Falam Bible Thutawi

Falam Bible Thutawi

Ting Hlei Thang

Falam Bible thawhkehdan

(1)  American Bible Society ih suahmi A thousand Tongues (Tawng thawngkhat) in cabu an suah mi sungah Thuthang Tha pali ( Mathai, Mark, Luke, le John), Tirhthlah cabu le I kor. cu cabu pakhat in Falam tawngin kum 1933 ah an suah. Himi hi kan calai in rak tuahsak tu Rev. J. H. Cope in a let ih Cabu hmin ah " Laizo Baibal" an rak ti. U Lian No ( laizo mi ) mi in a rak bawm.

(2) 1951 kum ah Pu En Thawng ih lehmi Thukam Thar cabu, A.B.M press ih suahmi Laizo Bible an rak suah. Kum 1960 tiang cu Laizo Hlabu, Laizo Baibal, Laizo tawng tiin a rak feh. 1960 hrawng in Rev. E. Kyon Bill in Falam peng Khristian a rak kai hruai. Amah hi Falam miphun sung in BTH a ngah hmaisa biktu a sil. A mai hohanak in pengpi le rampi huap theimi tawngfang a tha ti ruang ah pengpi mitting ahthu a suahpi ih kum 1962 ah mi tamsawn lungkimna in " laizo tawng" timi in "Falam tawng" tiah an thleng. Cuih hnu in Falam Hlabu, Falam Baibal, Falam tawng tin kan run hmang tata.

(3) Himi cu Rev. E. Kyon Bill ih ruannak thu a si.1960 kum thawkin Bible hnatuantu pawlpi (Bible Society) le Kawlram Tipil Khrihfabu pawlpi ( Burma Baptist Convention) bomnak in hi tawng pathum in Holy Bible neih thei ding kan thawk", a ti. Cutiin Falam khal cu zapi lungkimnak in Baible lettu (Translator) dingah Rev. E. Kyon Bill an hril. Thukam Thar hi kum 1972 ah a theh nan, bible Society in cabu ih namnak khuan an rak pek lo. A leh mi ah lungkim lo nak an nei a rak si hmang. Cutin kum 7 sung lai Rev. E. Kyon bill le a bawmtu committe pawl ih hnatuannak cu 'thuthi' ah a cang.

(4) 1973 kum Ramthlo khua ih FBA khawmpi ah thu an suahpi ih mizapi lungkimnak in  Hre Kio hi Falam bible lettu (translator) ding ah an rak hril. Cutin mipi auaw cu el ngam ve lo in kumkhat sung timtuahnak a neih hnu kum 1974 in tuan hram a thawkih 1991 ah falam Bible a theh suak thei. Cun 1995 in rem ( revised ) an thawk ih 2005 ah an theh thei.

2005 hnu lam cun Bible lettu thatha Pathian in in runpe vivo ih Bible phunphun tla kan run nei thei vivo. A hnuai ah kan zoh pei...

Falam Bible pawl

(1) Rev. J.H. Cope ih leh mi, Laizo bible 

(2) Pu En Thawng ih leh mi, Thukam Thar cabu 

(3) Dr. Hre Kio ih lehmi le remsalmi, Holy bible  (TEV)

(4) Dr. Thang Hoop ih lehmi, Pathian Thu Thianghlim (NASV)  

(5) Dr. E. Kyon Bill lehmi, Thukam Thar (living)   
(6) Dr. E. Kyon Bill lehmi, Thukam Thar (NIV)

(7) Ngawn Thukam Thar (UBS), (TEV)

(8) Zangiat Thukam Thar (UBS), (TEV)

(9) Robert Thawm Luai lehmi, Thukam Thar (KJV)

(10) Dr. Timothy Sui Lian Mang lehmi, Thukam Thar (KJV)