Hlawhtlinnak Ih San

Hlawhtlinnak thawn pehparin ruahdan phunphun, simfiangdan phunphun a um. Hlawhtlinnak timi hi ziangvekih kan simrel hmanah thuthluknak in tuahsak theitu cu thil pakhat lawng a si. Cumi cu hi thusuhnak hi sang aw.

 Ziangtlukih mi lungawi ka si?

A hlawhtling zetmi hnaṭuantupawl cu an hnaṭuan hlawhtlinnak hrangah tikcu tampi thungaithlakin hna an ṭuan ringring. Hivekih taima tuk le zuamtukin an hnaṭuanmi ih thinlung an pek tam tuk ruangah innsang le pawlkawm-awknak lamah thubuai tampi an tawng ṭheu. Cutiih taimak suah, nasatei zuam le thinlung pek tuk ahcun innsang le lu-hmuh-yi ahcun buainak tete um lo cu a theih lo. Taimak suah le nasa tei thinlung pek lo cun hlawhtlin a theih fawn lo. Sumpai tampi kan hawl thei nan lungawinak kan nei lo timi cu a dik ciah hrih lo. Nuntu khawsaknakah kan tikcu kan pe tam tuk tinak a si. Taktak ahcun sumpai hawl hnakih thupimi tampi a um ko.

Leitlun ih milian pakhat si dingah nitin ten kan zuam nan lungawinak kan nei thei lo a si ahcun kan hrilmi thilin hlawhtlinnak diktak in pe thei lo tinak a si. Ka tuahmi thil hi vun cikfel sehla, sumpai lamih hlawhtlinnak, innsang lam, rualpi kawmnak tivek, ṭhen theihlomi thil tampi na hmu ding. An zaten thil thupi hlir an si tikah thil pakhat ih thinlung nasa deuh na vun pek veten a dangpawl ahcun ba-hlahnak tete a um tengteng ding ti cu theih cia a si.

Sumpai tampi ngah duhtu, len duhtu na si ahcun a dang thilpawl na sunral ṭulmi a um tengteng ding. Cuvek thotho in innsang hrangah tikcu pek tam duh, midang bawmduhnak hrangih na caan na pek tam asile a dangah bahlahnak a rak um lala ding.

Ziangmi si na duh bik? Ziangmi neih na cak bik? Na innsang thawn ziangmi neih na duh ih ziangmi si na duh? Na ti thupit bikmi kha ṭhaten ruat aw. Cumi na tuah asile cumi in a lo lungawi ter ding. Cuti a si lo ahcun ziang na tuah khalle a hmin men, lakkha duh men a si dingih lungawinak le diriamnak na nei thei lo ding.

Lolam te a si ko. Na kiangkap ih minungpawl kha an duhhrilmi hnaṭuan thawn pehparin diriamnak an nei maw sut san hnik aw. Ṭhimnakah, ka theihmi tlawng sayamah nu kha ka sut. Asinan a lakkha a mal tuk thuthawn pehparin a phunciar ringring ruangah hnaṭuan dang ṭuan dingin ruahnak ka pe. Asinan tlawng sayamah ṭuan kha a duhtukmi a si ruangah hna dang a ṭuan thei lothu in sim. Hi tawk khalah a kaih aw thei lo lala. Ngaingai te cun tlawng sayamah ṭuan cu a duh taktak a si ahcun lakkha a mal khalle a cohlan dingmi a si. Kan duhmi thil pakhat kan hril hnuhnu cun a dang sulral ṭulmi a um ringring ti kha hngilh lo a ṭha.

Asile, na lung a awi thei maw?

Hlawhtlinnak timi ih san a thupi thlang. Na bulpak ih san kha a thupi. Cu hnakih a thupimi pakhat cu na tumtahmi a si. Mi harsa bawm le midang hrangih nun khan a hrang, hlawhtlinnak ih san na ti asi ahcun tluangtlam ten na tuah thei ding nan na lian dah lo ding. Lennak hi na hrangih hlawhtlinnak ih san a si ahcun na lian ding nan innsang le pawlkawmnak (Lu-hmuh-yi) ah tlaksamnak tampi a um ding. Himi hi na cohlan thei asi ahcun na lung a awi tengteng ko ding.

Na lung a awi maw asilole mi lungawi na si maw timi kha sut aw sal aw. Na lung a awi thei asi ahcun mi hlawhtling na si. Na lungawinak a tam sinsin asile na hlawhtling sinsin. Tui ni ah na lung a awi thei lo a si ahcun ziangsimaw na thlengawk ṭulmi a um tinak a si.

Source: Gentleman Magazine