Selawn Khaw Thuanthu Tawi

Selawn Khua

Zahau Khukhnin fa Thang Hlei hrin Za Ṭhio ih fapa upabik Zamang cu 1850 hrawngah Selawn ah khua a hung kai ih Lal a si. Zamang cu 1940 ah a thi. Za Ṭhio hrin Zamang, Lian Sum le Kip Kual tla an si. Za Mang ih nau Za Ṭhio fapa 3 nak Kip Kual cu vengin khaw kiangah an lal ter. Khaw neitu ih

comi sapa hmuahhmuah cu Kip Kual in veng cawnlam le sakah tikah phel awk dingin an rel. Vawk asile til zum, cu khal cu phel awk dingin an rel. Kip Kual in a veng conlamnak sa tilzum cu a u Za Mang Lal upa deuh cu a phelh duh lo ruangah thu an buai tin Selawn Lal, Ral Lian Ṭhio in a rel. Kip Kual ih nupi cu Zawngte Lal, Run Ceu ih fanu a si. Cutiih thu a buai ruangah a pu lei hnen zawngte ah Van Hnuai Khup san ah an vai.

Za Mang in fa a nei ih Tha Cung Nung, Tha Cung Nung ih fa cu Tai Sut a si. Tai Sut in fa a nei ih Ral Lian Ṭhio, Ral Lian Ṭhio in fa a nei ih Sui Zam Thang a si.

Tai Sut (Khen Tai Lo pa) in Meithai ah khua a toh ih inn 20 hrawng an rak si. Uilawngnak ah Ngawn inn 7 an rak um cucu Ngawn Rawn an rak ti. Meithai ihsin hmunhlun ah khua

an kai an ṭhawn ih inn 40 hrawng an si. Cucu Tai Sut (Khen Tai Lo Pa) ih lal lai a si. Khen Tai Lo pa a thih in Khaw Tin Sawn a lal (Ral Thio Pai Nau). Cuisin Lal an hril ih cinin Ral Ṭhio a lal. Cumi ṭheh hmat-thla lal an hril awkin Pu Than Ṭhio (Sen Ro Sum Pa, cangantu/Ting HLei Thang Pu) a lal. Hmunhlun pi ih kawhhran din hmaisabiktu cu Ṭial Bawi (nunau) hrilhfiah dawngtu, Kap Khuai(pabawl pa), Tawksan pa, Kap Hai Pa, Sa Zam (Tawk Zingpa), Tawk Khuai pawlin kawhhran an din. Selawn ih kawhhran din hmaisatu an si. Pu Than Ṭhio kha ralkap ihsin a hung tlungih Biakinn a sak. Khawlakah titler in ti an la. Ngun Mang pan khuang a cawi (cinkhat a cawi). Kap Hai pa in Se hra vawithum a nei (hminthatnak vawi thum a nei). Hmeithai an um ihsin fangcang a suak hmaisa bik (Lairal tlangah). 

Hmunhlunpi ih umhmaisak laiah Cozah in phunli tlawng a hun pe, Ral Ṭhio ih lal lai a si. Tlawnginn an sak ih Ral Ṭhio in tlawng saya a tuan. Cusin Ral Ṭhio in a sim/zirh paih nawn lo ih leilet Neih Ṭhiang in a sim. Sasawpi rawn rangrawkpi hnuiah tlawnginn an hung sak. Cucu Selawn khua ih tlawng a din hmaisabiknak a si. 

Ral Ṭhio Lal hlun a si ruangah a dungthluntu pawl thawn Sasawrawn ah khua an kai. Pu Than Ṭhio a duhtu pawl cu kumkhat khawhlun ih an um hnuah lungsum ah khua kai dingin an lungkim. Pa Bawl pa , Kap Hai pa, Pu Than Ṭhio le lian Tin Thang khua an hung hal ih zankhat lungsum ah an hung riak. Arcang an keng ih zankhat an riak. An arcang kenmi a khuanglo ih ngaih sia in an tlung. Cuisin khua kan kai lo ding ti’n fa lei hnenah a ti, asinan Fala tlangval in an duhlo ih kan kai thotho ding an ti ih Farṭuah par hnuah khua an kai. Khua an kai ah innsak hmaisa lawn Biakinn an sak hmaisa bik, lei-inn ten lungsum parah an sak. Sasaw rawnih Ral Ṭhio homi pawl cun kum thum nakah Selawn ah an hung fin. Inn 20 – 30 karlak hrawng an si. Kumli nga lai a rei hnuah in sawmruk leh ti an hung si. Tlawngin (phunli tlawng) an sakih cozah ih rangva pekmi thawn an sak. Tlawnginn an sak thluh in bualrawn an lai ih lairal in karkhat a bawm. Tidai cu cozah in a pe ih pipe in tidai an la. Cule khawlak ah Bilat in an dawl.

Caan reinawn hnuah Pu Than Ṭhio cu Ṭalpi ah khua a kai, pu Than Ṭhio, Pu Sen Ro Sum le Phung Sung cu khaw kai hmaisabiktu an si. Bual Kio Nu le Pu Khen Tai Lo cu lungsum ah an um lai. An mah inn hnih te lawng Lungsum ah an rung tang. 

Tui Selawn ih khawm dar khi Pu Than Ṭhio in ralkap a ṭuan lai ih a sarmi a si ih cumi dar cu a tai ah a thlaih ringring phah in ral a do. Cule hitin thla a cam “tluang tei damcak ih ral kan do suak asile biakinn hrangah ka hlu ding” ti’n thla ka cam a ti. Selawn ah khawmtu an um nawn lo ruangah dar cu Tlang Kawi ah a zuarih “selawn khua a ral ta ding asile dar hi Tlang Kawi ah um taseh, a ral lo ding asile dar hi ka nun lai ah Selawn ah ra kir sal seh” a ti ih kumkhat hnuah tlangkawi pawlin an rak pek sal. 

Biakinn sak thawk a si veten Pu Than Ṭhio cun Pathian hnenah a hlan, a ruang zing a si veten thla a cam ih “himi biakinn hi kan saksungih pawntamnak umlo dingin, cuvek sak sungih thubuai a um asile kan biakinn hi a sia tata ding, minung kan um nawn lo kei selawn khua a mang ding” a ti. Cuvek thubuai cu a um lo nan di-ha-thum an cih sungah Khaw San le Hrang Dawn pa an to aw aw. Cuisin inn parin an ṭumih namtawng in an sat aw zik ih Pu Than Ṭhio cu a au ciamco, vawithum Halleluiah tin a au. Naw-alh la tahratin Biakinn cu a uar zik, cule a tai in an kaih ih a ur suak lo, cutin a inn zinzawh in a tin. Kawhhran Upa Khaw San, Pa Sai, Lian Tin Thang, Kap Khuai, Kap Hai Pa pawlin an va lem. Phianghlam suancu zanlam nahzi pathum hranwgah an lem thei ih cutin biakinn di an ra cih salih tutiang Biakinn a ding. 

Lopil
Hmeithai, Uilawngnak, Talpi, Cinghniabuk, Darlut (toek ram), Saihremrawn le Lerhte pawl an si.

Khuangtul ramah tlangthlangta, liansum hmun, tlangsakta, thawngluai sele tlaknak an si. 

Cikhur
Zilpi cikhur, Talpi cikhur

Vun
Cuangtin vun, phiangpi vun, leilinglet vun.

Tiva
Phiangpiva, Zawngekva, Pihuknuilova, thingthupi va, toekva, Saibilcawmva, ramriva, hmeithaiva.

Selawn Khua hi Tipithuanthum (Sea Level) 4000-5000 hrawng a si. Falam hnakin malte a hlum deuh tinak a si.

Ting HLei Thang