KEITI IN FALANU IH THU

KEITI IN FALANU IH THU

Falanu le tlangvalpa hi an duh aw ngaingai i nitinin  hmunkhatah lo feh tlangin an tlak aw ringring ṭheu. Hmunkhatih hna an ṭuan tlang hi an nom tukah Nitlak hman hi an thei ṭheu lo. Ani ni-in  an duh aw siinsiin. Nisa hman sa an ti lo. Ruah a suur hmanah daai an thei lo. Cuti`n nuam lutukin an feh tlang ṭheu.

Nikhat cu ni a sa nawn. Khua a hlumih ti a hal rero thlang. Falanu cun a tlangval pai` hneenah cun, “Ka ti a hal” a tii. Tlangval pa khal cun ma`i fala thil duh cu hawl suak a tum vee. Curuangah a falanu i hneenah cun, “Hi tikhur i tidaai hi rak in aw hlah, tivapi i ta khi ka vung khai ding” a tiih tithawl thawn a feh. Tlangvalpa cu a va rei deuh ruangah falanu-in a tihal a rak tuar thei nawn lo i an lo tikhur i “Keiti” a rak in. A in ngah veete`n minung thinlung nei nawn loin mikei ruahnak a nei vee. A mithmai khal cu a dang. A mit a sen. A taksa milai pian si hman sehla a ruahnak le a thinlung hmuahhmuahin mikei a si zo. Amah le amah khal a thei aw. Cutiih mikei ka cang zo tii a theih cun a um a nuam nawn lo. Khawruahhar ninghang le lungsia in a rak um.

Tlangvalpa cu a tidaai khaai-in a hung thleng. “Tidaai in aw hen” a tii i a hun pe. Asinan, “Ka duh lo” a tii. “Keiti na in si fawh maw?” a tii. Falanu cun, “Ka in lo” a ti. Asinan a mitmen le a umtu daan tlangvalpa in a zoh tikah a hmuihmel kel a keng nawn lo tii cu fiangte`n a thei. Thlamah kan va cawl hrih ding a tiih tlangvalpa cun a colhpi. Falanu cu a tha a baang. A thin a nuam lo siin siin. A tlangval a duh fawn si. Mikei a sii zo ruangah an co aw thei nawn fawn lo ding kha a thei. A mitthli a luang thluahthlo. Tlangvalpa cun a hneem rero nan a hneem thei cuang lo. An thlam zautlang cun an khua a hi cuan I,

            “Kan ruun thang rung lang

            Thiamṭial ka remnak,

            “Kan suumtual rung lang

            Valzaa ka pumnak”

a tii i a ṭap zok rero thlang.

Tlangvalpa cun tlun a sawm rero nan a duh nawn lo. Khua ih va tlun ding cu a thinlungin a ngam nawn lo. Cuti`n suunvu te`n ṭah aw phahin an um khawm hnuah zaanlam khua a siimin tlangvalpa cun, “Tlung uh si” a tiih an tlung. Lam hla nawn an fehih an khua an thlen zik thlang cun falanu cu “Paw” a tii, mikei ah a cangih a zuang hlo. Tlangvalpa cu a lungleng le umhar te thawn amahte innah a va tlung ta.

Falanu cun nitinin sakhi, a si lo le zukneng cawn a phunphunin an thlamah zingtin a rak ret ṭheu. A nu le a pa cun cutiih zingtin sa an ngah ringring ruangah an fanuute mikei a can cu an ning a hang tuk lo. Asinan zingkhat cu milai cawn a rak ret. An khawpii pawlin falanu mikei ah a cangih milai a deh tii an theih cun kan that ding an tii. Curuangah a fala nu le pa cun tlangvalpa cu, an thah a sii le a lu na tuam i na fuunakah an tii i hneemrang puan an ken.

An khawsenin an suak i sakhaan cu an nam ciammam. Falanau cu tlangval pai` hmaiah a suak ngaingai. Tlangvalpa cun,

            “Tuu lut si ci maw, khaan suak si ci maw

            Ka caangṭial li sangah khai ta lang”

a rak ti. Falanu khal cun,

            ”Tuu lut si hlang e, khaan suak si hlang e,

            Na caangṭial li sangah khaai hlah law”

a tiih fala ah a cang sal i sunnvu te`n hmunkhatah an um khat. An ngaiawknak thu le hla cu an mithmai in an reel thlang. Zaanlam khua a siimin an suakkhawm i “Zo talin nan hmu maw” ti`n an sut khawm aw. Tlangvalpa cun ka hmu nan ka kap thiam lo a tii san.

A thaisun cu hual sal an tum thotho. Falanu i nu le pa cun tlangvalpa cu na hmuh le va kap mai aw an tii. Sakhaan cu an hun nam sal. Falanu cu tlangvalpai` hmai thotho ah a suak. Tlangvalpa cun,

            “Tuu lut si ci maw, khaan suak si ci maw,

            Ka caangṭial li sangah khai ta lang”

a ti laalaa. Falanu khal cun,

            ”Tuu lut si hlang e, khaan suak si hlang e

            Na cangṭial li sangah khai hlah law”

a tii i suunvu te`n an pawlaw laalaa. Kah ding le a falanu a si fawn. Asinan ziangtilam hmanin hmunkhatah an umkhawm thei nawn fawn lo ding. An hrangah nunnak ding khawruah a har ko. Milai thinlung an neih tawkah cun an ngaiawknak le an duhawknak cu simcawk a si lo. Zaanlam khua a siimin mitthli le canghnap thawn an ṭhen aw sal.

An khawsenin an suakkhawm sal i, “A hmu nan um maw” ti`n an sut aw. Tlangvalpa cun, “Ka hmu nan ka kap thiam lo” a ti laalaa. A thaisun cu hual an tum thotho. Ziangah tii le milai a deh zo ruangah midang tla in deh pang ding tii an phang. Fala nu le pa khal cun tlangvalpa cu, “Va kap thlang aw, mikei le milai kan umkhawm thei cuang lo ding” an tii. Tlangvalpa khal cu a pok sal vee. Sakhaan cu an vum nam i tlangvalpai` hmaiah a suak sal laalaa. Tlangvalpa cun,

            “Tuu lut si ci maw, khaan suak si ci maw

            Ka caangṭial li sangah khai ta lang”

a ti sal. Falanu khal cun in that thlang ding tii a thei i,

            “Tuu lut sing e, khaan suak sing e,

             Na cangṭial li sangah khai ko law”

a tii i, “Paw” tiah a tlangvalpa cu deh dingin a zon ciamco. Tlangvalpa khal cu a rak ralrin cia ruangah a keu man hlaaanah a kahih falanu cu a thi. A hngawng a tan hnuah a puan ken mi cun a lu a fun i a pi le a pu a hun pek.

Tlangvalpa cu a falanu a thih cun a umhar a lung a leng siinsiin i a rual zemnak hmunah nitin ṭah-hla sakin a feh ringring ṭheu.

************************************