Facts of Falam

Facts of Falam

Francis Lal Uk

Facts of Falam (edited)

1.     Vaar Hydro Electric hmangih Falam khua sung meisa van hmaisabik ni cu: December 15, 1986 (……..) a si.

2.     Zahau Mi-uk Pu Thang Tin Lian cu “Thang Tin Sawn” timi ihsin an thlenghmi a si.

3.     Vate le Ramsa hmin ih saubik cu, “Thangkawngkingkawng” a si.

4.     1937 kum hlan ahcun Falam ah Baptist siar lo kawhhran dang a um lo.

5.     Evangelist Tha Nei Fai ih Thuthangt’ha a sim hmaisabiknak khua cu “Haikhawl” a si.

6.     USA ram sung ih states khuapi pawl lakah Falam khua hnakih umnak sang sawn cu khua 2 lawng a um.

7.     1990 hlan ahcun Falam peng minung tamsawn in Falam hla hnakin Hakha hla le Mizo hla an thiam tamsawn.

8.     Bill Gates in leitlun mipum zate’n ni 3 sung rawl a daar thei ding ti a si ruangah Falam khua sung cu kum 2739 le a hrek tluk in daar thei ding.

9.     Col. Hrang Thio cu August 8, 1949 (………..) 3:50AM ah a thi.

10.                          “Tur ruri i Puite tei’ Uipi teer rerotu Ro Te Pu” timi catluan cu na keyboard tluntabik tlar lawng hmangin na ngan thei.

 11. Falam khua sungih nunglai vanram kai tlak an rak timi pawl cu Lumet Paras, Pu No Zam le Pu Thawng Cin Thang pawl an si. (Pu Thang Tin Sum ca sung taa..)

12. Mai Far Men Par cu a Album hmaisabik hla a thun lai ah nazi 7-11 sung lawng a rei.

13. Pu No Than Kap ih Revolutionary hmin cu John Khaw Kim Thang a si.

14. English - Falam Chin Dictionary hmaisabik cu Sayakyi Van Kyi in 1959 ah a rak tuah.

15. Falam mi a hrek hnakih tamsawn cun Pu Than Bil Luai ih "Siibawi Um Lonak Ah" timi cabu hi cabu t’habik a si ringring lai tiah an pom. (Baibal siar tel loin)

16. New York khua sung luhnak Lincoln Tunel ih nikhat sung Toll man ngahmi cu Falam hrangah in rak hlu sehla Falam ihsin Rih tiang mawtaw zin laihnak a daih t’heh hlei ah, Falam mipum pakhat in Ting 1 zikte ciar kan zem aw thei lai ding. 

17. Actress Thet Mon Myint cu kum 11 a silai ah Japan ram a rak thleng dah. 

18. 1943 kum, November 7 ah Japan pawl Falam an lut.

19. 1988 kum ah Falam ihsin minung 2 lawngin phun 10 an ong.

20. Dr. Hre Kio ih lehmi Falam Baibal cu bu 40,000 (thawng sawmli) zem/zuar suah a si zo ih Falam cabu suak tambik a si.

21. Pu Cong Kham le a nupi cu Khrihfa ih an luh ruangah hramlak ah kum 6 sung umter an si.

22. Falam peng ah T’aal, T’io le Vaar timi lawng hi awfang suak pakhat (1 syllable) ummi khua an si.

23. Cangan thiam 'Mai Sokhlei Par' ih hmin ngai cu 'Thawng Lian Par' a si.

24. Falam (Fahlam) ih sullam cu, Fa=fate, hlam (thlam)=beunak (Fahlam=te le fa pawl him tei' beunak) tican a si.

25. Hlasak thiam BJ ih hla sungah 666 timi a tel.

26. Sunthla khua thar cu Falam peng sung khua thiangfaibik tiih hminsinmi a rak si.

27. Rev. E. Kyon Bil in Falam Baibal kum 7 sung a rak let nain Bible Society in an pom sak lo.

28. Kan Laica ah, "w" kan hman tinte’n a hmai ah "a" a um a t’ul ih “g” kan hman tinte’n a hmai ah “n” a um a t’ul ve.

29. Taluk mi an zatein Dollar $1 ciar thawh khawm in Falam hrangah in hlu sehla kan zate’n Rangoon ah inn pakhat le mawt’aw pakhat kan lei thei ciar ding.

30. Relsing khua ih Pa pakhat cun a fanu nupi ah a t’hit.

31. Falam Actor Ngun Mang cu Baffullo (NY) ah a um.

32. Pu No Than Kap in "Aw Falam" cabu sungah '1992 hlanih pacang t’ha pawl in 1992 hnuih Pacang t’ha pawl cu phunhnam lainatnak ah an neh thlekthlek' ti’n a ngan.

33. Falam khua sung ih luh theinak lamzin pi (4) a um. 

34. Fa nei upabik cu Pu Than Tum a si ih kum 72 a si ah fapa a nei.

35. Zaniat t’ong ih 'Sawngen' timi cu  'Thlacam' tinak a si.

36. Cafang non saal (repeat letter) um loih word saubik cu "Zumtheilonak" timi a si. 

37. Falam peng sungih hrinhnam 11 sungah Falam t'ong t'ha teih thiam harbik cu Ngawn an si.

38. Santhar raldonak (CNA din hnu) ah ral kut ih thi hmaisabik cu Thawng Lian Piang le Than Vel an si.

39. ZBC (Zomi Baptist Convention) cu 1953, Falam khua ah an din.

40. Falam mi kum 40 tlun lam 70% tluk cu Vainimho thawn t'hanglian mi an si.

41. Campaign tuah tinte’n a kaitu ih 85% tluk cu an piangthar ringring.

42. Khuate lam nauhak pawl cun "Muthla" le "Ralkap" an t'ih daan a bangrep.

43. Hlasak thiam Solomon Menrihai le BJ cu Pa khat Nu dang (unau) an si.

44. Hnawm hlon khawmnak hmun cu Sunthla t'ong in "tlaitlaan" ti a si.

45. Laizo khua cu Falam peng ih rangva inn tambik khua recorded a rak si.

46. Nunau phun hra ong hmaisabik cu Pi Hlawn Kip Thluai a si. (1956)

47. Falam khua an din pek (1900 hnu deuh) hrawng ahcun Falam khua sungah Falam mi hnakin Mirang le Kala (Indian) an rak tamsawn.

48. San San Nu (U Nu ih fanu) in Lt. Col. Hrang Thio cu zunghruk a pe dah, tiah an rel t'heu.

49. Pu Za Nei Sum ih kawhhran a rak dinmi hmin cu “Budhism and Christian Reformation Independent Presbyterian Church” ti a si. (1937)

50. “Kan nunnak” timi catluan cu dungkir zawng (reverse) ih siar khalah a bang aw thotho.

51. 2010 Hril-awknak ih Chinram MP cuhtu lakih nauhakbik cu kum 27 mi Thian Uk Thang (Nhgepi) a si.

52. Biazai ngan thiam, Hlaphuah thiam, Zuksuai thiam “Zunphir” ih hmin ngai cu “Sui Za Lian Thang” a si.

53. Hlanlai deuh ahcun atu ih 'C' kan hmannak ah, 'Ts' an rak hmang ih, 'Tl' kan hmannak ah 'Kl' an rak hmang.

54. Surbung tlang ih Vanzam t'umnak tuah dingih t'anlatubik le tawlreltubik pahnih cu Dr. Ni Khuai le Pu Kap Cung Nung an si.

55. 2000 kum hrawng, Falam khua sungah Falam tlangval hnakin Kawl ralkap an rak tamsawn.

56. Falam ih Pu Nawn Cong cu a fale 4 phunhra an on hnu ah amah tla a ong ve.

57. Chinmi lak ihsin Inspector of Schools hmaisabik pathum cu Falam mi lawnglawng an si. (1^st- Pu Siah Luai, 2^nd- Pu Sum Mang, 3^rd- Pu Van Kyi)

58. Leitlun Ralpi Veihnihnak (WW II) hlan ahcun Falam peng ih tlawng pawl ah Pu Za Nei Sum ih Tlawng Hla (Kan Laitlang ih Cazirmi u le nau...) timi an rak sak ringring. 

59. Pu Con Bik ih tupa Pu Siah Luai cu 1960 ah Australia, USA, England le Japan ram pawl a rak thleng zo.

60. 1979s hrawngah Falam siizung pi cu ihkhun 100 tlem asinan minaa 600 hrawng an rak um. 

61. Haimual, Zamual, Hmunpi le Dihai timi khua pawl cu Falam peng sungah khua hnih ciar an um.

62. USA ih khua khat um tambik cu Lumbang khua an si ih USA  sungah innsang 100 lenglo an um.

63. Kan Calai Pawlkom laarbik a rak si dahmi Falam Chin Christian Literature Society (FCCLS) cu 1982 ah an din.

64. Pu Cong Kham a thih lai ah a inn sung cu a tleu t'heh, an ti. (?)

65. Kawlram Zalennak ngah (1948) ihsin Rangoon khuapi kilvengtu le President inn kilhimnak ih t'uanvo latu cu 1^st Batallion The Chin Rifles an siih a uktu cu Lt. Col. Hrang Thio a si.

66. 1953 kum ah Falam khua sungah Jeep a thleng. 1955 ah mawtaw tumpi a thleng thei.

67. Falam mi kum 30 tlun minung 1% lawng Siizung ih suak an si.

68. CNA (Chin National Army) cu 1988 November 14 ah an din. (A dintu : Pu No Than Kap)

69. 'A u a au ouo o" timi catluan cu Vowels cafang hlir in ngan a theih.

70. B.A ngah hmaisabik cu Pu Siah Luai (Pu Con Bik tupa) a si ih 1938 ah a ngah. (Chinram ih ngah hmaisabik a si)

71. Pu Sang Ci cu kum 15 sung sum a dawng ih Mizoram ih First Class milian hminthang ah a cang.

72. Falam mi 65% tluk cun “t’ong” ti’n an ngan, 20% tluk in “t’awng” tin an ngan ih, 15% hrawng cu ca ngan dah lo lawlaw le hih thu a ruat ih ruat dah riai lo pawl an si. 

73. Micak hminthang Thuam Cak cu tlawngkhen zum tun khawmmi parah a it thei.

74. Falam thawn nai awbik khua cu Khawzaang a si.

75. Falam pacang 40% tluk cun Voksa cuai khat ei t'heh thei an ngam.

76. Falam Pastor ih Karate thiambik cu Rev. Don Hre Dun a si.

77. Rev. Dr. S. Hre Kio in Falam Baibal cu kum 11 le thla 8 le ni 2 sung a let.

78. Kum 2012 ah Falam khua sung mipum 7300 hrawng an um.

79. Lente t'ong in “Hangbo” cu "Vantil"an ti.

80. Meihol suah tambiknak cu Congt’he khua a si.

81. Pu Cong Kham (Falam peng Khrihfa hmaisabik 2nak) cu Pathian a awih hlanah an khua ih raithawitu lubik (puithiam) a si.

82. Kawl siangpahrang Tibaw in Pu Con Bik cu Vuiraang a rak t'hen dah. (?)

83. Laimi karhzai thoknak 'Lailun' cu Sunthla ram, Falam ihsin peng 5 tluk hlatnak ah a um.

84. Falam peng sungah Cite (Salt) suahnak (Ci khur) pahnih a rak um dah ih, Tlauhmun ram le Selawn ram ah an si.

85. "Maw! Lairam Na Dam Maw?" timi hla a phuahtu cu Henry Pum Kai Thang a si.

86. Tonic Solfa thiambik kawhhran cu Baptist an si. 

87. Pu No Than Kap t'heh hnu ih Falam mi CNF hotu t'uan saal hmaisabik cu Pu Za Hlei Thang a si.

88. 1976 kum, Falam ih Regional College ong dingih secret vote an thlaknak ah lungkim vote 25 le kimlo vote 8 in an rak neh na’n ......

89. 1979 ihsin Falam Siizung cu vei 5 lai rem/sak bet a si ih cumi ih paisa cemmi hmuahhmuah sungah Acozah ih bomnak cu t'henthum t'henkhat fang lawng a si. 

90. Falam khua cu minung 30,000 zikte in an rat sak. An zatein Mirang, Kala le Tuluk an si. 

91. Leitlun mipum hi kut kai aw t'heh sehla Thlapi vei hnih kan ngerh baan ding ti a si ih, Falam khawsung mipum kut kai aw t'heh sehla Lungpi khua kan thleng deuh lo ding. Thlapi thleng ding cun minung pakhat in peng 341 ciar kan feh a t'ul.

92. No (1) BEHS, Falam  cu kum 1906 ah an din.

93. 2005 kum tiangah Falam sung ihsin Theological ih Doctorate ngahtu 18 an um ih, Secular ih Doctorate ngahtu cu pa 3 lawng an si. 

94.  Cafang "s, d, f, z, c, v, b le z" pawl cu t'ongfang cemnak ah hman an theih lo. 

95. Institute of Chin Affair (ICA) cu May 5, 2012 ni ah an din.

96. A liam cia kum 20 hrawng ihsin nunau hmin duhkawh (nick name) laarbik cu "Mawite" ti a si.

97. Pu No Than Kap ih cabu suah hmaisabikmi cu "Sadhu Sandar Sigh" thuanthu a si ih 1978 kum ah a suah.

98. Falam ih Kawhhran upa t’uan reibik cu Pu Pek Thang a si.

99. 1931 kum March 20, ah Bualkhua ah minung 64 tipilnak an la ih Lairam ah nikhat sungih tipil la tambik a rak si. Cuih thu cu American Baptist Weekly Journal ah an rak suah.

100. YouTube ihsin zohtu ngah tambik Falam hla cu BJ ih 'Hoilo par mitthli' timi a si.

101. Falam peng sungih khuate 65% tluk cu kumkhat hnu kumkhat inn a mal deuhdeuh.

102. Kalaymyo ihsin Lumbang khua tiang mawt’aw zin cu mipi thazaang ih cehmi a si ih a tawlreltu cu Lumbang mi-uk Pu Hlur Hmung a si.

103. Falam ih hmin ngaingai cu 'Fahlam (Fathlam)' a si.

104. Falam bazaar ih thilzuartu a hrek hnakih tamsawn cu Laizo mi an si.

105. Hmin saubik cu, "Abraham Van Nei Cung Lian Thawng" a si ih, Falam, Tlanglo veng ah a um.

106. Pinlong Agreement ih hmin sign vetu Falam palai cu Pu Hlur Hmung a si.

107. Laica in tuahsaktu cu Baptist missionary Joseph Herbert Cope a si.

108. Kum 1960 - 2010 tiang kum 50 sungah Falam in kum 8 lawng Chinram ih phun 10 ong tambik dinhmun a co. 

109. Falam peng sung khua hmin ah ‘T'  cafang ih thok a tambik ih khua (27) a um.

110. Malaysia ihsin USA feh ding a hngak rerotu hmuahhmuah USA an thlen t'heh cun Falam khua sung hnakin US ram sungah Falam mi an tamsawn ding.

111. Mi-uk Pu Thang Tin Lian in khua 82 a rak uk.

112. 1977 kum ih Chin State khuapi Falam ih t'hawn saal ding vote an laaknak ah lungkim vote (22) le lungkim lo vote (11) a rak si na’n ......

113. Falam Time Zone cu MST (UTC+ 6.30) a si.

114. Thli lakah feh thei bang awla, Falam ihsin New York tiang thleng dingah ni 280 hrawng na rei ding.

115. Leilungtlun ram lakah Falam peng mipum hnakih mipum malsawn ram 23 an um.  

116. 1982 kum tiangah Laimi Degree ngahtu 1342 an um ih Falam ihsin 285 an tel. 

(Zatek in 21.2% tluk a si ih a pahnihnak a si. Degree ngah tambik cu Tedim a si ih 460 an tel ih 34.2% tluk an si.)

117. Falam peng khua hmin saubik pawl cu, Thanghluang, Pamunchaung le Hrianghnang tipawl an si ih cafang 11 ciar an um. 

118. 2000 kum tiangah Falam khua sung fala le tlangval pawl an date (ching) awknak hmun larbik cu Aving Video (Hall 3) a si. 

119. Falam khua sungih Lawi thing phur lut tambik khua cu Relsing a si. 

120. 1985 kum hrawngah Falam khua sung tidai a hartuk ih Siizung minaa operation tuahnak hrangah siizung thlanglam ih bulpak tidai an rak khai t'heu.

121. Falam mi 90% cun Baibal caang khat (a malbik) tal zoh loin an siar thei thluh.

122. Lt. Col Hrang Thio a thih zik ih siizung ih phurtu cu Pu Bawi Kheng (Lumte khua mi) a si.

123. Pu Za Nei Sum cu kum 7 a kim ah Pathian a awih ih Tibual khua ihsin dawisuak a rak tuar.

124. Thawphat kung t'hatbiknak khua cu Lumbang a si.

125. Pu Thang Tin Lian cu nupi 4 a nei ih faate 26 a nei.

126. Saya Hre Dun hnenih black belt ngah hmaisabik cu Tluang Lian Sang a si.

127. Falam peng sung khua hmin ah "W" cafang ih thok cu 'Webula" lawng a si.

128. Falam peng sung khuate pawl hrangih ralmuang lobik caan pawl cu: (kum 10 karlak in rel sehla)

1) 1890-1900,

2) 1940-1950, le 

3) 1995-2005 kum pawl an si

130. Cafang"tlio" timi ih a san cu "Zamrang te'n tuah/t'uan" tinak a si.

131. Chin Pawlpi USA le Lailun Foundation hohanak ih pekmi 'Chin Person of the Year' ngah hmaisabiktu cu Rev. Dr. Stephen Hre Kio a si. (2003)

132. 1910 kum hrawng ahcun tangka fangkhat in Arti pum 100 a lei thei. (India Rupee an rak hmang)

133. Salai Thuah Aung ih hmin pum cu "Wilfred Thuah Aung Bening" a si.

134. Kan Laica ah awkhat suak (one syllable) ih t'ongfang saubik cu  'thluang' ‘thliang’ le'hngawng' timi an si. 

135. Levi Sapte ih fapate Samuel cu kum 10 a kim ah ram 49 a thleng zo.

136. Falam mi ih hmin tawibik cu "Pa Uk" ti a si ih, Sunthla khua ah a um. (A ID hmin rori a si, cafang 4 lawng a um).

137. Pastor 70% hrawng cun a hmin hmai ah Mirang hmin (asilole) Christian hmin an nei t'heh.

138. Three Ideal Educated Families (ပညာေရး စံျပ မိသားစု(၃)ခု) hrilmi pawl cu,

1. Pu Ceu Vung innsang

2. Pu T’ial Luai innsang

3. Pu Ngun Nei Luai innsang pawl an si. (2006 ih rak hrilmi a si)

139. Dr. Ni Khuai Falam Siizungih a t'uan hlan ahcun Falam mi pawl in Or-paw nat hi dam theih lo nat ah an rak ruat.

140. Indiana State (USA) sungih Falam mi hnat'uan hmuahhmuah in an nikhat hlawh ciar thawh hngai sehla atufang Falam khua sungih t'ulbikmi poimawh/caakkhai ton caan ih hman dingah Mawt’aw fate (Jeep) pakhat a lei thei ding.

141. "Buhfai ei cop deng lawk men, sunvu zurit" timi catluan ah cafang zatein (A ihsin Z tiang) a kim t'heh. (Kan hman lomi J, Q, X, Y siar lo)

142. Chinram ih Inspector of Schools (ျပည္နယ္ ပညာေရးမွ ူး (စစ္ေဆး)) t'uan reibik cu Pu Sum Mang a si ih kum 14 sung a t'uan.

143. A liam ciami kum 10 sungah Falam mi pawl ih saal tambikmi hmin cu "No Than Kap" le "Saya Hre Kio" ti a si. (Laitlang ih kan palai pawl survey tuahnak vek in...)

144. Falam khua kum 100 a kim (1992) ah Falam khua sungah Telephone 100 a um ve. (A hmin in 100 a um nain, hman theih ngaimi cu a malte ti a si)

145. Falam mi ih RC Siangbawi hmaisabik cu Fr. Hrang Hluan (Lumbang) a si.

146.  L. Zamual khua cu Hlawn Dawh Thang ih khua a si.

147. Falam khua sung mipum ih a hrek tluk cu Baptist kawhhran an si.

148. Falam email group hmaisabik cu "Lailun@yahoogroups.com" a si ih October 26, 2000 ah an rak tuah.

149. CCOC hnat'uannak (Kum 16 sung) ih nunnak liamtu minung 7 lakah Falam mi pakhat hman an tel lo.

150. Falam Zuknung (Movie) hmaisabik "A luangmi Duhdawtnak Mitthli" timi a si ih Director cu Pu Duh Luai a si. 

151. Falam Khua sung ih inn dot 5 nei hmaisabik cu Pu Lal Ding a si.

152. American mi lakah Falammi ih theihtambik pathum cu, Carson, Bill Gates le Abraham Lincoln an si.

153. Falammi lakah midang hrangih sumpai hmang tambik cu Levi Sap Nei Thang a si. (?)

154. Mizoram ih News Megazine hmaisabik cu "Zoeng" a si ih 1983 ah Pu Run Bik in a suah thok.

155. Mai Far Men Par cu Single Album 17 a thun zo. 

156. Web site: chinlandtoday.info cu 2008 ihsin an din thok.

157. 1935 kum hrawngih Falam Mirang tlawng ah Falammi tlawngta cu t'henthum t'henkhat (1/3) fang lawng an si. A dang cu miphun dang hlir an si. (Mirang tlawng = Phun 5 in phun 9 tiang)

158. Nunau pawlin Bible hmin an hman tambik mi cu, ‘Esther’ a si.

159. 1933 kum Falam ih Khristian biakinn hmaisabik saknak dingah hnat'uan nei hmuahhmuah in an thlakhat hlawh cio an thawh. 

160. Chin Media pawl lakah Kawl Acozah pi hnenih hmatpungtin (Register) tuah hmaisabik cu "Chinworld Media" (chinworld.info) a si.

161. Mirang hla ih mahte Album suah hmaisabik cu John That Luai a si.

162. Falam khua sung Biakinn hmaisabik ih catlangtar (motto) cu Matt 11:28 a si. (1933)

163. Falammi that tambik natnak cu Malaria a si.

164. Kum 1989-90 hrawngah NLD upa pawl le Falam upa pawl Mirang t'ong in meeting an tuah.

165. Antarctica siar lo Continent paruk ah Falammi an um t'heh.

166. D. Hum (Doctor of Humanity) ngah hmaisabik cu Thimothy Sui Lian Mang a si.

167. Falam peng cu Luxembourg ram thawn a area a tia aw. (Luxembourg ram cu, Germany, Belgium le France ram karlak ih ummi ram a si.)

168. Falam mi lak ihsin US thleng hmaisabik cu Pu C. K Taikwel a si ih 1948 ah Electrical Engineering zir dingin a thleng. (Cabu hrekkhat ah 1952 ti'h ngannak tla a um)

169. ZBC ih "100 Years Plan" an tuahmi vek asile kum 2080-2099 ah "Toward Amired and Abundant Land" kan si ding.

170. Falam khua sungah kawhhran (36) a um.

171. Falam mi pawl ih theih tambik Baibal caang 3 pawl cu, 

Seem. 1:1, John 3:16, Saam 23:1 pawl an si.

172. 1960 kum ah Kawlram pumpi in Budhhist biaknak biak t'heh dingih thu an suah tum ruangah Falam Hrang Thio bualrawn ah mipi 10,000 lenglo pumkhawm in duhlonak an langter. (Biaknak le Acozah karlak thubuai cangvaihnak ih mipi tambik a si)

173. Leitlun ah Falam peng hnak ih ram fate sawn ram 27 a um.

174. Laica ih Cafang kan hman malbikmi cu "w" a si.

175. Salai Thuah Aung le John Tin Zam ih din hmaisabikmi Music Band hmin cu "Kiss Me Quick" a si.

176. Falam peng ih phun 10 ong result t'hatbik kum cu 1986 a si ih 40.2% in an ong.

A siatbik kum cu 1988 a si ih 1.23% lawngin an ong.

177. Hakha khua upa pawl in State khawpi Falam ih t'hawn saal an lungkim lo thu Rangoon ih thirhri an thoihnak hrangah paisa 700 an rak cem.

178. Kum 1932 ah Falam t'ong in Thuthangt'ha Pali (Matt, Mark, Luke le John) Baibal an rak suah.

179. Falam mi lakah aw khat suak (one syllable) hmin nei cu "France" a si. [Pastor a si].

180. 1985 kum cu Falam peng sung mipum zate cathiam kum tiah an rak lawm.

181. Leilungtlun ram lakah Falam peng mipum hnakih malsawn ram 23 an um. 

182. Falam khua sung kawhhran lakah Pastor nei lo Kawhhran 4 an um. (2012 kum)

183. Kan Laica ah "g" le "w" kan hmang t'heu ko na’n t'ongfang ngan thoknak ahcun kan hmang dah lo.

184. 1925 kum ihsin 1948 kum tiang cu Acozah Tlawnginn ah Kawl ca an rak zir lo.

186. Falam peng sungah Tlawnginn 181 a um.

187. Falammi lakah Rangoon ih dawr tuah hmaisabik cu Pu Hluan Ceu (Relsing) a si.

188. 2012 kum Sept thlacem tiang Falam peng sungih Motorcycle umzat cu 1400 hrawng a si.

189. "Laizo T'ong" ti'h rak hman t'heumi cu kum 1952 ihsin "Falam T'ong" ti’n an thleng.

190. Rev. S. Hrang Kap Hnin cu thawnginn ih khum a tong dah. (Amai’ palhnak tel loin)

191. Indianapolis (USA) ah 2002 kum ihsin Falam pawl in kawhhran an din thokih kum 10 a kim (2012) ah Falammi pawl ih khawmnak kawhhran (10) a um. Kum khat pakhat a karh tluk a si.

192. Pu Phun Kar Thang cu Falam mi lakih Offset Printing Press nei hmaisabik a si.

193. Kan t'ongfang zate'n Rhyme an nei t'heh. (Mirang ahcun month, orange, silver le purple pawl in Rhyme an nei lo.)

194. Pu Con Bik le Pu Thang Tin Lian cu Nupi pa li veve an nei.

195. Falam khua sung ih Cawhnawi phur lut tambik khua cu Lungpi/Lungrang a si. 

196. “Thih thleng tiang titheitawk teih Thuthangtha t'an t'ent'otu Thang Tsin" timi catluan cu t'ongfang 16 a um ih "T" hlir in a thok.

197. Mirang Acozah thawn t'ang tlang puh ruangih Falammi pawl rak thattu Japan ralbawipa ih hmin cu "Inada" a si.

198. Hlanlai deuh ahcun natnak hi “dawi” le “khawsia khuavang” hnenih ra a si tiah an rak ruat.

199. 1935 kum ihsin High School a um thok. (Phun 9 tiang a rak si)

200. “Thuanthu Roling” cabu ih sim daan vek asile: Hla kan neih thoknak cu “PiNu” ih zirhnak in a si.

300. April 29, 2013 ah Falammi tampi umnak Saikhumphai khua (Mizoram) cu Vaphai khua pawl in an urkang sak t'heh.

301. Falam peng sung hmun hrekkhat ih phunmi Thinglamtah pawl cu Mah-wah-t’ah thupek vekin March 1994 ah an hau tluk t'heh.

302. Pu Thang Tin Lian cu kum 23 a kim in mi-uk a t'uan.

303. Kan pupa pawl in khuavang lakih sangbik ih an ruahmi cu 'Cung Luphir' a si.

304. A veikhatnak Chin Music Award (2013) ih Vocalist Award ngahtu cu Salai Tuan Ling Thang (male) le Mai Far Men Par (female) an si.

305. Kan pupa daan ih Puai (Conlaam) nasabik cu Khuangcawi a si. (Khuangcawi nei lo khua hrekkhat khal an um ve.)

306. Rihli ti cu kumkhat ah veikhat (December 15 – January 15) zarh khat sung a baal/nawi t'heu ih cuih ti baal cu damnak a si, ti a si. 1970 kum luanlam tiang sii ih run hmangtu an um.

307. Kan pupa pawl cun Satpia (soap) an neih hlanah cing-al le sihlimkhing (thingrah) an rak hmang. (Sihlimkhing kan timi hi kawh daan a bang aw lo ding. Ram sunhlu tiat hrawng, a phul a suak theimi kha a si)

308. Pu Za Hre Lian cu veikhat ah ram pa 3 ih Embassador a t’uan. (France, Holand le Spain)

 309. Falam peng sungih mipum le siibawi (doctor) ratio cu 3000:1 a si. (Mipum 3000 ah siibawi pakhat tluk a si)

310. Falam khua ih nikhat sung ruahsur tambik ni cu May 18 , 1995 sun a si. (5.20 inches)

311. Ni khat sung thlihrang nasabik cu July 19, 2012 a si ih 19.8 mph.

312. Thla khat sung ruahsur tambik cu July 1966 a si. (21.45")

313. Kum khat sung ruahsur tambik cu 1966 a si. (80.31")

314. 2000 hnulam ih khuasabik (temperature sangbik) cu May 5, 2009 a siih 32.7’C a si.

315. 2000 hnulam khuadaibik (temperature niambik) cu Jan. 14, 2012 a siih 2.8'C a si.

316. Pu Za Hre Lian in kum 1951 ah Chin Congress Party a rak ding.

317. Mizoram ih Journalist laksawng ngah tambik cu Dr. Run Bik Taithio a si.

318. Cuulrual in phun 10 camibuai hi a tuahtu ih 26% hrawngin an ong t'heu.

319. Kan Lai daan ah falai cun t’uanvo le covo an nei lo.

320. ‘Mifim’ timi cafang cu a dunglam khal in ‘mifim’ ti thotho a si.

321. US ramih raalkap Major tiang ngah hmaisabik cu Patric Van Lian Uk a si.

322. Falam Bible a thoknak cafang cu, cafang hmaisabik a si mi “A” in a thok ve.

323. Kan Lai daan ah nunau in a duhmi mipa a fan tikah mipa a duhlo khal le kut lawngin khir daan a si lo. Hnipuan/tangka (mah le khua ciar ih daan neihmi) a pek a t’ul. Asinan mipa in nunau a fan ahcun khir a thiang.

324. Kum 2000 hnu lamah Falam peng phunhra camibuai result t'hatbik kum cu 2003 a si ih 33.48% in an ong. A siatbik kum cu 2006 a si ih 8.52% lawngin an ong.

325. Phun 10 camibuai ih Distinction ngahtu tambik kum cu 2003 le 2005 a si ih minung 41 veve in an ngah.

326.  Falam pengah hramlak (forest area) 84409 Acre a um ih cumi cu Chin State pum forest area ih 5% fang lawng a si.

327. Falam peng sungih kumtin lo tuahnak area cu 3596 acre a kau. Cumi cu Falam peng area ih 0.4 % fang lawng a si.

327. Kum tinte meihol hrangih thing haumi cu cubic Ton 40 tluk a si ringring.

328. Falam khawsung ah Acozah zung 40 a um.

329. Falam khawsung ah acozah hnat’uan 1695 an um. Falam khawsung mipum ih 22.5% tluk an si.

330. Falam khawsung cozah hnat’uan tu cu nunau 59.5% le mipa 40.5 % an si.

331. Falam peng sungih fa nei tambik (nu khat pa khat) cu Belawi khua ih Pa Mang Lut le Nu Kap Cuai an si ih fate 17 an nei. (Nu Kap Cuai cu tutiang a dam lai.)

332. Falam khawsung ah kum 80 tlun lam mipa 21 le Nunau 50 an um. (2013)

333. 2013 ah Falam peng sungih tlawngta umzat cu 11827 (2013-2014) an si ih tlawng saya hi 129 an si. Cumi cu tlawngta 91 ah saya 1 (91:1) tluk lawng a si. (Tlawng saya hi acozah ih ret mi lawng siar a si.)

334. Falam peng tlawngta cazin kum 20 sung zoh tikah phun hrek kaitu ih hrek lawng phun 10 Kai tu an si. (Tlawng ta a hrek tluk cu phun 10 an thlenglo tinak a si)

335. Falam khawsung ah nauhak farah cawmnak (orphanage) pa hnih a um. Nazareth Children Home le Agape Children Home an si.

336. "Pipu Ruuninn" timi pitar le putar cawmnak a um ih mi pa 3 an cawm.

337. Falam khawsung ah biaknak lam zung 11 a um.

338. Falam khawsung ah Pastor 90 hrawng an um. Baptist Pastor hi 49 an si. (2013)

339. Falam peng khawte ih puai tuah tambik (t'ilva that ih puai) cu Tlauhmun khua an si.

340. Falam khuasung ah Library pa 3 a um. (2013)

341. Falam pengah Sizung Pali a um. (Falam, Tibual, Rih le Lumbang)

342. Mi naa tambik caan hi July-Sept thla a si ih a tambik cu naute sungdok luak luak a si.

343. Falam peng sungah thlahlawh ei ih hardamnak lam hnat'uan tu 200 leng an um. (2013)

344. Kum 1994 Ramthlo ih FBA Triennial Khawmpi ah bible zoh lo siar an zuamaw ih Mai Za Kip Men (Hmunpi) in Thusimtu cabu a zaten naal zetin a siar suak thei. 

345. Falam mi ih tuahmi blogs 120 hrawng a um.

346. Falam mi ih tuahmi Facebook group (open&closed) 170 hrawng a um. (A hrek tluk cu update nawnlo mi an si)

347. Falam khawsung ih children home (orphanage) hmaisabik cu Nazareth Children Home a si ih 1995 June ni 5 ah an rak din.

348. Falam ih orphanage pahnih ihsin  B.Th zir suak tu minung 25 an um zo.

349. Falam khawsung ah nung dam lai kum upabik cu Pu Pek Thang a si ih kum 94 a si.

350. Rev. James Tial Dum cu Reverend (ordained) nauhakbik a si ih kum 23 a si ah a ordained.