MISSIONS LE NANGMAH

               MISSIONS LE NANGMAH

                              Pathian in kan leilungpi ih hna a ṭuan rero mi ah telve aw

Catettu ih Thuhmaihruai

Hi cabute hi kum 2010 ah khan World Mission class ah kan Prof. Dr. Manzano cun cabu zohkirsaknak (Book Review) nei dingah tlawngta in fial. Cutin, a pekah cun a fate fawn siar teh a tlak ding maw si ti ah ka phur tuk lo! Asinan, ka vawn siar ih, bung khat hnu bung khat ka hawn lut thuuk vivo cu ka nun in tham tuk lawm mam ih banhna thiam nawn lo in vawikhat siar ah a bu pum in ka ṭheh lawlaw! Culawng khalah duhtawk loin ka siar sal leuhleuh ih ka nunnakah Pathian ih Thupek Ropi missions hnaṭuan a thupitzia siseh, cuih ṭuanvo cu zutupawl ih liangparah Bawipa in a ṭhumzia siseh, a tharin missions rawngbawlhna kan tharthawh zangzang a ṭulzia pawl ka nunin a theifiang sal.

Aliamcia ih ka missions rawngbawlnak pawl tla mitthlamah rawnglang sal in, hi cabu sung ih thu le hla ka theih thar mipawl hin ka nun i khuai. Kum a liam ih a thar sinsin ti bang in ka thinlung ah hi cabu sungih ka siar mi le hmuhmipawl a thi thei nawn lo. Ka feh sukso nak kipah ka ruat, ka thinlung ah a cam ih a sungthupawl in ka nun in vel. Cutin kan ṭongte rori ih lehsuah ka beisei. Cutin, angantu Dr. Larry Caldwell ih hnenah siannak (permission) ka dil ih cutin amai remtinak le siannak thawn lehlin hna ka thawk.

Kan can neih mi ka zoh tikah full time tlawngta ti cu ka ca le a tamtuk fawn ziangtin ka ti pei aw ti ah ka khawruah a har zet. Asinan, Pathian hnenah cahnak huham dil in thla ka cam. Can fumfe zeh pe ih thla ziang maw tizat ka heng hnu ah Ka nupi Mary Chin ih thazang peknak le ruallepawl ih thlacamsaknak thawn ka ṭhehsuak thei ngerngo.

A namsuahnak sumpai thuhla ah ka dawn a har lawk! Asinan, Pathian rinumnak cun a tikcu khelte ah a ṭhabik in rem in ruatsak ih cutin ka namsuak thei sal.

Cule, ṭongfang remsual, catluang remlo le tisual aum lonak dingah tin duhsaknak thawi zohfelhna in bawmtu Salai……………. Pawl tlunah ka lungawinak ka tarlang fawn.

Cun, a cabu kawm mawi zetih in remsaktu Salai/Pu …………………………hnenah lungawinak simcawk lo ka nei. Amai fimnak le thiamnak tello cun hitluk cabu kawmmawi hi cangsuak thei lo rori mi a si! Duhsatnak thawi theitawp in suahpi mi parah ka lungawinak ka nawlhsal duh.

Anetabikah, hi cabute lei ih a siartu zate hnenah lungawithu ka sim ih, Pathian ih thinlung, a sehermi le vei bikmi Missions rawngbawlnak ah taimak suahih a teltu nan si cio theinak dingah Pathian in lo thlawsuah cio hram seh.

Henry vl Hmangaih

Thuhmaihruai

Hi cabu fate hi a hmaisabik namsuah a si ihsi kum hleinga hnu lawngah a vawihnih namnak tuahsal theih in a rawng um.  Hitawk cahmai sungih thu le hla um mipawl tla kum ziang maw tizat sung missionarypawl le a thlahsuaktupawl nunram, a hleicein ramthim a nawrtupawl le a takih ramthim rawngbawlnak hrang hma a tuangtupawl bawmtu ah hman in a um ti ka theih tikah ka lungawinak a zual. Hi cabu ih thuken mi cu tluangtlam te a si nan a hmansuahnak lam hrang ve thungah cun kan zate hrangah thuukzet le ṭhathnempinak tlak thuhla ṭha tampi a keng.

Kum hleinga sung mission hnaṭuannak le kan leilungpi ih thil thleng mi kan zoh asilen, thil her danglam aw mi tampi kan hmu thei. Cupawl lakih a hleice mipawl pali ka tarlang ding. Ahmaisabik ih thlengaw danglam mi cu Western missionary a silo mipawl missionary ding ih ramthim luhhnawhtu an pung in an tam sinsin. Hi thu hi thu phurumza le lungawiza ngaingai a si.  Asinan, cuti ti tikah Western missionarypawl kan ṭul nawn lo ti ai lawngte cu a si lo ti kan theih a ṭul. Ziangpawl ti um lo le, khawitawk minung kan si ti um lole khawitawk ram ih piang kan si ti thleidan um cuang loin zumtu a si ta pohpoh cun hi Thupek Ropi phurhsuahnak ṭuanvo hi bangran in kan nei thluh.  Amahlawngte, western missionarypawl hin ramthim nawrnak ah  ṭuanvo thupituk cu an nei ti tuini khalah a lang fiang thotho lai. Cui, an ṭuanvo cu thei in western missionarypawl khalin anmai hna cu an ṭuan rero.

Apahnihnak ih thlengdanglamaw mi kan hmuh saal mi cu Evangelical ( thuthangṭha sim a uartu) a ti aw mi sung khalah inclusivism (sakhaw dang thawn khal kan bang aw sawhsawh ko lo maw) ti mi pawmnak le cohlannak sang zet hi a si. Tawiten kan sim fiang asilen cu, inclusivism ti mi ih sullam cu Vanram kainak ding hrangah lamzin tampi a um ti ruahnak (idea)  a si ih cumi ah Khristianpawl lawng Vanram kai ding an si lo, Khristiannak cu lamzin tampi a um mi lak ih pakhat men a si ti ai a si. Minung lam hmuhdan cun, incluclusivismpawl ih hmuhdan a dik a si ti ih zum cu thil hahdam zet a si men thei. Zo si Muslimpawl siseh, Hindupawl siseh, Buddhistpawl siseh kanmah pawl thawi Vanram ah hmuh ding a duh lo tu um ding? Asinan, thu ngaingai a si mi cu cuvek ruahnak sual zatekai lungput (inclusivistic thinking) neihnak cun thuthangṭha phuansuah a ṭulzia a nepter ih hleiah kan Khristian kekarnak le rawngbawlnak ṭhuanawp ko in in tuah.  Cuvek zatekai lungput sual kan neihnak cun missionary thlasuah a ṭulnak khal kha zumtu pumpaak nun le kawhhran khalah a thi ter.  Asinan, kan Bible cun fiangten Vanram kainak lamzin cu pakhat lawng a um ti’n in sim ih cuihleiah cui zin a um mi sun cu fapa neihsun, Jesu Khrih fehtlang lawng in a si ti ah a ti.  Hi Bible, Pathian thutak ih zirhdan hi kan hlohsan a si ah cun thuthangṭha ih a hrampi le sinak kan hloh fithla riai tinak a si.

Apathumnak ih thlengaw mi kan hmuh thei leh mi cu Evangelicals ( Thuthangṭha sim uartupawl )  lakah “ vantlang lole khawtlang nun”  remṭhat uarnak: khawtlang nun ṭhansoh ter le thianfai, hriselnak lam thupitter ti le a dangdang pawl a si.  Ahman, thuthangṭha timi cu thu le tuahnak a pahnih in a kawp aw.  Tuahnak tello cun thuthangṭha cu a famkim thei lo. Cuvek thotho in, tuahnak thuthlangṭha (Gospel of deeds) cu thutak phuansuahnak (proclamation of the word) tello cun thuthangṭha a si thei lo hulhual lala.  Ziangtin si mipawl cu an pum puar kiarkiar in cawm hman nung la thuthangṭha phuansuah mi ngaithlaaknak caanṭha an neih lo ah cun an hrangah thuthangṭha kan phuansuah mi kha ziangtin an ṭhathnempi thei ding?  An lei taksa cu puar le tlai in kan cawm tla a si men thei, asinan an lei nunnak a cem le veten Khrih umpilonak hmun kumkhua Meilipi a si mi ah an feh thotho ding. Curuangah, Thuthangṭha phuannak le tuahnak hi, ramthim kan nawr tikah rawngbawlnak cak nei thei ding cun an thupi zet ti kan cin ringring a ṭul.

Apalinak ih tlengawknak a si mi cu zumlotu lole Pathian theilotu kan leilungpi ah an karh ciamco hi a si.  Leitlun mipum ṭhansohnak ruangah, thuthangṭha ih a palban hrih lo mi mipum 2.3 billion ihsin kum hleinga sungah 3 billion rori tuini ah an pung. Asinan, thuthangṭha thlen ban hrihlonak hmun le ram ih missionary a ṭuan tupawl cu mipum ah anmah kel lawng an si ringring lai. Hi thudik le fiangfel a si mi hin ziangvek suanlam kan neih ah maw, kan ṭongsuak a si khalah mission hnaṭuan can a cem hrih lo, missionarypawl ih hnaṭuan can a um lai, mission hnaṭuan hi kan ṭultuk lai a si ti in theihter sal. Tuisun ah mission hnaṭuan hi a thi hrih lo a si. Thupek Ropi kan thlun a si ah cun tuini ah lohtheihlo in missionary tampi kan leilungpi in a ṭul hrih a si.

Curuangah si, hi cabute “Missions le Nangmah” khal hi pehzawm in kan ṭul hrih nak san.  Missions hnaṭuannak thu thawi pehparaw in na hrangih Pathian in ṭuanvo a lo pekmi na ruahnak le na sawnkirsalnak thawn Pathian in lo thlawsuah hram seh.

                                    BUNG 1 NAK

                         ZIANGRUANGAH NA TELVE A ṬUL?

ASI, ZIANGRUANGAH NA TELVE A ṬUL?

Hnaṭuan ṭheh in a um zo ko lo maw si ?

Kawhhran hi hmun tinkim ah a um thluh tlang in a lang. Cutiasilo hmanah hi thu hi leitlun ih ram tamsawn ah cun tuini ah a dik ding. Asinan, cuti kawhhran hmuntin ih a um ti tikah Jesu’i thupek, Thupek Ropi ti ih kan theih mi, “ feh uh la miphun hmuahhmuah kha ka dungthluntu ah va tuah uh” ( Matt. 28:19-20) a ti mi kha a famkim zo tinak a si maw?  Hnaṭuan in fialmi hi ṭheh in a um zo taktak maw? Khristianpawl hin daitlang zet, nuamsa zet le kutbawm ih zau huahi phahin Jesu’i ratsannak kan hngak men ding maw si?

Si lamlam lo! Atu hi cawlh huahhi caan a si tin na ruat a si ah cun na hrangah thuthang sia lo sim ding ka nei. Hnaṭuan fialmi kha ṭheh in a um hrih lo, hnaṭuan ding ṭuanvo kha a cem hrih lo. Bawipai hrang ramlak ding a tampi lai. Jesu’i thupek, “ feh ula, mi phun hmuahhmuah dungthluntu ah va tuah uh” ti mi hi nungdam ih a umtu tuini ih Khristian zate hrangah hi a nung lai a si.

A taktak ih a cang mipawl thuhla

A taktak ih a cangmi thuhla hrekkhat kan zoh tlang hnik pei. Tuini kan leilungpi ah hin mipum billion 7 lai kan um.[1] Cumi cu, nambat thawn kan ngan a silen cu 7,000,000,000!  zat a si. Hi mipum billion 7 sungah hin minung ziangzat ha Khristian si ding? Cui Christian sung hmanah cun a hmin menih Khritian silo mi piangthar felfel kan vawn hawl a si ah cun ziangzat tak si pei maw?  Hnaṭuan fialmi kha ṭheh ih a um zikte ah cun billion 7 pawl hi an zate zikzik in Kristian an si ding tin kan zum ke. Asinan, riatsiatzain , cui kan zumhmang vek cu a si riai lo.  Ahnuai ih mipum zohfelnak hi vawn zoh aw[2]:

Ziangruagah saw mipum zohfelnak a zate ih sin maltete ih hiti kan zohfel a ṭulnak san? Ahmaisabikah, khawimi si ṭhen fate bik ti khi theih tum aw. Fiangten zumtu, mi piangthar felfel lole Baibal zum ih Khrih a thluntu umnak ti a lang mai.  Azate kawm in million 700 hrawng hrang lawng an si cu teh! ( Cuhnakih tam sawn le tumsawn hmun ram luah dingih na beisei a si ah cun a pawi ka ti zet, cu zat lawng a si ta aw!)

            Tu-ah a dang ṭhen hrantete kha vawn zohsal aw.  Billion 1.4 lai tla cu a hmin men ih Kristian, thlarau lam ih ṭhangphawknak neih ṭul mi an si.  Hipawl hi Kristian ka si ti ih a ko aw 

---

[1] A tufang 2011 ih leitlun mipum tahnak neihmi thu hla ah kan leilung pumpi ah hin mipum billion 7 hrawng kan um tin an ṭuat.                

[2]  Hitawk ih mipum zat le tehnak phunphun pawl hi Joshua project i ta laak a si. An website cu www.joshuaproject.net ah hmuh theih in a um. Hitawk ih mipum tahnakpawl hi kum 2011 ih mipum siarnak thawi mil ih tuah mi a si. 

tu le Biakinn ih khawm ve ṭheu asinan Pathian le  missions hnaṭuannak hrangih alhsuak dah lo le thathawh ve lo pawl an si.

            A dang kan ṭhen tete kan zohsal a silen billion 2.1 minung pawl cu Kristian si hrih lo , asinan hrekkhat tualsung kawhhranpawl in Jesu’i rundamnak thuthangṭha an ausuahpi a si ah cun thuthangṭha theih bannak hmun ah an um.  An lakih mi hrekkhat tla cun Rundamnak thuthangṭha khal vawitam tak an thei zo, asinan an zum duh lo ih thuthangṭha kha an hnawl.

            Anetabik phuaih hi kan ṭhen mipawl sungah cun a tumbik le hmun luahkau bik an si.  Hi pawl cu pumpak ih thuthangṭha a theih ih theih hrih lo lawlaw le, thuthangṭha ih a thlenban hrihlonak hmuh, Khristian hrekkhat an hnenah an feh ih an sim lo a si ah cun ziangti kawngzawng khalih thei dah lo ding pawl an si.  Hi phuaih pawl hi thuthangṭha a hnawl ih theih duhlo pawl an si lo, cuhnakin Pathian thu an hnenah phuansuah in a tir ihsin tu tiang a um lo lawlaw sawn a si.  Thuthangṭha thawn pehzawmawknak le hmeltheihawknak an nei hrih lo lawlaw . Ruat hman, Billion 2.8 tluk rori pumpak thuthangṭha thei hrih lo , a sah ih sah bepbep an um a si cu! Unau, na theifiang maw? Mipum Billion 2,800,000,000 tuini ah thuthangṭha a theih ih thei dah lo ding mi Kristian nang le kei in fehsuak ih kan sim lo a si ah cun hi kan leilung pumpi ah an um a si. A tlunih kan ṭhenhran mi tete khi ngunngaih zetin zohsal aw la, hrekkhat ṭhen hran ih a um mipawl cu na ruahnak hnakih tum an si ding ka zum.  Hi thu hi ngun ngaih tak ih ruahtlak a si na ti ve lo maw?

Thu ngaingai a si

Mipum tahnak kan ṭhenhran mitete in na thinlung a lo re theihter tuk lo hram ka beisei, thlarau lamih vei le seherhnak a si ceng lo ah cun. A hman, angaingai tei kan ti ah cun,  Zumtupawl ih thinlung sungah hitluk ih thungai thil cang rero mi kan hmuh hnu cun zianghman tuah le ti tumlo ih nguisan men ding cu kan um ka zum lo:  Billion 3 zikzik tlukih tam leitlun mipum in thuthangṭha an theilo lole Amah Jesuh cohlang ding le hnawng dingin fumfe in thuthangṭha an ngaingah hrih lo a si cu.

            “Ṭhum deuh aw, hi kan leilungpi ah hin a thei hrih lotu tuini ah an um ngaingai ke maw?” ti ah hrekkhat cun nan ti ding.  Hi thusuhnak ciahciah hi kei khal a liamcia kum ziangmaw tizat,  ka nupi thawi People’s Republic of China, phunsangtlawng ih zirh ding ih kan feh hlan tiang ka rak sut ve. Cuikum cu 1982 kum a si ih China in khawthlanglam (West) ram ih a umpawl hrang an ram luh a sian pek te kha a si.  Kan khaan sungah cun Tuluk tlawngta nauhak cathiam le fim zetzet kan nei hai.  Cutlukih fim le cathiam e ti lo cun, an lakih tlawngta tamsawn cun vawikhat hman Pathian, Jesu lole Bible ti mi an thei hrih lo. A ngaingai a si mi cu, an lakih a tamsawn cun Jesu hnakin Santa Claus thuhla an thei bel sawn! Cuisi cun, hi kan leilungpi ah hin vawikhat te hman thei hrihlo pumpak tuini ah an um lai kem ti cu suh ṭul lo thil fiang feltuk mi a si ti ka theisuak ih cuithusuhnak cu suhṭul ah ka ruat nawn lo.   Rinhleihrualloin, Billion 3 zikzik lai cu pumpak in hi Tuluk tlawngtapawl vekih a theih hrih lo minung an um ti ka fiang.

            Billion 3 tluktluk cu a tamtuk a bang lo maw? Asi, a tamtuk ngai lo ziang.  Asinan, thulungawi um za a si mi cu hi mipum billion 3 pawl hi thuthangṭha thawn kan nawr a si ah cun  thil cang thei mi hna a si. Ziangruangah a cang thei? Asancu, pumpaak billion 3 pawl hi a tlun ih kan rak zoh zomi mipum ṭhen tete sungah mi 7000 cio in khai a pumpi ṭhen khawm sungah khan an um ve.  Mipum 7000 hnenih thuthangṭha thlen ding cu mipum billion 3 hnenih thlen hnak cun nasa zetin a awlsam sawn ding. Si lo maw? Asinan, ziangsi cuih mibuur umkhawm pawl cu?

Mibuur umkhawm pawl ( people groups)

            Mibuur umkhawm pawl ti ih sullam cu pumpak pakhat cio midang thawn a bang aw lo mi si hman sehla, ṭong le nunphung a tawm aw mi, vanthlang le sumdawn leilawnnak pakhat sung ih a tlangleng khawmpawl tinak a si. Ṭongdangin kan sim asilen, cui pumpak pakhat cio cun ṭong pakhat an  hman tlang le, nunphung pakhat sungih an um tlang a si ah cun mibuurpi pakhat sungih umkhawm kan ti thei. Cuvek mibuur umkhawmpawl cu an ṭong le nunphung ihsin theih an awl bik. Amahlawngte, mibuur ṭong khat hmang an si hmanah thuthangṭha cupawl hnenih thlen ding cun fimkhur, uluk le ruahhman fel ( strategy) ṭha tak thawi nawr an ṭul ding.

            Ṭhimnakah, Tagalog hi mi tambik, manila khawsung ih a um mi, Philippinespawl ih tappi ṭong a si.  Asinan, cuti ti ruangah Tagalog a hmangtu hmuahhmuah kha an bang aw thluh tinak a si lo. Tagalog tappi ṭong ih a hmangtu sung rori hmanah sumdawnnak thutawn siseh, eihawlnak le nuntu khawsak dan ah thlauhawknak nasa ngaingai a um. Manila khawsung ih a umtu pawl lak rori hmanah hrekkhat cu milian sungkua ( upper classes or rich classes) , hrekkhat cu a lailak ( middle classes) an um cun mi thawng tampi cu farah taiten ih vakvai, inn le lo ṭhiṭha khal nei lo mi farah ( low classes or poor classes ) an si.  Sumpai leilawnnak le nuntu khawsaknak thlauhawk tuk ruangah Tagalog ṭong pakhat hmang an si hmanah anmai sung ih mibuur fatete ( sub-groups) um pawl cu fiangten kan theithei.  Hi mibuur fatete pawl hnenih thuthangṭha hmuarnei zetih sim le kenglut ding cun missions hnaṭuan dan  a phunphun( different strategies) kan kenluh thiam a thupi zet ding.

            Leilung tlun pumpi zoh le zingzawi tikah mi hrekkhat 16,750 hrawng hi cu mibuur fatete ih umpawl an si ding ti ih ṭuat a si. An lakih mibuur 9,800 hrawng hnenah hi cun Jesu Khrih rundamnak thuthangṭha hi sim zo tluk ih ṭuat asilolen cupawl cu thuthangṭha thawi hruai theih ding ih ruah mi an si. Amahlawngtecu, cuti a va si hmanah mibuur fatete 6,950 pawl cu thuthangṭha ih thlenban lonak ram le hmun ih vakvai pawl an si lai.

Thuthangṭha thlenbanlonak mibuur fatetepawl

Ziangmi bikin si mibuur fatete ih umpawl kha thuthangṭha thlenbanlonak ih tuah? Hitawkah a simfiangnak malte kan zohtlang ta pei:

            Thuthangṭha thlenbanlonak  mibuur fatetepawl ti umzia cu mibuur fatete ih a um pawl, a lenglam mipawl ( cross-cultural)  ih bawmnak le ṭanpinak tello ih mahte tualsung zumtu umkhawm pawl an maltuk ruangah siseh, thuthangṭha an hnenih an thlennak ding hmanrua ( resources) a maltuk ruangih anmai mipipawl hnenih thuthangṭha thlen thei lo tinak a si.

            Hi hrilhfiahnak hi kan vawn zohfelsal hnik ding. Hmun pahnih thu fiangten a rellang. Apakhatnak, mibuur fatete ih a umpawl khan zumtu Khristian an neilo asilolen, mi malte kutzung khiah tham fang an si ah cun, cui mibuur fatetepawl cu thuthangṭha ih ram nawr hrih lo mi an si ti theih a si. Apahnihnakah, cui mibuur fatete sungah cun Khristian ziangmaw zat an um, cun kawhhran khal an um, asinan, cui Khristian le kawhhran a umsunpawl khal cu a lenglam  mission board pakhatkhat ih bawmnak le ṭanpinak tello cun thuthangṭha hmuar nei zetin an ausuahpi thei lo a si ah cun cupawl khal cu thuthangṭha ih ram nawr hrihlo mi ti an theih a si.  Palbanlomi mibuur fatetepawl hi darhzai zetin an um. Hrekkhat cu mipum millions leng (Afghanistan le Iran ih mipum million 4 lenglo an um vek le, Cambodia ram sungih Milliion 12) umpawl tivek tla an si thei. Khatlamah, hrekkhat cu a thawng tivek ih um (Nissan hmun Papua New Guinea ih mipum 7,000 tivek le, Adbas ti mi Nepal ih tlang leng mipum 7,000 ) tla an si.

Tahṭhimnak thawn kan zoh sal ding

Turkey ramsungah hin mibuur umkhawm, Dimli Kurds ti ih theih mipawl an um ih an tamlam cu million khat lenglo hrawng an si.  Hi Muslim Kurdish mibuur umkhawmpawl hin Turkey khawsaklam  sirte hi an luah.  An umnak hmunhma a ṭhat lole lungto khawrawk tuk hmun a si ruangah, Dimli khaw 100 lenglopawl cu Motor zin khal in a thlengban hrih lo. Cui Dimli Kurds ih a ummipawl khal cu sakhuannak zohman pehtlaih loin a hranten an um. An zaten “ Alevi Sect” ti mi Islam sakhua a thluntu le an biakmi sakhua hrangih mi hraatkhawkheng pawl an si. Cuti a hrante ih Muslim sakhua a betu um an si ruangah,  Turkey ramsung ih Muslim dang Kurds Muslim le Sunni Muslim tidan thluntupawl cun Dimli Muslimpawl cu fehsual an si ti ah an hmu. Cuvek thothoin, Turkish rampi a cozah khalin hipawl hi a hmuh sual phah ve.

Cupawl hmuahmuah ihsi fiangtei a rawng lang mi cu: Dimli zumtupawl hi minung malte, kukzung khiah tham lawng, an mipipawl an sakhua biaknak zirh neih tham le hruaitham an um lo tinak a si. Cutiasiruangah, Million khat lai a si mi Dimli Kurdspawl cu palban lo ih um mibuur fatete an si ti ah an ruat.  Hi Dimli mibuur pumpi hnenih an zumnak thehdarh ding cun, anmah sungah Dimli zumtu ziangmawzat lole kawhhran anmai miphunpi hnenih thusimtu ding an um tiang a lenglampawl ih bawm le ṭanpi an ṭul.

Balpanlomi mibuur fatete ih um mipawl cu thuthangṭha thawi palpawh mi mibuur fatete an si theinak dingah cun Khristian zumtu a sicia mi, mibuur fatetepawl in an hnenih thuthangṭha kan va aupi le fehsuahnak lawngin a cang thei mi a si.           Himi hi cing ringring aw:

Hi 6,950 balbanlomi leitlunih mibuur fatetepawl hi ṭhenli ah a hlawmpi in kan ṭhen thei ding:

            Muslim ( mibuur fatete 3,450 hrawng)

            Hindu (mibuur fatete 2,500 hrawng)

            Buddish (mibuur fatete 650 hrawng)

            Tulukpawl (Mibuur fatete 350 hrawng)

Hi mibuur fatete palipawl zindang zawngih zohdan cu a hnuaiih ṭhenhran fatete vek hin a si.

Mission thuhla a theifiangtupawl (experts) le mission pawlkawm( organizations) ziangmaw zatin cipciar zetin mibuur fatete palbanlo mipawl in simfiang zo. [1] Atufang kan ṭulmi cu ziang a siding tilen pum a pe aw mi zumtu pumpak le mibuur anmahpawl hnenih thuthangṭha phurtu ding kan ṭul.

Palbanlomi mibuur fatetepawl le 10/40 tukverh

Asilen, cuti mibuur fatete 6,950 lenglo lai palbanlomi tuini ah an um na ti si khawh, cupawl cu khawitawk hmunah saw an um hai? ti in na sut a si men thei. Thusuhnak ṭhazet a si. A ngaingaitei kan sim a si ah cun cui palbanlomi minungpawl cu leitlun killi ih khawpi tum deuhdeuh tinkim sungah  mal tete in an zaar darhaw aw. Ṭhimnakah,  Leitlun killi ihsi USA rampi sungih tlawngta a ra mipawl hmuahhmuah deuhthaw hi balbanlomi mibuur umkhawm mi sungih ta an si hai ih cupawl tla cu United States ih phunsang tlawng hmun ziangmawzat ah le leiltlun ram cangkang ih phunsang tlawng pawlah le cui an campus sungpawlah hmuh ding in an

---

[1] Bungruknak ih palbanhrihlomi mibuur fatetepawl umnak hmin a tarlanmipawl kha thuuksin theifiang dingah an websitepawl thawn zingzawi bet aw. 

 um hai.  Anmai khua le ram ih an umlai hnakin cui tlawnginn kulhsung ih an umlaiah an hnenih thuthangṭha sim cu nasa ngaingai in a awlsam cuang.  Pakistan Muslim nurse hrekkhat mipum 100 lenglo hi Middle East hmunah hnaṭuan in an um.  Cui Muslim nursepawl cu Paskistan ramsung ih nurse umpawl hnakin an thinlung sangka an awng aw sawn ih an hnenih thuthangṭha sim khal a awlsam cuang.  Manila khawpi sungah hin Indian Hindupawl hi thawng siar hnahih tam an um. Los Angelese tlawngtapawl lakah hin ṭong ci dangdang 100 lenglo hmang an um hai ih, cupawl lakih pumpak 10,000 hnakih mallo cu leitlun ih mibuur fatete kan simmi lakih ta kha an si.  Aneetnakah:

Mibuur fatete paltlang hrilomipawl palpawh thei ding ih ruahnak cu tuini ih mibuur 6,950 lenglo palban hrihlopawl umnak kha leilung ram hmunkhat kan theih larnak bik cun “ 10/40 tukverh” ti mi hmun ih umkhawm an si biik ruangah, anmahpawl hnenih thuthangṭha phurhsuah dan khal cu remruah le ruahman a zangkhai phah ngaingai.

Tukverh 10/40 ti mi cu hmun le ram 10° ( Degrees 10) saklam le 40° (Degrees 40) equator saklam karlak hrawngih um a si ruangah “ Turkverh 10/40”  ti ih kawh a si nak san a si. Hi Area pawl hin Western Africa ihsin Middle East le Asia pawl tiang a huap.  Leitlun ih thuthangṭha simnak le ausuahpinak hmun malbik pawl cu hi pawl ramsung a silolen a kiangkap ram Turkverh 10/40 kan ti mi pawl sungah a lut.  Leitlun ih thuthangṭha thawi palpawh lomibik, Muslim mi tambik pawl siseh, Hindu mi tambik pawl siseh, Buddhists mitambik pawl cu hi ram le bial sungih a umtupawl an si. A hnuaiih ram lm hin cui ram leilung sungih umpawl cu tukverhte hmangin fiangten in hmuh.

Zolepawl ha cui mibuur paltlang hrihlopawl cu an si ti kan theihlawng siloin tu ah cun khawitawk hmunah si tambik an um ti khal kan thei cih thei tlang. A si, cubang ih mibuur fatete umpawl cu kan thlahthlam thei hrimhrim lo ding, hrekhat cu an ram ih zirlo ruangah le an dinhmun in a pek lo ruangah cutawk hmun tukverh 10/40 karlakih a um mi an si. Kan thinlung sungte ah Turverh 10/40 ti mi in bawmtu tawngfang(key) vekin kan mang ringring pei. Cupawl ramsung ih hnaṭuan dingah tlinnak- sehhran hleice mi (sacred) tivek si maw, “ a hleice ih cungcuang” lole “ thlarau mi hleice” an si a ṭul tivek Bible ah a um lo. A fiangzetmi sawn cu, tuini ih Khristian kan zaten cui hmun le ram ih u le naupawl runsuak dingah missions ṭuanvo in in hngak cio a si. Thuthangṭha thawi palban hrih lo mi mibuur fatete 6,950 lenglo pawl hnenih thuthangṭha phurh luh ding hi kan liangpar ih ṭhum aw mi a si.

Atu khalah Jesu in a tirhthlahpawl hnenih Thupek Ropi ṭuansuah ding hna sunglawizet a fialmi kha ṭheh a si hrihlo, ṭuan dingmi, ramlak ding tampi a um lai. Hi thu na theih mi hin na lungthin a lo tham ve ka beisei. Asiartu mipi lakih mi hrekkhat cun “  Mibuur fatete ti lole palban hrihlomi mibuur fatetepawl vawn ti cun ngai a nuam zet a bang, nan Bible in in zirhdan vek a si ngaingai maw?” tin na ti mei thei.  Cukhal cu thusuhnak dang ṭha zet um thei mi a si.  Asilen hi mibuur um khawm pawl hin tulai ih thilthar hmuhsuahmi pawl thuhla lawnglawng hi an ruat ti mi lungput neih maw lole hi mibuur umkhawmpawl hi Pathian thinlung sungah kumkhua in an cam, a sehherh le vei zetmi an si ti sawn lungput ih neih a ṭha deuh ding?

A sungthu Bihciannak

Tukverh 10/40 sungih naute piang le a thi mipawl

Kan hmuh le zohzo vekin leitlun pumpi ih palbanlomi mibuurpawl cu Tukverh 10/40 sung le kiangkap ram pawl an si. Na thu cu ka thei lo, asinan kei cu hitluk mitam million tel pipi pawl hi tukverh 10/40 sungah an um ti ka theih mi hin umnuam lo ko in in tuah. Kei ih hrangah cun hi tukverh pawl zoh hin a sungah ziangzat minung an um ti mi nitin a thi le a piang mi siar hnakin a awl deuh.

            Nitinten punghman in naute 140,000 hizat hrawng hi Tukverh 10/40 ih ummi pawl ramah hin an piang. Cuti a si ah cun, nahzi pakhat sungah naute thar 6,000 tluk piang vek an si. Minute tinah naute 100 hrawng piang in, second tinte ah naute pahnih hrawng piang tluk an si.

            Cun, khatlam vethung kan zohsal a silen, nitin ten mipum 58,000 hrawng hi Turverh 10/40 ram ih ummipawl lakah an thi.  Cun, hi mi hi kan theih ringring a ṭul, cu tawk rambial le kulhsung ih a thitupawl cu vawikhat te hman Jesu’i rundamnak thuthangṭha thei hrih lo ih a ti hlir deuh thaw an si. Cumi ih sullam cu:

              Nahzi tinten mipum 2,400 Tukverh 10/40 ramsung ih umpawl cu Khrih tello in an thi rero ti ai a si. Minute khat ah minung 40 zel thi in , second khat ah minung pakhat zel Khrih thei lo in an ti tinak a si.

Hi catlang siar ding ih na timlam awk rero sungte hmanah hin mi panga (5) lai an thi zo ih, kumkhua in an hloral lanta ding. Cumi rualin, naute minung hleiruk (16) an piang ih , a reihlan ih thuthangṭha sim theih ṭul mi an si.

            Cuti a siruangah, Mathai 28:19 ih Jesui thupek mi hi a famkim ṭheh zo kan ti thei ding maw?  

Ruahkhawm dingmi thusuhnak

1.      Na Bible la aw la Jesui Thupek Ropi Matthai 28:16-20 kha siar aw. Jesu in Thupek Ropi (maksak) kha kumzabi pakhatnak sanlai ih a dungthluntu hmaisabikpawl hnen lawngah si maw a pek? Lole kumkhua in leitlung ih a dungthluntu mipipawl hmuahhmuah hnenah?   Thupek Ropi cu kan zate hrangah a si ah cun, cu mi cu ziangtin si na pumpak hrangah teh na lak ve ding?

2.      Nan ram sungah lole na umnak khawpi sungah mi pakhat khat thuthangṭha palban hrihlonak hmun ih a um mi mibuur pawl lak ihsi um le tlang leng an um maw?  Anmahpawl hnenih thuthangṭha ausuahpi dingah na pumpak le kawhhran in ziangtin hma nan la ding?

3.      An dam sungah vawikhat te khal Jesu Khrih ih rundamnak thuthangṭha theihnak can nei lo in minute tinah mipum 25 an thi si khawh, ziangtin cui thu na theihtikah na um?  Cuivekih thil atak ih cang rero mi cu ziangtin ha na ti ding?

BUNG 2 NAK

        MIPHUN DANGDANG: PATHIAN THINLUNG SUNGAH AN UM RINGRING

“ Hi mi hnuah ka hun zoh ih, ngaihnik, zohman ih siarcawklo mi burpi ka hmu. Cui mi burpi cu phunkip, hrinkip, mikip le ṭongkip ihsi a ra mi an si” (Thup. 7:9)

PATHIAN IN AN ZAWN A RUAT NGAINGAI MAW?

Khristian hmaisapawl khan an ṭuanvo an tuah!

            Bung hmaisa ih tehnak kan rak zohzo mi ihsin tuini ah leitlunah miphun buur tampi kan um timi fiangten kan thei zo. A ngaingai ih kan ti asilen cu, 16,750 hnakih tam sawn hi an zate cun an tling ding. Thuthang duhnungza, theih cakum zet mi cu a liamcia mi kum 2000 kulhsung ih a ummi Kristianpawl khan Jesu’i hnen ihsi an ngahmi an ṭuanvo, a dungthluntupawl hnenih a rak pek mi Thupek Ropi kha taimazetin an rak phursuak. Na ciing ringring ko ti Jesu’i thupek, “ feh ula miphun hmuahhmuah dungthluntu ah va tuah uh” ti kha?  Pathian ih umpinak le lam hruainak hnuaiah dungthluntupawl  le zumtu hmaisapawl khan rinum zetin Jesu’i thupek kha kumzabi kulnak a cem tiang an rak thlun. Cawntlak le sinsiahtlak a si mi cu an rinumnak kha a si. Ziangruangah? Asancu  kan hmaiih Kristian rak feh hmaisapawl khan rinumten an ṭuanvo rak phur lo sela cu nang le kei hi tuini ah Khristian kan si kher lo men ding!

            Hithu hi vawn ruat hnik. Kawhhran hmaisapawl khan Thupek Ropi kha Jesu’i dungthluntu hmaisabikpawl hrangah lawng a si ti rak zum ta bang sisehla ziang si an parah cang ding? Kawhhran hmaisapawl kha caklo in an awngrawp ih hleiah san malte a hawng her hnu cun an thuhla khal a ziamthluh a si thei. Jesu Khrih ih Thuthangṭha kha kan hrangah Thuthangṭha a si nawn ziklo asancu kan theih dah nawn lo ding ruangah. Asinan, Pathian hnenah lungawithu ka sim, Kawhhran hmaisapawl le Khristian anmah rawn thlun vivo tupawl khan Jesu’i Thupek Ropi hi Kristian hmuahhmuah hrangah a si ti hi an zum ih cumi cu daitei topi men lo ih an ausuahpi naksan a si. Thupek Ropi hi Kristian kan zate ṭuanvo a si ti an zum hngetnak le cui thupek kengih ke an rak kar vivo nak ruangah tuini ah mibuur fatete 9,800 pawl tla Jesu Khrih thuthangṭha ih palban le enter in an um zo. Miphun buur fatete 6,950 lawng an tang thlang. Cumi ih a phur um siinnak sancu nang le kei khal anmahpawl hnenih thuthangṭha thlennakah Pathian in telve in siang hi a si!

            “ Malte! Cawp le cilh in kan thlen thei cih ding maw si?” na ti. Ṭanhmun ṭhatak a si.  Bible ih thilcang mi hrekkhatpawl ka lo sim hlan cu mission le cui mibuur fatete palban hrihlopawl hnenih thuthangṭha thlen ding thu ah na phuur tuk ka duh lo. Cupawl hmuahhmuah tlunah, mission hnaṭuan mi phuurtertu bik cu hi hi a si midang miphun buur fatetepawl hi Pathian ih thinlung sungah ziangtik lai can khal ih um ringring le kumkhua ih a sehherh mi an si.  Bible kan zoh asilen hi leitlun miphun zate hnenih thuthangṭha thlen hi Pathian ih thupitter mi bik a si ti kan hmu thei.[1]  Kan hrangah Bible fehtlang in Pathian ih thinlung theifiang dingah hmanhmawh zetih kan zirhawk can a si.

Atirte ihsin kan thawk pei uh

            A tirte ihsi ṭansal hi ruahnak ṭha a si ringring. Atir kan ti tikah Bible tinak pan teh! Atirte a simi cu Seemtirnak cabu hi a si.  Seemtirnak cabu sungih ahmaisabik bung 11  sung tiangah thiltleng mi tuum zetzet pali kan hmu thei: Evi le Adam ih sualnak; Cain in Abel a thah thu; Tilik le Noah; le Babel innsang sak thu. Hi thilthleng tuum taktak pali cio ah hin, an hramthawknak cu a thazet cio nan an tawpnak lawngte sual in an tawp ter thluh.

            Evi le Adam- Pathian ih sersiam mi hmuahhmuah ih cungnungbik cun- thlemnak thu an lung ih, cutin Sersiamtu Pathian an dodal. Nangteh si aw la ziangtin na ti ding ka thei lo, asinan kei cu Pathian si nungla cu Evi le Adam kha ka nuai cimit lawlaw ding cutin a tharte in ka thawk sal ding. Asinan, Pathian cun a fimnak thawn cuvek in a tuah mai lo. Ansual ruangah cawhkuan an parah a thleng (hmuansung ihsi dawisuah in an um) ih asinan anmah minung ngai cu that lo. Pathian ih zaangfah lainatnak cu ansual hnakin a tuum sawn.

---

[1] Himi bung sungah, mipipawl ti lolen mibuur ih a um mipawl ti in ka hmang kawp. 

Cuvek thotho in Cain le Abel ih thu khal kan hmu. Kei cu siseh la cu Cain khal hi ka nuai cimit sal lala ko ding. Ahmaisata vek thothoin, Cain ih sual khal cun cawhkuan a rawn keng lala ( dawisuahnak), asinan a cal ih humhimawknak hminsin peknak fehtlang in Pathian ih zangfahnak cu a hnenah pek a si ve thotho.

            Noah ih san kan zohsal tikah minungpawl sual in an um thu kan hmusal lala. Si, a netnakah cun, Pathian in cimihter thluh lawlaw a duh thlang. Asinan, ziang a cang? Bible in hitin in sim, “ Noah cun Pathian lung a tawng” [ zaangfahnak ti mi siar aw] (Gen 6:8) ti ah a ti. Pathian in a zaangfahnak ruangah, Noah, a innsang le rannungpawl cu a thar tei taw thawhsal ding ah a zuah.

            A netabik Seemternak 1-11 sungih thil thleng mi ah Babel innsang dawl thu a tel. Hitawk ah minungpawl cu – ṭong khat hmang in nunphung pakhat lungrual ten an ṭawm aw. An saduhthah  cu “ van tawng tiangih innsang sak le cumi hmang ih an hmin thanter …”(Gen 11:4) tumnak a si. Pathian sunlawinak ding hrangah siloin, anmai hminser an duhnak cu ropitnak le sunglawihnak an tuah mi thil hmangin ngah an duh. An thinlung taktak a simi cu hi innsang an saknak hmang in Pathian thawn tluktlang aw kan si tile Pathian thawn kan bangaw ti langter an duh. Asinan, Pathian in a zohfel tikah.. a thuanthu na thei ko. Anhnen ah a vawng ṭum ih culen an ṭong a danglam ter. Cuisi thawk in Pathian in leitlun kawlkilli tiang ah a darhsarh ter thluh ( Gen. 11:9).

            Babel lungdawl thuthawi pehpar aw in khawitawkah si Pathian ih duhdawtnak a um? A langfiangmi cu, Pathian in Tilik sanih mipipawl a siatsuah vek cun hi caan ah a that nawn lo. Cumi cu a zaangfahnak a si kan ti thei ding. Asinan, cuhnakin thuuksin san dang a um lai. Hi mipipawl hmun dangdang ih an ṭhendarh thluhnak hmangin Pathian in leilung mi hmuahhmuah hrang tumtahnak thar a timlam sal. Asinan Babel innsang dawl thuanthu netnak cu Seemtirnak Bung 12 a cemhlan tiang le Abraham kawhih a umnaknak pawlah a ra lang nawn lo.

Abraham: Thlawsuahtu si ding ih thlawsuahnak a cotu

Babel innsang dawl thuthawi pehpar aw in Pathian ih duhdawtnak khawiah si a um?  A sannak cu Semtirnak Bung 12, cang 1-3 ah:

             “Pathian in Abram hnenah, ‘ Na ram, na miphun le na pa ih inn taanta

             awla ka lo hmuh ding mi ramah feh aw. Tefa tampi ka lo pe ding ih

             miphun tumpi-ah an cang ding. Ka lo thlawsuah ding ih na hmin ka

             thanter ding; cutiin thlawsuah mi na si ding.  A lo thlawsuah tu cu ka

             thlawsuah ve ding, Asinain siat a lo camtu cu ka camse ve ding;

             Nangmah fehtlang in leitlun miphum hmuahhmuah cu thlawsuah

              an si ding’”

Pathian in Abraham cu a thu a thlun a si ah cun thlaw a suah ding thu a sim. Cumi ih rahsuah cu Abraham ih thuhla kan ruah tikah- lole Israel miphun Abraham ih cithlah pawl ruahtikah ziangraugnah si pei Pathian in thlaw a suahnak san si ding tin thu ka ruat ṭheu.  Asinan, hi mi hi a tumtah a hrek lawng a si lai. Pathian in Abraham cu a thu a thlun ruangah thlaw a suah ti lawng a si lo, cumi cu fiang zetin a lang cing in.  Pathian in Abraham thlawsuah a peknak san cu midang thlawsuah siintu a si theinak ding hrangah sawn a si.

            Asilen, Abraham cun zopawl saw thlaw a suah sawng ding?  Cang thumnak ih ṭhenhnihnak in fiangten a sim, “ Nangmah fehtlang in leitlun miphun hmuahhmuah cu thlawsuah an si ding.” Na theifiang ko maw aw!, hi thu hi a pawimawh tuk ruangah ka nawlhsal ding. Pathian in hitin thlawsuah a cotu Abraham cu miphun hmuahhmuah hrangah thlawsuah a si ding a ti.  Asilen zo le ha cui miphun hmuahmuah a ti mipawl cu?  Babel innsang dawl ruangih a rak ṭhekdarhaw thluh mi miphun hmuahhmuah kha an si. Pathian in Babel innsang an dawl ihsi thawk khan an ṭong a danglamter hai ih cutin mah le ṭong dang cio nei in leitlun ah an ṭhekdarh aw thluh. Tu-ah cun mi pakhat Abraham hmangin- le a cithlah sawng Israel miphun telin, le cumi ih bangpi Pathian ih fapa neihsun Jesu Khrih hmang in – Pathian in a ruahhmannak le a thinlung taktak cu kan hnenah a phuang lang salzo.  A tumtah mi cu miphun pakhat fehtlang ih miphun dang hmuahhmuah a lam ih hruaikirsal hi a si. Curuangah, Pathian ih zaangfahnak maksak cu Babel innsang dawl ih an ṭhekdarhawk thluh hnu ah Abraham ih nun fehtlang in hmuhsal theih a si.  Hi mi hi cing ringring aw:

Abraham le a tesinfapawl kha malsawm thlawsuah dawng dingih thlawsuah pek men satliah an si lo. Cu-aiah, tumtahnak feltak nei ih thlawsuah malsawn co an si sawn: Babel innsang dawlnak ihsi a ṭhekdarh aw thluh zomi mi miphun hmuahhmuah tlunih malsawnnak si ding ah mawlsawn cotu an si.

 Israel: Malsawm thlawsuah petu si ding ih thlawsuahnak pek

            Pathian ih thinlung taktak, miphun pawl hmuahhmuah a hnenih hruai kirsal thluh ding ih duhnak cu Thuthlung Hlun cabu hmaisabik ihsi thawk in kan hmu zo. Cupawl hmuahhmuah a hnenih a hruaikirsal thei nak dingih a ruahmannak cu miphun pakhat a si mi- Israel- fehtlang in a si ih, Israel miphun thlawsuah malsawm a pek tikah,  Isreal miphun kha an kiangkap ih miphun le leitlun miphun hrangah thlawsuah an si theinak dingah a si. Ṭawngdangin kan rel asilen, Pathian in Isreal miphun thlawsuah malsawm a pek zia kha an kiangkap ih miphun dang in an hmuh le theih tikah an thu an ngai ding ih Pathian ih umpinak kha an hminsin thei ding ti a duhsan. Culeveten, kiangkap miphun dangpawl cun hitluk lawmmam ih Israel thlaw a suahtu hi zovek Pathian si ti’n thu an sut ding. Cumi ih a rahsuah zarah, an kiangkap miphunpawl khal in Pathian nung a si ti an zum ding ih, a thu an thlun ve lawng khal siloin amah hi Pathian tak a si ti ah an be thei ding.

            Asinan, vanduaithlakzetin, khati zawng kha cun a hlawhsam ti theih tluk a si.  Ziangruangah a si pei? Asancu caan tam bikah Isreal mipipawl hin Pathian thu an ngai lo ruangah a si.   An sualnak cun thlawsuah malsawm an dawnnak khal kha langsuak thei lo ko in a khuh bet ṭheu. Asinan, hi ti an um ding hi Pathian in a thawkih a tumtah mi cu a si lo.  Thildang hmuahhmuah hnakin Pathian in mal a sawmnak sancu midang malsawm sawngtu an si theinak ding hrangah a si.

            Asinan, David lawngte cun ziangruangah Isrealpawl cu malsawn thlawsuah  a tirte ah cotu hmaisa an rak si ti kha a hngilh dah lo. Pathian in midang hrang le miphun hmuahhmuah hrangah malsawm si ding ah anmahpawl cu thlaw a suah a si ti kha fiangten a thei. Cumi cu thangṭhatnak hla a phuahnak le saknak ( Saam cabu le hla) pawl hmangin kan hmu thei.  “Miphunpawl” ti sawhkhih tu Bible catlang hi 76 lai Sam cabu sungah hin kan hmu thei.  Cumi rualin, “ mi hmuahhmuah” ti le “ leitlun khua zakipah” tivek khal hi a telve ih cumi cun hi David ih sanlai ah hin Israelpawl hin Pathian hi leitlun pumpi ih Pathian a si tin an bia.  Hi Saam cabu sungih hlapawl,Temple thianghlim sungih an saknak fehtlangin ziangruangah Pathian in Isrealpawl thlaw a suah timi a theihtersalnak kan hmu thei.

            Ahleicein, Saam 67 nak cun mawi fahran in Pathian in Israelpawl cu miphun dang hrangah thlawsuah si dingah a thlawsuah hai ti kha a tarlang. Hi a hnuai ih ta pawl hi cang hmaisa pathum pawl an si:

             “ Maw Pathian, in zaangfah awla in thlawsuah hram aw;

               zaangfah thinpemnak thawn in run zoh hram aw. Cuticun

               leilung pumpi in na duhnak an thei ding ih, Mi phunkip in

               nangmah ih runnak thu an thei ding. Maw Pathian, minung

               in lo thangṭhat hai seh; Mi hmuahhmuah in nangmah lo

               thangṭhat cio haiseh.”

Israel cu midang hrangah thlawsuah si dingah thlawsuah in a um. Ziangruangah? Cule leitlun pumpi ih minungpawl in Israelpawl ih Pathian cu Pathian nung a si ti an thei ding ih Amah an biak ve thei ding.  Cumi cu leilung semhlan ihsin siseh, atu le a ralai ding mi caan khalah  siseh Pathian ih lungthlitum , Abraham par lawngih a thinlung si lo, cun Israelpawl par lawngih a lungput khal si lo, nan leitlun minungpawl hmuahhmuah hrangih a thinlung taktak a si.

Jesu’n Pathian ih tumtahnak a thlengdanglam lo.

Thuthlung Hlun lamih kan hmuh zo bang khan Jesu’i Pa cun leitlun minung a sersiam mi hmuahhmuah hrangah thinlung lainatnak a nei. Cutiasilen afapa Jesus teh ziang a bang? Asi, Jesu khalin a thlahtu a Pa’i thinlung le sehhrehnak vek thotho a keng.  Jesu’i rawngbawlnak kha Israel mipawl hnenah a sicing in , a tirte ih a Pa in a rak ruahhman mi kha a thlun vivo. Ahmaisabikah, Thuthangṭha cu Jew miphunpawl hnenah a thlen ih cutin anmahpawl fehtlang in leilung tlun mi hmuahhmuah hnenah cui Thuthangṭha thotho cu thlen ding kha a tumtah. Cuithu cu a takin, Jesu’i Thupek Ropi, Mathai 18:19-20 karlakah fiangten kan hmu thei.

            “ Curuangah va feh uh la, miphun hmuahhmuah cu ka dungthluntu ah

              va tuah uh. Pa le Fapale Thlarau Thianghlim hmin in baptisma va pe uh.

             Nan hnenih ka lo pek mi thupekpawl hmuahhmuah kha thlun dingin va

             zirh uh. Cule, ngaihnikuh, san cem tiangin nan hnenah ka um ringring

             ding.” ti ah a ti.

Hmaisabik a dungthluntupawl hnenih netabik a cahta mi ṭongkam hrekkhat ah le- tuini ih kannih a dungthluntupawl hnenih Jesu’i thu in pekmi cu midang dungthluntu ih va tuah sawng vivo ding hi a si. Asinan, zo mibuur umkhawmpawl hnen ihsin dungthluntu ih tuah hna cu kan thawk ding? Jews miphunpawl ihsi lawng in maw? Si lamlam lo, dungthluntu ih kan tuah ding mipawl cu leitlun ih miphun a um mi hmuahhmuah hi an si.

            Ṭongfang, “ miphun hmuahhmuah” ti mi hi a thupi tuk lawm mam! Jesu’n “ miphunpawl” ti ih a hman mi hi tuini ih kan hmandan thawn a bang aw lo. Jesu cun uar hleice nak nei thawn a sim. Asilen cucu ziangtin si?  Grik ṭongfang cun “ miphun hmuahhmuah” ti mi hi panta ta ethne ti a si. Cuvekin, mirang ṭongfang “ ethnic” kan ti mi khal hi Grik ṭongfang ethne ihsi a ra mi a si.  Ṭongfang ih a sawh duhmi cu miphun dangdang fatete ih umkhawm ti a silolen mibuur umkhawmpawl ti ai a si.  Jesu in leitlun ram mi hmuahhmuah dungthluntu ah va tuah uh tin a ram zawng- Ṭhimnakah Myanmar, Philipines, United States lole Japan tin a ti lo- leitlung ram kip le miphun kip ihsin van kan thlen tikah zumtu hmuh ding cu kan beisei ko ding nan. Asim duh sawn mi cu hi tin a si:

Jesu in a liamcia ih ta pawl siseh, a tui kan san ih ta a dungthluntupawl hmuahhmuah cu, leitlun ram tinkim sungih miphun buur fatete umkhawm mipawl kha Khrih dungthluntu ih tuah dingah thupek in pe ti sawn a si.

Tuini ih thuthangṭha vawikhatte khal thei dah hrih lo pawl miphun buur 6,950 pawl simsuah ding hi kan ṭuanvo tumbik a si. Curuangah, Jesu cu a Pa in a hramthawk ihsi a tumtahmi Missions kensuah hna ah a fiangtuk lawm mam.   A thinlung ih a seherh mi khal cu leitlun miphun kip kha dungthluntu ih tuah ding hi a si.

Kawhhran hmaisa an feh rero lai

Jesu’i dungthluntu hmaisabikpawl  le khawhran hmaisapawl khan Jesu’i Thupek Ropi kha taimak suahin an keng suak vivo. An umnak hmun hmaisabik, Jesusalem ihsi thawkin an kiangkap ih mi dangdang Judea, Samaria le leitlun kawl kili tiang tin Jesu’i thuthangṭha an phursuak vivo. ( Dungthluntu 1:8). Jesu’i Thupek Ropi cu an nunnak ih thupibikah retin, Pathian ih thupi bikih a retmi leitlung mibuur phunkim hnenih thuthangṭha phuansuah cu an damsan ah an hmang.

            Hithu hi Paul ih nunnak le rawngbawlnak hin a simfiang bik ko ding.  Paul hi Thuthlung Thar cabu sungih zohṭhimtlak bik mipipawl hrangih seherhnak neitu sangbik a si.  Cumi cu a thusimnak le cakuat mipawl hmang in kan theithei ( Dungthluntu 13: 46-47; Rom 4: 16-17, 15: 7-12; le Galati 3: 6-9).  Ahleicein, Rom cakuat neta a nganmi ihsin fingten a sinak a hmuh feng theih:

            “ Zentelpawl in thu an lun theinak ding hrangah keimah hmang ih thu

                le thilti ih Khrih ih a ṭuan ṭheh mi siarlo thil dang zianghman ka sim

                ngam lo. Cumi cu Pathian Thlarua huham in hminsinak huhampawl

                le mangbangza hnaṭuannak pawl tla ih a cang mi a si. Cutin, Jerusalem

               ihsin Illirikam ram kiangkap hmuahhmuah tiangin Khrih thuthangṭha

               cu famkim zetin ka phuang zo. Mi ih lungphum cia mi parih ka sakbet

               lonak  dingah Khirh hmin theihlonak hmun ah thuthangṭha phuan ding

               cu ka tumtah ringring mi a si. Asinan, “ Amai thu an rak sim dah lo

  mipawl in an hmu ding ih, hna ih a rak thei dah lo pawl in an theithiam

  ding,”(Rom. 15:18-21) ti ih ngan vek khan a si.

Paul khan nuam pa sel in a rak pal cia zonak ram le bialpawl fangin a tlawng rero thei. Hmunram kau zet “Jerusalem  ihsin Illirikam ram kiangkap hmuahhmuah tiangin”- Judea ihsin Italy tiang tla- evangelist hnaṭuan ding tampi le sunzawm ding tampi a um ko nan, ziangruangah Paul khan feh bet vivo a tumnak san si ding?  John Piper cun Paul ih lungthin ah leitlun mi hmuahhmuah seherhnak a tumtuk ruangah a si a ti:

Paul ih missionary hna le a lungput cu Khrih hnenih mi hrekkhat

hruai thlen lawng a si lo (cui hna cu a rawngbawlnak ramkulh sungah

hlawhtling zetin a ṭuansuak ko), a sahduhthah cu mi hmuahmuah

hnenih thuthangṭha thlen le miphun hmuahhmuah hnenih Khrih

pek hi a si. A thupitter mi kha ramthar hei nawr satliah kha a si lo.Cuhnakin,

a theihrihlo mipawl hnenih thuthangṭha pek le zem  kha a si[1]

Fiangten, Paul ih thinlung cu Pathian ih thinlung phut dan thawn milaw ti kan theithei.  Missions hnaṭuan ih a tlawn suksonak tinkim ah kawhhran hmaisapawl kha Thupek Ropi zamrang ih keng suak ringring dingih bawmtu le nungtertu a si.

Thuthangṭha!-Kan neh riai!

Pathian ih duhdawtnak thuthangṭha, a thei hrihlo mi mibuur 6,950 lai a tangmi pawl hnenih phuansuah kan rel tikah, thinnau a awl zet tla si men thei. Hmansehla, Pathian ih thinlung sungih a thi thei lo mi cu cubang pawl hnenih thuthangṭha kan neih mi simsuah hi a si tlat. Amahlawngte, minung lam ihsin cui hnaṭuan cu kan tlin taktak pei maw? tin thu kan sut ṭheu. Ahman, Minung lam hmuhdan cun kan hna cu thil cangthei lo rori vek a si. Nan, na zum maw? A taktak in hi thil hi a famkim lai ding! Kan Bible ih bu netabikin hi thu hi fiangten in sim.

---

[1] John Piper cabu , Let the Nations Be Glad! The Supremacy of God in Missions, 1993, Grand Rapids, MI: Baker, P 194. 

Thupuan 7: 9-10 kan zoh tikah, John in can tawpnakah ziang a thleng ding ti thu in sim John cun hitin:

            Himi hnu ah ka hun zoh ih, ngaihnik, zohman ih siarcawklo mi buurpi

ka hmu. Cui mi buurpi cu phunkip le hrin kip le mi kip le ṭongkip ihsi

 a ra mi an si. Kawrfual var hruh in an kut in tumkau hnah an keng

ih,laltohkham hmaiah le Tuufano hmaiih an din kha ka hmu. Cun, annih

in aw ring zetin, “ Laltohkham parih a totu khan Pathian le Tuufano

hnenah rundamnak a um!” ti ah an au.

Cuican a thlen ding cu a hngakhlap umtuk na ti ve lo maw?  San a cemtik ah cun, pumpak zumtu ziangmawzat -khai mibuur fatete, leitlun ih miphun zate lak ihsi in an um ding. Leitlun ih rak um dah miphun hmuahhmuah ethnes lak ihsin a malbikah pakhat tal an miphun ai awh ih Pathian a betu vanah kan hmu ding. Nehtu kan si ding! Hi leilung tlunih miphun hmuahhmuah hnenah thuthlangṭha sim a si ding! Pathian in Abraham hnenih a rak tiamkam cia mi cu ni nikhat khat ah cun a a rawng famkim ding.

Thukharnak

A tlunih kan sim mipawl kha mission hnaṭuannak thuthawi pehpar aw in kan Bible ih in zirhdan kan zohkirsalnak an si. Asinan, a tawi ruahin Pathian ih thinlung- a tirte ihsi leitlun pumpi runsuah a tumnak cu Bible sungih a tak thilthleng mipawl hmangin fiangten kan hmu thei.  Leitlun khua zakip ih a ṭhekdarh aw thluh mi miphun fatetepawl hnenah Jesu’i rundamnak thuthangṭha hi sim theih a duh. Leitlun ih thuthangṭha thlen ban hrihlo nak hmun ih a um mipawl hmuahhmuah khal in ni ni khatkhat ah Jesu cu Lal le rundamtu ih an cohlan ding a duh. Hi hna hi hlawhcawm ih Evangelists le missionaries a ṭuantupawl lawng ih ṭuanvo a si maw? A si ti ih na rak ruat a si ah cun, a pawi ka ti zet… na hrangah thuthang sia ka rak keng.  Cui ṭuanvo cu Kristian zate ih mawhphurh a si. Pathian in nang le kei ve men in hmang duh sawn hi thusuhnak suah tlak a si sawn lo maw?Pathian in ziangtizawng in  a lo hmang duh ti na thei fiang maw? Kan zohpeh ding mi bung ah hi thu hi cipciar deuh in kan thlur sal ding.

A sungthu Bihciannak

Dungthluntu 1: 8

Missions hrangih dawnkhamtu?

            Bible sungih bung le cang dang hmuahmuah hnakin Dungthluntu 1: 8  theih sualnak hin Kristian tampi missionary kan si ding in dawnkham bik in ka thei. Ziangruangah?  A Bible cang kan thei lar tuk: “ Asinan Thlarau Thianghlim nan parah a rung thlen tikah huham nan ngah ding. Cule Jerusalem khua ah, Judia ram hmuahhmuah ah, Samaria ram hmuahhmuah ah le leilung tlun deng tiangin ka thutheitu nan si ding.” Vanduaitlak zet mi cu, kan theih bel tuk taakah ngunngaih zet ih zohfiang ding kha kan thlahthlam.

Ziangsi ka ti duh sancu?  Mi tambik cu hi cang hi hitin kan letsawng theu: Jerusalem ti mi khan keimai innsang, rual le pi, le umnak khua: Judia ti mi khan keimai ram, umnak peng le state: Samaria ti mi khan kan umnak bial sangtu lole kan kiangnai bik state dang pawl lole kan ram naihte ih um ramri khua le tlang pawl; cun “ leilung tlun deng tiang” ti mi khan mai ram suahsan ih ramdang ih fehsuak.

Cumi ih rahsuah cu, Kristian zumtu tampi cun, “ mission hna taktak” cu  mi pakhat ram dang ih a feh suah phawt lo ah cun a thawk thei hrih lo tin an ruat.

Ziangruangah si pei mi tambik in hi mi kan let sual thluh nak san? Ram leilung thawi pehpar aw mi a si. Na Bible cemnetnakih ram lem zuk kha zoh hnik aw. Hmun pahnih: Nazareth ti mi le Jerusalem ti mi na hmu ding. Asilen, a tu rori ah hi thusuhnak pahnih hi nangmah le nangmah kha vawn sut aw aw?  Dungthluntupawl ih umnak khua hi khawitawk si? Jesu in hi Dungthluntu 1:8 a sim lai ah hin khawitawk ah dungthluntupawl an um?

A sannak, ahmaisa sawn ta, Jerusalem hi dungthluntupawl ih umnak khua a si lo. A hmaisabik dungthluntupawl hi “ khawte nauhak”, a tamsawn cu Galilee peng ih ngakaitu men an si. Jesusalem an feh tinten, midang thawn bang aw lo deuh ah an ruat aw ṭheu (Matt. 26: 73 Le Dungthluntu 2:7). Jesu in a dungthluntupawl kha Jerusalem ihsi thawk dingih thu a pek tikah, an rawngbawlnak hmaisabik ihsi khan anmah thawi bangaw lo mipawl ( type of cross-cultural work) hnenih rawngbawlhna ṭan dingah thupek a pe a si.

            Ngaingai tei ti ah cun dungthluntu hmaisabikpawl khan anmah le innsang, rual le pi, kawhhran le ram Galili ih kir le cuisi Kristiannak thehdarh cu an thlang sawn tengteng ding. Asinan, Pathian cun ruahhmannak ṭhasawn a rak nei.

            Pathian ih ruahhmannak ṭhasawn cu dungthluntu kan zohpeh ding mi bungcang ah, “ Jewspawl hnen ihsi van hnuai ih miphun hmuahhmuah hnen” ih thehdarh hi a tumtah a si (Dungthluntu 2: 6, 8-12).  Peter’ in Penticost ni ih thu a sim tikah, a thusim thei ih zumtu le Baptisma a cotu minung 3,000 rori ni khat sungah an tling. ( Dungthluntu 2:41).

            Dungthluntu hmaisabikpawl khan thinlung ih duhnak nasa zet thawn, anmah thawi nunphung ih a dangaw mi jewspawl hnenah thu an si.  Ziang lamzin ṭhasawn dang na ruat, khai Penticost ni ih thuthangṭha ruangih nun danglampawl khan anmah le ram cio ih mibuur umpawl hnenah khan an kirsal tikah khawihmun le ram a si khal len thuthangṭha an phur ding.  Jerusalem hnakin hmunṭha le remcang, leitlun pumpi ih thuthangṭha thehdarhnak dingih hram thawknak hmundang khawi ah a um cuang ding! Asinan, ahmaisabik dungthluntupawl khan tuini ih mitampi in Dungthluntu 1:8 kan hmuh dan vekin rak zirh aw sela cu, anmah khua le ram Galili pengah tlung ṭuuṭo sehla cu an hlawhtling dah lo ding, cuihleiah anmah sungkua le rualpi naivai lawng an san sungah thuthangṭha an sim man ding. 

Asilen, ziangsi cu mi ih a pawimawhnak san cu? Ngunngaih zetin a thei hrihlotu mibuur fatetepawl hnenih mission ṭuan a ṭulzia kan theih hnu ah cun suanlam zianghman tuah a theih nawn lo,  Pathian in kan innsang le rualpipawl hnen “ Jerusalem” ah thusim ding lawng in in ruat ti a ngah nawn lo.  Cumi tak cu si hi Bible catlang hi kum reitak sung Khristian mi tampi hrangah mission dawnkhamtu ih a rak cannak san. Kristian tampi cun hi bible catlang hi kanmah ih nuamti zawng in kan la ih cutin a thupibik mi a thei hrihlotupawl hnen ih thuthangṭha simnak kan hlamsiah.  Khristian tampi cun hitin, “ Pathian in Jerusalem ih hnaṭuan dingah : Ka sungkua, ka rualpi, umnak khua le ram hrangah in ko tin cuvial cu  ka hna a si ” an ti.

Pathian in hi dan thawi hnaṭuannak ah a lo kham khal a si thei, asinan dungthluntu 1:8 sungih ṭhum aw cu si cuang lo in . Cuhnakin, Jesu’n Dungthluntu 1:8 ah hitin a dungthluntu hmaisabikpawl le tuini ih Khristian dungthluntu ka si a ti awtu kan zaten, kanmah thawi a bang aw lo mi kan kiang le kap ih a um mipawl siseh, mah le umnak hmun ihsi cio in  dungthluntu ih va tuah ding ṭuanvo kan nei.  Hi Bible catlang hin kanmah thawi a bang aw lo mi miphun dang lole hnamdangpawl, kan lakih a um mipawl kha Khrih hnenih hruai dingah Pathian in a huham le cahnak thawn ṭuanvo in pe in cupawl cu kan lakah  a ret a si.  Mai khua le ram ih kan tlun tengteng a ṭul lo, kanmah le umnak hmun ihsin kan thawk cih ding a si. Cuti kan ṭuanvo kan tuah le veten kan kiang nai ih a um mi siseh hmuh hlapi ih a um mipawl tla Pathian hnenah kan hruai thei ding.

Pathian cu leitlun miphun hmuahhmuah a seherhtu Pathian a si.  Dungthluntu 1: 8 khal hi leitlun pumpi a seherhzia thu a rel langnak pakhat a si ve. 

Ruah dingmi thusuhnak

1.               Pathian rak si bang ta si aw la, Seemtirnak 1-11 thu na thlir tikah ziangtin ha na ti ke?  Tuisan kan leilungpi ih thilthleng rero mipawl hi Pathian in ziangtin a tuah na zum? Pathian ih zaangfahnak cu tuini ah ziangtin kan parah a ra thleng ṭheu?

2.               Ziangtin Pathian in miphun pakhat thlawsuah ding ih a hril dan –Abraham le a fesinfapawl, Israel miphun- Miphun hmuahhmuah thlawsuah malsawm pek ding hi a catuan thiltum a rak si rengreng maw sim fiang aw?

3.               Ulukzetin Dungthluntu 1:8 kha siar aw la, ziangtin hi Bible catlang na rak letsawng ṭheu? Tu ah teh ziangtin na letsawng ding, a hleicein nangmai pumpak nunnak thawi pehpar aw in?

4.               Vanram ah a malbik ah mipakhat tal hi leitlun ih miphun dangdang lak ihsin an tel thluh ding. Hi thutak thu Thupuan sungih kan hmuh mi hin ziangtin nangmah a lo tham? Ziangruangah?

BUNG 3 NAK

   ASILEN NANGTEH ZIANGTIN CUI THUHLA CU NA TUAH DING?

“ Curuangah a dungthluntupawl hnenah, “ Rawlkhawm ding tampi a um nain a khawmtu ding minung an malte a si. Curuangah rawl lak ding neitu bawi hnenah rawl khawmtu ding milai tampi thlah dingah thlacam uh,” ( Matt. 9:39-38)

Zo si, Kemah maw?

Kristian hmuahhmuah cun thubawhcahnak an tuah tengteng a ṭul.

            Pathian ih thinlung taktak cu hi leitlun minung hmuahhmuah a hnenih hruai a si ti mi kan Bible pumpi sungih thilcang mipawl bung hmaisa ih kan zoh zo mipawl in kan theithei. Bible thuanthu kan zoh tikah cui mi hmuahhmuah a hnenih hruai ding cu miphun pakhat , Israel a hril ti le, cui a tumtah mi cu fapa neihsun Jesu, peknakin a langter ti kan hmu thei. Culawnghmansiloin,  kan Bible sungthu ih thilcang mipawl kan zoh peh vivo asilen amah zumih a thluntupawl hnenah cui tumtahnak cu a pe sawng vivo ti fiangten behzawm in kan hmu thei. Cuih hna cu Thuthlung Thar san ih Jesu a thluntupawl nunnakah a tak ih a thlen dik vekin, tuini ih Khrih dungthluntu kan zate liangpar khalah Pa Pathian in a hngat lai a si. Cuih hna sunglawi cu si phurumza a si mi thu cu!

Ziangruangah a phur um kan ti thei ? Asancu,  Pathian ziangkimtithei in a zaangfahnak ruangah  nang le kei khal hi leitlun pumpi ih a duhdawtnak thuthangṭha a thei hrihlo mibuur umpawl  hnenih a cangvaihnak hruang sungah kapkhatte ih kan telve in siang hi a si.  Nang le kei khalin, dungthluntu Paul vekin, Pathian ih duhdawtnak thinlung a phuut rual ih ra phuve thinlung kan nei thei a si.

Ziangtin Pathian ih duhdawtnak thinlung a phuut rual in kan thinlung kan phutter ve thei ding? Tluangtlam te a si, kan sia le ṭha theihnak lung thiangte thawn Thupek Ropi thlun dingin thubawhcahnak kan tuah a tengteng ding. Cui thubawhcahnak cu hiti vekin a si ding:

Jesu in kan zaten leilung pumpi ih miphun um mipawl hmuahhmuah dungthluntu  ih va tuah ding ah in fial a si ah cun, cui thil cu ziangtin kan tuahsuak thei ding? 

A si, ziangtin cui thil cu a taktak in kan tuahsuak thei ding? ti mi hi a thupi tuk. Ziangtin cui thil cu cangsuak ko kan tuahsuak thei ding? Hi thusuhnak in kan mit le mit karlakah fiangzetin nang le kei in sunthlang ruangah, dai ziar in, kutbawm ih to tluang huahni men thei kan si nawn lo!

Na theih vekin Jesu’i dungthluntu taktak kan si ah cun a Thupek Ropi hi kan thupiter taktak a ṭul. Cun, kan thupitter ngaingai a si ah cun duhthlan ding pakhat lawng kan nei! Cui duhthlan ding cu hi hi a si:

Miphun hmuahhmuah dungthluntu an si theinak dingih mi a thlahsuaktupawl bawm lole nangmah rori thlahsuahmi  ih na ṭan a ṭul.

Cuvial a si. A tluangtlam tuk! Midang a thlahsuahtupawl kan bawm a silolen kan mah rori kha thlahsuahmi kan si a ṭul! Cui duhhril ding mi pahnih cu Thupek Ropi thlunnak le nunpi nak sungah a um veve. Kan mah rori kan feh asilolen midang kan bawm ding cutin an fehsuak thei ding. Cu lo hril ding dang a um lo. Lehhnu ah ti lo in atu rori ah thubawhcahnak kan tuah rori a ṭul!

Thubawhcahnak tuah tengteng a ṭulnak sanpawl:

Tluktlaang aw lo tuk  mi thil

Thubawhcahnak tuah cu kan hrial mai lo ding maw si? Thubawhcahnak tuah ding in malte can kan bawt sau thei pei maw? Aih! Kan bawt sau thei hrimhrim lo asancu thubawhcahnak tuah lo in kan bawtsau vivo asilen tuini ih hi leilung pumpi ih thuthangṭha a thei hrih lo mipawl hi vawi khatte khal theilo in an um lan ta ringring ding.  A taktak ih thilcang mi hi zoh hman.  A tufang ah hin leilung pumpi ah protestant missionary hi 300,000 hrawng an um ih zum a si.[1] Hi tehnak hin Mirang ram siseh, Asia siseh , Europe siseh leilung pumpi ih missionarypawl a huap thluh.

            Hrekkhat cun hitin, “ ziangtluk tehnak sang a si! Minung 300,000 tluk rori missionary hi kan leilung pi ah an um a si ah cun hnaṭuan cu an ṭheh zik te ko ding. Curuangah, Thupek Ropi thuthawi pehparaw cun thubawhcahnak ka tuah kherkher a ṭul lo men ding” ti ah kan ti men thei.

            Cui ruahnak cu a hman lo lawlaw mi a si! Ziangruangah a hman lo kan ti thei? Asancu, vanduaithlak zetin, hi missionary 300,000 sungih minung 15,000 hrawng lawng hi palban hrih lo nak hmunram ih a tak ih hnaṭuantu an si.[2]  Missionary hnaṭuan nakah in buuktawk lo mi nasa tuk a um. Cui buukaw tawn lo tuk mi cun ziangruangah a theilo tupawl hnenih thuthangṭha ausuahpi le phurhsuah a ṭul timi fiangten a nemhnget. A hnuaiih “ Buuk tawk aw lo tuk mi Buuksuuk” hi fiangten zoh hman:

---

[1] Ngaingai tei ti ah cun zohman in tuini ah protestant missionary hi ziangzat ciahciah an um ding ti an fiang lo.  Zum hmang hrawng a si mi cu mipum 200,000 ihsi 400,000 tiang hrawng hi a si ih cunah keiin a laitak 300,000 hrawng hi ka hmang ve.

[2] A tlunih ka rel zo bangin, zohman in hi protestant missionary 300,000 lakih si hi ziangzat cekci vawi khat te hman thuthangṭha a thei hrih lo lole thuthangṭha ih ram a lak hrihlo nak hmun ah an ṭuan ti hi an fiang lo. A tlangpi thu ih tehnak cu a niambik 2% ihsin 10% tiang a si ih cutin keiin a lailak 5% ti ah ka hmang. 

A tlunih Bukawtawn lo tukmi Buuksuuk ihsin leitlun pumpi ih missionary 285,000 pawl cu thlenbannak asilole palpawh theihnak hmun ah mission hna an ṭuan ti a theihtheih.

Cuti asiahcun, hrekkhatin hitin, leitlun ih mipum tamnak bik pawl in missionary tampi an neih cio zo ruangah, asilen cu ziang a ṭul nawn cuang?”  Ka reltum mi cu hihi a si, zatek ih sawkua le panga leitlun ih missionarypawl kha thuthangṭha thlenban cianak lole kawhhran umcia pawl ih palban nak hmunah hna an ṭuan tinak a si. Missionary 285,000 sung ihsin missionary pakhat zelin mi 14,750 pawl kha palpawhcia nak ram eng asilole palbannak hmun ah an um.

Khatlamah, Leilung tlun mipum hmuahhmuh lakih billion 2.8 pawl cu palpawh hrihlo mi mipi an si ih, cupawl lakah cun minung 15,000 missionary thlah an si- zatek ih panga (5%) lawng- leilungtlun missionarypawl hmuahhmuah lak ihsin an kim ngerngo. Cumi ihsin ratio zawng ih kan teh asilen cu missionary pakhat kha pumpak minung 187,000 ,  balban hrihlo ih mi mibuurpawl lakah thlah tluk a si. 

An tluktlanawk lo nak hi a sang ngaingai:  95% lole missionary 285,000 pawl cu 5% lole missionary 15,000 pawl thawn khaikhin an si cu! Ziangtluk an tluktlang aw lo! Ziangtluk an buukaw tawn lo!

Kan lakih mi hrekkhat cun buuksuuk hi nan nauhak laiah nan to men thei.  Na thei ko ding ka zum, na rualpi thaunawn na neih asilen cu cumi in a rihnak hmuahhmuah thawn khat lam ah a nih a to a si ah cun rei ngaingai tlunsangah a lo khai si lo maw?  Asi, hi an bangawktawnlonak cu thuukpi kan fehpi lo ding asinan malte kan zoh men hman hin tuini ih mission hna mi tampi in kan ṭuandan thawi pehpar aw in bangawk nak an nei. Kan buuksuuk cu palbanmipawl lole thuthangṭha thlenbannakpawl in a buuk neknek kan ti thei. Mi tampi thuthangṭha thlenbanlonak asilolen mahte ih tung ding aw thei lo pawl cu tuni khalah anmah ten tanta in an um lai.

Hi a bukaw tawklo tuk mi thil hrangah ziang kan tuah ding? Mission thuthawi pehpar aw ih mithiampawl cun a malbikah missionary thar 100,000 tluk thuthangṭha thlenban lonakpawl hmuahhmuah nawr eng ding cun kan ṭul ti ah an ti.[1] Tui a ṭuanrero lai minung 285,000 pawl kha an umnak duhduh in kan thleng thei lo! Asancu, an lakih tampi cu missions le cumi thawi apehpar aw mi rawngbawlnak phunphun thawi pehzawm mi hna an ṭuan ruangah. Curuangah, a tu rori ah mi thar 100,000 ,  ramthim ih a um mi mibuur 6,950 pawl pal eng ding cun kan tul!  Cutiasilen mibuur tin hrangah missionary thar hleingai hrawng cio kan ṭul tinak a si. Hrekkhat mibuur fatetepawl hrangah cun minung hleingai hrawng atawk men thei nan, hrekkhat mibuur tamtak umkhawm, million rualrual ih umkhawmpawl hrangah cun mibuur pakhat hrang minung hleinga cu an maltuk ding ih mi tamsawn cu lohtheihlo ih thlahsuah bet ṭul mi an si ding.

Asilen nangteh ziang na bang? Pathian in hi mipum 100,000 sungih tel ding ah lo ko in na thei maw? lole minung 100,000 pawl thlahsuaktu le bawmtu sawn ah lo hman a duh? Aw si ngai, punghman ih missionary a ṭuantu 285,000 pawl kha zawm lolen anmahpawl punghman ih an thlahsua awk thei vivo nak ding ih bawm tla na hril thei? A khawi mi sawn sawn- missionary thar 100,000 pawl thawi ramthim nawr ding ih kawhnak lole tui a rak ṭuan rero tupawl thawi punghman ih ke karnak sawn, pakhat khat sawn ah na tel nak ding thubawhcahnak na tuah tengteng a ṭul. Na thubawhcahnak ziangmi sawn a si ding?

Thlahsuahmi ah siseh  thlahsuaktu khalah siseh Kristian si hleice lole Thlaraumi hleice tivek bikhiah a um lo. Cuvek thotho in , Pathian ih Lalram khalah thlarau thilpek sang a dawngtu le niam a dawngtu tivek a um lo. Thlahsuahmipawl khal siseh a thahsuaktupawl hnakih an ṭhat hleicenak a um cuang lo. Himi hi cing ringring aw:

Ramthim nawr eng nak le Pathian ih Lalram karhzaiter nak ding hrangah “ thlahsuaktupawl” le “Thlahsuahmipawl ” hi bangran in an pawimawhnak veve. A pawimawi sawn le pawimawh lo deuh tivek an um lo. An pahnih in bangran ten an thupi.

Hi thu ka simnak san cu , vanduaithlakzetin, “ thlahsuahih a umtupawl” hi thlarau lamah ret sang hleice ih an um ṭheu ruangah a si. Asan khal cu thildang siloin Kristian rawngbawlnak tinkim deuh thaw ah hruaitu vekih a cangvai tu taktak an si ṭheu ruangah a si. In hmusual hram hlah aw. Missionary tampi cu mi hleice le mi cungcuang khal an si ih upat le ṭihzah khal an phu ngai. Amahlawngte, thlahsuahnak thilpek khal hi thlahsuahmipawl tluk in a pawimawh ve a si ti 

---

[1] A malbik ah Missionary thar 100,000 hrawng ramthim nawr eng tu dingah kan ṭul ti mi hi a niam thei bikih tehnak a si. Mission thuthiam hrekkhat cun a malbik ah mithar 200,000 hrawng lolen a tambikah million khat hrawng cu kan ṭul an ti.  Ziangvek khal a netabik ih tehnak a va si hmanah, fiang tei kan theih mi cu ramthim nawrsuak ding ah missionary thar tampi hi a tu rori ah kan ṭul ti hi a si.

hi kan theihfeng ka duh.  Thlahsuaktu miṭhahnemngai le pumpe aw pawl tello cun thlahsuah mipawl in thlacampitu an tlaksam ding hleiah, an hnaṭuan mi hlensuak dingah sumpai thawi pehpar aw in harsatnak an tawng ding. Pathian in thlahsuaktu ṭuanvo la ding ih a lo ko ih na thei a si ah cun, Pathian thangṭhat aw!  A theihrihlotupawl hnenih thuthangṭha thlennak zin ih a ṭuantupawl ṭanpinakah na ti theitawk ih ṭhabik na suah ding.  Nangmah le nangmah kha niam deuh lole ti theimi neilo tukah ruat aw hrimhrim hlah. Na ṭuanvo kaihmi hi a thupi tuk lawm mam!

Cun, khatlamah,  Pathian in nangmah rori kha tlahsuah ih umding le ramthim va nawr engtu dingah a lo duh ih na theih ah cun , Pathian thangṭhat thotho aw! Pathian in a ram hrangah a lo ṭul tuk.  Asinan, hi thu hi cing ringring aw, dunglam ihsi a takih na feh suah theinak ding ih lo thlahtupawl thawn nan thupitnak a bangaw aw. Annih hnakih na san hleicenak le na niamnak a um cuang lo. Pathian ih lo kawhnak le na ṭuanvo sawn a si.

Duhhril ding kha na cing lai ko maw? Kanmah rori kan feh maw,  asilolen a fehsuaktu pawl kan bawm tengteng a ṭul cutin an fehsuak vivo thei ding.  Khrih dungthluntu ka si a ti aw tu kan zaten hi thu hi thungaitlak ih kan ruah hnu ah thubawhcahnak kan tuah rori a ṭul.  Pathian ih duhnak theithiam dingah fimkhur ten na ruah a ṭul. Na Bible na siar tik le thla na cam tikah, Pathian in a duhnak a cekci ih lo sim ding in dil aw.  Hihi cing ringring aw,  na tuahmi hnakin thubawhcahnak na tuahmi parah tampi nangmah hmangih hlensuah ding a nei. Amai duhdan vekih thubawhcahnak na tuah thei nak ding ah lo bawm a duh.  Cangtheisela cu, van ihsin Pathian ih cakuat rori na mail cakuat sungah lut sela, cui thu ah cun Pathian hnen rori ihsi a ra mi a si ti le cuithu ah cung ziangmi ciahciah na tuah ding ti pawl um thluh sela a ṭha zet ding! Asinan, a pawizet, Pathian cun cuvek in hna a ṭuan lo. Na dilnak a lo let tengteng ding. Thinsau ten hnak aw la, hi thu hi na thinlung ah cing ringring aw:

Pathian cun thubawhcahnak dik tuah thei ding ah a lo hmuh ding asinan cu mi cu amai hruainak na hawl/dil hnu lawnglawng ah a si ding. 

Duhhrilnak kan tuah tinten thil tampi ruah ding a um. Cupawl tla cu hi mi sangtu bung pahnih ah kan zoh ding.  Bung li (4) nakah cun mi hrekkhat Pathian in Thupek Ropi a pekmi thlun ih midang thlahsuak dingah in ko ti ih a ruat aw tupawl ih thuhla kan zoh tlang ding. Cun, Bung nga (5) nakah cun mi hrekkhat Pathian in Thupek Ropi a pekmi thlun ih mah rori fehsuahnak “ thlahsuah ih um ding”  in in ko ti ih a ruat aw tupawl thuhla kan zoh tlang ding.

Himi bung hnih hi siar tengteng aw. Ziangruangah?  Asancu, “thlahsuahmi ” na si ah cun, nangmah a lo thlahtu Khristianpawl hrang ih thuhla siseh, an theih ulmi , neih tulmi  le tlinnak tete pawl kha na theih a tul.  Cun, “thlahsuaktu pawl” lakih telmi na si khal len na thlahsuahmi pawl lole thlahsuah ih a um mi na bawm ding mi pawl ih thuhla, an theih ṭulmi le tlinnak pawl na zohfiah hmaisak a ṭul. A hmaisa deuh ah, bung li nak ih thlahsuaktupawl dinhmun kan zoh hmaisa ding.

A Sungthu Bihciannak

Missions: Khawitawk bikah si kei ka mil aw bik ding?

Thupek Ropi thuthawi pehpar aw in mi tampi cun ziangbik hi si Pathian in ka hrang ih in duhsak mi tin thu nan ruat. Hitawk ah mi bawmtu ding thusuhnak pahra khawitawk bikah na milaw aw ti hmuhfengawk theinak ding ih na suhawk ding mi pawl a um.

1.  Ziangzin ah ha kei hi leitlun thilah phurzawng lole veizawng ka neih? Nauhak na si lai ihsin na thinlung sungte ah ram pakhat khat maw miphun pakhat khat maw an thuhla na theih tinten na thinlung ih cam ringring lole lo thamtu na nei tla a si thei. Cui, ruahnak le nun rori ih khansa nak cu Pathian ihsi ra mi a si thei pei maw?

2.  Mission hnaṭuan thuthawi pehpar aw in Pathian in ziangthuhla si in rak ruah zo mi um?  Pathian in ṭektla lole nimthlakau tivek zawng ih kawhnak hi missionary ṭuan ding ih mi a hmin nak ah a hmang khat zet. Cuhnakin,  A duhnak thlun ding ih in hruai dingah “ A aw nemte le dimte” a hmang sawn ṭheu. Cui a aw nemte ngaitlak le theih lawng a tawk lo ih a thlun ih thlunsuah kha a thupi.

3. Ziangvek mission hnaṭuannak thawn kan mil aw ding? Greg Livingston, frontiers ti mi dinsuaktu pa- a tu ih missionary 1,000 lai Muslim lakih neitu pa cun hitin a ti:

Missionary ṭuan ding ci na si le si lo sut aw hlah; cu-aiah,  kawhhran dinsuahnak hrangah na neihcia mi thilpek, titheinak le thiamnakpawl kha ziagntin  na hmang thei ding ti sut aw sawn aw.

4.  Midang teh in ziangtin ha ka thilpek comi, titheinak le thiamnak hi an rel? Ziangmi thilpek na co, na titheinak le thiamnakpawl na theih hi a thupi ngaingai, ahleice in missions hnaṭuan na thinlung in na tumtah a si phei ah cun .  Na zum maw zum lo leh lam, Pathian in ziangvek, zovek minung khal Amai thu an thlun sung pohpoh cu a hmang thei.

5.  “ Kawh ka sinak” hi ziangmi bik a si ding? Cui kawh ka sinak cu thil pek ka comi siseh, ka titheinak le thiamnak thawn ziangtin a pehtlai aw aw? Mi hmuahhmuah hi William Carey lole Billy Graham si ding ah kawh an si lo.  Nangmai hnenih pek a si mi thilpek, titheinak le thiamnakpawl kha kawh na sinak thawn na fehpi thiam a thupi ngaingai. Vanzam na cuan maw, tlangleng na to maw, lawng na to tikah thil danglam pi magic tivek a thleng hran lo, na to mi le cuan mi thil sawn khan na fehnak ding mission flield lam ah a rak lo hruai rero sawn a si. Pathian ih a lo pek mi hmansuahnak in hram thawk aw. Cumi tak cu si Pathian in na hmansuah ding ih a lo pek mi khal cu.

6. Miphun dang lole hnam dang le an nunphung thuthawi pehpar aw in thleidannak lo le lungput dik lo ka nei pang maw? Missions hnaṭuannak ramsung ih missionary pakhat khat a va thlen tikah, hmakhatten ruahnak dik a neih mi kha a hlo mai lo. Khristian zumtu hmuahhmuah cu hi lungput diklo kan neih thei mi ah hin kan ralrin a ṭul, ahleicein mission hnaṭuan ih a fehsuaktu le thlahsuaktupawl hrangah. Hi miphun dang nautat, hmuhsual lole thleidannak kha nangmah ah a tum tuk a si ah cun missionary ṭha si ding ih hril mi na si lo tinak a si men thei. 

7.  Tu ihsi thawkin ziangtluk zamrang in mission hnaṭuannakah ka tel ve ding?  Thuthangṭha fiangfel zetih phuansuah mi thei lo in nitin mipum 50,000 lenglo an thi. Asinan, cumi a si ruangah timlamawknak hngetkhoh na neih ta a ṭul lo tinak a si lo.   Pathian in Moses a timtuahnakah khan kum sawmriat (80) rori a awh. Cuvek thotho in Paul a timlamnak khalah khan kum 13 a awh thotho.  Kum khat lole kum hnih thum sung timtuahnak hrangih na can na pek mi kha reituk can khawh liam cu na si lo. Cuti kum hnih, thum sung na timtuah awk tikah nasa sin in mi ṭhahnem na si thei ding.

8. Pathian in fiangten missionary ih fehsuak ding ka si lo ti in sim sibang sela ziangtin tu hnakin ramthim ih mission hna a ṭuantupawl bawmnakah ka ṭhahnem sin thei ding? . Ramthim ah mi hmuahhmuah hi kuat an si lo ngai. Asinan, cui kuatsuah ih a umtupawl hrangah zumtu hmuahhmuah hi midang thlahtu ṭha kan si thei. Kuatsuahih a umtupawl hrangah ziangtin tu hnakin thlacamnak tamsawn, peknak tamsawn le bawmnak tamsawn thawn ṭan na la thei ding?

9. Ziangsi ka ṭih mipawl? Mission hnaṭuan thuthawi pehpar aw ah hin kan sinak ciahciah rel ngam hi a thupi zet. Theihdahlo le thlenlonak hmunram ih missionary ṭuan ti mi hi leitlun ih hna harsa bik pakhat lakih telve mi a si thei. Asinan, kei ka hrangah cun lawmman sangbik ( most rewarding jobs)  khal a si ka ti duh. Curuangah, na ṭihnakpawl kha a dik, thu ngaingai a si ti cohlang awla culen, Pathian bawmnak thawn cu mi cu cinfel tum aw.

10. Ziangha ka sunmang pawl ? Pathian hrangah sunmang tumpi man aw? Ramthim minung pawl thuthangṭha thawn enter na duh maw?  Ni khatkhat ah Pathian Lal tohkham hmaiih nangmah thawi Amah biak tlang ding hmuh na duh maw? Pathian bawmnak thawn thil cangthei lo mi zianghman a um lo! Curuangah, hihi cing ringring aw, Bawipa cu Kan lungthlitum in pek duhtu Pathian a si. 

Ruah Dingmi Thusuhnak

1.   Thuthangṭha thlen zonak le thlen hrihlonak mipum “Buukawtawn lo tuk mi” na hmuh tikah ziangtin na um/ ziangtin nangmah a lo tham? Zingtin cuithu cu na tuah ding?

2.     Ziangruangah thuthangṭha a thei hrih lo pawl hnenih mission hnaṭuannakah a thlahtupawl le thlahsuah ih a ummi pawl an pawimawh veve?

3.   Thupek Ropi thuthawi pehparaw in ziang thubawhcahnak si na tuah zo? Ziangmi thawn si na mil awk bik? Na thubawhcahnak tuahmi cu na pastor thawn lole Kristian na rualpipawl hnenah ruah aw. Na thubawhcahnak tuahmi hrang le na pumpak nunnak hrangih thla  lo camsak ding in dil hai aw.

BUNG 4 NAK

                                    NA HRANGAH ZO SI MIDANG KUATTU?

“Thlahtu um lo in ziangtin an sim thei ding” (Rom. 10:15)

ZIANG NA TUAH THEI MI A UM?

Thuthlung Thar Kawhhran ih Thlahsuaktupawl

            Bung hmaisa lamih kan hmuh bang khan, Zumtu zozo khal Jesu Khrih le a Thupek Ropi thlun duhtu hmuahhmuah cun thubawhcahnak an tuah a ṭul. Kanmah rori pumpe ih fehsuaktu kan si lo khal len midang thlasuaktu si ding in thubawhcahnak kan tuah hrimhrim ding a si.  Mitampi cun thubawhcahnak tuahin Pathian in midang mission field ih thlahsuaktupawl bawmtu ding ah lam a lo hmuh rero zo. Cun, mi hrekkhat cun hi thuthawi pehpar aw in Pathian ih duhnak ziangha si ding ti hawl rero lai khal nan um. Hrekkhat asilen cu nan thinlung sungah Pathian in nangmah rori fehsuak ding ah a lo tur in nan thei ih, thlahsuaktu pawlkawm hnget le ṭha dinsuak thei dingih thil ṭulmi pawl dap in nan um. Ziangvek ciah dinhmun ah atu kha na ding a si hmanah, Mission hnaṭuannak ah hin thlahsuaktupawl hin ṭuanvo tumpi Khristian sinak a thawk pek ihsin tuini tiang a kai ringring ti hi kan theih ṭul zet mi a si. Dungthluntu cabu sung ihsin kan zoh asilen Khawhhran thuanthupawl hmuahhmuah tiangah, thlahsuaktupawl hi an thupi tuk lawm mam. Tahṭhimnak hrekkhat kan zoh tlang pei.

Thutlung Thar kawhhran hmaisa an hawng karh vivo tikah missionary thlahsuak hmaisabiktu pawlkawm a takin an um thu kan hmu thei. Dungthluntu 13:1-3 kan siar asilen, “ Anṭiok Kawhhran ah profetpawl le zirhtupawl an um. Cupawl cu Barnabas, Niker an ti mi Simeon le Sairin peng mi Lusias, *Herod tetrak thawi a ṭhangliantlang mi Minian le Saul tla an si. Cule anmahpawl cu Bawipa lamih rawngbawlnak tuah in le rawlulh ih an um laiah, Thlarau Thianghlim in, “ Barnabas le Saul kha ka kawhnak san hnaṭuan ṭuan dingah ka hrangah a dangten ret uh,” ti ah a ti.

Hi minung pangapawl hin  ziangvek missions hnaṭuannak pawlkawm khal a thupit zia a takin an hmu. Anlakih mi pathum cu “thlahsuaktupawl” an si ih cule anlakih pahnih cu “thlahsuahmipawl” ah an cang.  Pathian in Barnbabas le Saul (Paul) kha hmakhatte ih anmahten mission hnaṭuannak ramthar ah feh ding in a hruai mai lo.  Cu-aiah, anmah le umnak thawi milaw ih missionary thlahsuaktu pawlkawm- Simeon, Lusias le Manian pawl hlawmkhawmawknak fehtlang in a thlahsuak sawn.  Asi, hi thlahsuaktu mi pathumpawl hin Anṭioh kawhhran pumpi ai an awh (zoh aw Dungthluntu 14:26-27) ih anmahpawl hi Barnabas le Paul thlahsuaktu pawlkawm ih a hruaitu lubaan pawl an si.

Dungthluntu Paul cun mission hnaṭuannak ih a thahsuaktupawl ṭuanvo pawimawh zia a kai. A tualsung Kawhhran Anṭioh ihsi thlahsuaktu mi pathumpawl thawi kutkai aw le naihawte ih an ṭuantlannak thawn a si ding Rom 10:14-15a ah cun hitin, “  Amah cu an zum lo asile ziangtin an ko ding? A thu hna in an theih lo ah cun ziangtin amah cu an zum ding? Cule, simtu um loin ziangtin an thei ding?” tin a ngankhum.

Hitawk ah Paul in Thuthangṭha phuangsuak ding ih thlahsuah a simi le a thlahsuaktupawl ih pehzawmawknak hnget zet a hmufiang. Hitin an pehzawmawknak cu Paul in a simfiang: Jesu’i hmin hlam timi cu zumnak parah sak a si, zumnak cu theihnak par ah sak si in, theihnak cu phuansuahnak parah a ṭhum aw aw, cun, phuansuahnak cu thlahsuahnak parah a ṭhumaw aw. Cuti asiruangah, thlahsuahnak ti mi in a pumpi ih cangvaih dan sangsang pawl kha a khaikhawm thluh, hi a hnuaiih kan hmuhnak zukzuai kan hmuh bang hin:

Pual ih rawngbawlnak cu a thlahsuaktu Antioah kawhhran pawl, a hleice in missionary a thlahsuaktu pawlkawm ruangah a tak ih cansuahter in a um. Missionary hna a ṭuannak thuthawi pehpar aw in Paul le Anṭioh kawhhran hin pehzawmawknak hngetkhoh zet an nei.  A missionary khualtlawn vawi thumnak a suah tinten, a tualsung kawhhran Anṭioh ihsin a pawksuak ṭheu (Dungthluntu 13:1, 15:35, le 18:23).  A vawikhatnak le a vawihnihnak ih a mission khualtlawn a ra tlun tikah, a rawngbawlnak thuthawi pehpar aw mi simthannak (report) pe  dingah Anṭioh ah a feh (Dungthluntu 14:27 le 18:22). A cangan mi le a cangvaihnak pawl ihsin, Paul ih hrangah cun, a thlahsuaktu Antioh kawhhran pawl cu a rawngbawlnak a hlawhtlin theinak dingah an thupi tuk lawm mam ti kan hmu thei.

Thuanthu Liamcia ih Thlahsuaktupawl

Kumzabi 2o nak ihsin tuini tiang, Kawhhran a karhzai le ṭhansohnak ah Anṭioh khawhhran pawl vekin, thlahsuaktupawl hin ṭuanvo thupi zet an kai ringring. Kan ruahtlang dingah a liamcia mi thuanthu nung pawl lakihsin thlahsuaktu pawlkawm pathum ka ruahkhawm dingah ka rawn tarlang ding.

Ahmaisabikah, a hlan deuh lai Can Lailak (Middle Ages) timi ih Khristian phungki pawl thuhla kan zoh ding. Tuini ah mitampi cun phunki innpi (monastery) hi puithiampawl (priests) lole serhthianghlim aw mi nunaupawl (nuns) -hi leitlun sualnak ihsi an thiarfihlimawknak hmun tin kan ruat ṭheu.  Asinan, hi rinhmang hi a dik tengteng ding ti nak cu a si cuang lo.  Kum thawngkhat can karlak AD 500-AD 1500, Can lailak (Middle Ages) ihsin Tuahṭhahsal can (Reformation) tiangah a tlangpi thuin missionarypawl hi phungki innpi ihsin thlah suah an si ṭheu. Cutin, Phungki innpipawl cu mission hnaṭuan cangvaihnak tinkim ih lailibik (central) ah a cang.

            Ṭhimnakah,  Kumzabi paruknak ah Irish mi Columba cun Irish ih phungki tlawng innpi pawl (monasteries) pehtlaihawknak (networks) a dinih cutin cui hmun cu mission hnaṭuan cangvaihnak phunphun ih lubik (headquarters) ah a rawng cang. Ireland saklam ihsin khual a tlawng ih cutin Island ih Iona le Scotland thlanglam tipi kap tiang. Cuihmun cu ṭanhmun ah hmang in, an kiang le kap ih Scotland mipawl hnenih thuthangṭha thehdarh ding ah phungki innpi cu cikcin vekin zawmtu ah a hmang. Midang Irish phungki, Columbanus khal in a hminsal in cui tidan cu a rawn la ve sal.  Khristian Phungki minung hleihnih hruaiin Ireland insin European khawmual tiang, cutin anfeh vivo ih thuthangṭha thlen hrih lonak mibuur umkhawm Franks ti mi pawl an vawn pem. Annih pawl hi France saklam ram ih um an si. Columba vekin an fehnak kipah, Kristian phungki tlawng an din vivo ih cutin missionary thlahsuah ding mipawl serawknak hmunpi tampi an dinsuak.

            Ziangruangah hi Irish missionarypawl le anmah vek minung thawng tampi pawl ih hlawhtlinnak a bangaw aw? Asancu, Pathian zaangfahnak  in, an mission hnaṭuannak dingih ṭulmi sumpai le thlacamnakpawl kha Khristian Phungki Innpi ihsin hai daih ko in an zoh ruangah a si. Thlahsuah ih a ummi Khristian Phungki, Phungki innpi ih rawngkir salpawl in European ram ih mibuur thuthangṭha thawi ciahban lo mipawl hnenih thuthangṭha a takih phurhsuahnak ah ṭhlahsuaktupawl in ṭuanvo thupi zet an thawhsuak ti kan hmu thei.

            Apahnihnakah, Khristian mibuur malte umkhawm kum zabi 18 nak tir lamih a um mipawl thuhla kan zoh sal ding. Cupawl cu Moravianpawl ti an si ih annih pawl hi sakhuanak lamih raltlanpawl (refugees), anetnak ih Germany ram  Count Ludwig Von Zinzendorf ti mi hmun ih bengbel aw pawl an si. Zinzendorf hi mi menmen ti ih kawh a si hrimhrim lo. Cu-aiah, thuthangṭha a thei hrihlo tupawl hnenih thlen a si theinak ding ih ṭhahnem ngai le seherhnak thinlung a nei zettupa ti ih theih a si. Amai kaihhruainak fehtlangin hi Moravian mibuurpawl cu missionary cangvaihnak tumpi ah thleng in an um.  Hi Moravians mibuur umkhawm lakih pumpak mimal hrekkhat cu Indies simlam ramah 1732 ah khan kuatsuah in an um. Cuisi thawkin, kum 28 sungah khan cui Moravian mibuur umkhawmpawl cun ram dangdang 28 ah missionary an thlahsuak.  An hruaitupa Zinzondorf ih thih tiang kum 1760 ah khan cui Moravianpawl cun missionary 228 an kuatsuak ngah.  An caan ih an tawngsan bik laifang ah khan Germany innlam ih a rak umtu thlahsuaktu mipum 10 tin khan missionary pakhat cio an thlahsuak tluk a si.

            Anetabik kan zohtlang ding mi ih ka hrilmi cu United States a si. Kum zabi 19 a cemnet lamah khan kawhhran sungah mission lam vei ih harhtharnak ( revival) nasa zet a thleng. Tuini leitlun killi ih thilthleng rero pawl thawn a bang aw zet, asinan hi harhtharnak hi a hleice in tlawngtapawl lakah a si bik. Cui harhtharnak ih a rawn hrinsuah mi cu Tlawngta Pumpe aw Cangvaihnak (Student Volunteer Movement) ti a si. Kum 1886 kumtir ihsi thawkin, cui cangvaihnakpawl cun kum 50 sungah khan missionary 20,000 lenglo an kuatsuak. Asinan, kan theih ding mi cu hi kuatsuah ih a ummi missionarypawl an thupit tlukin innlam ih si sumpai thawi ṭan rak latu thlahsuaktupawl ih thlacamnak le pumpekawknak pawl hi a ropi ngaingai. Hi kuatsuah rawngbawlhna ah hin minung paziat si pumpe aw ding?  Mipum 80000 hrawng! Pumpe aw ih thlahsuah a si mi mipum 20,000 pawl ih pumpekawknak le cupawl an ṭulsam mi ṭuanvo la ih innlam ihsi rak tuultu mipum 80000 pawl ih ruangah tuisun ni tiang an hnaṭuan mi cun leitlun hi a ṭhazawng in a hruai ta.

Midang Kuatsuaktupawl Hrang Khihhmutu Hrekkhatpawl

Ziangmi thil si Antioch Kawhhran ih mission hnaṭuannak siseh, Caan Lailak (Middle Ages) pawl san ih sersuahawknak sakhaw innpi ih cangvai pawlin siseh, Moravians (Moravians) pawl le Tlawngta Pumpe aw Canvaihnak (Students Volunteer Movement)  pawl zate in bangran ih an neihmi thil um?  Hipawl kan zoh rero tikah an zaten thlahsuaktu (senders) pawl ih an thupit zia,  nun zalam tluanih an tumtah hrampi cu missionarypawl cawm, tha pek le hmun dangdang ih kuatsuah a sizia kan hmu thei. Cuvek thotho in, tuini khalah missionary a thlahsuaktupawl ih lungthin ah rak thlahsuaktu hmaisapawl ih lungput vek cekci hi kan ṭultuk mi a si.

“ Ziang maw?” tin thu na sut tla a si men thei. “ Cuti asilen thlahtu ṭha si ding cun a hlan laiih Moravianspawl le Christian hmaisapawl ( Monks) ih nundan vekin ka nung ding tinak maw si? Si lo, cuvek cekci cu a si a ṭul hran lo.  Amahlawngte cu Kristian phungki (monks) sanlaiih ta siseh, Moravianpawl sanlai ih ta le a dangdang thlahsuaktupawl ih thuanthu le cangvaihdan pawl hi tuini ih thlahsuaktupawl hrangah zohṭhimtlak zet an si ti lam sawn a si. Tui kan san kum zabi 21 nak sanih a nungtupawl ih nundan le khai sanlai ih thlahsuaktupawl ih nundan a bang aw cekci ding a si ti lam  a si lo.  Amahlawngtecu, hi a liamcia ih rak thlahsuaktu mi hratkhawkhengpawl nun ih tidan ihsin thil tampi kan zir thei ahleicein an thuhla kan zingzawi tikah an zate nundan kha thil pakhat in a funkhawm thluh ti kan hmu ding. Asilen cui thil pakhat cu ziang a si?  An nunnak ih phurnak hrampi a petu: Missions le thlahsuah duhnak thinlung thuk tak nei ih an ṭhahnemngainak kha a si, cuti an ti tikah thuthangṭha in leitlun kiltin a den suah thluh theinak ding an ruahsan.  Cumi cu catlo ih anmah a buan le turtu seherhnak lungthin ih cawllo ih anmah tuult  a si.  Cuih phurnak, serherhnak le thathonak cu a si tuini ih tlahsuaktu pawl khal hin kan cawn le lak ṭul mi cu.  Zo zokhal thlahsuaktu a si ta poh cun hithu hi kan thei ringring ding a thupi:

Missions hnaṭuannak ih thathonak le missionarypawl hrangih seherhnak thinlung cu a thlahsuaktupawl hrangih ṭhumawknak lungphum a si. 

Hi sehherhnak le thathonak thinlung hi thlahsuaktu pakhat hnu pakhat tlunah danglamnak a um thei.  A tehnak lole a tehdan hran a um lo. Nangmah in thlahsuahnak thinlung thawi nuam na ti zawngzawng na ṭhangsoter in na hmangsuak thei. Asinan, na thlahsuahmipawl hrang le an hnaṭuannak hrangih na thathonak le ṭhathnemngainak lawngte a thupi bik miangmo mi a si, ziangvek in na nundan na hmang le na tlangleng a si hman ah.

Thlahsuaktupawl Hrangih Mawhphurhnak Tawhfung Pahnih

Pathian in fehsuak lo in umhmun ih umding ah a lo hruaisawn i na theih le cumi ah thlahsuaktu si sawn dingin thubawhcahnak na tuah a si ah cun, na hrangah ṭuanvo sunglawi  le mawhphurhnak maksak zet a um mi hi na hmuh thiam a thupi ngaingai ih cumi cu a kaphnih ih na mawhphurhnak thupi bik an si.   Aw si ko, thildang khalah thlasuahtu pawl bawmtu tivek le thildang tampi khal na thupitnak a um tuk ngai ko. Asinan, hi thil pahnih hi na thlahsuahmi missionary a rawngbawlnak ramsung theng ding le cutawk ih um ih nasa ngaingai ih a cangvaih theinak ding ih thil thupi bik pahnih an si.

Mawhphurhnak pakhatnak No 1. Sumpai thawi bawm

Missions kan timi ah hin sumpai a tel. Khawitawk ah an ṭuan ih khawitawh ah an feh ding khal a si hman ah- missionarypawl hin sumpai thawi bawm an ṭul.  Thlatin hlawh, haidaih aw in hriselnak lam hrang sumpai, hnaṭuannak fund, hlirthei le feh suksohnak fund, nauhakpawl tlawngkainak, vantlang humhimawknak, rawngbawlnak ihsin tlawn sukso nak , cawlhtikih eiin ding—cutivekin sumpai ṭulnak tampi missionarypawl tlun khalah missionary ih a fehsuak lo tupawl ih ṭulmi vek cekci a um ve. Hi a tlunih rellang mipawl le thil dang hihnakih tam khal a si thei, pawl hi na cawmmi missionarypawl ih sumpai ṭulmi an innsang hrang le rawngbawlnak hrangah a si thei.

            Thlahsuaktu pakhat vekin tu khawitawkah na um, a tlunih rellang mipawl na tuah zo maw? Ahmaisabikah, theih ringring ṭulmi cu missionary tampi cu sumpai thuthawi pehparaw ih an harsatnak sim le rel an hreh zet. Ziangruangah a si ding? Asancu, an rualpi thlahsuaktu le kawhhran in sumpai thuthawi pehparaw in thutiamkamnak thil dang rawngbawlnak tampi khal an tuah in an nei ve ti an theih ruangah a si. Anhrangah  sumpai thuthawi pehpar aw ih an rualpi pawl siseh Kawhhran siseh hawn dil bet le sim ding cu nuam an ti lo zet. Cutiasilen, na thlahsuahmi missionarypawl sumpai thuthawi an ṭulmi simsuak ngam dingah ziangtin na bawm thei ding?  Apekte ihsin na thlahsuahmi missionary cu sumpai thuthawi pehpar aw ih a ṭulsam mi rel ngam dingin bawm aw. Sumpai thuthawi pehpar aw ih an ṭulsammi thuhla suh ding kha na ṭuanvo a si. Sumpa’i thuhla relpi thei dingih na awnawk tikah cutin na missionary kha sumpai lamih a dinhmun le sinak dik tak rel lang ngam dingah na bawm thei ding.

Thlasuaktu dinhmun ih um ti cu na thlahsuahmi missionarypawl ih an ṭulsam mi sumpai thuthawi pehpar aw mi ṭuanvo na laksak ti ai a si.  Thupek Ropi hlensuah nakah ka ti theitawk in ka bawm ding ti tikah kan sumpai neihmi zatek ih ṭhahnem nawn mission hnaṭuannakah kan pek tengteng a ṭul  tivek thudik khohzetih kenkawh ṭul a um hran lo. A um siseh la ziangzat a si ding? Asannak cu thil tampi a um thei, na sumluhnak le sumpai thuthawi pehpar aw ih na tiamkamawknak thaw tla in a pehpar aw ding.  Pathian hnenih thlacamnak thawi ziangzat peksuah ding tile zawi hnenah ka pe ding ti mi cu hlanawk nak nasa zet neih a thupi zet ding.  Thlahsuahtu hrekkhat cun tluangtlam ten nung le khawsa in an sumpai hman ai le nawmsak deuh ai kha mission hnaṭuannak hrang an pek tam caan tla a um. Hrekkhat ve thung asilen an sumdawnnak le hnaṭuannak ah hlawhtlinnak an co dan le hmuhdan ih zirin missionary thlahsuahnak hrangah peksuah dan an nei. Dan pakhat a ṭhabik thlun thluh ding ti mi cekci a um hran lo.

            Misionary malte hnenah sumpai tamtham pek lole thlahsuahnak pek kha mi tampi hnenih maltete ih zemdarh hnakin a fimthlak deuh men thei. Ziangruangahtilen, ṭhimnakah, missionary pakhat khat hrangah thlatin minung 20 hnenih $ 50 sumpai hawlhmuh (raise) hnakin za hnenih thlatin $10 zatete sumpai hawlhmuh kha nasa ngaingai in a harsa sawn. Aw a si ko, na kawhhran lole pawlkawm in mission hrangah ahleice ih tikcu can (program) le sumpai hawlhmuh dan ruahhmannak can a nei a si ah cun, pumpak missionarypawl  hnenih bawmnak (support) na pehzawm ih pe ding ih na pumpekawknak  le kawhhran fehtlang ih bawmnak na pekmi kha hlensuak dingah buukawtawn (balance) ih na pek thiam a thupi.  Cule hi thu hi thlahsuaktupawl in kan cinken ringring dingah a thupi, a cancanah cun thlatin ih Missioanrypawl kan thlahsuaknak sumpai kha  mission hnaṭuannak karhzaimi phuhhruknak, thil man kai vivo le ṭumi thildang pawipeng silhkhahnak hrangah kan punter a ṭul.

Mawhphurhnak Pahnihnak No 2: Thlacamnak Thawi Bawm

Thlahsuah ih a um ding mipawl sumpai thawi na bawm le ṭanpi hi thil ṭul tuk mi a si. Asinan, sumpai thawi na bawmnak hnak hmanih thupi le ṭulbet sawn mi cu thlacamnak thawi na bawm hi a si. Ahman! Mi hrekkhat cun , “ Mission hnaṭuannak hrangah thlacam a thupi ti cu mi hmuahhmuah in an thei tluh ual” tin kan ti men thei. Asinan, a thupit zia thei hman nungla, mi tampi cun  hi thil thupibik mi ah hin kaa ih rawngbawlnak ( lip service) tiang lawng kan pe, a taktak in thla kan cam mal zet tin ka ruat.  Thlahsuaktupawl in an theih tengteng ding mi cu an thlacamsaknakpawl kha an tlahsuahmi – missionrypawl hrangah a thupi tuk ti hi a si. Ngaingaite’i kan tilen cu, thlahsuahih a ummipawl hi a tak rori in Pathian thutak a theihrih lo pawlih thlaraupawl thawn thlarau lam doawknakah nasa tak in an bei aw a si.  Can tampi ah cun cui thlarau lamih doawknak ih nehnak le sunnakpawl tla cu dunglam ih thlahsuaktupawl ih thlacamsaknak parah tla nasa zetin a ṭhumaw aw.  Missionrypawl hi hlawhtlinnak le nehnak hi thinlung tak thawn hi vekih dunglam ihsi nasa zetih thla rak  camsaktupawl ih pumpekawknak tlunah an ṭhumaw thuk zet.

            Nang thlahsuaktu, thla nasa sin in na cam a ṭul.  Na thlacamnak cun na thlenbanlonak ram.. .ahlatnak hmum tampi missionarypawl le an hnaṭuan a danglamter a ṭul hrimhrim. Hiti thlacam, “ Bawipa, zangfahten Missionarypawl hmuahhmuah thlawsuah pe hram aw” , ti hi mi tampi ih thlacam dan vualval a si. Asinan,  keicun “shotguns  thlacamnak”  tin ka ko. Asancu, shotgun meithal cun vawi khat kahsuah ah meithal zim ihsin meithla mu fatete tamtak a kapsuak ih asinan cui meithal mu fatete ih a zam mipawl cun hmuitinmi (target) a kapfuh in a kap fuh lo thei.  Cuvekin, “ shotgun thlacamnak” cun hmuitin a kaapfuh tengteng ding ti lam hnakin a kaap fuh khal a si thei, cun a ṭhelh khal a si thei ti mi a sawh. Na thlacamnak cu “ rifle thlacamnak” (rifle prayers) : miphun  pakhat khat lole mibuur umkhawm pawl a hlece ih bah mi, an ṭulmi hrangah le an dinhmun hrang ti’n na neih a ṭul.  Ziangtin na thlahsuahmipawl hrangah tui thlacamnak vekin thla na camsak ding?  Nelawzet le pawhawzet ih na thlahsuahmi missionrypawl thawi nan pehzawmawknak hmang in.

            Missionary hmuahhmuah hrangah hleice thlacam “ rifle prayer” na neihsak thluh thei lo. An zate hrangih hleice thlacamnak neih ding ti mi cu thil cang thei lo lawlaw a si. An hming na thei lo lawng si lo in an ṭuannak hmun le ram tla na thei cawk lo ding. Asinan, Pathian in na thinlung sungih seherhnak le veinak a lo pekmi missionary tampi lak ihsin mi malte thlang in an hrangah hmuarnei zetin thla na camsak thei.  Cui na hril suah mipawl hrangah cun taimaksuahin, nitin, kartin, thlatin cawllo in thla camsak aw.  Thlacam thupi an lo kuatmipawl tla ulut zetin siar ṭheu aw la, cutin mission hnaṭuannak ramsung ( mission field) ih an um tikah email in siseh, cakuat in siseh, phone in siseh an hrangih na thlacamsaknak le thlazaang peknak kuat ringring aw.  Inn ah an ra tlung ti na theih tikah, phone ih na biak lawng siloin hmaikaa rori in anmah tawng in thlacamsak aw.  Ziangruangah saw hi pawl hmuahhmuah hi na ti a ṭulnak san? Asancu , cuti na ti tikah an hrangah, an rawngbawlnak, le miphun pakhat khat lakih an cangvaihnak hrang pawlah hmuar nei sin in na bawm thei ding. Cutin, na thlacamnak  cu “ rifle thlacam”  si in: nangmai lamah hmuitin mi felfai tak na nei ding ih , cutin na thlacamnak cu Van ih kan Pa’i hnenah na kaapsuak camcin ding a si.

            Asilen, ziangtin ha cui thil cu na tuah thawk thei ding? Hi tawk ah thurawn hrekkhat kan tarlang ding.  Midang thlahsuaktu lole thlahsuak dingih thinlung a neitu, ahleicein missionary lole missionarypawl pakhat khat nan seherhmi le veimi bangawpawl thawn hmunkhatah kawmkhawm aw uh. Nangmah le nangmah siartlakin missionary na thlahsuahmipawl hrangih thlacamnak neih sak ringring dingah pumpe aw. Cui an hrangih siartlak thlacamsaknak neih ding thubawhcahnak na tuahmi cu nangmah pumpak nunnak ih na kaihhnget ding siseh, na rualpi thlacampipawl hnenih na langter ding mi a si.  Zarhkhat ah vawi khat a silolen thlakhat ah vawi khat tivekin cui missionary nan thlansuahmi hrangih thlacam ding cun punghman ten tawng aw ṭheu au (cun hican hi pumpak lawng sinawn loin a buurpi (pawlkawm) hmin in cakuat ngan can ah hmang uhla, nan lakih pakhat khat cangantu ah ruat aw in cutin nan zaten thazaang peknak le nan thlacamsaknakpawl kha ca in kuat uh).  Cun khatlamah, nan thlahsuahmi lole thla nan camsak rero mi missionarypawl cu nan hrangah siartlak an si theinak dingah an rawngbawlnak thansohdan, cangvaihdan le thlacam dil duhmipawl a khaat tawkin ca thawi rawn lo theihter ding ah dil fawn uh ( Hi thil hi tulai internet le email um hin nasa zet in a awlsam ter). Ziangruangah? Asancu taimaizet ih an hrang thlacamsak dingah tu le tu an rawngbawlnak le hnaṭuannak ih thilcang mipawl nan theih a ṭul. Hmunkhat ih cuti pumpe aw ih nan pumkhawmnak ihsin hmuar nei sin in thlahsuah ih a ummi missionarypawl hrangah thla nan camsak thei ding ih cutin a rei hlanah “ rifle thlacamnak” a takih hlensuaktu nan si ding. Cun, khatlamah Satan ve thung asilen cui nan meithal kahsuah mipawl ih ngah lo ding in relhnak le beunak hawl in a rak vavai ve ding.

Midang Thlahsuaktupawl Hrang Netabik Ralrinpeknak

Maw nangthlahsuaktu, na ṭuanvo le liangpar ih a ṭhumawmmi mawhphurh kha thupitter lo in um sual pang hlah aw! Tuini ah missionarypawl thlahsuah an si tikah, kawhhran tambik in kan uarmi le thupitter mi cu thlahsuah ih a umtupawl kha an si bik, cuti a si tikah a thlahsuaktupawl kha ṭuanvo thupit lo deuh kaitu lole pawimawh lo deuh vekin kan ruatsual pang ṭheu. Asinan, angaingai te ih kan ti asilen cutivekin thlahsuaktu le thalsuahmipawl karlakah hmuhnak danglam kan nei ding a si hrimhrim lo. Jesuh in Khristianpawl hmuahhmuah hi Thupek Ropi kimter hna ṭuanvo la tlang dingah in ko a siahcun a thlahsuaktu le thlahsuah ih a ummipawl ih thupit dan le pawimawh dan hi a theihrihlotupawl hnenih thuthangṭha phurhsuahnakah bangrep in an thupi veve.

Riahsiatzazetin, Kristian tampi cun tuini ah mission thlahsuahhna ṭuanvo sunglawi le thupizet cu thlahsuaktupawl missions pawlkawm (missions organizations) kutah kan ret. Cumi ih a rahsuah cu,  an kawhhran ih missionary a thlahsuahmipawl parah siseh, missions ramthar (mission field) rawngbawlnak khalah ṭuanvo nei mal ih an ruahawk lawng siloin mawhphurh neilo tlukah tla an ruat aw ṭheu. Asilen, in hmusual hram hlah uh. Missions pawlkawm (Missions organizations) pawl hi tuini ah an thupi tuk. Asinan, missions pawlkawm phunphun kan theih mipawl hin ziangti zawng khalin sumpai le thlacamnak thawi missions hnaṭuannak ih mikip bulpak ih kan mawhphurh hi a deem in a nepter ding a si hrimhrim lo.

Thlasuahtupawl, nan thupi tuk lawm mam!  Kawhhran santhuanthu a liamcia hmuahhmuah kan zohsal tikah tuini tlukih a theilotupawl hnenih runnak thuthangṭha ausuahpitu le phursuaktu ding missionary tampi kan ṭul a um hrih lo men ding! Tuini ih Bawipa in a huham thiltitheinak thawi ram dangdang ih Thlarau Thianghlim cangvaihnak thawi zumlotupawl lakih a phuansuahawknak vek hi Penticost ni hnu ah a tam lo men ding! Thlahsuaktu le thlahsuahmipawl hmuahhmuah kutzatial kaiih Bawipa kan hawn kar tlang taktak ding le a kutcak kan lakih nasa sinsin ih rawng langsuak ding hawn hmuh ding cu ziangtluk thil cak um za a va si so!

Na kehlam kut kha thlahthlam hlah! Thlahsuah hna ih na mawhphurh kha mission agencypawl tun men hlah. Cuhnak khalih a thupi mi cu:

Missionary na thlahsuahmipawl ih lamzin zawhmi hmuahhmuah zawhpi ve dingih lungkimnak na neihhlan sung cu mithlahsuaktupawl (sending team) ah tel aw hlah!

Ziangruangah saw cuti ka rel? Asancu, Runnak thuthangṭha a thei hrihlotupawl lakih hnaṭuan hi a awlai lo. Tuini ih kan kawhhran tambikpawl cu piangthar hmin cazin tampipi neih le kawhhran thar a tam theibik ih din hi thupi bikah kan ret. Missionarypawl lak ciocio khalah hivek lam ih rawngbawlnak a nei pawl hi “ a hlawhtlingmi missionary” ti ah kan ruat ṭheu. A ngaingaite ih kan ti ah cun hiti a lenglam ih kawhhran din le mi piangthar cazin men zoh cun rawngbawlnak hlawhtling ti ih thuṭhennak tuah mai ding cu a si lo. Mission ram hnaṭuannak ciocio khalah mi hrekkhat zumlotupawl cu thuthangṭha an theih mi kha awlsamte ih cohlang le a miphun pumpi khal ih thuthangṭha duhtu an um. Asinan, hrekkhat thuthangṭha thei hrihlo mibuur umpawl – runnak thu thei hrihlotupawl lakih a tambikpawl an si mei thei- pawl cu an hnenih thuthangṭha a thlen le an cohlannak dingah tik le cu tambik a rei a ṭul. Piantharnak taktak nun an congah ding hi a fuum zet tla a si thei. Cuti a si tikah, anlakih fellowship lole kawhhran din a si thei nak dingah cun kum tampi can laak khal a ṭul thei fawn.

Can rei tak hngah ṭul si bang ta sehla hngak thei dingah na tiar aw maw?  Pathian kutcak mangbangza in a theihrihlotu mibuurpawl a tham ih anlakih a cangvaih tiang thinsauten na hngak ding maw lole na missionary thlahsuahmipawl hnenah cawplecilh rori ih hlawhtlinnak nei tengteng dingah na phut ding? Thlahsuak dingih na hrilmi na missionarypawl cu a ṭul a si ah cun kum 5 sung, kum 10 sung, kum 20 sung lole cuhnakih tam khal sumpai le thlacamnak thawi bawm dingah na tiar in na pumpe aw thei kem?  Leitlun mipawl ih hlawhtlinnak an ruahdan (world’s opinion of success) men in na lungput lo hnaihnawk hlah seh. Hmakhatte ah hlawhtling vurvo dingah ruat aw hrimhrim hlah! Cuhnakin na thlahsuahmi missionarypawl parah lungput hnget nei aw la thinsaute in Bawipa’i cangvaihnak hngak thiam aw.

Kan Bawipa Jesu Amah rori khal in mi zokhal kan zaten a dungthluntu si a duhtu hmuahhmuah cu a rawngbawlnak sungih tel dingih pum kan pekawk hlanah “ a man ṭuat” ta dingah in ngen (Luke 14:28-3). Cuvek cekci in , thlahsuaktupawl khal in thlahsuahmipawl bawmnak mission pawlkawm (mission team) sung tel dingih thubawhcahnak a tuahhlanah a man ngunngaih zetin a ṭuatta tengteng ding a si. Na thlahsuahmi missionarypawl ih cemheu le ṭul dingmi ṭuat ciamciam dingah na tiar aw maw?  Missionarypawl hi in lamih thlahsuaktupawl  in an hlawhtlin canah siseh an hlawhsam can khalah siseh thlathlam lo in bawmnak kut an san ringring ding maw ding lo ti ruatih an thinhar cu retṭhat ah  an ṭuanvo le mawhphurh hrimhrim hi a rit cia mi a si. Rinsantlak, ṭhumawknaktlak, punghman ih pelhlo ih thlahsuaktu lole bawmtu hi an ṭulbik mi a si. Missioary thlahsuaktu na si le cuvek thlahsuaktu si hram aw. Manṭuat ciamciam ih thlahsuaktu, mai thlahsuahmi missionarypawl parih ziangkim thil cangmi asia ah siseh, a ṭha ah si seh , Pathian mithmai zohih mawhphurhnak la ngamtu hi tuini mission thlahsuaktu le zumtupawl lakah hin kan va ṭul tam em!

A Sunthu Bihciannak

Thlahsuaktupawl le an thlacamnak

Kum ziangmaw tizat a liam zo mi ah khan missionary pakhat le a nupi cu Africa ah missionary rawngbawlhna ṭuan in an um. An mission field ih an fehhlante ah anmai khua ih an kawhhran cun rinum zet ih an hrang thla camsak ding ah thu an tiam. Cutin, an thutiamkam mipawl cun an nupa cu a cakter zet. Cutin, cui missionary tei nupa cun an mission field lam pan in an pawk. Vanduaitlak zetin, kum hnih an rei hnu ah cui missionary cu a duhdawt bikmi a nupi le a neihsun sungsuak fanau thar cun African natnak (African desease) ruangah an thihsan. Amah khal cu cui natnak cun a sualbuai ciamco ih cutin, thlakhat lawng dam dingah can a nei thlang. Cumi ih ruangah cun, sim thancianak um lo in lawng thawn an ramah cun a tlung.

An khua ah cun tluang ten a thleng. Tlawngkai nithum zanlam ah cun cui thi zik ih a dam lo rero le a kekkuaimi missionary pa cu zarhtin ih an kawhhran in thlacam khawm an neih nakah cun telve dingah Biakinn a pan cih. Dunglam ih an retmi tonak ah cun thawm lo ten a to ih cutin daiziar in an thlacam a ngai.

Thlalcamkhawm an ṭheh ah cun , a tonak ihsin a tho ih cutin nuamnai ten Biakinn hmai pulpit lam cu a pan. Cutin, thlacamtupawl ( prayer group) hnenah cun hitin:

        “ Thla nan camsak mi nan missionary kha keimah ho khaw ka si. Ka nupi le fa cu Africa ramah ka phum ih kei khal thi dingah ka ra tlung.  Nan thlacam mi ka ngai ih ka mang a bang, nan lakih mi hrekkhat cun nan missionary hrangah thla nan cam, asinan nan thuthiam mi len nan bawhpelh fawn. Nan thlacammi hmuahhmuah khal nanmah thawi a pehpar aw mi le nan kawhhran thuhla lawnglawng a si, asinan nan missionary nan hngilh. Atu ah cun fiangten ziangruangah ka hlawhsam ti ka thei zo. Dunglam ihsin hridai thawi hngetkhoh zetih in rak pawk ding kha nan tuah lo ruangah a si"  ti ah a ti.

Thlahsuaktupawl in hi thuanthu nung riahsiat umza ihsin ziangsi kan zir thei mi um? Thlacamnak ih huham hi thiltitheinak hram a si.  Na missionarypawl hrangih thlacam hi loh theihlo ih ṭul nguaingo mi a si. Sumpai ka kuat takah tin thlahdah zetin thlacam lo in um men hlah aw. Hi thu ih thlahsuahtu zo ta poh khal in thupi ah kan ruat a ṭul hrimhrim. Na thlahsuahmi missionarypawl ih dam le thih- nun rori khal kha a thlahsuaktu nangmah ih thlacamnak parah tampi a ṭhum aw aw ho khaw. An rawngbawlnak ih hlawhtlinnak le hmuar khal kha dunglam ihsi nan thlacamsaknak parah tampi a ṭhum aw. Cuhnakih thupi sinmi cu, a thei hrihlo mi mibuur pumpak 6,950 pawl ih kumkhaw nunnak khal kha rinum tei na thlacamnak parah tampi a ṭhum aw a si.

Thlacamnak hi thlahsuaktupawl ih mawhphurh hmaisabik a si.  Midang hrangih thla ka lo cam sak ding ti ih lungkim men cu, Africa ramih missionary a thlahsuaktu kawhhranpawl bang khan a awl tuk. Asinan, thlahsuah ih a ummi missionarypawl an hlawhtlin theinak ding le an rawngbawlnak a karhzai theinak ding hrangih ṭulbik mi taimak suah ih hmanhmante thlacamsak cu thil harsa zet, thupibik ih ret lo ah cun awlai lo zet mi a si. Hi hna hi mak lo ah siar hrimhrim hlah aw!

A tu rori khalah hin na thlahsuahmi missionarypawl in na thlacamnak hi an ṭul tuk! Na thlahsuahmi missioarypawl thawi nan thuthlung lole nan thutiam kha tharter sal ringring aw. A cancan ah cun an hrang thlacam tla na rak daithlang a si thei, cuvek a si khal len tui thawk in taimak suahin hmanhman ten thla camsak aw. Tuini hi an hrangah rinumtei thla na camsaksal nak ding hrang tharthawh nak ni le canṭha s ihram seh. Na missionarypawl in na thlacamsaknak authawm an ngai pang maw? An hrangah ziangti vekin si thla na camsak?

Missionary kan thlahsuahmipawl in kan thlacam au aw theih ding nitin le zantin an bawh[1]

Ruah Dingmi Thusuhnak

1. Ziangruangah si dungthluntu Paul in “ Thlahsuahmipawl” le “ Thahsuaktupawl” hi bangran in a uarnak san?  Amah a thlahsuaktu Kawhhranpawl thawn ziangvek pehzawmawknak si Paul in a neih? Paul le amah thlahsuaktupawl ih pehzawmnak hi tuini ih mission rawngbawlnak hrangah zohṭhimtlak a si maw?  Ziangruangah a si na ti in ziangruangah a silo na ti thei ?

2. Khristian hlan Phunki siseh, Moravians siseh, lole Student Volunteer Movement ih memberpawl ih tuarnak le tuini ih Khristianpawl ih tuarnak kan tawn mi ah danglamnak a um maw?  Ziangruangah a hlanih thlahsuaktu hmaisapawl khan an missionary thlahsuah rawngbawlhna  kha hmailam nawr vivo thei dingah thathonak thawn  an fehpi thei?

3. Nan hrangah zole si thlahsuaktupawl, ziangtluk thlacamnak le peknak thawn thlahsuahnak ah na tel?  Hi thlahsuah hna ah hin ziangtin tu hnakin ṭangkai sawn in na tel thei ding? Mission thlahsuahnak ih a man na ṭuat zo maw?

4. Na hrangah zo le si thlahsuah ih um ding, thlahsuaktupawl ih thuhla na siar le zingzawi tikah ziantin hi bung sungih kan ruahkhawm mi in nangmah ah thu a lo sim?

---

[1]. Hi a tlunih missionary thuanthu nung kan ngan mi hi Steve Murrel’s ih “ When Churches Don’t Pray”,Victory Fire, 2 (4) July 43:26-27 ihta laksuah mi a si.

BUNG 5 NAK

 NA HRANGAH ZO LE SI KUATSUAH IH UM?

Cule BAWIPA in, “ Zoso ka thlah ding? Zosi kan palai a si ding?” a ti ka thei. Cutikah kei in, “Keimah ka feh ding! I thlah aw!” ka ti (Isaiah 6:8)

HIMI HI NANGMAH NA SI THEI MEN HOKHAW!

Hmaisabik Thilpawl cu Hmaisabikah

Bung hmaisa ah khan Thupek Ropi hlensuah a si theinak dingih midang missions field ih thlahsuahnak hrang bawmtu ih tel a thupitnak le ṭulnak thuhram hrekkhat kan zoh zo. Tui bung sungah cun mi hrekkhat Pathian in nangmah rori kha thlahsuah ih a um ding mi missionary hrangah lo ko vekih a ruataw tu le a thei aw tupawl hrangah theih tengteng ṭulmi thu le hla kan zoh peh ding.

Kan luhthuk hlanah, simfiang ta duh mi ka nei. Hi bung sungah hin punghman (regular) missionary si dingah ka lo sawm (challenge) menmen a si lo ( “Punghman” missionary ti tikah mi zokhal thuthangṭha thlencianak ih missionary ṭuan a duhtu siseh thuthangṭha thlenban lonak hmun ih missionary ṭuan a duhtu an pahnih in a huamtel). Hivek ih missionary rawngbawlhna hi hmailam ah kan ṭultuk lai ding nan, tuiṭum ih ka relmi, ka uar duhmi cu hivek ih missionary rawngbawlnak hi a si lo.

Ziangruangah? Asancu Bung thumnak lam kan zohsal a silen, kan leilungpi hin “punghman”(regular) missionary cu 285,000 tlukih tam thuthangṭha thlencianak ah asilole thuthangṭha ih a thlenban theih mi mibuur umkhawmpawl hnenah an ṭuan rero. Na cing lai maw? Khai Bung thumnak thotho ah khan, thuthangṭha thlenbanlonak hmun mibuur umkhawmpawl hnen ih missionary a ṭuan rerotu cu mipum 15,000 lawng an si hleiah, cupawl lakih thlahsuak dingah missionary amalbikah 100,000 lohtheihlo ih ṭul le mamawh a si. Khai missionarypawl kha cu a hmahruaitu lole thuphurtu missionary hmaisapawl tin ruat aw. Ahman! Punghman “ regular” missionary khal kan ṭul tuk lai, asinan hi tawk ah nunau le mipa, fala le tlangval, nutling le patling missionary hmaihruai (frontier), thuthangṭha a thlenbanlonak hmun ih mibuur umpawl hnenih runnak thuthang phurtu ding hi kan leilungpi in a ṭul tuk lawm mam! Tuini ah missionary hmaihruai (frontiers) pawl hi hmuh ding an vang zet: Nutling le Patling, mission hmatawng ih um huam, Khrih thuthangṭha a thlen ih a thlen banlonak ram thim le phunhnam dang pi lakih thuthangṭha ausuahpi hna le kawhhran din hna atcilhtu hi kan leilungpi in a ṭul bik mi a si .

Cun, hi Bung sungah hin mi pakhat khat Pathian in thuthangṭha a thlen hrihlonak hmun ih missionary le rawngbawlnak a neipawl hnenih indirect ih tel duhnak neipawl thuhla khal zir tlang a si fawn ding. Indirect ti ih ka duhsan cu ziang a si pei? Ka tiduhsan cu mi hrekkhat cu midang zirh (training) bawm dingah tlinnak (qualification) ṭhaṭha a nei tla nan um thei, ahleice in western ram a si lo mi (non-western world) ih umpawl hnenah, cun mi hrekkhat asilen cuvek ih thiamnak a neipawl cu thuthangṭha a thlen ban hrihlonak hmun ih missionarypawl vehvai in zirhnak (training) an lakah an va tuah ding. Thuthangṭha a thlenban hrihlonak hmunih missionary a ṭuan rero tupawl zirhnak (training) va pek hi thil thupi tuk mi a si ziangahtile cuvekih kap tin ih an tahhriamawknak cun hmailam ih an kekarnak hrang ralṭhatnak , thiamnak rintawkawknak le ruahsannak nung a peklawng si lo in, a ralai ding mi thil hmailam thu rak thlir thiamnak le fimnak khal a pe tel fawn.

“Thlahsuahmipawl” le “ thlahsuah ih a um mipawl zirhnak petupawl” hin a thuahthip ih seherh le veimi thuhmun tampi an nei. Himi bung sungah cupawl khal cu ka rawn rel vivo ding. Ahmaisabikah,  tawite in cubang thuthang ṭha a thlen hrihlonak hmun ih missionarypawl zirhnak petu ih thupitnak malte kan zoh hmaisa ding.

Missionary Zirhnak Petupawl (trainers) hrang

Thuthangṭha thlenban hrihlonak hmun ih runnak thunung a kengtu missionarypawl zirhnak (training) pek hi thiam a ṭul zet, nangmah ih ṭangkainak a let sawmthum, sawm ruk, le zakhat tiang khal karhzaiter na si ruangah ( Thlaci thlaktu tahṭhimnak zoh aw- Mark 4:3-20). Nangmah, zumtu mi pakhat lawng, cuvek theihlonak hmun le ramhla ih missionarypawl training va pe ih na pawhsuah hnakin, cuvek thinlung a neitu minung pawl hlankhan in zirhnak (training) na rak pek cia le, thuthangṭha a thlen ban hrihlonak hmun hla tampi ih mibuur umkhawm pawl hnenah nangmah thawn kutkai aw ih ṭuantlang in cupawl tla cu kilkip le hmuntinah an pawksuak ve ding.

Cuih hna cu si atu ah ka ṭuan rero mi. A liamzo mi kum 25 sungah khan, a hmaisabikah USA ihsi thawkin  a tu Philippines ah, cutin thuthangṭha a thlenban hrihlonak hmun ih mibuur umkhawm pawl hnenih missionary rawngbawlhna a ṭuantupawl zirhnak ( training) pe in ka can ka hmang. Ziangtluk mi vanṭha ka si! Mibuur umkhawm pakhat lawng hnenih thuthangṭha thlen ai ah mibuur umkhawm tampi hnenah thuthangṭha thlen theinak ka zirhmi tlawngtapawl, an rawngbawlnak le missionarypawl fehtlang in canṭha ka ngah ve. Ka zirhmi tlawngta hrekkhatpawl cun tu ah Nepal, Katmandu ih a um mi Tibetan Buddists siseh, Mongolia, Ulaan Baatar ih a ummi Mongolian mipipawl siseh, Nigeria, Pakistan le Albania ram sungih Muslim a umpawl siseh, USA ih Somali refugee pawl siseh, Kawlram sung hmun dangdang ih Buddisht a um mi le tlangmi (tribal peoples) pawl siseh, Thailand le Cambodia ram ih umpawl, China ih phunsang tlawngta hrekkhat siseh, Philippines ih Muslim Madanao le Maginadanao pawl tampi Khrih hnenah an hruai. Cuvekin an hmin cazin cu a um vivo thei lai. Cupawl ruangah cun si mangbang riai lo in “ziangtluk mi vanṭha ka si!” ka ti thei nak.

Mi hrekkhat cu keimah vekin Pathian in midang zirhtu dinhmun in lam a lo hruai rero tla a si thei. Bible tlawng thawi a pehpar aw mi cross cultural theology le Bible interpretation zirhsuahnak ihsin missionarypawl zirhtu (trainers) ah ka rawng ṭang vivo. Hmatawng ( frontier) missionarypawl hrangah Pathian thu zirnak (theological education) neih hi ( Bible tlawngah siseh, cun graduate seminary ah siseh) a thupi tuk mi a si, cuvek thotho in thildang ziang kan tuah mi khalah zirhnak timi hi a ṭangkai. Ṭhimnakah,  Tuini leitlun hmun tambik ih thuthangṭha a thlen hrihlonak hmun ih mibuur umkhawmpawl ih an ṭul zetmi cu harhdamnak (basic primary health care) a si ih si le vai lam thiamnak neitu na si ah cun cuvek hmun ih missionary a fehtupawl lole harhdamnak lam hnaṭuan a neitupawl zirhnak (training) peknak fehtlang in Pathian in lo hman a duh khal a si thei. Cun, Mirang ṭong thiam hrangah can remcang zet a awng aw fawn. Mirang ṭong hi thuthang ṭha a thlenban hrihlonak khua le ram tambik cun thiam duh ah an hawl rero. Cuvekin, mirang ṭong na thiam ah cun midang Englsih zirhnak -Teaching English to Speakers of Other Languages (TESOL) fehtlang tla in na bawm thei.

Theihrihlotu mibuur umkhawmpawl in an theih theinak ding hrangah zirhnak (training) a phunphun peknak hmang in kan tel thei cio. Asinan, hi thil pahnih hi cing ringring aw. Pakhatnak, mi hmuahhmuh hi zirhtu (trainer) an si thluh lo. Hi zirhnak rawngbawlhna hi a thuthangṭha a thei hrihlotupawl hnenih runnak ausuahpi a ṭul tuk lawm mam titu hmuahhmuah hrangah a si lo, tlinnak le thiamnak a nei hrangah a si cuang. Pahnihnak, Pathian in hivek rawngbawlnak ih tel dingah fiangten a lo theihter ti na theih ta a ṭul. Hi hnakih hna harsa le khungkai, ṭuanvo tumsawn na parah ṭhum a si ih cumi na duhlo ruangah hi hnaṭuan hi nangmahah fiangtei theihnak a um lo cing in na hna heelnakah na hmang tivek cu a si hrimhrim lo pei. Asinan, Pathian in fiangten hi rawngbawlnak hnaṭuan hi ṭuan ding ah a lo ko ih na theih ah cun ralṭha zetin feh vivo aw! Na feng emem mi a si ah cun zohman in ringhlel in thu an lo sut ciamco lo ding- himi hi si thiam ruahman zirnak ih mission rawngbawlhna ṭuanvo kaih kan ti mi cu. Hi hnaṭuan ṭuan dingah na umnak ram suahsan kherkher a ṭul lo. Na umnak ramsungah thiam ruahman zirnak hmunpi (strategic training center) khal a um a si thei.

Na umnak ramsung suahsan lo in ramthim ih a fehtu missionarypawl zirhtu ṭuanvo na kai a si hmanah na dunglam ihsin thlahsuaktu missionary pawlkawm (missionary sending team) na neih ve tengteng a ṭul. Hrekkhat cun “ziangruangah ramthim ih a fehtu missionrypawl trainingnak petu cun amai ramsung lole umnak hmun ihsin thlahsuaktu pawlkawm (sending team) a neih a ṭulnak san?” nan ti mei thei. Kan sannak (answer) cu ramthim rawngbawlnak  hrang thiam ruahhman cangvaihnak ih ziaza thawn a pehzawm aw. Ṭhimnakah, Nan khua le tlang ih missionary zirnak petu (trainer) ah na ṭang a si ah cun sum le pai thawn thlahsuaktu pawlkawm (sending team) ah na tel tla a ṭul tuk lo a si thei, asinan, an tlacamsaknak cu lohtheihlo ih na ṭul bik mi a si. Satan in cubang hmatawng missioanrypawl zirhtu (trainer) pawl cu a huat tuk ruangah, anmah siatsuah thei nak ding le an rawngbawlnak rahsuah nei lo ko ih tuah cu a sun zan ih a tumtah mi a si.  Thlahsuaktu pawkkawm (support team) pawlih thlacam saknak hi a thupi ngaingai.  Thu ciksawn le ngunngaih sawn ih ka ruah rero tikah ramthim ih fehsuak missionarypawl innlam ihsi zirhnak (training) rakpetu (trainers) an cah dingzat an cahlonak san ih ka hmuh mi cu an ṭulsam mi thlacamsaktu (prayer support) an neih lo tuk ruangah a si.

Na umnak ramsung ah siseh, ram leng hmundangah siseh Pathian in missionarypawl zirhnak petu( trainer) ah a lo ko a si ah cun, na hrangih thlacamtu ding (thlacam team) na ṭul tuk. Na hrangah missionary thlahsuahtupawl le thlacamtupawl a tam thei pa tawp ih din le sersuah kha a thupi. Ziangruangah? Asancu, na umnak ramsung suahsan ih ramleng na thlen tikah na umnak ramsung ih harsatnak na tawn dahmi si lo harsatnak dang tampi na tawng cih ding. Ramthim nawrnak ih “hmatawng” (front lines) na si thuk poh len dunglam ihsi thlacam saktu ( prayer support team) na ṭulnak a sang sinsin. Culawnghmansiloin, dunglam ihsin sumpai thawi bawmtu (financial support team) khal na ṭul thei fawn.

Tirhthlahpawl bang Ramthim ih thlasuahmipawl hrangah

Tucu tirhthlahpawl bangih Thuthangṭha thlenbanlonak hmun Ramthim “hmatawng” ( frontline)  ih missarypawl thuthawi pehpar aw ih theihṭul mipawl cipciar deuhin kan ruattlang pei. Thildang kan ruah le relkhawm hlanah hi mi hi cingkeng ringring aw:

Pathian in ramthim hmun, thuthangṭha thlen hrihlonak ramih missionary hnaṭuan ṭuan dingin a lo ko a si ah cu cumi hna hlensuah theinak thlarau lam thilpek khal a lo pe tel ding.

Cuvek ih thlarau thilpek cu thuthangṭha simsuahnak (evangelism) le kawhhran dinsuah theinak thiamnak thawn hmun thar le ramthar khalah Pathian in nangmai sungah hnget zetin a lo phunsak ding. Cuvek thilpek cu tirhthlahsinak thaw khal in a pehpar aw zet.

            Ziang na ti ai saw? Mi hrekkhat cun “ Kei cu tirhthlah (apostle) ka si sawm?” ti ah nan ti men thei. A hman! Nangmah rori khal in cui thusuhnak cu na sut aw ve a si thei? Thlarau thilpekpawl kan ti mi hi Thuthlung Thar an ngan sanlai ih Jesu’i dungthluntu/tirhthlah minung hleihnihpawl hrangah lawng khan a si lo maw? Si lo, A si lamlam lo. Pathian in kawhhran hmaisapawl ihsi thawk in tuini tiang a mipawl hnenih a pekmi thilpek  a si. Hi bung cang sungah cipciar in tirhthlahsinak thilpek ka rellang lo ding.  Himi thuhla hi cabu dangih ka ngan mi a um ih theihfiang sin na duh len cipciar sawn in rak zingzawi bet aw.[1] Cu-aiah, hi bungcang sungah cun hi tirthlahsinak ih thlarau lam thilpek ramthim ih missionary a ṭuantupawl in ralrin le fimkhur kan thiam theinak dingah a thupitnak tawite in kan khaikhawm ding.

---

[1]. Zoh aw My Sent Out! Reclaiming the Spiritual Gift of Apostleship for Missionaries and Churches Today, 1992. Manila/Pasadena, CA: Church Strengthening Ministry/William Carey Library.

Tirhthlahsinak:  Ramthim ih missionary a ṭuantupawl hrangih thlarau lam thilpek

Tirhthlahsinak thlarau lam thilpek (the spiritual gift of apostleship) kan ti mi cu ziang a si?  Tawite in sang sela. Hi thilpek hi Pathian in ramthim ih missionary a ṭuantupawl, ahleice in thuthangṭha a thlen ban hrihlonak hmun ih missionary “hmatuang” (frontline) ṭuanvo a latupawl hnenih mi phun dang le ṭong dang hmang lakih thuthangṭha simsuah (evangelism) le kawhhran dinsuah thiamnak a pekmi a si. Dungthluntu/Tirhthlah Paul phei tla cun thlarau thilpek dang pawl hmuahhmuah lan in tirhthlahsinak thilpek hi thupibik le hmaisabik ah ret ( Zoh aw-Thlarau thilpek hmin a sangsang ten I Kor. 12:28 le Eph. 4:11). Uar zetin ka sim bet duh asilen, khristian thuanthu a liamcia ih kawhhran picang taktak le tuini ih kawhhran kan hmuhmi pawl khal hi tirhtlahpawl khan nasa ngaingai in miphun dang le hnamdang lakih thuthangṭha simsuah hna le kawhhran dinsuah hna kha rak uar lo si bang sehla cu hmuh ding kan nei lo men ding!

Paul cun a rawngbawlnak kha tirhthlah dinhmun in fiangten a thei aw. Ringlotu le ramthim, phunhnam dang le tlang dang ih ummipawl lakih rawngbawlnak kha thuthangṭha sim a thawk ihsin a uar in a luhhnawh vivo. Thuthangṭha a thei hrihlo tupawl lakih kawhhran dinsuah le thuthangṭha phurhsuah cu tirhthlahsinak thilpek a neihnak cun a tur in a tur. Bung hnihnak lamih kan hmuhzo bang khan, ramthim a veinak le seherhnak cun a pumpak nunnakah thathonak le phurnak thar a pe ringring.

            “ Ka tumtah ringring mi cu Khrih an theih dah lonak hmunah Thuthangṭha

              Phuan kha a si, ziangahtile midang in a hram an rak bun cianak hmunah

              Khan va sak beet ding cu ka duh lo”  (Rom 15:20)

Spain ih feh a duhnak ihsi hin Paul ih tirhthlahsinak thilpek a co mi cu fiangten kan hmu thei, “ …Atu cu hi ram hrawngih ka hnaṭuan ka ṭheh zo” (Rom. 15:23).  Paul cu nuam huahhi in thuthangṭha a thlenpinak le kawhhran a dinnak khuapawl ah rawngbawlin a um thei ko. Asinan,  dungthluntu Paul cu cutin nuam huahhi in a to men thei lo. F.F Bruce cun hitin :

             Catlang “ Hi tlangtluanah hnaṭuannak ding hmunlawng a nei nawn lo

             ti mi cun a ṭuanvo parih Paul ih lungput ah tleunak a rawn thlen.  Thu

             thangṭha thawi ram a nawrcianak pawl ah cun hna sunzawm ding tam

             pi a umlai ko ding, asinan,..cupawl cu tirhthlahsinak ih hnaṭuan

             pawl an si lo.  Tirhthlahsinak ih hnaṭuan cu thuthangṭha a thlen hrih-

             lonak hmun ih thuthangṭha ausuahpi le kawhhran a um hrihlonak hmun

             tinkim ih Khrih taksa a si mi kawhhran din hi a si.  Cui kawhhran din thar

             mipawl cun anmahte ke ih dingsuak thei ding ko Pathian thutak zirhnak

             an co le an ṭuanvo anmahte ih an kaihthei hnu ah cun, tirhthlah cu

             hmun dang ah ṭhawn aw in theih hrihlonak hmun ah simsuah le kawhhran

             din rawngbawlhna cu a sunzawm vivo[1].

---

[1]. F.F. Bruce, Pual: Apostle of the Heart Set Free, 1977. Grand Rapids, MI: Eerdmans, pp 314-315.

Paul cu tirhthlahsinak thilpek a co mi cun thuthangṭha a thlen hrihlonak hmun ih thuthangṭha ausuahpi le kawhhran din ding hrangah hmailamah a tuul ringring. Cuvek rawngbawlhna cu a ṭul dan ih zirin taimak suah in a ṭuan ih a nun pumpi in a atcilh. Thlarau thilpekpawl hmin tarlan mi ih a hmaisabik ah tirhthlahsinak thilpek a tarlan tikah amah thawi pehpar aw in a hnaṭuan a thupit zetnak thinlung ih mang ringring in a tarlang.  A hman, ngaingai te ih ti ah cun, Paul ih thlarau thilpek thuhla ah kawhhran din le thuthangṭha sim lawng si lo tampi khal rel lang ding a um ko ding. Anih ih hrangah cun thilpek ti mi hin Pathian thutak canonical doctrine zirhnak khal a tel. Asinan, tuini ih dungtluntupawl cu Paul ih tirhthlahsinak thawn hi zawn ah kan dang; kannih cu Pathian thu phuansuahawknak famkim ( full revelation- Bible) kan neih zo ruangah, Pathian thutak canonical doctrine zirhnak thilpek cu kan hrangah a cem zo[1].

Tirhthlah: Thuneihnak thawi thlahsuah a si mi

Tirhthlahsinak thilpek hi Pathian thilpek hleice thuneihnak thawi a ra mi a si ti kan theihfeng a thupi zet.  Hi thuneihnak thawi thlah ti mi hin Thuthlung Hlun ih mi pakhat khat hnaṭuan kai thawk dingih thuneihak thawi thlahsuah ti mi ruahnak sungah hram a bun.

Hebrew ṭongfang, shaliach hi Thuthlung Thar ṭongfang ih apostle (Greek: apostolos) timi laknak hram a si. Cumi cun mi pakhat khat pumpaak a silolen misenpi aiawh ih thuneihnak petu ṭuanvo kaitu ( dan thu ah asilole biaknak lam khalah) a sawh, lole cui mi pakhat ti mi cun Pathian ai a awh ṭheu. Tuini ah cun cuvek cu ambas-sadors tin kan ko. Ambassador cu rampi pakhat in thuneihnak thawi a rampi aiawhtu dingih a ruat mi a si. Cui a ṭuanvo a tuah tikah a rampum aiawh ih thusim theinak thuneihnak pumhlum a nei a si. A ram aiawh ih prime minister lole President vek zik tete khi a si. Asinan, a ngaingai ah cun a rampi ih theihpi mi cozah hnaṭuantu pakhat ve mai a si.  Hivek ih theihnak hi Thuthlung Hlun ruahnak ih shaliach an theihdan vek a si ih a sullam cu mi pakhat khat thuneihnak thawi hnaṭuan ṭuan ding ih thlahmi tinak a si.

Ṭhimnakah, Isaiah 6:8 ih Bawipa in Isaiah ih hnenah, “ Zoso ka thlah ding? Zosi kan palai a si ding”  ti  ih thu a suh tikah Pathian in mi pakhat khat cu dawr zuartu’i hnenah lole, hmuansak hmuan thlang pai hnenah feh tahrat in zo so hnaṭuan hrangah thlasuah ih um ding ti va sut aw a tinak a si hrimhrim lo. Cu-aiah, Pathian cun a thuneihnak huham thawn mi pakhatkhat Jews mipipawl hnenih hnaṭuan ṭuanvo ṭuan ding ih thlahsuah  a duh thuhla a rel sawn. Cutin, Isaiah in Bawipa’i sawmnak aw a theih tikah “ Keimah ka feh ding, I thlah aw!” ti ah a sawn. Thuneihnak thawn thlahsuah in a um ti mi kha Isaiah cun fiangten a thei.  Isaiah cu Pathian ih thuneihnak palai lole agent a si ih Pathian ih Shaliach a si[2].

Cuvek in si Paul khal in tirhthlahsinak thlarau thilpek a nunih a theihfeng dan kha. Paul ih hrangah cun,  tirhthlah (apostle) ti mi sullam cu mi pakhat pakhat hnaṭuan thupi tuk ṭuan dingih thlansuah lole thlahsuah ih um, a thlahsuaktupa ih thuneihnak aiawhtu tinak a si. Amai nun rori khal kha hi mi hrangih zohṭhimtlak a si. Paul cu Damaska zinah, Jerusalem ih puthiam sang

---

[1] . Thei bet duh hrangah, Sent out! ti mi cabu ih bung li kha siar aw.

[2]. Theibet duh hrangah Sent Out! ti mi cabu ih bung hnihnak kha zoh aw.

sinak dinhmun thawi thlah shaliach a sinak ihsin Jesuh Khrih ih thlasuahmi shaliach ah a thlengaw aw ( Zoh- Dungthluntu 26:12-18; ṭhim- Dungthluntu 9: 1-19 le 22:21). Pual cu Jerusalem ih a ummi Jews hruaitupawl ih thuneihnak keng in Damascus ih a ummi Khristianpawl hrem dingah a ṭuanvo hleice a parih pekmi thawn thlahsuah a si.  Asinan, Paul in Jesu Khrih Damaskas daiih a tawn hnuah cun anih cu Jesuh Khrih ih thuneihnak kengin thuthangṭha a thei hrihlotu Gentilepawl hnen ih missionary ṭuanvo ṭuan dingah a hleice ih thlahsuah mi ah a cang.

Pual cun dungthluntu dinhmun ih a thuneihnak cu Jesu Khrih hnen ihsi direct ih a hnenih a ra mi a si ti fiangten a thei. Hithu hi a cakuatpawl a hram thawknak a ngandan pawl ah fiangten a lang. Ṭhimnakah, Galatia 1:1 kan zoh asilen hitin, “ Paul , tirhthlah a si mi-minung ih thlahmi le mi pakhat khat hmang ih thlahmi si lo, Jesuh Khrih le Pa Pathian ih thlahmi” ti rori ih ngankhummi kan hmu. Tirhthlah dinhmun ih a thuneihnak a theihfengnak khal Bible bungcang hmun dangdangah kan hmu thei (ṭhimnakah, I Kor. 9:2; Gal. 2:8; I Kor. 15:3-8 le II Kor. 10:8).[1]

Tirhthlahsinak Thilpek le Nangmah

Asilen leitlun pumpuluk ih thuthangṭha a thlenban hrihlonak, ramthim hmun le rampawl ih thuthangṭha thlentu ding pawl hrangah ziangsi hi thu hi a pawimawhnak? Ahmaisabikah, Hithu hi thupek khohtak a si ti kan theihfeng ta a ṭul, ahleicein ramthim su engtu ding hrang a “hmaituang” (frontline) ih ṭang ding ah Bawipa in a lo hruai ih na theih ah cun na ṭulsam mi thlarau thilpek khal na ṭuldan vekin a lo thuam ding ti ringngam aw.  Aliamcia mi zumnak ih kan papawl le kawhhran hmaisapawl vekin tirhthlah hnaṭuan na ṭuan ih , ramthim nawr engtu dingah a hmatuang ah ṭang in phun hnamdang le ṭong dang lakah Khrih ih taksa a si mi Kawhhran nung din dingah na ding ti kha thei ringring aw. Tirhthlah Paul khal khan hivek ciah hi si a rak tuah ve. Cun, nang le kei khal missionary dingih Pathian ih kawhnah dawngtu si in kan thei aw a si ah cun hi hnaṭuan ciah hi si kan tuah ve ding mi. Paul ih neihvek tirhthlahsinak Pathian thlarau lam thilpek cu na kekarnak lo bawmtu le hlensuak ko lo caktertu dingah na co ve ding. Na mang a bang maw? Mangbang ding a um hrimhrim lo. Pathian in hna in pekmi  ṭuanvo cu a kel thotho a si.

Cuvekin, tirhthlahsinak thilpek ih rahsuah cu kan zoh a si len a nasa ngaingai in kan hrangah a ṭangkai. Ziangruangah? Asancu, ramthim le zumlotu mipipawl lakih Pathian hna na ṭuan tikah:

Nangmah ah rintawkawknak hngetzet, Pathian ih thlahsuahmi na sizia le, a mission hnaṭuan sunglawi hleice hlensuahih a um theinak dingah a thuneihnak sangbik thawi kuatsuah na sinak le a cahnak huham thawi dunglam ihsi a lo thuam ringring zia na thei ih cumi in ralṭhatnak le rinnak hnget nangmah ah a sersuak.

---

[1] Cipciar sin in theih kan duh len Sent Out! ti mi cabu sungih bung linak sungah zoh bet aw.

A phur um tuk na ti ve lo sawm? Anmahpawl thuthangṭha thawi nawr eng dingah Pathian ih huham  thawn thuam in na um ding.  Ziangtluk dawnkhamtu tum le harsatnak tamtak in a lo nuai a si hmanah thinnau le ruahsanak neilo vekin na tuahmi parah na um ding a si hrimhrim lo ziangahtilen lothlahsuaktu le locaktertu cu Bawipa a si ringring ruangah. Ralpa Satan do dingah, Pathian ralthuam hrukin ralṭha zetin a cahnak thawn ding aw. Ziangtin harsatnak lakah, ralpa Setan ih tukfawrhnak lakah thlarau lam doawknak le rawngbawlnak na peh vivo thei ding?  Na peh vivo theinak ding lamzin um mi cu Jesuh khrih ih thuneihnak huham sangbik thawi thlahsuah na sinak le a thilpek cahnak kha a hnenih si ra mi a si ti kha ralṭha zetin na hrangah na ham a ṭul. Ziangruangah? Asancu, Jesuh Khrih ih thuneihnak huham thawi thlahsuahmi, a theihpi men mi lawng silo Amah rori ih cakter le umpi mi na si ruangah ( Matt. 28:18 zoh aw).

Vanduaitlakzetin, tuini ih missionary tampi cun an rawngbawlnak hi thuneihnak thawi thlahsuah le kuatsuah an sinak an hmu lo. Mi tampi cun an rawngbawlnak le tuahmi hi Pathian in tuahter dingih a fialmi a si le silo an fiang lo, cuti a si ruangah Pathian huham ih cakter an si le silo khal an feng lo ih ruangah an hnaṭuannakah rintawkawknak (confidence) an nei mal. Hiruangah tla a si men thei ahmaisa lam Missionary hnaṭuannak lak ihsin 50 percentage rori in ṭhansoh lam hnakin ṭumsuk lam an rak pannak. Asinan, cuvek in thil a um lanta ding mi a si lo.  Pathian in ramthim, thuthangṭha thlen hrihlonakah thuthangṭha sim ih kawhhran dinsuak dingah a lo ko ih na theih ah cun a thuneihnak thawi thlahmi na si ti kha na nunah kaihnget aw, thilpek na co mi kha tirhtlah thilpek a si ti in zum ngam fawn aw. Ngaingai tei tilen cu nangmah le nangmah tirhthlah na si ti ih na kawhawk duh le duh lo cu retṭha sehla, a thupibik mi miangmo cu Pathian hnen ihsin himi thlarau lam thilpek hi fiangten na co a si ti na theih kha a si.

Hi thlarau thilpek hi ka nei a si ah cun ziangtin ka thei thei ding?

Hrekkhat cu a tufang ah ziang nan ruat ti ka thei. Hitivekin thusuhnak nan tuah: “ Asinan, ziangtin saw hi tirhtlahsinak thilpek cu ka co ti ka theih thei ding?” Hi thusuhnak hi pehzawm in kan rawn zoh vivo ding.

Ziangtin ha hi thlirhthlahsinak thilpek hi na neih le neih lo na theih thei ding? Kan rel le sim zo bang khan, thirhthlahsinak thilpek petu cu Pathian a si ih, zumtu Khristianpawl hnenah Pathian hna tlamtling tei kan ṭuansuah theinak dingah Thlarau Thianghlim fehtlang in Pathian in thlarau thilpek hi in pe a si ( I Kor. 7:7). Asinan, hi a tlunih ka rel thusuhnak fiangten zumtu Pakhat in a theihfeng theinak dingah amah bawmtu ding hrangih a theihfeng tengteng ṭul mi thil hrekkhat a um.

Ahmaisabikah, Atu fangah ram dang le miphun dang thawi a pehpar aw mi (cross- cultural ministry) pakhat khat ah telnak na nei maw? lole hmailam can a ralai dingmi ah Pathian in cuvekpawl lakih rawngbawlnak nei dingah hleicein a lo ko/hruai in na thei aw maw? Nangmai nunphung thawi a danglam mi, miphun dangpawl theihfeng sinsin duhnak thukzet na nei maw? Phun hnamdang ṭong awlsamte ih zir le thiamtheinak, zirduhnak thinlung na nei maw?  Atufang ah hin ramthim lam rawngbawlnak pakhat khat tlawngtapawl lakah maw, ramthar lole na kiangkap ih kawhhran ding pekpawl sawmdal hna ah maw telnak na nei maw? Cuvekpawl rawngbawlnak pakhat khat ah na tel hrih lo a si ah cun, a tlun ih thusuhnak kan tarlang mipawl hmang in, a ṭangkai theibik in Pathian ih hmansuah ding hrang cuvek rawngbawlnak sunglawi zetih telve dingah sawm in na um ve lo maw?  A tlunih kan tarlangmi rawngbawlnak pawl lakih pakhat khat ah hin nang le kei kan telve lo ding sawm?

A thlunih ta pakhat pakhat ah, “aw telve ding/telve duh e” ti ih na sawn a si len, cu ti na sawnnak cu Pathian hnen ihsi tirhthlahsinak thilpek na comi nemhngehnak khal a si thei fawn.  Asinan, cuvek rawngbawlnak lam pakhat khat ah na tel lo lawng si lo, na ngaihsak zawng le phur zawng khal a si hrimhrim lo a si ah cun, a tlunih kan relmi ramthim lole theihdahlo miphun hnamdang lakih missionary ṭuan lole kawhhran dinsuahnak thilpek na co lo khal a si thei fawn. Ziangruangah? Asancu, cuvek miphun hnamdang pawl ih thuhla theih hiarnak thuuktak neih, an lakih rawngbawlnak pakhat khat ih telve hiarnak pawl cu tirhthlah thilpek neitupawl nunih thil um hmaisa mi a si ruangah a si. Cuti ti tikah ramthim rawngbawlnak lakih tel kan ti mi hi na umnak ramsung suahsan ih ramthim na va feh kherkher si lo lawng silo in, mai ram suahsan lo khal in ramsung ihsin na ṭuan thei. Ṭhimnakah, Na umnak ramsung, khawpi daikap ih farah taitem, anhaipawl sawmdawlnak rawngbawlhna khal hi hi rawngbawlnak kan ti mi sungah a tel ban ve.

Apahnihnakah, a tufangah phun hnamdang lakih thuthangṭha simsuahnak le kawhhran dinsuahnak rawngbawlhna ah na tel,  asilole cuvek rawngbawlhna ih telding ah duhnak nasa tak na nei maw?  A tlunih tarlan zo bang khan, phunhnam dang lak ih telve nak lole telve duhnak, phurnak neih menmen ruangah tirhthlah thilpek na co tinak cu a si lo. Phunhnam dang lakih a takih thuthangṭha phuansuah duhnak thuuktak neih le kawhhran dinsuah duhnak sangtak neih sawn hi tirhthlahsinak thilpek ih a thupibikmi tawhbawr an si.  Kawhhran a um hrihlonak hmun, ramthim le Pathian thei hrihlotupawl lakih thuthangṭha phuansuah duhnak thinlung, meisa bang ih a lo kangtu lole cupawl lakih kawhhran, fellowship pawlkawm dinsuak ih Pathian hnen hruai tlen ding veinak le seherhnak nasa tak na nei maw?  Cuvek duhnak thuuk tak na nei a si ah cun Pathian in tirhthlah thilpek a lo pe khal a si thei fawn.

A tuican cu nangmah le mah dik takih na zohfelawk can a si. Ramthim pan ih missionary pakhat khat bus in maw, tlangleng in maw, vanzam in maw a pawhsuah tikah, vanzam ṭumhmun ah thilmak lole tlunlam cangvaihnak danglam hleice a thleng hran lo.  Ramthim hnaṭuanankih missonary le tirhthlahsinak thilpek cotupawl ih cangvaihnak na zoh le bih rero tikah, an cangvaihnakah, an tawnmi le an parih thilthleng mipawl ah na um a nuam thei lo, na ṭih lole tlinlo tuk ding vekin na ruat a si ah cun, anmah vekih ramthim, ramthar le miphun hnamdang lakih thuthangṭha sim, le kawhhran dinsuah ṭulnak hmun ah na feh a silen na um a nuam lo tla a si thei. Ahman! tuini ih missionary tampi vekin na kumkhatnak hrawngah cun um remlo, thinbaang, lungleng le pit vekih na ruahawk can khal a um ding.  A hlanah cun, thuthangṭha simsuah duhnak le kawhhran dinsuah duhnak thuuksin hi kan mission ram kan thlen leveten, an umnak ram leilung kan pal hin a pung ciamco dingah na rak ruat tla a si men thei. Nan, cumi cu kan ruahdan men a rak si. Nan, nuamnai tete in Pathian ih kutcak umpinak le na hnaṭuan mi ih rahsuah na hmu ve vivo dingih, kumthum le kumli hnu ah tla cun na mission hnaṭuannak khua le ram na duhnak a karh ding ih, na khua le ram ngaingai tla ngai ih anhnen tlun leuhleuh na caknak tla  a mal deuhdeuh sal ding.  Tirhthlahsinak thilpek ih thupizet mi thuhram cu:

Atu ih na umnak hmun le ram ihsin, thilpek na co mi kha na hmangsuak ringring lo a silen, hmailam can ah khawitawk hmun le ramdang a va si hmanah,  na thilpek comi thawi pehpar aw mi hnaṭuan a silen na nawmpi in na lungawipi nawn lo ding ziangruangah tilen na hmandah lo ruangah a si. Na thilpek kha a tu ih na umnak hmun ihsin hmang suak cih aw.

Kum ziangmaw tizat sung ihsi khan ka tlawngtapawl, hmun dangdang ramthim le miphun dangpawl thawi pehparaw ih missionary a ṭuan le rawngbawltupawl in harsatnak le buainak a phunphun an tawn can ih, bahhlah riai lo ih nehnak an co le an pahtlang theidan thawi an rel tambik mi cu cuvek canih hmansuah ding mi cahnak thilpek Pathian in anmah ah a pe ti hi a si. Cuti rawngbawlnak sungih an phumawk tikah nuam nai tete in Pathian in thirhthlah thilpek a rak pe ziar a si ti an thei fiang

Na hrang khalah hi thu hi a thupi zet. Nangmah le nangmah thei aw aw. Ramthim le ramthar nawr ennak, phunhnam dang lakih rawngbawlnakah hlawhtling ih ke na kar theinak dingah ziangmi thilpek si Pathian in a lo pek lole ziangvek thiltitheinak cahnak si Pathian in a lo pek ding ti mi fiangten na theih a ṭul.

A sungthu Bihciannak

Tirhthlah Paul, Mike Boit le Keimah

Pathian in a ngilneihnak in thlaw in suah ih tlaan theinak le cangvaih theinak in pe. Hi thu ah ziangtin ka tlaan ti thu rel ka tum lo cuhnakin ziangtluk cakin ka tlaan ti mi sawn ka rel ding.

High School le College ka kai laiah tlaanzuamawknak ah ka rak tel ve ṭheu. Cuih can ah cun nasa takin ka zuam tikah, hmun tampi ah nehnak le hlawhtlinnak ka rak co ve ban.  College ka kai lai canah phei cun ramsung (national level) ih tlaanzuamawknak ih mi malte an hrilmi lakah ka tel ban ve.  Tlaanzuamawknak ih tlaantu lakah tiṭha ve zet tu ka si, a tlaan cakbik lawngte ka si lo nan, zahpi um lo dinhmun cu ka si ve.

College ka kai pek, kum 20 ka si laiah khan ramsung tlaanzuamawknak (national track) ih tel dingah ka tling ve. Cuih ṭumah cun small Bethel College of St. Paul, Minnesota aiawih ih thlan ding ka si hngehnge. Hi tlaanzuamawknak cu “ can thupi” (big time) ka hrangah a si cuang ding tin ka ruat ziangruangahtile United States ram pumpi sungih tlaancak bikbik khal an telve ding ruangah. Hiṭum ih a tlaantu hrekkhatpawl tla cu leitlun pumpi ih cak bikbik sinak a kai rerotu tla an si hai.

 Cuvek ngaingai in, kum 28 ih upa, Kenya mi, Mike Boil cun keimah thawi tlaanzuamawknak cu el aw ding in a pawtfuh kherkher. Hilai canah, Mike Boil cu leitlun pumpi ih tlaancakbik sinak record kaitu peng hrek tlaanzuamawknak le pengkhat tlaanzuamawknak ih a cakbik a si. Cupa thawn cun cutin tlaan zuamaw ding kan si.

Vawn lo sim vivo sehla,  kha laican fangih Bethel College , Minnesota ih tlaan cakbik sinak kaitu le leitlun pumpi ih tlaan cakbik sinak kai rerotu tei pahnih ah khan danglamnak nasa ngaingai a um. Ka ṭih le huphurh na zum maw? Zum! Tling tawk lo ih theihawknak ka neih na zum maw? Na zum ti? Na ti dik! Mi cakvak Mike Boit le vekih hmaiah cun zoso maw ka si i ti ah ka to aw ngai?

Mike boil le kei cu tlar hmaisabik rin sir le sir ah cun sang aw in kan ding. Tidan kel tlaan a zuamawtupawl in an keh le vawrh ih tlan ding pawl an tlan hlan ih kut an kaih awk le tlan nuam ti ih an ti ṭheu vek cun ti aw ve ding kan si. Asinan, na kiang ih leitlun pumpi ih tlaancakbik sinak a kai rerotu’i hnenah cun ziangtin ha na ti ke? Ka dang a awk! Ka cibai ih zawng ih ka ṭong khal ka mang nawn lo. Cuṭheh leveten, tlaanzuamnak ih thawknak meithal a awn ih cutin mah le theitawk cio in tlaan kan thawk.

Nasa ngaingai ih zuamawknak a si maw? Si ciah lo! Mi hmuahhmuahin Mike Boil in a neh ding ti an thei. Keikhal in ka thei. Mike khal in a thei aw. Cun, mipi khal in an thei. Ahman! Tlaanzuamawknak ah cun ka neh lo. Asilen cu ziangsaw tang nawn? Asinan, khaiṭum ah khan ka damsung ih ka tlaan cakbik ṭum ka tlan!

Nehnak cu ka co lo! Asinan ka phurnak le leitlun ih tlaancakbik sinak kaitu thawi zuamawk ka sinakah ka theitawp ka suah ih ka damsung ih ka tlaancakbik ṭum ah a cang. Khaisi kum 30 a liam hnu khalah, khai ṭumih ka record tuahmi kha Bethel University ih tlaancakbik record a si lai. Khai ṭum tlukih ka tlaancak ka thei dah nawn lo.

Hi thuhla ka relmipawl hin tirhthlah Paul le missions thuthawi pehpar aw in ziangha in zirh duh? Thil tampi in zirh duhmi a nei.   Tirhthlah Pual ih rawngbawlnak missions le Khristian zumtu hmaisa, missionarypawl ih cangvaihnak kan thlir rero tikah annih cu an ropi tuk ti ih mah le mah hmuhniamawk a awlte. Anmah thawi kan ṭhimawk tikah hitin “ziangtin kannih vek men hi missionary tla kan si thei ding?” ti ih ruahawk a awlte. Asilen, ziangtin tirhthlah kan si thei ding? Tirhtlah Paul in thlarau thilpek a comi vek ziangtin nang le kei khal in co ve ding ah kan ham ve thei ding? Mike Boit ka zoh vek khan Paul kan zoh a ṭul. Tlinglo le tlak lo tiawknak kan nei ding. Kanmah le mah kan zohawk tikah Paul thaw cun ṭhim ban ci kan si lo kan ti ko ding.

Asinan, hi thu hi kan cinken ding ah ka duh. Paul, amai sanlaiah khan , anih khal tling lo le tlaklo tiawknak a nei ve thotho. Anih phei tla kha cun Pathian hnaṭuantu le tirhthlahpawl hmuahhmuah lakah a fate bik ka si a ti hial ve ho khaw ( I Kor. 15:9 ahleice in Eph. 3:8). Asinan, Pual cu amai sanlai ah ramthim le thuthangṭha thlenlonak hmun tampi ah mission hna maksak zetin a ṭuan ngah thotho.

Na hrang le ka hrang khalah hi thu hi tuini ah a hmun lai. Ahman! Tirhthlah Pual tlukih mi ropi, lar le pawrh kan si kher lo ding! Amah vek kan si kherkher khal Pathian in in phut fawn lo. Asinan, Mike Boit in ka hrangah thil in ti sak vek khan, Pual hi zumtu, Pathian hnaṭuantu, kan zaten mah le tlaancak theibik suah ih tlantu si thei dingih in bawmtu, in caktertu -Pathian sunlawinak ding le leitlun pumpi ih thuthangṭha phurhsuahnak, a Lalram kauhnak hrangah phurnak in petu si hram seh.

Ruah Dingmi Thusuhnak

1. Ziangruangah saw missionarypawl zirhnak pek hi ramthim rawngbawlnak an neihnak hrang a thupit tuk nak san? Cuvek ih missionary ramthim ih a ṭuantu dingpawl zirhnak hrangah ziang thilpek, talent lole fimthiam zirnak na nei? Cupawl cu ziang pawl ha an si?

2. Tirhtlah Paul in ziangtin a rawngbawlhna kha tirhthlah hnaṭuan a si ti a thei thei? Ziangruangah ha tirhthlahsinak thilpek hi tuini ih missionary ramthim ih a ṭuantupawl hrangah a thupit tuk nak san?

3. Tirhthlahsinak thilpek co in na thei aw maw? Hitawk bung sungih kan zirkhawm bang in ziangpawl si tirhtlah sinak ih ziaza pawl ? Tuini ih missionary rawngbawlhna a ṭuantu in ziangtin hi tirhthlahsinak thilpek hi a co le colo a theih thei ding?

4. Ziangruangah ha tuini ih ramthim ih missionary hnaṭuan a ṭuantupawl hrangah an rawngbawlnak hi Tirhthlah Paul ih rawngbawlnak thawn an bang aw ti an theih hi thuthangṭha an simsuahnak ah siseh, kawhhran an dinnnak hrangah a thupitnak san?

BUNG 6 NAK

A TU-AH ZIANG NA TUAH DING?

Na lungthlitum hmuahhmuah lo pe sehla, Na tumtahmi ah lo hlawhtlingter hramseh ( Saam 20:4)

ATU-AH ZIANGSI?

A thawknak le a cemneetnak

Hi tawk kan thleng thlang, kan cabu cemnak kan naih hrethro. Hi cabute sungah thil tampi kan thankhawm zo. A tu tiangih kan tuah mi malte kan zohsal hnik ding; A tufang ih Leitlun pumpi missions ( World missions);  Bible in missions in zirh  dan; thubawhcahnak felfai tuah ding ih sawmnak; le thlahsuah ih a ummipawl hrang le thlahsuaktupawl hrang ih lamhmuhnak tamtak kan zoh zo. Atu ihsi cun na lu a zing curco tla a si thei.

Nan lakih mi tampi cu, “ Atu-ah ziang ka tuah ding?” ti mi in a lo mangbang ter zet. Thusuhnak ṭhazet, buainak tlak khal a si ko. Thusuhnak sannak cu a tu rori ah na tuah lohli a ṭul. Asinan, zianghman na ti hlanah naapiin na thaw la aw la thlahsal aw. Thungaingaimaw! Pathian in leitlun ih ramthim le thuthangṭha a thei hrihlotupawl hi minute nga (5) sung lole kum nga ( 5) sungte ih pal eng thluh in beisei lo. Curuangahsi, thinsaute in amalbikah kum thawngli (four thousand years) sung lai in hngak zo. Ahman! Pathian in a thei hrihlotupawl hnenih thuthangṭha thlen ding phurrit hmuahhmuah nangmai liangpar lawng ih na reta beisei lo.  Missionary rawngbawlhna kan ti mi hi Pathian ih kawhhran pumpi ih hnaṭuan a si, nangmah le keimah pakhat lawng hnaṭuan a si lo. Amai hnen ihsin zawh ding lamzin fumte na neih theinak dingah timlamawknak can na ṭulmi Pathian in a lo pe.  Na hrangah ṭha tei na ruat a si ah cun thlahsuaktu dinhmun in maw lole thlahsuah ih um dingmi dinhmun in Pathian in lo hman a duh ti theihfeng theinak can kaupi na nei ko. Amahlawngte cu cumi theisuak dingah lawngte can reituk cu khawhral hram hlah! Bawhlung cu na kutsung ah a um ih, goal sungih thunlut dingah na cangvaih lohli a ṭul!

Hitawkah a sangsangte ih na thlun ding mi karbak hrekhat an um. Cui a sangsangte ih thlun ding mipawl cu thlahsuaktupawl hrangah siseh, thlahsuahmipawl hrangah a pahnih in hmansuah a theih.  Cupawl cun can tampi lole sumpai tampi an ṭul lo. Asinan, cupawl cun atu rori, cawplehcilh ih cangvaihnak hrangah siannak a lo pe ding. Muangcang in hngak sual pang hlah. Ziangruangah? 

Pathian in na thinlung sungah hnaṭuan in na nun a lo tham a si ah cun neta ah tin muang cang pang hlah ziangahtile cuti atu rori ih thlun dingmi steps tete na thlun cih lo a silen, na hrangah Pathian in “thlahsuaktu” dinhmun lole “thlahsuahmi” dinhmun ih a lo hman duhnak canṭha sunglawi a liam sual thei.

Hi a tlun ih tarlang mi hi ṭhihṭhaihawknak a si lo. Thungai thu ka lo sim, ngunngaih zetin hi thu hi na ruah a ṭul. Ziangruangah? Asancu hi cabu na siar le a sungih thupawl na zircian tikah Pathian in na sungah a tharin mission rawngbawlnak hrangah hna a ṭuan. Atu ah cun hi cabu na siar pek thawn nan bang aw nawn lo. Atui nan dinhmun ah hrekkhat cu “thlahsuaktu” lole “thlahsuahmi” si ding ih duhnak phurrit nan thinlung sungah a um thei. Cumi cu ngaihthah in lehhnu ah na tilen a ṭihnung. Natalen ti in na thinlung ih lo turtu phurrit kha na thlun lole tuahnak thawi a takin na cangvaiter lo asilen hi cabu na siar hi na hrangah ṭhathnemnak a um lo ding. Atui phurrit le seherhnak na neih mi khal a takih tuahnak thawi na thlun lolen ni a liam vivo ding ih cutin nuntu khawsaknak ih ṭul le pawihai tampi in a lo cim vivo tikah hi cabu na siar hlan hman tluk lo in mission rawngbawlnakah cawrngawr in na um thei. Pathian in na thinlung sungih a lo tur tikah, a lo pamnak ngai in thil pakhat khat na tuah lo ding maw?

Thil pakhat khat tuah aw!

Na kawhhran sungah mission rawngbawlnak  hrang thlacam pawl lole bawmtupawl din in ṭuan thawk aw; thuthangṭha thlenban hrihlonak hmun ih mibuur umpawl lakih mi kha nafa le vekin cawm aw; reilote sung misson khualtlawnnak nei in tlawngsuak aw; mission thuthawi pehparaw mi cabu ṭha dangdang siar bet aw. Hi bung sungah hi a tlunih cangvaihnak a tak ih a cansuah thei dan kan ruataw beh ding. Hi a tlunih kan relmi- cangvaihnakpawl hmuahhmuah hin cemliam (cost) le pumpekawknak malte (minimum effort) cio tal cu mi a phuut.  Atu cu na hrangah ramthim, thuthangṭha a thlenban hrihlonak ih mibuur umpawl na serherhnak le veinak a takih tuahnak thawi na langter can a si. Na hrangah Pathian ram hrangih kekarnak thar a si ding.

Mission Hrang Thlacam Pawl le Bawmtu Pawl Din Thawkaw

Na mission rawngbawlnak cakzet ih nunter ringring nak ṭhabik cu nangmah vek mission thinlung a neitupawl thawi kutkaiaw ih ṭuantlang hi a si.  Atu khalah nangmah vekih mission thinlung thukzet a neitu rualpi ziangmaw zat na nei cia khal a si thei. Anmahpawl thawn can hmang tlang in, mission hnaṭuannak ih nan thinlung le seherhnak pawl tla ruah aw in hlawm aw tawn uh. Rualpi zumtu na neih len hi cabute khal hi siar ter ve tengteng aw cutin nan zaten a hram nan thawk tlang thei ding. Nanmahten Bible zir bet uhla cutin Pathian ih thinlung ngaingai hi ziang a si pei ti mi ṭhaten ruat uh. Ramthim mibuur umkhawmpawl hrangah siseh, missionarypawl hrangah siseh, ram tin hleicemi nei in thlacam khawm thawk uh.Ramthim ih missionary a ṭuantupawl hrangah le mission rawngbawlnak (project) hrangah sumpai thawhkhawm in cutin Pathian ram hrang hnaṭuan thawk zaang uh si.

Bung li sungah thlahsuaktu pawl (sender’s group) thuthla cihciar deuh in kan zoh zo. Mission hrang Thlacam pawl le Bawmtu pawl khal nuam naitete in thlahsuahtupawl dinhmun ih ṭhangso ding, tumtah hleicemi ram le ramthim ihsin mission thlahsuaktu pawlpi ih ṭhangso ding an si. Mi hrekkhat thlahsuah ih a um ding mipawl hrangah nan mission rawngbawlnak lo cawmtu le lo thlahsuaktu ding hrangah mission hrang thlacam pawl le bawmtu pawl na rak thawkpi pawl hnakih mi ṭangkai an um cuang lo.

Na umnak kawhhhran kha tu hnakin missions rawngbawlnak an thupitter ding duhnak phurrit lole veinak na nei maw? Cumi hrang khalahcun, na umnak kawhhran sung ihsi’n missions hrang thlacam pawl (prayer group) le bawmtu pawl (support group) din thawk aw la, cumi cu na kawhhran pumpi missions hnaṭuannak hrang na phurter thei dan ṭhabik lakih pakhat a si ve ding. Himi hi kawhhran pumpi missions hnaṭuannak ih karsuahawknak le sawmsuahawknak ṭhabik ih ka hmuhtawn mi a si.  Missions hrang thlacam pawl le bawmtu pawl kha a karh vivo ih memberpawl a sungah an tel tam vivo tikah kawhhran pi ih mission hnaṭuan duhnak le telve ding ih pumpekawknak khal a karh ve vivo.

Hi thil hi a takin ka zirhmi tlawngtapawl nunnakah a tak in vawitam pi a rak cang dah mi ka hmu.  Ka tlawngta pakhat a ra ding ih mission rawngbawlnak ih telve a duh thu in ra sim ding, asinan a kawhhran lawngte cun an phur tuk lem lo. Hitawkah kan biakawknak ka rawn tarlang:

Tlawngta: “Dr. Cardwell, ziangtin ka ti ding? Missions rawngbawlnak hrang thinlung a neizetmi Kawhhran ka hawl a ṭul tinak a si maw?”

Caldwell: “ Silo-na kawhhran suahsan hrimhrim hlah. Cu-aiah, na kawhhran sungah na rualpi pawl thawn missions hrang thlacam pawl le bawmtu pawl thawk aw.”

Tlawngta: “  Asinan zohman in missions rawngbawlnak an phur lo pi”

Caldwell: “ Cuti a va si hmanah, missions hrang thlacam pawl le bawmtu pawl dinsuah tum aw. Mi tampi an si lo hmanah mi malte tal cu missions rawngbawlnak a ngaihventu nan lakah an um tengteng ding. Cumipawl cu zo an si ti na hawlsuah a ṭul.

Tlawngta: “ Cuti asilecu, ka tuah tum ding”

Thla reilote a liam hnu ah, cui tlawngta pate cu ka hnenah a ra kil sal ih cui ṭumih in sim mi cu missions hrang thlacam pawl le bawmtu pawl caktak an lakah an ding men lawng si lo in, an kawhhran pumpi khal tu-ah cun missions rawngbawlnakah an phur vivo zia in sim. Cule, an kawhhran in an missionary hmaisabik hrang thlahsuah an tum ih cule hi tlawngta pa te hi an candidate hmaisabik ah a cang! Hivek thuanthu hi a tu le tu a thleng leuhleuh mi a si. Na kawhhran in missions hnaṭuannak an thlahthlam ruangah thinnau in na um pang maw? Missions hrang thlacam pawl le bawmtu pawl din thawk phawt aw la, cutin na kawhhran kha missions thinlung nei thei dingih an thlengawknak hrang na bawm thei ding.

Ramthim lam milaipawl kha cawm aw

Leitlun ram pumpi kan zoh asilen mi tampi in mifa kha an fale vekah an pawm (adopt) ih cutin anmai sungsuak fa vek rori in an cawm. Cui tidan vekcu hmang in, Christian pawlkawm pakhat khat in ramthim ih a ummi milaipawl cu an fale vekih la in a hleice ih cawm le sawmdawlnak an pe ding; anhrang thlacamsak ringring ding pumpekawknak tuah; sum le pai thawi bawm; le anmah rori Pathian thu ih an pitlin theinak ding ih sawmdawl le bawm. Cuvekin, ramthim ih um milaipawl fale vekih cawm le zohkhen hi thil harsa a si lo.  Nunphun le ram leilung ih tlawhpawh harzet hmun ih mibuur ziangmaw zat, thuthangṭha a thei hrihlotupawl um lak ihsin Pathian in mai sungsuak fale vekih cawm ding phurrit a lo pe zo tla a si men thei. Cuvekin na nunnak le innsangah Pathian in phurrit a lo pe a si ah cun, na tuah hmaisak ding mi cu ziangvek mibuur umkhawm pawl cekci ha Bawipa in cawm dingih in duh ti in taimazateih thlacamnak thawn cupawl ih thuhla zingzawi aw. Cuvekin, na mission hrang thlacam pawl le bawmtu pawl khal kha hi vekih ramthim milai cawm (adopt) ding ah fawrhfial fawn aw. Ramthim minung pawl sawmdawl le zohkhen dingih na zingzawi,thla na cam tam sinsin tikah na lungsungah duhdawtnak thunsawn le sehernak sang sawn Bawipa in a lo pe vivo ding. Cumi ih a rahsuah a si thei mi , Pathian in nangmah lole nan thlacam pawl sungih pakhat khat kha ramthim hmun ih fehsuah ih thuthangṭha ausuahpi tu ding ah a lo hmang sawn riangri khal a si thei. A cangthei lo ding na ti pang maw? A cang thei tuk hokhaw, hivek hi a tak ih cansuak mi vawi tampi keimah rori in ka hmu.  Cuti a silolen cuvek hmun ih missionary dinhmun thawi fehsuah a tum rerotu lole- a rak thlengcia zo milai na hmuh le theih tikah anhrangah thlacamsaknak le peknak thawn nan bawm thei ding. Ni nikhat khat ah cun nangmah rori khal cui mibuur umkhawm pawl lakih na cawmmi pawl miphun cu zoh le theih duhin an hnenah na tlawng khal a si thei. Can remcang kan ti rero mi hi awn a si lai! Kan ṭuannak le peknak hmang ih Pathian in mi nun a hawn thleng danglam ding hmuh hi a cakum tuk na ti ve lo maw?

Mi hrekkhat cu Leitlun pumpi ih hivek mi cawmnak thawi hna a ṭuan rerotu ( Global Adopt-A –People Clearinghouse[www.adoptapeople.com]) pawl thawi kutkai aw ih ṭuan duh tla kan um men thei.  Hi clearninghouse pawl hin leitlun hmun tinkim, thuthang ṭha a thlen hrihlonak hmun ih rawngbawl mission agencies thawn an ṭuantlang ih cutin, kawhhran le pumpaak ih cuvek sungih mipum cawm a duhtupawl cu an hawlsak ṭheu.  Clearringhouse timi ih hmin pekluh lole pehzawmnak hngeh neih cu ṭulnak ciamco a um lo nan, cumi ih ṭuantlangnak cun na missions thlacam pawl le bawmnak pawl thawn midang hrangah thla nan camsak ti a theihter ih a theitupawl hrangah thazaang a rak si. Na batmi mibuur umkhawm pawl le cawmmi pawl ram le miphun sungah thuuksin ih rawngbawlnak pehzawm vivo na duh a si ah cun hi pehzawmawknak (networking) hin hmailam hrangah nasa takin a lo bawm thei.

Reilote sung mission khualtlawlnakah telve aw

Hivek in mission rawngbawlnak thawi a pehpar aw mi ah na tlawngsuak hrih lo a silen, miphun hnamdang ih nunphung le ziaza hmu dingah thlawngsuak ve aw. Ziangruangah? Asancu, hi tivek ih na tlawnsuahnak cun phunhnam dang pawl ih nunphung le umtlandan hmuhthiamnak a lo pek hleiah, cuhnakih a thupi mi mission rawngbawlnak hrang taimak suah ih thlacam uar sinsin dingah a lo tuul ding.  “ Thlahsuaktu” lole “ thlahsuahmi” in hi reilote sung mission khualtlawnnak hi nasa zetin an ṭhathempi thei veve.  “ Thlahsuaktu”  pawl in hi an hmuhtawn mi ihsin an thlahsuahmi missionarypawl ih dinhmun , an harsatnak le ṭulmi ṭhahnem sin ih bawm thei dan ding an zir ngah thei. Cun, khatlamah  “ thlahsuah” ih um dingih thinlung a neitupawl khalin hi khualtlawnnak fehtlang in Pathian in ramthimpawl lakih rawngbawlnak nei ding in a kawh mi a si le silo fiangtei theihnak a  neih phah thei fawn.

Reilote sung mission khualtlawnnak (short-term mission trip) hi sumpai tampi cem le khungkhai ih tuah a ṭul lo. Ahleicein, United State ah tla cun Khristian tambik tla cun hi vekih reilote sung mission khualtlawnnak nei thei dingah canṭha an nei thluh. Hi cabu ka ngannak Philippines khalah, cuvek in canṭha khawhhran fehtlang in siseh, mission pawlkawm (agencies) a phunphun fehtlang insiseh kahsuahawknak canṭha tampi a um. “Kan kawlram sung ih rawngbawlnak khalah reilote sung mission khualtlawnnak nei thei dingah mai kawhhran fehtlang cio in mi tambik in hmuh le thlen dah lonak ramthim kan thleng thei cio”[1] Zumtu Khristian kan si bangin kan tlawnsuahnak ding hmun le ram cu a bangawk thluh a ṭul lo. Leitlun hmunkim hi kan missions rawngbawlnak ram (field) a si tikah mah le umnak hmun thawi a remcan dan ih zirin hi reilote sung missions khualtlawnnak hi neih theih cio a si. Cuvekin, sumpai khungkhai tukih cem ṭullo in kan dinhmun ih zir in ramdang deuh siseh, kanmah ramsung ih nunphung dang le phun hnamdang lakih kahsuahawk hi a ṭhahnem ngaingai. Mi ih fehcak ding ko in sawmdan thiam tum aw! Na rualpi mission hrang thlacam pawl le bawmtu pawl hmuahhmuah telve dingah sawm aw. Na umnak kawhhran ih minopawl tla telve dingah sawm aw. Cuvekin, Pathian in nan khualtlawnnak le nan lakih thilmak a tuah ding zum ngam aw. Nunthlengaw le Pathian in an nun a thleng ding mi pawl hrangah ziangtin bawmnak na pe ding ti ralring cia aw.

Cabu Siar aw

Hitawk ihsin khawihmun pan in na feh vivo ding? Fehnak, hmun ṭhabik pakhat lakih a telve mi cu library lole bookstore a si. Mission thuthawi pehparaw mi cabu ṭha tampi, “thlahsuaktu” dinhmun lole “thlahsuahmi” dinhmun ih Pathian ram hrang hnaṭuannak ih na tel thei nak ding hrang lo bawm theitu cabu ṭha tampi a um. Kan zohpeh vivo ding mi cahmai malte sungah missions rawngbawlnak hrang ih cabu ṭha ka tizual mi pawl ka tarlang ih cupawl cu siar bet zuam aw. Cupawl na siar thluh a siah cun mission rawngbawlnak hrangih theih ṭul mi thuṭha tampi an lo hmuh ding. Hi thusuhnak “ Atu-ah ziang ka tuah ding?” ti mi thu na sutaw a silen nasa ngaingai in na san dan ding a lo bawm ding.

Hi a hnuaiih ka relding mi cabu tambik hi cu nan tualsung cabu dawr lole library ah a um ding. Aum lo pang asilen, interent ih www.amazon.com lole www.missionbooks.org. ti mi ah zoh aw la, awlsamte in na hmu thei ding. United State ah phei cun awlsamte in toll-free 1-800-MISSION ko mai aw.

Alphabetical in a dawtdawtte in hitin cabupawl cu ka rawn tarlang

Anthropological Insights for Missionaries, by Paul Hiebert, Baker Book House, 1985.

Missionarypawl hin an rianmi mipipawl ih thuanthu, nunphung le ram leilung umdan fiangtei an theih a thupi zet. Anmah le mah an theihfengawk vek tluk rori in an theih a ṭul. Cutiasilole, Hievert cun hitin ralrinnak, “ Thlahsuaktupawl” le “ Thlahsuahmipawl” in hi cabu hi an siar a ṭul ahleicein thlahsuahmipawl in an ṭul zual ti ah a ti. Hi cabu hi mission thuthawi pehpar aw thuhla ka zirhnak classpawl ah tahfung vekih ka hman ṭheu mi a si ih, ka tlawngtapawl khal in a ṭhatzia an rel uar zet.

Let the Nations be Glad! The Supremacy of God in Missions, 2^nd revised edition by John Piper, Baker Book House, 2003.

---

[1] . Hi catluante hi keimah (Henry) ih bet mi a si.

Hi cabu hin Khrih ih Kawhhranpawl cu Pathian ih vision laifang a si mi leitlun pumpi ih thuthangṭha phuansuah hna ah thasuah sinsin dingmi a fawrh. Let the Nations be Glad! Cabu hin missions le Kawhhran hrangah ṭhumawknak tling Pathian thuthuuk a thawng tampi Bible college hrangah siseh, seminary tlawngtapawl hrangah siseh, missionary le pastorpawl hrangah mi a pe. Thlung Hlun le Thlung Thar ih Bible catlangpawl la suakin, John Piper cun “Pathian Biak (worship) hi kawhhran ih hmuitinmi thupibik a si ih cui cohlantlak Pathian biaknak cun missionarypawl cu kekarsuak cakzet nei thei dingah a mawng” tin a ti.  “Thlahsuaktu” ansi maw “Thlahsuahmi”an si khal len, mi zokhal mission rawngbawlnak ah a teltu le tel dingih a timlam aw rerotupawl hrangah hi cabu hi kutken vekih neih thlak a si.

Operation World , By Patrick Johnstone and Jason Mandryk, Paternoster UAA, 2001.

Thlacamnak in ziangkim a danglamter! Hi cabu mi zumtu pakhat khat a thlacamnak Pathian in leilung pumpi thlengnakah hmang hramseh ti ih duhnak sangzet a neitupawl hrangah bawmtu danglam hleice a si. Hi cabu sungah hin thlacam director, ram pakhat hnu pakhat an ṭulmi- missionary hnaṭuan siseh, an phurrit siseh, an ram ih an ṭulmi pawl felfai zet ih tarlannak a si ih thlacam rawngbawlnak a neitu cun neih tengteng a tlaak. Mi pum tamlam, pursum leilawnnak, ram hruaiawknak, sakhuanak, kawhhran, a ram zuk , khua le tlang, leilung umdan pawl tla cipciar zetin mi a kawhhmuh. Siar aw la, Pathian in leilung miphun tampi lakih a hnaṭuan zo mi le a ṭuanrero mi na hmuh tikah na lungawi in na tha a tho zet ding. Cun, khatlamah leitlun killi ih thuthangṭha hmuar nei zetih phuansuah a si lai hlan lo missions rawngbawlnak kan liangparah a ṭhum aw ti thei in thlacamnak in siseh na ti thei dandan in missions rawngbawlnak ah tel ve aw. Thlahsuaktupawl, hi cabu hi a hleice in nan hrang liauliau ah a si! Nangmai pumpaak thlacamnak hrangah siseh, cutiasilole na missions rawngbawlnak hrang thlacam pawl le bawmnak pawl hrangah cabu tlak le tling a si.

Perspective on the World Christian Movement: A Reader, 4^th revised edition edited by Ralph d. Winter and Steven C. Hawthorne, William Carey Library, 2009.

Hi cabu hi Bible tlawng 100 lenglo le special course hrang ih zirh dingih timlam mi, secular background ihsi Pathian ram hrang hnaṭuannakih pumpe aw pawl hrangah ih timlam mi a si. Tuini ih missions rawngbawlnak hrang theih ṭulzet mi Bible thuhla, thuanthu, nunphung le tuahdan ding (strategies) a phunphun kimcang zetin a langnak library vek a si. Hi cabu sungah hin cahram (articles) 170 lenglo a tel ih cui cahram pawl tla cu minung 150 laiih an ngansuah mi, thlahsuahmipawl  khal in an theihfeng ding le thlahsuaktupawl khal in an ṭhathnempi ngaingai ding mi cabu rotling a si.

SENT OUT! Reclaiming the Spiritual Gift of Apostleship for Missionaries and Churches Today, By Larry W. Cardwell, William Carey Library, 1992.

Tuini ih thuthangṭha sim uartu (evangelical) tampi cun tirhthlahsinak thilpek hi kan theifiang lo. Mihrekkhat cun hi thilpek hi Thuthlung Thar ih Kawhhran hmaisapawl cun a takin an hmang ko an ti, asinan tuini ah Kawhhran ah ziangtin hmansuah a si, lole ziangtin hmansuah a si ding ti mi ah an thinlung a vaivuan . Mi tampi cun hi thilpek hi tuini ih zumtupawl hrangah a si nawn lo ti ih a titawk siseh, cun hi thilpek hi Thuthlung Thar nganṭheh a si khan a cem ve cih a ti khal an tampi fawn. Hi thuhla hi Send Out! timi cabu sungah a thar ih kan feng theinak dingah ka rawn tarlang ih cuihleiah kan Bible in ziangtin hi ruahnak hi Pathian thu (theology) zawng insiseh mission thuthla (missiology) zawng in a rel timi khal ka hliakhlai tel.  Cumi ih ka thukharnak cu thirhthlahsinak thilpek hi tuini ih Kawhhran in mission hna kan ṭuannak khalah Pathian in mi a pe lai ti hi a si.  Hi cabu khal hi “ Thlahsuaktupawl” le “ Thlahsuahmipawl” hrangah bawmtu tling neih tengteng tlak a si.

Serving as Senders: Six Ways to Support Your Missionaries, by Neal Pirolo, Emmaus Road, 1991.

Hi cabu hin “Thlahsuaktupawl” cu ramthim in mission rawngbawlnak a neitu hmaituang pawl thawn ziangtluk an thupi ti mi fiangten a rellang. Tuini ih missions cangvaihnak (missions movement) a phunphun hrangih theih ṭulmi ruahnak thuuk zetzet le ṭha zetzet a funkhawm. Pirolos cun thlahsuaktupawl hrangah theih tengteng a ṭulmi thil paruk:  Ruahnak (Moral), Thilumtudan (logistical), sumpai thuhla (financial), Thlacamnak (prayer), Biakpawhawknak (communication), le ziangti luh ding (re-entry) pawl a tarlang. Curuangah, “ thlahsuaktupawl” , hi cabu nan siar tengteng a ṭul!

World Mission: An Analaysis of the World Christian Movement, by Jonathan Lewis, William Carey Library, 1999.

Theihawlsam le famkim, pawl (group) lole mah pumpak hrang zirnak kutken ih neih tlak a si. Hi cabu hi tuini ih missions kutken cabu kan neih ṭhabik mi lakah a tel ding.  Asung ah hin siartupawl hrangah tuah le ti ding tete mi a pe ih cupawl tla cun rawngbawlnak hrangah mi a bawm zet. Mission thuhla tlawng inn ih ka zirh tinte’n hi tawk sungih ca pawl hi ka thuhmaihruai ah ka hmang ringring. Hi cabu zirciannak ihsin nun a thlengaw danglam mi ka tlawngta minung tampi an um. Bung 1 nakin kan Bible in missions hi ziangtin a hmu timi le missions a ṭhumawknak thuhla pawl a rel; Bung 2 nakin ziangtin mission hnaṭuan kan ṭuan ding  ti a rel; Bung 3 nakin ramthim le phun hnamdang lakih mission rawngbawlnak mi a khihhmuh. Hi cabu hi thlahsuaktupawl le thlahsuahmipawl hrangah bangran in a thupi veve. Ahleicein, Khawhhran missions rawngbawlnak hrangah missionary thlahsuah a duhtu le thlahsuak ding ih a timlam aw rero tupawl cun hi cabu hmang in thil tampi an zir ngah thei ding. Hi cabu hi a ṭha tuk ti liam lo sim ngaihnak khal ka thei lo! Siar tengteng aw.

Website ah zoh aw

Hitawk hmun ihsin khawtawkah na feh bet ding? Na fehnak ding hmun ṭhazet pakhat dang leh cu Sungbu (Internet) hi a si. Khatlamah, internet na kau tikah missions thuthawi pehparaw ih theihternak (information) tampi na hmu ding, asinan, hi tawkah leitlun pumhuap ih missions rawngbawlnak le cangvaihnak ih rawn a tlak bikmi website pathum pawl,an cangvaihnak kaihtawimi thawn ka lo sim ding. Hi websitepawl zingzawi fel dingah na can pe in kau aw. Anzate hin ramthim lakih rawngbawlnak hrangih theih ṭulmi theihternak (information) le ziangtin cupawl hnenah thuthangṭha kan thlen ding (strategy) a phunphun an lo sim ding. Cui websitepawl tla cu a hitivekin:

JOSHUA PROJECT (www.joshuaproject.net)

Ramthim, thuthangṭha thlen ban hrihlonak ih mission rawngbawlnak hrang kawhhmuhtu ṭhabik pakhat a si mi cu Joshua Project hi a si. Hihmun hi zovek “ Thlahsuaktu” lole “Thlahsuahmi” khal in hram kan thawknak ding hmun a si. Joshua Project hi leitlun ih phun le hnam fatete ih a ummi, Pathian thuthangṭha thlenban hrihlonak hmun pawl, Jesu a zumtu malte lawng umnak hmunpawl zingzawinak website le cui minungpawl ih thuhla tawi le theih ṭulmi tarlannak hmun a si.  Thupek ropi hlensuahnak hrangah hivek ih mibuur fatete umnak pawl le an hnen ih thuthangṭha phurhsuah hna le anlakih thilcang rero mi, thuthar pawl theih hi a thupi tuk. Cupawl tla cu hi website in a lo sim thei ding.

Joshua project cun miphun kim hnen ih Thupek Ropi thlen le leitlun mi hmuahhmuah Khrih dungthluntu si thei ding hrangih theih ṭulmi , hmalak ṭulmi le hmalak dan dingpawl a ṭha theibik ih pek a tum: (1). Leitlun ih miphun fatete ummipawl cu zole an si? (2). Anlakah Kawhhran dinpi a ṭulmi mibuur paziat an um lai? Le (3) Cupawl hnenih thuthangṭha le kawhhran dinsuah hna hlen a si theinak dingah ziang hmanrua pawl si ṭul? ti mipawl mi a kawhhmuh. Joshua Project cun leitlun killi ih mission hnaṭuannak hrangah thuhla a lakhawm, a lakkhawm mipawl cu a zohfel, cutin midang hnenah theihternak (information) a pe suak ih cutin kawhhran dinsuah a si theinak dingah le missions pawlkawm (agencies) a phunphun thawn kutkaiaw in an ṭuankhawm.  Joshua project cun missions thuthawi pehpar aw ih zingzawimi hna a phunphun a khawngkhawm ih cutin, mi phunkim a kim thei bik ih an thuhla theihternak (information) peksuah cu a tumtah bikmi a si.

THE NETWORK FOR STRATEGIC MISSIONS (www.strategicnetwork.org)

The Network for Strategic Missions hi thuthangṭha a thlen hrihlonak leitlun pumpi ih ramthim a a si lai mi pawl hnenih ruahmannak fumfe thawi an hnenih Pathian thu thlenter theidan ruahkhawmnak innpi a si. Hi Website in mi ṭhahnemngai tampi pawl ih thazaang suah ih an zingzawimi, online missions magazine media thuthang laktawi siseh;  Missiopedia, missions hnaṭuannak hrang kutkaih nangmah ih na rem theih ding mi; mission cahram (articles) 16,000 hnak ih tam le a phunphun thuhram laknak(sources) na hmu in na hmang thei. Hi website hi ramthim rawngbawlnak hrang lawngah a siloin “ Thlahsuaktupawl” le “ Thlahsuahmipawl” hrangah hleihlei thuuksin ih mission thuhla zingzawinak ah a ṭha tuk.

U.S. CENTER FOR WORLD MISSION (www.uscwm.org)

U.S.Center for World Mission (USCWM) hi pawlkawm, Pathian sunlawinak famkim zetih a langsuah theinak dingih hlan mi, leitlun ih miphun hmuahhmuah Amai hnenih hruai le Pathian thuthlun (Jesuh Khrih ih phuanlang a sivekin) ti mi ruahsan ih tuah mi a si. Hi USCWM hin leitlun khua zakip ih miphun le innsang a ummipawl, Khrih ih taksa pawl thlawsuahnak ding le an nun sawhhngehnak ding ih hmansuah ding mi hmanrua ṭha ṭha an tuahsuak. Cui an hmanrua tuahsuahmi lakah Daily Global Prayer Digest (Nitin ih zumlotupawl mibuur umkhawm pawl hrangih thlacam dan ding) siseh, Thlakhat vawihnih suak Mission frontiers (Ramthim rawngbawlnak ih thil cang rero mi thuhla thar lam le cangvaihnak pawl) siseh, thlali dan ih vawi khat suak International Journal of Frontier Missions (Ramthim lam rawngbawlnak hawi Pathian thu ziak thuuk le sang taktak) pawl an tel. Hi a tlunih hmanrua (resources) pawl hi a lak ih laksuah theih (downloadabe) theih in an um. Hi website khal hi Leitlun pumpi ih thei hrihlotupawl hnenih thuthangṭha thuuksin ih kan luhpi theinak ding hrangah cun “ Thlahsuaktupawl” le “ Thlahsuahmipawl” hrangah bawmtu maksak a tling.

Ralṭha zetin um aw

Tuah bet na duh lai maw? Hrekkhat thil pakhat khat tuahbet duh hrangah cun, “ Hmuhdan” (Perspectives) lole “ Kairo” zirlai (course) ti mi na umnak hmun thawi zir ih na lak ka lo duhsak. Hi zirlai pahnih ka tarlan mi khi leitlun hmunkip ah a um ti theih a si. Cuihleiah, ṭong dangdang khal in lehlin in a um. An websites www.perspectives.org lole www.kairoscourse.org hi famkim sawn ih na theih nak hrangah pehtlai aw. Na sirawk lo ka zum!

Thukharnak

Kan sim zo bang khan a takih na tuah thei ding mi ṭuanvo tampi a um. A tlun ih ruahnak kan pekawk mipawl tla khi na nunnak hrangih na Pathian kutcak siarih na hmansuahawknak, Pathian in na nunnak ih bungcang thar (next chapter) a lo peknak ding hrang lo thatho tertu lawng an si hrih. Sim zo bangin hi rawngbawlhna a takih nunpi ding hi nangmah ih thu a si. Hi thupawl na theih hnu ah a sannak tuahtu ding cu nangmah na si. Na hrangah sannak ka tuah thei lo. Midang zo khal in na hrangah an tuah thei lo. Nangmah rori in a sannak na tuah a tul! Pathian rawngbawlnak sungah na telve ding maw ding lo cu nangmah rori ih thubawhcahnak na tuah ding mi a si. Na nu le pa, u le nau, rawngbawlpi le kawhhran khal in kan lo tuahsak thei lo! Thubawtcattu ding thupibik cu nangmah na si.

Hi kan umnak leitlun ih runnak thuthangṭha a thei hrih lo mi mibuur 6,950 tluk rori a um hrihmi pawl hnenih Bawipa in hna a ṭuan nakah nang le kei khal diriam takih kan telve theinak dingah canṭha tuini ah in awn ve. Nang le kei khal in kan ti thei tawkte ih telve dingah Pathian in can sunglawi in awn hrih a si. A thei hrihlo mi mipum 2 Billions hnih, kumkhaw Hremhmun ih an nun liamral mai ding khi vawn ruat hman na zaang an fak lo maw? Hipawl nunnak runsuah an si theinak dingah Bawipa in can in awn hi mi vanṭha tuk kan si! Kutbawm in to men hlah uh si! A tu rori ah, an nun a liam hlanah runsuak zaang uh si.

A Sunthu Bihciannak

Reilote Tlawnnak le Thlarau Thilpek

Reilote sung mission khualtlawnak ih tel hi zirnak ṭhazet ah a cang thei. Mission hnaṭuannak thuhla lawng si lo in, thlarau lam thilpek kan comi tla kan hmuhfeng phah thei. Keimai pumpak nunih ka hmuhtawn mi ihsin thuhnihte ṭhimnak vekin ka lo ruah ding.

Bible tlawng ka ṭheh hlante ah ka nupi thawn Philippines ah kumkhat tlawng in Bible tlawng fate ah ca ka zirh. Kan nupi thawn kan pahnih in Pathian in missions hnaṭuan ṭuan dingah in ko in kan thei. Cule, Pathian in nuamnai tete in ka thlarau lam thilpek khal in hmuh feng ter ih cutin zirhnak thilpek ka rak co titla ka vawn hmufiang deuhdeuh. Hi reilote sung kan khualtlawnnak hi kan hrangah cun can sunglawi zet ah a cang. Khaiṭum ihsi khan zirhnak (teaching) hi thilpek ka co mi ti fiangtei ka hmuhsuah hleiah, kan nupa in kum rei sawn (long- term) ramdang ih missions hnaṭuannakah kan tel a ṭul timi fiangten kan thei. Khatlamah, kan samnakpawl ziangmaw zat kan hmuhsuah hleiah ziangzawnah ṭhan bet kan ṭul timi pawl tla kan hmu suak.

Kumhnih a liam hnu, ka nupi thawi kumkhat sung People’s Republic of China ah miring kan zirhsal tik khalah, ka hrangah thlarau lam thilpek ka co mi suhawknak can a si lala. Philipines ih ka umlai ah khan zirhnak thilpek ka co mi kha nemhngeh in a um zo ih. Atu China ah, missionary hmaituang hrangah thilpek ka co le colo hmuhsuah ka tum sal. A tawinak zawngin, Ka hmuhsuahmi cu ka co lo ti hi a si. China pawl zohman Pathian hnenah ka hruai lo. Kawhhran khal ka din fawn lo.  Ngaingai ten ka sim bet a silen, ka hrangah ka tlawngta pawl hnenih Kristian zumnak thuhla rel hman ka harsat zet. Culawnghmansiloin, zirhnak thilpek ka comi khal nemhngeh in a um sal lala. Cuisi fiangtei ka  hmuhsuah mi cu mission ramthim nawrnak ih a hmaituang si ding hi ka thilpek dawnmi a si lo ti hi a si. Asinan, ramthim rawngbawlnak hrangih ka hmarngainak cu ramthim hmatuang ih rawngbawlnak thinlung a neitu le thilpek a cotupawl zirhnak ah malsawmnak titler ah a cang thei ve thung.

Na hrang khalah reilote sung missions khualtlawnnak hi a ṭhahnem zet tla si thei ve. Na hmuhtawnmi in na thlarau lam thilpek hmuhsuahnak ah a lo bawm in, ramthim rawngbawlnak ah ziang dinhmun lole ziangtin tel dingah Pathian in a lo duhsak titla na hmufiang thei fawn. Reilote missions tlawnsuahnak a um len telve tum tengteng aw!

Ruah Dingmi Thusuhnak

1. Na rualpi Khristian minung panga na missions hrang thlacam pawl le bawmtu pawl lo zawm thei ding awm ang ih na ruah mi ngan aw. Ziangtinha cui minung pawl cu na sawm khawm ding? Khawitawkah le ziangtikah ha hmaisabik tawnkhawmawknak nan neih ding? Zopawl hrangah ha thlaza nan cam ke?

2. Ramthim mibuur ih umpawl lakah seherh mi hleice lole hril hleicemi nan nei maw? Pathian in hi ramthim minungpawl lakih sin mi pakhat khat fale vekih nan cawm ding ah lo theih ter si bang ta sehla an thuhla fiang tei thei ding in ziangtin ha thuhla nan zingzawi ke? Ziangtin ha na  mission hrang thlacam pawl , bawmtu pawl le Kawhhranpawl cu hi ramthim minung pawl fale vekih cawm theinak an neih theinak dingah na bawm ding?

3. Na hrangah reilote sung rawngbawlnak ding can awng aw a um maw? Cupawl cu ziang hna an si? Cupawl ihsi hlawknak nangmah khal in sarsuak ding ah ziangpawl na tuah a ṭul?

4. Missions thuthawi a pehpar aw mi ah ziang cabu si hi mi thluh ah siar na tum?  Ziangtin ha cui cabu cu na ngah thei dan ding? Cun, ziangtik cekci in siar na thawk ding? Ziangtikah internet online in a tlunih kan tarlan zomi websitepawl na zoh ding?