Internet/Online ih Ṭhatnak le Ṭhatlonak

Internet/Online ih Ṭhatnak le Ṭhatlonak

A Ṭhatnak

1. Internet/Online Hi Zirnak Ṭha Zet A Si

Tui san ahcun Internet Online ihsin ziangkim zir theih a si. Google, Youtube le Facebook in ziangkim na duh mimi na zir thei ding. Mirang ṭong, Hla, Lam, rawlsuan, ṭingṭang tum, hlasah, ramthukhel, sumtuahdan, thuanthu le ziangkimin na umnak khan te sungin nangmah te na zir thluh thei. Google le Youtube in na zir duhmi na hawl dingih a ngah thluh, mirang ṭong thiam na si ahcun a ol sinsin ding. Ziangkim mahte. Tui san kan vanṭhatnak bik cu hlan sanih rak um dah lo Internet/online in ziangkim mahte a zir thluh theih hi a si. Zingzoinak ih an hmuhfiangmi cu Internet/online hmangmi tlawngta 8% cu Internet/online hmanglotu hnakin an tlawng ca an tuah thluh thei ih tlawng ṭheh suak a tam ter.

2. Pursum Leilawnnak

Tulai ah leitlun ram tum pipi siseh, bulpak le pawlkom tampi cu Internet/online ihsin sum la luat an si. Kan laimi lak khalin website le blogspot tivek ihsin sum lalut tampi an um zo. Internet/Online cu mi tampi in thilzuarnak le leiawknak ah an hmang fawn. Thil thehlarnak le ziangkim ah hman a si fawn. Internet/online hi hmanthiam lo cun paisa dawktu a sinan mifim tampi cun sum lakluhnakah an hmang ti kan hngilh lo a ṭha.

3.Pehtlaihawknak

Rualpi thar hawlnak le nupi pasal hawlnak ih remcang, olsam le ṭha zet a si. USA ah 2005 ihsin 2012 lakih neiawmi 35% cu Internet/online ruangih nei aw an si. Harsatnak ton tik khalah bawmdilnak le tlangthannak ih olsam zet a si. Internet/online ruangah leitlun thuthang, kawlram thuthang le Chin thuthangpawl tla olsam zetin kan thei thei. Tufang leitlun ah ziang a cang, kawlram sungah ziang a cang, Chin-mi lakah teh ziangvek thuhla a um ti olsam zetih kan theihthei ruangah thil ṭha zet a si.

4. LungNomnak

Internet/online ah hnihsuak capoh le mai phur zawng thil tampi a um ruangah cupawlin reilote thinnomnak tampi mi a pe thei ve.

A Ṭhatlonak

1. Zongsang Theih A Si

Internet/Online hi zongsang ol zet pakhat a siih zongsang cu thil ṭha lo tak a si. A ṭhatnak te hmangthiamin zongsang lo dingin zuam aw, culo asile na tikcu le na paisa a lo laksak ding.

2. Ruahnak Ṭha Lo A Suahter Thei

Internet ah thil tha lo tampi a um ruangah ahleice in kum kimlo ih hmangpawl hrangah ruahnak sia le thil ṭha lo a suahpi thei, upa ih ralrin thiampi a thupi. Ca ṭha lo, video ṭha lo, nungcang mawi lo, le thil ṭihnung tampi a um ruangah cuvek pawlin kum kimlo asilole Internet/online zongsangpawl ih khawruah tampi a siatsuah thei.

3. Duhdawtnak le Lainatnak A malter thei

Internet/online ruangah rualpi hlun le duhmi hlun le thil dangdang olsam zetih biakawk le hmuhawk sal a theih tikah, innsang le sungkua lamih duhdawt lainatawknak a mal ter thei ih kan thinhengnakpawl tla kan tarlang ṭheu tikah cucu thil ṭha lo zet a si.

4. Ihthah Theilonak a suah pi

Internet/online rei deuh kan hman tikah ihthat theilonak a suah pi, ihthat thei lo cu harhdamnak hrangih thil ṭha lo zet a si. Zaan na ihthat theilonak tamsawn cu Internet/online aislole computer/phone ruangah a si ko ding.

5. Bummi Si A Ol

Internet ihsin company lem tampi in mi bumnak ah an hmang. Ṭhimnakah cumi khami na tuah asile na lian ding, paisa cu zat in kuat awla tivek tampi a um, kan laimi lak khalin tampi bum tuar an um. Duhdawtnak lam khalah nom duhmenah duhdawt ngaingai vekin mi an bia ih ziangkimah bumawknak ih olsam zet a si tikah ralrin ṭul zet a si.

6. Tikcu Hlawn A Si

Zingzoinak ih an hmuhsuahmi cu Internet/online hmangtu 80% cun zianghman tuah kupkap loin an tikcu an hlonral rero ti an thei lo ti a si. Bulpak hlawknak le pawlkom, innsang hlawknak pakhat hman tello in Internet/online ah kan tikcu kan hlawn sual ṭheu.

7. Tisa Cakhiarnak A Suah ter

Tui san ahcun mah umnak khan te ihsin lawngfangkheh zuknung le ziangkim zoh a theih tikah taksa cak hiarnak a suah ter ih thil ṭha lo zet a si. A hleice in kum kimlomi hrangah thil ṭha lo hleice a si.

7. Ca zoh le Siar A Ti Mal

Internet/online ruangah cabu hnakin phone le computer, internet sungih thil ṭukṭak tete in kan ca zoh le ca siar a ti mal thluh. Cucu ṭhansohnak dawnkhamtu a si.

Thunetnak

Zo khalin thatnak le siatnak kan nei, ziangkhalin thatnak le siatnak te an nei. Zu khalin thatnak a neih vekin siatnnak a nei, cuvek thotho in Internet/online khalin thatnak le siatnak a nei ve. Asinan cucu an mahte um ih tha lo le sual an si ciamco lo. A hmangtu ih kan hman sual ruangih sual vekih cang an si. Curuangah a thupimi cu kan mai hrang thathnemnak ummi kan tuah ding kha a siih kan hrang thiltha lomipawl cu tuah lo ding a si. “Curuangah nan ei ah siseh nan in ah siseh, ziangthil nan tuahmi kipah Pathian sunlawihnak hrangah tuah uh” (1 Kor. 10:31).

Source: 

1. http://parentinfo.org/article/9-ways-the-internet-can-be-good-for-your-children

2. http://www.buzzfaze.com/22-reasons-why-the-internet-is-bad-for-you/