Zisu A Ṭap

Zisu A Ṭap

John 11:35

Thuhmaihruai

Kan Bible sungah John 11:35 hi Bible cang tawi bik lam cu a si ve. Hmanseh hi cang tawite sung ihsin zir ding le ruah ding tampi kan nei. Ziangahtile leitlun Rundamtu Zisu A Ṭap tlat mai. Mi tampi in John 11:35 hi Bible cang tawi bik ti’n ruah a si. Asinan cucu a lettui thuthu le Bible version thu men a rak si. Ziangahtile NIV, TEV le NLT pawl ahcun Job 3:2, “He said” timi hi a tawi bik. NKJV, ESV, RSV le KJV pawl ahcun tui kan Bible cang John 11:35, “Jesus wept” timi hi a tawi bik. Falam Baibal Thianghlim Hlun ahcun Matthai 5:2, “thu a zirh” timi hi a tawi bik lala. Rel duh cu Bible cang tawi lam siloin tawi zet hman sehla zir ding tampi kan nei ti lam a si sawn. Bible ih in sim duhmi le zirh duhmi tete kan zoh khawm pei.

Zisu leitlun a len lai thu kan zoh asile Amah hi a Leitaksa zawng khalin mi-law, hnaṭuan paih, midang zawnruat thei, miding, pacangtha, ṭahneilo le mi tuarfai a si. A lei taksa a ti a hal ih A Pa Pathian in a tlansan lai hmanah Zisu a ṭap ti kan hmu lo. Asinan hitawkah ziangah Pathian Fapa Zisu rori a ṭap thei si pei?

Mi tampi in hitawk zawnih Zisui ṭahnak san hi (1) Judah/mipi pawlih an zum thei lo ruangah (2) Mari a zangfah tuk ruangah (3) Lazarus a duhdawt tuk ruangah a si ding ti’n zumdan phunphun a um. Asinan cupawl cu ‘ding asilole zumnak’ men lawng a si ruangah kan rel tam lo ding. A tawi zawngin kan zoh ding.

Ziangah  Zisu a ṭap?

1.      A thin a na ih a lung a hno. “Zisu in Mari le a topitu mipi pawl tla an ṭah kha a hmuh tikah a thin a na ih a lung a hno” John 11:33.  Himi in insim duhmi cu Zisu hi minung taktak a si zia, thin na thei, lung zur thei le lung hno thei a si zia fiangten kan hmu.

2.      Minung sinak zakhat ah zakhat neitu, minung taktak asi ruangah. Zisu hi Pathian sinak lawng neitu si sehla a ṭap kher lo men ding, ziangahtile a nung ter sal thei timi cu a thei cia ko si. A Pathian sinak in ka nung ter sal thei ti cu thei cia hman sehla a minung sinakin a ning a hang, a lung a zurih a ṭap cu a si bik ko. Minung a si zia, riahsia thei, ninghang thei, lungzur thei a si zia cu a ṭahnak in a lang ter. Minung cu kan lung a zur ih kan riahsia in kan ṭap ṭheu. Zisu hi minung sinak zakhat ah zakha neitu a si zia fiangten kan hmu.

Ziangtik Canah A Ṭap?

Zisu hi leitlun a len lai, kan mah misual run dingih a rat lai canah harsatnak tampi a tuar. Lei le Van tuahtu le ukthluhtu Cungnungbik Pathian ih Fapa cu a rualpi ṭha in a hnawng ih a dungthluntu pawlin an tlan san. Misual ti ih phiar a si ih rukru le suanhmang menih puh a si. Mipi pawlih hnihsuak le zawkzetnak menih hman a si ihPathian in a bawmlo ti ih zawkzet a tuar bet lai. A hnihpuan cu lehawknak men ih hman a si ih, vuak le velh, thinglamtah tiangih khen a si hmanah a lungzur in siseh na ti in a ṭap ve dah lo.

Hmanseh a kiangkap ih a mi le fate pawlih ṭah aw cu a ngai thei ve lo, a lung a zur, a sung a hno ih a ṭap. Bawm dingin kan hrangah a tiar cia ringring. Ziangtluk duhdawttu so kan neih. A manhla hleice!A va sung lawi ve! Hitlukih ngaihsaktu le duhdawttu hi lei van rang deng hmanah kan hmu nawn lo ding.

A duhdawt mi pawl an ṭah tikah a thin a na, a lung a hno ih a ṭap ve mai. Taksa ih leitlun a tlanlen lai khalah a duhdawtmi a rualpi sungkhat pawl an ṭah, lungzur a hmuh tikah a um thei lo ih a lung hno in a ṭap ve. Pathian fate pawl harnak kan tawn le A Hmin ruangih mangbang vansannak kan tuarmi pawl khal Amah Zisu’n in tuarpi in theihpi, a letza in inrul leh ding ti hngilh hlah uhsi. Kan lungzur ih kan ṭah canah in ṭah pi ve, harnak, vansang mangbang thlaphannak kan tuar canah a um thei lo, in tuarpi ve ih in umpi ringring. Pai vawrhlam ah a to men lo, kan sual tuahmi ngaidam a si nak dingah Pai hnenah puithiam in ṭuan sakih kan harsat mang bang canah thazang thar le cahnak in pe sal ṭheu. Kan mah run ding le bawm ding hi a cak bik le duh bikmi a si. Na thla phang hrimhrim hlah. Ziangtik khalah Zisui thawn fehtlang tuar tlang nuam tlang kan si kha. Thazang thar la in ram nuam kan pan vivo a si kha! Cawl lo in Pathian hrangah feh sin uhsi.

Thunetnak

John 11:11 ih Zisu in, “Kan rual Lazaras cu a itthat zo; asinan ka feh ding ih ka va ṭhang ding” a ti bangin kan kiangkap ih Thlarau lam itthat pawl ṭhang ve dingah Zisu’n in sawm. Kan rualpi Pathian thu ngaihsaklo bembem pawl kai thothotu dingah fial kan si. Kan sungkhat lakih Pathian thu duh thei lo itthat rero lai pawl kai tho dingah Zisu’n in fial. Kan Unau, Sungkhat, Rualpi, Nu le Pa lakah Pathian thu ih itthat kan um pang maw? Cu pawl kaitho ih ṭhangharh dingah fial kan si.  Peknak lam a ti theitu peknak, a sim theitu’n sim in kutkai aw ih ram thar la sinsin ding kan si. An thisen man mawhphurh kan si lonak dingah kan theitawk thuthangṭha sim uhsi. Kan kiangkap ih itthat pawl ṭhangharh thlang uhsi.

Leitlunah Protestant Missionary tla cu minung tingthum (300,000) fang ih ruah a si. Thuthangṭha simtu kan maltuk lai hrih. “Mission and You” timi cabu te sungih a sim dan vek asi tla cun leitlunah mipum Billion 7 kan um ih zumtu mi piangthar felfel cu million 700 lawng kan si ih a hminmen Khristian cu 1.4 Billion lai a si. Thuthangṭha thlen bannak sungum nan zumlotu hi 2.1 billion lai an si ih Thuthangṭha thlen ban lo nak ih zumlotu pawl hi 2.84 billion an si. A tam tuk lawmam. Zumtu cu a hrek ih hrek sin hman ka si hrih lo.

Culakah leitlun Pastor pawl thla khatah minung 3000 cu thlatin an Pastor hnaṭuan an suahsan ti a si fawn. Zisu hi a si lo zawngin kan ninghang in kan ṭap ter pang kei ti a phang um tuk. Theitawkin Pathian hrangah pumpeaw sinsin uhsi. Pathian in kan leitlun ih hna a ṭuannak ah tel ve hram!!!

Ting HLei Thang