Chin Kum Thar Puai [Fang-er] Hmuhvedan

Chin Kum Thar Puai [Fang-er] Hmuhvedan

Ting Hlei Thang

“Lai Fanger Puai” hi “Chin Kum Thar Puai” tiih kan hmanthawknak cu kum 6 tluk a si zo. A san ih zirin thil ṭha zet ti theih a si. British ram nawr kutih kan zalen hnu a vawi khatnak Chin Affair Counsel khalin October 26 ihsin 28 tiang hi cozah theihpit ih zungpih ni, Chin Phunpi Kumthar ni ah March 17, 1949 ah an rak nemhnget. Culai ih Chin Affair Counsel sungtelpawl cu: Pu Vom Tuh Mawng, Captain Mang Tung Nung, Pu Sa Vut le, Pu Lian Thum tipawl an si. Hmansehla Chin phunpi ni fanger puai cu 1962 General Ne Win ih ralkap uknak san ihsin a riaral deuhdeuh ih Chin phunpi hminsinnak khal a tenau sinsin.

General Ne Win (zovek mirang, kawl, vai uktu/lal ansi khalle) hin Chin Affair Counsel pawlih hmalaknak, Chin Phunpi Kum Thar Puai, le cozah theihpiih zungpitnipawl tla cu ti tenau in a ziamral ter thei ko ding. Asinan Chin mipawlih hnampicang thinlung, duhdawtawknak le mai nunphung ngainatnakpawl tla cu zo/ziangvek hmanin a ti tenau in a ziamral ter thei hrimhrim lo.

Cumi a tak a sizai cu tuisan minung Chin mipawlin kan umnak, kan thlennak kipah urhsun zetih Chin Kum Thar Puai kan hman reronakin a lang ter.

Peng le pil ih zirin: A tlangpithu in Fanger (Zahau, Sim, Laizo,...), Dawngpui (Zanniat), Dawngsawm (Ngawn), Tenreh (Tapong), Tho (Khualsim, Hakha,...), Khawdo (Tedim), Chapchar Kut (Mizo), Kum-er (Mindat), Losak (Matu), tvk in kan hmang.

Hitin ṭawng dangdangih kan hman ruangah kan thinlung a hmun khat lo, kan duhdaw-aw lo, ka ral aw tinak a si cuang fawn lo. A tlangpithu in kan hmandan, ka tumtah le kan hmannaksanpawl cu a bangaw ṭheh. Kan ṭawng, kan kawhdan lawng a dang khi a rak si men.

1. A Hmin Ziangtin Kan Ko/Hmang Ding?

A tlunih sim zo bangin Pu Vom Tuh Mawng le a hopawl, Chin Affair Counsel khalin kan Fanger Puai cu ticelcelih hmannak ihsin lungrual lam pan dingah asilole a hmin dingah “Chin Kum Thar Puai/Chin New Year Festival” timi hi an rak duh bik ih leitlun huap ih hman ding khalah tling le tlak bikin an rak thei.

Kum tawkfang a rei hnuah Chin Pawlpi USA khalin “Fanger Puai” cu “Chin Kum Thar Puai /Chin New Year Festival” tiih hmang sawn dingah hma a run lathawk ve ih lungawi um za zet a si. Amahlawngte a ni/tikcu thu ah hmalaknak a nei hrih lo (ka theih sual lole), ih hmalak ding a nei lai tin ka ruahsak!

Kan palepawl kan ulepawl cangantu tam sawn khalin “Chin Kum Thar Puai” tin an ngan hmuh tikah siseh kan hmunkhat rero zo ti hmuh tikah lungawi um zet.

Curuangah cangantu khalin HMIN thu ih a duhbikmi le Mino tampi hnenih a sawm duhmi cu “Chin Kum Thar Puai/ Chin New Year Festival” tin hmang vivo thei sehla ti hi a si.

1.1 Asile “Fanger Puai” Teh?

Asi, Fanger Puai timi kan hmin mawite hman nawn lo ding ngaingai cu thinlungin a seherh deuh ṭheu thotho. Curuangah telh tengteng kan duh asi ahcun kan thulu vekin “Chin Kum Thar Puai [Fanger}” tvk in tla hman theih cu a si ko. Cun Fanger Puai tihi cu hrinhnam ih kan tuah ah hmang men sehla. Ṭhimnakah: Zahau Fanger Puai, Laizo Fanger Puai tvk…Chin/Falam huap ih kan tuah tik ahcun “Chin Kum Thar Puai/ Chin New Year Festival” ti hi hmang thei sehla tiah.

2. A Ni/Tikcu Ziangtikah Kan Hmang Ding?

Chin Kum Thar Puai/ Chin New Year Festival cu ziangvekin (how), ziangtikah (when), khuitawkah (where) kan hmang a va si hmanah a ra suahnak cu Fanger Puai a si ruangah Fanger thu cu malte tal zoh lo cu a theih lo ding.

2.1 Fanger cu Ziang a si?

“Faanger” timi cu “Faang” le “Er” timi tongfang pahnih kom aw mi a si ih kan pilepu pawl in “laifang” a tlor mikhi sang ah an tuah ih cu cu faanger tiah an ti. Mi hrek khat cun laifang silo in faangcang tlor khal in an tuah. Asinan laifang tlor hi an hmang tam bik. An tuah daan phun hnih in a um. Pakhat cu killi nei in an fun ih cucu sangpi an ti. A dang pakhat cu a pum sawl te in an tuah ih zawlrit tiah an ti. (By San No Thuan – Chin Kum Thar Puai)

2.2 Fanger Puai cu Ziangtikah An Tuah?

Faanger Puai cu lo rawl an lak theh hnu September thlalai hnu ih thlathul (fullmoon) hmaisa bik ah an tuah. Curuangah September thlalai in October thlalai tiang khi kan pupa pawl in faanger thla tiah an ko. Lorawl lak ti tikah thal rawl si lo in fur ih ciinmi laifaang, faangcang le vainim lak thehnu ah an tuahmi a si. Cui rawllak khawm cu kan pupa tong cun rawllu pet (harvest) tiah an ti. (By San No Thuan – Chin Kum Thar Puai)

Ka theihsual lole Chin Pawlpi USA cun a tikcu thuah hmalaknak a nei hrih lo.

Tarlang zo bangin Pu Vom Tuh Mawng le a hopawl, Chin Affair Counsel cun October 26-28 cu Chin Kum Thar Puai/ Chin New Year Festival hman tikcu siseh tin kawlram cozah hnen tiangah an rak nemhnget.

Himi thu khalah cangantui’ ruahnak cu hmin bangawlo, tuah tikcu bangawlo celcel cu cuhnakih thil ṭha pakhat-khat a um ko ding ti hi a si.

Faanger Puai cu lo rawl an lak theh hnu September thla-lai hnu ih thlathul (full moon) hmaisa bikih tuah a rak si tikah a ni asilole tikcu felfai/official zetin a rak um lo ti theih a si. Curuangah hrinhnam ih kan tuah tikcu ah hmang sehla. Ṭhimnakah Zahau Fanger Puai, Laizo Fanger Pua, le Sim Fanger Puai tivek cu September thlalai hnu ih thlathul zan hmaisabik ah.

Chin/Falam pi huap ih kan tuahmi “Chin Kum Thar Puai/ Chin New Year Festival” a si ahcun a tikcu hi October 26-28 hi si thei sehla. Ziangahtile Chinmi tla leitlun hmunkip kan thlen ve zo tikah tikcu felfai /official zetih neih hi a  ṭha zettin ka thei.

Tikcu Hmanrei le Reilo

A cang thei ahcun a ni thum rorin hmang thei dupdo sehla a duh um. A ngaingai te cun kan pupapawl tla “Fanger Puai” an rak hman tikah ni li lai an rak hmang. A ni thum kan tlin lo hmanah himi sungih ni khat cu official zetin hmangin kan upapawlin hma in hruai thei sehla duh um za zet a si. A hnuaiah an hmandan cu Salai Lal Ram Lian ih “Chin Kum Thar @ Fanger” timi sungin kan zoh pei:

1. Mualtlang Sun (Ni 1nk)

Ni hmaisabik cu “Mualtlang Sun” an ti ih mualrawn ah vawk an that. A zan ah inn tin in Chin sang an suang ciamco ih “Sangkhar Zan” an ti. Sang phun hnihin an tuah tlangpi ih kil li nei cu “Sangzawl” an ti ih a pumsawl cu “Zawlrit” an ti. Zawlrit cu nauhak pai theih dingin hridai an thlaih ih nauhakpawl in vaidip bangin an pai ih an lehpi ciamco ṭheu. Khawzing Pathian hnenah thla an cam ih kumpi kum khat sung lam a hruainak le lorawl thlawsuah a peknak parah lungawithu an sim.

2. Nipi Ni (Ni 2nk)
Mithi thlaraupawl tla an lung a leng ve tiin an ruat ih an hrangah Lai zu tla an retsak. Cun pacangpawl in mithi hla an sak. Nipi zan cu khua a thim vete’n mah le inn ih zaute ah thingṭek an phun ih cui’ thingṭek ih hlamphei an retmi parah meifar zanvar an vang. Kum hlun ihsin kum thar an luh tikah kum hlun sungih thilṭhalo, vansiatnak, natsia le dausia hmuahhmuah suak thluh hai seh tiin khawsia an dawi. Inn sung hmuahhmuah cuam kerkawm, belraw lak, ihkhun hnuai tiang le inn leng a kerkawm tiangin meifar thawn an sawh ih, “Rirai e, tlangrai e, suak uh law, tlan uh law. Raisia e, suak uh law, tlan uh law. Kum thar ah nan um thei nawn lo e,” tiih au phahin khawsia an dawi ciamco ṭheu. Nauhakpawl khalin "Rirai e, suak uh law, na nui' zin zawh law, na pai' zin zawh law," tiin an rak au ve ciamco. Meisa alh cu nauhakpawl khalin hiti'n hla an sak ih an rak aupi ve. "Zawi' meite hliausawn maw? Kanmai' meite hliausawn maw?" tiin nuam zetin zan an rak var ve. Khawsia ra lut thei nawn hlah hai seh, tiah meifar cu zanvar an vang ih khuangdar an cum, an au, an rak, an kiau ih meithal tla an kap ciamco. Fala-tlangvalpawl khalin zanvar zaihla sakin zan an meng. Kawlpawl ih Tacian ah tidai thawi an tawihawk thawn tahṭhim theih a si.

3. Nilen Sun (Ni 3nk)
Zan mengsuak hmuahhmuah hmunkhat ah rawi eikhawmnak an nei. Sunvui, zanvar zaihla sak le lamin nuam dupdawn can an hmang.

4. Arṭhing Sun (Ni 4nk)
Fangza-aih hla an sak, ceretlawh lam an lam, khuate hla an sam, lehnak phunphun an tuah. Dawksang deuh le nawm khawp lo deuh pawl hrangah an saduhthah a tlamtlingin an di a riam zet ṭheu.

Khaikhawmnak

Ka hmuhdan le ruahdan hi a dikbik tinak cu a si lo. Himi Cahran khal hmin pakhat, tikcu bangaw ah Chin Kum Thar Puai hmang thei sehla timi bak hmuitin dang a nei lo. Hmailam ih kan pumkhat sinsin theinak ding, a hmin le a tikcu bangaw tei’ kan hman vivo theinak dingah mino tampi in ṭuanvo kan nei. Himi cahran teh ziangtin na ruat? Chin Kum Thar Puai thawn pehparin Chin Kum Thar Puai hrangih Na duhdan, na ruahdan, na duhmi hmin, na duhmi tikcu zalen zetin a hnuai lamah comment pe ve aw. Cutin ṭha sawn hmusuakin zin khat thinlung hmunkhat ah kan feh thei ding! Lungawi.

Rawn:
San No Thuan, "Chin Kum Thar Puai"
Salai Lal Ram Lian, “Chin Kum Thar @ Fanger"

RFA Chin Radio Program October 24, 2013