USA ramih inn-rangpi (white house) ti cun a thei lo
kan um lemlo men ding. USA President pawl umnak ti khalih theihmi a siih tuiṭum
cu White House thu le a sungah ziangpawl an um timi mallai kan run ngan ding.
White House hi 1792 ih sakmi a si. A hmunram umnak
hi 1791 ah president George Washington ih rak hrilmi a si nan amah cu
inn-rangpi (White House) sungih rak um ngahlotu president a si. Tui White House
umnak hmun khi George Washington le a nupi an rak hmuhawknak le duhawk
hmaisabiknak hmun tiih simtu tla an um. A hram (foundation) cu 1792 ah an thla
thokih a saktu ding mithiam (designer)
ahcun James Hoban in nehnak a co. 1792 ihsin an sak thokih 1800 ah an ṭheh, kum
riat an rei.
1800 ah president John Adams le a nupi Abigail cu
inn-rangpi ah an ṭhawn ih White House luah hmaisabiktu an si. White House ih an
thlen pekte ah President John Adams in inn-rangpi thu thawn pehparin a nupi
Abigail hnenih ca a kuatmi cu: “Hi inn
pi hi vancung Pathian ih thlawsuah pekmi siseh tin thlaza ka cam, cui thlawsuah
cu kumkhua in hi Innpi ah um ringring hramseh! Ram hrangih midingfel, mi rinum,
le fimthiamnak neimi siarlo zovek hmanin hi luanglu hnuaiah rampi thuneihnak la
in lal tum hlah seh!” (I pray Heaven
to bestow the best of the blessings on this House, and all that shall hereafter
inhabit it. Man none but honest and wisemen ever rule under this roof). Cui
ca cu America ramih a vei 32nak President Franklin D. Roosevelt ih sanah White
House innpi sung, rampi rawleinak khanih phar parah an run tar.
1812 ralpi ah British in 1814 ah meisa thawn an
siatsuah thluh. James Hoban cu
inn-rangpi sak sal dingin fial a siih
cutin 1817 ah president James Monroe cu inn-rangpi ah a cer sal. Monroe
ih sanah thlanglam banpawl a sak bet ih Andrew Jackson in 1892 ah a saklampawl
a sak bet. Kum zabi 19 hrawngah hi inn-rangpi hi rem bet vivo a siih a cipciar
le fiangfel ih theih thluh lomi tete tla a um. Tu ih kan theih daan a hmin,
inn-rangpi (White House) timi hmin pe dingih rorelnak an neih laiah lungvar ih
sakmi a si ruangah siseh, president ih duhnak ruangah siseh ‘White House’ tiih
hmin pek a rak si. A thok lam ahcun White House tiin an rak ko dah lemlo.
President sui-inn (President palace), President innpi, cozah innpi tivekin an
rak ko celcel. 1901 ah Official ten president Theodore Roosevelt in “White
House” tin hmin a pek. Cumi ihsin tutiang White House ti lawnglawngin an ko
lanta.
Tu ahcun hi inn-rangpi hi a sau lam pi 168 (51.2
meters), a kauh lam cu ban tumpipipawl (porticoes) tello in pi 85 le zung 6
(26.1 meters) a siih banpawl thaw cun pi 152 kau a si. A tlangpi thu cun a sak
lamih a san lam (a luanglu tiang cun) pi 70 a siih a thlang lam cu pi 60 le
zung 4 a si. A sungah khan (rooms) 132, kholhawknak khan 35, sangka 412,
sangkate 147 ummi innpi a si. Cun, tappi (fireplace) 28, le karbak (staircases)
8, le cetfehnak (elevators) 3 an um. Inn rangpi ih rawlsuannak khan cu mikhual
140 lai rawl dar thei ih hisapmi a si. White House cu a zial hmunram (a sawng 6 zial zate) cu 55,000 square feet
hrawng a si.
White House innpi sung ahhin umnak khan tampi lakih
hminthang bik cu zungkhan sawl (Oval Office) tiih theihlarmi a si. Cumi sungah
an hotubik (president) ih hman dingmi cabuai pakhat a um. Hi innpi sungah cabuai tampi a um ko nan a
hminthangbik cu himi cabuai hi a si. Ziangahtile himi cabuai cu 1850 ah England
ti-ralkap lawngpi, HMS Resolute, thingpawl thawi tuahmi a si ruangah a si. Cumi
thing cu 1879 ah British lalnu Victoria in America ih a vei 19 nak an president
Rutherford B. Hayes hnenih laksawng a rak pekmi a si. Cui zungkhan sawlpi
sungah sangka pali a um. Sangka pakhat cu rawleknak khan fate le ca siarnak
khan fehnak a si. A dang sangka pahnih cu inn-rangpi (White House) dunglam
fehnak a si. A dung lam ahcun president le a kuthnuai bawi upapawl ih
zungkhanpawl tla an um. Netabik sangka ih suah asile a mawi zetmi langsinpar
dum (rose garden) ah a suak. Oval Office ih pharpawl ahcun hminthang zetmi kut
suaizukpawl an um. Kut suaizukpawl cu rothilretnak(museum) ihsin lakmi an siih
president dang an kai asile an duhlomi cu a thleng thei ih pharpawl khal an
duhmi rong(color) thlengtheinak a nei.
A dang hminthang deuhmi khanpawl cu dinhmun zohnak
khan (situation room), cozah rorelnak khan, Lincoln ihnak khan, Lincoln ih
casiarnak khan, zuk(map) umnak khan, lalnu ih umnak khan, tivekpawl an si.
Lalnu timi cu America ra tlawngtu England, Netherland, Nepal, Norway, Greek
ramih an lalnu asilole an siangpahrangnupawl ih umnak khan tinak a si. A hlan
ahcun cumi cu langsinpar khan (rose room) tiih kawh a sin an siangpahrangnu
(lalnu) pawl an thlen leuhleuh hnu in a hmin thleng salmi a si. Cutawk ih mipa
riak dahtu um sun cu British PM Winston Churchill a si. Mangbang um nawn pakhat
cu Asia nunphung thawi tuahmi khan pakhat a um. Cumi cu Tuluk khan (China Room)
tiih kawh a si.
Hi innpi ahcun President-pawl colhhahdamnak hmun tla
a um. A hmailam ahcun minung 42 tlem movie/video zohnak khan a um, cumi cu
president a colhhahdam caan ih a zoh ding hrangih retmi a si. Oval office ih
dunglam ah president-pawl ‘golf’ lehnak hmun le tileuhnak hmun a um. Cun
casiarnak (library), basketball lehnak, tennis lehnak tipawl tla an um. Cutawk
cu a lengmi khal va len theihnak hmun a siih thla khatah minung 30000 lenglo an
leng ṭheu.
White
House Thu Theih Ṭha Tete
US President lakah George Washington lawng hi White
House ih rak umlotu a si.
Thomas Jefferson cu 1805 ah White House onnak-puai (inaugural
open) tuahtu a si.
John Quincy Adams cu White House pangpar hmuan
tuahhmaisabik tu a si.
White House hmailam a tualrawn hmuahhmuah tidai toih
thluh ding cun tidai gallons 570 a ṭul.
White House ih ti-leuhnak khi 1933 ih tuah betmi a
si.
A lenglam tikhohnak cu Gerald Ford in 1975 ih a
tuahmi a si.
Tu ih movie umnak khan khi a hlanah kawr le thilri
retnak (cloakroom) a rak si.
President Carter cu 1978 ah White House ih a
hmaisabik computer le laser printer kengluttu (neitu) a si.
White House sungah hin pangpar dawr, ha-tuahnak zung
(dentist office), zungthiam zung (capenter’s office) le bowling alley pawl tla
an um.
Dinhmun thlirnak khan (Situation Room) timi tla a
hnuaitabik (basement) ah a umih siatral harsatnak tivek a thlen caan ih
President in a thuronpawl a tonnak hmun a si.
(Ref:
thutazone, whitehousehistory, whitehouse.gov, history.com, dcducks)
0 comments:
Post a Comment