Israel Ram Thar An Din Daan

Israel Ram Thar An Din Daan

Part -I

By: Dr. Run Bik

Kan Baibal sungih a ngan vekin Israel mi pawl cu Pathian thu ih an um lo ruangah a hmaisa ah Israel ram(Saklam ram) cu BC7 00 hrawng ah Asiria pawl in an lak ih, cuih hnu BC 500 hrawngah Jerusalem telnak Juda ram cu Babylon pawl in an lak leh. Himi hnu cun Jesuh Krih suah tiang kum malte sunglai lawng Israel pawl cu mah te uk-awknak an nei ih, a tam sawn cu ram dang kut hnuai lawnglawng ah an um. Kan Bawipa Jesuh Krih ih a rak sim cia vekin Jerusalem cu na siat nasa ding a ti vekin AD 70 ah Juda mi pawl ih thate ih an um lo ruangah Rome emperor lal bik cun a fapa Titus Hovin ralkap thawngsawm tampi Juda ram ah a thlah ih, Jerusalem khal cu a bal thluh ih, mi khal thawng tampi an that. Tamzet in an ram an tlansan.

Himi hnu ah an ram cu Rome hnuai thotho ah an um ih, a tangmi pawl in AD 140 ah an hel leh. Rome cun zangfahnak malte hman nei lo in mipi cu a hrem ciam co, an nung um sun pawl khalin an ram an suah san thluh ti theih a si. AD 330 hrawng ih Rome lal Constantine  cu Christian a can tikah mi tampi cun Rome pawl ih Juda Palestine ram ti ih an kawh mi ah khual va tlawng in Jesuh umnak pawl an va zoh theu.

AD 636  ah Arab Muslim pawl in ram thianghlim cu an lak ih hi ram cu Muslim ram ah an tuah. AD 1200 hnu ah Europe ih crusade tuahtu Christian ralkap pawl in kum 150 lai an uk. Cule Arab a si lo nan Muslim a si mi Seujuk, Maamluk pawl tla in an run uk, a netabik ah Muslim tho tho Ottoman Turk pawl in kum 400 lai an run uk. AD 636 ihsin kum 1300 sung hrawngah a tam sawn cu Muslim pawl in Israel ram hi an run uk.

Kum AD1800 ihsin cun Juda mi pawlin leitlun ram dangdang ihsin “kan ram ah kir saal uhsi!” ti politic an run tuah. Juda mi pawl ih an ram an suahsan thluh hnu kum 1700 sung lai ah Palestine ah Juda mi pawl hi malte tal an tang nawn ke maw aw ti hi tuhlan ah rak theih duh mi bik pakhat a si ih, cumi thu ah veikhat cu ziangtiklai khal ih Palestine ih Juda mi 5000 tal an um ringring thu an ngan.

Santhar Israel Din Daan

Part II. (Theodor Herzl ih Thu - 1860-1904)

Dr. Run Bik

Kum 1800 hrawng tiang ih Israel ram um daan kan ngan zo ih, tu cu santhar Israel dintu pa Theodor Herzl (1860-1904) ih thu ka run ngan ding. Ani hi Hungary khawpi Budapet khua ah 1860 ah a suak. A nu le a pa khal mi nung thei an siih. Juda mi ti aw fekfek an si na’n sakhualam ngaihsak lemlo an si. Herzl hi ca a thiam thei zet ih, 1878 ah Vienna University ihsin Ph.D a ngah. Cuih hnu ah France ram Paris khawpi ah thuthangca ih thuthang latu hna a tuan. Tawkfang tiang cu Herzl hin a miphun thuhla lam a ruat tuk lemlo. A thinlung a thlengtu cu 1894 kum France ram ih thil thlng ihsin a si.

France Army ih Captain hnatuan France Juda mi Alfred Drufus cu midang pawl in ram phatsantu ah an puh ta riai. Thuthatei’ a ruattu pawl cun hihi thu dik lo a si ti an thei na’n Dreyfus hi Juda mi a si ruangah reipi tiang cu acozah le court lam khal in thiam lo an can ter. Heilaifang ah France khawpi tampi ah mi tampi cu zinzawh in Juda mi pawl thi hai seh tiin an au phah vek a theih tikah Herzl cun Juda mi pawl hin mai’ ram ti thei dingmi ram an neih lo cun an him dah lo ding ti a thei. Himi hnu cun Herzl hin Juda mi pawl hrangih ram neih theinak ding lawnglawng a ruat thlang. Herzl hin 1896 ah The Jews State ti ca uk a ngan ih, Zionist Novel Old New Land ti’n 1902 ah a ngan. Herzl hlan ah Juda mi pawl hrangah ram neihter ding titu pawl an rak um ko nan an rak hlawhtling dah lo. Cumi pawl  lakih hmin thang pakhat cu Hebat Zion ti hi a siih, annih hin lo neih phah ih Juda mi pawl hrang ram din an rak tum.

Herzl cun World Zionist Organization a din ih, amah cu President ah a tang. First Zionist Congress cu Switzerland ram Basel khua ah 1897 ah an tuah. Amah khal cu khual a tlawng ciam co i, Jerusalem tla a pal. Cule a ram thar din dingah khati lai ih Palestine ram neitu Ottaman Empire ih sultan tla Istanbul ah a tong. German siangpahrang Kaiser William II tla a tong. Tha an rak pe lem lo. Amah rak bomtu bik cu leh hnu ih British Prime Minister rung tuantu Joseph Chamberlain a siih anih cun British pawl ih Africa an ukmi Uganda ram ah Juda ram tuah sehla tiin thu ron a pe. Juda ram hrangah Cyprus tikulh le Sinai ram tla an zoh. Herzl cun Uganda ram i ram thar rak tuah lawk cu a duh nan an hotu pawl in an duh lo. Curuangah 6th Congress ah Uganda cu ruat nawn lo siseh tiin an ti.

Herzl hi a tummi hrangah hna a tuan tam tuk curuangah a harhdamnak khal in a tuar ih, kum note, 44 lawng a si lai ah Pneumonia natnak in Vienna ah 1904 ah a thi. A ruhro hi 1936 ah Jerusalaem ah an la ih, Independence an neih hnu 1949 ah Jerusalem ih Mount Herzl ti hmin an sakmi ah thlaan hnget si dingin an phum ta. Herzl hi The Father of Modern Zionism an ti theu. Israel ram thar dintu ah a cang na’n Juda sakhua cu cutluk in a thupi ter lo…

Israel Ram Thar Din Dan  III

By: Dr.Run Bik

Theodo Herzl cun Israel ram thar din theinak dingah Zionist Congress a din ti kan thei zo. Kum zabi 19 cem lam ahhin Herzl ih pawl lawng in Israel ram thar din ding hi an buaipi a si lo  ih, midang khal in an buaipi ve. Asinan Herzl cu kum 1904 ah a thi.

1870 hrawng ihsin Russia ram le ram hrekkhat ah Juda mi pawl hremtuar peknak  nasazet in a um. Cutikah thawng za tamzet cun Russia ram tla an suahsan nan Palestine ram ah an vai cuang lo. Palastine ram ih vai cu an malte. Cuti cing in an pung vivo thotho.

Leon Uris ih nganmi Exodus thuanthu ahcun 1900 ah Paletine ah Juda mi 50,000 an um zo a ti. Himi pawl hi a tambik cu lo neihnak hnatuan lam ah an um. 1906 ah Poland ram suak David Ben Gurion cu kum 20 lawng si in Palestine ah a vai ve. David hi a senlai ahcun Juda pawl ih tong Hebrew a thiam lo. A pai’ dinmi Hebrew tlawng ihsin an tong zir cawp a si. Ram le miphun a duhdawttuk ih tlawng hman kai sang lo in Palestin ram ah a vai a si.

Ben Gurion hi lo neihnak lam ah hna a tuan ih Palestine ih rakl thleng zo mi pawl a ho. Lo neihnak lam lawng si lo in Trade Uion lam ihsin a miphun hrangah hna a tuan. First World War a ra thlen tikah Palestine rak uktu Ottaman Turk pawl ih kaih an tum ruangah Ben Furion cu United States ah a tlan. Raal do-awk sung cu USA ah a um. USA ah Juda nu pakhat nupi ah a nei.

Raldo awklai ahkhan British pawl in anmah tantu dingah Juda mi pawl cu an duh ruangah Juda mi pawl cu an tlawn. Ral reh hlan deuhte 1917 ah British Foreign Secrectary Lord Balfour cun Balfour Declaration timi thu a suah i, cunah cun raal a reh tikah British kumpi cun Juda mi pawl hrangah zalenmi ram a din sak ding tiin thu an tiam.

1918 ah leitlun ralpi veikhatnak cu a cem ih British pawl cun Turk pawl cu an dawi, Cutawk lai in leitlun pawl tum bik League of Nations cun Palestine ram kil khawi dingin British kumpi cu mawhphurhnak a pe. British pawl ih thuneihnak ngaingai an run neih cun Juda mi pawl tlun ih an thutiam cu an ti hlawhtlin ter lo. Himi hi Arab pawl ih Palestine ram ih Juda mi pawl vaih an dodal ruangah a si. British pawl ih Arab pawl an rak tihnak cu Arab ram pawl ih zinaan(petrol) an rak neih ruangah a si.

Israel Ram Thar Din Dan  IIIBy: Dr.Run Bik Theodo Herzl cun Israel ram thar din theinak  dingah Zionist Congress a din ti kan thei  zo. Kum zabi 19 cem lam ahhin Herzl ih pawl lawng in Israel ram thar din ding hi an buaipi a si lo  ih, midang khal in an buaipi ve. Asinan Herzl cu kum 1904 ah a thi. 1870 hrawng ihsin Russia ram le ram hrekkhat ah Juda mi pawl hremtuar peknak  nasazet in a um. Cutikah thawng za tamzet cun Russia ram tla an suahsan nan Palestine ram ah an vai cuang lo. Palastine ram ih vai cu an malte. Cuti cing in an pung vivo thotho. Leon Uris ih nganmi Exodus thuanthu ahcun 1900 ah Paletine ah Juda mi 50,000 an um zo a ti. Himi pawl hi a tambik cu lo neihnak hnatuan lam ah an um. 1906 ah Poland ram suak David Ben Gurion cu kum 20 lawng si in Palestine ah a vai ve. David hi a senlai ahcun Juda pawl ih tong Hebrew a thiam lo. A pai’ dinmi Hebrew tlawng ihsin an tong zir cawp a si. Ram le miphun a duhdawttuk ih tlawng hman kai sang lo in Palestin ram ah a vai a si. Ben Gurion hi lo neihnak lam ah hna a tuan ih Palestine ih rakl thleng zo mi pawl a ho. Lo neihnak lam lawng si lo in Trade Uion lam ihsin a miphun hrangah hna a tuan. First World War a ra thlen tikah Palestine rak uktu Ottaman Turk pawl ih kaih an tum ruangah Ben Furion cu United States ah a tlan. Raal do-awk sung cu USA ah a um. USA ah Juda nu pakhat nupi ah a nei. Raldo awklai ahkhan British pawl in anmah tantu dingah Juda mi pawl cu an duh ruangah Juda mi pawl cu an tlawn.

Ral reh hlan deuhte 1917 ah British Foreign Secrectary Lord Balfour cun Balfour Declaration timi thu a suah i, cunah cun raal a reh tikah British kumpi cun Juda mi pawl hrangah zalenmi ram a din sak ding tiin thu an tiam. 1918 ah leitlun ralpi veikhatnak cu a cem ih British pawl cun Turk pawl cu an dawi, Cutawk lai in leitlun pawl tum bik League of Nations cun Palestine ram kil khawi dingin British kumpi cu mawhphurhnak a pe. British pawl ih thuneihnak ngaingai an run neih cun Juda mi pawl tlun ih an thutiam cu an ti hlawhtlin ter lo. Himi hi Arab pawl ih Palestine ram ih Juda mi pawl vaih an dodal ruangah a si. British pawl ih Arab pawl an rak tihnak cu Arab ram pawl ih zinaan(petrol) an rak neih ruangah a si.