Thawhsalnak Nun Tak Neitu Na Si

“Zisu in a hnenah, Kei cu thawhsalnak le nunnak ka si.

Zokhal keimah I zumtu cu thi hmansehla an nung ding.

Zokhal keimah sungah a nungmi le

I zumtu cu an thin awn lo ding” (John 11:25-26)

Thih ṭihnakin na nun a lo luah khat pang maw? Asilole ka thih hnuah ziangtin ka um ding? Thawhsalnak tivek hi teh a um ngaingai pei maw ti ruahnakin siseh, Hellram, Vanram, le Pathian tivek hi rak um lo pang sehla teh tivek ruatin siseh, Bible le thawhsalnak thu ah hnangam loih na um caan a um pang ṭheu maw? Minung kan si sungah cuvek cu um theitukmi thil a si. Cuvek na ruah pang le na thin a bang pang ṭheu ruangah na piangthar lo tinak a si hrimhrim lo.

Ka lo sim duh, Setan in Bible, Pathian thu ah rinhlehnak le thlaphannak nei dingin lo thlem le lo neh a tum ringring ti hi a si. "Rukru cu ru ding, that ding le siatsuah ding lawnglawngah a ra. Kei cu nunnak an ngah ih tlamtling zetih an neihnak dingah ka ra a si" (John 10:10).  Leitlun minungpawl cu thi dingin leitlun ah kan rung nung nan kan nih zumtupawl cu nung dingin kan thi leh ding. Zumtui’ hrangah taksa thih hi nunnak a si.  Pathian mihman ropi DL Moody cu a tar tuk thlangih ka thi zik cuahco thlang ti a theih awk tikah mipipawl hnenah, “A rei hlanah thuthang le cahnah parah DL Moody a thi timi cangan nan hmu ding, asinan rak zum hlah uh, cui caan ahcun kei cu nun hram ka rak thawk rero zo ding” a ti. Setan ih hrawkhrawlnak le thlemnak men ruangih thlaphang le thinhar ih na um cun na sung tuk. A nih cu Kalvary tlangih a lu rialbek zomi a si kha. Cuvek na umpang caanah thawhsalnak nun tak neitu na sizia le a tak a sizia hmufiang sintu na si nak dingah Pathian hnenah thla cam aw.

Setan in, Pathian teh hi a um ngaingai kei maw? Hell ram le Vanram tivek teh hi a um ngaingai kei maw? Ka thih hnu ah teh Pathian hnenah ka feh taktak pei maw tin Pathian, Bible le thawhsalnak ih rinhlehnak nei dingin a lo thlem ringring. Cui caanah Sam 14 “Mi aa cun a thinlungin Pathian a um lo a ti” timi kha vun siar sal awla, thawhsalnak rinhlehnak na neih ṭheumi cu Setan ih bumtumnak a si ti na fiang ding. Kan ruahnak peng ding le lak hloh sak ding hi Setan ih a zuam bikmi pakhat a si. Kan ruahnak a lak thei cun kan taksa cu a ta a si cia ti a fiang tuk ve fawn.

Nang cu Pathian fa na siih na lei nunnak a cem vetei Pathian hnen feh ding, nun hram thawk ding na si. Hi thawhsalnak um hlah sehla Pathian kan zum man a ṭha hnem lo ding. Biaknak dangah thawhsalnak a um lo ih kan nih cu Zisui’ thawhsalnak hi kan ruahsannak a si. Buddhist biaknak rak thawktu ‘Gautama’ cu a thi ih a thosal nawn lo. Islam biaknak dintu ‘Muhammed’ khal a thi ih a tho sal nawn lo. Confucianism biaknak rak thawktu ‘King Fu TSu (Confucius)’ khal a thi ih a tho sal nawn lo. Hinduism biaknak rak thawktu ‘Ancient Sages’ khal a thi ih a tho sal nawn lo. Sikhism biaknak rak thawktu ‘Guru Nanak’ khal a thi ih a tho sal nawn lo. Taoism biaknak rak thawktu ‘Lao-tse’ khal a thi ih a tho sal nawn lo. Zoroastrianism rak dintu ‘Zoroaster’ khal a thi ih a tho sal nawn lo. Judaism (Hebres pawl biaknak) thawktu ‘Moses’ khal a thi ih a tho sal nawn lo. Kan biak Pathian cungnungbik fapa Zisu Khrih cu a mai sim cia bangin a thi ih ni thum hnu ah a tho sal (Matthai 28).

Zisui’ thawhsalnak cun Pathian hmaiah thiamcoter na si zia a lang ter (Rom 4:25) ih thih hnu hrang khal thlaphan ding na neih lo zia a lang ter. Zisui’ thawhsalnak cun thihnak a neh zia a lang ter (Rom 6:9) ih na thih veten na tho sal dingih Pathian hnen na feh ding ti khal a lang ter. Zisui’ thihnak le thawhsalnak hin zumtupawl khal a mah vekin ka thi dingih kan tho sal thluh ding ti a lang ter (1 Korin 15:20-22)

Curuangah nang cu kumkhua in vanram nuamih um ding na siih na hrangah nun khal a hlawk ih thih khal a hlawk sinsin. Setan ih thlemnak menin na lung rethei hlah seh! Setan ih bum tumnak menin thawhsalnak thu le na thih hnuih umdan dingah na nun buai hlah seh. Nang na nun cu lakhloh theih lo dingin Pathian in Khrih sungah a thuh a si (Kolosa 3:3). Cui nun thawn nun hram thawk ding na si. Setan ih bumthlemnak menin na lung rethei pang hlah seh! Pathian thutak le Bible hmangin Setan kan do neh vivo ding. Amen!