Milai Nundan Cu…

Milai Nundan Cu…

Mexico ramih khawte pakhat cu tipi kapih um a si bangin khawsungmipawl khal nga hawlih pumcawmawmi an si. Cui khawpawlih umdan le tlandan cu khualtlawng milianzet pakhatin a hmuh tikah mak a ti zet, an paih zat tete le an khawp fang tete lawng nga an kai ih tamdeuh ngah bet an tum lemlo danpawl cu a mangbang zetih hitin a sut, “Himi ngapawl ngah dingah ziangtluk nan rei?”

“Rei tuk cu a si lo” ti’n lungrualten an sang.

“Ziangah nga tam deuh ngah dingin a lengah rei deuh nan um lo?”

Ngakaitupawl cun an ngahmi malte hin an innsang hrang le an ṭulsammi hmuahhmuah a daihthluh thupawl an sim fiang.

“Asinan nan cawlh canah ziangtin can nan hmang?”

“Tlai-ah kan it, kan falepawl thawn kan lek, cule kan nufapawl thawn tla kan nuam tlang. Zanlam ahcun rualpi thawn tawngawin khua ah kan feh ih kan ei, kan in tlang, guitar kan tum, hla kan sak. Leitlun nawmnak kan cen ve cu a si ko.”

Milianpa cun, Harvard ah MBA ka nei, ka lo bawm thei ding! Cule nikhat ah rei deuh nga hawl thlang uh. Cutin nga tam deuh nan ngah dingih nan zuar thei ding. Cui nan zuarmi ihsin paisa nan ngah dingih lawng tum deuh nan lei ding.”

“Cui hnuah teh?”

“Cui nan paisa thawn lawng tum deuh pakhat nan lei bet thei ding, lawng tum deuh pakhat nan lei bet dingih a dang a pathumnak khal nan lei lala ding, cule awlten reiloteah nga tampi nan ngah thei ding. Zaran hnen menah siloin mi tampi hnenah nan zuar thei dingih paisa tampi nan ngah ding, cui paisa pawlin sumdawnnak nasaten nan tuah thei ding. Cuisin hi khawte cu nan tlansan thei thlang dingih Mexico khawpi, Los Angeles, asilole New York City ah nan vai ding, nan um ding. Cutawk ihsin sumdawnnak ropi taktak nan tuah thei ding.

“Cumi si thei dingin ziangtluk a rei ding?”

“Kum kul, asilole kum kul hluan-nga hrawng a si ko ding” ti’n milianpa cun a sim.

“Cui hnuah teh?”

“Cui hnuah maw? Ruallepawl, cumihnu cu theihcakumzet a si thlang ual” ti’n milianpa cun a sang. A hni ih hitin a ṭong a peh, “cui hnu ahcun maw nan sumdawnnak a ṭhangcak vivo dingih nan thilzuarnak le leinak ihsin milianmaktara (Millionare) ah nan cang ding.

“Millionare maw? Ngaingai ti aw?” ti’n an sut sal.

“Cuihnu ahcun hahdamten nan cawl dingih, khawte kiangih tipi kapah nan um dingih, duh tiktikah tho, falerual thawn lek, nga paihtawk tete kai phah, nufa thawn nuamtlangin le zanlam ni-nemah rualpi thawn ei le in tlangin nan nuam tlang ding, guitar tumin le hlasak phahin leitlun nawmnakpawl tla cu nan cen ve pei cu.”

“Sayapa, in simmipawl hi kan zanten kan lo lungkimpi thluh, asinan tui in simmipawl cu tui kan umdan ciah hi a si ual. Curuangah ziangahsaw cui kum 25 cu?” ti’n an sut sal.

Cui milianpa cu sim ding thei nawn lo in a um.

Thuanthu Ihsin Zir Dingmi: Nunnakah si kan duhmi, thlen kan duhnak hmunah … kan rak um ziar hi a si.

Source: Knowledge Publisher