Nun Lungawinak

Thupi: Nun Lungawinak

Filipi 4:4

Leitlun minung zate in leitlun kan dam sungah nun pakhat te lawng kan nei. Kan nun sungih kan can theimi zuknung ngai umsun khal tui kan nun lawng hi a si fawn. Cumi ah a thupi bik cu nun lungawinak na nei maw? Zumtu ni tin kan nun ah nun lungawi kan si theinak dingah hi ca hin a lo bawm ding ti ruahsannak ka nei. Nitin kan nunih lungawinak a um theinak dingah:

Midang Thawn Tahṭhim aw hlah!

Zozo khal nanmah ih ziaza cio parah thuṭen aw ding nan si.

A ṭha asile midang ih nundan thawn

tahṭhimawk ṭul rero loin

nanmah ten nan lung a hmui ding (Galati 6:4)

Nang cu zothaw hman tahṭhim theih lo dingin danglam le hleice zetin Pathian ih lo sersiammi na si. Leitlun minung million 6 lenglo lakah zohman thawi bangaw lo dingin danglam le hleice zetin Pathian ih lo sersiammi na si. Na kiangkap na innhnen an hlawhtlinnak menin na nun lo ti buai hlah seh. Na innhnen, na rualpi le na kiangkappawlih hlawhtlin dan vek ciah ih hlawhtling dingin Pathian in a lo sersiam lo. Nang cu hleice le danglam zetih sersiammi na si bangin hlawhtlinnak danglamzet Pathian in lo pek a duh a si. Midang an hlawhtlin ruangah na nun buai hlah seh, Pathian ih mi hleice na si kha mang ringring aw. Midang an hlawhtlin ruangah vanse cuangih ruatawk ding a si lo ih midang an tlaksiat ruangah vanṭha cuang ih ruat awk ding khal a si lo. Nang cu nang na siih Pathian ih minung, Pathian kilvennak hnuaiih um na si. Miih umdan poh ih um ding le miih thucawngih um ding menih sersiammi khal na si lo.

Na nupi/pasal, na unau, na nulepa le na fale khal midang thawn tahṭhim aw hlah la nangmah khal zothaw hman tahṭhim aw hlah. Nang cu Pathian in danglam zetih a lo sersiam bangin nulepa, unau, nupi/pasal, fanau khal danglam zet a lo pe a si kha. Khuitawk hmanah tui na nulepa, na nupi/pasal le na unau vek kha zo hmanin an nei lo. Nang cu tui na nulepa, na unau le na nupi/pasal neitu na si kha na van a ṭha tuk. Leitlun ah khavek ciah nulepa, unau, nupi/pasal le sungkhat nei zohman an um lo. Bill Gate in ‘midang thawn na tahṭimawk a si ahcun nangmah le nangmah na hmuhsuam aw a si” a ti. Tui ni ah kei in ka sim duhmi cu, na nun kha midang thawi na tahṭhim ringring asile na nun a lo petu asilole a lo sersiamtu Pathian kha na hmuhsuam ti tluk a si. Ziangahtile midang thawi tahṭhim aw dingin Pathian in a lo sersiam lo.

Tui na nunah hlawhtling hrih lo vekih na theihawk hmanah Pathian in na hrangih tumtahnak ṭha a neihmi a dang lam dah lo. Hlawhtlinnak timi cu sumpai tampi neih le len a si lo zia khal theihfiang tum sinsin aw. Ziangahtile midang thawi na tahṭhim awknakin na tumtahmi a lo hlawhtlin ter phah lo ding ih na ruahnak ṭha pawl a lo siatsuah sawn ding, beidawngnak le thiharnakpawl a lo neih ter fawn ding. Midang thawi tahṭhimawknak cu lungawinak thattu a siih riahsiatnak le thinnaunakpawl ko suaktu a si fawn. Midang thawi na tahṭimawk tikah thil ṭha lo lam hlir na sarsuak ngah dingih ralramih ral sungmi ralkappawl vekin na ruat aw ringring fawn ding. Midang thawi tahṭhimawknakin lungawinak a suah ter phah lo ti kha cing ringring aw.

Hlawhtlinnak le hnangamnak taktak ngahtu na si nak dingah nangmah le nangmah kha zothawn hman tahṭhim aw hlah la miih nundan khal va cawn tum hlah. Midang ih hlawhtlinnak khal na nun thawi tahṭhim hlah! Pathian in leitlun minung billion 6 lenglo lakah nang cu zo thaw hman bangaw lo, hleice le sunglawi zetih a lo sersiammi na si. Midangpawlih ngahmi hlawhtlinnak vek ciah kha Pathian ih lo pek duhmi a si lo. Pathian in nang cu hleice le danglam zetih a lo sersiam bangin a danglam zetmi, midang thawi a bangawlomi hlawhtlinnak lo pek a duh a si. Tui na nun ah hlawhsamnak um hman sehla hlawhsam lanta dingin Pathian in a lo sersiam lo. Pathian in na hrangih tumtah ṭha a neihmi le na fehnak ding lamzin kha thei fiang dingin Pathian sut awla Pathian ih a lo kawhnak hmunah feh aw. Cule leitlun ih nunman neibik, lungawi bik le hlawhtlingbik na si ding.

Milai Parah Ruahsannak Nei Hlah!

Milai hotupawlih parah nan rinsannak ṭhum hlah uh;

Alo run thei lotu ih parah cun!

(Sam 146:3)

Milai parih ruahsannak asilole rinsannak neih timi khal lungawinak siatsuahtu asi ih mi mawhthluknak, mi vuihramnakpawl suaktertu a si. Ziangahtile harsat mangbang na tawn caanah na beisei le na ruah vekih an lo ngaihsak thei lo, an lo bawmih an lo zoh thei lo tikah na thin a ling dingih mawhthluk duhnak le vuihram duhnakpawl a suak ter ding. Curuangah zumtu nitin kan nun bawmtu dingah “milai parih ruahsannak neih” timi cu a tling hrimhrim lo. Milai kan si vekin harsatnak, mangbangnak, le beidawnnakpawl cu lo theihlo ih kan tawn dingmi a si. Cumi ah, zawi hnenah ruahsannak kan nei? Asilole ziangmi kan ruahsan timi a thupi tuk. Khami khan na nitin nun ah thu tampi a rel ding.

Saam cagnan tui nun lamtluan malte kan zoh pei uh. Saam cabu ngantu hi minung panga lai an si tiih ruah a sinan Saam 121 ngantu hi cu David siangpahrang a si. David hi Saam 121 a ngan lai ah ziangvek dinhmun ah a um? Bible hrihfiahtupawl cun Saam cangan-khualtlawngpa tin an ti hngehnge. David cu Middle East ihsin Jerusalem lam panih a vah rero lai ah remdaihnak a duhlotu Meshech hrin (Sem. 10:2) misual (hel) pawlin David cu that dingin an hual. Cuvek thotho in Ismael hrin (Kedar, northern Arabia ih um) pawl khalin David cu that dingin an hual thotho. David cu ral ṭih le thih ṭh ah Jerusalem lam panin nelrawl ram car lakah a tlan rero. Nelrawn ramcar ah boruak a sat tuk laifang a siih tidai in ding a um lo ih rawl ei ding le a um fawn lo tikah a thabang in a cau. A taksa thinlung a bang ih bawmtu le ṭanpitu zohman nei nawn loin ziangtikah ka thi ding ti hngakih a um rero lai fangah Jerusalem lamih tlawngpawl hnen ihsin bawmnak a um pei maw tiin tlangpawl cu a hi cuan? Asinan bawmnak a hmu maw? Hmu lo. Saam 121 ah ziangtin a sim? “Tlangpar khi ka hei cuang; Khui inso bawmnak ka hnenah a rat ding? Keimah bawmnak cu Bawipa ih hnen ihsin a ra; Lei le van tuahtu Bawipa ih hnenin” (Saam 121:1-2)

Kan harsat mangbang le beidawn caan ah, tlangpawl (kan unau, sungkhat le rualpi ṭha) kan hi cuan ṭheu. Asinan in bawmtu ngaingai cu, lei le van sersiamtu Bawipa a rak si sawn. Milai hnenih rinsannak na neih sung cu na rinsan vek an rak si lo tikah, asilole na ruah vekih an lo ngaihsak lo ih an lo bawm thei lo tikah thinhar le thinna in, mi mawhthluk duhnak le vuihram duhnak thinlung tiang a suahpi ding. Curuangah zumtui’ hrangah cun milai hnenih ruahsannak neih timi cu kan hrial dingmi thil a si. Pathian hnen lawngah ruahsannak nei awla ziang vek na tawn khalah na nun cu lungawithu simnak in a khat ding.

Hlawhtling Dingih Pathian ih Sersiammi Kan Si Ti Hngilh Hlah!

Nan lennak dingah cahnak huham a lo petu cu

Bawipa nan Pathian a si kha thei ringring uh.

Hitiih a tuahnak cu  nan pupa hnenih

thukamnak a tuahmi kha a kimter ruangah a siih

tuihsun khalah cuih thukamnak  cu hngetter a duh a si.

(Danpeksalnak 8:18)

Kan nih cu mi hlawhtling si dingih Pathian sersiammi kan siih hlawhsam lanta dingih sersiammi kan si lo. Sibawipawl ih simdan vek asile milai pakhat hung cang suak dingih mipa pakhat ih ci sungah minung hungcangthei ding mipa ci million 20 lenglo a um ti a si. Cumipawl cu minung hung cang dingih an zuamaw ciamco ih cumi lakah pakhat lawngin nehnak co in minung ah a hung piang ti a si. Taktak ahcun kan suahhlan hman ihsin nehtu asilole mihlawhtling kan rak si zo. Pathian in kan nih cu hlawhtling dingih in sersiammi kan si.

Pathian hnen ihsin tlansuaktu Jonah hman Pathian ram hrangih a hlawhtlin ahcun nang le kei khal kan hlawhtlinlonak ding san a um lo. Mitthat Paul, David le Moses-pawl hman Pathian ram hrangih mi hlawhtling an si ahcun kan hlawhtlin lo nak ding san zianghman a um lo. Hlawhhlang Rahap hman Pathian ram hrangah a hlawhtling a sisi. Putar Abraham le nauhakte Jeremiah hman Pathian ram hrangih an hlawhtlin ahcun ziangah saw kan nih teh kan hlawhtlin lo ding. Kan pupapawl an hlawhtlin vekih hlawhtling ve dingah Pathian in in tiam a sisi. Cak le ralṭha in kan um dingih Kanan ram cu kan lut dingih hlawhtlinnak cu Pathian in inpe hrimhrim ding.

Hlawhtlinnak kan ti ve ten sumpai lawnglawng ah na mit fu hlah seh! Sumpai hi hlawhtlinnak a si lo vekin hlawhsamnak khal a si thei thotho. Hlawhtlinnak timi cu na nunah mi tampiin ei ding an hmuh ahcun mi hlawhtling na si. Sumpai ruangah maw, damlonak ruangah si maw, thu pakhatkhat ruangih thinhar vansang ih na um canah, hi thu hi cing ringring aw, “kan nih cu hlawhtling dingih Pathian ih sersiammi kan si”, hlawhsam le cau lanta ding menih sersiammi kan si lo. Kan nih cu leitlun nehtu, Cungnungbik Pathian ih fa kan si.

Curuangah na nitin nunah mi lungawi le lungawinak nun neitu na si duh ahcun 1) midang thawn tahṭhim aw hlah, 2) milai parah ruahsannak/rinsannak nei hlah, 3) hlawhtling dingih Pathian sersiammi na si kha hngilh dah hlah!

Hminsin: Himi hi mizan (10 July, 2016) ah "Philippines Myanmar Christian Fellowship" ih thuthangṭha ka simmi a si.