Tisa duhnak le Thlarau duhnak an ral aw (Gal. 5:17)

By: Rev. Amos Thang

Leitlun mifimpawl le ralthiam pawlin do harsa bikih an theihmi cu sunglam ral a si. Ralkap burpi lakah mi lamṭang an rak um pang khi ral sunnak thlentertu a si. Cuvekin zumtu nunah Pathian duhzawngih kan nun theilonak bik cu kan sungih minung hlun (Old nature), tisa duhnak, suahkeh sualih kan neihmi hi a si.

Hi suahkeh sual minung hlun hi zumtu kan si ni in hlo mai sehla a duh um zet nan, cucu hlo ter mai loin a do nehnak dingah a thlarau in pe sawnih, cutin nehman laksawng in pe ding a si. Amai zangfahnak ruangah kan sungah thlarau a nun terih cumi hmangin sual doral nehtheitu ah in tuah. “Desiring God” timi ca sungah “hi nun pahnih do aw hi a harzetmi tuah in fialmi siloin, kan mai duhdan ih fehloin, thlarau sawnah nungin Pathian duhdanih kekar dingin, in duh sawn ruangah a si” a ti. Kan taksa sungih daan danglam um, minung hlun sualnak daan hi kan taksa sualnak daan hnuaiih in hruailuttu a si ti theihfiang a poimawh tuk (Rom 7:23). Himi theifiang tu cun lenglam mi hmuhnak lawng buaipi nawn loin an mai sungih sual donak cang an thiam.

David Schnarch cun “zokhal, an mah le mah kilkhawi aw (control) aw thei lo cu kiangkap mipi khal an kilkhawi (control) thei lo” a ti (Ref: psychologytoday.com). Kan Bible cun kum 2000 liam zo ah minung hi amah le mah donehnak dingah bawmtu Thlarau Thianghlim a ṭul thu a ngan zo ih, zumtu zaten cui thlarau hmangin kan nunih sual um do neh in, nu le pai nunsim theih lo le cozah hmanin thawnginn sung a khumih do neh theilomi, do neh theinak in pekmi co ngahtupawl cu, mangbangza in Pathian hmanrua ah an taksa a hung cang sawn.

Setan hnen ihsin kan ngahmi nun hi, Pathian in a Thlarau Thianghlim hmangin nitin ti mualpho ih neh vivo a duh ruangah, hi minung hlun tisa daan le thlarau daan, a kawpin in nuntlangternak a si. Himi pahnih hi duhdan bangawlo kalh aw rori an siih Watchman Nee cun “rawl pek puar sawn mimi in an neh” a ti. Tisa rawl cu leitlun caknak le Pathian duhlo zawng hiarhalnak hmuahhmuah hi a si. Thlarau rawl cu Pathian Bible Ca Thianghlim a siih nitin khuimi sawnin kan nunnak a luah tam deuh ti mahten kan ṭhencat aw ding.

Hi tisa duhnak le thlarau dokalh aw kan sungih ummi hin buainak le phurrit in thlen ṭheu hmansehla, Rebekka  ih pum sungih miphun phun hnih um a U sawnin a nau ih rawng a bawl ding ti thupawl Pathian hnen ihsin a don veten, pumsung ih nau sual aw bang lo hman hai sehla, a buainak a reh vekin, Pathian in nitin nehtu si ter in duh ti theifiangtu cun Pathian hnenih lungawi thusim theinak a suak sal sawn a si. Kan nunih sual um in do neh sakih a sunlawinak in hmuh tertu Pathian thangṭhat in um seh.