Romeo le Juliet

Romeo le Juliet

Thuanthu: Willian Shakespeare

Lettu        : Ting HLei Thang

Thuanthu sung umpawl

Montague Tei’ Sung

Lord Montague (Pa bik)

Lady Montague (Nu bik)

Romeo, Montague tei’ fapa

Benvolio, Romeo ih sungkhat unau (cousin)

Capulet Tei’ Sung

Lord Capulet (Pa bik)

Lady Capulet (Nu bik)

Juliet, Capulet tei’ fanu

Tybalt, Juliet ih sungkhat unau (cousin)

Adangpawl

Escalus, Verona Lal

Paris, Lal ih rualpa

Mercutio, Romeo ih rual

Juliet tuamhlawmtu (Nurse)

Father Lawrence, Puithiam

Father John, Father Lawrence ih rual

Verona le Mantua minungpawl

Lord Montague ih hnenum

Lord Capulet ih hnenum

Dawrthil Zuartu

Music tumtu

Thuhmaihruai

Romeo le Juliet thuanthu cu innsang pahnih, Montagues le Capulets tei’ innsang hnih thuhla a si. Hi thuanthu cu Italy saklam ram, Verona ah a liamcia kum za-nga lai ih a rak cangmi a si. Hi innsang hnih cu a liamcia kum reipi ihsin remaw thei lo ih rak buai rerotu an si.

Romeo le Juliet

Bung 1

Verona ih Thubuai

Italay ih Verona lamzin parah Lord Montague le Lord Capulet tei’ siahhlawhpawl cu sual-aw in an aukio ciamco.

LORD CAPULET IH SIAHHLAWHPAWL – Montagues cu kan hua tuk! Capulet cu       Montague hnak cun a let thawnghra in a ṭha,     kan duh sawn.

LORD MONTAGUE SIAHHLAWHPAWL – Curuangah si lo thah kan cak tuk! Capulets   khal thi seh! (Benvolio a ra thleng)

BENVOLIO -  Ziang nan cang? Cawl uh! Cawl uh, Buai nawn hlah uh!           

Benvolio cun theitawkin a kham rero hai nan a kham thei lo ih an sual-aw rero thotho.

TYBALT (a ra thleng ve) – Benvolio! Ziang na tuah ve? Kan hnenumpawl na sual          maw? Ra aw, kei mah thawn kan sual aw ding!

BENVOLIO – Silo, Tybalt, in theih sual. Kei cu zothawn hman sual-awk ka paih lo. Kei cu remdaihnak ka tuah reromi si ual!

TYBALT – Thuphan! Nan nih Montagues hi cu nan sungin nan bangaw thluh. Ka lo that thluh hai ding. (A namsau cu la tahratin Benovolio cu a zawn ciamco. Lord le Lady Capulet an ra thleng.)

LORD CAPULE – Zoh! Montagues tei’ sungin Tybalt thah an tum khi! Ka naam kha                                   zamrangin!

LADY CAPULET – Naam e? Tluaih-tlo, Capulet, aa hlah. Na tar tuk zo si! Naam na hmanlonak kum kul a rei zo.

LORD MONTAGUE (a ra thleng ih Lady Montague hnenah) – Zoh! Capulet tei’ sungin buainak an tuah lala khi!

LORD CAPULET – Ziangtin e na ṭawng, Montague? Buainak an tuah lala e? Buainak tuahtu le thawktu hi na tupa Benvolio so khaw a si!

LORD MONTAGUE – Kei ka feh ding, Capulet, putar sual!

LORD CAPULET – Misual ee? Putar ee? Ka lo that lak ding! (An sual aw thawk thlang. Lal Escalus a thleng.)

LAL ESCALUS – Cawl uh! Montague! Capulet! Tu rori ah cawl uh! Tybalt! Benvolio! Tu rori ah nan cawl ding maw nan zaten ka lo hrem ding! (An zaten sual-aw nawn loin an umih an dai ṭhepṭhep.) Ngai uh. Ka thin in ti heng tuk hokhaw. Verona hi khawpi lian le khawpi mawi tuk a si. Asinan nitin deuh thaw in lamzinkap ah sualawknak a um ringring. Montague, Capulet, ra hnik uh. Buainak tawp dingin nan sungkua veve simuh. Nan thei maw?

LORD MONTAGUE LE LORD CAPULET – Awleh.

LAL ESCALUS – Ziangah nan sungkaw hnih lakah buainak a suak ringring? Ziangtin a thawk?

LORD MONTAGUE – Ka thei ciah nawn lo, Lal.

LORD CAPULET – Buainak cu hlanpi ihsin a rak thawk zomi si, Lal.

LAL ESCALUS – Buainak hi a tawp a ṭul. Verona ah daihnak a um a ṭul.

(An zaten inn ah an tin thluh)                

     

LORD MONTAGUE – Benvolio, Lal ih simmi kha a dik hokhaw.

BENVOLIO – Si e, kei tla an sual-awk ka kham rero si, culaiah Tybalt le midangpawl an ra thleng ihsi.

LADY MONTAGUE – Kan fapa Romeo nan hmu maw? A nih buainakah a tel dah lo. Cumi cu ka lungawinak pakhat a si.  

  

BENVOLIO – Zingpitte ah kha cun Romeo ka hmu. Zinglam nahzi pali hrawngah asi ih a thim deuh lai. Cumiah a mah te’n lam a leng rero.

LORD MONTAGUE – Romeo hi ziang a cang si pei? Tuini cu a dai tuk. Ni dang ahcun a khan sungah sunvu a um ṭheu. Lungawilonak pakhat-khat a nei si ding. Benvolio, vung cukha hnik aw. (Romeo a ra thleng)

BENVOLIO  Zoh – a ra thleng zo. Ka va be ding. (Lord le Lady Montague an suak.) Romeo, ziang na cang?

ROMEO –  Benvolio, kei cu duhnak sungah ka pil zo. Fala mawi Rosaline timi ka hmu ngah, ka duh tuk zo.

BENVOLIO – Asile ziangahsaw na riahsiat?

ROMEO – Asan cu in duh ve lo. A nih cun zohman a duh lo. Ziangtik hmanah pasal ka nei lo ding a ti.

BENVOLIO – Verona ah fala mawi tawr le seng an um. A lo duh lo asile hngilh men aw.

ROMEO – Ka ti thei lo. Rosaline cu leitlunah a mawi bikmi nunau a si. Midang zohman ka duh thei lo.

Bung 2

Lunglutza Thuthang

Verona lamzinpar ah, Lord Capulet le Paris an bia aw.

PARIS – Lord Capulet, sim ding pakhat ka lo nei. Na fanu Juliet ka duh zet ti cu na thei zo ko ding. A ṭha, neih ka duh tuk ihsi.

LORD CAPULET – Ka fanu cu a nauhak tuk lai ual, Paris. Kum 13 te lawng a si lai. Pasal neih ka siang hrih lo. Kum khat lole kum hnih hrawng cu na hngah a ṭul ding. Juliet in le a lo thei hrih si lo.

PARIS – Asinan ka duh tuk si. Na fanu in i neih asile, a nuam aw tengteng ding.

LORD CAPULET – Paris, zanlam party ka nei i. Cutawkah Juliet tla a um ding, cun fala mawi tampi tla an um ding. Ra awla ra nuam ve aw. Cumi ah Juliet tla na be thei dingih a lo duh tla a si thei, duh lo tla a si thei. Asinan a nauhak tuk ti cu hngilh hlah. (Hnenum pakhat a ra thleng ih Capulet cun ca fate a raK pek.) An hminpawl cu hnuai ah a um. Feh awla ka party hrang mi tampi in sim sak aw. An zatei an rat thei ka beisei.                                                                                        

Lord Capulet le Paris cu an feh.

HNENUM – Asinan ka siar thei lo pi! Ziangtin ka tuah ding? Ka thei! Mi pakhat-khat in siar sak aw ka ti ding. Romeo le Benvolio an ra thleng. (Romeo Hnenah)  Sayapa, zangfahten – Himi hminpawl hi in siarsak thei pei maw? Himi hminpawl hi Lord Capulet ih tuizan a party ah ra dingih va sim/sawm thluh an ṭul.               

Cahnah cu Romeo a pek.     

ROMEO – Martino le a nupi le a fanupawl – Valentiona le a sungkhat unaupawl – Tybalt – Lucio – Livia – Rosaline – Rosaline – Rosaline! Benvolio, Capulet ih party ah kan feh a ṭul! Rosaline a um ding!

BENVOLIO – Asinan Romeo, Capulet le na pa cu ral an si ual!

ROMEO – Cucu a thupi lo. Rosaline ka hmuh a ṭul!

Bung 3

Lady Capulet ih Tumtah

Capulet inn ah Lady Capulet, Juliet le Juliet tuamhlawmtu pawl cu thu an rel. Lady Capulet cu tohkham ah a to.

LADY CAPULET – Juliet, kumziat na sita?

NURSE – Kum hlei-li a kim zikte. Asi lo sawm, ka duat?

JULIET – Aw si e. Ka kum hlei-li birthday cu tuihnu zarh hnih ah a si ding.

LADAY CAPULET – Ka duat, pasal neih ding tivek teh na ruat dah maw?

NURSE – Juliet hrang maw? Miih thinlung a tur ter, cak um!

JULIET – Pasal neih ee? Ai, ka ruat dah hrih lo.

LADY CAPULET – A ṭha, tucu na ruah a ṭul thlang. Tleirawl pakhat in a lo nei duh. A hmin cu Paris a si. Minote a siih a lian, mi ṭha tla a si. Verona Lal ih rualpi khal a si fawn. Duh awla cu ka lo duh sak zet.

JULIET – Asinan a theih hman ka thei lo mi cu!

LADY CAPULET – Cucu a pawi lo. Tui zanlam party ah na hmu ding. Na duh ko ding ka zum tuk.

NURSE – Ka duat, na hrang pasal ṭha zet a si ko ding. 

Bung 4

Romeo in Juliet A Hmu

Capulet ih inn ah party cu an thawk. A thlum zetmi awnmawi, hla le lam pawl tla a um. Lord le Lady Capulet, Juliet, Tybalt, Paris, Tuamhlawmtu, hnenumpawl, awnmawi tumtupawl le midang tampi tla an si.

LORD CAPULET – Rualpi zaten, nanmah ten nuamawk uh! Tuizan cu kan zaten kan lam ding. Meisa tleu deuh! Tam deuhin in! Awnmawi tumtu – ring deuh in tum! Mangbanza party nuam kan tuah ding! (Romeo, Benvolio le Mercutio an thleng. An nih cu hmai-khuh an hmang.)

LADY CAPULET – An nihpawl cu zo an si? Hmai-khuh an hruk ruangah zo an si ti ka thei thei ual lo.

LORD CAPULET – Zo an si ti ka thei lo. Thupi lo. In nel zettu an si hmel ko. A dang i run thlet hrih. Ziangtluk pary nuam saw a si! Ziangah ka tleirawl sal thei nawn lo aw? Kan lam pei?

LADY CAPULET – Lam eel? Aa hlah ka lo ti Capulet. Na tar tuk zo! Na lam lonak kum kul a rei zo. Ra aw la ka hnenah ra to aw.                                             

An to.

MERCUTIO – Romeo, laam na paih ve lo maw?

ROMEO – Ai, paih lo. Mercutio na paih le lam awla ka lo hngak ding.         

Benvolio le Mercutio an suakih an lam.

ROMEO – (Paris thawi lam rero Juliet cu a hi hmu). Culawmam ih mimawi cu! Zo si a si? Ka va tawn a ṭul! Laam a ṭheh le ka va tawng dingih ka va bia ding.

TYBALT – Ka pu, Kha pa kha cu Montague a si!

LORD CAPULET – Khuimi bik?

TYBALT – Tunaite ih ra kha. Khi, khitawk ah – hmaikawr hruh pa kha male. A aw ihsin ka thei. A hmin cu Romeo, Montague sung male. Ka va that ding!

LORD CAPULET – Lamlam! Capulets le Montagues cu ral-awk a ngah nawn lo. Verona lal in buai nawn lo dingih in sim kha na thei nawn lo maw si? Cun Romeo cu mi ṭha a si. Curuangah va tuahmawh hlah. Na thei maw?

TYBALT – Si e, ka pu. Asinan ka thin a heng tuk hokhaw. Hitawkih a rat cu a ti sual lawlaw a si aa. (A suak)

ROMEO (Juliet Hnenah) – Na hmin cu ka thei lo nan tu naite ah ka lo hmu i lo biak ka cak tuk. Asinan lo biak ding cu ka thei lo.

JULIET – Zianghman sim ding na nei lo.

ROMEO – Nang tlukih mawi zohman ka hmu hrih lo. Na kut ka lo kai thei pei maw?

JULIET – Asinan zo na si ti ka lo thei lo pi! (A-hni) Um, ngah tuk male, in kai thei tuk.

ROMEO (A kut a kai) – Kan kut a dai aw asile kan hmur tla a dai aw thei ko. (cutin a vun hnam.)                                                                                                           

 A Nurse a ra thleng.

NURSE – Juliet, khuiah na um? Oh, na um ko ti. Na nu in a lo pawi. In thlun aw ka duat.

ROMEO (cu nui hnenah) – A nu cu zo si a si?

NURSE – A nu cu Lord Capulet ih nupi.

ROMEO – Himi cu ṭihnungum a si ual! Lord Capulet cu ka pai ral si. Juliet hi ka duh tuk nan kan tawng aw thei sal nawn lo ding!

JULIET (Romeo ih fehliam cu a zoh) – Nurse, khami pa ih hmin cu zo si? Tunaite ih suakmi pa kha. Nupi nei zo a si ahcun pasal nein awn lo in ka thih tiang ka um ding.

NURSE – A hmin cu Romeo si, cule Montague a si. Na pai ral tumbik pa ih fapa neih sun a si kha!

JULIET – Nangmah lawng ka lo duh, Montague cu ka hua!

NURSE – Ziang si? Juliet, ra aw. Na nu’n in hngak ringring.

Bung 5

Thuthup

Benvolio, Mercutio le Romeo cu Capulets ih inn hmuan leng ah an um. Romeo cu midang hnen ihsin a thup aw.

BENVOLIO – Mercutio, ra aw. A tlai tuk zo. Kan tlung ding. Romeo teh khuiah saw?

MERCUTIO – Tunaite ih ka hmuh si. Romeo! Romeo! Ra aw, Rosaline kha cu hngilh men aw! (A-hni.) Dudawtnak tivek cu hngilh men aw! Ka hnen ah ra aw.

An tlan, cule Romeo cu a ra suak.

ROMEO – Hnihsuak um tak a si – Duhnak timi an thei dah lo lawlaw. Juliet thawi nai-aw ih um a ṭul. Ka duh tuk.                                                                                         Juliet in sangkate a awng ih a vun zoh. Zoh aw! Ziangmi tleu si? Nisuahnak lam ihsin si, Juliet cu ni a si ko! (A-relh)

JULIET – Oh, Romeo! Hmin ti vekmen cu ee? Nang cu Montague nasi, kei cu Capulet. Cucu hmin men a si ko cuteh, zianghman a si lo. Ziangah kan sungpawl an hua aw ih ral ah an cang? Ka lo duh hi a buaithlak sawn.

ROMEO – Na ti dik a si Juliet. (a ra suak.) Zianghman hi a thupi lo. Romeo tin i ko lawn Duhmi tin i ko aw.

JULIET – Romeo, ‘aw’ ka thei! Ziangah hinah na ra? Ka unaupa in a lo hmuh asile a lo that ding.

ROMEO – Duhdawtnak in i rak hruaisuak a si hi. Na pa, Capulet ih naam cu ka ṭih lo. I duh ngaingai asi ahcun ka hrangah ṭihnung timi hi a um lo.

JULIET – Romeo, ka lo duh ticu na thei zo si. Ka lo duh tuk asi hmanah awl zetih ka lo duh ka lo ti lohli ahcu ka tisual men thei si. 

ROMEO – Nunau, Ka lo duh tuk, ka lo duh ringring ding. Ziangtikah kan um tlang thei ding ti in sim aw – kan nunnak ni a cem tiang umtlang thei dingin?                 A tuamhlawmtunu in innsung ihsin a run ko.

JULIET – Oh, Romeo – Ka feh ṭul. Ngai aw. I nei duh ngaingai asile i tuamhlawmtu, ka nurse hnenah thaizing le ca ka run lo kuat ding. Cumiah khuitawk ah kan tawngaw dingih ziangtikah timi rak sim sal aw. Cule ka bawipa, leitlun khuitawk na feh khalle ka lo thlun ding. Mang ṭha, duhmi.

ROMEO – Mang ṭha, ka duat bawihte. (Juliet in sangkate cu a kharih innsungah a lut.) Puithiam, Father Lawrence hnenah ka sim a ṭul. A thuptei kut in sih dingin ka dil ding, cule innlam zohman kan sim lo ding.

Bung 6

Father Lawrence Hnen Ihsin Bawmnak

Zingpit te ah Father Lawrence cu a hmuan sungah a rak um.

FATHER LAWRENCE – Pangparpawl hi sii ka tuahnak hrangah ka hmang ṭangkai tuk. Sii cu a ṭha tuk, ṭih a nung fawn lo. Curuangah ṭha zetin ka enkawl sinsin ding. Romeo a ra thleng. Na tho ṭha maw Romeo. Na zing tuk ual. Ziang thupawi a um – na itthat thei lo maw?

ROMEO – Silo, Asilo. Father Lawrence duh tukmi Fala ka nei ihsi, na bawmnak ka ṭul.

FATHER LAWRENCE – Aw, Rosaline thawn nan duh aw zo ti? Asi ko lo maw?

ROMEO – Rosaline e? Silo, a nih cu ka ruat nawn lo. Capulets ih fanu Juliet khi ka duh tuk ii.

FATHER LAWRENCE – Cucu mangbangza! A mah in teh a lo duh maw?

ROMEO – Aw, in duh. Neihawk kan duh, cucu tuini ih kan tuah a ṭul. Asinan a thupte ih kan tuah a ṭul. Kan sungpawl kan sim asile in dawn ding. In bawm ko aw maw Father Lawrence.

FATHER LAWRENCE – Ka fiang lo. Nan sung le an sung cu an ral aw zet a si lo sawm?

ROMEO – Aw si e. Asinan cucu Kei le Juliet hrangah a thupi lo.

FATHER LAWRENCE – Malten umhrih – nan pahnih nan neihawk asile buainak a cem dingih nan sungpawl cu rualpi ah an cang ding! Asi, Romeo, ka lo bawm tuk ding. Zanlam ah Juliet thawn ka inn ah ra uh la kut ka lo sih hai ding.

ROMEO – Lungawi um tuk! Ka lung a awi tuk, Father!

Bung 7

Juliet hrang Cakuat

Verona lamzin ah Mercutio le Benvolio cu an ṭawng phah rero.

BENVOLIO  Mercutio – tui zing Romeo na hmu maw?

MERCUTIO – Ai, hmu lo. A nih cu rualpi a ngaihsak nawn lo pi. Fala lawng si a ngaihsak thlang.

BENVOLIO – Tybalt in mizan an party ah Romeo a hmu ih a thinheng tuk lawlaw.

MARCUTIO – Ha! Tybalt cu zosi ṭih? Zoh, Romeo cu tu a ra si!                   

Romeo a ra thleng

BENVOLIO      Romeo – Khui ah na feh? Na rualpipawl in kawm paih nawn lo maw?

MERCUTIO – Rosaline thawn nan duh aw tuk thlang a si lo sawm? Curuangah si ding kan hnenih um na paih nawn lo!

ROMEO (A-hni) – Silo, Rosaline thawn kan duh aw lo.

BENVOLIO – Tybalt cu na parah a thinheng tuk si. Party ahkhan a lo hmu sokhaw.

ROMEO (A-hni sal) – Nan Tybalt cu Capulet a si. Cupulets cu ka rualpi an si hai si.

MERCUTIO LE BENVOLIO – Na rualpi! Ziang na duh san?

NURSE (A ra thleng) – In theithiam hram uh. Lord Montague ih fapa Romeo ka hawl. Nan rak thei pang maw?

MERCUTIO – Amah hi Romeo cu a si ko.

NURSE – Oh! Nangmah maw si! Romeo ka lo bia duh duak nan. (Midangpawl a zoh.) Nangmah lawng, zangfahten.                                                                    

Benvolio le Mercutio an suak, an hni phah. Juliet in nangmah tawn I fial, Na thei maw a lo duh tuk.

ROMEO – Ka duh tuk ve si. Puithiam, Father Lawrence hnenah ka sim zo. Tuizan zanlam ah Juliet kha ra dingin i sim sak aw. Kut in sih dingin in lungkimpi zo. A nulepa cu na sim hrimhrim lo ding.

NURSE – Phang hlah! Ka sim lamlam lo ding. An nih cun Paris thawi neihawkter an duh si, asinan Juliet in a duh lo. Cubetah Paris cu nangmah tlukin a tuak lo.

ROMEO – Sim ding hngilh hrimhrim hlah - tui zanlam Father Lawrence ih inn ah.

Bung 8

Thupte Neihawknak

Father Lawrence ih inn ah Father Lawrence le Romeo cu an bia aw rero.

ROMEO – Juliet cu a ra thleng cing ding. Kan neihawk ahcun ka nuamaw tuk ding.

FATHER LAWRENCE – Ngai aw, Romeo. Zarh reilote Rosaline cu na rak ngai. Cing ringring aw, Juliet na neih asile na thih tiang na duh ih na umpi ringring a ṭul.

ROMEO – Asi, Father. Ka theithiam tuk. Ka duh ringring ding kumkhua in.                   Juliet a ra thlengih Romeo cu a vun hngam.

JULIET – Ka Nurse nute in hitawkih tawngaw dingin I sim. Father Lawrence in kut in sih ding tin in sim fawn.

FATER LAWRENCE – Si, i thlun aw.

Bung 9

Buainak A Sosang

Verona lamzin hnawk celcel lakah Mercutio le Benvolio khal thurelin an ṭawng ve rero.

BENVOLIO – Tui sun cu a hlum tuk ti aw? Hivek boruak cu ka ngaih lo zawng tak si. Nikhua a sa tuk ruangah minungpawl cu an ummen hmanin thinheng an man ṭiaṭia.       Tybalt le a rualpipawl an thleng.

MERCUTIO – Zohhman! Capulet le an si khi – khi tawkah!

BENVOLIO – Buainak tuah tum hlah aw, Mercutio! Buainak kan duh lo ee.

MERCUTIO – Tybalt tivek men ka ṭih lamlam lo.

TYBALT – Khuiah saw Romeo teh? Nan rualpi a si lo sawm, kha pa kha?

MERCUTIO – Cucu na hnaṭuan a si lo.

TYBALT – A mah ka hawl, ka hawl suak ding.

MERCUTIO – Sual-aw ding ah maw na hawl?

BENVOLIO – Nan pahnih in cawl uh! (Romeo a thleng.)

TYBALT – Aw, na ra thleng ti aw Romeo! Ra hnik e! (A nam a zuk.) Mizan kan inn na ra a si lo sawm? A ṭha, kan inn ah Montagues cu kan duh lo lawlaw. Nun ka lo sim ta ding. Ra hnik, na nam la awla kan sual-aw ding!

ROMEO – Tybalt, na ral ka si lo pi! (A-hni) Montagues le Capulets cu rualpi ṭha an si cing ding.

TYBALT – Ziang e na ṭawng?

MERCUTIO – Romeo, ziangah saw na sual lo? (A nam a zuk.) A ṭha, kei mah ka lo fight ding. Ra!!                                                                                          

Mercutio le Tybalt cu an sual-aw.

ROMEO – Cawl uh! Lal Escalus ih simmi kha nan cing nawn lo maw si? Benvolio, in ṭhen bawm ve aw.                                                                                  

Benvolio and Romeo in an dawn, an kham, an ṭhen rero nan Tybalt in Mercutio cu nam thawn a sun ngah thotho ih Mercutio cu a tlu.

MERCUTIO – Ziangah kan lak ah na ding? In dawt ngah!

ROMEO – A pawi tuk! Lo ṭhen ka tum ihsi Mercutio.

MERCUTIO – Sibawi ka ṭul. Oh, nang Montagues le Capulets cu at thlakza buainak a si. Nan pahnih in nan sual, tuvekin nan sual aw, nan hua aw – Ka thi ding! (Mercutio a thi)

ROMEO – Mercutio! A thi! Tybalt! Ra kir aw! (Thinheng zetin a nam a zuk.) Ka rual pa na that. Tu ka lo that ve ding.                                                                         

Tybalt a ra thleng. An sual-aw, cule Romeo in a that. A kiangkapih a hmutu/zohtu pawl cu an au.

BENVOLIO – Himi cu a ṭihnung tuk! Romeo, tlan aw! Lal in a lo hmuh asile na awl lo ding.

ROMEO – Oh, ka ti pang, a va pawi ve! Ziang si ka tuah? (A tlan) 

Lal Escalus, Lord and Lady Montague, Lord and Lady Capulet, hnenumpawl le midang dang an thleng.

LAL ESCALUS – Ziang nan cang? Ziang tin hitei pahnih an thi?

BENVOLIO – Tybalt in Mercutio a that. Mecutio cu Romeo ih rualpi a si. Romeo cu a thinheng tukih Tybalt cu a that ngah pang ve.

LADY CAPULET – Romeo cu a thih tengteng a ṭul. Mithat pa a si. Ka tupa Tybalt a that a si.

LAL ESCALUS – Tybalt tla mithat thotho asi ve ko, Lady Capulet.

LADY CAPULET – Lamlam! Cucu Benvolio ih ṭawng menmi si, amah cu Montague a si. Romeo cu a thih tengteng a ṭul.

LORD MONTAGUE – Lal, kan fapa hi mithat a si lo. Tybalt a thahnak san cu a thinheng tuk ruangah si.

LAL ESCALUS – Nan zaten ngai uh. Ka thuthluknak cu hihi a si. Romeo cu a tuahmi vek rori in hrem le thah cu a si lo ding nan Verona ah a um thei nawn lo ding, tlan sehla ziangtik hmanah ra kir nawn hlah seh! Tu rori ah tlan dingin va sim uh, a ra kir sal asile a thi ding. Nan nih khal nan zaten remaw zetin va tlung uh.

Bung 9

Cakuat Dang

Juliet cu a khan sungah a mahte lawng a um.

JULIET – Ka hngakhlap tuk! Tuizan cu Romeo thawn kan um tlang thei thlang ding! Tute kan nei aw nan in theihpitu cu Father Lawrence le ka Nurse nute lawng an si. Aw ka Nurse nute. (A Nurse a thleng)

NURSE – Juliet, thil ṭihnung le rapthlak za thil a thleng. (A ṭap thawk hngal.) A thi, a thi.

JULIET – Zo maw thi? Romeo a si lo ti aw? Ka pasal Romeo a si lo ti?

NURSE – Silo, Tybalt a thi.

JULIET – Oh, a cang thei lo! Ka unau Tybalt! Ziangtin a thi?

NURSE – Buainak a umih Romeo in a that ngah.

JULIET – Thil cang thei a si lo! Romeo mi a sual dah ual lo.

NURSE – Asinan thu dik a si fawn. Tybalt in Romeo ih rualpa a that ih Romeo a thinheng tuk tuar lo ah a that ngah pang.

JULIET – Romeo cu tu khuiah a um? A parah ziang thil a cang ding?

NURSE – Romeo cu Father Lawrence inn ah a thup aw hrih. Lal in Montague hnenah Romeo cu Veronan a suahsan a ṭul, cule ziangtik hmanah ra kir nawn hlah seh tin a sim.

JULIET – Cucu ka hmu sal nawn lo ding tinak a si kei cu! (A ṭap cih)

NURSE - Ṭap hlah aw , ka duat. Ngai aw. Tuizan le Father Lawrence inn ah ka feh dingih  a thupten Romeo cu hitawk  ra in nangmah ‘mangṭha’ ra lo pe dingin ka va sim ding.

JULIET – Lungawi, Nurse. Mi zangfah na thiam tuk. Umhrih – himi zunghruk hi la aw. (A zunghruk a pek.) Romeo va pe aw cule a lo duh tuk tin va sim aw.

Bung 10

Romeo hrang Thuthang Sia

Father Lawrence inn ah Romeo cu a rak relh thup. Father Lawrence a ra thleng.

FATHER LAWRENCCE – Romeo – khuiah na um? Keimah, Father Lawrence ka si. (Romeo a ra suak)

ROMEO – Lal Escalus in ziang a sim? In that pei maw?

FATHER LAWRENCE – Ai that lo ding. Tybalt thah cu sual a sinan Lal in a lo that lo ding. Asinan tu rori ah Verona a suahsan dingih ziangtik hmanah ra kir nawn hlah seh a lo ti.

ROMEO - Ṭih a nung tuk! (A ṭap cih.) Juliet thawi a hlatnakih um ding cu thih hnakih har sawnmi thil a si.

FATHER LAWRENCE  - Romeo, ka ṭawngmi ngai ta aw. Na van a ṭha tuk lam. Lal hi na parah zangfahnak a nei tuk lam hokhaw.

ROMEO – Asinan thih ka duh sawn si. Juliet lo cun ka nung thei lo pi.        

Sangka king awn an thei.

FATHER LAWRENCE – Romeo, relh aw! Pakhat-khat in hitawkih an ra lo hmuh a si ahcun a ṭha lo ding.

ROMEO – A pawi lo, thih ka duh sawn.                                                                 

Nurse nute a rung thleng

FATHER LAWRENCE – Nurse, ka lo hmuh cu ka lung a awi tuk. Juliet thawn nan umtlang maw?

NURSE – Aw, tunaite ah ka hmu si. A nih khal hitawkih Romeo vek thotho a ṭap, a ai rero.

ROMEO – Asinan a unaupa ka that asi si. In duh lai maw si?

NURSE – Aw, duh tuk ee! A lo duh tuk lai. (Juliet ih pektermi zunghruk cu Romeo a pek.) Himi zunghruk hi in kuat a si.

FATHER LAWRENCE – Romeo, ka ṭawng ngai hman! Tuizan ah Juliet na va tawng thei. Asinan cu ṭheh veten Verona na suahsan ding. Cuihnuah Juliet thawi nan nei-aw asi tin mikip hnenah ka phuang ding. Cui hnuah Lal khal ṭhaten ka va dil sal dingih Verona ah na ra kir cing sal thei ko ding. Asinan tui zanah Verona na suahsan ih Mantua ih na feh a ṭul. In lungkimpi thei maw?

ROMEO – Aw, lungkimpi e. Mantua ah ziangtluk rei ka um ding?

FATHER LAWRENCE – Ka fiang lo. Ka cakuat na ngah sal hlan sung cu khatawkah um hrih ko awla a ṭha ding. Thuthang pakhat-khat ka hnen ihsin na theih hlan cu ra kir aw hlah. Tucu feh awla Juliet kha ‘mang ṭha’ va ti ta aw.

Bung 11

Lord Capulet ih Tumtah

Capulets ih inn ah Lord le Lady Capulet le Paris an bia aw hai.

LORD CAPULET – Paris, ka fanu hi a lung a awi thei lo. A unaupa Tybalt kha tui zingih a thih ruangah a si ding. Lord Montague ih fapa in a thah si.

PARIS – Aw, a va pawi ve! Ka riah a se zet. Juliet cu ka va bia thei kem?

LADY CAPULET – Tu rori cu silo sehla a ṭha ding, Paris.Tucu a khan te ah a um lai. A tlai deuh thlang, a cawl a ṭul hrih.

LORD CAPULET – Ngai hmanuh! Thu pawlsuakmi pakhat ka nei. Juliet hi Tybalt ih thihnakthu hngilhter ka duh. Pasal nei sehla cu a lung a awi zet ding ka zum. Paris, na nei duh a si lo maw? Nan pahnih hi a rang theitawpih nan neih awk a ṭul. Tui ni hi niziat si?

PARIS – Tlawngkai nikhat zan a si, ka Pu.

LORD CAPULET – A si, neihawknak cu Tlawngkai Nili ah si seh!

PARIS – A va lungawi um ve!

LORD CAPULET (A nupi hnenah) -  Kan nu, feh awla Juliet kha thuthluknak ka tuahmi hi va sim aw. Kan hmanhmawh a ṭul. Paris, hngilh hlah maw khah – neihawknak cu nithum lawng a duh thlang kha!

PARIS – Ka hngilh lo nasa ding, ka Pu.

Bung 12

Juliet hrang Harsatnak

Juliet ih khan ah Romeo le Juliet an um tlang.

ROMEO – Bawihte, ka lo duh tuk nan ka lo fehsan a ṭul, ka riah a se tuk. Lenglam khi zoh hman – zingpit a kim zik rero zo.

JULIET – Cuvek cu in sim hram hlah aw. Ka kiangih na um ringring ka duh. Tucun ka pasal na si zo. Feh a ṭul lo.

ROMEO – Duat, ka feh a ṭul ticu na thei ko si. Hi tawkih in ra hmutu an um asile Lal in daan vekin in hrem ding. Ka feh dingih Mantua ah ka um ding. Father Lawrence in kan sungpawl siseh, Lal siseh a rak bia dingih cumi hnuah ca in in rak theih ter sal ding. Ka ra kir cing thei ko ding ka zum.

JULIET – Si hram seh! Ka duh bikmi, Romeo, ka lo duh tuk.                       

Sangka king awn an thei.

ROMEO – In hnam aw! Mang ṭha, ka duat.                                                   

Sangkate ihsin a suak.

LADY CAPULET (A ra thleng) – Juliet – Na tho zo maw a tlai thlang so khaw.

JULIET – Ka thei ko. Zan ka itthat thei lo ihsi.

LADY CAPULET – Aw, na unau Tybalt ih thihnak ruangah tutiang maw riahsia ih na um. Na thin har duh hlah aw, ka duat. Romeo cu kan hawl ding, kan hmuh veten a thi si mai. In ngai hman, thuthang duh-um tak ka run lo ken. Na pa in Paris thawn nan nei aw ding a lo ti. Neihawknak cu tlawngkai nili ah a si ding.                              

(Juliet cu a thawpi a suah.)

JULIET – Paris cu ka nei lo ding. Thil cang thei a si lo!

LADY CAPULET – Ziangtin ee, ziangsi na sim duhsan?                                 

Lord Capulet le Nurse an rung thleng.

LORD CAPULET – Thuhla kha Juliet cu na sim zo maw?

LADY CAPULET – Aw sim, asinan Paris ka nei lo ding i ti.

LORD CAPULET – Ziang ee? Ziangah maw? Juliet, ngai aw. Paris hi mi ṭha ho khaw a si, mizangfah a nei fawn. Mi thupi zet pakhat khal a si. Cubetah Lal ih rualpi a si fawn. Mi van ṭha tak na si ding.

JULIET – Ka pa, ngai aw. Ka thin nawmnak in hawl sak ti cu ka thei ih ka lung a awi. Asinan Paris cu ka nei dah lo ding. Ka duhmi khal a si lo, theih khal ka thei dah lo.

LORD CAPULET – Cucu a thupi lo pi. Tlawngkai nili ni ah nan nei aw ding, na thei maw?                                                                                                                 

Lord le Lady Capulet an suak.

NURSE – Ka duat, ngai aw. Romeo cu Mantua ah a um. A ra kir sal nawn lo tla a si thei. Na nulepa ih lo simmi hi a dik a si. Na thei ko si, Paris cu mi ṭha le fel a si kha. Romeo hnakin pasal ṭha a si sawn mahna! Romeo cu hngilh men aw. Parsi hi nei aw. Cucu thil ṭha bik a si. (A suak ve.)

JULIET – Tuiṭum ahcun ka Nurse ih thukhal ka ngai paih lo. I bawm ding hmang tinak i lai. Father Lawrence hnen ka feh dingih a nih tal cun i rak bawm thei mahna!

Bung 13

Father Lawrence ih Sii

Father Lawrence ih inn ah Paris le Father Lawrence cu an bia aw rero.

FATHER LAWRENCE – Ziang tin ee? Tlawngkai nili ah ee? Mangbangza si ual!

PARIS – Si, ka thin a phu dukdo ve. Juliet ka rak duh nak hi a reipi ve zo, tucu rei hlanah ka nei ngah thlang ding.

FATHER LAWRENCE – Asinan ṭhiṭha in hman na thei lo pi. Paris, na hngah deuh hrih a ṭul. Tlawngkai nili cu a rang tuk!

PARIS – Hmanseh a pa in thuthluknak a tuah thluh zo si. Ka lung awi ngahfuh!

JULIET (A ra thleng) -  Paris, na tho ṭha maw?

PARIS – Hello, ka duhte Juliet (A hni) Rei hlanah ka nupi na si ding.

JULIET – Cang thei. Puithiam tawng dingin si ka rat.

PARIS  - Ziangtluk i duh ti sim dingah si pei cu ti?

JULIET – A mah lawng si biak ka tum.

FATHER LAWRENCE – Paris, zangfahten leng in rak suahsan thei pei maw?

PARIS – Ngah tuk e, Father. Duhte, Mang ṭha. (Juliet a hnam ta.) Kan nei aw cing ding. (A suak.)

JULIET – Ziangsi ka tuah ding? (A ṭap hngal.) Thih ka duh.

FATHER LAWRENCE – Paris neih tilo cu ziangsaw na ti thei nawn ding? Na neih a ṭul ko.

JULIET – Father, Paris cu ka nei dah lo ding. Romeo ka duh tuk ticu na thei lo maw? A nih cu ka pasal a si. I zoh aw, nam ka rak keng. (A namte cu a suah) Paris nei ding i ti a si ahcun hitawkah ka that aw cih ding.

FATHER LAWRENCE – Umhrih! Na nam kha ret aw la i ngai ta aw. Juliet, ruahsuakmi pakhat ka nei. (A feh ih dawng pakhat a va la.)

JULIET – Khami cu ziangsi? Tur maw si? Khakhan i that thei kem?

FATHER LAWRENCE – Ai, tur a si lo Juliet. Asinan himi cu sii a si. Himi sii in pohpoh cu ni hnih sung mithi vekin zianghman thei lawn an um.

JULIET – Ziang tuah ter i duh?

FATHER LAWRENCE – Nan neihawk nak zankhat duh ah himi sii hi in aw. Cule nasaten ni hnih sung rori na itthat dingih zianghmanin a lo ṭhangharh thei lo ding. Na taksa a dai dingih mikipin a thi zo tin an lo ruat ding.

JULIET – Cule ziang kan tuah bet ding?

FATHER LAWRENCE  - Cutin na taksa cu na sungpawl ih thlan ah an lo ret ding, na unau Tybalt ih kiangah. Cuhnuah na ṭhangharh sal ding (Juliet cun a thawpi a suah.) Phang hlah, Mantua ih Romeo cu Verona ah zanlai fangih ra dingin ca ka hi kuat lohli ding. Cutin nan pahnih in Mantua ah nan tlan thei ding. Na tuah thei kem? Ṭih cu a nung deuh, asinan himi na tuah lo ahcun Paris na neih a ṭul.

JULIET – Aw, ka tuah ding, Father. Romeo thaw cun ziangkim hi ka tuah ding. Ka lung a awi, Father.                                                                                               

Juliet cun dawngte cu a la ih a suak.

FATHER LAWRENCE – Father John! Father John! (Father John a ra thleng. Father Lawrence in ca cu zamrangten a ngan ih a pek.) Hica hi la awla Mantua ih Romeo va pe aw. A thupi tuk, ca thupi tuk hokhaw aw!

Bung 14

Neihawknak Dang

Capulet inn ah Lord le Lady Capulet, Nurse le hnenumpawl cu an buai celcel.

LORD CAPULET (Hnenumpawl hnenah) – Feh awla kan rualpipawl hmuahhmuah kha neihawknak ih ra dingah va sawm aw. (Hnenum dang hnenah) Verona ih bel ṭha bik le tum bik kha va hawl aw. A sunglawi zetmi neihawknak a si ding. (Nurse hnenah) Juliet teh khuiah a um?

NURSE – Aw, a nih cu Puithiam hnen ah si, ka pu. A ra kir cih ko ding. Aw, zoh hman tu a ra zo. A lungawi hmel nasa.

JULIET (A ra thleng) – Ka pa, ka riah a se zet.

LORD CAPULET – Ziang ee?

JULIET – Paris neih dingih i fial hi thil dik zet a si. Ka ṭap nawn lo ding. Amah khal midik a si. Hmaisa ih ka rak lungkim lo lawk kha cu ka ti palh tuk.

LORD CAPULET - Thuthangṭha tuk a si ual. Oh, ka lungawi tuk zo! Nan zaten ngai uh! Neihawknak cu thaizing ah a si ding. Feh uhla Paris kha va sim uh.

LADY CAPULET – Thaizing ee? Thaizing cu tlawngkai ni thum a si ual. Neihawknak cu tlawngkai nili ah na ti si.

LORD CAPULET – Cucu a thupi lo. Juliet le Paris cu a rang theitawp ih an neihawk a ṭul. Zamrang uh, zamrang! Tuizan cu zohman an itthat thei zik lo – kan buai nasa ding.

Nurse – feh awla Juliet kha a neihawknak thuamhnaw tuah tla kha va bawm aw! Oh, ka lungawi tuk!

Bung 15

Juliet in Sii a in

Juliet ih khan ah Juliet cu neihawknak thuamhnaw a hruh san rero. Nurse le Lady Capulet in an hngak rero.

NURSE – Ka duat, na mawi tuk, na kaih tuk.

LADY CAPULET – Juliet, ihnak khan ih na feh a ṭul ding. A tlai deuh zo, va cawl hahdam aw. Mang ṭha.

JULIET – Thaizing ah Paris ka nei ding tin an ruat thluh ko ding, an thei lo nasa. (Father Lawrence ih pekmi dawngte cu a keng.) Ka in dingih ka itthat ding. Cule ka thi ah in neih ding. Oh, ka ṭih tuk! Ni hnih sung cu tho thei lo in ka um ding sikhawh. Ka thawh sal tikah cun thlan ah a si dingih mithi ruangpawl ka kiangah an rak um ding. Asinan ka tuah a ṭul ko. Romeo a ra dingih i rah awl ding, cule kan umtlang thei leh sal ding.                                                                                      

Sii cu a inn ih a ihkhun ah a tlu.

Bung 16

Capulet in Juliet a hawl

Zingpit te ihsin Capulet inn cu Lord le Lady Capulet, Nurse, hnenumpawl le rawlsuangpawl cu an buai celcel.

LADY CAPULET – Rawl kan ṭul bet. Tohkham le cabuaipawl tla kan ṭul hrih.

LORD CAPULET – Khitawkih pangparpawl kha rak keng uh! Zamrang, tikcu tam kan nein awn lo.

NURSE – Ka pu, ziangah ihnak lam na feh lo? A tlai thlang sokhaw.

LORD CAPULET – Ka itthei lo pi – ka thin a tur tuk! Zing ahcun ka fanu te in Paris a nei thlang ding. Neihawknak a cem thluh hnu ah party kan nei bet ding. Party ka tuahmi hmuahhmuah lakih mak le danglambik a si ding.

LADY CAPULET – Paris cu a ra thleng cing ding. Nurse – Juliet kha vung ṭhang hnik aw.                                                                                                                   

Nurse cu a feh

LORD CAPULET – Awnmawi tum awn tla ka thei. Paris cu music tumtupawl thawn an ra thleng.                                                                                                 

 (Lenglamah music cu tum a si rero zo)

NURSE – In bawm uh! In bawm uh!                                                          

(Hnenum hrekkhatpawl cu bawm dingin an feh)

LADY CAPULET – Ziangsi cang?                                                                              

Nurse le hnenumpawl cu an ra kir, Juliet cu an rak cawi, riahse zetin an ṭap.

NURSE – Juliet a thi!                                                                                               

An zaten an cawl.

LADY CAPULET – Juliet! Ka fanu neih sun! (Juliet cu a pawm) Zangfahten tho aw! Oh! A dai thluh zo si. A thi ngaingai zo!

LORD CAPULET – Leitlunih dunungum bik ka fanu te. A nih cu kum 13 te lawng a si lai, asinan tu ahcun a thi.      

 Father Lawrence, Paris le musicians pawl an ra thleng. Awnmawi cu ti riangro ten an tum phah.

PARIS – Juliet cu biakin ih hruai dingin si ka ra!                                                   

 Juliet ih ruang cu an hmu. Awnmawi tum khal an cawl.

LADY CAPULET – A nih cu kan fanu neih sunte asinan si. Tucun nun man ziang saw ṭangkai. Lungawinak timi kan nei thei dah nawn lo ding.

PARIS – Juliet- a thi? Himi cu ka nunnak ih harsabik thil a si.

FATHER LAWRENCE – A ruang cu biakinn ah a keng. A ruang cu nan sungpawl ih thlan ah ka rat ding, a unaupa ih thlan kiangah. Pangparpawl cu a taksa parah ret uh. 

Pangparpawl cu a taksa parah an ret ih an phur.

Bung 17

Verona ihsin Thuthang

Romeo cu amah te lawng Mantua lamzing parah lam a leng rero. Zinkap ah dawr thil zuarmi tete tla a um

ROMEO – Oh, Juliet tel lo cun nun hi a va har lawmam ve! Verona ih kir sal cu ka va cak ve, asinan kir a ngah silo. Father Lawrence hnenih ca ka ngah hlan lo cu ka hngak ṭenṭo hrih ko ding. Rei hlanah thu ka dawng ko ding ti ka ruahsan tuk. (Montague ih hnenum pakhat a ra thleng.) Father Lawrence ih lo thlah mi na si maw?

HNENUM – Ai, silo. Asinan thuthang pakhat ka run keng. Thuthang sia a si. Sim ding khal ka hreh tuk. Juliet a thi. Mizan ah Capulet ih thlan ah a ruang an ret ka hmu.

ROMEO – Ziangtin ee? Ka kir sal tengteng a ṭul. Ka feh dingih ziang thil a thleng, a cang timi cu ka va hawl suak ding.

HNENUM – Ka bawipa, um hrih. Kir hrih hlah aw. Father Lawrence ih cakuat na ngah hlan cu hngak hrih ko aw.

ROMEO (Thinheng zetin a au) – A cang thei lo. Tu rori ah Verona ka feh ding. In feh san hrih aw. (Hnenum cu a tlan.) Juliet hi a thi a si ahcun kei tla thih ka duh. Juliet hi vawikhat tee tal ka va hmu sal ta ding, cule kei khal ka thi ve ding. Tur ka hai. Khuitawkah tur ka hmusuak thei pei? Aw, hi kiangkapah dawr tete an um a si lo sawm, khuiah si ta kha? (Dawr lenglam ah a feh) Hey, nang kha sii na zuar a si lo sawm?

THILZUAR – Aw si ee, sazapa.

ROMEO – A cak zetmi tur ka duh. Na thei maw?

THILZUAR – Sazapa, kei cu sii hi minungpawl bawmtu dingah ka zuar, tur in tahratih mi thah nak dingah a si lo.

ROMEO – Hinah (A kawr dip sung ihsin suipawl a suah.) Na duh zatzat sui ka lo pe dingih farah le rilrawngpawl va bawm aw.

THILZUAR – Awleh, sazapa. (A nih khalin a dip sung ihsin tur sidawng te a suah ve). Himi tur-sii ka nei. A ṭih nung tuk. Himi tur-sii into pohpoh cu an in veten an thi cih. Asinan ka lo zawrh thei lo ding sazapa. Himi cu thilsual a si. Ka lo zawrh asile in kai thei.

ROMEO – Phang hlah. Zohman ka sim lo ding. (A kawr dip sungih sui cu a suah bet). Hitawkih ka suipawl hi a zaten la aw. Ka hai nawn lo. (Thilzuarpa khal cun a tur-sii cu Romeo a pekih a feh.)

FATHER JOHN (A ra thleng) – Romeo khuiah a um?  Father Lawrence ih in cahmi thusim ding ka nei. Father Lawrence in ca thupi tuk a ti hokhaw. (Lamzin tluan ah feh phah in) Romeo! Romeo! Khuiah na um? Romoe! Oh, a va pawi ve! A um nawn ual lo.

Bung 18

Umtlangsalnak

Biakin leng hmuan pakhat ah zanlam deuh a si thlangih Paris khal Capulet ih thlan kiangah a ding. Thlan tumpi a siih a sangka khal a rit zet.

PARIS – Oh, Juliet! Leitlunah ziang hmuahhmuah hnakin ka lo duh bik. Ka nupi ding ka lo ti rero lai ah tu ahcun nang cun in thih san. (Pangpar cu thlan parah a ret.) Zantin ten na thlan ah ka ra ringring ding. Ziang thawmvang si? Pakhat-khat rat thawm si!                                                                                                    

Arelh, cule Romeo a ra thleng.

ROMEO – Juliet na mithmai pante kha ka hmuhsal a ṭul a si!                                 

Paris a ra suak. Romeo in thlan sangka cu a awng.

PARIS – Cawl hnik! Nang kha Romeo na si ko lo maw? Montagues tei’ sung na si. Juliet ih thlan ah ziangsi na ra tuah ve?

ROMEO – Zo sin a si? Kei mah lawng in um ter hrih aw! (An pahnih in an sual-aw ih Romeo in Paris cu a thah. Romeo cu thlan sungah a feh ih a neihmi tur-sii cu a suah). Juliet, ka duat, ka nupi! Nang cu na thi, asinan na mawi ringring lai. Himi hi netabik kan hnamawknak a si ding. (A hmur te ah a vun hnam, cun tur a inn.) Nangmah hnam phah in ka thi ding. ( A thi.)

FATHER LAWRENCE (A ra thleng) – Juliet cu rei hlanah a tho sal ding. Romeo hi khuiah saw? Father John hnen ca thawn thu ka cah, hitawk ah ra ih tawn awk ding a si kha. Romeo! (Thlan ah a feh.) Thlan sangka a awng! Ziang thil saw thleng?

JULIET (A ṭhangharh thlang) – Father Lawrence, ka lo hmu cu ka lung a awi tuk. Khuiah saw Romeo teh?

FATHER LAWRENCE – Juliet, thil danglam le ṭihnungum a thleng a si hi. Romeo cu na kiang ah a it si. Asinan a nih cu a thi! Arming – hinah ihsin kan suak lohli ding. Pakhat-khatin hitawkih in ra hmuh ahcun kan awl lo ding.

JULIET – Ai, Father, ka tlan lo ding. Romeo thawi umtlang ka duh. (Father Lawrence cu a tlan lohli). Ka duh bikmi, Romeo, ziang na cang? (A kiangah tur a in mi dawng a hmu.) A mah le mah a rak that aw. Aw, a tha! Kei tla ka thi ve ding. Romeo lo cun nun hi ka paih lo. Romeo ih hmur ah tur a um lai ding ti a ruah ruangah a hmur ka hnam asile a hmurih ummi tur in I that ko ding tin a ruat. (A hmur te ah a hnam ve.) Ziangah ka nung lai thotho, thih ka duh a sisi. Thih cu ka ṭih lo pi. (A nam a zukih a mah le mah a sun that aw. Midangpawl an ra thleng.)

MIPI (An au) – Ziangthil si thleng? Zouh, Paris, a thi! Romeo tla a thi ve. Hrekkhatin thlan sangka an awng! Lalpa an hawl! Capulets le Montagues tla! (Lal Escalus, Capulet le Montagues le hnenumpawl an thleng.)

LAL ESCALUS – Romeo le Juliet cu an thi maw? (Father Lawrence le mipi dang tampi cu an ra thleng bet.) Father Lawrence himi thuhla thawn pehparin theih mi na nei maw?

FATHER LAWRENCE – A liamciami ni reilote ah Romeo le Juliet hi an nei aw. (Mipi zate cu an lau thluh, cuveten Lady Capulet cu a ṭap.) A thupten kut ka rak sih hai. Ziangahtile Capulets le Montagues cu ral an si ruangah. Juliet cun Paris cu a nei duh fawn lo. Curuangah sii in dingmi ka rak pek. A thi a si lo, a itthat mi a rak si. Cule Mantua ih Romeo hnenah Ca ka kuat nan a rak ngah lo. Cutin tu ahcun an pahnih in an that aw veve.

LAL ESCALUS – Lord Capulet, Lord Montague – hinah ra uh. (Lal hmaiah an pahnih in an ding.) Hithil a cannak cu nan mah pahnih ral-awk ruangah a si. Nan mai ruangah si Romeo, Juliet, Paris, Mercutio le Tybalt pawl cu an thih.

LORD CAPULET – Lal, kan buainak pawl cu a cem zo. Tucun ral ihsin rualpi kan si zo. Ziangtik hmanah ral-aw in kan buai nawn lo ding.                                

Lungawi lemlo in an cibai aw.

LORD MONTAGUE – Romeo le Juliet ih zuklem kan tuah pei uh. Cui zuklem cu sui thawi tuahmi siseh. Cule zohmanin an nih cu kan hngilh dah lo ding.

LAL ESCALUS – Tu ihsin Verona ah remdaihnak um hram she. (Vanlam a zoh.) Tui zing cu ni a suak lo. Inn ah nan zaten va tlung uh, cule riahsiatza Romeo le Juliet ih thuanthu cu va hngilh uh.