Van Ihsin Cakuat

Van Ihsin Cakuat

Ka duhdawtmi ka sungpawl, lo simduhmi ka nei,

Asinan hmasabik ah tluangten ka thleng ti ka lo sim hmaisa duh,

Hi ca hi Pathian thawi kan umnak Van ihsin ka run nganmi a si,

Hinah cun riahsiat le mithlitlak a um lo, kumkhaw duhdawtnak lawng a um,

Nan hnenih ka um nawn lo ruangah riahsia in um hlah uh,

Zing, sun-zaan, nan hnenah ka um ringring ti rak thei uh.

Ka lo tansan a ṭul ni, ka leitlun nun a cem veten,

Pathian in I hruai ih I pawm, cule “hi hmunin kan lo hmuak” tin i sim.

“Kan hnen na hung thleng salih ka lung a awi.

Na um nawn lo vete cun an lo ngai zet,

Asinan na duhdawtmi na sungkawpawl khal hinah an hung leh ding,

Hi tawk hung thleng hmaisa dingah ka lo ṭul, cucu ka khawkhan ciami a si,

A thi theimi minungpawl bawm dingah tuah ṭulmi tampi kan nei lai”.

Cule Pathian in tuahter I duhmi ngankhumnak ca I pe.

Cumi sung ahcun, nangmah lo kilkhawi ding thu cu a hmaisalam ah a um.

Ni tin, zarhtin le kumtin na kiangin ka lo kil ding,

Cule na riah siat caanah na mitthli hnultu dingah ka rak um ringring ding.

Sun hnaṭuan khungkhai le hrehum na ṭuan hnu zaan na ih tikah,

Kei le Pathian cu zaan lai fangah na kiang nai bikah kan rak um.

Leitlun ka um lai thu le kan nawmlai caanpawl na ruah tikah,

Cupawlin na mitthli an tlater ṭheu, asinan cucu minung na si ruangah a si.

A fiang zetmi pakhat cu, kei cu ka leitlun nun a cem zo,

Asinan a hlan hnakih nai sawnin na kiangah ka um.

Cun ka rual ṭhapawl tla, Pathian kha rinsan uh.

Nan mah thawn a hlatnakah ka um lo, tlangpar ka rak kai hmaisa men.

Nan hmaiah lungto lamzin pal ding le tlangsang kai ding tampi a um.

Asinan ni khat nini ah hmunkhatte ah kan feh tlang leh ding.

Cucu kei ka “philosophy” a si.

Leilung pe dingah, leilung in a lo pe ve ta ding.

Riahsia le mi harsa pakhat-khat nan bawm thei asile

Zaan lai ah Pathian nan sim thei, ka hnaṭuan hi a lak a si lo.

Tu ahcun ka nun hi ka di a riam tuk hokhaw,

Ka nunnak a cem veten mi pakhat hnih ter theimi ka nei ti ka thei.

Lam zinpi ih na feh rero lai ah, na ruahnak ah ka um,

Na kehneh ka lo thlun,

Zilthli thiangin nem tei’ na hmai a run lo hran tikah

Duhdawtnak thawn nemten ka run lo pawm asilole ka run lo kuah tinak a si.

Na taksa zalen zetih na suahsan tikcu a thlen tikah,

Na cemral tinak a si lo, na inn asilole ka hnenah na hung tlung tinak a si.

Ka lo duh ringring ding, cui hmun nuam ihsin,

Rei hlanah kan tawngaw leh sal ding.

P.S, Pathian in a lo duhdawt zia in sim ter.

Hram: (Ngantu Theilo ih “A Letter from Heaven”)