Thlarau ih hruaimipawl cu daan ih ukmi an si nawn lo (Gal. 5:18).

By: Rev. Amos Thang

“Daan cu thlarau lamih thil a si ti kan thei. Asinan kei cu tisami ka siih sualnak sal si dingah zuarmi ka si” (Rom 7:14).  Hi Bible cang kalh aw zikzik a bang nan daan ih kaihruainak hnuai ih kan um lai ah thihnak leiba nei kan si a lang ter (Rom 3:20). Galati cakuat rengreng hin a tumtah bikmi cu minung daan thlunnak ruangih thiam kan co thei lo zia a simih Pathian zangfahnak lawngin thiamcotermi kan si ti a sim. Daan hi thianghlim hman sehla tisami kan siih sual salih zuarmi kan si ruangah kan mizia thawn a kalh aw a si. Sihmansehla Pathian zangfahnak ruangah daan loin Pathian felnak kan co. Cathianghlim in “Zumnak ruangih Pathian thiamcotermi lawng an nung ding” (Gal. 3:11) a ti ruangah daan thlunakin zohmanin thiamcoter an si lo ding ti a fiang.

Daan hi thlarau lam thil rak si hmansehla tisami, sualpu taksa, sualsalih zuarmi kan hrangah cun, Pathian mizia a simi daan thianghlim cu kan nun thawn a kalh aw lellel. Cuti asinan Pathian in Khrih thihnak hmangin kan sual in ngaithiam ih cui tlunah a mai mizia kan neihsal theinak dingah a thlarau in run pe. Cui thlarau Thianghlim le kan thlarau a peh awk tikah, a mah ih nun thar kan nei. Khrih ih nun Thlarau Thianghlim hmangih kan co hnuah nun pahnih kan nei. Kan pianpi sualpu taksa Pathian in Kross ah in khenbeh sak zo ih, asinan kan mai nun ahcun a Thlarau Thianghlim hmangih nitin kan nunih sual um, do neh ih nun vivo hi Pathian ih tumtahmi a si.

Kan thulu ah Thlarau ih hruaimipawl cu daan ih ukmi an sin nawn lo ti a si. Asile zumtu ka si hnuah daan hi a sual maw si? Sual lo ve. Milai zo vek khal sungnung thlarau nei lo ih minung hlun thaw lawngih daan thluntum tupawl cu, an mahte ramri an ṭhenih minung mithmai ih a ṭhami tiang lawng an tuah. Cupawl nun in Pathian a ti lungawi dah lo. Thlarau ih uk mi pawl cun minung mit hmuh lawngah si lo in an mah ih um Pathian Thlarau duh zawng in an nung sawn. Thlarau ih hruaimi pawl cu Ezk 36:27 ih a sim vekin “nan sungah ka thlarau ka khum dingih ka daan nan thlun thei ding” a ti. Cui Thlarau ih ukmipawl hrangah daan hi, an sunglam nun an mizia diktak ih Pathian pekmi ti a si an thei. A daan in ukloin Thlarau sawnin a uk ih cutin thil pakhat khat an tuah tikah Pathian mithmai zoh in Pathian duhzawngih nun theinak an nei.

Daan ih ukmipawl cu daan hnuaiah tlansuahnak an hawl ih, cuhleiah daan ih umlomi, Bible cangan ih a cekci ih nganlomi cu pawi lo ah an ruat. Ṭimnakah (Kuak fawp hlah, kuva ei hlah, na pumna damnak zu malte in aw) tivek hi sualtuah ngamnak ah an hmang. Thlarau ih ukmipawl cun Pathian fate ih tuah dingih mawi le mawilo tisa daan le Thlarau daan thleidan thiamnak a pekih, cutin Pathian duh zawngin an nung sawn a si. Cumi um zia cu an nun uktu dingah an sung nung Pathian pekmi thlarau duhdan an thlun sawn.