Chin Khristian Le Tuarnakpawl

Chin Khristian le Tuarnakpawl

Ting Hlei Thang

Asungthupawl

-          Thuhmaihruai

-          Biakinn Sah Khamnak

1.      Carson Memorial Hall

2.      Hakha ih United Pentecostal Church

3.      Kalaymyo ih AG Church

4.      Tamu Peng

5.      Ngaphe Peng

6.      SPDC Ralkappawl le Phungkipawl Tumtahmi Pakhat Hrang Ṭangtlang

-          Thinglamtahpawl Siatsuahnak

1.      Tonzang Peng

2.      Matupi Peng

3.      Hakha Peng

4.      Thantlang Peng

5.      Falam Peng

-          Chin Khristian Martyr

1.      Paletwa Pengih Rev. Luai Thang Thihnak

2.      Ziangah Cule Ziangtin Kawl Ralkapin Chin Khristian Pali An That

-          Khristian Calai Tiduhdahnak

-          Mizoram ih Chin Khristian Harsatnakpawl

Thuhmaihruai

1990s thawknak lam ihsin “The State Peace and Development Council (SPDC)” in zangfahnak malte hman telloin Kawlmi a si lo hmuahhmuah cu harsatnak nasaten a rak pe ringring, ahleice in Chin-ram. An ralkap uknak karh ter ding le Chin-ram Khristian mipum malter dingah nasaten hma a rak la. 1988 hlante hrawngah ralkap battalion khat lawng Chin-ram hrangih ret an si nan, ke-ralkap battalions 10 (ralkap thawng nga) lai Chin-ram ah nasaten an cangvai rero.

Chin-ram cu zatek (percentage) zawngin kawlram pumpi ah Khristian tamnakbik a si ruangah Kawl ralkap an khoh ter sinsin. “Hill Regions Buddhist Mission” timi ih kawl phungkipawl cu kawl ralkap thuneihnak in Chin-ram hmuntin kipah a thlah ih cui phungkipawl cu kawl ralkapin an kil vivo. Cutin khaw tampi, hmun tampi ah hmun-um ralkappawl hnakin thu an nei sawn.

Chin Human Rights Organization (CHRO) in Chin pastor pakhat hmaitawn thusuhnak a neihmi ah:

“Zakam, Rezua, Leisen, Vangvai le Tinsi khua ih ummi phungkipawlin khua le pawlkawm zaten an ra uk thluh. Cui phungki thu, thlunduhlotu cu SLORC/SPDC ralkap hnenah an va simih ralkap in an hrem. Thubuai hmuahhmuah cu phungki in thuṭhennak a nei thluh. Buddhist ih luttupawl cu harsatnak an luat, hramhram ih hnaṭuan ter an luat, paisa kuan, tvk an luat. Phungki cu khuitawkih khual a tlawn khalah ralkapin an thlun ih cui phungki ih thilri phurtu ding cu an duhduh mi an fial. Khawmipawl cu lo theihlo in Buddhist biakinn le phungki umnak an sak ter. Asinan ralkap ih an hrem rero hmanah ‘Kan nih cu Khristian kan si’ tin an el ih an sak duh lo. Tu hi himi thu an rero lai ih ziang kan cang ding ti kan thei lo”.

Matupi peng ihsin kum 40 mi, Chin Khristian pakhat, Buddhism a luh thu le Khristian donak ding campaign ih a teldan tla cu:

27/2/95 ah SLORC (tu ih SPDC) in social welfare training kai dingin in sawmih Matupi ihsin ka feh. A hmun ka thlen tikah thuneitu in Buddhist phungki U Razinn in Mindat ih a tuahmi Buddhist hill tract missionary training kai  in fial. Khristian kan si vekin kan tuah thei lo thu kan sim. Asinan an phungki cun in thlemih, ‘Khristian si khalle a pawi lopi, himi cu biaknak lam training men a sisi.’ Cutin midang panga le kei cu cui ni 10 training kan kai.

Training sung ahcun, ziangtin Khristian kan do thei ding timi thu kan zirih do dingmi thu 17 a um (a hnuai ah zoh leh aw). Cumi thupawl cu Chin Khristian pawlkawm lakih theihter vivo ding a si. Cule innsang thawn Buddhist ih luttu  cu thla tin 1200 kyats pek kan si dingih bulpak ih Buddhist luttu cu 800 kyats pek dingih tiam kan si. Cu lawng a si lo poter le, hramhram ih hnaṭuan ter, le paisa khawnnak ihsin kan luat ding. Cubetah kan falepawl cu cozah in an tlawngkainak a bawm ding.

Himipawl ruangah kei cu Buddhist ah ka lut, ziangahtile kei cu Khristian hnakin Buddhism hi a ṭha sawn tin ka hmu. Buddhist ih ka luh hnuah coka lam thubuai, nitin ei-in tivekpawl cu zianghman a lang nawn lo. Ka fapa Rangoon ih theological college kai dingih ka ngennak khal in hnawl sakih ca zir peh lo dingin in sim men. Curuangah ka fapa nan bawm lo asile Buddhist ihsin kan suak ding thulolak a si tin ka sim, cun Buddhism ihsin ka suak tithu ka theihter hai. Cule an nih in ka zawm sal duh asile ziangtik lai khalih ka zawm thei thu, ka zawm sal asile a hlan hnakih tam deuh in bawm ding thu in sim sal men.

Buddhist-pawlin an hnen luttupawlih ṭulmmi cu an bawm ko, cule covo ṭha tampi khal an nei, ih tu ahcun an lung a awi zet. Buddhists ngaingai vekah an cang. Ziang a si hmanah kan nih Chin-pawl cu ramdang bawmnak dil in siang lo ih cutin farah le rethei zetin ralkap ukbetnak hnuaiah an duhduh tilh in fial rero.

A hnuaitapawl hi an zirmi, Khristian do daan ding 17, lehlin mi an si:

1.      Khristian innsang le Khristian ṭhansohnak do ding.

2.      Manila, Philippines ihsin an thlahmi sermons-pawl sawisel ih do ding.

3.      Pathian, Amah rori ih simmi “Kumkhaw Pathian siarlo pathian dang a um lo” timi cu dokalh ding.

4.      Mino hlothlau le nungcang mawilo do ding.

5.      Khui tawk khalah Khristian-pawlih thusimmi cu eltai ringring ding.

6.      Khristian biaknak ih tlaksamnak le nemnak zawn hawlthiam ih sawisel ding.

7.      Khawte ih Khristian cangvaihnak karh ter lo ding.

8.      “Thisen tello cun rundam a theih lo” timi cu do ding.

9.      Khristian-pawlih tlinlonak le Buddhism an lehkhuhlonak dingah an ralrin lo laiah dokirsalnak tuah ringring ding.

10.  Zingzawinak thawngin Bible kha a si lo lam zawngin do ding.

11.  “Pathian in Israel lawng a duh, miphun zaten a duh lo” timi cu do ding.

12.  An thuthlung (thukam) pahnih kha zum lo le rinhleh ter dingin zuam ding.

13.  Khristian kha zianghman a si lo, nan duh maimai ti zawngih do ding.

14.  Sersiamnak thu ah Khristian-pawlih ruahnak thleng tum ding, cule scientific ruahnak thawn khaikhin sak ding.

15.  An peknak thu ih an pekzatpawl zingzawi ding.

16.  Zingzawinak thawngin Thlarau Thianghlim kha sawisel ding.

17.  Khristian-pawl kha a nem zawng le a khoh zawngih do ringring ding.

Recopy and translate, Myo Chit, Wah Mah Tah, 2639 True Copy (Sa Win)

I.                  Biakinn Sah Khamnak

Chin-ram cu 90% hnakih tam Khristian an si ruangah ralkap thuneihnakin nasaten a nambet sinsin. 1990s ah ralkap thuneihnakin biakinn sah cu nasaten a rak kham. A dotu le a eltu cu ralkap ih vuak le hrem tuar a si. Khampat ih “Salvation Army Church” sah rero laimi cawl dingin ralkap ih thupeknak cu kawhhran pastor in a duh lo ruangah ralkappawlin nasaten an hrem a vuak ih ni tampi sizung ah a um.

A hnuaiih tarlangmipawl hi ralkap thuneihnakin Khristian thawn pehparmi inn hmuahhmuah sak nawn lo le cawl dingih thu a rak pekmi an si; Hakha ih “Chin Christian centenary”, Hakha ih “United Pentecostal Church”, Falam ih “Zomi Theological dining hall”, Falam ih “Church of Jesus Christ”, Hakha ih “Chin Christian College hrangih nunau le mipa umnak ding innpawl (hostels)”,  Farhual ih “Baptist Church”, Khampat ih “Salvation Army Church”, le Kalaymyo ih “Assembly of God’s Church”.

2000 ah, US ih hrambum, Chin Freedom Coalition ih simdan vek asile a hnuaiih tarlangmipawl hi ralkap thuneihnakin Khristian biaknak thawn pehparmi innpawl sak nawnlo dingih thu a rak pekmipawl an si. Cupawl cu; Myoma Quarter ih “Evangelical Baptist Church”, Lawibual Quarter ih “Faith Bible Theological Seminary”, “Sakollam Baptist Church”, le “Lawibual Baptist Church”. An sim betmi cu Rangoon ih Chin-mipawl um tam zetnak, No. 41 U Aung Min Street, Ward 2, Mayangone township ih “Lai Baptist Church” khal an rak phih sak.

1.      SPDC in Carson Memorial Hall sah reromi cawl dingin thu pe!

1999 ah, State Peace and Development Council in Hakha ih Carson Memorial Hall cu sak nawn lo dingin thu a rak pe. Himi hi Hakha Baptist Churches in Chinram ih a hmaisabik missionary upatnak ih an sah mi a si. Himi innpi (hall) cu Chin Christian centennial puai, March 15, 1999 hlanih ṭheh dingih hmuitinmi a rak si. Himi innpi (hall) cu missionaries pawlih hnaṭuan hminsinmi, lai nunphung thilipawl, le centennial puai ih hminsin ding thuanthupawl retnak dingih tumtahmi innpi a si. Ralkap thuneihnak in sak nawn lo dingih thupek cu zo hmanin an rak el ngam lo ruangah cutin a um.

2.      SPDC in Hakha ih United Pentecostal Church cawl dingin thu pe!

June 13, 2000, Hakha ah SPDC in Chin-ram ih an thuneihnakin, Rev. Tin Hei, United Pentecostal Church (UPC) pastor cu, Cherry Lamzin ih an biakinn sak nawn lo dingin thu an pe.

An biakinn sahmi cu hmun thum hrangih timtuahmi a siih pakhat cu biakinn ah, pakhat cu Hakha UPC District office ah, le a dang pakhat cu pastor’s umnak (quarter) hrangah an si. April 25-28, 1998 ih tlawngtapawlin “Students’ Festival” puaipi an neih ding ṭumah Chin Khristian-pawlin lehpannak innpi phentu umlo asilole tlunkhuh umlo tonak cu hramhram in an tuah ter, cucu SPDC hotupawl nuam zet le hahdam zetih a lektupawl an zoh thei nak dingah a si. Curuangah khawsungmipawl cu hramlak hlapi ih thingpawl an va hawlih thlanhri baksen tla in tonak cu an tuah sak.

Lehnak puaipi a cem hnuah hotupawlin thing ṭhaṭha cun an lak thluh men. Cule UPC kawhhran in thing hrekkhat cu SPDC hnenah an biakinn sahnak hrangah an lei. UPC in an biakinn sahnak hrang SPDC ih dilmipawl hrangah an hotupawl an va tawngih cutin SPDC in siannak a pe. Asinan Buddhist temple sahnak hrangah cun zo hmanin SPDC hnen ihsin siannak an la lo. UPC biakinn sak lo dingin SPDC in kum hnih sung a rak phit. Asinan ziangruangah khatin a rak phit ticu ziang thu hman an rel lo.

Hivek ciah in Kalamyo ih SPDC zungin Kalemyo ih Pinlong Ward ah Agape Church of the Assembly of God cu an biakinn sah cawl dingin thu an rak pe dah. Cumi lai ih an pastor cu Rev. Go Za Nang a si.

3.      Kalaymyo ih AG Church Sah Reromi Kham!

1993 ah, Taung-phi-la block, Kalaymyo ih Assembly of God (AG) biakinn tumpi cu thuneitupawlin kawhhran upapawl hnenah biakinn sah cawl dingin an sim. Cutin biakinn sah cu an rak cawl.

“Ministry of religion hnenih zangfah kan dil khalle thuneitupawl hnen ihsin ziang thulehnak hman kan thei dah lo” tin Pa Tling (humhimnak hrangih hmin thlengtu), kum 54, kawhhran upa pakhat a si mi in a sim.

“Thuneitupawl hnen ihsin zianghman sanlehnak kan ngah dah lo ruangah thuneitu sang deuh, district thuneitu hnenah biakinn sah thluh theinak hrang siannak kan dil”, hitin a sim.

AG biakinn sahnak ding siannak ngah nan duh asile thunitupawl an sinak tinkimah an zaten nawhthuh nan pek thluh a ṭul. Kalaymyo District Peace and Development Council hnenah 50000 kyats, Kalaymyo township Peace and Development Council ih chairman hnenah 50000 kyats, sipin bawi (head of department of municipal) hnenah 30000 kyats, Taung-phi-la block Peace and Development Council upatnak ah 50000 kyats.

An zate hnenih nawhthuh pek hnu lawngah biakinn sahnak hrang siannak mi an pe. Cule biakinn cu pher le thil dang thawi tuam/kham dingih sim a si. Cutin lamzin le kiangkap ih vak maimaipawlin kawhhran biakinn a si ti an thei thei lo ding.

4.      Tamu Peng

February 20, 2000 ah, Tamu Township Peace and Development Council ih Chairman, Captain Khin Maung Myint le a hopawl cu kan khua an ra thleng ih Tamu khaw thar lamah an feh. Zinglam nahzi 10:00am hrawng a si. Himi zingah kan kawhhran ih members pakua le kei cu biakinn sahnak ah kan rak um rero. Captain Khin Maung Myint le a hopawl an ra thlen tikah biakinn sahtheinak thu zoin a lo pe tin in sut cih. Thu in suh rualin a kiangih ding, U Kan Hla (Chairman of the Village Peace and Development) cu a beng phah. A milai pahnih in U Kan Hla cu an dir ih Captain Khin Maung Myint in nasaten a thawng ih a sit. Rua ih tuahmi fung thawn nahzi pakhat zikte a vua. Cu ṭheh in ka lam a her ih, a meithal (pistol) cu a phawrh ih ka lu ih i tin hnuah, “Ka lo that ding nan nih Chin-mipawl hi, zianghman khal nan si lo, mi hnawksaktu lawng nan si” i ti. Cuveten kan sahmi biakinn siatbal sal dingin in fial. Cu tiih kan biakinn vun siatbal cih sal ding cu kan ngam thei lo.

Curuangah captain pa cu a thin a heng tukih a mah rori in thingrua kan hmanmipawl cu a dir thla ciamco. Tikcu le thazang cemih kan tuahmipawl cu an siat thluh. Cu hnu ihsin khawmnak ṭhiṭha khal kan nein awn lo. Hmunum thuneitupawl in le biakkhawmnak tuah thei lo dingin a phunkip in an tawlrel fawn.

Taktak ahcun himi kan biakinn sah theinak hi ‘local Peace and Development Council member’ U Aung Sein (Buddhist) hnen ihsin siannak kan ngahmi a si. Amah hi Form 105, biakinn neih/sah theinak in petu khal a si.  Pi 150 square kau, 70,000 kyats in a neitu, U Tha Khin hnen ihsin 1996 ih kan rak leimi a si. Kan biakinn in siatsak hnu ihsi cun a hmun cu nelrawn vekah a cang men. Khawmnak kan neih nawn lo ruangah remcang lo zetin ka inn ah kan khawm ṭheu.

Inn ih kan khawm men khalah, kan khuangtum awn le kan hlasak awn cu an ngaih lo, mi nan hnaihnawk in tiih in ti buai. Khawm ih zabeng tiang hman in kham. Cu tikah nan nih Buddhists teh loudspeakers nan hmang ringring ko si, cuvek nan tuah caanah khawsungmi nan hnaihnawk le hnawk lo cu khawsungmipawl sut hmen uh ka ti. Asinan an nih cu tlunlampawlih thuneihnakin zohmanin nan va hnaihnawk lo pei in timi an si tin in sim. Cu hnu lawngah hivek ih in ra tibuai ringring le kei khal loudspeakers thawi an au mi khi ka va complain ve ding tin khua ih thuneitu hnenah ka sim.

(A tlunih thu hi pastor pakhat, humhimnak hrang hmin thuhmi in, CHRO field monitor hnenih a simmi thu lehmi a si).

5.      Ngaphe Peng

1996 ah, Hakha Baptists Church (HBC) in Ngaphe peng ih Asho Chin pawl hnenah hnaṭuan an thawk ih Rev. Pa Lian (humhimnak hrang hmin thlengmi) cu ṭuanvo latu dingih thlan a si. Curuangah mission team in biakinn sahnak ding siannak a pe ih Matung le Linte khua ah biakinn pahnih an sak. Pakhat cu Burngbaw khua ah a siih Ngaphe thawn a hla lo.

1998 ah, cui biakinn pathum cu kawl ralkap thuenihnak in a siat thluh ih hmunumpawl cu Khristian biakinn hrimhrim sak lo dingin ralrinnak an pe.

6.      SPDC ralkappawl le phungkipawl tumtahmi pakhat hrang ṭangtlang

Rev. Biakthang (humhimnak hrangih hmin thlengmi) cu Thantlang pengih Lautu Baptist Association in Ann khawpi, Arakan State ih an thlahmi missionary a si. Van siat ih Rev. Biakthang ih nupi cu October 1996 ah a thi. November 1998 ah Thantlang ih Lautu Baptist Association meeting pi kai dingah a umnak mission center cu a suahsan. A um lo sungah phungkipawl le ralkappawlin a in cu an rak boh sak. A nupi ih thlan le canganpawl khal an rak siatsak thluh. December thla ih a rualpi hnenih ca a nganmi ah, “ralkap zungah kawh a siih zianghman tuahmawh umlo in a suahsal thu” a sim. A ngan betmi pakhat cu Church of Jesus Christ ih thlahmi evangelists hrekkhatpawl cu ralkap le phungkipawl ṭangtlang tahratin nasaten an vua timi khal a tel.

II.               Thinglamtahpawl Siatsuahnak

Thinglamtah hi Khristian-pawl zumnak langtertu thupibik pakhat a si. 90% hnakih tam sawn Khristian a simi Chin-ram sung khalah thinglamtah cu kan zumnak langtertu a si tiin 1980s ihsin khawte ah siseh, khawpi ah siseh, tlangpawlah siseh, thing ih tuahmi thinglamtahpawl kan phun thawk ve. Asinan 1990s thawk lam hrawng ihsin ralkap thuneihnak le thazang hmangin Chin-ramih thinglamtahpawl cu siatsuah thawk a si ve. Ram a ṭhat hnu hmanah hivek theih ding a um ringring lai. A hnuaiih tarlangmipawl hi Chin-ram sungih thinglamtah siatsuahmipawl an si.

1.      Tongzang peng

1944 ah, Tonzang peng ah, Township Law and Order Restoration Council ( tu ih Township Peace and Development Council) in hmunum Catholic kawhhran ih tlangzim te ih an sakmi thinglamtah cu siatbal sal dingin thu an pe. Asinan himi cu puithiam in tidai thianghlim a tawih ih thlawsuah a pekmi a si ruangah zo hmanin an siatsuah duh lo. Asinan, May 16, 1994, zanlai fangah, hmunum palikpawlin thinglamtah cu an urkang. Kawhhran upapawlin thinglamtah an ur thu cu an duhlo thu an simih thuneitupawlin zung ih feh dingin an simmen. Lehhnu ah kawhhran hruaitupawlin Rangoon ih Ministry of Home and Religious Affairs hnenah cui thubuai hrangah palai an thlah. Asinan Deputy Minister of the Ministry ih Colonel Aung Khin cun hmunum thuneitu in hi thubuai ka hnen ih a run thlen lo ahcun ka lo cinfel sak thei lo a rak ti san men.

2.      Matupi Peng

March 2002 ah, Matupi peng sung, tlangzimte ih sakmi thinglamtah cu balsiat dingih thupek an si lala. Hmunum Matupipawl cun himi cu SPDC sungtel, Major-General Ye Myint, Chief of the Bureau of Special Operations, himi hlan tee ih khawpi ra haltu a si ding tin an zum. Himi thinglamtah cu 1948 ih rak sakmi a si. 2001 ah 30-foot sangin concrete thawn hnget deuh le rei deuh daih dingin an tuahrem salmi a si. General Ye Myint hi hivek duh lo zettu a siih Matupi a ra tlawn ih a tlun veten Township Peace and Development Council office in hi thu a suahcihmi a si. Asinan kawhhran hruaitupawlin an siat duh cuang lo. Asinan ralkap hrekkhatpawlin va phawng an tum thotho, a hram hnget zetih concrete tuahmi a si ruangah a zate cun an siatsuah thei lo, lehhnu ahcun a hram hrekkhatpawl an siatsuahmi cu Khristian pawlin an va hmu.

3.      Hakha Peng

Hakha cu Chin-ram ih khawpibik a si. Hi khawpi cu Rung Tlang hnuai te ih ummi a si. 1980s ah, Hakha Baptist Church in cui tlangzim tee ah thinglamtah an phun. Hmanseh, 1995 ah, cui thinglamtah cu theitu um lawn siatsuah thlu a si. Khristian-pawl cun thinglamtah cu thupi tuk ih an ruahmi a siih zohmanin hivek an tuah dah lo ruangah Khristian-pawlih tuahmi cu a si thei lo ih, kawl ralkap an si ding tin mi tampi in an zum. Lehhnu ah kawhhran in a umnak ciah ah thinglamtah sah an tum sal nan thuneitupawlin an siang lo, thinglamtah cu biakinn kiangkap lawngih um dingmi a si tin an rak sim.

Kum malte a rei hnuah SPDC in cui thinglamtah phunnak zawn ciah ah phungki lem an tuah. Rungtlang hi Hakha minopawl le kawhhran, pawlkawm tampiih Christmas Eve tivek puai an rak tuah ṭheunak a si. Asinan ralkap battalion headquarters thawi a rawi aw thluh zo. Hmun hrekkhat cu ralkap umnak ih tuah a si tikah duhduh hi feh khal a theih lo.

4.      Thantlang Peng

Khawpi tampi, hmun tampi ah thinglamtah cu siatsuah a si rero. Hmanseh, January 1999 ih Thantlang pengih an siatsuahmi cu nasa tak a si. 1999 kum hi Chin-pawl hrangih Khristian kum 100^th an kimnak a si. Kum zakhat kimnak puaipi American missionaries hmaisabik in 1899 ih mission center a rak sahmi, Hakha khawpi ah March 15 ah tuah dingih timlam a si. Cumi tikcu a kim hlanah pengtinah an mah local kawhhran tete in hlankhan in puai cu an rak tuah ve cio. Thantlang peng khalah midang thawi bangaw lo deuh dingin January 1-3, 1999 ah an rak tuah.

January 5, an puai a cem tikah Vuichip ih tlangzim te ah Centennial Memorial thinglamtah an tuah. Cucu hlanih American missionaries pawl hngilhlonak hrang a si. A mak zetmi cu, cui thinglamtah an phun zaan rori ah Township Peace and Development Council in thinglamtah cu bal sal dingin thu a pe. Mipi in an bal sal duh lo ruangah hmunum palikpawlin cui thinglamtah siatsuah thluh dingin mi an thlah ih ṭuanvo neitu Pastor paruk, Rev. Thawng Kam, Rev. Biak Kam, Rev. Thantu, Rev. Tha Ceu, Cung Bik le Pastor Beauty Lily cu an kaih cih bet. Mipipawl cu lungkimlonak le riahsiatnak langterin January 6 sun cu hna khal ṭuan lo le zianghman tuah lo in an um thluh. Nahzi 24 sung inn le kawhhran ah rawl-ul thlacamnak khal an nei. Cui thu cu khawpi dangih a than thluh an phang ruangah thuneitupawlin telephone line pawl an phit thluh ih kawhhran hruaitu minung 20 an kai bet. January 9 ah, Hakha khawpi ih kawhhranpawl cu an lung a awi lo zetih, Hakha ih Chin State Peace and Development Council ih Chairman hnenah Thantlang ih feh ding le cui thubuai reh ter dingin simngennak an nei.

5.      Falam Peng

Falam khawpi cu Zomi (Chin) Baptist Convention ZBC, le CCIT ( hlan ih Zomi Theological College) umnak hmunpi a si. 1980s hnu lam deuh ah Falam peng sungih Chin Khristian-pawlin Ruun tiva lilawn tlunih Falam-Kalaymyo fehnak lamzinpi tlunah thinglamtah tum zet tuah dingin khua an rak khang. Falam le Kalaymyo fehtu khualtlawng hmuahhmuah in langfiang zetin cui thinglamtah cu an zoh thei. Cui thinglamtah in khualtlawng tampi cu a hnenih racawl ding le thlacamnak nei dingin a hip ih mi tampi in hnangamnak an nei.

Hmanseh, 1990s laifang hrawngah kawl ralkap thuneihnak in thuhla zianghman umloin cui thinglamtah cu an siat thluh.  Cutawk kiangih ummi Chin Khristian-pawlin thinglamtah tuah sal dingin an dil nan SPDC in an kham. A hnu, reilote ah cui thinglamtah an siatnak ciah ah Buddhist purang an sak.

III.           Chin Khristian Martyr

1.      Paletwa Pengih Rev. Luai Thang Thihnak

Rev. Luai Thang cu Matupi Theological School ihsin 1989 ah buaih a rak ngah. Matupi Theological School ih tlawng a ṭheh hnu reilote ah Zomi Baptist Convention in Paletwa ih evangelist pastor dingah an hril. Cutawk Paletwa peng cu Chin rirai bia le Buddhists biatupawl umnak hmun a si. Chin-ram cu an zate deuh thaw Khristian an si nan Chin-ram hmun hrekkhat ahcun Pathian thu a theih ih theihlonak ram tampi a um. Cumi lakah Paletwa hi a rak tel ve.

Rev. Luai Thang hi Zomi Baptist Convention in CCOC (Chins for Christ in One Century) hmangin a hmaisabik saklam Chinram ihsin thlanglam Chinram ih evangelist pastor hmaisabik a rak thlahmi a si.  CCOC cu 1985 ih dinmi a rak siih a tumtahmi cu 2000 kum ah, Chinmi zate hnenih thuthangṭha thlen ter ding a si.

Curuangah, Rev. Luai Thang cu Pyichaung khua, Paletwa ihsin peng hnih hrawng hlatnak ah missionary pastor ṭuanin a um.

June 7, 1993 ah Rev. Luai Thang cu Suilaipi khuah Pek Thang ih nupi neih ah kut a sih. Cumi ah, Sergeant Tun Myint (“kah-pah” private number/459663) le Minpya “kha-mah-yah” ihsin Light Infantry Battalion LIB 379 ralkappawl, Company 3 pawl tla cui khua an ra thleng. An thlen veten Sergeant Tun Myint cu inn ah a lut cih ih ralkap ih siannak tello in Khristian puai cu nan duhduh in nan tuah ti phah in Rev. Luai Thang cu a sit, a thawng ih a meithal (riffle) taw thawn a sawh ciamco. Rev. Luai Thang cu kut a sihnak mipi hmai rori ah kawl ralkapin nasaten an vua ih an hrem hnuah hi hmunramah Chin Khristian pastor hrimhrim kan hlah lo ding an ti.

Rev. Luai Thang cu nasa tukin hliarhma a tuar thu a diary ih a ngantami a thih hnuah a sungpawlin an run hmu sal. Nasatei an vuak hnu zarh tam deuh a rei hnuah a ruak cu an hmu.

August 14, 1993 ah Rev. Luai Thang ih ruak cu khaw kiangih tiva ah an sar. A kut a kiak, namsau ih sunmi neh cu a awm (a ṭang) le a dunglam taksa parah an hmu. A hliamhma tuarmi cu theih theih lo dingin thuh a si fawn.

Rev. Luai Thang cu a duhdawt zetmi a nupi, Ngun Hlei Sung le a fanu, kha laiih kum khat mite Raisy cu a tanta. Cubetah biakinn a sah rero laimi cu ṭheh man lo in a tansan ta fawn.

2.      Ziangah Cule Ziangtin Kawl Ralkapin Chin Khristian Pali An That

Lt.Col. Thurah Sein Win ih hohami Burma Army battalion (Kha-lah-yah unit), Light Infantry Battalion 89, cu Burma-India ramri, Homalin district ih Phailen ah ret an si. July 1993 ah an lakih ralkap pakhat cu meithal (rifles) pali thawn a hlo. Ca a tantami ah Kawl ralkap lakih um le nun a paih lo ruangih tlan a si thu a ngan.

Netabik ahcun Ralkap unit in Phailen ih Khristian pawlkawm cu Kuki National Army bawmnakah kawhhran paisa thawn ralkap tlanpa ih meithal nan lei tin an puh. Kuki-pawl cu Chin an siih Indo-Burma ramri ih um an si (Kale-Kabaw ihsin Tamu tiang).

Ralkap unit in pawlkawm hruaitu tampi an kai ih ralkap umnak hmunah an hreng. August 2, 1993 ah thawngtlami Pastor Zang Kho Let cu thusuhnak an nei. Pastor ih sannak cu an lung a kim lo ruangah ralkappawl cun nasaten an vua, an meithal taw in an sawh, thu an suh hnu ni hnih rei ahcun a ruh zate deuh thaw in a kiak thluh zik. An rek ih a kaa an aan ter hnuah “na lei kan lo tan sak ding cule thu na sim thei nawn lo ding” an ti. Cutiih nasatei an hrem hnu ni hnih khalah Pastor Zang Kho Let cun kawhhran paisa in KNA bawmnak hrang meithal an lei lo thu le cuvek ih an tel lo thu a sim thotho. Ralkappawl, Non Commissioner Officer NCO, le officers-pawlin thi ding rori le minung tidan hman bangnawnlo khawpin ni hnih sung an hrem nan Pastor Zang Kho Let cu a nung lai thotho. A hremtupawlin an bawi, Colonel Thura Sein Win cu pastor ih thuhla an va simih colonel cun plastic bag thawn a lu cun fek ngaingai in a tuampit dingin thu a pe. (Cumi ruangah Thura timi laksawng cu ralṭhat manah an pek).

Zangfak umza Pastor Zang Kho Let a thih hnuah a taksa cu tlawnginn kiangah an hnukih an kap bet. A taksa parih meithal hma a um ruangah kawl ralkap cun tlansuah a tum ruangah kan kapthat a si tin an sim. Ralkappawl cun Pastor Zang Kho Let ih ruang cu tlawnginn dunglamah an dir salih khua ih hruaitupawl an kaihmipawl hnenah an ret. Cule a nungdampawl hnenah “KNA nan bawm thu nan phuanawk lole thudik in simlo asile nan nih khal hivek ciah nan si ding” tin an sim.

Khaw lal, Zang Kho Ngam, lothlo Ngam Khai, le Thawng Kho Lun cun thih le hrem ṭih ah kan bawm tin an sim. Asinan an an pathumin an hrem thotho. An pathum thi dingah ni sarih rori an rei, nuam teten a har zawngin an that. An vunpawl an hlep, an hmahnai ah cite an phulh. Lothlo pahnih an thih tikah ralkappawlin an ruang cu Pastor Zang Kho Let ih ruak umnakah an hi dir ih an kap bet. Khaw lal Zang Kha Ngam cu a nung cingin an phum.

Himi caan hi National Socialist Council of Nagaland (NSCN) le Chin (Kuki) India, Manipur ih an mah le mah an doawk rero lai caan a si. NSCN cu hel (insurgent) mibur, an siih Naga hrangah India ih zalennak sual rerotu an si. NSCN in Manipur ih ummi Kuki-pawl kha NSCN cangvaihnak hrangah siah a dil, asinan an duh lo. Chin (Kuki) le Naga cu Baptist Khristian veve an si. Mah le mah doawk hi midang hrang cahnak a rak si ṭheu.

[“How and why the Burmeese Army Murdered Four Chin Christians” is provided by Dr. Vum Son Suantak. This reports was published by Chin National Journal in 1998]

IV.           Khristian Calai Tiduhdahnak

1962 ih ralkapin thuneihnak a lak hnu ihsin kawlramih Khristian, kawl a si lomi hmuahhmuah hrangah mai ṭawng te ih Bible namsuah a theih nawn lo. Ṭhimnakah, Chin-pawl cu kan ṭawngih lehmi Bible cu India ah nam a siih 1970s le 1980s ah a thupten kawlramah run phurh a si. 1820s ih Rev. Judson ih lehmi kawl Bible rori hman BSPP ih Censor Board in namsiannak a pe lo. Thuthlung thar, Saam le Thufim telmi te lawng 1962 ihsin 1988 lakih namsiannak ngahmi umsun a si.

1965 ih, “Printers and Publishers Registration law” le 1965 ih “Censor law” in Chin bibles namsuah le biaknak dang thilri namsuah a rak siang lo. Himi daan pahnih hmangin, 2000 kumah, SPDC in Chin ṭawng le hnamdangih suahmi, bibles lehsawngmi 16,000 rori, Sagaing ramṭhen, Tamu ah an rak urkang thluh. Himi Bibles-pawl hi 1999 ah kawl ralkapin Chin, Karen le miphun dangdang hnen ihsin a kaihngahmi an si. Tamu pengih Khristian hruaitupawlin himi Bibles-pawl ur lo dingin an dil. Cui hnuah kawlramih Baptist pawlkawm tum bik, Myanmar Baptist Convention khalin Rangoon ih SPDC zungah dilnak a nei. Asinan ralkap lam ihsin ziang thulehnak hman an hmu lo. 1999 ah, kawlralkap in Chinese (Tuluk) Bibles 30,000 a kai ngah ih Kaleywa, Sagaing ram ṭhenih ralkap thilri khawlnak innpi sungah an ret. Zo hmanin an la ngam nawn lo.

 Falam peng ih Chin-mi pakhat ih simdan vek asile, November 1999 ah Mizoram ihsin Khristian bibles 30 hrawng a run phurh ruangah ralkapin an kai ih kum hnih le thla sarih lai Kalaymyo ih thawng an thlak thu CHRO hnenah a sim.

V.              Mizoram ih Chin Khristianpawl Harsatnak

India rampi ih daanhrampi, cahram 25 nakah, “Biaknak thu simrelnakah siseh, ruahnak simphuan theinakah siseh, kan zaten bangrep tei hmansuah theinak zalennak kan nei thluh” (all persons are equally entitled to freedom of conscience and the right freely to profess, practice and propagate religion) timi a um.

Chin-mipawl vek thotho in Mizoram khal Khristian hlir an si thluh deuh thaw. A tumbikmi cu Presbyterian le Baptists an si. Zumnak bangaw kan si ko nan ṭawng thiamlo le bangawklonak ruangah Chin-pawl cu Mizo pawlkawm hnakin mahte ih khawm an duh sawn. Cutin an mahte kawhhran an din ih an mahte an khawm. Asinan hmun hrekkhat ah Mizo voluntary association in an mahte pawlkawm le kawhhran neih cu an kham. Lunglei ih Chin fellowship hotu pakhat ih Human Rights Watch a sim danah:

[YMA sungtelpawl] cu kan hnenah an ra ih mahte biaknak nei lo ding le mahte pawlkawm nei lo dingin in ra sim.

 Mizoram ih Chin-mi cozah tlawng saya ṭuan in Mizoram palik cu kan hnenah a ra ih a dangte ih khawm le mai ṭawng ten a dang te ih khawm lo dingin in ra sim tin a sim. A sim betmi cu, “Palikpawlin thazang hmangin fellowships le kawhhran tampi an phitsakmi a um. Ka telnak kawhhran pakhat khalah, Mizo welfare committees (voluntary associations) cu kan hnenah an ra ih kan mai ṭawng hmangih kan khawmnak cawl dingin asilole Mizo ṭawng hmang dingin in ra sim”.

March 2008, Aizawl ih Chin nunau pakhat, Human Rights Watch ih thusuhnak an neihmi ah hitin a sim:

Kan dung zarh hnihkhat rei ahkhan, YMA in Chin-mipawl cu a dangten khawmnak nei lo dingin thu an than. Mizoram ih kan um duh asile Mizo kawhhran lawngah khawm ding tin an sim. Asinan a hrekkhat Chin-mi cu Mizo ṭawng thei lo an um lala fawn. Cun Chin-mi tampi cu anmah Mizopawl vekin biakinn ih thuamhnaw ṭha kan hruh thei lole paisa tam kan neih lo ruangah kan ning a zak fawn.

A liamciami ah, Mizo voluntary associations in Mizoramih Chin kawhhranpawl khawmnak nei nawn lo dingin thu a suah. Saiha ih Chin kawhhran hruaitu pakhatin:

“Mizopawlin kan kawhhran hi khawmnak nein awn lo dingin vawi tampi in sim. Tu hi a vawi thumnak kan kawmawksalnak a si thlang” tin a sim.

Rawn:

“Religious Persecution (A Campaign of Ethnocide Against Chin Christians In Burma)” by Salai Za 

Uk Ling & Salai Bawi Lian Mang (Chin Human Rights Organization).

“We Are Like Forgotten People” (The Chin People of Burma: Unsafe in Burma, Unprotected in India) by Human Rights Watch.

“A Chin Compendium.” http://www.projectmaje.org/chins.htm. September 19997

“Religion and Politics among the Chin People in Burma” by Lian H. Sakhong