Zohman An Famkim Lo

Vawi khatah tlangvalpa in a falanu cu a duh tuk ruangah nupi ah a ṭhit. Neihawknak puai khal ropi zetin an tuah. An rualpi zate le an sungkhat zaten sawm thluh an siih cui neihawknak puaipi cu sunglawi zetih tuah a si. A ra suaktu hmuahhmuah cu nuam le lungawi zetin an um.

Monu cu a mothuam kawr-rang tethawn mawi zetin a umih mopa khal a kawr mawite thawn tuak zetin a ra. Mipipawl cun lungawi zetin "an kaih aw tuk, duhdawtnak taktak khal an mah ah a um rori a si" an ti rero.

Thla hnih thum a rei hnuah an nu cun a pasal hnenah dilnak pakhat a tuah. “Kan dung naite ah kan duhdawtnak a hngetkhoh sinsin theinak dingah Magazine ka siar.

Cucu kan pahnih in ca kan ngan dingih kan pahnih lakih palhnak, buainak, diriamlonak, duhthusampawl tla kan ngan veve ding. Cule kan duhlonak, kan tuahṭul le tuah lo dingpawl tla kan thei aw dingih kan innsang cu hihnakin a nuam sinsin ding”

A pasal cun a lungkimpi. Khan pakhat veve ah an lut ih an buainak le remcanlonak tetepawl tla an ruat fingfing. Cui ca cu lungkim tiang nganih cui hnuah hmuh aw veve dingin an tiam aw.

Zingkhat cu thawhhlam einak ah an canganmipawl hmuh aw thlang sehla ti an rel hnuah an pahnih in an lung a kim veve.

An nu cun ‘kei ka hmai sa ding’ a ti. A cahnah cu a phawrh ih tamtak nganmi a nei. A sangsang ten a ngan thliangthliang ih cahmai 3 cu a khat thlerthler. An nu cun anpa thawi an remcanlonak, a duhlomi le lungkimlomi thu a nganmipawl cu a run siar zutzo ih an pa cu a biangah a mithli a luang.

“Kan pa, ziang na cang” tin a sut. “Ziang hman ka cang lo” tin a let ih “na ca run siar peh hrih aw” a ti. An nu cun a run siar vivo ih caphek hmai thum cu a siar thluh. Felfai ten a ca cu cabuai parah a bilih a ret.

Cule “tucu nangmah can, na ca run siar ve awla na ṭheh le kan canganmipawl thawn pehparin kan relkhawm ding” tin lungawi zetin a sim.

An pa cun awnem zetin, “Kei zianghman ngan ding ka thei lo. Ka hrangah na famkim. Ka hrangah na tling tawk tuk. Tui na umdan vek ciah in ka hrangah um ringring aw. Ka hrangah duh na nung ih na mawi ringring curuangah zianghman na thlengawk ṭulmi ka thei lo” a ti.

An nu cun a pasal ih a duh zia, a lainat zia le a zawi thei ziapawl a hmuh a tikah an pai lam a herih an pa cu a pawm ih a ṭap.

Hram: Knowldgepublisher