Bawipai Thlacam

Bawipai Thlacam

Matthai 6:9-13

(Minung) – “Vancung ih um kan Pa…”

(Pathian) – Awi!

(Minung) – In hnaihnawk hrih hlah. Thla ka cam lai.

(Pathian) – In kawh si.

(Minung) – In ko e? Ka lo ko lo. Thla ka cam a sisi. “Vancung ih um kan Pa…”

(Pathian) – In ko lala. Awi!

(Minung) - Ziangtin ee?

(Pathian) – In ko. “Vancung ih um kan pa” na ti rero si. Ziangsaw in hai, hinah ka um. Pawihai na nei maw?

(Minung) – Aw, ti pang. Kei cu thla ka cam maimai menna. Thla ka cam tinten Bawipai thlacam hi ka sal ṭheu ii, cule ka um a nuam, ka ni hman a nuamin ka thei ihsi. Ka lo tihrim lo.

(Pathian) – A ṭha ko, asile peh hrih aw he!

(Minung) – “Na Hmin thianghlim seh…”

(Pathian) – Umhrih. Ziang na ti duhsan si?

(Minung) – Ziangmi cu?

(Pathian) – “Na Hmin thianghlim seh na timi kha”?

(Minung) – Asan cu..aaa…asan cu … a ṭha mi riahsiatnak…aaa ka thei lo. Ziangtin 

saw a san cu ka theih dingih? Himi cu thlacam phunkhat a sisi, kahtaphuat ziangsaw a san cu a si rengreng?

(Pathian) – Asancu thianghlim, mangbanza, upatnak a si.

(Minung) – Hey, I ti buai thluh. “Thianghlim” timi cu ka ruah dahmi khal a si lo. “Na uknak thleng hramseh, vancung ih na duhnak a kim bangin leitlun khalah kim ve seh.”

(Pathian) – Khakha na thungai ti?

(Minung) – Thungai pei cu, ziangah maw thungai lo ding?

(Pathian) – Ziangtin saw na ti thei?

(Minung) – Ziang tin saw na ti thei ee?? Zianghman ti hlah. Khatawk ih na thil tuah vekin hitawk khalah ziangkim Nangmah in na kilkhawi, na uk thluh a si ding ka ti men.

(Pathian) – Ka duhnak ah ka lo hruai thei dah maw?

(Minung) – Hruai e. Biakin ka feh si.

(Pathian) – Cucu ka lo suhmi a si lo. Na thintawinak kha teh? Buainak na nei ringring ti na thei si. Na paisa hman daan teh? Cun ziangvek cabu na siar tipawl teh? “Vancung ih duhnak a kim bangin leitlun khalah kim ve seh” na ti ruangah famteh!

(Minung) – Duhtawk aw! Kei khal biakinn ih midangpawl vek thotho in ka ṭha ve ko. Thlacam tla ka ṭheh lohli a ṭul. Ni dang hnakin ka rei tuk cuang. A rei tuk zo. “Nitin nunnak rawl in pe aw”.

(Pathian) – Rawl kha malte na ṭhum deuh a ṭul. Na thau luar tuk ding.

(Minung) – Umhrih, umhrih! Ziang ee na sim? Ka thlacam in sawisel tinak maw? Khristian ka sinakin ka ti kel ka ti ringringmi a si.

(Pathian) – Thlacam hi maw ṭih a nung hokhaw. I ko ih ka lo awi. Tu ahcun lo cawlh ter dingah a tlai zo. Cam hrih he, na pehmi ka rak ngai… (a cawl lawk)

Cam bet hrih awla.

(Minung) – Ka ṭih.

(Pathian) – Ziang maw na ṭih?

(Minung) – Ziangtin I let ding ka thei cia.

(Pathian) - Ṭhaten I hun zoh hnik.

(Minung) – “Midang mawhnak kan ngaithiam bangin kan mai mawhnak in ngaithiam ve aw”.

(Pathian) – Asile “Ente” ih thuhla teh?

(Minung) – Kha si mai…ka thei cia ka timi a dik. A nih ih thuhla na rel ding cu ka thei cia. Ziangah saw Bawipa, a nih cu ka siatnak thu a rel ringring, kan sungkaw ṭhatlonak khal a rel ringring. In bakmi a leiba khal in pe dah lo.

(Pathian) – Asile na thlacammi teh ziangtinak saw?

(Minung) – Ka tumtahmi le tihrim cu a si lo.

(Pathian) – Na huatnak le iksiknak in na thin a lo har ter ringring a si lo sawm? Phubalak timi cu a thlum lo, a kha tuk. Tu zoh awla, khami ruangah na lung a awi thei dah lo. Asinan himi hi ka ti danglam thei.

(Minung) – Ka ti danglam thei e?? Ziangtin?

(Pathian) – Ennte kha ngaithiam awla cule ka lo ngaithiam ve ding. Cule huatnak le sualnak cu na ta a sin awn lo ding, Ennte ih ta a si thlang ding. Cule hahdamten na cawl thei ding.

(Minung) – Aw singai, na dik. Na simmi hi a dik ringring. Lehrulhnak hnakin aaaa…aa…(cawl lawk)…(thawpi)… A si, a tha. Ka ngaithiam. Ka ngai thiam zo, a nun lamtluan ah Nangmah in bawm hramaw Bawipa.

(Pathian) – Mangbang za! Khah! tu ziangtin na um?

(Minung) – Hmmmm. A tawkpam ko, a tha ko. Ka um a zia ngaingai. Asinan cawlh ti le ka nei lo ih ka bang nasa ding, ka cawl thlang men ding e.

(Pathian) – Na thlacam na ṭheh hrih lo pi, peh hrih.

(Minung) – Aw singai, a tha. “Sualfawrhnak in tuar ter loin, siatnak lakah in hum aw”.

(Pathian) – Tha tuk, a tha tuk. Kei mah in ka tuah ding. Asinan thlemtheinak ding hmunah feh lo le thlemthei dingin nangmah le nangmah kha pe-aw hrim lo awla. Na thlacam peh hrih.

(Minung) – “Uknak le huham le sunlawihnak cu  kumkhua in Nangmaita a si”. Amen!

(Pathian) – Ziangmi in sunlawihnak a rak keng ding na thei maw? Ziangmi in ka lung a awi ter ding?

(Minung) – Thei lo, aisnan ka thei duh. Tu ih lo lungawiter khal ka duh. Thil sual tampi ka tuah ti khal ka hmu aw. Asinan na dungthlun duhtu taktak ka si khal ka thei aw.

(Pathian) – Thusuhnak cu nangmah in na sim zo.

(Minung) – Na sim zo ee?

(Pathian) – Si e. Ka lung I awi tertu cu nangmah vek sual phuang aw ih ka hnen ratupawl hi an si. Tui kan pahnih vek hi a si.

(Minung) – Bawipa ka lungawi, Amen!

Source: Inspiration Christian History ih The Lord's Prayer