Zumnakih Mi Huaisen Kim Davis Ih Thu Mangbangza 5

Kim Davis kiangah Republican Presidential Candidate Mike Huckabee in umpi in September 8, 2015 ah  Grayson, Kentucky thawngin ihsin a suah laiih a telpi lai

Neihbangaw (homosexual) duhlo ruangih US cozah in thawng a rak thlak dahmi Kim Davis cu thawng inn ih ni 6 a um hnuah kan dung September 8, 2015 ah a suak sal zo thu cu kan zaten kan thei cio ding a zum um.  Kim Davis cu thawnginn ih a suah hnuah a hnaṭuan zung cazi (cleark) ah a ṭuan sal thu The Christian Post sirhsan in theih a si. A hna ṭuan a sunzawm sal vekin neihawknak licenses thuah federal court a el hrih ding maw ti cu a fiang hrih lo.

Mangbanza a thuhla tla cu:

An Cazi (cleark) Hnaṭuan cu Innsang Sumhawlnak A Si

Davis ih nu, Jeanne Bailey cu kan dung kumih a hnaṭuan cawl dingih thuthluknak a tuah hlan kum 37 lenglo Rowan County cazi (clerk) a rak ṭuan. Davis in a nui hnaṭuan cu kum 26 lenglo hlawhtling zetin a rak ṭuanpi. Cui hnuah a mah in a run ṭuan.

Davis thawng a tlak sungah a fapa Nathan in Davis ih zungah to in a hnaṭuan a rak sawng. Asinan cumi lai khalah a fapa Nathan in neihbangaw neihawknak licenses cu a rak pe duh ve cuang lo.

Davis cu Democrat A Si

Davis ih nu in a hnaṭuan a cawlhsan hnu kum 37 ah Davis in Democrat ih a nui’ hnaṭuanmi dinhmun ah a va ṭuan ve.

Minung tampi in Davis cu Rpublican a si tiih an zum rero lai ah kan dung kum ah vote 23 thawn Democratic primary in nehnak a rak co. Kan dung November ih general election ah Davis cun Republican ih John Cox cu 53% in a rak neh.

Hi hrilawknak (election) ah Davis in nehnak a co hnuah, “Hivek hlawhtling zetin nehnak ka co ding titla ka rak ruat ban lo, ka ṭuan tikcu ahcun ka thei tawkin mipi le zung hnaṭuanpawl ka rian ding” tin a sim.

Davis cu Vawi Thum Rori Pasal Rak Ṭhenzotu A Si: Fate Pahnih Thawn

Zung Ca (court documents) vek asile Davis cu pasal vawi 4 a nei ih vawi thum rori rak ṭhen zotu nunau a si. Netabik an ṭhenawknak cu 1994, 2006 le 2008 ah a si ih Davis cun tui a pasal (Ed Davis) hi vawi hnih a neihnak a si.

Davis cu a hmaisabik a pasal thawi an ṭhenawk hnu thla nga ah faphir te a nei. U. S. News & World Report ih simdan vek asile a faphir te cu a pasal pathumnak thawn biological ih an neimi a si. A faphir te cu a pasal pahnihnak pa in Davis thawi an neihawkhnu ah a lakih a enkawl.

Davis cu Christian A Sinak Kum 4 Lawng A Rei

Christian tampi cun Davis cu pasal tampi a neih ruangah Christian ngaingai a si lo ding tiih sawiseltu tampi an um. Asinan cu lai ah Davis cu Christian a rak si hrih lo. Christian a sinak le a piantharnak cu kum li le hrek tlukfang lawng a rei.

Davis cun a pasal ih nu a thihnak thu ruangih piangthar a si thu a simfiang. “A liamcianmi kum li laiah ka pasal ih nu thihnak thawn pehparin ka tuarnak zia deuh ding le i duhsaknakpawl kim ter dingah Kawhhran ah ka feh, cui ṭumah Zisu Khrih ih duhdawt zangfahnak le ngaidamnak thupawl ka thei ih cummi ihsin nunneithawk ka si” tin a sim fiang.

Davis cun, “ka famkim ve lo, zohman a famkim kan um lo. Asinan kei cu ngaidammi ka si zo. Ka Bawi Zisu cu ka duh tuk cule A Thu le Pathian Thu cu ka thlun tengteng ding” tin a sim bet.

Davis cu tu ahcun Morehead, Kentucky ih Solid Rock Apostolic Kawhhran ah a khawm ringring.