Khawm Laiah Prophet Tiawtu in John MacArthur Ih Thusim A El Hnuah Pastors Pawl le Bloggers pawl Tel Ve!

Grace Community Church ih John MacArthur ih thuzirhmi ‘cawlhnak thurin’ (doctrine of cessationism) timi thuah mah le mah prophet ti awtu in zirhnak sual a si tiih nasaten khawm lai rori ih a el hnuah pastors, theologians le bloggers pawl tla an tel ve cih.

Gospel Herald pawlih simdan vek asile hi thuthang hi tui thla thawk (August 16) pek hrawngah a siih Sun Valley California kawhhran, MacArthur ih kum 45 lenglo Pathian hna a ṭuannak ah a si tin an sim.

Prophet cun Biakinn sungih hmailam a sannak ah feh tahratin MacArthur cu hitin a va ti. “Thlarau Thianghlim na riahsiat ter a si. Na thurin hi a sual lellel. Thlarau Thianghlim cu a riah a se zo, John MacArthur. Hithu lo sim dingah na hnenah thlah ka si. Nang cu nam na tat hriamih mipipawl cu an mah le mah an sat aw rero”.

Security pawlih an kaih man hlanah a ṭawng cu hitin a peh: “Prophets timi na zum lo asile rak zoh aw. Pathian in thutak na zirhnak ah a lo zangfah. Na thurin cawlhnak (doctrine of cessationism) cu a sual lawlaw, a sual lellel. Na thurin a sual thu lo sim dingah thlahmi ka si. Zumlotu hrangah nan sual sir uh. Pathian Lalram a nai tuk zo. Tikcu tampi nan nein awn lo. Zisu a ra cing ding. Pathian minungpawl Pathian in lo thlawsuah hram seh!

Tikcu malte a rei hnuah MacArthur cun an Pathian biaknak cu a peh salih cupa (lengih an suahpi zomi prophet) thu ah, “A nih kha prophet si sehla khatin a um lo ding” tin a sim.

Cuihnu reilote ah John MacArthur preaching ministry ih Executive Director, Phil Johnson in a facebook ah “Mah le mah prophet ka si ti awtu in Grace Community Churh ih Pathian kan biak lai in ra ti buai” tin  a ngan.

Cui hnuah Evangelical Focus, Pastor le Cangan thiam, Will Graham khalin John MacArthur a diknak thu a sim cih. “Pastor ih zirhnak hi a sual hrimhrim lo. A nih cu thuanthu zawng khalin mi rinum le Pathian mi a siih hivek dodalnak tawng lo sehla a duhum tuk nan” tin a sim.

Graham cun “MarArthur cu Bible le a nupi hnen khalah kum 45 lenglo rinum zet a si. Miin hitivek ih an ti cu mak ka ti. Pathian in fimthiamnak  pe sinsin hramseh. Prophet ka si tiawtu a san dan khal kha ngaisan um za a si" a ti.

Cuvek thotho in Brown khalin mahte prophet tiawtu hin doctrine of cessationism thu ah siloin Pastor MacArthur ih zirnak ah hmuhthiamlomi a nei a si tin a sim.