Chin Refugee Pawl Ka Thlir

Chin Refugee Pawl Ka Thlir

Kan nauhak deuhlai suahsemnak lairamih zo ngai lawi, lungduhza thawi hni le khekih kan nawm lai pawl, zanthlapa awi ih a lek reromi nauhak, Lairam hrang theitawk mawinak a rak suahtu parmawi phunkim, Lairam mawinak phunkim rak femvetu va phunkim le ka duhdawtmi unauza pawl  ka ruah tikah ziangruangah saw tui canah kan țhenawkthluh ti thu pawlin ka thinlung a sual buai. Ram harsatnak le retheihnak ruangih kan unau, sungkhat le țhianrual pawl “refugee” an tlan thluh nak hin ruahsannak tampi cu a ti cau, hmansehla suahsemnak lairamah kan kirsal thluh leh ko ding ti ruahsannak thawn “refugee” thuhla mallai ka zoh peiuh.

 “Refugee” timi tawngkam hi 17^th century 1675-85 ih French țawng  “réfugié”  ih ra a si. A sullam cu tampi’n leh a theih ih beunak hlaw ih tlan, harsatnak sungin himnak hawl, Ram buainak ruangih Ram khatin Ramkhat ih tlan tin siseh tampi san a nei. “Refugee” timi tawngkam hi mi’h thinlung la zettu a si lo nan tui kan Leitlun pi ih a tawn rero mi le kan Chin mipi ih kan tawn/tuah reromi a si fawn. UNHCR official website vek asile 2009 kumih a vawi 60^th kimnak Refugee day a tuah țumah leitlun ah “Refugee” mipum 42 million an um tin a tarlang. Tu-ah 43.3 million lenglo a um ih zum a si. Leitlun Refugees ih 80% cu Miphunpi sung ihsin Ramsung buainak harsatnak ruangih Refugees an si. NGOs ih leitlun refugees a puncahdan thu a relmi hnakih refugees tamsawn a um tla hi thuhman asi betah mangbangza ngaingai a si. Curuangah himi in a sim duhmi cu leitlun a damsung cu refugees hin cemni a nei lo ding ti in simcia tinak a si.

Curuangah tulai kan Chinland ih lar zet pakhat a si mi Refugee hi ziangtin na ruat ve? Refugee hi a sual na ti maw? A sual na ti asile ziangmi tahfung na hmangih a sual na ti? A sual lo na ti ah teh ziangmi tahfung thawn na tah ih a sual lo tin na hmu? Hihi a thupi ngaingai. Thilthupi a si vemi cu Refugee feh a sual maw suallo ti tahnak ‘Tahfung’ ziang ka hmang ding ti hi a si.

 Mit-kharh hring kharhtupa in ziangkim hi a hring in a hmuțheh ih mitkharh sen kharhpa cun ziangkim hi a sen in a hmu ve thluh. Cuvek thotho in mitkharh dum kharhpa khalin thil adum, asen, avar le ziangkim khal a dum in a hmuh țheh ve lala, cucu an kharhmi Mitkharh ih rawng(color) ruangah a si.

Thil ziangkimah kan kharhmi mitkharh, kan hmanmi tahfung a sual le thil ziangkim hi sual țheh in kan hmu. A țhat le țha thluh vekin kan hmu lala. Curuangah ziangkim kan ngaihtuah ding tikah kan ngaihtuah dingmi thil kan ruah hlanah kan Tahfung (criterion) hi ziang a si? Ziangmi Tahfung kan hmang ding ti kan ruat hmaisat tengteng a țul

Atlunih kan relmi thuthawn pehparaw in kan Bible sungih “Refugee” thuhla mallai kan zoh tlang hnik pei uh.

Kan Bible sungah “Refugee” thawn pehparawmi “Refuge” timi tawngkam vawi 90 a tarlang (NIV). A zaten kan tarlang thluh cawk lo dingnan thin diriamnak le a zoh paih hrangah mallai run tarlang sehla. Numbers 35,  Deuteronomy 23:15, 32:37,33:27, Joshua 20-21, Jude 9:15, Ruth 2:12, 2 Samuel 22, 1 Chronicles 6:57,67, Saam cabu sungta pawl, Proverbs 10:29, 14:26,32, 22:3, 27:12, 30:5, Isaiah 4:6, 14:32, 25:4, 27:5, 28:15,17, 30:2, 32:2, 33:16, 57:13, Jeremiah 16:19, 17:17, 21:13 
Joel 3:16, Nahum 1:7, 3:11.

“The Biblical Perspective on Refugees” timi cangantu cun a hnuilamih tarlangmi pawl hi Bible sungih ‘Refugees’ pawl an si” ti’n a tarlang.

Thuthlung Hlun Ih Refugee

(1)             Jacob (Gen 27:41-36:43)

(2)             Joseph (Genesis 37)

(3)             Moses (Exodus 2-4)

(4)             David ( I Samuel 19:18 – 30:31; II Samuel 15) pawl an si ih Beunak Khawpi Pathum (Three cities of Refuge) timi khal a um fawn.

 Thuthlung Thar ih Refugees (Refugees in the New Testament)

            (1) Jesus (Matt. 2:13-23)

            (2) Tirhthlah 8 sungih kawhhran hmaisapawl.

Hi pawlih thuhla hi cipciarin kan sim cawklo nan Raltlan (Refugee) an rak si ti cu tarlangmi Bible buncang pawl zohtikah hmu a theih. Thih le nun thilthu ih harsa mangbang ih rak tlan dah pawl an si. “Refugee” timi hi a sual lo lawlaw, kan Bible thaw khalin a kalh aw lo lawlaw. Thuthlung Hlun san laiah tla cun rinlopi ih mithat le thil ti sual pawl hrang beunak innpi hman tuahsak an si hngehnge. Asile kan Chin refugee teh?

A tam sawn kan Chinmi “refugee” pawl hi Bible ih rak umzotu “Refugee” pawl thawn kan bangawlo. Khatlam zawngih kan sim asile kan nih cu “refugee” nuam pawl kan si ih alem tla kan si men thei (zaten ka ti lo). Theihciazo vekin a lem deuh kan si ruangah thuphan-var per tla țul deuh ngai hmang (zaten a si cuang lo).

Cunah si mi hrekkhatin Refugee hi a țhalo an ti nak. A țha titu le a duhtu pawl cun hihi Pathian in kan țhansohnak ding le kan mibangnak ding hrangih sangka in awnsaknak a si ti’n caanțha ah ruatih feh fawrh aw rero khal bolo. Ziangtiih kan va feh a si hmanah Ramsungih Rawngbawlnak Pathian hna țuan rero lai hrang ahcun feh dingah kei cun ka ruat lemlo. Hnațuan ding umlo ruangih feh cu thukhat.

Rel duh cu kan fehdan thuah alem, mibum, thuphanper asilole a ngaingaiin kan feh a si khalle kan semnak ram te ah kan kir țento peiuh. Cucu Bible sungih “refugee” pawlih tidan tla a si ih zohmawi zettla a si.  Canțha kan neih canih kan umnak, kan suahnak Ramih kirsalduhnak thinlung kan neih lo a si ahcun khai Thuphan-var kan permi kha Thuphan-dum, thuphan tawmtawhlawt a si dingih mai Miphun hrangah rinumlo kan si hleiah kan Chinmi pawlih “refugee” fehdan cu Pathian ih duhlozawng tla a rak si pang thei. Kan fehdan hiti a si betih tlungduh nawnlo pawl cu a miphunpi le Cung Pathianin ziangtin ruat tak kei maw?

“Hrekkhat cun Ram a țhat tikah kan tlung sal ko ding” an ti. Himi zawnah Ramțha timi ah ziangmi tahfung kan hmang ti zoh a țul lala. Ramțha na timi hi inntum pipi le khawmawi taktak, innsaang pipi le țaih-inn mak taktak  pawl Ramțha ih kan tah/ruah a si ahcun Chinram cu kan san sungah Western le Europe ram pawl hnak cun a țha dah lo dingih tlun ti na nei lo ding. Cuvek ruahnak thinlung thawi Ram a țhat hnu lawngah ka tlung ding ti pawl cu ka tlung nawn lo ding ti thawn a bangaw. Asinan canțha a um tikcu teih tlun a bawh khiokhitu, tlun a tum ringringtu cu a Ram le Miphun hrangah ziangtluk lungawiza so a si?

Hmuntinum Chinmi pawl hneih tlinglo tlaklo zetih ka cah duhmi cu kan Biak Pathian hrang le kan Miphun hrangah theitawkin a tak rorin țuansuak uhsi. Israel tla khi leitlunih Ram fate mipum tamlo ansi nan an Biak Pathian hrang le an Miphun hrang ahcun thih an ngam țețe ringring. Cucu a hlawhtlin biknak ti sehla a sual lo ding. Bible sung kan zoh tikah Jacob cu Egypt ramah a thi ko nan a luruh tehman Ram dangih um a duh lo, a pa le a pu ih Ram (Israel) roriih a luruh phum dingin a fa Joseph a cah, a dil ih a ngen kha, a mak hokhaw! Pathianih pekmi an Ram hrangah rinum zetih an um ruangah Pathian cu Israel hrangah rinum zetin a um ve. Cuvek thotho Jeseph khal a rung si. Unau cawn an va tlak ve! Cuvek thinlung nei kan Chinmi ah paziat tak um kei maw ti’n thinlung mithlam in ka hun dap țheu tikah vawitampi cu ka hlawhsam zikzik țheu.

Ziangtlukin Israel pawl cu vakvai khal sehla an Pupa pawl luruh phumnak hi an tanta men dah lo ih Pathian in a tanta ve dah lo. Ka Ram hrangih kan rinumlo asile kan ram hrangah Pathian a rinum ve lo ding. Kan Ram in kilhim sak ve lo dingih kan thlacamnak khal mu le mal a nei lo ding. Ram hrangih rinumsilo Pathian hrangih rinum bawk silo cun thlacamnak hin mu le mal a nei thei lo.

 Israel cu Ram ti ding hman um nawnlo le Miphun ti ding hman um nawn lo khawp ih a siat hnu khalah Israel  Prime Minister hmaisabik David Bengurion te pawlih nun lamtluan kha vun zoh sal hman. Cawn an tlak tuk na ti ve maw? Innțha loțha le mawtaw țhațha, tintling țha zetzet, lukham țha zetzetah an duhnak hmunhmun ih um thei, it thei, tlang thei an si ko nan, cuhnakcun a siatzomi an Ram, Israel Ram din tharsal dingah Ramțhing Ramro Ramcarih sa le ral lakih an um paih kha! Tohkham nuamih tomen hnakcun lusammanglawi Ram le Miphun hrangih ral lakih tlan sukzo a hril sawn kha! Hebrew pa tiih rak kawh, Israel/Judah mi Moses tla kha miphun dang Egypt pawl thawi siangpahrang innih lal berber le nuam takih um hnakin a miphun Israel pawl thawi nelrawn um a hril sawn kha! Ruat sal hman..

Unau kan sulphumnak kan Ram maurat men ding hi cangtheiin na ruat maw? Mai țuanvo lo vekih um ringring hi a rei tuk thlang lo maw? Pathianih pekmi mai sulphumnak Khua le Ram rori ih kan Pupa bang luruh phum ve duhtu ah Pathian in kan thinlungah hnațuan hramseh!