NGAI ṬAH LE A NU

NGAI ṬAH LE A NU

(Tilik thuanthu)

Ngai Ṭah hi fala tleirawl te a si. A hmel ṭhat zia cu zoh khawpawk loin a ṭha. A ruang le a raai ah zoh tha nungzaate a si. A mitmen cu zaan i arsi iangin a mawi i a mitmu cu thengre mit bangin a thiangin a fai. Vaandum bangin a dum lengli. A nui` mit lawngah a si lo; a hmutu hmuahhmuah hin an thin a nuam. A hneen ah thlenah cun ziang dang hman an ruat thei dah lo. An thin helhkam mi khal a daai thluh ṭheu. Nuunau ziazate thawn kaih aw in a nungcang a mawi.

Kumkhat cu vaanruah a tam tuk lawmmam. Haan tii um nawn loin a sur rero. Tivapi le tivate pawl khal an liam thluh i hmunrawn le tlang hram hmuahhmuah a li khat thluh thlang. Minung tampi cu tlangsang deuhdeuh an pan i an kai. Hramlak um ramsa phunkim khal tlaang saan nak an pan so vivo. Ruahti a kang cuang lo. A nii ni-in a tam siinsiin. Tlang niam deuh pawl cu an pil cuahco thlang. Tipithuanthum ti bangin leilungtlun pumpi`n a li khat denden i tidaai a hung tho i tisuar a hung her awk awn thawng cu, “Ngai, Ngai, Ngai” tiin a thang. Minung tampi cu an pil i an thi. Ramsa tii cawk lo an thi vee. Tlangsang pahnih pakhat te lawng an tang i mi cak deuh le mai umnak ram thawi a nai deuh pawl vial an luat lai hrih. Tidaai cu a thang siinsiin. “Ngai, Ngai, Ngai” ti`n a awn so vivo. Ngai Ṭah tei` nufa khal cu tlang saannak pan cun an feh so ve.

Minung tii cawk lo tlang zimah an tong aw. Tiidaai in le a hun cim so vivo i, Ngai, Ngai, Ngai, ti phahin tlang khal cu a cim pil zik cuahco thlang. Tidaai awn cu Ngai, Ngai, Ngai .. a tii ruangah Ngai Ṭah a ko a si ding an tii i a puante cu tidai sungah an vun thlak. A puante a pil veeten veikhat cu a niam sualso lawk nan a rei hlaanah ahung tam sal i a kai siinsiin. Amah kelah a cang sal. An mang a bang i a korte an thlak sal. Tidai cu a niam sualso laalaa. Asinan a kai so sal thotho i a tam siinsiin. An pil zik duahdo. Ngai Ṭah i thilrii le hnipuan an thlak caanah cun malte sung cu a tum suk ṭheu nan, tawkfangah cun a kai so thotho. A thilrii le hnipuan an thlak thluh. Tidai le a kai sinsin thotho i, “Ngai, Ngai, Ngai” a ti thotho si, mi hmuahhmuah kan thih thluh hnak cun minung pakhat thih cu a ṭha deuh ding an tii i Ngai Ṭah cu thlak an tum. A nuin le a fanu neihsun te a sii ruangah a siang lo. Thih le thih thluh. A fanu neihsun thih hnak cun midang cu an thih thluh hmanah a ziang a poi lo. Asinan Ngai Ṭah nu cu an kaih hrem i a fanu Ngai Ṭah cu a siang lo cing te`n hramhramin an lon hnu ah tilik suar lakah an thlak sak. Ngai Ṭah nu cu a fanute ti sung i a pil zawngah cun, “Ngaite, cikheengah kan tongaw sal leh ding” a tii ta. Cuti`n a nu`n ui cing ṭap cingin Ngai Ṭah cu tipi sungah cun a pil. Ngai Ṭah ti sung i a pil veete cun tilik pi cu a tum sualso vee. A niam sinsin i a kang ta dah. Ngai Ṭah cu ngapi (ngathaisawn) ah a cang an ti. Curuangah ngathaisawn cu minung bangin pianzia a nei i minung hnawi bangin hnawi khal a nei. Minung i sii cang a si ruangah a si an ti.

Ngai Ṭah nu cu a lungleng le a umhar lutukah umngaihnak le nun ngaihnak khal a thei lo. A thinhneemtu bikk le a aipuannak bikk a si ṭheu mi a fanute ngai-in nitin a ṭap a rak ṭheu. Cutiih a ṭahnak i a hnap hnit nak hmuahhmuah cu cikhurah an cang an tii. Kan Lairam i cikhur hmuahhmuah khi Ngai Ṭah nui` hnap a si an tii.

Ngai Ṭah nu cu a lungleng le umhar a tuar nawn lo. Lungleng le umhar in thih a theih si lo. A um ngaihnak thei loah “Thiamtial ka bang ding” a tii. A thiam baannak cu tlang khatin a raal tlang khat lam hmuh ban ceu ah a si i, a bang thei tu an um lo. Vate phunkim an ra suak nan an zuang thleng thei lo. Vapualin ngerhkhat cu a bang thei an tii. Tukhal ah hin kan nu pa pawl cun Ngai Ṭah nui` thiambaannak tlang an tii i Falam peng Conghoih khawlu tlang, leenpi tlangtluan tlang pahnihte sang hlei deuh a um mi khi a si. Cui tlang i tan khaam tluun tlang sang pi khi a khatlam a thiamtlang a si an tii. Mi hrekin Thlantlang peng Farrawn khawlu i Tombuk tlang khi a si an tii. Kan Lai thuanthu ah a phunphunin an rel i mah le ram thwan a naih deuhmi le tlangsang deuh pawl khi Ngai Ṭah nui` thiam tlang ti`n an puh i hmin an sak cio. Hi tilik thuanthu hi  miphun dangdang thuanthu khalah an nei cio. Asinan an sim dan le an reel daan cu a dang cio ding.

Ngai Ṭah nu cu a thin nomnak dingah le a umhar hneemtu dingah khua a ruat rero nan ziang khal a lunghneemtu ding a um thei cuang lo. A umhar cun a vak a tawi vivo. A fanuute ngai cun, tlang i kip le ram i kip a hrawh suak i a mitthli le a canghnap thawn, tlang saannak i kip cun, “Ngaite” ti`n a au nan sawntu le betu an um nawn cuang si lo. A hnap hnitnak i piangin cikhurah an cang vivo i netabikah cun Haka peng Seen Thang ram lamah a thleng. Cui hmunah cun a lungleng cun a thi ta. Amah khal cu cilung ah a cang ta. Seen Thang cikhur ti`n tutiangah hin hminthang zetin a um, Seen Thang cikhur cu lungto i sin a suak mi a si. Cui lungto cu minung pian a keng i nuunau a bang deuh an tii. A citi suahnak khal cu nuunau zahmawhkua i sin a suak tii a si. Hlaan pipu deuh pawl cun kha ti vekin nuunau zahmawhkua i sin citi a hung irhsuak kha mihrek khat cu an hnih a suak ṭheu i a hnihsantu hmuahhmuahin inn an thlen tawkfangah an thi. Thihnak a si an tii. Curuangah Seen Thang ci an er tikah titleer in hlat nawn ah an lak. A putsuaknak kha hmuh ban si nawn hlah she tiinak a si.

Ngai Ṭah cu Ngathaisawn ah a cang. A nu cu cii ah a cang. An nufa in cikhengah an tongaw saal ṭheu. Bible ca sung khalah tilik thuanthu Judah mi pawlin an nei ve. Kan Laimi pawl i sim mi thawn cun a bangaw lo ding. Asinan leilung tluunah hin tilik thu cu a um tii a fiang.

************************************