Abigail Nun Thawn Thazang Laknak

Abigail Nun Thawn Thazang Laknak

(1 Sansiarnak 25:1-43)

A hmaisa ah an sung thu le a thuanthu tawi kan zoh duak ding.

Abigail hi Siangpahrang David ih pa Jesse ih fanu pahnih lakih pakhat a si. Khatlam zawngih kan sim asile David ih nau a si (1 San. 2:9-17). A nu cu Nahash a si. Abigail ih nu Nahash hin Abigail le Zeruiah a neih hnu a pasal ih thihsan hnuah David ih pa Jesse in nupi ah a rak neihmi a si. David in nupi ih a neih hlanah Ishmael ih tefa Jether a pasal ih fapa pakhat Amasa an rak nei (2 San. 2:17). David thawi an neihawk hnuah Hebron khua ah fapa a hrin sak, a hmin cu “Chileab (Khileb)” a si. (2 San. 3:3). Daniel ti khalin an ko (1 San. 3:1;1;2:16, 2 Sam. 17:25).

A hmin sullam cu “nawnnak Pa” tilam a khih hmuh. Amah hi mi mawizet le theihnak lamih mi tawkzet timi nu a si ih tu thawngthum, kel(me) thawngkhat nei ih a rannung pawl Carmel tlangih khaltu Nabal timi ih Nupi a si. A pasal Nabal hi mai zawn lawng ruattu, thilṭhalo tuah ṭheutu a si. A hmin sullam khal “mi-aa” tinak a si. Hipa hi ram neitu a siih, ram ṭhazet hmunih Maon khua mi a si.

A Nun Ihsin Zir Dingmi

1.      Abigail cu Pasal ih tlinlonak khuh thiamtu a si.

Theihciazo vekin Samual a thih hnu Paran ram thlaler ramcaar ih David a feh laiah David in ka milai pawl thawn pui ni ah kan ra dingih theitawkin in rak bawm hramaw tiih thu a cah lai ah “David cu zoso a si? Jesse fapa cu zoso a si? Ka theih dahmi a si uallo” tin mawilo zetih Nabal ih a rak ti ruangah David a thinheng tukih that thluh dingin an pawk.

Cuithu a pasal ih thlinlonak a theih veten  Abigail cun sang zawl zahnih le sabit savun thawl hnih, pumih kiomi tuu panga, vaikan bawm hnih, car ciami Sabit rah bawr zakhat le caar ciami theirah hlom zahnih pawl cu zamrangte in a khawmih laak pawl a phurh ter. Cule a hnenum pawl hnenah, “Hmaiah rak feh uhla ka lo thlun ding,” a ti. Asinan a pasal hnenah cun zianghman a sim lo.

Abigail  cu a pasalih thlinlonak le thiltuahsualmi cu a pasal ih theih lo ten mawi zetin a tuamsak thei. Khurkhua ruathiam a si nak cu a pasal a sim lo hi si. A pasal sim sehla a pasal in feh a siang lo dingih an sungkua in an thi thluh ding. Fimzet ih thu a ruah hnuah tim a tuah ih thubuai a tawlrel fel thluh hnuah ziang a cang timi cu a pasal a sim sal. A pasal cun zurit laiih a rak ṭawngmi pawl Abigail in a sim sal tikah a ṭih tukih thihnak tiangah a hman phah.

Abigail hin hitlukih ih mi-aa le tlinglo pasal a nei ko nan “Na aa tuk, nangmai hrang lawng na ruat, thusau na ruat thei lo” ti’n a kawk ve lo. A tlinlonak pawl a khuhsak hnuah thuhla um dan cu a sim ten a sim fiang. Amah hi pasal aa zet nei a si ko nan a kawk zawng le hmuhsuam zawngin a pasal a bia lo. Kan pa a tling lo ti’n a khuhmawi sak thiam.

Himi in in zirh duhmi cu kan pasal pawlih tlinlonak mi dang hnenih va rel ciamco ding tinak lam siloin an tlinlonak te kha zohhmanih theihthiamlo dingin tuammawi sak thiam ding hi a si sawn.

2.      Innsang hrangah mi ralṭha le nutling a si.

Abigail hi a pasal ih thiltisual pangmi parah mi’h kehram ih va bawk le ngaidam dil khal a hreh lo ih a ṭih lo. Thinhengnak sosang ih fei le nam thawi pasal at-tuk ruangih mah thatu dingih ra-pawl va tawn hi thil awl cu a si hrimhrim lo ding. An thinheng tuar lo ah ziang ruat lawn in rak nuai ciamco pang kei maw ti cu ruah lo a theih lo ding. Asinan Abigail cun a innsang le pasal hrangah  ṭih cingten khalin a tuahsuak. Innsang le Pasal palhnak khuhsak theitu le luattertu Nu cu ziangtluk nutling so a si.

3.      A thil tuahmi ruangah mi’n Pathian an thangṭhat.

Abigail ih nuntu ziaza, tuahmi le cangvaih dan David in a hmuh tikah “Keimah tawng dingih tuisun ah a lo thlahtu Israel ih Pathian Bawipa cu thangtha si ko seh, laithahnak le phulaknak ihsin I luattertu dingih tuihsun ih thil na tuahmi le thinlung na neihmi ruangah Pathian ka lawmih ka thangthat a si” a ti.

Abigail ih a pasal, innsungsang le a umpi pawl a ruah zia le cumi hrangih a ṭan lakzia ihsin mi’n Pathian an rak thangṭhat. Kan innsang ih kan cangvaih dan, kan pasal hrangih kan cangvaih dan le innsang kan duhdawt lainatnak ihsin mi’n Pathian an rak thangṭhat ding a thupi.

4.      Hmailamthu ruatcia thiamtu a si.

Abigail in David hi Pathian ih hmanmi le hriak thihmi ti a theih tikah an innsang hmailam hrangah a ṭihzah ih a tlawn thiam. Abigail hin hmailam thusaupi ruatin David hnenah hitin a ti “Bawipa Pathian in a lo kamcia bangtukin na parih a ṭhami hmuahhmuah kimteih a thlenter tikah le Israel siangpahrang ih a lo tuah tikah kei hi I hngilh hram hlah aw” a ti. Pathian mi pawl tlawn hi a fuh thei bik. Kan innsang hrangah hmailam thu kan te le fa, tu le fa san tiang ruatthiam cia in Pathian mihman pawl duhdawt le tlawn thiamtu si zuam uhsi. Kan te le fa, kan innsang a puitlin theinak dingah Abigail bang hmailam thu saupi ruat thiamtu si kan zuam cio pei uh.

Pathian hi kan hmailam hrangih kan biakthiam a thupi hleice. Tui dinhmun in thleng tertu hi Amah a si bangin hmailamah hi hnakih sang dinhmun ka neih thei nak ding hrangah Amah kai hnget sinsin uhsi. Ahleice in innsungsang kan fa le ih hmailam hrangah Pathian hi bia in tlawn thiam uhsi. Sumpai tampi roh hnakin kan fa lei hmailam hrang Pathian kan biak fuh asile an hmailam a tluang vivo dingih kan nih ih ruahhar ding a umlo. Mi ropi le rinsanmi an si thei nak ding hrang siseh kan innsang hmailam hrangah Pathian hnenih kan tlukluh sinsin a thupi. Abigail bang hmailam khurkhua hrangah Pathian mi le fate duhdawt ngaihsak in Pathian lungawiter in feh vivo uhsi.

Thunetnak

Bible sungah zohṭhim le cawntlak nu tampi an um ih cupawl nun hmangin kan zoh kan zir vivo ding cu Pathian ih duhmi a si. “Pathian in hmuntin ah Amah aiawhtu dingah nu-pawl a tuah” ti’n Judah pawlih thufim an neih bangin Nu ṭha le Nu tling tling cun insang nuam a sersuakih kawhhran kilkhawi theitu rinsanmi fanu fapa a hring. Ramhruaitu mifim hmantlak rinsan um zetzet a sersuakih a innsang cu a ngaihven hlehle. A mai ruangah innsang a nuam ih kawhhran khal a hlim, rampi tiang khal a cak. “Nui duhdawtnak cu minung nunnak ih a cangtheilo mi khal tuah thei dingih thazang petu a si” (Marion C. Garretty).