Mipa le Nunau hi Pathian Hmaiah An Bangaw Maw?

Mipa le Nunau cu Pathian hmaiah an bangaw ko, Pathian hmuihmel kengih sersiammi an si veve (Sem. 1:27). Nunau le mipa cu sual salih tang veve an siih rundam ṭul an si veve. Cule zangfahnak ih rundami an si veve. “Nunau le mipa karlak khalah siseh, thleidannak a um nawn lo” (Gala. 3:28).

Asinan kan theih ṭulmi cu nunau le mipa ih ṭuanvo hi innsang ah siseh, kawhhran ah siseh, an dang. Pathian in ṭuanvo a pekmi an dangih an sinak man le hmual cu a dang lo. Inn saktupa ih sobul le tlawngkhen a hman dan a dan vekkhi a si. Inn sahnak ah sobul le tlawngkhen cu lo theihlo ih ṭulmi an si. Inn sahnak ah Sobul cu tlawngkhen hnakin a thupi sawn cuang lo ih tlawngkhen khal sobul hnakin a thupi sawn cuang lo, an bang aw. Cuvekin nunau le mipa khal ziangkim a famkim theinak ding sawnih ṭuanvo dangdang kai an si veve, an manneihdan a bang aw.

Nunau cu mipa tlun ih um dingin Pathian in mipa lu ihsin a tuah loih mipa ih hmuhsuam le nautat men dingin mipa ke ihsin khal a tuah lo. Bangrep le covo bangaw ciah dingin, mipa hnakruh ihsin a tuahmi a si. Curuangah nunau cu mipa tlun ih um ding a si lo ih mipa khalin hmuhsuam men ding a si lo. Pathian hmaiah mi bangaw kan si timi theih a thupi. 

Innsang le Kawhhran ah Mipa cu nunau tlunah hruaitu lu a si ding ti ruangah mipa cu Pathian in a ṭan hleice ih Pathian in a bawm cuang tinak a si lo. Cumi ih san ngaingai cu Innsang le Kawhhran ah mipa cu nunau hnakin ṭuanvo tum deuh a nei tinak sawn a si.

Mi tampi in Pathian hmaiah nunau cu niam deuh an si ko ding tin an ruat sual ṭheu. Cucu Pathian thu theih mal ruangah a si men thei. 1 Piter 3:7 in a simmi cu, “Pasalpawl, nan nupi thawn nan umtlang tikah a derdai deuhmi an si ti thei thiam uhla upat uh, ziangahtile nanmah thawn hmun khatah Pathian ih pekmi nunnak laksawng ro cu an co ve ding” a ti. Thlarau lamah bangrep an si, nunnak laksawng ro co tu ding an si veve.

Pathian hmaiah asilole Thlarau lamin nunau le mipa cu an bangrep. Asinan taksa zawng cun an bangaw lo. Asinan mipa khal tlaksamnak le tlinlonak tampi a neih bangin nunau khal tlinnak le thiamnak zawng tampi a nei ve. Cui an tlaksamnak te cu silhkhah-aw-tonin Pathian ram kohnak ding le a Hmin sunlawihnak hrangah lungrualten ṭuan tlang ding kan si.