Zisui Suahkehnak ih Nunau Pali

Zisui Suahkehnak ih Nunau Pali

(Matthai 1:1-25), Thufim 31

Sermon by: 

Flora Biak Za Mawi

Matthai bung 1 pumpi kan siar asile Zisui suahkehnak thu cithlahawkdan a si. Abraham ih san ihsin a fapa Isak, Isak ih fapa Jakob tin Zisu a rung thlen tiang ngan a si. Hi cihthlahawknak thu ah mipa hmin lawnglawng a lang rero nan danglam zetin nunau pali a sim cihmi kan hmu thei. Cupawl cu Tamar, Bathsheba, Rahap, le Ruth pawl an si. Rahap le Ruth hi Gentile miphun an siih Tamar le Bathsheba hi Judah miphun an si. Curuangah Zisu cu Judah le Gentile miphun a si tinak tluk a si. Rahap hi hlawhhlang a si tin (Joshua 2:25) ah in sim. Tamar le Bathsheba khal an ui-re ti cu Semtirnak 38, le 2 Sam. 11:1 ah kan hmu thei. Ruth lawngte hi nunau fel a si. Hi nunau pali hi Ruth siarlo cu hlawhhlang le ui-re an si ko nan a thupi zetmi Zisui suahkehnak ah ziangah an lang ve si pei. An nun ihsin zir dingmi tete run rel ka duh.

Rahap

Rahap ih thu hi Joshua 2-6 ah kan hmu thei. Israel pawl kum 40 sung sal an tannak ihsin Kanan ram thleng dingih an feh laiah Jericho khawpi neh ta tengteng a ṭul. Khai Israel pawlih nehnak ah a thupibik cu Rahap a si. Zo hmanih an duhlomi le an hnonmi hlawhhlang Rahap nun ihsin zir ding kan nei.

a.     Mibum cu sual a si ringring ko. Mi tampi cun Rahap ih mibumnak ruangah Israel pawl nehnak an hmuh ruangah mibun hi a ṭhatnak lai a um, asilole thuphan var per cu a poi lo tin an sim. Asinan mibum pohpoh cu sual a si ringring ko. Rahap kha mi a bumnak ruangah a luat a si lo ih a zumnak ruangah a si tin Hebru 11  ah kan hmu. Pathian hmaiah mibum cu cohlan theihlomi thil a si ticu Thufim 12:22, 6:17 ah kan hmu thei.

b.     Pathian in ngaithiam thei lo a nei lo. Kan sualnak, kan harsatnak le mangbangnak hnakin Pathian duhdawtnak hi a tum sawn ringring. Rahap hi a hlanah ziangvekin rak nung hman sehla Israel pawl runsuahnak le an nehnak hrangih mi thupibik ah Pathian in a hmang thotho. Hebru bung 11 sungah tla cun nunau lakah Rahap le Sarah ih hming lawng a lang.

Kan nih khal Rahap vekih misual kan si ko, asinan cumi in kan ruahsannak a cem ter lo. A thupimi cu thinlung thiang neiin Pathian hnenih sualsirnak thawi a hnenih kir ding a si. Ziangvek dinhmun kan si ti a thupi bik lo, Pathian in in cohlang thluh thei ih kan tlaksiatnak le zatlaknak hnakin kan hrangih Pathian tumtahmi a tum sawn.

Tamar

Tamar cu hlawhhlang thuam ih a thuamawk ruangah Judah ih ihpit mi kha a si. Himi in kan zir dingmi cu kan thuamhnaw hruhmi in thil tampi a rel. Hlawhhlang thuamih kan thuamawk ahcun hlawhhlang ih in ruattu kha an mawh lo. Curuangah dinhmun le umnak ih zirin a remaw zetmi thuamhnaw hruhthiam hi a thupi. 1 Timote 2:9 ah, “nunau khal a tawkzawnin um haisehla zohmawi tawkin thuam aw haiseh. An sam an tom tikah a hleifuan in tom hlah haiseh; sui hlawnthil, lung mankhung zetzet thawn thuam aw hlah haiseh” a ti.

Bathsheba

Bathsheba cu Uriah nupi a siih miih nupi si cingin David ih sualpit mi kha a si. A nun ihsin zir ding kan nei. Cupawl cu: 1) Zovek minung an si khalle mai taksa cakhiarnak kilkhawi theilo mipa kha hrial thiam ding, an hmuh banlonak ih um kha a thupi. 2) Ziangvek dinhmun khalah mah le mah kilkhawiawk thiam ding, miin kan mah vekin kan zawn in ruat ringring lo.

Ruth

Ruth cu a pasal ih a thihsan hnuah a pasal ih nupi Noami kha rinum zet le raltha zetih a thluntu kha a si. A nun ihsin zir ding malten kan zoh sal pei.

Noami cun bawmtu neilo a pasal ih nupi Noami a bawm ih a hrangah hna a ṭuan. Cun a mai bulpak hlawknak hrang lawng ruatin thil a tuah lo.