NGANBO LE THLIMCAN

NGANBO LE THLIMCAN

                                                                    

Nganbo nu le pa cu nitinin lungrual zet te`n lo an feh tlang ṭheu. Asinan nikhat cu Nganbo pa cun a lungkuai nawnte nutlawi pakhat a hmu i Nganbo nu kha a iai deuh i an ṭhenawknak dingah khua a ruat. An lo fehnak ziinah liilawn pakhat a um i a hnuai cu tilipi a si. Nganbo nu cu mi thlariin nei, tihhrut deuh sikhaw liilawn kha thiitha-in amah te`n a zawh ngam dah lo. Nikhat cu an pa-in “Lomi tlunah zokhal liilawn zawh ngamlo cu kan tul thla aw ding” tiah a ti.

Nganbo nui` hrangah cun lomi tlun ding cu tih a nung ko. Tuizaan cu tili sungah ka tla thlang ding tii faingte`n a thei. Lomi cu an hung tlung i liilawn hram an thlen cun a liilawn zawh hreh tukah a ding lawk. An pa cun, “Feh aw he law” tiah a tii. An nu cun, “Ka thi hna a cat i ka peh lai” a ti. Tawkfang a hi zawh. Asinan a tha a thia. A zawh ngam nawn lo. An pa cun, “Feh thlang aw hen haw” a tii laalaa. An nu cun, “Ka thisep a cat i ka peh lai” a tii. Tawkfang ah an pa cun, “Feh thlang aw hen law” a tii laalaa. Nganbo nu khal cun, “Ka thisep a cat i ka peh lai” a ti thotho. An pa khal cun a thinheng a tuar nawn lo i, “Cuzat thi cat le thi peh cu” a tii i tili sungah a tuul thlak. Tili sungah cun ngathisawn ah a cang.

Nganbo pa cu thindiriam le lungsung saduhthatin a hung tlung. A nutlawi ngaai mi ziangtin ha a co thei ding. Ziangtin ha innsang thar a din sal thei ding? A phunphun khua a ruat i an inn a thlennak hman a thei man lo. An kotkheen in a fanuute Nganbo cun, “Ka pa, ka nu the?” a tii i a rak hmuak. Nganbo pa cun a fanuute a zohah cun a thin a har ko. A thi tii ding cu a ruat baan lo. “Bote I hrangah a tii i pangpar a tot lai” a tii san. A nu thlen tii a neih lo cun, “Ka pa ka nu the” a ti sal laalaa. A pa khal cun, “Bote i hrangah a tii i cu mi kha mi a la lai” a tii i thu dangdang a sim vivo. Asinan tawkfangah cun Nganbo khal cun ka nu a thi zo tii a thei fiang thlang.

Nganbo pa cun Nganbo cu, “Thlimcan nu tei` meisa va cawng aw” tiah a fial. Nganbo cun ninghang lungsia te thawn an kotka tei` meisa cawn a va dil. Tlimcan nu-in, “Na pa thawi kan umawk loah cun” a rak ti. Nganbo cu a kir saal i a pai` hneenah, “Ka pa, Tlimcan nu-in na pa thawi kan umawk loah cun i rak tii i ka cawng ngah lo” a va tii. A pa cun, “Umawk khalah umawk lo khalah va cawng thotho aw” tiah a tii. Nganbo cu a feh sal i, “Ka pa`n umawk khalah umawk lo khalah va cawng thotho aw i tii, nan meisa cu in cawn mai aw” a va tii sal. Tlimcan nu cu a lungawi tuk kha a pehin a pet suak i a thilri neihsun bung le bel hmuahhmuah thawn an pok suak i Nganbo tei` innah an va lut thluh.

  

Tlimcan nu cu Nganbo pa thawn an um khat. An saduhtht le an lungruah thup thil pawl an ngah thluh thlang. Mothar le mopaa thar va tii cu lung a nuamin an duh aw ko. Asinan Nganbo te kha nu loin ar bang a vaai ko. A pan nupi dang a neih san ruangah tuihlaanih a pa vek khan a zoh ngamin a naihniam ngam nawn lo. Nu-ei a tuar i zangfahzaa te`n a suk le a so ah a nui` kawk le vuak tihih a tawivak rero. Felte`n a tuah khal le kawk thotho, ṭhatei` a tuah khal le kawk thotho. Nu-ei tuar kan tii cu. A pa in le a nui` thu kha pompi thlang khaw Nganbo cu hneemtu ding a nei nawn lo.

Nitinin Nganbo cu a naunuu Tlimcaan an um ter i a nu le a pa cun lo an feh san ṭheu. A nu cun Nganbo cu rawl uih le thing hma a pek i a fanu Tlimcan vialin rawl thawthaw a ei. Asinan Nganbo a tumtawl cuang lo. A taksa a mawi, a ruang le raai a ṭha. Duhnungzaa in a um siinsiin.

Tlimcan nu cun Nganbo cu rawlsia sia khopkham lo zetin a pe nan a tumtawl cuang lo i a ni ni-in a taksa a that deuhdeuh le a mawi sinsin kha a hmuh tikah a khawruah a har. Tlimcan a suh tikah, “Nitin a nui` hneenah khan tilipi ah an feh i rawl thawthaw a rak pe ṭheu” ti`n a sim. Nganbo nu cun nitinin ngaleng sa le fangcang buh a rak pe ṭheu. Nikhat cu Nganbo tei` unau cu tilipi ah  cun an va feh sal. Nganbo nu cun a pek kel rawl cu a rak pe hai. Tlimcan cun a sa co mi kha a ei thluh cingcing. Nganbo nu cun, “Bote na nau seu aw” a tii i a seu ṭheu. Tu le tu pek cawl lo le seuh cawk loin a ei thluh cingcing. A nu cun a fial laalaa. Nganbo cun, “Ka nu, ziangah ha Tlimcan hi cu tii i pek ding i i fial, a hi nu hi a si lo maw nitin i thawi i i veeltu cu” a tii. Cumi a theih tikah, Nganbo nu cu a thin a heng i Tlimcan cu a thawi ciammam vee. Tlimcan i ṭap le rak cu a nu in a rak theih i a suh tikah, “Nganbo nu-in i thawi” ti`n a va sim.

Tlimcan nu cun Nganbo nu a ham a ṭha lo ding. Kan thah loah cun a tii i thah theinak khua a ruat. Pol hnenah a leng i, “Tuizaan kan pa, na hneenah ka ra ter ding. Nganbo nu nan thah loah cun nan nui` pumna a daai lo ding ti`n rak sim aw” tin a tiamthup. A zaanlam cu, “Ka pum a na tuk e, pol hneenah zamrangin va sut aw” tin an pa cu a fial i a lawng a tal rero. An pa khal cun ziang thei loin a va sut vee. Pol khal cun an tiam awk ta bangin, “Nganbo nu nan thah loah cun” a rak tii. Cutin Nganbo nu that dingin an relcat. Nganbo cu, “Kanu an that thlang ding” a tii i ninghang lungsia in a ṭap a rak. A nui` hneenah a va feh i, “Ka nu, lo thah an tum. Curuangah ti taw kat ka lo tii le ti lu ah kat aw. Ti lu kat ka lo tii le ti taw ah kat aw” tin a va sim. A thaisun cu Nganbo nu that dingin an pok i, a sa phurhnak dingah bawmthleek thawn an va pan. Nganbo cun, ”Ka nu ti lu kat a tii i, tii taw ah a kat. “Ka nu ti taw kat a tii i, ti lu ah a kat. Cutin an that thei lo. Tlimcan nu cu a thin a heng i, ”Nganbo zutzo kha amah that lawlaw uh” a tii. Nganbo khal a thin a phang i, “Ka nu keimah thah in tum”, na zang hriamte hun lang ter aw” a tii i cutin an kah i Nganbo nu cu a thi.

A sa cu an sahṭhet ṭheh hnu-ah bawm pahnih khatin an san i Nganbo le Tlimcan an phurh ter. Tlimcan i phurhmi vialin a thi a suak ciammam i a takpumin a thi a khat thluh. A nu cun, “Bote nanau thlengaw” a tii i Nganbo thawn an bawm phurh an thlengawk ter. Nganbo i a phurh cun a thi a kang. Nganbo i bawm Tlimcan i a phurh cun a thi a dok laalaa. Cuti`n thi le hnai pi thawn inn an va thleng. Nganbo cun, “Nannih cu nan duhnakah leng thluh au. Keimahin sa cu ka suang ding” a tii i a sungte pawl cu a leen ter thluh hai.

Nganbo cu a nu`n a thihsan zo ruangah ninghangin a ṭap phahphah i a nui sa cu a suang. A rawl suan cu a be phahphah i

            “Ka nu aw, ka nu aw, na khuitawk tiang hmin cang maw?”

ti`n a sut. A nu khal cun,

            “Ka fa aw, ka fa aw, ka khuk i hnuailam hmin cang e”

a hun ti. Cutin, “Ka taitan i hnuai lam, ka siang i hnuai lam, ka hngawng i hnuai lam ti`n an sima aw phah phah i an um khat. Netabikah cun a nu cun, ”Ka fa aw, tucun ka lu tiangin a hmin thluh thlang ding. I be nawn aw hlah. Ka lo be thei nawn lo ding. Ka sa an run ei le nang cu i run ei aw hlah. Ka ruh vial run khawl aw la puanvarin leilungah ṭhate`n i run phum aw. Nithum hnu-ah rak zoh leh aw” a tii i cutin an ṭian aw ta.

Nganbo cun a rawl a hmin cun an sungte pawl cu a ko hai i rawl ei a tuah sak. A sungte pawl cun, “Ngathaisawn sa ti`n hluk le hlekah a hang thawn an ei i thaw ti fahranin an cepcep rero nan Nganbo cun a ei ve lo. “A ruh vial kei i pe au, a sa cu ka ei lo ding” a tii i a ruh cu ṭhate`n a fingkhawi. Phuanvarin a tuam hnu-ah seentlung ah a va phuum. Nithum a kimin va phorh khaw thi rual a phunphunah a rak cang. Tlimcan nu cun Nganbo i thi a hmuh tikah midang ta a ruk si hmang a ti i, “Nganbo in e thi rualpi a ruk e, nan thi rak zoh cio uh law” a tii i khawpi pawl cu a sim hai nan, “Zohman thi hlo kan um lo e” an rak tii san meen. Tlimcan nu cun a fanu i hrangah a duh vee i, “Bote na nau pe vee aw” a tii. Tlimcan i a hun orh le seentlungah a cang sal i, “Hivek ka duh lo” a tii i a hlon. Nganbo i a lak len thi ngai ah a cang sal laalaa. Cu tii i seentlung i a can sal ṭheu ruangah an pe aw thei lo.

Tlimcan nu cun Nganbo le Tlimcan kha a phunphunah a zuamawk ter zok rero. A fanu Tlimcan kha ziangkimah Nganbo hleih ter a duh zet. Nganbo i mawinak le thatnak hmuahhmuah kha a iksik, a nahsuah ruangah Nganbo cu zingzaan vuak le thawi le camsiat a tuar ringring. Cuti`n Nganbo cu nu-ei tuarin ningzak le hmaizumin a um. A nui` zoh ah Tlimcan cu ṭha le mawi in lang hman sehla midang zohah Nganbo cu a mawi deuhdeuh thotho.

Veikhat cu Tlimcan nu`n a fa le pahnih lo a neih ter i a dangdangin ri a ṭhen hnuah mah le lo cio a thlawh ter. Nitinin an unau cun lo an feh i fang le vaainim rawlci phunphun ciingin lo cu an tuah, an thlo ṭheu. Nganbo cu milaw, taima a si i Tlimcan vialte in nitin malte lawng a ṭuan. Ni a sat le a cawl i ruah malte a suur le a cawl. Lo cu thlawhsuak tii le a nei lo. An ri rori in an lo rawl ṭhatzia cu a tan aw. Nikhat cu Tlimcan nu cu, “Ka fa le pawl lo ka va haal ding” a tii i lo a va feh. Nganbo i lo rawl vial lawng dum detdet, hring demdemin a va hmu. Tlimcan i lo cu sen fialfial le lohar hrampi rul liailiai in a va hmu. Asinan Tlimcan i lo rawl cu a nui` mitah cun a ṭha sawn thotho.

Nikhat cu Kawl mi mang a sal rual pawl thawn Nganbo tei` unau cu an hung leeng i an thlen zik cun, “Maw Tlimcan, na lo ziin khuitawk ha” an vun tii. Tlimcan cun, “Pat dum le pat rang ka khih kha run zong au law” a tii hai. An vun zong i a thlam an vung thleng hai. Tlimcan cu tlangval lengtu ka nei a tii i thlamsungah fala pawl i an mawi tum ṭheu thei tawk suahin a rak cei aw i a rak hmuak. Kawlmi mang pawl cun, “Tlimcan na vaainim in va eh aw” an tii. Tlimcan khal cun aungaw phahin, “Kei i vaainim cu a sau khal an sau, an paw khal a ṭha” a ti i zaphak can lo tete a va la suak i a rawh sak hai. “Na fanghma in lawh aw” an tii i fanghma piingkirh, hma pi thawn a khat tupti pawl a va lo i a zelh sak hai. Cuthluh hnu-ah kan hrik in zoh sak aw an ti laalaa. Tlimcan cun, “cu lawmmam i hrik tam cu e” a tii i a cip i a deh sak zok rero. Tawkfangah Nganbo i hneen leen kan duh hrih aw an tii i an tlaan san.

Nganbo i lo ri an thlenin, “Maw Nganbo, na lo ziin khuitawk kha?” an va tii. Nganbo khalin, “Pat dum le pat rang ka khih kha run zong au” a rak ti ve. An vun zong i a thlam an vung thleng nan zohman ve tu le hmuaktu an nei lo. “Maw Nganbo ra cawl hrih aw hen” an hi tii. Nganbo cun, “Ee” a ti hai. A ra cuang lo. Tawkfang ah, “Maw Nganbo, ra cawl hrih aw hen” an ti laalaa. “Ee law” a tii i, a va cawl cuang lo. An ko sal thotho i Nganbo khal cu a va cawl vee. Kawlmi mang cun Nganbo a hmuh cun a mit a lo nasa. A zohah ṭha le mawi a ti, a mit hman thep hna thiam loin a zoh. “Na vaainim in va eh aw” a tii. Nganbo cun, “Kei i vaainim cu an se tuk lawmmam, paw belte lawnglawng an si” a tii i dong cancan a va la i a rawh sak hai. “Na fanghma in va lawh aw” an ti laalaa. “Kei i fanghma cu si le hma thawn, kawihkawlem vek lawnglawng an si” a tii i a zen ṭhaṭha a no tete a va lawh sak i a zelh hnu ah a pek hai. “Hrik in zoh aw” an ti thotho. An hrik cu a zoh sak hai i, “Nan lu ah hrik a um lo, theihmu lawnglawng a um” a tii hai.

Nganbo i cetcangzia kha an duh ruangah, “Na nu le na pai` hneenah kan hung leng ding i Tlimcan nupi dingah kan hung be ding, asinan nangmah kan lo nei ding” tin an sim. Kawlmi mang te cu Tlimcan nu le pai hneenah nupi bia in an hung leng.Tlimcan nu cun a fanu Tlimcan i felzia le ṭhatzia a mawi zia cu tii in a rak porh a rak sim hai. An nitin ni a kimin Kawlmi mang pawl cu an hung thleng. Tlimcan nu cun a fanu Tlimcan pasal nei ding tiah a thuam ṭhaṭha in a ceimawi hnu-ah Nganbo kha, “Na nau pasal a neih ding ruangah hi thlah phah awla, na tlun lamah zaanthing rak phur phah aw” a ti i bawm thawn a thlah ter. Kawlmi mang pawl cun mo cu lungawi zetin an lawi.

Lam hlat nawn an thlenin Nganbo cun, “Kei ka kir thlang ding, ka kiir lamah ka ning a tih ding” a tii. “In rak thlah hrih aw la” an ti. Tlang dang an liam sal. Nganbo cun, “Ka kir thlang ding” a ti sal. “In rak thlah hrih aw la” an ti laalaa. Tlang dang an liam sal. Nganbo cun, “Ka kir thlang ding, lam a hla tuk zo. Ka ning a tih ding” a tii. Lam a hlat nawn thlang ruangah an tii i a thing phurh ding cu an hlam sak hnu-ah Tlimcan cu, “Nang ka lo thi lo, na nui thingphurh ding a tii kha hi phur phah aw” an tii i Tlimcan cu an khiir sal. Tlimcan cu ningzak le ninghang cemin, “Ka nu e” tiah a puan lukhuh i ṭap phahin a rak ciammam i inn a va thleng. A nu cun, “Na ning hman zak lo i nau i pasal neih ruang i e” a tii i a rak vuak bet. Tlimcan cun, “Ka nu e, keimah hokhaw ka sii” a tii i a puanlu khuh vun ong na khaw, “Ka fanute ziang can saw na can a tii i ninghangin a ṭahpi ciammam. “Nganbo rak ngai seh, a ham ṭhat le ṭhat lo” a tii.

Kawlmi mang tei sung pawl cu mothar hmuakin lungawi aipuangin puai an tuah i an nuam. Nganbo khal cu innsang tharah mawi le felte`n a leng thiam ve. Zing khat cu a ni nuu-in, “Nganbo vok rawl va pe aw” a tii. Vok rawl cu va pe zik khaw, “Ka ni, vok kuang sungah thi-hna ka hmu” a tii. A ni cun, “Pek cih mai aw” a tii. Asinan Nganbo in a vung sar i a ret ṭhat. Sumdeen a fial laalaa. Sum sungah cun a ni nuu cun kep a rak ret thup. “Ka ni, kep a um” a tii. “Deen cih mai aw” a ti thotho. Pamhmai in a tii i a lak. A ni nuu in Nganbo i felzia le ṭhatzia a hmuh tikah a lung a kim nasa i a duhdaw zet. Cutin nuam zetin an umkhawm hai.

Nikhat cu Nganbo cu a nu le a pa in “Kan ngai tuk, hung tlawng seh” tin an cah. Kawlmi mang khal cun an that pang ding tii a phaan ruangah a sal rual pawl thawn a thlah i, “Na pi hi ziang khal an fial le nanmah in hung ṭuan thluh au. Zianghman hung ṭuan ter aw hlau” a tii ta hai. Tlimcan nu le pa cun an rak lawm i an rak hmuak. Tlimcan nu le pa cun Nganbo cu ziang khal an fial le, ”Keimah, keimah” an tii i Nganbo i ṭuan ai ah a sal rual pawl cun an ṭuan sak thluh ṭheu. Nikhat cu lo cul-ah vok rawl ding hnahcang put an fial. Sal rual pawl cun kanmah kan pu ding” an tii i hnahcang pu dingin an feh hlo thluh.

Nganbo cu a nu le a pa pawl thawn innah anmahte an rak um. Tlimcan nu cun caanṭha a tii i tap parah tisa belpi in a soh i a ret ter. A hrukpi kha zaute hnuai ah a tlak ter hrim. Nganbo cu a hrukpi tla vung sar a fial. A sal rual le zohman an um nawn lo. Hnancang pu dingah an rak feh thluh zo. Nganbo cu zaute hnuaiah vung tum khaw a kuun zawngah tisa belpi kha a vun toih i Nganbo cu a kaang tawt thluh i a thi ta. A sal rual pawl an ra tlun hlaanah Nganbo i thuamhnaw kha an hlih i Tlimcan an hruk ter. Nganbo i ruak cu hnarpawnah pherin an zual i an rak hlon.

Sazaw in Nganbo i ruak kha a hmu i meihol le meisa thawn a va sem a va sem i Nganbo cu a hung nung sal. Sazaw cun a nau umtu ah a hruai. Nitin Nganbo cu naute a um i,

            “Khua i hlaanah Kawlmi mang nupi ka si,

            A tu ah cun pu sazaw i naute ka zum”

a tii i hla a sak ṭheu.

Kawlmi mang i sal rual pawl cu an pinuu thawn an vung tlung sal. Kawlmi mang cun Nganbo a si lo tii a rak thei. Asinan ziang aw tii ṭha Nganbo cu a thi zo. Tlimcan cu a nupi bangin a tuah ko. Zingkhat cu a nu nuu cun, “Sihmui va phom aw” a tii. Sum sungah kep a va hmu. “Ka ni, sum sungah kep ka hmu” a ti. “Phom cih mai aw” a tii i, a phom ruai thluh. Vok rawl pek a fial leh. Thi hna a rak um lala. “Ka ni vok kuang sungah thi-hna ka hmu” a tii. “Pek cih mai aw” a ti i a pek cih. Kawlmi mang nu cun Tlimcan i nunzia a hmuh tikah a bei a dong ko. A mo hlun Nganbo kha ziang tlukin ha a ngai ding.

Nikhat cu Kawlmi mang cu a sal rual pawl thawn lo an feh. An thlawhri pawl cun,

            “Khua i hlaanah Kawlmi mang nupi ka si,

            A tu-ah cun pu sazaw i naute ka um”

tii i hlasak aw thawm, sal rual pawl cun an thei. An pupaa cu an sim. Kawlmi mang cun na pinu nan that zo, ziangtin ha cuvek thil a um thei nawn ding a tii i a ngaihsak lo. Amahte hman a umhar lungleng um ngaihnak theih lo laiah cuvek thu cu a hnasungah a lut thei lo. Asinan sal rual pawlin cui hla awte thawng cu an thei sal laalaa. An pupaa cu an sim sal. Kawlmi mang khal cun hun ngai vee khaw,

            “Khua hli hlaanah Kawlmi mang nipi ka si,

            A tu ah cun pu sazaw i naute ka um”

tii aw te cu Nganbo i aw te bangin Kawlmi mang i hna sungah cun thlumte`n a ra thang vee. Sal rual pawl cu an va tlan i va zoh na hai khaw an pi Nganbo kha a rak si. Hruai tlung an tum nan a duh lo. Ziangah tii le sazaw i minung a si zo ruangah a si. Kawlmi mang khal cu a lungawi um ngaihnak hman a thiam lo. Mithi hnu kir leh sal cu. “Ka mang a si pang maw?” ti`n nuai aw rero in a um.

An hruai tlung theinak ding cun sazaw kha biak leem a ṭul tii a si. Zaanlam khua a siim cun sazaw cu a rung tlung. Kawlmi mang pawl a inn khatin an rak um ruangah a tin ngam nawn lo. A inn kapah cun hmuansak hmuanthlang helin a tawi a vak zok rero.

Sazaw a rung tlun ngam nawn lo kha an hmuh tikah, “In tih aw hlah, zianghman kan lo ti lo ding. Na nau umtu kan lo dil tum ruangah a si” an ti. Cutin a vung tlung i ”Na nau umtu hi hruai kan duh, a man ziangzat ha n angen ding?” an tii. Sawzaw khal cun, ”Banhla bukhat le meihol bawmkhat i pe au la, nan hruai ding” a rak tii. Cutin a ngen vek cun lungawi zetin an pe i Nganbo cu an innah an tlun.

Kawlmi mang cu Kawl nam samseu in a tat i pakhat hrangah hnahcang, nam mawi te`n a tuah i dar phaw mawi zetin a ben sak. Kawl nam cu Nganbo a hman i Hnahcang nam cu Tlimcan a hman. Nan sat aw ding i a nehtu tu ka nupi nan si ding a tii hai. An hun sat aw cu Nganbo cun Tlimcan cu a sah that. Tlimcan a thih cun a sa kha ralcabelpi sungah an san i a thaw suak lo dingin ṭhate`n an put.

Ni rei nawn hnu-ah cun Kawlmi mang cun, “Ka pi le ka pu kha rung tlawng hai seh law, kan ngai tuk thlang” ti`n an hun cah. Tlimcan nu le pa cun, “Kan fanuu Tlimcan in in hun cah” an tii i lungawi hngakhlap zetin an vung tlawng. Kawlmi mang inn an vung thlen tikah Nganbo cu a puan lukhuhin a rak it. Tlimcan nu cun, “Cante, ra tho aw, na nu le na pa kan rung thleng” a va tii. Asinan a puanlu a khuh ṭha deuhdeuh i a it thotho. A nu cun, “Ra tho aw” a ti rero nan a tho duh cuang lo. Kawlmi mang cun, “Ka pi, kan lo cah laiah nan rung duh lohli lo i a ngol, a thin a heng a si kha. Lehhnu deuhah rung tlawng leh au la tu cu hitin hung tlung hrih au. Ralcabelpi i sathu kan thut mi hi hun phur aw la a tii i an belpi cu a phurh ter.

Tlimcan nu cun, “Ka fanu Cante in sathu belpi khatin in phurh ter, hmuansak te, hmuanthlang te pawl sathu ra tok cio u law” a tii i an innhneen pawl cu a sathu tok ding cun a sawmkhawm hai. Innhneen pawl khal cu lungawi zetin an ra suak cio i sathu cu an tok ruuri hai. An hmuansak pa cun vun tok na khaw, “Ai e, hi cu Tlimcan i kutkee a bang” a tii. An hmuanthlang pa`n a tok vee in, “Ai e hi cu Tlimcan i kee te a bang” a ti laalaa. Tlimcan nu khal cun, “Ziang ha nan reel rero. Tlimcan in i phurh ter hun si ah” a ti san hai. An kotka pa`n a hun tok ve i, ”Ai e hi cu Tlimcan i luruh te a bang” a ti laalaa. Tlimcan nu khal cu a lung a naum nawn lo i va zoh na khaw a fanuu Tlimcan i luruh ah a rak cang. “Maw ka fanu e, ziang can si maw na can e” a tii i a ṭap a rak nan, mithi hnu a fanu Tlimcan in zianghman a sawn thei nawn si lo. An sankhat nun cu mithli thawn an cem ta.

Kawlmi mang tei sung, Nganbo cu Tlimcan a thih hnu cun nuam le lungawi ziang ngai nawn loin an rung nung lan ta.

************************************