Ṭihnak kha Rualpi Ah!

Ṭihnak kha Rualpi Ah Hmang Aw!

Ṭihnak timi hi hnaṭuannak zung tinkim le mitinkim ih tuarmi a si. Sunral ding kan ṭih, tisual kan ṭih, hminsiat kan ṭih, hlawhtlin lo, hlawhsam kan ṭih. Asinan cui ṭihnakpawl sim ngamtu cu mi malte an si.

Taktak ahcun ṭihnak timi hi a ṭhalo lam hlir an rak si cuang lo. Ṭihnak hi na dung ihsin thazang a lo petu thil ṭha pakhat khal a si thei thotho. Zuamawknak a na sa zetmi hi leitlunah sunral le hlawhsam ṭihnakpawl hi na rualpi ṭha khal a rak si thei thotho.

Pawm Hnget Aw!

Nang cu cet thawi tuahmi na si loih minung hmuahhmuah hnakih cungcuang khal na si lo. Curuangah thuthluknak tuah tikah siseh, ṭuanvo lak tikah siseh, hlawhsamnak phunkim lakah ṭihnak timi cu a-kel-ten a ra ringring ding. Curuangah cui ṭihnak timicu rualpi ṭha vekin rak pawm aw. Na ṭihhrutnak kha a ṭha lam zawngih thlir cun na thazang dernak siloin na thazang cahnak sawn a rak si thei. Ṭihnak timi kha rualpi vekin ṭhatei na rak kilkhawi thei a si ahcun thuthluknak tuah lohli ṭul canah a lo bawmtu a si ding.

Zingzawi Aw, Thir Aw Hlah!

Ṭihnak timi cun a lo thir ter dingih thubuaipawl ṭhatei ruat thei lo dingin a lo tuah ding. Ṭihnak kha ṭhanglian ter aw hlah. Vun zingzawi deuh aw. “In pekmi tikcu a mal tuk ruangah maw si ka ṭih” tin sut aw-aw. Thubuai asilole harsatnakpawl kha pakhat teten thliar dangin hlensuah tum nakin ṭihnak kha a lo do neh ter ding.

Harsatnak Kha Mai Tuah Ṭhangmi Vekin Tuamhlawm-aw!

Va zuam cu thil ṭha a si. Harsatnak le buainakpawl kan tawn tikah, cutik ni le thla ah tuah thluh tengteng a ṭul timi thilpawl a ra thlen tikah mah le mah rak zumawlo tui hrangah a hlawhtling a si ahcun thazang cahnak ngaingai a si. Ṭihnak hin kan harsatnakpawl hi tuamhlawm theinak in pe ko. Zuamawknak asivekin ka tuah ding, ka tuah lo asile a ṭha lo sinsin timi ṭihnak thinlung hin thazang in pe.

Cangantu cu a nem le a dai zawngin harsatnakpawl a pah tlang ṭheu. Tufang ih ka tawnmi harsatnakpawl hi ca ah ka ngan, cule ṭihnak timi ih a hram ka hawl. Caan tampi cu ka rak ṭih zetmi harsatnakpawl hi cutluk an rak si lo timi cu ka hmu fiang. Ṭihnak timi ih a hlawknak na hawl hlanah buainak tuamhlawm dan pakhat khat cu na ṭul ding.

Na Venghnen ah Thazang Lo Pe Theitu Ding Hawl-aw!

Na kiangkap ah na rualpipawl an um ahcun na ṭihnak thinlung a zia ding. Na fehnak ding lamzin a har tuk ding asile na rinsanmi hnaṭuanpi le mifim thurawn pe theitupawl ih kiangah um aw. Na rualpipawlin, khawruah harsatnak (pressure) na nei tam deuh, cawlhahdamnak dingah khual tlawn a ṭha tiih ruahnak an lo pek le zum aw. Nangmah pakhat lawng na silo timi theihnak cu thazang ngaingai a si.

Thubuai le Harsatnak ih Hram Thei-aw!

Sumdawng tampi le milian tampi harsat buainak le ṭihnak ih nasa tukih a nuai ciamco ṭheunak cu buainak ih hram an hawl fuh thei ṭheu lo. Tawntehmi rak nei zotupawl cun harsatnak timi cu minung, thilri, le hnaṭuannak ih hram bunawmi a siih pakhat khat ahcun a um tengteng ding timi cu an rak hmu cia.

A hmaisabik karbak cu ṭih aw hlah. Na kut sungih ummi harsatnak kha ral ṭha deuh in vun zoh aw. Na zum vek ih harsa tuk cu a rak si lo ding.  Cun harsatnak fa-tete pakhat ruangah hnaṭuan tumpi pakhat kha vun ruat tel bet aw hlah. Na kut hnuai hnaṭuanpawl ih ṭuankhawm dan le dinhmun kha zoh aw. Na thil tuahmi ih hlawknak le samnak kha vun zoh aw. Harsatnak hram na vun hmuh ngah cun harsatnak cu dingfel zetin thuthluknak na tuah thei lohli ding.

Minung tinkimin ṭihhrut-harsatnak kan tuar cio. Asinan cui ṭihnak ih hram na hmuh fiang ih thazang ih na hman ahcun mi menmen lak ihsin na suak dingih na hlawhtling ding. Ṭihnak timi hi a um ding ti thei cia in upat zetih na rak co hlang thei a si ahcun ṭihnak timi in na hnaṭuan ṭhang so dingin thazang a lo pe ding tinak a si.

Gentlement.com