Fapa Hrangih Mawibik Apa

Kum 80 putar pakhat cu tohkham-nem (sofa) parah, a fapa kum 45 mi, tlawng sangzet kai pa thawn an to tlang. Rinlopin an kiangih sangkate ihsin ar a rung khuang.

A pa cun, “hihi ziangsaw?” tin a sut ih a fapa cun, “arkhuang famteh” a ti.

Minutes malte rei hnuah a pa cun a fapa cu, “Khakha ziangsaw a si” tin a vawi hnihnak a sut sal lala.

A fapa cun, “Ka pa, tunai ka lo sim zo kha, arkhuang si” a ti.

Tikcu malte a rei hnuah a pa cun, “Ka fa, khakha ziang e a si” a vawithumnak a sut lala.

A vawi thumnak cun a fapa tla a thin a heng deuh tlangih aw hro nawn in a pa cu, “Arkhuang, arkhuang” a ti.

Malte a rei bet hnuah a pa cun ka fa, “khakha ziang e?” a ti sal lala.

A fapa cu a sup aw thei nawn lo ih a pa cu a auh in a auh, “ziangahsaw i suh bang cu i suh sal leuhleuh, arkhuang a si tin vawi tamtuk ka lo sim zo a sisi, na theithiam thei lo maw si hi lawmam?”

Cucun a pa cu a khan sungte ah a vung lut ih a diary cabu pakhat te thawn a ra suak. Cui a cabu fate sung ahcun a fapa a suahni ihsin a nganmi thupawl tla a um. A pa cun a fapa cu cabu kau dingin a fial ih a fapa cun cui cabu a vun kau ih a sungih ca a siar tikah, hitin nganmi a rak um.

“Tui ni cu ka fapa kum thum te thawn tohkham-nem (sofa) parah kan to ih ka sangkate kiangin ar a rung khuang. Ka fapa te cun ka pa hihi ziangsaw a si tin vawi 23 i sut ih a vawi 23 in thinheng loten ka rak let. Ka fapa te cu duhdawt zetin ka kuah ih ka pa khakha ziangsaw a si tin i suhmibang cu vawi 23 tiang i sut sal leuhleuh. Vawikhat te hman thinheng loin ka fapa duat te cu a vawi 23 in, 'arkhuang a si' tin ka sim".

A fapa te in “himi cu siangsaw a si” tin vawi 23 a suh nawn rero hmanah vawikhat hman thinhengnak awkam tel miah loin a vawi 23 in a sang thluh nan tuini ah a pa cu a tar thlangih, a pa ih vawi 4 thusuhnak menah a fapa te cu nasa zetin a thin a heng.

Curuangah, na nulepa an tar tikah siseh, thu an theih thei nawn lole aan an cin nawn lo khalah kawk in hro pang hlah. Duhdawtnak le thinsaunak thawn pawm ringring aw. Tuini i si cun, “Ka nulepa hi kumkhua in lungawi ih an um hmuh ka duh” ti thlang aw. Ziang theilo ih ka nauhak lai ah a sang bik duhdawtnak le lainatnak thawn in tuamhlawm. Tuini ih minung ka si theinak dingah hmun sukso le hrap lakah thlisia le ruahsia hmulo dingin in rak feh pi.

Pathian hnenah thlacam aw, “a tar zetmi ka nulepa hi ka thei tawp suah in ka tuamhlawm ding. Ziangvek an si hmanah duhdawtnak awkam te thawn ka bia ringring ding”.

(“Handsome is that handsome does” timi cahram a remcang danih lehmi a si)