Malaysia, Times Square ah Ni 4 (Waiter’s Dairy)

Malaysia, Times Square ah Ni 4 (Waiter’s Dairy)

Ting HLei Thang

Thuhmaihruai

Malaysia ih um kan Chin mipawlih dinhmun hi Ramsungum nulepa le mi tampi in kan theihthiampi lo ih ka hmuhbanpi lo ṭheu. Kei mah lala khal Malaysia hi vawi 5 lai ka tlawng zo ih rualpi hnenah Malaysia cu a nuam tuk si ka ti ringring. Asinan “nan nih vek reilote ra tlawngih tlungsal tivek hrang ahcun nuam tuk kei cu” in ti ve sal. Cumiruangah an umdan, an sidan vek ciahih umsanduhnak thinlung ka nei. Ziangahtile ziangtin an umih ziangvek hna an ṭuan tileh an dam le dam lo hman theifiang mumal loin, inn lam ihsin paisa…paisa.. paisa, mai fanu/fapa duate hman na dam maw ti suh hlanih paisa in kuat thei kem? ti ta rori kan suhnakpawlin an thinlung tampi kan siatsuah ko ding tiih ka ruah ruangah a si. Cucu mitampi ih hmuhtawnmi le relmi ka theih ruangih hica ka ngannak khal a si.

Curuangah vawikhat cu Malaysia ṭumruk ka tlawnnakah ka sinak, ka theihsunmi le ka thiam sunmi tete tla tan thluh in Cabuai Hnul Hnaṭuan ka ṭuan.  Rawldawrih cabuai hnul hnaṭuan hi Malaysia ih hnaṭuan har tuk le awl tuk a si lo. Kan Chinmi Malaysia thleng pek pawlih ṭuan tlangpimi siin ka thei. Ka ṭuan sungih ka hmuhtawnmipawl kimcang ten ka nganih a cemtiang siar awla Malaysia ih kan laimi dinhmun awmangtawk a lo theihter ding. Kei tla cu ṭawng thiamcia le upat lungfim deuh hnuah ka feh ih a zia tuk, ziang ṭawng hman thiam lo le nauhak deuh ih rapawl hrangah ziangtluk a har sinsin ding tikhal ruat tel aw.

Hnaṭuan hrang Interview (October 25, 2014)

October 25, 2014 zan lamah ‘Times Square’ innpi cu rualpi pahnih thawn hnaṭuan hawl dingin kan lut. Hnaṭuan cu hlankhan ih kan rak ngaihven cia lo betah reilote lawng ṭuan ding ka si ruangah hnaṭuan ṭha deuh le lakkha tam deuh ngah a har, a umum ṭuan a ṭul. Hnaṭuan hawl tifam cu ‘Times Square’ innpi ih hnuaitabik sawng ihsin kan feh thawkih Korea rawldawr “Sopoong” timi kan hmu cih. “Sopoong” ticu “Picnic” tinak a siih cui dawr cu 2011 ah Malaysia ih an rak din thawkmi dawr a si. Cui dawrah cun ‘waiter vacancy’ timi catar kan hmuh ruangah nan dawrah hnaṭuantu nan ṭul maw tin kan sut. An duh thu in rak simih interview dingin in ko cih. An boss pa in na ID in pe aw in tiih ka Passport ka pe. Ka Passport a zoh tikah Malaysia vawi tam nawn ka ra tlawn zonak, Singapore le Korea le ramdang tete ka fehnak pawl a hmu tikah tlunlam a zoh ih mallai thu a ruat. Himi rampawlah ziang na rak tuah ti tla i sut. Ka tlawng men ‘just visit’ tin ka let.

A thuruah a ṭheh hnuin mirang ṭawng na thiam maw”? tin i sut. A ngah ko ka ti, asile “Tui hlanah ziangmi dawrah na rak ṭuan dah”? tin mirang in i sut. Amah hman mirang a rak thiam lo tin lehhnuah rualpi in insim sal. A mirang cu theih a har tuk lawmam. Philippines ah Korea Pastor pawl thawn kum 3 rori Kawhhran ah hna kan ṭuan tlang nan hitawk Korea dawr ih boss pai mirang cu ka thei thiam thei hrimhrim lo. Vawi thum rori ‘ziang e’ tin ka sut. A vawithum nakah ka thei fiang ih…aw…ka rak ṭuan dah lo, experience ka neih lo thu ka sim. Cutawkih hnaṭuan hotu cu kanmah Falammi a si ruangah a mah thawn bia-aw dingin in fial. Kan bia aw ih “Experience na neih lo ruangah Malaysia paisa 900 ih na thawh a ṭul ding” i tiih ‘ee’ ka ti. Hnaṭuan tikcu cu zinglam 10:00am ihsin zanlam 10:00pm tiang (nahzi 12 sung) a si thu i sim hnuah thaisun tipsun ih ṭuan thawk dingin kan simaw. Cui hnuah inn ka tlung.

Ni Khatnak (Day 1)/ October 27, 2014

Hnaṭuan vawikhatnak ding ti fam cu zinglam 8:00am ihsin ka it thei nawn lo. Inn ihsin hnaṭuannak cu town-bus thawn nahzi khuai sung hrawng feh a si ruangah 9:30am in ka pawk. 9:50am ah kan dawr ka thlengih zohman an rak thleng hrih lo. Minutes 10 hrawng ka hngah hnuah an ra thleng. Ziang hna ka ṭuan ve ding tin ka sutih zial le cabuaipawl hnawt aw in ti. “Aw” ka tiih ka tuah thluh. Thil ṭul tete kan tuah thluh ih ‘Customer’ pawl an thlen hlanah midang cu hnaṭuannak kawr hring (uniform) an hruh thluh. Kan boss pa in puansia vek deuh ti-hnumhni pakhat a pekin pe lawn a seh in i rak seh tupti ih ka rak kaih cukci. Cule hihi ka sawp ding maw tin ka sut ih zohniamnak mithmai thawi i hnihsan hnuah ‘hruh aw’ i ti. Ka thinlungin e-le-heu himi boruak cu awl ual lo ka ti. Asinan a leng cun ‘Ee-law/yes’ ka tiih ka hruh. Kei ih hruhmi cu kawr dum a siih midang le kawr hring an hruh thluh tikah ka um a nuam tuk lo. Thleng thar zianghman thei lo in tiih in hmuhsuam deuh ruangah si pei maw aw titla ka ruat rero. Asinan kawr hring dang an nei bet nawn lo a si ding ka zum sawn.

Zing 11:30am hrawngah rawl ei ngah zo in tiih rawlsuannak sung lamah rawl la in ka feh. Buh le hmeh cu kan mahten kan la ih a remcan naknakih mahte to, rawl ṭhuat si ko. Ralkap ka lut dah lo nan ralkap rawl-ei an rel vek deuh khin ka thei. Rawl dawr tifam cu rawl cu thaw ka ti zet nan ka thar deuh lai ruangah ka la bet lem lo.

Cumi sun ah cabuai hnawtu (waiter) pali kan um. Falammi pahnih le Matupi mi pahnih kan si. A sungih rawlsuangtu cu mi 6 an si. Kawl pakhat tilo cu laimi an si ṭheh hmang. Nahzi 10 in kan ṭuan thawkih zanlam 2:00pm a kimah ka ke a zawng tuk zo ih to le a theih silo har hi ka ti tuk. Ka tuar cuahco ih ka zoh tambikmi cu nahzi a si. Ka ke zawng tuarlo ah nahzi cu ka vun zoh leuhleuh ih 2:05pm lawng a rak si lai. Ka ke zawng ka thihzik hnu ah nahzi paziat ka ding lai ding na zum? Nahzi 8 sung din a ṭul lai ti ka thei hicu umngaihnak ka thei lo ticu a nep tuk. Vun tahṭhim ding khal ka thei lo. Himi canah minutes pakhat cu kum khat tlukin ka thei. Hivekin reipi ka rak din dah lo ruangah tla a si ding ka ke zawng tuk ruangah ka feh le kekar khal a hman thei nawn lo.

Kan hotupa in Falam ṭawngin “Nang na ke a rak ṭha lo cia rengreng maw si” tin i sut. Ding zet le zawnte ih ka feh thei nawn lo ruangah fam teh! Cule ka mithmai pan ka suah ṭenṭo ih a ṭha ko, ka ke a ṭha ko, nan malte a zawng deuh ihsi ka ti. A ngaingai te cun malte zawng men a si lo, ka thi lo ih cufang ti theih a si, ka ke pawl an ṭhia zik, ka buut hruhnak ka ke zungpawl an na tuk zo.

Zanlam 4:00pm hrawngah kan hotupa in nahzi-khuai (half-hour) cawlhnak caan in pe. Kei hi sun ih itthat dahmi ka si lo, ihkhal ka it thei lo. Asinan cui sun cu cawlh caan in pe ih ka to veten ka dungih phar hngohsanin ka itthat cih. Cutluk ka bangih ih ka duh cingin tikcu kim hlanah ka ṭhang vukvi. Ziangah? Na theithiam ko ding. Waiter timi cu a awl lo pi, a hleicein Korea boss hnenah.

Cutin a ni khatnak cu ‘order’ cah le ka thiam hrih lo tikah an tuahdan zoh le an dawr cabu ‘menu’ zoh/zir ti hrawngin caan a liam.

Hnaṭuan ka tlun ahcun khap-khat hnakih sau in ke ka kar thei lo. Ding zetin ka feh thei fawn lo. Cang-ai vekin peng tluitlawn ka feh famteh. Sihte palthat in bus umnak tiang ka feh ṭenṭo ih inn ka tlung. A ngaingai te cun Times Square inpi ihsin bus-station hi mizaran hrangah minutes 5 hrawng feh a si. Himi zanah kei cu Times Square le bus-stop lakah minutes 25 ka rei. Inn ka thlen ih ka bual-awk thluh veten minutes pakhat te hman ka ding thei nawn lo, ihkhun parah ka tlu hngal. Ka ke a na tuk ti ka thei ih nat-sawk ka ei lole ka it thei lo ding ti ka thei cih. Ka hun dap ih ka ei hnuah, hiti ngai cun thaisun ka ṭuan thei kei maw ka ti aw ih ka itthat cih.

Ni hnihnak (Day 2)/ October 28, 2014

Ni hnihnak zing ka tho cu ka ke-napawl tla an rak zia deuh ih ka bualawk thluh veten a tikcu kim ciah 10:00am ah dawr ka thleng. Fork, spoon le tissue retnak bawmte kha cabuai parih ret ding pakhat te ka hngilh ih kan boss pa nih dingin i zoh ih i met riairiai hngal. Sorry ka tiih ka va ret lohli.

Rawl-ei tikcu a kim tikah kan tidan kel ten kan tuah. Rawlsuannakih kan mah Falammi pakhat in ka hnenah ra ei aw, tihang tla ka nei, i tiih aw ka tiih a hnenah rawl ka ei. Tihang duh zet ka sinan tihang hnakin kan Falammi thawi khatiih rawl ii tlang kha ka duh sawn. Rawl-ei phah ah thupawl kan ruahaw rero ih nuam ka ti zet.

Tui sun cu nahzi 2 ah ka ke a zawng lo nan zanlam 4 hrawngin ka ke a zawng ṭan ih malte cu ka ṭhangso tin ka ruat aw. Asinan ka ke a zawn hnu nahzi 1 hrawng rei cun ka thi zik. Hlan hnakih a luarin ka thei aw. Ka ke hi a rawp thluh thlangin ka thei. Boss pawl vun zoh le mi an rak met riairiai. Boss pawl umlo caan khalah rualpi zohhman an to lo tikah to ngam ding a si cuang lo. Tlailam deuh a kimtikah kan hotupa in i ko ih na cangvaihdan a fung tuk, na hni dah fawnlo tikah kan ‘boss’ te nih in simfial sokhaw, thaisun cu ṭhaten kan zoh dingih hivek asile cu a ngah lo ding an lo ti tin i ra sim. Ka thinlung ten hivek hnaṭuan in zo ha hni thei ke ka ti aw rero. Asinan waiter kan si vekin ziangtlukin kan bang kan cau ih kan ke a zawng hmanah customer an rat cun paih khalle, paih lo khalle hnisiamsi tei rak welcome cu a si ko. Cubetah mi thar deuh ka si ruangah hnaṭuan ding a um tinten a rak umciapawlin in fial duh ce! Cumi khami tuah a ṭul, rak tuah aw inti. An mai tuah theimi khal cumi vun tuah hnik in ti ṭhekṭho. Boss pawl umcanah boss thu ngai a ṭulih an umlo canah hnaṭuantu senior deuhpawlih thu ngai a ṭul lala.

Himi sun cu Hakha nute tla a ra telih a mahthawn cawlhcan in pe tlang. A nih cu hmailam ah kun in a itthat ih kei cu dunglamah zau in ka itthat. Ziangtlukin kan hrangah nahzi hrek a sunglawi timi ka fiang tuk, cui hnuah nahzi hrek cu minute 1 tlukfang tawi in ka thei lala. Nahzi khuai a kim hnuah kan hnaṭuan kel cu kan peh.

Zanlam tlun tim kan tuah rero thlangih kan cabuai le thil dang tete tla kan luh thawk rero. Kan boss pa in hmaiih tarmi sign-board luh i fialih mirang a thiam lo tikah korea ṭawngin i fial. Ka theifiang lemlo tikah a dang pakhat sawn kha ka luh zikih himi a si maw ka ti. Cucu kan hnaṭuanpi Matupi mi pahnih nauhakte cun in rak hmu ngelcel ih ‘a thei lo, a thei lo’ ti siawmtakin in hnihsan kerko ih kan boss pa thawn an pathumin in hnih san. Ka ruat….aw  a hibang nauhakte men hmanin in hnihsan ual, hivek fualfo cu a va har ve! Asinan ka hrilmi lamzin a si fawn. Kan tlun a cu thlangih kan counter hmai ka feh zawng ciah ah boss pa in i ko ih, tuisun na umdan vek a ngah lo, waiter na si na thei lo maw? Tivukvo in cangvai aw khavek a ngah lo, cun hni ringring aw, me remrem aw hlah tin i kawk hnuah ka tlung.

Lamzin tluanah Cabuai hnawttu hmanah in duh vak lo si khawh…nem-mam… ka ṭuan nawn lo ding tin ka ruat. Ka ke zawngin le i hun tur auhauh. Inn ka thlenah ka Uu lei hnenah hitin ka sim. Ka rak thau deuh thawn, mi vekin ka cangvai lohli thei fawn lo, ka ke le a na tukih in duh tuk lo, ka ṭuan nawn lo ding tin ka sim. A thawk ihsin ṭuan duh awhlah, na ṭuan thei lo ding kan lo tisi, tucu na ṭuan laklawh ih na cawlh cun lakkha na ngah lo ding a lak thluh ah an cang ding si khatluk harih na ṭuanzomi tla cu in ti. Siko ka rak tum laklawh si ziangvek khal thla khat te cu ka ṭuan sal ko ding ka ti.

Tuizan cu nihnihnak a si thlangih ka ke a na zet nan sii cu ka ei lo ding ka ti. 

Ziangahtile zantin si ii a ṭul ringring ka phang. Asinan sii ka ii hlan sung hmuahhmuah cu ka ke a zawng tukih ka itthat thei lo lawlaw. Zing thawh a ṭul thotho tikah ihthah thei lo cun zing thawh thei lo ka phangih sii cu ka hung ei lala ih cutin sii in i sawk deuh hnuin ka itthat sal.

Ni Thumnak (Day 3)/ October 29, 2014

Zing ka thawh a har tuk sal, ka taksa a ṭhawp, ka bangih ka cau zet tikah tho lohli thei lo in reipi ka nuaraw ta. Tikcu a liam ngaingai hlanah tin paihlo zet cingin ka va khawlh-aw. Tikcu khelin dawr cu ka thleng. Ka thlen veten kan hotupa in “khah! tuisun cu kan boss pawl nih an lo zoh ding ṭhaten aw” in ti. Keimah khal nasa deuh ih cangvaih le ṭuan cu ka tum cia. Ni thumnak tla a si thlangih order lak tla ka thiam phah thlang. Himi ni ih hmaisabik Customer rungmi cu keimah in order ka lakih kan boss pa ka va pek. Cule a mirang thiam sun suah in “you are very good” i ti. Ok ka ti ve fam teh!

Rualpi dang an umlo ih table 10 ih customer pawlin bill kan pe duh tin in rak ko ih kan pi hnenah table 9 in bill an pe duh tin table numbat ka va sim sual pang. Cule kan pi in i zoh ih, rei nawn i zoh hnuah “table 9 ma-sih-bu” tin kawl ṭawngin i ti. Eheu! Ziangtin kawl a thiam thei? Kawlrammi hnaṭuantu a rak nei tam zet zo a si hi maw ka ti. Cui hnuah ai, cu maimai, kei teh, “Khamsamita” ti ka thiam ve si ka ti aw sal. Hehe J

Sun rawl khawhhnu kan boss pawl umlo laiah order ka la rero ih vawikhat cu ka ti sual pang. Kan hotupa in i ko ih Falam ṭawngin nasa nawnin i kawk. Cule aw, ka ti suang pang sorry si ka ti. Cule malte a rei hnuah tunaite kha ziangmibik ah si ka ti sual, ka thei lo ih sokhaw tin ka va sut sal. Asinan a nih cun ziangsi thei lo ding um, na ngansual famteh tin awring takin i rak auh ciamco. Cule aw, lehhnu sualbet ka phan ruangah ka sualnak theifiang dingin ka ra lo sutmi sokhaw tin ka awnem neihsun le ka thinsau pittawp suanin ka bia  sal.

Cui sun cu kan tluang lo, tawkfang a rei deuh ah kan naupa Malaysia ih kumrei hna rak ṭuan zotu in kan pi ih um lai ah order a cah sualih nasaten an kawk. Cui hnu cu Customer an rung luh le ka ngam nawnlo nan mah order lak uh inti. Asinan mi an tam deuh caan ahcun order a lak a ṭul thotho ih ka zangfak zet. Malte a rei hnuah kan hotupa le waiter lakih a senior bik pakhat an ti thiam aw lo lala. Ramdangmi boss pawl ti lungawinak le an mithmai ngah duh le kilnak men ruangih kan mah le mah kan kawk-aw le hro aw rero dinhmun, kan dinhmun hi cu ka tuar har bikmi lakih pakhat a si ve. Ziangtluk zangfakza Chinmi so kan si. Tawkfang a rei hnuah kan dawr kiangah rukru si awmtak an kai ih kan va zoh.

Dawr sung kan lut salih rawl suancianmipawl cu customer pawlih cabuai parah kan ret rero. Vawikhat cu ret nak ding table ka thei lo ih ziangmi table ah ka ret ding tin ka vun sut ih kitchen ih senior rawlsuang kawlpa in A-11 ah tin ring ngaingai in um-hmunah i auh. Aa-khei!! Cui kawlpa cu tin ka thin a hung so ciamco nan waiter dinhmun hmanah mithar ka si ruangah ka thin cu ka nam dai sal.

Tlun tim kan tuah rero thlangih kan hotupa in thil tuahdan tete zirin, va zoh aw in tiih thilri an ret danpawl ka zoh. Kan boss pa a ra ih “ziahha na din hrianhrian men, ra…hilamah tuah ding a tampi ra tuah” i ti. Kan hotupa in an tuahdan zoh awla ziraw in ti ruangah si tin mirang in ka sim nan mirang a theih lo ruangah thinheng in i met riairiai ih mi-aa men bang a kut i zap hnuah hnaṭuan ding a kut in i khih zohzo.

Hi sunih ka ke-na le ka ke zawng cu a naa, a zawng timen a si nawn lo. Ka ke zungte pawl an puar, ka buut hruh rei tuk nak thawhlum le uap-aw ruangah ka ke tlunlampawl tla an sen ih hrekkhat cu an hawk, ka ke zungpi tinlutnakpawl tla an thi, an sen ih an dup ṭeiṭei thluh. Cumi thawi sunvu hna ka rak ṭuan tikah ka ke naa le zawng ka ṭannak ah hitluk sun thawhlumah ka hmur hmuah a khing thluh. Zinglam 10am ihsin zanlam 10pm tiang a si tikah a awl ve lo. Nahzi hlei-hnih sung tinak a si cu.

Tlung dingin ka pawkih counter hmai ka thlen ciah ah kan pi in “you are ok today yaa” in ti. Of course, I tried my best ka tiih an nupa in an hni ziamziamih ka tlun san.

Cui sun cu ka ke a naa tuk ding ti ka thei ruangah kedam ka rak keng cia. Ka tlungih Times Square leng ka thlen veten ka ke a nat tuk ruangah buut ka hlit ih ka phanat kenmi cu ka hruh tum. Ka kepawl cu an rak pem, an rak dup tikah kedam ka hruh le a thip tuk lawmam ih ka hruh thei cuang lo. Buut ka hruh salih bus umnak lam pan in ka pawk. A hnukin ka hnukaw ti sehla a sual lo ding. Cuizan cu Times Square le Bus-station ah nahzi khuai ka rei. Kherkherah bus man le paisa-nawi nei lawn 20 ca lawng ka rak neih tikah bus sungah an la duh lohli lo ih mallai kan buai, Falam nute nih fangkhat i pek sak. Bus sungah U Bawite thawi kan tawnawksal ruangah fangkhat cu a ṭul lo a ti nan ka rul sal. Inn kan thlenih ka ke-na-pawl ka Uu ih a hmuh tikah thaisun cu ṭuan nawn hlah i ti. Asinan kei cun ṭuan ka tum thotho. Cui zan cu ka bang luar tuk ruangah sii ei loin ka khawlh-awk thluh veten ka itthat cih.

Ni Linak (Day 4)/ October 30, 2014

Zanlamih ka rak bang tuk le ka kepawl a rak nat tu ruangah zing thawh a har hleice! Har ti tuk ṭunṭo cing le paihlo zet cingin ka rak tuahtumi asi si tin ka tho ṭenṭo. Himi zing cu ka kepawl an nat tuk ruangah buut ka hruh thei nawn lo. Dawrah phanat hruh le an siang fawn si lo. Cunah tingaihnak theiloin a hmailam buut vek a dunglam phanatpawl khi lamzin ah Ranggit 18 in kan hi lei phah. Buut ngaingai a si lo tikah himi in sian lo a si ahcun ka ṭuan thei nawn lo ding tin ka thinlungin a ruat cia.

Cu taktak, dawr ka thlen veten kan boss pai hnenah ka ke a nat zia le a thling, a pem le a durhpawl ka hmuh ih hiti ka si ruangah himivek buut phanat hi hruh in siang hram aw, cu lole ka ṭuan thei lo ding ka ti. An nupa in a ngah lo thu in sim ciamco ih cabuai hnawt (waiter) nih buut lo a ngah lo na thei lo maw in ti thul. Cutikah aw, a singai, himi in sian lo cun hnah ka ṭuan thei nawn lo ding ka ti ve. Kan hotupa in “aw ti men aw, an um lole khami na hruh thotho dingih an lo kawk asile keimah ka lo simsak ding” in ti ruangah ‘aw’ ka ti men.

Cumi hnu nahzi pakhat rei hrawngah phone a ra ih, “hnaṭuan dang a um, lakkha tla a tam deuh, nuam tla a nuam deuh ding thu ‘thuthang ṭha’ kan ti pei cu ka dawng. Cumi ruangah cumi na paih asile tui na hnaṭuan khan na cawl thei in ti ruangah ‘ee’ ka tiih ka cawl. Kan boss pa hnenah ka cawlh ding thu ka simih a cal a dawm nguaingo. Cui sun cu Times Square ihsin kan umnak Sungai Besi tiang KL khawsung theihnak ah tiiah bus to duh lo in ke in ka tlung. Tawkfang ka feh ih zinpi pali umnakah pial a cu maw culo tiih lamzin ka zoh rero lai ah U Cer a ra ih ka suh tikah na hmaizawn zinpi hi zawh vivo aw la nan inn zin si in ti. Ka zawh vivo ih LCF biakinn hmai ka thleng dukdi ih ka lung a fim. Cutin inn ka thleng. Minutes 30+ hrawng ka rei.

Ka feh phah ah thu ka ruat. Hi ti rori hin maw hna an rak ṭuan ringring. US lam ah teh ziangvek dinhmunin ziangvek hna tak ha an va ṭuan ke????

Part II….cuan….