Tui Zarh Hrang Khristian Thuthang Lawrkhawm

India Khristian-pawl cu Khrismas boruak ah vei 23 lenglo biaknak dangih do an tuar tiah theih a si. Washington hrambun, International Christian Concern ih sim daan ahcun “zumtu tampi cu sizung le thawnginn ah an thleng” tin a sim. India pastor pakhat, Prabhu Kumar cun, “hivek ih huatnak le donak hi tui hlanah ka rak tong dah lo” tin a sim. Himi hi ‘persecution lobby group ih zingzoinak neihmi ihsin theihsuakmi a si. (Ref: christiantoday)

US RC puithiam (priest), Father John Delaney in Khristmas ih tuahmi Aung-ba-li (lottery ticket) in paisa €500,000 a poh. Amah cu Florida hrambun Catholic kawhhran ih puithiam (priest) a si. Father J. Delaney in, “California ih ka tunu Carol in a suahcam (birthday) cu December 22 ah a tuah. Cumi ṭumah Aung-ba-li (lottery) cu phur lemlo in lei bet ka tum. Ka nu le pai neihawknak ni (anniversary) hi January 4 a si, kei ni 4 ah baptisma ka co, cumi ruangah dawrah ka feh ih ticket pali ka lei bet” tin tualsung thuthang Irish newspaper, the Mayo News hnenah a sim. (Ref: CT).

Billy Graham ih tunu (granddaughter) in a pa-te (uncle) Franklin Graham ih Donald Trump a ṭanpinak cu a soisel. A nih cun ramthukhel (politics) lamah siloin rawngbawlnak lam sawn hi nasa deuh ih buaipi sawn ding a si tin a sim. Tu fangih leitlun Pathian thusim hminthang Franklin Graham (Billy Graham ih fapa), kum 65 cun kan dung December 1 ahkhan a Facebook ah “President Donald J. Trump tlukih Khristian ṭantu, humtu le zumnak ih fek President ka thei hrih lo” tiah a ngan. (Ref: gospelherald)

Samson zuknung thar “Trailer” tlangzarhnak an nei zo. A zuknung famkim cu February thla ih     tlangzarh ding a siih a suahtu cu Popular faith-based production company Pure Flix Entertainment pawl an si ding. Samson cangtu ding cu Billy Zane, Golden Blobe rak ngahtu Rutger Hauer, Jackson Rathbone, Lindsay Wagner, Caitlin Leahy le Taylor James pawl an si ding. Zuknung ngantu cu Zachary Warren Smith, Jason Baumgardner, Galen Gilbert, le Timothy Ratajczak pawl an si. Thuhla famkim cu  https://samsonmovie.pureflix.com ah zoh le siar a theih ding. (Ref: CP)

Siar bet

Israel & Jerusalem Thuthar Thuthang

Hebrew daily “Yediot Ahronot” ih simdan vek asile US President Donald Trump in December ni 6 ih Jerusalem cu Israel khawpi a si a timi  lungawinak, upatnak le hngilhlonak ah Israel cun an tlangleng colhhmun thar hminah “Donald John Trump Train Station” tin hmin an pe. Cumi tlangleng zin cu leihnuai ah peng hnih zikte a lut ih Jerusalem khawpi hlun luhnak Central Bus Station kiangte ah a si. Hi tlangleng colhhmun thar tuah bet ding hi kan dung kum ihsin lamzin lam tlangbawi (transportation minister) Yisrael Katz (Likud) in sah bet a ṭul thu a rak sim rero zo. 

US President Donald Trump in an pailai zung (embassy) cu Tel Aviv ihsin Jerusalem ah kan ṭhawn ding a ti hnu reilote ah Guatemalan President Jimmy Morales khalin an pailai zung ṭhawn ve dingin a sim. Cun Czech President Milos Zeman khalin an palai zung Jerusalem ih ṭhawn a tum le a zum thu a relsuak ve. Hungary ram khal hi Jerusalem thu ah Israel ṭantu a si. Palestinian Authority ih simdan vek asile Latin American ram ihsin Panama le Honduras khalin an palai zung an ṭhawn tum ve ti a si. Panama cu Jerusalem le Israel thu UN rorelnak pi ih vote rak thlalotu ram 35 lakih pakhat a si. 

US cun Jerusalem cu Israel khawpi a si a timi cu UN rorelnak ah ram tam sawnin an dokalh ruangah UN fund $ 285 a ṭhum ding.

Denmark ramin Palestine NGOs an bawmnak sumpai cu an titawp ding.

Israel cu an Prime Minister Benjamin Netanyahu ih a rak sim cia bangin UNESCO (United Nations Educational, Scientific and Cultural Organization) ihsin official in an suak fel zo. An Foreign Ministry spokesman Emmanuel Nahshon in tlawngkai ni nga ah khan kan suahnak ca hi kum cem hlan ah ca kan theh lut tengteng dingih cutin US vekin 2018 kum cem ahcun kan suak verver thei ding tin a sim. 

(Ref: worldisraelnews, virtualjerusalem, israelnationalnews)

Siar bet

Nick Vujicic In Faphir Te A Nei

Kutke neilo leitlun Evangelist hminthang Nick Vujicic cu Khristmas hlan te ah fanu faphir te a neihnak ruangih Pathian hnenih a lungawi thu cu mipi hnenah a phuang.

“Nan thlacamsaknak le duhdawtnak parah ka lungawi tuk. Naute Olivia le Ellie khal a nui suahni ah an suak. Olivia cu pound 5 le 2 ounces a siih Ellie cu pound 5 le ouces 14 a si. Nunaute an siih a nu tla a nuam awzet. Bawipa ka lung a awi” tin a Facebook ah a ngan. Lehhnu deuh, tlawngkai nili zan lamah an zuk a tarih “likes” 65,000 le comment tampi a um man.

Nick Vujicic cu “Life Without Limbs” timi rawngbawlnak dintu a siih a suah pek ihsin kut le ke neilo a si. Fanu faphir te hlanah fa pahnih an nei zo. Nick cu 2012 ah a duh zetmi Kanae thawn an rak nei aw. Tu ahcun Pathian in rilrah fate pali a thlawsuah zo.

Nick in a nulepa hnenih upatnak le lungawinak thu a sim phah ah, “ka nun hi midang thazang pe dingah hmang dingin thuthluknak ka tuah zo. Ka neihmi parah ka lung a awi ih ka neihlomi parah riahsia in ka um lo. Thlalang ah ka zoh aw ih, ‘Na thei maw? Leitlun hi a dik a si – kut ka nei lo ih ke khal ka nei lo. Asinan ka mitmawi mite cu zo hmanin in lak sak thei lo. Ka neihmi thil ṭha hi ka lungawipi tuk” tin a sim. 

(Ref: Gospelherald, Wikipedia)

Siar bet

President Donald Trump In ‘Friends Of Zion Award’ A Ngah

Kan dung zarhpi ni December 11, 2017 ahkhan Dr. Mike Evans hohanak ih dinmi Friends of Zion Award timi cu Donald Trump hnenah hlan a si. 

Hi lawmman pekawknak cu White House zung ah tuah a siih Vice President Pence, Senior Advisors Jared Kushner le Ivanka Trump siseh, Family Research Council’s Tony Perkins, Family Talk Radio ih James Dobson, biaknak lam hruaitu televangelist Paula White, Dallas megachurch pastor Robert Jeffress, African-American pastor Harry Jackson le Southern Baptist Convention president Jack Graham le midangpawl  khalin an telpi.

Dr. Evans in “Israel rampi hrangah hivek ih zawn in ruattu le ral ṭha president an um hrih lo” tin a sim. “Friends of Zion Award” rak ngahzotupawl cu President George W. Bush, Monaco ih Prince Albert II, le President Rosen Plevneliev (Bulgaria ih an president palinak) pawl an si. Dr. Evans in himi lawmman cu Israel ih an President pakuanak, President Shimon Peres, hlanih Friend of Zion Museum ih Chairman thawn Israel ram le Judah miphun pawl an ṭanpinak, theihpinak, le ralṭhatnak ruangih an pekmi sunlawihnak a si. 

(Ref: fozmuseum, gospelherald)

Siar bet

Trump In Jerusalem Parih A Thuthluknak Ruangah Zisui Ratsal Caan A Nai Tin US Pastor In Sim

Israel le Palestine ih an cuhawk reromi Jerusalem khawpi cu tuini tiang ret ti a nei lo ih buainak khal a so sang vivo. Cumi laiah tufang US president Trumph in tlawngkai nithum ih a thusimnak ah Jerusalem cu Israel ta le an khawpi a si thu leitlun pi theih ah a phuang. Israel ramih American embassy khal Tel Aviv ihsin Jerusalem ih ṭhawn dingah timtuah dingin a sim cih fawn.

Himi thuthawn pehparin Texas hrambun Lamb and Lion Ministries dintu le director David Reagan in, “kei cun hi thuthluknak cu ka lungkimpi rori, ziangahtile Jerusalem cu kum 4,000 lai Israel khawpi a rak si zo. Judah pawlih khawpi a si ih ziangvek thuanthu khalah midang ih ta a rak si dah lo, Muslim le Arab pawlih ta khal a rak si dah lo” tin news website Sputnik ah a sim. A sim betmi cu ‘caan a nai tuk zo’. Ziangahtile Judah pawlin Jerusalem cu an ta a si thlang dingih Temple Mount ah temple pathumnak an sak ding, cumi cu Islam le Judaism ih an thupitnak hmun le an ti thianghlimnak bik a siih a pakhatnak le pahnihnak a siat vete cun caan cem lam kan pan ding tin a zumnak thu a sim. 

Cun “Antichrist hi European Union ihsin a ra dingih Middle East ah hmun a khuar ding cule Israel thawn ral a tuah ding. Cun Daniel bung kua (Bible sung) ih in zirh vekin tribulation (kum kum sarih harsatnak) a thok ding ka zum tin Sputnik thuthang hnenah a sim.  America ih Evangelical Christian tampi khalin himi thu ah ralbuainak a suak ding ti cu an zum. Bible ih a rak sim vekin Muslim ram tampi in Israel an do ding (Sam 83) sungih a simmi rampawl, asinan Israel in a neh thluh ding. Cun Arab cun Russia hnenah bomnak a dil dingih a ṭahhnawh ding. Russia cu Muslim ram tampi (Persia (Iran) le Turkey telin) thawn an ṭangtlang dingih Israel tlang cu an siatsuah ding”. (Ref: Christian Today, unitedwithisrael)

Siar bet

Selena Gomez In Hillsong Conference Ah Mithli Thawn Tetti A Khan: “Kei cu Pathian fa ka si, cucu a tawk tuk”

Leitlun pop hlasak thiam hminthang le mimawi, fala nonal Selena Gomez cu a tlangval Justin Bieber thawn Hillsong Conference ah an va khawm ve. Cumi ah singer Selena cun a nun lamtluan thupawl ca ih a rak nganmipawl mitthli thawn simphuannak a nei.

Hillsong Kawhhran hi Selena le Biber lawng siloin leitlun hlasak thiam hminthang tampi khal hip theitu kawhhran an si. Tunaite november 2-4, Los Angeles ih tuahmi conference khalah kum 25 mi singer “Wolves” cun ca ih a nganmi a nun thupawl mipi hmaiah simphuannak a nei. A nauhak ihsin tui a dinhmun tiangih a thuhla pawl a sim.

Selena le Biber cu tufang ah an thuhla a ṭha ih an duh aw zet, asinan a liamcia 2011 ihsin 2015 lak hrawng kha cu zapi theih in an duhawknak a remcang tuk lo. Cumi hnu reilote ah Selena cun kan nun lamtluan ka zoh ih ka cek-awk sal hnuin Zisu ih duhdawtnak le in lainatnakpawl ka nunah a fiang sinsin tin a sim. Selena in mipi a thawngtel hmaiih mitthli thawi a simmi a nun lamtluan thu cu:

“Selena, nang cu mi tawk na si, asinan cucu na zuamnak ruangah a si lo, midang na duhdawt thei tuk le mitthmai ṭha na pek theituk ruang khalah a si lo, mipi thawngtel hmaiih ding le lar asilole midangin na tawk tuk an lo ti ruang khalah a si lo. Nang cu Pathian fa na si ruang sawnah a si, a nih cun nunnak pekin a lo duhdawt. Cumi ruangah nang cu mi tawk zet nan si ziangahtile a Zangfahnakin a lo runih a lo tuam” tiih a canganmi te hi mipi hmaiih mitthli thawi a simmi a si. Youtube ih zoh duh hrangah  “Hillsong Conference 2017” tin zoh a theih ding.

United States ahcun Hillsong kawhhran cu a ṭhangso zetmi, mipi kawhhran ti le a sual lo ding, cutawkih Pastor cu Carl Lentz a siih New York ah a um. Leitlun huapin an Pathian hnaṭuannak cu zarhtin minung 100,000 lenglo in an zoh. Selena Gomez cu Hillsong kawhhran ah rinumzetih khawm ringringtu le a hlan ah hla rak hruaitu khal a si. (Ref: CP)

Siar bet

Billy Graham Kum 99 A Kim

Leitlun Pathian thusim thiam hminthang, Pathian mihman Billy Graham cu tui kar, November 7, 2017 ahkhan kum 99 a kimih kum za kim dingah kum khatte lawng a duh thlang.

A fanu, Anne Graham-Lotz in “ka nu cun a liamcia kum hra ah vanram ah in feh san zo. Ka pa hi ka nu tello in hi tiang in dampi thei ding hi kan ruat ban lo lawlaw. Kan dung thla-thumli hrawng cu ka pa hi a dai tuk” tin a sim. Thuthangṭha a sim thei nawnlo hnu ahcun: Zisu in, “Kei cu lamzin le thutak le nunnak ka si. Keimah ihsin siarlo zohman Pai hnen an thleng theilo ding …. Pathian in leilung hi a duhdawttuk ruangah a Fapa neih sun a pe, Amah a zumtu hmuahhmuah cu thi lo in kumkhaw nunnak an nei ding (Johan 14:6, 3:16) timi a sal nawn leuhleuh, cumi lo a dang ti thei a nei lo” tin a sim bet.

A fapa Franklin Graham (tufang ih leitlun Evangelist hminthang le Pathian mihman) khalin, “Ka pa cu kum 99 a kim thlang, cumi cu kum 100 tiang a dam ngaingai ding a bang, mangbangza si” tin a ngan. “Ka pai thusimnak ruangih thazang ngah le nunthar nei dahpawl, ziangtik ah, ziangtin, khuiah timi kha BillyGraham.org ah thuhla tawi in hlawm thei” tin a sim bet. (Ref: GH)

Siar bet

Texas Biakinn Sungih Kahthatmi 26 Vuinakih Cemliammi Southern Baptist Convention In Ṭuanvola

Kan dung zarhpi sun nahzi 11am ah Sutherland Springs, Texas ih First Baptist Church biakinn sungih khawmpawl cu Devin  Kelley, 26 in AR-556 rifle thawn an khawm thawk pek ih a kah ciamco ruangah mi 26 an thi ih a dang minung 20 cu nasaten hliam an tuar.  Hi mithi 26 pawl ruakvuinak hrangih cemliami cu Southern Baptist Convention in ṭuanvo a la. SBC President Steve Gaines le SBC EC President Frank S. Page khalin tlawngkai ni hnih ah khan Pastor Frank Pomeroy cu lengin tohpinak an nei. America Vice President Mike Pence khalin a va veh hai ih “Siatnak hnakin kan zumnak a tum sawn, kan rampi in nan hrangah thlaza kan cam” tin a hnem.

Riahsiatza a simi cu innsang pakhat ihsin minung pariat le naupai lai a nu khal mi thi ah an tel. Cun cui kawhhran ih Pastor Frank Pomeroy ih fanu kum 14 mite tla kahthatmi ah a tel ve. Kum 15 sung hi kawhhran ih pastor ṭuan zo Pastor Frank Pomeroy in “himi thu hi mikip hnenah sim ka duh – ka sungkua cu hinah kan umih nan nih cu khanah nan um – kan nunah ziangvek khal a thleng thei, Pathian lawng hngohsan uhla nan mai theihnak kha rinsan hlah uh. Ziangah hivek a cang ti ka theithiam thei lo, asinan ka Pathian cu ka thei ringring” tin  tlawngkai nikhat ni ahkhan a sim.

Pastor Frank Pomeroy ih fanu kum 14 mite le a members dangpawl biakinn sungih kah an si lai ah Pastor tei nupa cu hmun dangah an rak um kherkher, a nupi Sherri Pomeroy in “ hi thuthangsia kan theih veten Florida ihsin kan ra tlungih cui zan cu kan falepawl le kan tulepawl thawn kan um” tin a sim. Pathian remruah hi theihthiam a har tuk ṭheu. Pathian in Amah betu a milefate, a mah zumtupawl hnenah ziangah hivek siatnak thlen ter a siang ti cu kan thei ban lo, an hrangah thlaza cam sak cio uhsi. (Ref: GH, CP)

Siar bet

Kalaymyo Khawsung Vengah Khristian Biaknak Hmunram le Innhmun cu Ralkap in Lon Tum

Kalaymyo Chian-Mih-AungSiVeng, Ward(4) ih Biaknak hmunram le Innhmun(20) lenglo cu veng kiang No. 941 Construction Engineer Ralkap in ralkap hmunram si dingah hring-hro in lon an tum. Ralkap pawlkom lam khalin cutawk hmunah feh in hmun-um inn-neitupawl thawn tonawknak an nei.

Cui hmunram cu biaknak lamih neihmi ram a si laiah a kiangih Khah-Lah-Yah (228) in 1990 ah ralkap ram kauh nak hrangah an rak laksak. Cumi hnu 1997, December thla ah rampi thunei bawi upapawl ih fialnakin hmunram neitu ngaingai Khristian Kawhhran hnenah an pe kir sal. Cu hnu khalah a kiangkap ih Construction Engineer ralkappawlin an ti buai leuhleuh. 2001 ah venglam thuneitu ralkap (Kalay) in a ti felsak ih hivek thubuai um nawn lo dingin ralkap bawi Khin-Maung-Aye in biaknak leiram, le minung umnak leiram cu leiram cazin (105) suah sak lohli dingin a fial.

 Asinan August 1, 2017 ah cui hmunram cu ralkap hmunram hrang ‘Master Plan’ ah a tel, ralkap ram a si thu le a rang thei bikih pe sal ding le tifel dingin an simih, tifel duh asile ralkap thaw lawngin relkhawmih Facebook ih ngan lo dingih an sim hnuah Laimi ih inn paziat a um, kawl inn paziat a um tipawl nasaten an sutih an hliakhlai ciamco. Hmunram neitu ngaingaipawlin an ram cu Khah-Lay-Yah (228) ih pekmi le leiram cazin (105) an neihmipawl tla an hmuh nan khapawl cu a lem lawnglawng a si tin an ti sak men. Cubetah ṭuanvo neitu upapawl cu an pai hmin le an umnak tivek an sutih hek ding tiangin an hringhro. An nih khalin ti thei dang an neih lo tikah hek asi khalle thuṭhennak zung tiang an thlun ding thu an sim ve. An mah ih in tuahsakmi le in pekmi rori a lem in ti saktu khalin a simmi hi a dinpi ngam ringring a ṭul, kan nih khalin hi thuhla a fel hlan le a neitu kan si zia a fiang hlan sung, theitawkin kan zuam ve ding. (Ref: GS Mang fb, Zalennews)

Siar bet

Kawlramih Pastor Dom Dawng Nawng Latt (L) le La Jaw Gam Hseng Thawngtla

Kawl ralkapin kan dung December thla ih an rak kaihmi assistant Pastor pahnih cu kan dung tlawngkai ni-nga (Oct. 27) ahkhan daan loih pawlkomnak, ralkap thangsiatnak le tirhfung an ṭuannak ruangah timi sualpuhnak thawn thawng an thlak tin theih a si.

Pastor Dom Dawng Nawng Latt, 65 cu kum li le thla thum thawngtla ding a siih pastor Jaw Gam Hseng, 35 cu kum hnih le thla thum tla ding a si tin Shan state ih Lashio town zung lam ihsin theih a si.

Hi Kachin pastor pahnih cu Kachin Baptist Convention sungtel an siih Kachin Independence Organization (KIO) thawn pehtliahnak an nei timi thu ih sualpuh an si, cun an tirhfung (spying) an si tiih puh an si fawn. Nawng Latt cu media hnenih thu a simnakah an kaihnak thu ih ralkappawl a soisel ruangah a thawngtlak ding kum, kum hnih an ṭhan betmi a si.

Mong Maung town, Shan state ih Pastor Zau Ra, Kachin Baptist Convention ih sungṭuan (secretary) cun Morning Star News hnenih a sim nakah himi pastor pahnih cu tualsung thuthanglatupawl an bomnak ruangih kaih an si hmel bik tin a sim. 

Ziangahtile hi pastor pahnih in kawl ralkapih vanzam thawi bomb an thlaksiatmi St. Francis Xavier Catholic Church siatmi, zuktu dingah tualsung thuthanglatu an ko.

Pastor Zau Ra cun, “hi pastor pahnih an suahzalen ding hi kan duh a si, ziangahtile an nih in sualnak zianghman an tuah lo. Thawng tla tlak khal an si lo. Daan thawn kaih aw in theitawk kan bawm ding. Thlah zalen sal ding khalin theitawk kan zuam dingih kan dil ding” tin a sim. Morning Star News hnenih a sim betmi cu “hi pastor pahnih in KIO hrangah hna an ṭuan timi thufelfai (evidence) a um lo”.

“Himi cu a diklomi a si – KIO hrangih ṭuan an si lo. An ṭuan rori ti hmutu le theitu felfai a um fawn lo. An nih cu biaknak lamih hotu men an si, hmuntin ah feh in Pathian thu asilole thla an cam pei cu. Cucu biaknak lam hotu zo khalih tuah theihmi zalennak a si. Amahlawngte ralkap bawmmi an nei ngaingai a si ahcun thuhran” tin a sim. 

Pastor Zau Ra in “hi pastor pahnih umnak hmun cu KIO ih kuthnuai ih um cu an si ko, curuangah biaknak lam hruaitu cun hmuntin ah feh in thu an sim, thla an cam. KIO pawlih thuneihnak hmunram ih feh ruangah  hi pastor pahnih in KIO hrangah hna an ṭuan ti lawkmai theih tla a si lo” tiin a sim.

Himi thu ruangah kan dung tlawngkai ninga (Oct. 27) ah, Yangon ih U.S Embassy khalin ‘statement’ a rak suah. Human Rights lam khalin an thling thla, international rights group dangpawl khalin thlah sal ding an duh.

Nawng Latt le Gam Seng cu cahram 17/1, daan lo ih cangvaihnak (unlawful Association Act), Section 8 ih Import/Export Act ih khing, thawngthlak a si.

November 2016 ih Burma le miphun dang ralkap bur buaibainak hi northern Shan state ah a nasa tuk, 50,000 lenglo China ramri ah beunak hawlin an tlan. Kawlram cu zatek 80 cu Buddhist an siih zatek 9 lawng Khristian an si. 

(Ref: Gospel Herald)

Siar bet

Khristian Pastor-pawl Kawr vek Hruh in Newin tupa (Aye Newin) Cu Party Ah Feh

Catholic Khristian hotupawlih hruhmi kawr hruh in Party puai ih Aye Newin a feh cu a mah bulpak thu a si tin biaknak lamih thuneitu cun a sim.

Mah-Sah-Lah sanih thuneitu lubik Newin tupa Aye Newin cu Yangon ih Black Hat Wine Bar & Burmese Tapas Restarant ih tuahmi model Shwe-Ein-Shi ih suahni lawmah Khristian upapawlih hruhmi vek hruh in a feh. Biaknak le nunphung lam hotupawl khalin himi cu zohman a hnaihnok lo, a mah bulpak thu men a si tin an sim. Catholic biaknak pawlkom hotubik khalin hi thu ah zianghman sim ding le sim ṭul a um lo tin a sim. 

(Ref: Burmese-dvb,lwinpyin) 

Siar bet

Evan/Singer PBK Liankhuma Le Singer TBC Zaithanpuia In USA Ah Gospel Concert Nei Ding

Mizo hlasak thiam hminthang le tulai Pathian mi hman PBK Liankhuma le Singer TBC Zaithanpuia cun tui thla(November 11-12, 2017) ah, USA ah “Rejoice in the Lord”  timi Gospel concert an nei ding tin theih a si. PBK Liankhuma hi hlasak lawng siloin thusim lam khalah    Pathian ih hman zetmi a si. Mizo hla lawng siloin, Falam le Hakha hla khal tampi a sak. 

A hmun         : 329 West Banta Rd, IN 46217

A Caan         : 7:30-9:00pm

Luhman        : $ 10 (Zaan hnih hrang)

A Ni              : Nov. 11-12, 2017 (Sat & Sunday)

(Ref: David Nun Tho FB)

Siar bet

Lawngfangkheh Zuknung Lemcangpawlin Khrih Zisu An Pan

Pastor in ‘lawngfangkheh zuknung zoh zongsang nak ihsin luatnak’ timi a thusimnak ruangah, lawngfangkheh zuknung ih lemcang hminthang Brittni De La Mora (hlanih Jenna Presley tiih theihmi) cu a hnaṭuan le thiltuahmipawl bansanin Pathian lamah a tlulut tiah theih a si. De La Mora cu lawngfangkheh zuknung za lenglo cangtu a si, hmanseh tu ahcun cupawl tlansanin Zisu a hmu-ngah zo tin ‘gospelherald’ thuthang in kan dung thla ah a rak ngan.

Cuvek thotho in Mark Wahlberg khal a hnaṭuan, lawngfangkheh zuknung lemcannak ihsin a colh thu le a liamcia ih a thil tuahmi ruangah Pathian in i ngai dam thei ko ding tiih ruahsannak a neih thupawl tui tlawngkai ni hnih ankhan ‘foxnews’ in a ngan. Mark Wahlberg cu 1997 ah “Boogie Nights” timi lawngfangkheh zuknung ih lem rak cang dahtu a si. Wahlberg cu a kum 16, 1988 ah tla thawng rak tla dahmi a si. (Ref: Foxnews)

2 Korin 5:17, “Zozo khal Khrih thawn an pehzomawk tikah cun mithar a si, a nun hlun cu a cemih nun thar a thok zo”

Siar bet

England Ram Biakinn 4 Ih 1 Tluk Cun Khawmtu Nauhak Neinawnlo

England ramih Biakinn pali ih pakhat tluk cu an khawmnak ah khawmtu nauhau an um nawn lo ti ah theih a si.

October 2016 ih zingzoinak an rak tuahmi khalah kawhhran fate deuh, zatek 25% cun an biakinn ah nauhak an neih nawn lo thu an sim. Kan dung zarh ih an zingzoimi an tarlangmi khalah kawhhran lailak pawl ahcun a tlangpithu in Biakinn pakhat ah nauhak pathum hrawng an umih, biakinn/kawhhran tumpawl ahcun a tlangpi thu in nauhak 35 hrawng an si thu an tarlang.

October 2016 ih an simmi cu a tlangpi in minung 930,000 ah nauhak zatek 14% hrawng lawng hi zarhtin Biakinn feh an si. Church of England ih simphuangtu (spokesperson), Anna McCrum in Christian Post hnenih a simmi cu “kawhhran hin nauhak nei ding kan si nan, ziangahtile tlawng 4,700 hrawngah nauhak million 1 lai an um” tin a sim.

2014 ah Khristmas puai hmangtu hi 2.4 million an siih cui kumah 130,000 cu baptisma pek an si. Cumi cu 2004 ihsin kan ruat asile zatek 12% a tlaniam tinak a si. Kutsih neiaw 50,000 an siih 19% a tla niamih, mithi vuinak ah 146,000 kha 29% a tla niam tin the Guardian in 2016 ah a rak sim. (Ref: Christian Post) 

Siar bet

Kutke Neilo Leitlun Evangelist Hminthang Nick Vujicic Ih Thusimnakin Ukaraine Ah Mi 400,000 Rundamnak Co

Leitlun thusim thiam Evangelist hminthang bik lakih pakhat, kutke neilo Nick Vujicic in Ukraine ih Pathian thu a simnak ruangah minung 400,000 cu an sual sirin rundamnak an co. Hi ṭhangphawknak cu Europe khawmual ih nasabik le ropibik a si ding Nick ih thusim hi minung 800,000 lai in an ngai. “Bawipa, ka lungawi tuk” tin Nick Vujicic in tui tlawngkai nihnih ahkhan a Facebook ah a ngan.

Nick Vujicic, 33, in nahzi 40 sung a rak umnak Russia ih thuthangṭha sim a tum hrih lo thu a sim. “Vansiatnak ah President ka tong thei lo, asinan duhdawtnak ci tuh peh ding le thuthangṭha simphuan theinak sangka a on awk hlan sung hi ram hrangah ruahsannak kan nei a si – in ṭanpinak ah ka lung awi” tin a sim bet.

Nick Vujicic cu a suahthlak ihsin kut ke neilo a siih ziangruangah hitin a cang ti khal zohman in an thei lo. Hmanseh a bei a dong mai lo, amah vek leitlun ih harsatnak neitupawl hnenah thazang pek le ruahsannak pek sawn hi a tumtahmi a si. Tu ahcun a nih cu leitlun ram 63 lenglo ah Pathian thuthangṭha a sim zo.

Thinnau le beidong in na um pang maw? Pathian hrangah ka tlinglo tuk na ti pang maw? Fimthiamnak ka tlasam tuk tin na ruat pang maw? Pathian hnaṭuan dingah lennak sumpai ka nei lo na ti pang maw? Nick Vujicic ih nun lamtluan hi zo hman aw, suahthlak ih kut ke nei lo hman hitlukin Pathian in a hmang. Nick Vujicic hmangtu Pathian hin ziangah a lo hmang thei lo ding? Na tlin ruangih lo kotu Pathian a si lo ih a lo kawh ruangih tling sawn na si. Tlangak le ramsa hman hmang theitu Pathian a si. 

(Ref: Gospel Herald)

Siar bet

British Khristian Missionaries Pali cu Nigeria Ah An Kai

British missionaries pali cu Nigeria thlanglam ram Delta state ah kaih an si tin palikpawlin kan dung tlawngkai nit hum ah khan an sim. Hi missionaries pali cu sii-vai lam bomnak pe dingih feh an siih October 13 ahkhan meithal kaipawlin an kaih, tin Delta state palik spokesman cun a sim.

Andrew Aniamaka in, a kaitupawl hi kan pehtlai thei lo, ziang an duh ti tla kan thei lo, asinan theitawk kan zingzoi rero lai a si tin a sim. An nih cu missionaries an siih khawte ah a lakin sii-pawl zem an tum menmi a si tin a sim bet. Nigeria ahcun hivek kaihawknak cu a um deuh ringringih harsatnak zaran vek a si ko. Hmansehla a buaithlakmi pakhat cu Khristian hrangah Nigeria cozah ih humhimnak a tuahlomi hi a si. 

(Ref: Christian Today)

Siar bet

Al-Shabaab Kutin Somalia ah Khristian 302 An Thi

Islamist ralkap bur sualtak “al-Shabaab” in kan dung zarhte ni ahkhan Mogadishu ah bomb an puah ruangah Khristian 302 cu an thi a si tin Somalian officials in a sim. Pentagon spokesman Col. Rob Manning in, U.S in Somalia ah ralkap bur 400 lai a thlah zikte nan a ṭhulh sal tiih ruah a si tiin a sim.

Al-Shabaab hi Somalia le Africa Union forces ih dawisuah a tum reromi a siih U.S khalin a duh lo zetmi misualral an si. Nairobi-based think-tank Sahan zingzoinak ah 2016 ah Somalia minung 723 thah an rak siih 395 cu bomb in an thi, cumi cu 2015 lai ih thahmi 193 hnakin a tam deuh. 

Kan dung kum khalah hi misualralpawl cu Kenya khawte lamah feh in Khristian tampi cu an hngawng an tan, an nung cingin an ur. Al-Shabaab hin 2015 Kenya ih mi 148 an thah laiah a tam sawn cu Garissa University College ih tlawngtapawl an siih meithal kaipawlin tlawngta minung 700 lenglo namih sah-that dingah an hruai ih Khristian a simi tampi cu an that ih Muslims a simi cu an thlah. 

(Ref: Christian Post) 

Siar bet

Lakewood Church in Kari Jobe, Tasha, Cobbs, Hillsong Worship Pawl Sawmin Hurricane Thlisia Tuarpawl Hrang Concert An Tuah

Kan dung zarhpi October 15, 2017 ahkhan leitlun Protestant Kawhhran lakih tumbik pakhat, USA ih Lakewood Church in Houston, Texas ih Hurricane thlisia ih siatsuahmi le harsapawl hrangah Khristian hlasak thiam hminthangpawl sawmin Concert an tuah.

A hohatu bik le Lakewood Church ih senior Pastor cu tufang leitlun Pathian thusimthiam, hminthang le lar, Joel Osteen a si. Amah in Bethel Music, Chris Quilala, Tasha Cobbs-Leonard, Kari Jobe, Cody Carnes, Hillsong Worship, Passion le Pat Barrett pawl cu sawmin harsa bomnak hrangah amai kawhhran ah zarhpi 15 October 7:00pm ah concert an nei. Cui concert cu a zoh-man a lak asinan a rasuaktupawl hnen ihsin a bawm theithei tin bawmnak an tuah ih Houston Worship Relief website le Bethel Music’s Facebook ihsin ‘live’ an thlah. (Ref: Christian Post)

Siar bet

Tihal-rilrawng North Korea Khristian-pawl

USA ih hrambunmi “Christian humanitarian aid organization World Help” timi in North Korea ih zumtu thlaraulam rilrawng-tihalpawl hnenah a thupten Bible 100,000 cu pekhlannak a nei.

Ziangahtile North Korea cu a liamciami kum 16 ihsin leitlun ih Khristian hrem tambik le harsatnak pe tam biktu ram a rak si. Cumi ruangah World Help cun hivekih hma a lak nak a si.

World Help President Vernon Brewer in tlawngkai nikhat zanih tonkhawmawknak ah North Korea ramri a feh lai ih Bible phur ṭheutu missionary pa thawi an biakawkmi cu hitin a sim. “Ziangtlukin Bible kan namih kan kuat khalah Bible khopkham ih siar ding a um dah lo. Tufang ah North Korea ih zumtupawl cu Bible kai hrih lo tampi an um. Bible cang hnih-khat te zohlo ih siar thei dingin cahnah parte ah an ngan, thlarau lamih rilrawnnak taktak a si” tin a sim. Brewer in a sim betmi cu North Korea zumtupawl cun Pathian thu cabu copy tuah sak an ṭul zia thu a si. Asinan cozah in a theih ahcun thawng an tla cih ding.

World Help ih simdan vek asile, Bible pakhat North Korea zumtu hnenih kuat dingah $10 kan cem. Brewer ih simmi cu North Korea ih kawhhran hrekkhat cu Bible pakhat an ṭawm aw, curuangah $10 cun minung panga hrang lai a daih. Thlarau lamih kan unau anmah te harsatnak an tuar rero timi cu kan ngai ngam lo, hremawknak le harsatnak cu kan ti rehter theilo nan Zisui lamzin an zawh nakah kan ti theitawk kan bawm ding tin a sim.

Netabik North Korea ih mipum siarnak ah Khristian hi 300,000 hrawng an um ti a si, cumi hlan ih an siarmi ah Khristian 200,000 timi hnak cun an karh deuh. Brewer in, Kim ih kaihhruaimi cozah ih tumtahmi cu a ram sung ihsin Khristianpawl dawisuah  thluh le cemral ter ding a si a ti. Cun North Korean labor camps ih Khristian thawngthlakmi hi 70,000 hrawng an si ding tin a sim bet. Cutawk hmun cu lotheihlo in hna an ṭuanternak, an hrem le an vuaknak hmun kha a si. North Korea ahcun Bible neih men le hymn hlasah asilole thlacam menah kum 15 tiang thawng thlak theih a si. Kum 15 thawng thlak timi cu “thah asilole thi” ti thawn a bang aw. Ziangahtile thawng an thlakmi Khristian tam sawn cu kum 3 sungah an vuaknak le an hremnak tuar loin an thi thluh. Labor camps ih hruaimi Khristian ra kir sal thei an um lo. Rawl lo in an ret, an thawi, an vua ih nikhat ah nahzi 13 sung hna an ṭuan ter.       

(Ref: The Christian Post)

Siar bet

Billy Graham ih Bible Bungcang Duhbikmi

Tufang leitlun Evangelist hminthangbik lakih pakhat, Franklin Graham (Billy Graham ih fapa) in ka pa in Bible bungcang pakhat cafang tumpin a nganih a inn hmunkip ah a tar, cule “himi hi ka nunih Bible bungcang a si” a ti tin a sim. Hi Bible bungcang cu ka pa Billy Graham in a bualawknak, rawlsuannak, a ihnak khan, le hmundang tampi ah cafang tum pin a tar tin kan dung tlawngkai nihnih ni ah a Facebook ah a tar.

A Bible bungcang duhbikmi cu Galati 6:14, “Kei ka    hrangah cun kan Bawipa Zisu Khrih thinglamtahnak siarlo uar ding dang zianghman ka nei lo. Ziangahtile      Khrih thinglamtah ruangah leilung hi ka hrangah khenbet a si zo ih kei khal leilung hrangah khenbet ka      si ve”.

     July thla ahkhan Billy Graham Evangelistic Association and Samaritan’s Purse ih president (Franklin         Graham) in a pa kum 98 a siih a hardamnak a ṭha nan a kum a upat thupawl a rak sim. January 2013           ah khan Billy Graham Library website in 1995 ih a Bible cang duhbikmi cu Johan 3:16, “Pathian in leilung hi a duhdawt tuk ruangah a Fapa neih sun a pek ih a mah a zumtu hmuahhmuah cu thi loin kumkhaw    nunnak an co ding” a si tin an rak ngan. 

    (Ref: Christian Post) 

Siar bet