Pu Run Nawn (Chin-mi, International Boxer) ih Thuanthu

Pu Run Nawn (Chin-mi, International Boxer) ih Thuanthu

Photo credit: Nu Than Mawi

Pu Run Nawn cu 1963 kumah Selawn khua, Falam peng, Chin state, Myanmar ah a suak. An sungten Tahan-Kalaymyo kiangih Zotlang/Minhla (hlan ih Tithim) khua ah an vai. Pu Run Nawn cu Myanmar Army kawpin boxing thawng a rak thawk. Asinan Kawl ralkap lakih boxing thawng cu hmailam hrang ruahsannak a mal deuh tiih a ruah ruangah Mizoram ah a feh ih Mizo-hmin Zoramthanga tin hmin a pe aw, cutin 1985 ihsin boxing thawng a thawk sal. Cule Mizoram-Myanmar Champhai Border Championships ah sui tacik (gold medal) a rak ngah ih cui kumah best boxer khal a ngah cih.

Pu Run Nawn (Zoramthanga) cu Mizoram le India ram pumpi aiawh in vawi tampi boxing a rak thawng. 1989 ah tla Moscow (Russia) ih tuahmi World Amateur Boxing Championships ah  a tel ih quarter finals tiang a thleng, quarter final ah Rogelio Marcelo (Cuban rammi) hnenah a rak sung. 

A hlawhtlinnak bik cu 1990, Mumbai ih tuahmi leitlun pumpi zuamawknak, 6^th Boxing World Cup ah a siih “light flyweight” 108 pounds (49 kilograms) ihsin leitlunpi lakah dar tacik (bronze medal) tiang rak ngah theitu a si. Cui ṭumah South Korea mi Jin Yang timipa cu points in a rak neh. Cutin quarter finals a thlengih quarterfinals ah Scotland mi Paul Weir khal points thawn a neh lala. Netabik cu Semi-finals ah United States ih Eric Griffin (champion) hnenah points thawn a rak sung. A pathumnak (dar tacik) hrangah Boxing World Cup in zuamawknak a tuah salih a India pi, Dhamendar Yadav cu points 17-4 rorin a neh ih cutin leitlun pumpi zuamawknak Boxing World Cup rori ah a pathumnak (dar tacik) tiang a rak ngah thei. Pu Run Nawn (Zoramthanga) ih ngahmi dar tacik hi India rampi khalin Asian Games tlunlam, “International boxing tournament” ih tacik a rak ngah hmaisabikmi khal a si.

1990, World Cup Boxing ih dar tacik a ngah hnu, Aizawl khawpi ih a ra tlun tikah Mizoram pumpi in mi maktara le miropi, Pu Run Nawn (Zoramthanga) cu upatnak le sunlawinak thawn an rak hmuak. 

Pu Run Nawn cu Mizoram cozah in an state ih Sports Officer ah an hmang. Boxing thawng cu 1992 ihsin a cawl. 9 February 2005 ah Mizoram ih Lunglei Civil Hospital ah thisen sang (hypertension) nat in a nun a liam. A hnaṭuan Sports Officer cu a thih hlan tiang a ṭuan. A nupi le a fale pathum a tanta. 

Pu Run Nawn (Zoramthanga) ih hlawhtlinnak ruangah Mizoram ih mino tampiin boxing thawng an run paih phah. Kan Chin (Falam-mi) sungin leitlunpi zuamawknak tiangih hlawhtlinnak rak ngah theitu kan neih hi kan thazang a tlung ngaingai. Chin mino tampi khal kan mah le lamzin cio ah Pu Run Nawn (Zoramthanga) vekin leitlunpi ih hlawhtlinnak ngah theitu kan sinak dingah zuamnak le taimaknak thawn hmainawr sin uhsi.

Pu Run Nawn (Zoramthanga) ih Pa cu Buan Kip Thang a siih a nu cu
Ṭial Ro a si.

An unaupawl tla cu: Pu No Lian Sum, Pu Run Nawn, le Pu Ni Cung tla an siih nu neta (a pai nupi neta) thawi an run neihmi a unaupawl tla cu:  Pu Ngun Tawk, Nu Saphun, Nu Siang Nei, Nu Nung Thawng Par, Nu Salem Thar, Lal Rem Ruat, Lal Ram Luah tla an si.

Source:

Wikepedia/zoramthanga(boxer)

Indian boxer passes away. Telegraphindia.com (10 February 2005). Retrieved on 13 April 2014. 

Speech by Governor of Mizoram to 2nd Mizoram State Legislative Assembly, March 16, 1991. Neportal.org. Retrieved on 13 April 2014.

The great Chin boxer Zoramthanga died; The Chinland guardian. 10 February 2005

The Hindu: Zoramthanga passes away. Hinduonnet.com (10 February 2005). Retrieved on 13 April 2014.

Amateur boxing records. Amateur-boxing.strefa.pl (12 February 2014). Retrieved on 13 April 2014.