na duh asile meithal ka lo pe ding tin a sim. Asinan Thang Tsin cun “Pathian ih siahhlawh ka si vekin meithal ka ṭul lo, Bible hi ka meithal a si” tin a sim.

Fimthiamnak Zir Dingin Thazang A Pe

Saya Thang Tsin cu hmailamthu ruatthiam zettu a si. Thuthangṭha simih a vahsuah tikah Pathian thu lawng siloin thingfa cindan a zirh phah ih fimthiamnak tla theitawkih zir/zuam dingin thazang a pe ringring. 1914-15 kum sungah, a naupa Za Lian le Parte khua Za Hlur, Zimte ih Hlei Sum, Rah Mang le a fapa Phu Tsi le a fanu Mary le Ma Me Caw, Phaizawl ih fala nute, Rev. Za Duh, Saya Ngaih Sum, Ma Al Nei, le Lumbang ih Lian Bia, Saya Len Thang le Bualkhua ih Hmung Bil, Tlorzan ih Sat Hmung, Lungpi ih Ngun Sang, Haitui khua ih Zung Zal, Darbo ih Hran Tiam, Van Hnuai Sang le Angten ih Pa Tum, Fungmual ih Akheng, Ca Cuai le Heluk khua ih Mang Nim pawl tla cu fimthiamnak le ziangkimah thazang a pe.

Ngaih Sum tla cu a nauhak lai ihsin ṭha hleice in a zoh ih Haka ih mission tlawng ah a kuat. Lehhnu ah Toungphila ah hna a ṭuan ter.

Dad khua Tawl, Do Sang, Than Thuam le Lal Lam Do pawltla Thang Tsin ih ruangah missionary tlawng an kai phah.

A Thlacamnakin Thli le Ruah A Dai Ter

Ni khat cu a missionary khualtlawnak ruangah Manipur tiva a thleng. Cutawkah thli le ruah in nasatukin a nuam ciamco ruangah a khuk-bilin thla a cam. Cuveten thli le ruah cu a reh reprep, mero dumpi khal a kiang ṭheh ih cutin dam le tluangten Hmunli khua a va thleng ih thin diriam in thuthangṭha a va sim.

Ni Khat ah 64 Baptisma Pe

March 20, 1931ah Chin Baptist Association meeting cu Bualkhua ah tuah a si. Cui ṭumah amah in mi 64 cu baptisma a pe. Himi hi a sansungah ni khat ih baptisma a pek tambik ṭum a si. Amah lawng asilo missionaries Chester U. Strait le Herbert Cope pawltla an lung a awi tukih cui’ thu cu American Baptist thuthang an suahmi ah an hi sim. Cui’ thu ruangah cutawkih milianpa tla Thang Tsin ih tuahmi le a nunah a lung a rak awi ve tuk.

Cutin Thang Tsin ih thlahlawh cu Rs 15 ihsin Rs. 20 ah an ṭhan sak.

A Hrang Ni Neta (tlailam ni khal a liam miarmo)

February thla 1932 ah deistrict meeting cu Toungphila ah tuah a si. Saya Thang Tsin khal cui’ meeting tel ve dingin a feh. Cui’ Associatoion District meeting ṭheh ah Dr. Cope thawn Khualsim peng lam tlawng dingin tumtahnak an nei. Cutin an khualtlawn an thawkih a rang thar leimi to phah in an feh. Cutiih rang a to lai ah a rang cu a khir ih tlunih a hun seh ruangah a tai ih thlaihmi namte cun a tai ah a sun ih a pumpi lam tiang a ngah tikah nasaten hliam a tuar, a nat cu a bese tuk. Cutin Kalaymyo civil sizung ah an phur. A natnak cu damlam a pan thei lo ruangah U Hlei Hmung ih umnak innpi ah an phur kir sal. Ni 11 a rei hnuah a ihnak ihsin tho thei nawnlo in March 7, 1932 ah a sersiamtu a biak Pathian tawn dingin a feh.

Tahan ih Tuah Hrang, Methodist Pastor in a run phum.

A falepawl

1.      U Phu Ci

2.      Daw Sung Hnia (Rev. Charles Hrang Tin Khum ih Nu)

3.      Daw Mary (Sayakyi Zung Lwei h Nu)

4.      Daw Khawm Cung – Singapore ih Galu Indra Bahadur ih Nupi (a tattooist)

5.      Daw Esther Kyin (Mrs Son Kho Pau, Dr. Vum Za Cin Pau ih nu)

6.      Daw Phua Khin (Mrs. R. Lian Kim, Ral Lian Bawi ih Nu)

7.      David (died an infant)

2.      Cong Kham Thuanthu

Cong Kham ih thuanthu kan vun zoh sal tikah hmin ngandan ihsin thawk cabu pakhat le khat bangawklonak tete a um. Ṭhimnakah ‘Laura Carson’ cun “Tang Tsin, Tsong Hkam” tin. ‘Kip Thian Pau’ cun “Thang Tsin, Cong Kham” tin. ‘Lian H. Sakhong’ asile “Tsong Kham (Cawng Kham)” tvk. Kei cun Cong Kham tin ka nganih an cabu ka rawnnak zawntete ah cangantui ngandan vekin ka ngan vivo. A thuhla bangawklonak lakih langcu zet pakhat cu khawtlangih an vuak thu ah a si. Kip Thian Pau in a cabu sungah vawi 5 an vua tin a tarlangih Rev. Robert Johnson in vawi 15 an vua tin a tarlang. Laura Carson ih nganmi hi ka thlunmi a siih fiangfel zetin a tarlang lo nan vawi 15 hnakih tam an vua in a lang.

A Suahthu

Cong Kham cu 15^th August 1875 ah Bualkhua ah a suak ih a pa cu Pu Phawng Thang a si.

Hlan Thu

Cong Kham tei cithlah hi an pupa san ihsin rirai bia (animism) puithiam an rak si. Cule hitin zumnak a rak um. Sankhat hnu sankhat an fa upabik kum 12 a kim tinten cui puithiam ih pa cu a thi ringring tin an rak zum. Ziangruangah hitin a cang ringring ti cu zo hmanin an thei lo. Mihrek cun an biakmi khuavangpawl lungawilonak an nei a si ding tiah an rak zum. Hi harsatnakih rahsuah cu sung cithlah an pung thei lo.

A Piantharnak

Cong Kham cu a fa upabik kum hleihnih a kim tikah ka thi thlang ding asi tin thinhar in a um. Curuangah a thinlungin cui thihnak ihsin luat theinak dingah biaknak dang pakhat khat a hlam thlang. Vanṭhat ah Rev. Dr. E. H. East le Saya Thang Tsin cu Bualkhua ah Pathian thu simin an rung thlengih thuthangṭha an sim thawk. An thusimmi cu hitin a si, hi leitlunah Pathian diktak pakhat lawng a um. Cui Pathian cun leitlun minungpawl hi in duhdawt tuk ruangah kan sual ruangih thi ding cu a Fapa neihsun Zisu Khrih kan hrangah in pe, asinan ni thum hnuah a tho sal. Cumi a zumtu hmuahhmuah cu zovek miphun, ziangvek zumnak neitu an si hmanah kumkhaw nunnak an nei ding. Culawng asi lo, cui Pathian cun ziangvek khawsia le thlarau ṭhalo thiltithei khal a neh thluh. Cui thusim cu Cong Kham in a theih tikah a hawl reromi biaknak diktak le luatnak diktak cu a hmu ngah thlang ta!

Tikcu tam a rei hlanah Cong Kham cun cui’ biaknak a thlun ih harsatnak tete a tawng ṭan. Ziangahtile a nih cu puai nikhua le an pathian biak canah an sungkua cithlah daan vekin thil-hlan le ziangkim cu a mai ṭuanvo lak tengteng ṭul asi. Kherkherin cui kum cu puai ropi tuah ih an sungkaw za in thlarau biaknak nasatak nei dingih an timtuahawkawk kum kherkher a si. Cong Kham cu cui an pathian hrangih thil-hlanpawl le ziangkimah ṭuanvo a lak nawn lo bakah cui puai hmanah a tel nawn lo. Ziangahtile a nih cu hlanih a biakmi biaknak cu a tlansanih Khristian biaknak a kai hnget zo. A minungpawlin cui thu an theih tikah an thin a heng tuk. Ziangahtile himi puai ah an tuah dingmi an tuah lole kan khua kan ram ah harsatnak, farah pamnak tipawlin in nen ding timi ruahnak hngetkhoh an rak neih ruangah a si.

Baptisma A La

Thla thum lenglo tiduhdah le harsatnak a tuar hnuah Chin Baptists ih a hmaisabik convention an tuah ni 31^st March, 1907 ah baptisma a la. Cui meeting ah mipum 18 an rak kai ih Saya Thang Tsin in Cong Kham tla a pianthar ruangah tiduhdah le harsatnak tam zet tuarzotu a si ve ruangah baptisma cotlak a si tin an rak sim. Cui’ meeting thawk hlante ah Rev. A. E. Carson ih baptisma a rak pe.

Cong Kham ih nupi Seng Thiam le midang piangthar Pa Thuam Mang tla October 1907 ah Rev. Maung Goon in baptisma a rak pe.

Rawngbawlnakih A Hnaṭuan

Pa Cong Kham cu Pathian thu sim ta lo in a ni a hmang cem dah lo. A nih cu puai tuahnakih zu le sa, ei le in ih an umnak hmun ah a feh ṭheu ih Pathian thu a sim. Zuri ih lam nawn lo dingin Pathian thu a sim. “Zisu Khrih nan zum asile tui zuri, hlasak le lamih nan nawmawknak hnakih let zakhat in nawmnak nan hmu ding”, tin a sim.

Vawihnih-khat cu minung pahnih lole pathum te an um khalle Khristian Hla (hymn) pawl an sak. Cucu thluak hmangih rirai biak hnakin Khristian biaknak hi a dik sawn a si tiih zumlotupawl thinlung la thei dingih an tumtahnak pakhat a si.

Hitawk khua lawngah a si lo. Thuthangṭha a karhzai vivo thei nak dingah Ngawn ram lam ah tla feh in Pathian thu a va sim. Caan tamsawn cu Thang Tsin thawn an feh. Himi hi a si Ngawn ramih Pathian thuthangṭha a thlennak cu!

Saya Thang Tsin ih a thihsan hnu ahcun Rev. Than Sai (Rev. Than Sai cu Farrawn ihsin rami a siih missionary pakhat a si) thawn an thlunaw ih cutin hmunkipah thuthangṭha an sim.

Tiduhdahnak le Harsatnak

Cong Kham cu Bualkhua ih puithiam sang (chief priest) a si bangin rirai biaknak thawn pehparin a mah cu mi thupibik pakhat a si. Curuangah a khawpipawl cun hlanih a biakmi rirai biaknak cu bia sal dingin an sawm. Hotu pakhat thawi biaknak ruangih an biaksawnawknak tla hitin ngan a rak um:

Hotu                : Kan pupa san ihsin kan mahte biaknak rak nei mi kan si ti cu na thei ko lo maw? Khristian biaknak kha tlansan awla kan hnenah ra sal aw!

Cong Kham     : Cungnungbik Pathian ka biak hnuah nan hnen ahcun ka kir thei hrimhrim lo ding.

Hotu                : ‘Zu’ na in lo asile na na ding, na ṭawl vivo kei lehhnu ah na thi leh ding.

Cong Kham : Himi ruangih thih ding asi ahcun ka thi ko pei, a pawi lo.

Hotu                : Nangmah lo theihthiamnak dingah inn khat Rupee fang khat cio kan khawng ding kan lo pe ding. Na khawpipawl hi in duhdawt lo maw si? Na khawpipawlih kan tuar dingmi harsatnak hi teh in ruahsak thei ve lo maw si?

Con Kham       : Duh tuk e, ka khawpipawl ka lo duh hai tuk. Curuangah ni khat nini ahcun hi biaknak thlarau siapawl hi tlansanin lei le van sersiamtu a nung Pathian nan run be leh ding. Nan biaknak ka lo biakpi velo ruangah cun zohman nan thi hrimhrim lo ding.

Hotu                : Nang cu puithiam sang na si, zu le sa cu na hnenah hlan a si, cucu na lungkim thei nawn lo ngaingai ke maw?

Cong Kham : Kim lo, ziang hmuahhmuah hnakin Pathian ih remdaihnak hi ka duh bik.

Cong Kham cu paisa le a duh thei dingmi thil dangdang thawn tlawn lungawi an tum rero nan a theih hrimhrim lo, a zumnak cu a hnget khoh sinsin lam. Amah lawng an thlem a silo, a nupi Nu Seng Thiam khal an lem, an thlem ih an hringhro nan hngetkhoh zetih an zumnak an dinpi ruangah zohman an hlawhtling lo.

Rorelnak Sang ah An Thlen

A khawpipawl cun ziangti hmanin Cong Kham cu an zumnak zum kir sal dingin an  hruai kir sal thei lo ruangah cui ṭumih an tuahmi puai ropi ah rorelnak hmaiah an thlen. Hmanseh Cong Kham cun “ka parih tuah nan duhmi cu tuah ko uh!” timi bak kamkhat te hman a ṭawng ve lo.

Cutikah a khawpipawl cun inn-puai hrangih a zuatmi a vawk pahnih cu an kaih sakih a fang khawlmipawl tla cu ‘zu’ tuahnakah hman dingin thupek a si.

Cuihnu malte a reiah, zing khat cu a inn ah an va lut ih thawhhlam a rak ei rero lai an hmuh tikah bel le kheng sungih a hmuhmi rawl le ziangkim an hlawn sak thluh. An sungkua tei lo an feh caan khalah a hmuhsalmi cu a suanciami rawlpawl hmuahhmuah cu an rak hlawnsak thluh.

Cubetah an khaw hruaitu in Lumbang khaw-lal zungah thu a thlen.

Lalin Hliakhlai

Lumbang lal, tlangsuak-upa le khaw hruaitupawl tla cu cui thu hliakhlai dingah Bualkhua ah an rung thleng. Cong Kham cu rawl a ei rero lai, hmaisabiknak buh a barih a dawlh man hlanah an va dir suakih lal hnenah an va hruai.

Lal                   :Ziangah nang cu Laimipawl lakih puithiam sang na si cingin Khristian ah na cang? Kan biakmi khawzing thinheng ding le in siatsuah thluh ding hi na ṭih lo maw si? Na khawpipawl an thih thluh ding teh hi na ṭih lo maw si?

Cong Kham: Rin-hlelh ding a um lo, ka khawpipawl cu ka duhdawt tuk. Asinan      Khristian ih ka can ruangah ka khawpi zo hman an thi lo ding. Ka biakmi kumkhaw Pathian cu kan rak biakmi khawzing hnakin a tumlian sawn. Ka Pathian cu ka tlansan thei hrimhrim lo ding.

Lal                   : Asi ahcun nan khaw-lal le tlangsuak upapawl, kei mah tiangin ṭihzah upatnak na pek lo ruangah tlang ih vuak na ṭul ding.

Cong Kham     : Aw Lal, nan thu ka lo thlun lo ruangah ka parih tuah nan duhmi ziangkim tuah ko uh. Nan duh ahcun in vaw thei.

Lal                 : Harsatnak lo pek hi kan duhmi a si lo. Cun himi thu ruangih Mirang Kumpi/cozah (English Government) hnenih feh tla kan duh lo. Kan lo sim rero si, himi ramdang Pathian na biak asile kan zate parah harsatnak a thleng ding. Ramdang Pathian hi tlansan awla paisa ‘rupees sawmthum’ ka lo pe ding” a ti. ( rupees 30 cu $ 10 tluk a si).

Cong Kham     : Nan thei thiam hrih lo. Khristian biaknak hi a dik ruangah ka zumih   ka thlun. Khristian ka si ih ka si ringring ding.

Lal cun ka lem thei lo, ruahsannak a um lo ti a theih tikah “ ka nun sungah tui sun nangmah thawi kan biakawk tlukih ka hnuaidawr lai a um hrih lo. Curuangah ramdang Pathian na tlansan ding maw miih tuar dahlomi nasatei vuak na hril sawn ding”? A ti. Tsong Hkam cun “vuak ka hril sawn ding, in vaw ko uh,” a ti.

Khawtlangin Vua/Thawi

Lal cun Lati ihsin mi sang zet le Lumbang ihsin a dang pakhat Con Kham vawtu ding le sunhlu kung hngeṭek nel ṭhazet (branch of wild plum tree) a run keng cia.

Himi hi March ni 2 nak, 1907 ah a si. Lal cun Cong Kham cu mi pathum in vawi hlei-nga ciar Lal hmaiih vaw dingin thu a pek. Mi pathum an si tikah vawi 45 a si tinak.

A vawtu ding mi pathum cu thupek lawng hngakin an tiar cia ṭhepṭhep ih Cong Kham cu vawikhat, vawihnih, vawithum…tvk ih rak siartu ding Lal hmaiah a ding. Hmaisabik a vawtupa in a vaw ṭheh ih a pahnihnak ih a vuak thawk tikah Tsong Hkham cu a tuarmi a natsat zet ruangah a tuar thei nawn lo ih leilungah  a tlu.  Tsong Hkham cu zianghman a rak ei lo tikah vun tuar bet thei dingin a pumah rawl a um lo ih a thazang a der zetzo ruangah a tho sal thei nawn lo. A kut a thlir ih, “malte in hngak hrih uh” a ti. Cutikah vanlam a zohih “Aw Pathian, an sualnak ngaithiam hram aw, ziangahtile a nungmi kumkhaw Pathian Nangmah an lo theihlo –  an theithiam lo” tin thla a cam. (Bible sungih Stephen vek)

Cuihnuah amah vawtupawl lamah a her ih, “Ra uh, ka man sal zo. I vawtu ding pa khat a tang lai a sisi.”A zumnak ih a hngehkhoh zia cu Lal in a hmuh tik ah a tlan. Cutin zo hmanin an dai ngam nawn lo. 

(Rev. Robert Johnson cun a cabu sungah vawi 15 an vua tin a ngan. Kip Thian Pau cun a cabu sungah vawi 5 an vua tin a ngan. Kei ka ngandan hi Laura Carson ih nganmi sirhsanin a siih vawiziat ti fukfi ih nganmi a um lo nan a ngandan vek asile vawi 15 tlun an vua ti theih a si).

Saya Thang Tsin In A Dam Tiang A Tuamhlawm

A tupate in ramsa menbang nasa tukih a pu an vuak a hmuh tikah, “Khaw-lal, ka pu hin na nu a lo thah sak maw si? Na pa teh a lo thah sak dah maw si? Ziangah minung cu hitluk lawmamin nan vuak?” tin a au.

Saya Thang Tsin khal cu a um thei ve nawnlo ih kei tla in vaw ve uh tin a au! Asinan “Nang cu na luan lo, zaran na si, asinan Cong Kham cu puithiam sang a si, a hnaṭuan a ṭuan duh lo ruangah vuak ding hrimhrim a si”. Thang Tsin cun tuisan ah sualnak neilomi pakhat vuak a theih timi daan a um maw si tin tuletu a au.

Cutin Thang Tsin in Cong Kham cu a natnak le hmapawl a dam tiang tuamhlawm dingin Lumbang ah a hruai. Ni nga sung cu a vaksuak thei lo.

Cong Kham malte a dam deuh hnuah Thang Tsin in Falam Sub-division ih thuneitu superintendant hnenah zangfah kan va dil dingih cutin na vawk le na fangpawl an duhduh in an lo laksak thei nawn lo ding tin ruahnak a pe. Asinan Cong Kham in cumi cu a duhlo ih hitin a sawn sal, “Leitlun thilripawl neih duhnak thinlung ka nei lo, an duh vekin ka neihmi thilri cu hmangin la ko hai seh. Dikfelzet le daan thawn ka thilripawl ka ngah sal thluh asile an hnenah Pathian thu sim theinak lamzin a pit sawn pang ding, ka lamzin khamtu a si sawn pang ding. Ka thilri inlawnmipawl ngah sal thluh hnakin Pathian thu thawi neh ka duh sawn”. Cutikah Thang Tsin khalin, “Si e, na ngaidam thei asi ahcun, himi hi Khristian pawlih a thupibikmi kan ziaza cu a si” a ti.

A Inn le Lopawl An Lawng

Cu tiih damlam a pan vivo tikah inn ih vungtlun ih a ṭhanson sinsin theinak dingah a hnaṭuanpawl daitei vung ṭuan sal cu ṭha bikin an ruah sak. An khua ahcun a vung tlung salih zing khat cu lo a feh ih tirhfung ih thlahmi mi pakhat a tawng. Cupa cun, “Hitawkah ziang na ra tuah? Ramdang Pathian na biakih na tlansan hlan sung cu hihi na loram a si nawn lo” a ti. Cule Tsong Hkam in, “Si e, hihi ka lo a si nawn lo” tin a sawn. Cutikah inn ih meisa-tih dingmi thingpawl a phurih inn ah a tlung sal. Inn a thlen in a thing phurhmi cu a thingkhawn ah a ret. Cuveten mibur tamnawn an ra ih, “Hitawkih thing na rak phurh a ṭul nawn lo, ziangahtile hihi na inn a sin awn lo. Khawl-lal in midang a pe zo. Na nupi khal a sal dingah a la zo ih nang khal ramdang Pathian na biak lai thotho asi ahcun a sal ah na cang ve ding” an ti. Tsong Hkam cun “Aw si e, a sal ah ka cang ko ding”.

Tsong Hkam cu lal tei innah a va feh ih thla tamnawn cu an hnaṭuan a va bawm taktak. Khaw-lal hnenih a um khalah a rinumnak le dingfelnakin khaw-lalih thinlung a neh zet.

Tikcu a liam vivo bangin Haka ah Association um ding a siih Tsong Hkam cu lal hnenah feh in “Haka ah Khristian pawl meeting kan nei ding. Ka hnaṭuan tla felfai zetih ṭuan ka zuam. Na hnenah vawikhathman siannak (permission) ka lo dil dah lo feh ka duh tuk, a ngah maw”? tin a dil. A dilnak vekin siannak pek a si. Cui tawnkhawmawknak (meeting) pi an neih tikah baptisma la dingih hmin an runsalmi sungah Tsong Hkam ih hmin tla a tel. Thuhla pakhat khat ruangah baptisma ngahtlak lo a si tiih titu nan um maw tiih thusuhnak neih asi laifangah  Tang Tsin in tui ka lo simmi thu hi a relsuak a si tin Laura Carson in a cabu “Pioneers Trials, Trials and Triumphs” sungah a ngan.

A hnuaiih a ngan betmi tla cu: Khrih ruangih a inn le lo, nupi le zalennakpawl can ṭhehtu cu baptisma cotlaktuk a si ko tin kan zaten kan ruat thluh. Cutin cui ṭumah baptisma a la.

A Hlawhtlinnak

Ziangtluk harsatnak le tiduhdahnak tawng hmansehla Cong Kham le a nupi cu an hardamnak a ṭha zetih nikhat hnu nikhat an damcak sinsin. Lo-theih-lo ih an umternak khawsia le thlarau ṭhalopawlih umnak ramsia tla cu an nih nupa hrangah damcaknak a rak si e.

Cui’ canah an khua ah pam a tlunih an khawpipawl cu ei ding an neih lo laiah Cong Kham le a nupi cu khawp zetih ei ding an nei betah ei ding neilopawl pek ding an nei lai.

A thuhla tla cu missionaries pawlin kumpi/cozah hnenah an thlen ih a mah vaw dingih thupetu lal tla cawhkuan (fined) ter a siih cutin Tsong Hkam ih thilri, zalennak le a nupi tla cu pek thluh sal a si tin Laura Carson cu a cabu sungah a ngan bet.

Khristian Pakhat Pung

Cong Kham le a nupi cu nutukhawsak a remcan vivo vekin ei-inn ding neilo ṭulsampawl tla rawl an zem. Cutin midang thawn biakawk theinak tikcu an nei ih 1913 ah mipakhat cun an zumnak a run thlun ve.

Remdaihnak A Um

Cong Kham le a khawpipawl lakah rualremnak a umlo laiah Khuasak ihsin Saya Thuam Hang cu Cong Kham upatnak pe dingah Bualkhua ah a tlawng. Cong Kham khalin a rak ngai thupi ih khawpi zate sawmin puai nasaten tuah in a rak mikhual ve. Cumi ihsin thawkin Cong Kham le a khawpipawl lakah remdaihnak a um thawk. Cuihnu cun riraibia (animists) pawlin puai an tuah tikah Cong Kham tei nupa tla’n an sawmih cutin cabuai pakhat an hil tlang thei sal.

(Thudang: himi ka ngan laiih ka ruahmi cu ziangtheilo rirai, khawsia le khuavang bia kan pupapawl le Khristian pawl hman remaw tawnin cabuai pakhat an kil tlang laiah kan nih Khristian veve ziangah kan rem aw thei lo? Ziangah santhar/fimsan kan timi tuisan sawnah kawhhran pakhat le khat doaw ringring timipawl tla i ruah ter).

Khristian Hlabu An Sak Thei

Phaizawl khuaih Pa Mang En in hymn hlasah a zir. Saya Thang Tsin ih fapa U Phy Kyi khal hramthawk cangan le siar zirh dingin Bualkhua ah an sawmih 6^th April 1923 ah a thleng. Cutin casiar a zirh rero ih Zanniat ṭawngih nganmi hymn hlabu tla an sak thei. Neta ahcun casiar le cangan tla an thiam.

Mitthli In Lungawinak A Rahsuak

Cong Kham hi a neihmi rannung an rak laksakih a fang le tirawlpawl an hlawnsak thluh, a inn le lo an laksak thluh ih zangfahnak malte hman umlo ih an vuak lai hmanah vawikhat hman a mitthli a tla dah lo. Hmanseh a khawpipawl zumtu an karh deuhdeuh ih an khua rori ah Rev. Thang Tsin in1931ih minung 64 baptisma a hun pek ṭum ahcun a lungawinak mitthli cu a biangah a rung luang.

Association Meeting cu Bualkhua Ah Tuah

1931 ah Chin hill pumpi zumtupawl tawnkhawmawknak cu Bualkhua ah an rak tuah. Cumi hrangah Karen evangelist in Ks. 100 a rak hlu. Cui paisa cun duhthusam in a daih lo nan khawsungpawlin theitawk thawh in an rak ṭangkhawm. Cutin sia pathum, vawk pakhat that in meeting kaitupawl cu darin khawpipawl thawn tikcu an rak hmang.

Biakinn Saknak

Zumtu an karh vivo tikah Evan. Cong Kham ih inn ah an tlem nawn lo. Curuangah 1924 ah pi 24 saumi biakin an rak sak thei ih 1934 ahcun pi 24 sau a tlunlam lungih tuahmi Biakin an run sak thei.

Vancungmiin Evan. Cong Kham Hmuakin Hla Mawi An Sak

1935 ah Association meeting kai dingin Angteng khua ah a feh. Cui kumih April thla ah bese zetin a na ciamco. Cutikah a fanute Mang San cun a vun ko asinan a nih cun keimah hmuak dingin hla mawi zet sakin ka hnen an ra tin a let.

Cui ni nahzi 10, Pa Mang Thul in Cong Kham hrang thlacamnak a neih hnuah inn tlunlam cu a tleu pempem ih cui caanih umtu mipawlin tlun lam ihsin hlasak aw an thei. Thla a cam ṭheh veten mina cu an vun zoh tikah Pu Cong Kham cu a thaw a rak cem zo. Leitlun harsatnak ram tannin a Pathian hrangih sal ṭha le rinum cu a biakmi a Pathian hnenah a cawl.

A Falepawl

1.      Nu Eri

2.      Nu Mang San

3.      Pa Van Tin Lian

4.      Rev. Nun Tiam (Pastor of Bual khua, rtd).

5.      Pu Cung Zam

3.      Tial Hmung (Saya Shwe Hlaing) Thuanthu

A Suah Thu

Tial Hmung cu 1873 kumah Lungpi khua, Falam peng ah a suak. A pa cu Leng Har a si.

Tial Hmung cu 1889-1893 kumah Kalaymyo peng ih Indin khua ah tlawng a kai. A tlawngkainak ihsin “Shwe Hlaing” timi kawl hmin a rak neihnak a si. Himi kum li sung a tlawngkainak ruangah Buddhist phungki pawlih zirh le ciahnehnak ruangah Buddhist ah a cang.

Khristian A Can Dan

Hlan Chin pupapawlih an rak uar zetmi le lar zet asimi ṭhi hlum tete (strings of beads) zuar dingah Mizo ram, Aizawl ah a so. Aizawl a thlen tikah cutawkih umpawl cu hla cabu (hymn books) kengin Pathian be dingah Biakin an feh rero cu a hmuh tikah a nih tla biakin ah feh vein biakin sung tonak (tohkham) ahcun a vung to ve. Cutikah a thinlung ah Khristian si caknak a suak ve.

Cutin Mizo ram ah a pehpeh in kum thum a umih tlawng tla a kai. Cutin lehhnu ahcun Khristian ah a rung cang. Ziangtikah baptisma a la ih zoin baptisma a pe timi ngankhummi a um lo. Mihrek cun 1897 ah a si tin an zum.

Himi hi a dik a si ahcun Chinmi lakih a hmaisabik zumtu Pau Suan, 1904 ih piangthar, 1905 ih baptisma co hnakin a hmaisa sawn. Cun Falam pengih Thang Tsin hnak khalin a hmaisa sawn. Ziang a va si hmanah a tikcu hi theihfelmi a si lo ruangah hmaisabik ih telh a theihlonak a si.

A Nulepa in a minung lem an rak vui

Shwe Hlaing cu kum thum sung inn tlung lo ih a um tikah a nulepa cun a thi a si tin an ruat ih hnahcang kung ih a sung note (plantain trunk) an la ih cumi cu hnipuan in an thuam hnuah kum 3 kimmi sia, vawk le vate tla that in vuinak an nei.

Kum thum hnu 1998 ah Shwe Hlaing cu inn a rat lung sal. A nulepa in vawk sum-ruk, vate sen that in puai an tuah tum. Asinan Shwe Hlaing cun hivek puai tuah a ṭul lo thu le Khristian a si zo thu, lei le van sersiamtu Pathian a biak zo thupawl tla a sim. Asinan a nulepa cun an nunphung  daan cu thlun in an tuah sak thotho.

Chin mipawl hnenah a hmaisabik Calai  

Cumi laiah Chin (Chin Hills) pumpi ah Shwe Hlaing tilo cu cangan thiam an rak um lo. Shwe Hlaing cu 1893-1894 ah Kawl-ca ngan le siar a thiam zo. 1898 ah Mizo cangan le siar a thiam zo. Curuangah a nih cu Chinmi lakah casiar le ngan, calai thiam hmaisabik a si.

Kalaymyo ah A. E. Carson thawn Tawngaw

Rev. A. E. Carson cu Kalaymyo ah a thleng ti thuthang a theih tikah phur zetin Chin ramih missionary hmaisabik tawng dingin a feh.

Cutin Carson thawi an tawnawk ihsin Rev. Carson tei’ nupa in 1901 ihsin 1905 tiang mission tlawng kai dingin Rangoon ah an kuat.

A Rawngbawlnak

Shwe Hlaing cu Khualsim le Zanniat ram pawlah evangelist dinhmunin Pathian thu simin khaw khat hnu khaw khat a feh. Amah hi Chin rampumpi (Chin Hills) ih Pathian thu sim hmaisabik khal a si. 1910 ah Darbo khua ih Duh Cuai thawn an nei aw.

A Harsatnak le Retheihnak

Saya Shwe Hlaing in Pathian hnaṭuannakih a zuamnakin a thawkpek lam ihsin zumtu thar tete tla an um. Culai ih kan Chinmipawl ih kan nawmawknakbik cu puai tuah ih zu le sa ei/in phah ih lam hi a rak si. Asinan zumtu umsunpawl cun cui puai ah an telpilo tikah cupawl cun an mitkem ih ngaihawklonak tete a suak.

Nithla Theihtheinakah Bepi (sulphur beans) an rak hmang

Culaiah nithla siarnak (calendar) a rak um lo ih nitin thuhla ngannak (diary) khal a rak um lo. Curuangah Chin pawl cun ni, thla le kumpawl siarnakah bepi (sulphur-beans) an rak hmang. Khristian an rung si hnuah a hlanih an thingbul lungbul biak nun (animistic life) in ni le thla theihtheinak hrangah ziang ṭhathnemnak hman a rak pe lo. Ziangahtile an thawh veten thawh-hlam an ei, cun lo an feh ih sunvu hna an ṭuan zanlam a kim tikah zanriah an ei ih an it.

Sabbath Ni asilole Lalpai Ni asilole cawlh ni le cawlh-um caan (holiday) tvk an rak nei dah lo. Asinan Khristian an si hnu cun Lalpai/Bawipai Ni hmang dingin thuthluknak an tuah. Cutin Saya Shwe Hlaing in inn-tin ah be-pi (sulphur beans) pa 7 cio a rak pe hai. Cule cui’ bepi cu zing an thawh veten zing khat pakhat bel/khuat pakhat khat sungih thla ringring dingin a sim. Cutin cumi pa 7 a cem tikah cuini cu Cawlhni (Sunday) a si ti theihtheihnak dingah a si.

Zumtupawl Tlanin Hmun An Khuar

Saya Shwe Hlaing le amah tluntu zumtupawl an kiangkap minungpawlin an hua, an nautat, khawlal khalin cumi khami nan tuah thei lo tin mipi hmaiah a simih khua ihsin a dawi hai. Curuangah Zom Tlul le Darbo ih Mang Tiam le Khuahlun khua ih Lian Khum tepawlih hohanakin Khukkhel (kawl hmin – Kabani) ah hmun thar an hmu ih cutawkah hmun khuarin an um. Cutawkih an um cu Kawl (Burmese) ramtawipawlin an hmuh tikah nan umnak hi a niam tuk, tiva kiang a si fawn ṭoṭum (thli le ruah) a rat canah harsatnak nan tawng ding tin an sim.

Cupawlih ruahnak pekmi cu thil cang thei a si tin an zum ruangah hmun thar Kawlpawlih Sedaw tiih an kawhnak hmun ah an ṭhawn. Cumi cu 1913 kum a si. Cui’ hmun cu zumtupawl an va umnak hmun a si ruangah zumlotupawlin “Zisui’ khua” (Jesus village) tin an ko. Cui hmin cun reipi kawh lan a si nan lehhnu ah cun Angṭeng tiih theihmi a si.

A Hlawhtlinnak

Pathian in Saya Shwe Hlaing cu a ṭuanzuamnak ruangah a thlawsuah zet ih kum reilote ah zumtu thar tampi a nei. 1906 ahcun Saya Shwe Hlaing cu Saya Thang Tsin thawn kutkaiaw in hna an ṭuan tlangih himi hi an hlawhtlin cuangnak le zumtu thar an ngah tam cuangnak khal a si.

Tuini ahcun Saya Shwe Hlaing ih hna a rak ṭuannak hmun cu thingbul lungbul bia (animist) an um nawn lo, an zaten Pathian betu lawnglawng an si ṭheh. Himihi Saya Shwe Hlaing in thlaici mangkhung a rak tuhtami ih rahsuah cu a si. Amah cu Khualsim le Zanniat tlangtluan ih Arsi pakhat, meitlu keng hmaisabiktu a si.

A hnaṭuan cawlhnak

Himi laiah kumpi cozah ih ukawknak ah Chinmi sungin calai lam thiam deuh kha  Naga hills ih hnaṭuantu parties hohatu dingah le cutawkih feh dingin amah cu thupek a si. Cutin Saya Shwe Hlaing cun kumpi cozah ih thupek cu el ngamloin Nga hills ah a feh.

1918 ah Chin Hills pumpi ih Khristian zate cu Angṭeng ah annual meeting cu tuah a si. Hiṭumah Rev. Cope in Saya Shwe Hlaing cu a hmu nawn lo tikah a thin a heng zet. Lehhnu ah Rev. Cope cun Saya Shwe Hlaing cu, “ a thupi tukmi Chin hills pumpi ih Chin Khristian hmuahhmuah tawnawknak meeting ah ziangah ka lo hmu lo, khuiah na rak feh, cun ziang duhsan ahsi na um lo”? Tin a sut. Saya Shwe Hlain cun kumpi cozah in Naga hills ih feh ding an ti thu cu a sim. Cutikah Rev. Cope in, “ziangvek thu pawipeng a um tla asile ziangah caan khelin i sim lo” tin thinheng deuh in a let sal. Cumi cu Saya Shwe Hlain in tawk a ti zet thlang ruangah a thin tla a heng ve thlang ih cutin a full-time hnaṭuan ihsin a suak.

Cui’ thawk ihsin amahte free-lance evangelist in hmuntin ah Pathian thuthangṭha simin a caan a hmang.

A ni neta (tlailam ni tla a liam miarmo)

1951, umnak hrangih amai rak hmuhmi hmun, Thiamthi ah lo thlawh ding a timtuahnak ah thing in a nen/tluk ih cutin a nunnak a liam. A falepawl cu Thiamthi ih U Van Sum le U Van Nei (Za Mawi pa) Anṭeng ah damlai tla an si.

Chinmi Lak Ihsin Ahmaisabik Zumtu Mipiangtharpawl

       Hmin                                  Khua               Baptisma                     Baptist petu

1.      Saya Pau Suan                        Khuasak          11-5-1905                    Dr. E. H. East

2.      Daw Kham Ciang                   Khuasak          11-5-1905                    Dr. E. H. East

3.      Saya Thuam Hang                   Khuasak          11-5-1905                    Dr. E. H. East

4.      Daw Dim Kho Cing                Khuasak          11-5-1905                    Dr. E. H. East

5.      Saya Shia Khaw                      Hakha              1-1-1906                      Rev. A. E. Carson      

6.      U Son Vung                            Tuitum             27-2-1906                    Dr. E. H. East

7.      U Hen Za Kam                       Tuitum             27-2-1906                    Dr. E. H. East

8.      Saya Thang Kyin                    Lumbang         5-9-1906                      Rev. A. E. Carson      

9.      Daw Lakhu                             Hakha              1-10-1906                    Rev. A. E. Carson      

10.   Evan Cong Kham                  Bualkhua         31-3-1907                    Rev. A. E. Carson

Rawn:

Kip Thian Pau, “Trials and Triumphs of the Chin Pioneers”  

Lauda Hardin Carson, “Pioneers Trials, Trials and Triumphs” 

Lian H. Sakhong, “In search of Chin Identity”

Stephen Vum Cung Nung, “A HISTORY OF CHRISTIAN MISSIONS AMONG THE CHINS WITH SPECIAL REFERENCE TO AMERICAN BAPTIST MISSIONARIES AND THEIR CONTRIBUTIONS TO THE TRANSFORMATION OF THE CHIN CULTURE”

Bawi Hu, “Literacy and Language Maintenance in Chin State, Myanmar”

“Chin Church History” by Zomi Theological College