Cibainak cu Amah Runsuaktu!

America ramih thil cang taktak mi asi, Sathahnak cetzung(sakhung) ah Numi(nupinu) pakhat cu hnaṭuan ṭhehzikte inn tlun hlante ah Sahcia mi cawsapawl cu se(uih) lo dingin a tlar ih an thlaimi pindan-dai(air-con room) ah a vung cek fel. Sangkapi cu veilehkhat ah a kharaw aw.Cui sangkapi cu a sunglam ih on theihlo, lenglam lawng ih on theih a si. Pindan-dai ih tahnak khal a hnuailam an thleng ih, a dai zet. Pindan sung ah mei-eng a um fawnlo, thim in a khat.

A nih khal ṭihzet le thinphang in a au. Sangkapi cu a kut thawn a theih tawp in a cum, a hnin, a nam.Asinan, sangkapi hi thir rit-sahzet ih tuahmi asi ruangah lenglam um pawl in an thei theilo. Cuihnu cun, hna ban caan a si ruangah hnaṭuantu zate deuhthaw khal inn an tlung. Anih khal sangkapi cu nam thul, au-kio phah in nazi -1 a reizo, a kut an durh, aw-ceem in a bangzet ruangah pindan-dai phar cu hngohsan phah in a hahcawl.

Nuam te ten a dai zung pawl cun a ruh-cang pawl cu an hit ter. Cun, a taksa sungih hlum-sa khal a tlakniam ruangah a taksa pum cu a cangvai theilo ih phar hngohsan in aum. Kharhkhum ih a um hi nazi -2,3 a rei thlang. A mit an ngau ih meng thei lawn a um. Thil umdan khal thei mu-mallo in aum. A hmai, a hnipuan ah vur in an kawp-kai. Nazi- 5 a rei thlang. Amah ah beiseinak a neih nawnlo ruangah beidawng in aum.Thi ding in a pum a pe aw!

Hi tikcu ah a umnak, pindan sangkapi cu veilehkhat ah a run ong aw. Sangka luhnak ah mi pakhat ih thlam a rung lang. A leng ih eng-tleu ruangah a thimnak a sung lam cun a hmuh fiah theihlo. A mit a vun meng ṭen ṭo ih ngaihsakzet in a vun zoh cu ket kiltu Putar a rak si. Cu cun siizung ih mina phur motor a rung thleng. Nurse pawl in puan in an tuam, leng in an nawr ih siizung ah an hruai, cutin a nung dam.

A dam vivo ih siizung ihsin a suah ah a nunnak rak runsuaktu: ket kiltu Putar cu ziang ruangah pindan-dai sangkapi cu a mai hna si silo, a on saknak san a sut. Putarpa cun hitin a let –

“ Hitawk, sathahnak cetzung ih hna ka ṭuan hi kum-35 a kimzo. Hi cetzung ah nitin hnaṭuan; lut, suaktu pawl hi mi zatel an si.Asinan, zingtin ten I cibai ringringtu hi nangmah thawn mi malte lawng ansi. Mi dang pawl cun ka um le umlo hman an thei lemlo.

Khai zing kha hlan vekin ‘Hello!, Good Morning’ tin i run cibai. Sim lam hnaṭuan ban caan ah nidang ih ka theih ring ringmi ‘ Bye Bye, kan tawngaw sal ding’ ti mi ṭongkam ka theilo. Cunah hnaṭuannak ihsin na tlung hrihlo ti ka thei. Asinan, hnaṭuan caan hleifuan(Over Time) na la ah ka neih ih ka lo seherh lemlo.

Asinan, hnaṭuan ban caan nazi- 3,4 arei tiang na tlung hrih cuanglo tik ah pakhat khat na cang si ko ding ka ti ih ka lo seherh deuh. Cunah cetzung kiangkap ah ka rung lo hawl, ka lo hmuhlo ruangah a netnak ah pindan-dai ka run ong cu ziang thei lawn na rak um”.

Mi thawn nan tawnawk tikah thinlung le thungaithlak in cibai aw. Cuti na ti ruang ah na hrangah zianghman na bang phah cuanglo. Asinan, Ni khat khat ah hi thilcang tak tak vekin cibainak in nangmah lo bawmtu ah asileh lo ding tin na rel thei maw? 

(Source: Thoughts To Share-2)