Tili Pahnih Thuanthu

Tili Pahnih Thuanthu

Tipi li pahnih thuthawn pehparin thuanthu mawi zet a um. Mediterranean timi tipithuanthum kiangah a hminthang zetmi Tipi Thi a um. Tipithuamthum ngai a siloih tilipi sawn a siih nauhakpawl hmanih an theih thluhmi kan Bible sungih Tipi Thi timi kha a si. Himi hi ziangah Tipi Thi tin an ko? Asilole ziangruangah a thi a si pei? Asancu Tipi Thi hi 67 kms sau, 18 kms kau, pii 1237 thuk asinan a kiangkap ah nunnak neimi zianghman an um thei lo. Ziangahtile leitlun ih tipi al bik a siih tipi dang hnakin a let 9 laiin a al sawn.

Ziangruangah hitluk lawmamin a al si pei? Asan cu hi Tipi cu luansuak salnak a neih lo ruangah a si. Jordan tiva cu Tipi thi ah a rung luanglut ih khuitawk hmanah a luangsuak sal nawn lo. Tidai runglutmipawl cu luansuak betnak a um nawn lo ruangah tikhu ah an cangih cumi in a al ter sin. A al tuk ruangah a kiangkapah thingkung le pangpar an ṭha thei lo. Ziangvek ramsa khal rei an um paih fawn lo. Khualtlawng tihalpawlin an hlam dah fawn lo.

Tipi thi ih saklamah Galilee Tipi a um ve. Galilee tipi cu a sau lam peng 13, a kauh lam peng 8 tluk fang a si. Tipi thi thawi ṭhim ahcun te takte a si, asinan a sungah ziangvek hlawnthil a um ti na thei maw? Tidai sungih ummi thilnung tintian a um. A sungah a mal bik nga phun dangdang 20 an um. Hi tili hin a kiangkapih thilnungpawl kum 2000 lenglo a rak sawmdawl rero zo. Mi tampi in pumcawmnak ah an hmangih a kiangkap ah thlaihnah thlairah an ṭha thei zet fawn. Hi tili fate hi ziangah tili tumpi thawn kan ṭhim ti asile a nungmi ti a si ruangah a si. Ziangah a nung? A thuthup cu a tidai hi mi a hlawm. Jordan tiva thotho cu Galilee tili ah a rung luang nan Galilee tili cun a hnen ihsin tidai cu hmundangah a luangsuak ter sal. A hnenih runluangmi tidai cu a hnenah tawpter men loin a luansuak ter sal ruangah a harhdammi tili, a nungmi tili, le hmantlak tili ih a cannnak a si.

Ka ngahmi le kan neihmi thil mi kan hlawm tikah kan neinung sinsin. Kan neihmi thil, kan ngahmi thilpawl peksuahnak umlo ih kan hnen lawnglawngih kan ret asi ahcun midang hrangih eitlak le ṭhathnempitlak umlomi Tipi Thi vek kan si. Mi neinung sinak hi ngah lam lawng a si lo ih peksuah lam thawi a kawpawk lawngah a famkimmi neinunnak a si thei. Kan nun hi midang hrangih ei tlak le bartlak a si thei ding cun Galilee Tili vek kan si a ṭul. Galilee Tili vek na si ding cun na nun kha midang hrangah luangsuak ve aw!

Source: media.radiosai.org sungih Two “See” Differently