Zawi Zumdan le Hmuhdan A Dik?

Zawi Zumdan le Hmuhdan A Dik?

Ting Hlei Thang

Thuhmaihruai

Leitlunah miphunkip kan um, hmuhmi dangdang kan nei ih hmuhdan phunphun kan nei cio. Kan hmuhdan a bangawklo ṭheu vekin kan hmuhtawnmi khal a bangaw lo celcel. Pathian thu siseh, ramthukhel, calai le pawlkawm khalah kan hmuhmi ziang(what) timi le ziangtin(how) timi hi a bangaw thluh thei lo. Kan hmuhmi le kan hmuhdan cu kan zohnak kan mai lam sawnah tampi a rak ṭhumawk ruangah a si. Kan zohnak mitkharh asilole tahfung parah hram a rak bunaw ṭheu. Simṭheu bangin mikharh sen a kharhtu cun ziangkim a sen in a hmu ih a hring kharhtu cun a hring in a hmu thluh tivek deuh khi a si. Asile kan thupi vekin zawi hmuhdan, zawi ruahdan, zawi zumdan le zawi hmuhtawnmi a dik timi cu mal teten zoh khawm vivo sehla.

Hlan deuh, kum zabi 18,19 hrawngih leitlun mi hminthang, mifim, mithiam le milar hrekkhat pawlih an ruahdan, hmundan le simmi pawl cu a tawitheinak in malteten la in kan vun zoh khawm duak pei.

1.      Mikip in computer cu inn tin ah nei in an hman duh nak ding san a um lo. (Ken Olson, president, chairman and founder of Digital Equipment Corp,, 1977).

2.      ‘Telephone’ hi cu mikip pehtlaihawknak ding hrangih hman ding ahcun tlaksamnak tam tuk a neih ruangah kan hmang thei ngaingai lo ding. A thilri khal ziang ngai a si lo, kan hrang ahcun man nei lo a si. (Western Union internal memo, 1876).

3.      American pawl cun ‘telephone’ an ṭul, asinan kan nih cun kan ṭul ve lo. Thuthang simthantu palai tamtuk kan nei. (Sir William Preece, chief engineer of the British Post Office, 1876).

4.      Hrineilo awnmawi kuang ‘wireless music box’ cu umzeneilo a si. Cumi hrangah zosi sumpai pe duh ding. (David Sarnoff’s associates in response to his urgings for investment in the radio in the 1920s).

5.      An aw kan duh lo, an guitar aw khal thulolak a si. (Decca Recording Co. rejecting the Beatles, 1962)

6.      Radio cu hmailam hrangah cun ruahsan ding umlo a si. Cet hmangin aw cu thli lakah a feh ding khal cang thei lo a si. (William Thomson, Lord Kelvin, British scientist, 1899).

7.      Nunau ‘Prime Minister” an hung can thei ding tikcu cu a kum in a si ding, ka san sungah cun a si hrimhrim lo ding. (Margaret Thatcher, 1974).

8.      Vanzam hi nauhak lehawknak ahcun a ṭha, asinan raldonak hrangah cun a si dah lo ding. (Marechal Ferdinand Foch, Professor of Strategy, Ecole Superieure de Guerre).

9.      Nuclear cahnak ngah theinak dingah atom cu puak ta ding a si ruangah cumi ngah theinak a tebikmi thil a um lo. (Albert Einstein, 1932).

A tlunih mifimthiam le micungcuang pawlih simmi le tuisan 21^st Century ih kan tlanlendan na thlir tikah  lei le van vekih a danawk zia na hmu ding. Cucun mangbangnak mallai cu in pe men thei. Ziangahtile an nih cu kan mah vek mi menmen an si lo. Leitlun pi ih rinsanmi ralbawi, scientist, founder le noble prize hman rak ngah rerotu pawl an rak si. Cui mak na ti deuhmi na ruahnak te kha thlah hrih lo ten kai hrih awla, a dang kan vun zoh bet ding. Pathian thu Bible a mak zia malte ka run thlak duak ding. A tlunih tarlangmi mifimthiam pawl cun a ralai dingmi hmailam kum 300 thuhman hman le dik zetin an simcia thei lo. Asinan kan Bible in hmailam kum tampi thu a rak simciami pawl cu pakhat te hman a sual ve lo.

Kan Bible cun kum zabi 5,6,7 lai ih Prophet Isaiah (700-680 BC), Jeremiah (626-580 BC)  le Zechariah (520 BC) te pawlih Jesui suahnak ding thu, Asinak, Arawngbawlnak, Thihnak le Thawhsalnak ding thu pawl an sim ciami cu kum zanga ruk hnu (A.D) san a rung thlen tikah a takin an kim cutco, pakhat hman a sual lo. 1800 BC hrawngih ngan zummi Semtirnak ihsin Danpeksalnak ngantu ih hmailamthu simciami pawl hman a takin an kim cutco. Kan Bible sungah hmuh theih ṭheh an si. Thin diremnak ah mallai run tarlang sehla…

A. Asuah Thuthawn Pehparmi	Simcianak	Famkimnak
1. Nunau Hrin	Sem 3:15	Gal 4:4
2. Fala Thianghlim Hrin	Isa 7:14	Mt 1:18-25
B. ASinak	Simcianak	Famkimnak
11. Khuahlan ih Rakum Zo	Mic 5:2	1 Pet 1:20
12. Lalpa Ti’h Kawh A Si Ding	Sam 110:1	Tirh 2:36
C. Rawngbawlnak	Simcianak	Famkimnak
21. Galilee In Thawk Ding	Isa 9:1-2	Mt 4:12-17
25. Lak Note To In Jeresalem Lut Ding	Zech 9:9	Mt 21:1-7
D. Thihnakthu	Simcianak	Famkimnak
28. A Rualpi in Phansan	Sam 41:9	Jn 13:18-27
29. Ngun Tangka 30 ah Zuar	Zech 11:12	Mt 26:14-15
E. Thawhsalnal le Vanih A Kai Thu	Simcianak	Famkimnak
57. Thihnak Ihsin A Tho	Sam 16:8-11	Tirh 2:24-31
58. Pathian Fapa Pek A Si	Sam 2:7	Tirh 13:32-35

Kimcang zoh duh bet hrangah…….. http://www.tinghleithang.blogspot.com/2013/07/jesui-thu.html

BC 350 ah Chinese mifim van le arsi lam zingzawitu (astronomer) Shih Shen timi pa in Van ih Arsi pawl cu 800 tiang a rak siar suak. 130 BC ah Greek mifim (astronomer) Hipparchus in 850 a rak siar suak. Kum zabi 2 (2^nd Century) AD ah Ptolemy in 1,056 tiang a rak siar suak thei. Asinan santhar mifimthiam (astronomers) pawl cun galaxy pakhat hmanah Arsi cu billion telin a um ruangah siar cawk a silo ti an run hmu ban coh.

Asinan kan Bible cun kum Zabi 6 (626-580 BC) lai ah Prophet Jeremiah hmangin Jeremiah 33:22 ah “Van ih Arsi pawl siarcawk lo an si” a rak ti daih zo.

Kum zabi 16 (16^th Century) hrawngih mifim le thuruatthiam tam sawn cun leilung hi a sawl a si ti an rak zum tam sawn. Cu hrawngih ruahnak dang deuh rak nei theitu pawl tla cu siar theih fang an si ih cupawl lakih felfai deuh ih leilung a hlum ti rak phuanglangtu tla cu Columbus (1451-1506) le Plato (427 BCE - 347 BCE) an si.Columbus hi tipithuamthum helsuak in leh ram tin feh in zingzawinak a neih hnuah leilung a hlum ti hmufiang in tlangaupitu a si. Plato hi Pythagorean mathematics zingzawi dingih Italy thlanglam a tlawn lai, Athens a ra thlen ih tlawng a din ah a tlawngta pawl hnenah leilung a hlum thu a rak zirh. A dang a tam sawn le mipi (leitlun pumpi) cun leilung a sawl ih rak zum a si. Greek philosopher Aristotle (384-322 BC) te pawl tla in an rak zumlo, ca thawn nasaten an rak do.

Hivek thubuai le ruahnak phunphun lakah kan Bible cun Prophet Isaiah hmangin BC 700 ah “A Siangpahrang tokham cu a hlummi leitlun lengah a ret” tin Isaiah 40:22 ah a rak ti zo. Cangantu pakhat tla cun “BC 1000 lai ah kan Bible cun leilungpi a hlum thu a rak sim cia daih. Minung pawlih leilungpi a hlum a si ti an hmuh hlan kum 2500 hlanah a rak sim cia” a ti. Asinan tui cangantu cun Kan Bible hi ziangtluk a hmaisa ti lam hnakin zumnak dangdang le pawmdan phunphun lak khalah kan Bible cu rin le zum a tlak zia le a dik zia sawn hi a tarlang duhmi a si.

Kan Pathian thu cu kum a rei le a hman sinsin, a dik sinsin, a thlum sinsin ih a thaw sinsin. Pathian Sunglawi Seh!

Kan thu a sau tuk lo nak dingah tulai kan Chin mi sungin Calai lamih rinsanmi Upa pawlih Calai hmuhdan le theihdan tete kan vun zoh khawm ve sal ding. Himi a hnuaiih tarlangmi pawl hi an sual, an palh tinak lam siloin an hmandan, ngandan pawl kan zoh ding ih hmailam hrangih hmuhdan le ruahdan cu tawpkharnak lamah kan rel vivo ding.

‘Cangandan’ Phunphun

1.      Cangan Daan ………. Run Cung Mang (Laica Zirnak)

2.      Cangandan     ……… Khar Thuan (Falam cafangkom hliakhlainak le laihlangsalnak)

3.      Cangandan     ……… No Than Kap (Thisen le Mitthli)

4.      Ca Ngan Dan  ……… Sen Ro Sang (Hliak Hlai Ve Lang Kan Calai)

5.      Ca Ngandan   ……… H. Sui Lian Mang (Chin Ca Kalhmang)

6.      Ca Ngan Daan ……… Phun Hram Awi le Sing Lian (Vankau Arsi, May 2009)

7.      Ca ngandaan ………. Phun Zam le Kei uk (Vankau Arsi)

‘Duhdan Le Hmandan’ Phunphun

1.      Duh Daan = Hman Daan (Run Cung Mang)

2.      Duh Dan   = Hman Dan (Mi hrekkhat)

3.      Duhdan    = Hmandan (No Than Kap)

4.      Duhdaan  = Hmandaan (Phun Hram Awi)

‘Anka’ Ngandan Phunphun

1.      Anka   - Cangantui’ Kutkaih

2.      Aanka – Mi hrekkhat

3.      Aankaa – Laica Zirnak (RCM)

4.      Ankaa  - Mi hrekkhat

‘Thuthangṭha Le Thuthang ṭha’

Thuthangṭha   =  Hre Kio le Bible lettu dang (Falam Bible)

Cangantui Kutkaih Ih Simfeng Dan

The word “thuthangṭha” mean “gospel” as theological.

The word “thuthang ṭha” mean “good news” as secular.

‘Pawl’ Hmandan

 Mirang                      Cangantui’ Kutkaih (CLF)                    FCLS/ Laica zirnak (RCM)

1.      Children                              Nauhakpawl                                            Nauhak Pawl

2.      Churches                             Kawhhranpawl                                        Kawhhran Pawl

3.      Students                              Tlawngtapawl                                         Tlawngta Pawl

Rwn: Elijah Cuan ih Calai Mitkharh

Himi pawl hi kan upa pawlih Calai thuih an hmuhdan le ruahdan pawl a si. Hmuhdan le pawmdan hi a bangaw thlu theih lo. A awl zawng cun CLF in “Aw” FCLS in “O” in a feh. Hmuhdan ruahdan phunphun cu a si ko. Biaknak lam  khalah a phunphun si ko, tam cu kan rel lo pei. Hmailam kum zakhat zahnih lamah teh ziangbik rung tang kei maw? A tlunih tarlangmi hmuhdan le ruahdan pawl hi an sual thluh kan ti theilo vekin a hman thluh khal kan ti thei lo. Ziangahtile hmaisabik ih tarlangmi pawl tla an mai san, an vanglai cio ahcun leitlun ih rinsanmi, mifim, mitawk, mithiam le langsar hlir an rak si. An mai san lai ahcun an simmi le an zummi pawl cu hmanbik le dikbik vek hlirah an ruat. Asinan kum 100, 200 a rei tikah can asilole santiluan tilipi in a luanpi. Cui santiluan timi tipi cun mahtawkih fim le thiam ti’h theiawtu pawlih ruahbanlo tiangin leitlun cu a fehpi ih a luanpi. Khatlam zawngih kan sim asile a hmaisawng lo nasa. 20^th Century ihsi cun fimthiamnak a karhtuk tinak a si.

Thunetnak

Tui Calai thu ih tarlangmi pawl ah teh zawi zumdan le hmuhdan bik ha lehhnu kum zakhat zahnih ah kan mino zirthiamsang pawlih a hmanzia an tarsak dingih, a hman lo zia an run tarlang leh ke. Mi pakhat kan si tikah “mai thuthu, mai duh dandan, mai hman dandan” timen a ngah lo. Kum a rei ih mino pawl zirnak ih an san sinsin tikah na simmi, zirhmi a sual zia an run tanglang leh ding, a hman zia an run tarlang leh ding. Tluntabik ih tarlangmipawl bangin a hmanlozia tarlangmi sungah maw kan Bible vekih a hman zia tarlangmi sungah lehlam kan um ding. Mai san lai cio ahcun dik bik le hman bik ih theih cu a si ko. Lehhnu timi in thuhman thudik tampi in simfiang ding.Calai cu duhduh ih tikual men theih a si lo. Nautat le zohniam theih men tla a si lo.

Himi tlunlamih tarlangmi Calai thuthawn pehparin “a bangaw thluhmi pakhat” hmantlang thei dingah Santhar Mino tampi fimthiamnak zir a ṭulih kan Pa le pawlih simmi a dik bik hawlsuak thailang thei a ṭul. Fimthiamnak lam kan tlaksam le santiluan in kan Calai le zumnak hi a pengah a luan pi thei. Ṭhimnakah, mipum tamtam, pawlkawm ṭhaṭha, Kawhhran cakcak, sumpai neinei, media rangrang le thiltithei sa-tliah men pawl hrannak lamlam menih kan Calai an hran ding, a luan ding le feh ding cu phan a um tuk. Cupawl cu a thupilo tinak lam a si lo. Fimthiamnak thawi kan Calai kan laihlang le kan hawlsuah hnuah Media le a phunphun in cak zet ih feh ding a si. Media, Kawhhran, Pawlkawm le Mipum tamtam ih Calai mi neh kan tum cun tlak kan nai tuk tinak. Fimthiamnak kan ngaihsaklo asile kan Calai cu mipum tamtam, pawlkawm ṭhaṭha, Kawhhran cakcak, sumpai neinei, media rangrang menin a luanpi dingih “Quality” neilawn “Quantity” in a feh dingih Calai cu ṭumsuk lam a pan ding. Phan a um zet.

Kan ngan zomipawl kawmkhawm ih na zoh tikah “Zawi Zumdan le Hmuhdan A Dik”? timi in thinlung malte a ti buai ter deuh men thei. Khuimi ka thlun dingih khuimi ka zawh ding titla na fiang lemlo. An mah le mifim le tawk, thiam an si ve fawn. Hmanseh Pathian thu lawng thlun tlak le zum tlak a si. Cui Pathian thu ah hmuh dan phunphun um hmanseh Kawhhran Thurin hnakin Nunthianhlimnak, Pathian duh zawngih nun pawl uar sawnin le midang va duhdawt, Iksik lo ih innhnen duhdawt, mai ral pawl tiang duhdawt ih an hrang thlacam sak thei nun tiang nei thei dingah cu pawl cu ti thupit ding a si sawn. Ziangahtile Kawhhran Thurin, mai pawm dan, mai zumdan le ruahdanpawl cu midang in an duh thluh lo thei ih an lungkim thluh thei lo ding. Asinan Nunthianhlimnak, Duhdawtnak le midang zawnruah/ hmuhthiamnak pawl cu mikip ih duhmi a si. Amen!

NANGMAH RORI IH NA HAWLSUAH LE HMUHMI, MIDANG TIMEN RUANG SILO, A ṬHATNAK LE DIKNAK NA SIMFIANG THEIMI LE MI’H ZUMNAK LE RUAHNAK NA DOKALH LO, NANGMAI HMUHDAN LE RUAHDAN KAIHNGET CINGIN MIDANG RUAHNAK, HMUHNAK LE ZUMNAK NA PAWMPI THIAMSAK ASI AHCUN, NA ZUMNAK CU A DIK TENGTENG DING, KA LO THLUN DING.

*Unity is not Uniformity*