Setan In Rorelnak Puaipi A Tuah

Setan In Rorelnak Puaipi A Tuah

Setan in leitlun pumpi ih khawse zate sawmin rorelnak puaipi a tuah. An rorel thawknak ih a thusimmi ah, “Khristian-pawl hi biakinn feh lo dingin kan kham thei nawn lo. An Bible siar le thutak theihnak khal kan dodal thei nawn lo. An biak Pathian thawi pawlkawmnak ṭha an neih ringringmi khal kan siat sak thei nawn lo. Zisu thawi pehtlaihnak ṭhate an neih hnuhnu cun kan thiltitheinakpawl an hlo thluh fawn. 

Curuangah a ṭha bik cu an khawmnak biakinn ah kan va feh ve pei ih kan va hnaihnawk pei, an tikcu kan va ruk sak pei, cule Pathian thawi pehtlaihnak ṭha an nei nawn lo ding. An mah rundamtu Zisu thawi an peh tlaihawknak siatbal dingah ziangkhal tuah uh. Cucu tuini ah ka lo cah duhmi le ka lo tuahter duhmi a si” a ti.

Cule an lakih khawsepawlin “ziangtin saw cucu kan ti ding?” tin an au. “Thulolak thilah buai dingin tuah uh. Zisu thawi pehtlaihnak ṭha nei thei lo dingin an ruahnak ti peng tumuh. Khawm lai ih an phone tham duh le tham cak dingin an ruahnak thleng tumuh. An tikcu kha thulolak ih hmangral ding le miih thil sang pe aw rero men dingin thlem uh. An nupipawl kha an hnaṭuan tikcu sau ter uhla, pasalpawl cu zarh khat ni sarih sung, nitin nahzi 10-12 hnaṭuan dingin tuahsak tumuh. Cule an hnaṭuan lawngah an thinlung a um dingih Pathian thawi pehtlaihnak caan an nei lo ding. An falepawl hnenih tikcu pe tam sawn dingin tuah uh, cutin an innsang le hnaṭuan ruangah biakinn an feh nawn lo ding.

Hnaṭuan an feh tikah siseh, khuitawk an feh khalah leitlun hla lawnglawng ngai dingin thlem uhla an fehnak dawr tinkimih TV, VCR, CDS, le Pcs pawlah Pathian thawn pehparnak neilomi hla le zuknung, thuanthu tivek lawnglawng an theihmi siter tumuh. Cumipawl hin an ruahnak a thleng dingih Pathian thawi a pehtlaihnak a siat ter ding. Cabuaipawl cu magazines le thuthangpawl lawnglawngin luah khat seh. Ni khatih nahzi 24 sung cu an ruahnak laksak tumuh.

Khristmas caanah puai lawnglawng ih an thinlung um dingin le Zisui thawhsalni ah Easter bunny (arti, ei-in..tvk) pawlin an thinlung luah khat seh. Cule Zisui suahnak le thihnak thu an ruat tel man lo ding.

Thlarau khawmpi an neih caanah an lakah va tel uhla relsiatawknak, le thikawknakpawl va thlah uh, cule relsiatnak le thikawknak in an nun a ti buai dingih rei an um paih lo ding”.

A thu-tum cu a ṭha tuk lawlaw. Cutin khawse tampi cu an tuah dingmi tuahsuak dingah Christmas a um tinten zumtupawl lakah an telih an hnaṭuan ih buai sawn dingin a suk a so ah an thlem. Cule Pathian hrangah tikcu an nein awn lo. Zisui thiltithei zia le a huhampawl midang hnenih simsuahnak caan khal an nei thei nawn lo. Biakinn sungah pakhat le khat tawkthai aw ding le mai phone thamin an um fawn. Thusuhnak cu hihi a si ding ka zum, Setan cu khawsepawl thawi an rorelnakih thutum cu a hlawhtling tuk a bang. 

Source: Source:http://varietyreading.carlsguides.com/