Kan dinhmun thawi a bangawmi Bible sungih minungpawl

Thuhmaihruai

Harsatnak kan tawn tikah Setan in kan harsat ruangah milai rinsan seh ti in duh ih kan harsatnak hi midang ih tawn le tuar dahlomi ka tuar tiih ruat aw ding khal, in duhsak ringring. Harsatnak ih nehmi siter in duh ih harsatnak ruangah Pathian ih duhdawtnak rinhlelh ter khal in duh. Setan cun kan harsat hi kan sual ruangah a si tiih ruataw dingin a zuam ih ruahsannak a um nawnlo timi ruahnak neihter khal in duh ringring. Pathian in dinhmun ṭha deuh ah in ret seh ti ruahnak neih ter khal in duh ih Pathian thu ih rinhlehnak neih khal in duh.  Hmanseh, himipawl cu kan dinhmun a siat a ṭhat khalah Pathian thu thawi kan pahtlang dingmi thilpawl an si. Kan mah lawng tuar vekih kan ruah ṭheumi harsatnakpawl hi Setan hnaṭuan a siih, kan mah lawng a si lo zia Bible ah kan hmu.

1. An Duhdawt Zetmi An Sungral.

·        David ( II Samuel 18:33), Mary – Zisui nu (John 19:25-30), le Naomi (Ruth 1:3-5) an zaten an duhdawtmi an fale in an thih san. Mi tampi cun fa le ih thihsan hi tuarharbik pakhat a si, nulepa hi fa le ih thih hlan ah thi sawn sehla tin an sim ṭheu.

·        Lot cu Sodom thuṭhennak a nupi in a zoh ruangah a nupi a sungral (Sem. 19:23-26)

·        Noami, Ruth, le Orpah khal an duhdawtmi an pasalpawlin an thih san. An thih dan thu cu ngan a si lo. (Ruth 1:3-5).

·        Mary le Martha khal an unau in an thih san. (John 11:1-21)

·        David khalin a rualpi duhbik Jonathan in a thih san. (II Samuel 1:25-27)

Pathian in minung hrangah vawikhat thih cu a ruat ciami a si ko. Asinan kan duhdawtmi kan sunral tikah tuar a naa ih lung a hno tuk. Zisu khal Lazarus cu ka nung ter sal ding ti thei cia cingin a thlan ah a ṭap ko. Thihnak cu sualman a si, asinan zumtui hrangah nunhram a si.

2. An Duhdawtmipawlin An Phatsan.

·        Hosea cu a nupi rinumlo zetin a phatsan ṭheu. (Hosea 2:1-5)

·        Esau khal a nau Jacob ih bum a tuar. (Sem. 27:1-4)

·        Joseph cu a unaupawlin an phatsan ih sal ah an zuar. (Sem. 37:28-36)

·        Paul khal a rualpipawlin an phatsan. (II Tim. 4:16-17)

·        Zisu khal a dungthluntu Judas in a phatsan. (Mark 14:10-11)

Kan duhdawt ih za ah za kan rinsan hnuah, kan duhdawtmi in in phatsan ih in do lehsal cu minung hrangah tuarharbik thil pakhat a si ve. Asinan kanmah vekin mailai tampi, Bible sungih Pathian mi tampi khalin an rak tuar ve, cule tuarfainak thawn pacang zetin ziangkim an rak pah suak.

3. A Harsa Zetmi le A Siatmi Innsang ih Ṭhanglian.

·        Ishmael cu kum 15 lole 16 a kim tikah, a nu thawn inn ihsin dawisuak an si. A duhdawttu a pa in a umpi lo ih, a nuam zetmi innsang ih ṭhanglianmi a si lo. (Sem. 21:8-21)

A siatmi innsang ih ṭhanlen hi thil diklo a bangih tuar a har hleice. Midang cu nulepai duhdawtnak hnuaiah hlim le nuam zetin an ṭhanglian, thlarau le taksa lam khalah siseh an puitling. A siatmi innsang ih ṭhanglianmi nauhak cu, nun ih bummi tla an bang. Hmansehla Ishmael tla hlawhtlinnak nasa tak a hmu ko.

4. A Harsat Zetmi Natnak An Tuar.

·        Kum 12 thiput nu khal a nat ruangah caan saupi harsa mangbangin a um. (Matt. 9:20-22)

·        Khawsia ih pawlhmi nunau nu cu kum hleiriat sung a ngawr, a el tla a kuun ih dingtein a um thei lo. (Luka 13:10-13)

·        Tili kap ih kum sawm thum le kum riat sung a nimi a um. (John 5:1-9)

5. Nauneih Thawn Pehparin Harsat Buainak An Tuar.

·        Sarah cu nau nei thei lo nucing a si hnu a kum 90 lawngah nau a nei lai. (Sem. 21:1-2)

·        Bathsheba ih fa cu ni 7 a kim ah a thi. (II Samuel 12:18)

Leitlun ah dam le tluangtei nau neih timi cu ziang thawn kan tahṭhim ding. Hmanseh mi tampi cu nau nei thei lo nu cingin siseh, an duhdawtmi an fate in an thih san.

6. Farahnakin An Nun A Nuai.

·        Zarephath nuhmei nu cu farahnak in a nun a cim ih ei ding neih lo ih thih ding hnakin tin sang fate pakhat cu an nufa hrang a timlam. (1 Siang. 17:10-12)

·        Lazarus cu Pathian ih duhdawtmi fa a si ko nan farahnak le damlonak thawn a khat ih ei ding hman nei lawn milian pai rawl ṭil fuan a bawh. Cuvek dinhmun in a hringnun a hmangih ne ta ahcun a thi. (Luke 16:19-22)

Sumpai neih lo hi beidawngnak, thinharnak, le thinnaunak ih hrampi pakhat a si. Tui san khalah sumpai kan hawl, len ka duh, mibang kan duh nan kan tlasia sawn ṭheu. Midang ih hlawhtlinnak lawng hmuh rero timi khal thil awl a si lo.

7. Nupasinak ih Nekrawkmi An Si.

·        Tamar cu a unau-hrek (half brother), Amnon in a duhlo cingin a sualpi. (II Samuel 12:1-14)

·        Bathsheba cu David ih inn ah kawh a siih pasal nei cingin nupa sinak hmanpit a siih a pasal cu ralram ah thah a si. (II Samuel 11:1-4).

Minung kan nunah nupasinak ruangih nekrawk tuar hi thinnat um le ningzah um khal a si. Hman sehla kan mah vek khal Bible sungah tampi an um ve. Thinnau lanta ding le beidawng lanta ding hi Pathian ih in duhmi a si lo. Leitlun thusimthiam hminthang Joyce Meyer khal a mah hringtu a pa rori in vawi 200 leng a sualpi thu a mah in a sim. Asinan tu ah leitlun ih Pathian mihman ropi ah a cang.

8. Diklo Zetin Sual Puh An Si.

·        Saul cun David cu a do ih sualpuhnak phunphun thawn thah tiang a tum. (I Samuel 18:8-30)

·        Siangpahrang Ahab cun cun Elijah cu Israel harsatnak petu a si tin sual a puh, asinan harsatnak thleng tertu ngaingai cu amah Ahab a mah a si. (I Siang. 18:17-18).

Thu ṭha hnakin thusia hi a feh rang tuk. Diklo zetih sualpuh khal hin thinnat a ti luar ih hngir a ti ṭeu tuk ṭheu. A tlun ih kan hmuh vekin ziangkimah dingfel le dik zetih feh hi a thupibikmi pakhat a si.

9. Thi Ṭha Tuah Suak Zuam Rero Laiah Donak le Eltainakpawl An Tuar.

·        Elijah cu thil ṭha tuah suak ding le Pathian duhnak tuah dingih Ahab le Jezebel ih milaipawl a do rero lai ah a nunah riahsiatnak, harsatnak, le beidawnnak in a nun a thlun sawn. (I Siang. 19:1-10)

·        Paul cu Pathian lawng rinsan ih ke a kar rero lai ah pawlkawm tampi cun an do, an hrem, thawng an thlak ih netabikah an that. (II Korin. 11:24-27)

Mipi hrang ruatin, mipa hlawknak ding tuah rero laiah mipi lala in in do, in hrem ih hruaitupawlin thawng in thlak ih in that timi tla cu tuarhar zet pakhat a si. Ziang a si hmanah hlan zumtu pacang ṭhapawlih keneh thlunin a neh tiang tuarsuak tumin, Pathian ih in tiamciammi ruahsannak thawn feh uh si.

10. Neihmi Zaten Sungral.

·        Job cu a falepawlin an thih san thluh, a neihmi thil hmuahhmuah a cem thluh, a harhdamnak a hlo thluh, a rualpipawlin an tlansan thluh, netabikah a nupi rori hman an parah a thin a tawp. (Job 1:13 – 2:9)

Thunetnak

Pathian in harsatnak tuar in siang nan, hleice ih tumtahnak a neih lawngah harsatnak in tuar terih kan harsatnak ihsin in hruai. Pathian cun kan harsatnak tuar thei dingin thazang in pe ih kan harsatnak le beidawnnakah in umpi ringring. Hi harsatnakpawl hmuahhmuah tlunah Pathian cun hlawhtlinnak in tiam.

Himi cahram tawite na siar tikah nangmah lawng har cuang le na cuang vekih na theihmi harsatnak vek a tuartu an um tuk ko ding. A tlunih nganmipawl zoh awla zangfak umza hlir an si ko lo maw? Asinan an thuhla kimcangin zoh awla hlawhtlinnak nasatak nei an si ko. Pathian hmin sunglawi seh! A duh taktak tui hrang ahcun bawmnak le ruahsannak a um ko. Pathian risan awla a thu thlun aw. Pathian in na hrangah thuhmi a nei lo dingih sianlomi khal a nei lo ding.

Hram: E. Allen Griffith ih Victory over Trial & Trouble sungta a remcan danih lehmi a si.