Diamonds Hawlin

Diamonds Hawlin

Vawikhat cu Africa ram sungah mi lungawi, hna-ngam theizetmi lothlo pa-pakhat a rak um. A hnga a ngam thei tuk ruangah a lung a awi ih a lung a awi thei tuk ruangah a hnga a ngam thei zet. Nikhat cu mifim pa a hnenah a ra ih Diamonds ih sunlawinak, man a neih zia, a thiltitheinakpawl le a hnen ih a thlen thei zia thupawl a ra sim. Mifim pa cun, “na kut zungpi tiat diamond na neih asile nangmah ten khawpi pakhat na lei thei dingih na nei thei ding”.

Hmaisa ka lo simmi tiat diamond na neih thei asile khawpi pakhat cu na nei thei hrimhrim ding.”  Cutiih a sim hnuah a feh san. Cui zan cu lothlopa cu a it that thei lo. A lung a awi thei lo ih a hna khal a ngam thei lo. A hna a ngam thei lo ruangah a lung a awi thei lo ih a lung a awi thei lo ruangah a hna khal a ngam thei lo.

Zing khat cu a lo zaten a zuar thluh ih a nufa kilkhawi phah in diamonds hawlin a pawk. Africa pumpi deuh thaw a zoh nan zianghman hmuhsuakmi a nei lo. Europe ram zate deuh thaw a hawl nan zianghman a hmu cuang lo. Spain ram a thlen tikah a thinlung, taksa le sumpai a cem thluh thlang. Thinlung, ruahnak mumal khal a nei thei nawn lo ih Barcelona tiva ah a mah le mah a vung that aw.

Lo leitu cu lo ihsin inn a tlun lamah a ranrualpawl thawn tiva cu an vun tan. Ranrualpawl ke ih palmi lung le tidai ṭekpawl cu ni in a run kapih ti lengah vangro vekin mawi zetin a tleu surso. Thilṭha a si ding a tiih cui lung cu a lakih khan sungah ṭhaten a ret.

Zanlam a kim tikah mifim pa cu a hnenah a ra ih lungto tleuzet cu a hmu. “Hafiz a ra kir zo maw?” ti’n a sut. Lo thar neitu cun, “Ai, kir lo, ziangah in sut?” Mifim pa cun, “Diamond ruangah a si. Pakhat ka hmuh cun ka theithiam cih.” Lo neitu cun, “Ai, a si lo, hicu lungto menmen a si. Ka ra tlun phah ah tiva ah ka hmu ih ka lak menmenmi a si.” Asilole ra aw, ka lo hmuh ding. A dang tampi a um lai. An va feh ih a dang lungto memmempawl cu an lakih ṭhaten an zoh, an cek. A fiang tawk thlang lo sawm, lungto hmuahhmuah hi diamonds an si. Cuitin cui lo cu diamond thawn a khatmi lorampi a rak si ti cu a hmu fiang.

Thuanthu Ihsin Ziangmi Kan Zir Ding? Thil paruk a um:

1.     Kan lungput le ruahdan a dik canah, diamonds thawn a khatmi loram ih tlangleng   kan si ti kan theifiang. Caan ṭha timi cu kan ke hnuiah a um. Hmundang feh rero a ṭul lo. Kan zatei kan tuah ṭulmi cu theihthiam ding hi a si.

2.     Hmun dangih hrampi cu a hring cuang a bang ringring.

     3.     Hrampi cu khatlam ihsin sii kan hnih rero lai ah kanmah lam ihsin sii rak hnih         rerotu an um. An nih cun kan mah thawi thlengawk ding cu an hngakhlap tuk.

    4.     Minungpawlin caan ṭha timi kaih-ngah daan an theihlo laiah, mawhthluknak cun sangka a king.

     5.     Cui a bangawimi caan ṭha timi cun sangka vawi hnih a king dah lo. A lehhnu cu a ṭha sawn maw a se sawn tla a si thei, asinan hmaisa ta vekciah cu a bang nawn lo.

     6.     Nawmnak, lungawinak le hnangamnak hi Sui, Diamond le lungmangkhung thawn thleng hlah!

     Source: Knowledge Publisher