Ziangruangah zumtupawl kan tluse ṭheu?

Mizan hnakin tu-ah Pathian thawn nan naih aw deuh maw? A ngaingai te cun mizan hnakin tu-ih Pathian na naih sawn lo asi ahcun tluse rero na si zo. Pathian thawn kan feh, kan um tlang timi cu nikhat hnu nikhat ṭhangso vivo ding kan si nan nikhat hnu nikhat ṭumsuk lam kan pan vivo hi cu riahse za zet a si. Cu tiih kan umnak cu Khrih Zisui’ taksa vekih thleng aw verver kan si hrih lo ih milai taksa le thisen thawi kan um hrih ruangah a si. Cumi cu vanram kan thlen lawngih famkim dingmi a si. Cui caan ahcun sual le sualnakin kan nunah hmunram a nei nawn lo ding. Atu ahcun Pathian ih duhzawng tuah ding le tuah duhnak thinlung in neihtertu hman cu Amah Pathian lala a si. Cui Pathian cun kan duhmi le ka tuah theimi hnakih ṭhasawnin in tuahsak ding.

Hmanseh pakhat khatin Pathian thawn pehparmi thlacam, Bible siar le Biakin feh tvk a paih nawn lo a si ahcun a nun ah check awk sal dingmi a um. Lunglut za zet asivemi cu tlusia asilole dungsip (backslide) timi cafang hi thuthlung thar ah a um lomi hi a si. Thuthlung hlun lawngah a um. Asinan zumtu pakhat Pathian thawn hla aw zetih a um asi ahcun himi cafang hi simfiangnakah a tlinglo tinak cu a si lo.

Minung kan zaten Pathian hnen ihsin tlan ding le tluse dingah man-cia kan si ringring. Cucu ziangruangah tile kan sungih sual ruangah a si. Kan mah kan sual tinak siloin kan mah ah sual a um tinak a si sawn. Curuangah si Zisuh in misual (kan mah) cu in duhdawt tuk nan, kan sungih um sual cu a huat hlehle. Kan mah le in duhdawttuk, kan sungih um sual le a hua tuk. Ṭhimnakah na fapa te cu Cancer natin a na ti bang sehla, cui cancer natnak cun nikhat hnu nikhat na fapa te ih taksa a ei siat vivo tikah a thisen le thazang a cem vivo ih a thizik cuahco. Cuiruangah na fapa ih nunnak siatsuahtu Cancer natnak cu na hua tuk lawmam, asinnan na fapa te cu na lainat ih na duhdawt sinsin vek khi a si.  

Cui thubuai kan mah in duh si, kan sungih sual hua si, mi pakhat kan sisi timi buainak cu Zisu in ziangtin a tuah ding na zum? A nunnak, a thisen le taksa thawn in lei, in hring sal a si cu. Kan nih cu nui thisensuak ih hrinmenmi siloin Zisui thisen suak rori ih Calvari tlangih hrinmi FA kan si. Cucing hmanin kan nih cu dung kan sip, tluse zik rero kan si lai hmanah thlemnak ihsin in run, harsatnak ihsin in bawm, in thianghlim ter, in zangfah ih duhdawtnak sungih in hruai ringring ruangah lungawithu sim ding kan si sawn.

Theihternak: Pathian thutak, Bible thu theihfianglomi, sut duh le relkhawm duh kan neih asile Gmail: jrmting77@gmail.com le Fb: Ting HLei Thang ah peihtlaih theih ringring a si.